Te Viteo Teibi ae Katauraoaki bwa E na Riing Nanoia Rooro-n-rikirake

A mwaiti rooro-n-rikirake aika kaungaki nanoia bwa a na tirotiroi raoi aroaroia ngke a mataku n te viteo teibi ae Young People Ask​—How Can I Make Real Friends?a Iai i nanon te viteo teibi aei reirei aika manena man te Baibara, aia bwaebwaeti rooro-n-rikirake aika Kristian ao te kaotioti ae kaunganano ae boto i aon karakinan Nei Rina man te Baibara. (Karikani Bwaai, mwakoro 34) A roko bwaebwaeti ibukin te viteo teibi aikai mai Mexico.

E kaota nanona Nei Martha man taku: “E rangi n riingaki nanou n te viteo teibi aei. Titeboo ma e boni katauraoaki ibukiu. I taku ngai n au iango bwa e a bon tau naba ae I ataaki irouia au tia reirei ao raou n reirei ae Ana Tia Kakoaua Iehova ngai. I kabwaka ni kaota kakoauan aei n taekina te rongorongo ae raoiroi nakoia. I rangi ni kakaitau ibukin rongorongo ni kabane ake e a tia ni katauraoi Iehova, ao riki ngkai e rangi ni korakora riingakin nanora man te viteo teibi aei.”

E taku Juan Carlos: “E boni kammwakura raoi am iango te viteo teibi aei. Ngkai bon te roro-n-rikirake ngai, I a tia naba ni karaoi kairua tabeua ake I a atai ngkai bureia imwin norakin aroaro aika kaotaki n te kaotioti aei. I maiuna te maiu ae kiriuoua tabeua te ririki n nako, ma I a ataia ngkai bwa e kona ni kariki uaana aika buakaka nakoiu te aeka ni maiu aei. I a kaungaki imwin matakuu n te viteo teibi aei, bwa N na riai ni kakaonimaki nakon Iehova ma nanou ni koaua.”

E kaota nanokawakina Nei Sulem ni kangai: “Ngke I mataku n te viteo teibi aei, ao e bon rotai te uringaaba, kioina ngkai I a aki wawareware n te Baibara, ao I a aki bati n tatataro nakon Iehova. Ma, ngke I a kakauongo nakon aia kakarabakau rooro-n-rikirake n te viteo teibi aei, ao I a kaungaki iai bwa N na manga moana au reirei n te Baibara ao n tatataro naba nakon Iehova.”

A kaaitara ma kataaki rooro-n-rikirake ni boong aikai ao aroia n rineia raoraoia, e na bon rota aroaron maiuiia. (Taian Areru 26:4; Taeka N Rabakau 13:20) E buokiia ataei aika mwaiti te viteo teibi ae Young People Ask​—How Can I Make Real Friends? bwa a na karaoi motinnano aika raraoi.

[Kabwarabwara ae nano]