E Na Bon Toki Te Maiu Ni Kainnano?

“NORIA, rannimataia aika karawawataki, ao akea te tia kabebetei nanoia i rouia; ao iai te korakora irouia ake a karawawataia, ma akea naba te tia kabebetei nanoia i rouia,” e taekina anne Uean Iteraera ngkoa are Toromon. (Te Minita 4:1) Bon akea te nanououa bwa a mwaiti naba aomata aika maiu ni kainnano mai buakoia te koraki ake e taekinia Toromon bwa a karawawataki.

E aki tii kaineti te maiu ni kainnano ma akean te mwane. N aron ae e oti n te ribooti are katauraoaki ni Bangken te Aonnaba n Tun 2002, ao “e oti iai bwa e a tia ni katautauaki bwa n 1998, ao 1.2 te birion mwaitiia aomata ni katobibia te aonnaba aika a kabongana te mwaiti ni mwane ae kee i aan $1 ni katoa bong . . . ao 2.8 te birion aika maiu n te mwaiti ae e aki raka i aon $2 ni katoa bong.” E kaotaki bwa e ngae ngke e a uarereke riki mwaitiia aomata aika oti taekaia ikai nakon are kaantaningaki mai mwaina, ma e “bon rangi ni bubura te mwaiti aei, ngkai a bati aomata aika karawawataki.”

E na bon toki te maiu ni kainnano? E tuangia taan rimwina Iesu Kristo ni kangai: “Ba a bon aki toki ni memena i roumi aomata aika aki kaubwai.” (Ioane 12:8) Ma e nanonaki ikai bwa e na teimatoa ni waaki nako te maiu ni kainnano ma iriana aika karawawata? E na bon aki, bwa e ngae ngke e aki berita Iesu nakoia taan rimwina ni kabane bwa a na kaubwai, ma ti aki riai n iangoia man ana taeka akanne bwa e na akea te kaantaninga ibukia te koraki aika maiu ni kainnano.

E ngae ngke e aki kokoro bukin aia iango aomata n ikotaki ma rongorongo ake a beritana tokin te maiu ni kainnano, ma e kakoauaa nakoira ana Taeka te Atua ae te Baibara, bwa e na waekoa n roko te tai are a nang akea iai aomata aika kainnano. E tataekina “te euangkerio nakoia akana aki kaubwai” Iesu. (Ruka 4:18) Te euangkerio aei e beritana naba kamaunan te maiu ni kainnano. E na riki aei ngkana e a karokoa te maiu ae kakukurei ana Tautaeka n Uea te Atua i aon te aba.

Ai kaokoro ra te aonnaba n te tai anne! Ueani karawa are Iesu Kristo, e na “nanoangaiia akana mamara ma akana a kai nanoia, ao E na kamaiu tamneiia akana a kai nanoia.” Ni koauana, “e na kamaiu tamneiia man te babakanikawai ma te tiritiri.”​—Taian Areru 72:13,14.

E taku Mika 4: 4 ni kaineti ma te tai anne: “A na tekateka, temanna i aan ana kurebe ma ana biku, ao temanna i aan ana kurebe ma ana biku; ao akea ae na kamakuia: ba e atongnga win Iehova Tabaota.” Ana Tautaeka n Uea te Atua, e na katoki kangaanga nako ake a rotaki iai aomata, ao e na kamauna naba te aoraki ao te mate.

E “oongaki te mate [iroun te Atua] n aki toki; ao E na kaoi rannimata te Uea ae Iehova mani maata ni bane.”​—Itaia 25:8.

Ko kona n onimakin berita aikai ibukina bwa a kairaki koreaia iroun te Atua. Bukin tera bwa ko aki neneri rongorongo aika a kakoauaa bwa a kona n onimakinaki ana taetae ni burabeti nako te Baibara?

[Picture Credit Line n iteraniba 32]

FAO photo/M. Marzot