“Kaania Te Atua, Ao Ane E Na Kaaningkami”

Imwaina Ao Imwina—Aron te Baibara n Onea Maiun te Mwaane Temanna

E RANGI ni mamate nanon teuae Rolf-Michael n te katangitang, ma e rotaki naba ana iango teuaei n tangiran bwaai aika kamanging. E kabatiaa te moi manging ngke te roro-n-rikirake ngaia i Tiaman, ao e aki taua baangina ni kaineti ma kabonganan aeka ni kamanging riki tabeua aika korakora, aika rota buaka te iango.

I nanon ana tai teuae Rolf-Michael n uouotii bwaai ni kamanging aikai nakon te aono n Aberika ni karabai, e a kuneaki iai ao e a kabureaki i nanon te maan ae 13 te namwakaina. I nanoni karabutinakina, e a reke ana tai iai n iangoia bwa tera raoi manenan te maiu.

A kabanea korakoraia Rolf-Michael ma buuna ae Nei Ursula, ni kakaaea manenan te maiu, n aroia n ukoukora te koaua. N aki ongei rongorongo aika kabwaranano man Aaro aika atongaki bwa aongkoa Kristian, ma bon iai te ingaingannano ae korakora irouia te taanga aei ni kan ataa te Atua. A bati aia titiraki, ma a aki kona ni kaekaaki raoi man botaki n Aro aika kakaokoro nako. Irarikin naba anne, e aki rangi ni korakora te kaumaki man Aaro aikai ibukin bitakin aron maiuiia te taanga aei.

Ma n te tai teuana, ao a a kaitiboo Rolf-Michael ao Nei Ursula ma Ana tia Kakoaua Iehova. Imwin moanakin ana reirei Rolf-Michael n te Baibara, ao e a korakora riingan nanona n te kaungaunga ae: “Kaania te Atua, ao ane E na kaaningkami.” (Iakobo 4:8) E motika nanona teuaei bwa e nang ‘kitana te aomata nikawai are arona ni maeka ngkoa, ao e nang karina te aomata nabangkai are karaoaki bwa aron te Atua n te raoiroi ao n te itiaki are riki man te koaua.’​—I-Ebeto 4:22-​24.

E na kanga ni karina te aomata nabangkai Rolf-Michael? E kaotaki nakoina man te Baibara bwa tii man “te atatai” ao e a tibwa kona ngkanne ni “karina te aomata nabangkai, are e a manga karaoaki . . . n ai aron Teuare karaoia,” ae taekan Iehova ae te Atua.​—I-Korote 3:9-​11.

Ao imwin reken te atatai ae eti iroun Rolf-Michael, e a ukoukora ngkanne arona ni kaboraoa maiuna ma reirei aika mena n ana Taeka te Atua. (Ioane 17:3) E bon rangi ni kangaanga katokan tangiran bwaai aika kamanging, ma e noria Rolf-Michael bwa iai kakawakin kawaran Iehova n te tataro, ao e reke buokana mai iai. (1 Ioane 5:14, 15) E reke naba buokana man te iraorao ae kaan ma Ana tia Kakoaua Iehova, ake a kekeiaki mwaaka ni kaakaraoa nanon te Atua.

E reke naba buokan Rolf-Michael man ataakin ae e a tabe ngkai ni mauna nako bwaikorakin te aonnaba aei, ma a na tiku ni maiu n aki toki, te koraki ake a kaakaraoa nanon te Atua. E buokia n rinea ae e na aki tangira bwaikorakin te aonnaba aei, kioina ngkai bon te bwai ae kai mauna, ma e na tangira te kakabwaia are te maiu n aki toki are e na reke man te iraorao ae kaan ma te Atua ae tatangira, ae Iehova. (1 Ioane 2:15-​17) E korakora naba anaakin nanon Rolf-Michael man taeka aika taekinaki n Taeka N Rabakau 27:11 aika kangai: “Natiu, ko na wanawana, ao kakukureia nanou, ba I aonga ni kaeka ane kakanikoai.” E taekina ae kangai Rolf Michael ma kukurein nanona: “E kaotaki raoi n te kibu aei, bwa e nano ana tangira Iehova kioina ngkai e angania aomata nako aia tai bwa a na kakukureia nanona.”

Bubua ma bubua ngaa n aomata aika a a tia ni kakabwaiaki n aron naba Rolf-Michael ma buuna ao natina aika teniman, man irirakin ana reirei te Baibara. A kona n noraki aeka n aomata aikai n ana ekaretia nako Ana tia Kakoaua Iehova ni katobibia te aonnaba. Ma te kananokawaki, bwa n aaba tabeua ao a kabuakakaki taani Kakoaua n te aro ae kewe bwa te katei n Aro ae karuanikai ae e aki toki n urui utu nako. Ma a kaota kewen te kabuakaka aei, bwaai aika riki nakon Rolf-Michael.​—Ebera 4:12.

E taekinna Rolf-Michael bwa Mataio 6:33, are e kaungaira bwa ti na karimoai bwaai n taamnei, boni ngaia naba are e kairiia kaain ana utu bwa a na kamanenai raoi maiuia. E a bon rangi ni kukurei teuaei ma ana utu iroun Iehova, kioina ngkai e a tia n reke irouia te maiu n utu ae kakukurei, ngkai a a riki bwa Kristian ngaiia. A kakoauaa ana kaantaninga te tia areru ngke e anene ni kangai: “Tera ae N na manga angan Iehova ba boon ana akoi ni kabane nako iu?”​—Taian Areru 116:12.

[Kabwarabwaraan n iteraniba 31]

A anganaki aomata aia tai iroun te Atua bwa a na kakukureia nanona

[Te bwaoki n te iteraniba 31]

Ana Reirei te Baibara Aika Uaana

Aikai tabeua mai buakon reirei man te Baibara ake a a tia ni buokiia aomata aika mwaiti n tokanikai i aon tangiran bwaai ni kamanging aika kamamate:

“Ngkami akana kam tangira Iehova, kam na riba te buakaka.” (Taian Areru 97:10) Imwin kakoauan raoi buakakan mwakuri aika kamamate, ao karikirakean ribaakin aaro aikai, e a tibwa kona ngkanne ni bebete iroun te aomata bwa e na karaoi mwakuri aika a na kakukureia te Atua.

“Ko na nakonako ma aomata aika rabakau, ao ko na rabakau iai: ma e na maraki te aomata ngkana e raonia akana nanobaba.” (Taeka N Rabakau 13:20) E riai n rineia raoraona n te aro ae wanawana, te aomata ae tangiria bwa e na tokanikai i aon tangiran bwaai aika kamanging ao bwaai riki tabeua aika korakora tangiraia irouna. E na korakora boutokana bwa e na ribai bwaai ni kamanging aikai, ngkana e karikirakea ana iraorao ma Kristian.

“Kam na tai iangoa te bwai teuana n raraomaeakinna; ma a na kaotaki ami bubuti nakon te Atua ni bwaai ni kabane, n te tataro ma te bubuti ma te katituaraoi. Ao te rau are mairoun te Atua, are te rau are aki konaki n ataki teutana, e na kawakin nanomi ao aia iango nanomi i nanoni Kristo Iesu.” (I-Biribi 4:6, 7) E bon aki kona ni karekeaki te raunnano aei n te bwai riki teuana. Ao e na boni buokaki te aomata ni kaaitarai ana kangaanga aika akea angan katokaia, ni kaineti ma bwaai aika kamanging ngkana e onimakina te Atua rinanon te tataro.