Kangaanga Aika Irekereke ma Kaikawaaia Ataei Ni Boong Aikai
E A BWAKANAKO te tai, ngaia are te tia bwaibwai n te tabo n amwarake e nang kaina ana kirabu ma n okira mwengana. Ma a karina naba n roko uoman aine ao te ataei, ao a tuatua kanaia. E ngae ngke e a rangi ni kua te tia bwaibwai ma n tangiria n tuangia bwa e a in ana kirabu, ma e motika nanona bwa e na karekea kanaia. Ngke a tabe n amwarake aine aikai, ao aia ataei e a boni biriaitua i nanon te kirabu, ma ni kamrarai kanana bitiketi i aontano, ao ni manga toubekai. E aki kaeta aron natina te tina, ma e tii moa ngare. Ngke e a bane kanaia ao a a nako, ao te tia bwaibwai are e a rangi ni kua arei, e a manga kaitiaka aontano bwa e rangi ni bareka.
Tao n aron ae ko ataia, te rongorongo aei e kakoauaa bwa e a aki rangi n nakoraoi kataneiaaia ataei irouia aia karo n utu aika bati. A kakaokoro nako bukin rikin aei. Kaaro tabeman a kariaia natiia bwa a na karaoa are a kani karaoia, bwa a taku n aia koaua bwa natiia a riai n anganaki inaaomataia ae bati. E a aki reke naba aia tai kaaro tabeman ibukin tao tabeia ae bati, n tabeakinia natiia ao ni kataneiaia, ae te bwai ae a kainnanoia ataei. Kaaro tabeman a taku bwa te bwai ae kakawaki riki ibukia natiia, bon nakoraoin aia reirei, ngaia are a angania natiia inaaomataia ni bwaai ni kabane ngkana e raoiroi aia bwi ma ni kabwaataki nakon te kuura ae rietata.
Ma iai naba temwangina ake a taku bwa te natannaomata ao kaaro, a riai ni kaeta aia iango ni kaineti ma kaetieti ao aaro ni maiu ake a taku bwa a kakawaki. A taku bwa a irekereke ataei ma mwakuri ni kakeru ao iowawa aika tabe n rikirake ni katoa bong. Ibukin anne, te mataniwi temanna n te kauarinan i Seoul Korea, e katereterea bwa e riai ni moanibwaiaki riki reiakinaia ataei bwa a na katamaroaa riki aroaroni maiuiia. E taku: “E riai moa ni karinaki aroaron te aomata ae raoiroi, ao imwina e kona ni karinaki te atatai.”
A mwaiti kaaro aika tangiriia natiia bwa a na rin n te kuura ae rietata bwa e aonga n nakoraoi maiuiia, ma a baka n aki ongo n taeka ni kauring ake a anganaki. Ngkana te karo ngkoe, ao te aekaki n aomata raa ae ko tangiria bwa e na karikirakea natim? Ko tangiria bwa e na riki bwa te ikawai ae e bwaina te aroaro ni maiu ae riai ao e kona n onimakinaki? Ke ae kaotiota te atataiaomata ma ni kona naba ni bita ana iango ma ana kaantaninga ngkana e riai? Ke ae karaoa ae riai, ao e taraaki bwa te aomata ae kan ibuobuoki? Ngkana ngaia aei ae ko tangiria, ao taiaoka n rinanon te kaongora ae imwin aei.