Bukin Tera bwa E Kangaanga Te Kabwarabure?
N TURAI 2000 i California n te United States, te Boowi ni Katei Tua, e kabwaata te tua teuana ae e kona ni kainaaomataia aomata man katuuaeakia ngkana a nanoangaa te aomata are ikoaki man te kabuanibwai are a uaia n irekereke iai. Bukin tera bwa e kabwaataki te tua aei? E taekinaki bwa ngkana iai te aomata ae ikoaki ke te bwai ae uruaki imwin te kabuanibwai, ao a aki toki aomata n tabwarabwara ni kabwaraa aia bure, bwa a maaka are e na taraaki aia kabwarabure anne i matan te boowi bwa kaotaraean ae a boni kairua. N te itera teuana, te koraki ake a namakinna bwa e riai te waekoa ni kabwarabure nakoia, a kona ni manga un iai, ao n te aro anne e na kona n riki te kauntaeka ae bubura man te kabuanibwai ae uarereke.
Ni koauana, e aki riai bwa ko na kabwara bure ibukin te kabuanibwai ae ko aki karikia. Ao n taai tabetai ko wanawana riki ngkana ko iangoa te bwai are ko na taekinna, bwa e taku te taeka n rabakau rimoa: “E kakai bure te aomata ae e bati n taetae; e wanawana ane e kainababu.” (Taeka N Rabakau 10:19, BK; 27:12) Ma e ngae n anne, ko kona ni kaotiota te atataiaomata ao te ibuobuoki.
Tiaki te koaua ngkanne bwa a mwaiti aomata aika a a tia ni katoka aroia ni kakabwarabure, e ngae ngkana akea ae kabaea tangina ibukin te kabuanibwai are riki? E kona ni bwaebwaeti te buu-te-aine ni kangai, ‘E aki kaakabwaraa ana bure kaainnabau ngkana e kairua.’ E kona n taekina aei te mataniwi n te tabo ni mwakuri, ‘A aki kona au taani mwakuri ni kariaia aia kairua, ao e kangaanga naba irouia atongan ae, kabwaraa au bure.’ A kona n ribootina aei taan reirei n taiani kuura, ‘A bon aki kataneiaki ataei bwa a na taekina ae kangai, kabwaraa au bure.’
Bukina teuana ngkai e tabwarabwara te aomata ni kabwaraa ana bure, bwa e kona ni maaka katinanikuana. Ibukin maakan are e na aki kabwaraaki ana bure, ao e kona n aki kaota raoi aron ana namakin iai. Ni koauana, te aomata are e karaoaki te bure nakoina, e kona n rawa ni kabwaraa ana bure te tia bure, n te aro are e a kangaanga riki iai reken te raoi.
Bukina naba teuana, bwa a aki mutiakina aia namakin aomata tabemwaang. A kona n taku, ‘E aki kona te kabwarabure ni kamaunaa te kairua ae bubura ae I a tia ni karaoia.’ Iai naba ake e a kangaanga irouia kabwaraan aia bure, ibukina a maaka te bwai ae e na riki imwina. A kona n iangoa aei: ‘N na reke n te bure ao n tuangaki bwa N na kabwakaa te kaboomwi?’ Ma n angiin te tai te bwai ae tuuka kariaiakan te kairua bon te nanorieta. Te aomata are e rangi n nanorieta n rawa n taekina ae “Kabwaraa au bure,” e kona ni kangai, ‘I aki kani kariaia au kairua bwa mwina I kamaamaeaki i mataia aomata ao e na mangori iai taekau.
N aki ongeia bwa baikara aroaroia aomata iai, ma e mwaiti ae kangaanga irouia te kabwarabure. Ma e bon riai te kabwarabure? Baikara kakabwaia aika reke mai iai?
[Taamnei n iteraniba 3]
“A bon aki kataneiaki ataei bwa a na taekina ae kangai, kabwaraa au bure”
[Taamnei n iteraniba 3]
“A aki kona au taani mwakuri ni kariaia aia kairua”
[Taamnei n iteraniba 3]
“E aki kaakabwaraa ana bure kaainnabau”