Titiraki Mairouia Taani Wareware
Bukin tera bwa e taekinaki n te 1 I-Korinto 10:8 bwa 23,000 mwaitiia tibun Iteraera, ake a mate n te bong ae tii teuana kioina ngke a wene ni bure, ao Warekaia Iteraera 25:9, e kaokoro te ware ae kaotaki iai bwa 24,000 mwaitiia?
A a mwaiti bukina ake a kona ni kabwarabwaraki iai kaokoron waare aika kaotaki ni kiibu aika uoua aikai. Ma te kabanea ni bebete ni kaeka iai, e mena te ware ae eti raoi i marenan waare aika 23,000 ao 24,000, mangaia are e a kabwaninaki n te ware ae 24,000, n aki kee ke n raka nakon are boni mwaitina raoi.
Iangoa riki bukina teuana. E taekina rongorongoia tibun Iteraera te abotoro Bauro ake i Titim, bwa te bwai ni kakairi are e na kona ni kauringia iai Kristian ake n te kaawa ae Korinto rimoa, are te kaawa are e rangi n ataaki bwa e kaakaraoaki i aona aaro aika kammaira. E korea ae kangai Bauro: “Ao ti na tai wene ni bure, n ai aroia temangina i buakoia ngke a wene ni bure, ao a mate n te bongina uarebu ma teninga.” Ibukina bwa a kaokoroaki te koraki ake a tiringaki iroun Iehova ibukin karaoan te wene-ni-bure irouia, mangaia are e a anga iai te ware ae 23,000, Bauro.—1 I-Korinto 10:8.
Ma ti tuangaki ni Warekaia Iteraera mwakoro 25 ae kangai: “Ao Iteraera a raona Baara-beore n antinna: ao e ura unin Iehova nakoia Iteraera.” Imwina e a anga ana kaetieti Iehova nakon Mote bwa e na “kabaneia mataniwiia aomata” n tiringiia. Ni kaineti ma anne, ao e anga ana kaetieti Mote nakoia taani motikitaeka bwa a na karaoa nanon are e tua karaoana Iehova. E ienikuri Bineati n tiringa te I-Iteraera temanna are e kaira te aine ae tibun Mirian nako nanon te kaembwa, ao n te tai anne “e toki iai te aoraki are kamamate.” E motikaki te rongorongo n taeka aika kangai: “Ao ake a mate n te aoraki arei uarebu ma anga.”—Warekaia Iteraera 25:1-9.
Te ware are e kaotaki ni Warekaia Iteraera, e oti iai bwa a warekaki naba ibuakon te mwaiti aei “mataniwiia aomata” ake a tiringaki irouia taani motikitaeka, n ikotaki naba ma te koraki ake a tiringaki iroun Iehova. Tao bon teuana te ngaa mwaitiia mataniwi ake a mate i nanoni baia taani motikitaeka n te aro are e a roko iai n te mwaiti ae 24,000. E ngae ngkana tao mataniwi aikai, ke taani kairiri aika wene ni bure aikai, a ira bukamaruan te toa, ke tao a anga te kariaia nakoia ake a karaoi tooa aikai, ma a bon ataia naba bwa a bure kioina ngke a “antina Baara-beore.”
Ni kaineti ma te taeka ae “antina,” e taekinaki n te boki ae kabwarabwaraa te Baibara bwa e “nanonaki iai te itoman ma te aomata temanna.” Bon aomata aika a a tia ni katabui maiuiia tibun Iteraera nakon Iehova, ma ngke a “antina Baara-beore,” ao e a uruaki iai katabuan maiuiia nakon te Atua. E taetae Iehova nakoia tibun Iteraera rinanon te burabeti are Otea, 700 tabun te ririki imwina ni kangai: “A roko i Baara-beore, ao a tabuia i bon i rouia nakon te baere kamaamaaean te aba, ao a riki n aika riai ni bati n ribaki n ai aron are a tangiria.” (Otea 9:10) A bon riai n anganaki ana kaeti-taeka te Atua ae matoatoa te koraki ni kabane ake a karaoi baikai. Ma e ngae n anne, e kauringia natiia kaain Iteraera aika mwaane Mote ni kangai: “A a tia matami n nora are E karaoia Iehova ibukini Baara-beore: ba aomata ni kabaneia ake a ira nanoni Baara-beore, E kamaunaia Iehova ae Atuam mai buakomi.”—Te Tua-Kaua 4:3.