Te Bong ae Riai n Uringaki ae Rangi ni Kakawaki
BON te bong ae a bitaki iai aroia aomata n te aro ae a kona ni manga karekea te maiu n aki toki. Akea te bong teuana ma rimoa are e a tia ni kona ni karekea te bitaki ae korakora riki nakon anne. Bon te bong are e a tia ni katiai mwiokoana i aon te aba iai Iesu. E tine i aon te kai are e bobitiaki i aona ngke e anaa kabanean ikena ao e kangai: “E a tia.” (Ioane 19:30) Tera bukin rokon Iesu?
E koreaki n te Baibara ae kangai: “Aron naba Natin te aomata, ae e aki roko ba e na karekeia ana tabonibai, ma e roko ba e na tabonibai, ao e na anga maiuna i bukini kamaiuaia te koraki.” (Mataio 20:28, BK) E anga maiuna Iesu bwa a aonga ni kainaaomataki aomata man te bure are a ituaki iai, ao te mate. E koaua bwa, “E tangiriia aomata te Atua n te aro are E anga Natina ae te rikitemanna iai, ba e aonga n aki mate ane onimakinna, ma e na reke i rouna te maiu are aki toki.” (Ioane 3:16) Ai kakawaki ra ana karea Iesu!
Iai riki bukina teuana ae e riai n ururingaki maten Iesu iai. E reireinia ana abotoro Natin te Atua n te bong naba anne, n reirei aika kakawaki are a kona ni buokia bwa a na teimatoa ni kakaonimaki iai. Ai rotaki ra nanoia taan rimwin Kristo n taeka ake e atong imwain raoi matena! Baikara ana reirei iai? Ti na kanga ngaira ni kona ni kakabwaiaki man bwaai ake e reireinia Iesu iai? A na maroroakinaki titiraki aikai n te kaongora are imwina.