Bukin Tera bwa A Aki Toki ni Kawariko Ana tia Kakoaua Iehova?

E A TAONAABA ataakin aroia Ana tia Kakoaua Iehova ni botumwaaka n aia mwakuri ni minita ni kawari auti nako. A mimi tabeman bwa bukin tera ngkai a aki toki ni kakawaraki irouia Ana tia Kakoaua Iehova, ao riki ngkana a a tia ni kaota tii teutana te nano ni kan ongora nakon aia rongorongo taani Kakoaua. A ibuobuoki ni kabwarabwaraa bukin anne, reeta aika uoua mai Rutia.

E taku te ataeinnaine ae 19 ana ririki ae kaain Khabarovsk, ae arana Nei Masha: “N na kaota raoi ae koaua, bwa n taai ake ngkoa ao I aki toki ni kakaaea te anga are N na tuanako iai ma Ana tia Kakoaua Iehova.” Ma, e bitaki aroarona imwin warekan tabeua katoton te maekatin are e boretiaki irouia taani Kakoaua. E korea ae kangai Nei Masha: “A rangi ni kakannongora ao ni kaunganano rongorongo ake I a tia ni wareki n te maekatin, ma te bwai ae rangi ni kakawaki riki, bwa rongorongo ake iai a bita aron am taratara ni kaineti ma te aonnaba. I a moanna n ota bwa bukin tera ngkai iai manenan maiuia aomata.”

E korea ae kangai Nei Svetlana man te kaawa ae Ussuriysk, ae tao nimabwi te maire raroana i meangin Vladivostok: “I a tibwa moana warekan Te Taua-n-Tantani ao te Awake! A rangi ni kainnanoaki maekatin aikai n ara bong aikai. E kakukurei irou warekan taiani kaongora aika i nanoia ni kabane. A rangi ni kakannongora, a manena, ao a kaunganano. Kam rabwa! Kam rangi ni bati n rabwa ngkai kam mena n te aonnaba aei, ao ibukin naba karaoan te mwakuri n akoi ao te mwakuri ae rangi ni kainnanoaki.”

A maiuakina raoi ana titiraki te abotoro Bauro ae kamwakura te iango Ana tia Kakoaua Iehova ni katobibia te aonnaba ae kangai: “Ao a na iranna n ongo [aomata] ngkana akea te tia taekinna?” (I-Rom 10:14) Bukin tera bwa ko aki karekea tabeua te miniti n ongora n te tai are a a manga kawariko naba iai taani Kakoaua? Ko kona naba ni kakukureiko n te rongorongo ae karaunano, ae kuneaki n ana Taeka te Atua ae te Baibara.