Aia Ribooti Taan Ua Rongorongo Ibukin Te Tautaeka N Uea
Te Metera Ibukin Kaniwangan te Mwaneaba n Uea
TE Botaki ibukin te Otabwanin i Finland, e rinea te ririki ae 2000 bwa te “Ririki Ibukin Katamaroan Aon te Aba.” E taekinna temanna mai buakoia taani babaire bwa te kaantaninga ae aana “te boto n iango ibukin te ririki anne bon kauringaara, ngaira ni kabane ae aroka nako aika maiureirei aika a otabwaninira aikai, a manena nakon maiura ao ibukin kateimatoan naba marurungira.”
N Tianuare 12 2001, e roko te reta n aia aobiti n tararua Ana Tia Kakoaua Iehova i Finland, man te botaki ibukin te Finnish Association of Landscaping Industries. I nanon te reta aei, e kabwarabwaraki iai bwa e reke kaniwangan aia Mwaneaba n Uea Ana Tia Kakoaua Iehova i Tikkurila, teuana mai buakon metera, ake kaniwanga ibukin te ririki ni katamaroa i aon te aba, ibukina bwa e noraki rianakon tamaroan rarikina ao itiakin ma kantaran ana oo-n-aroka. E taekinaki naba n te reta aei bwa n tain te mwaitorotoro ao te kabuebue, “taraan te aba ni kabane are i rarikin te Mwaneaba n Uea, e bon rangi ni kamaiumata, ao e kanikan.”
A anganaki kaniwangaia aei Ana Tia Kakoaua Iehova n te Rosendahl Hotel i Tampere, Finland, n te botaki teuana ae kaainaki irouia bwakuaku ma taan bitineti aika 400 mwaitiia. E kanakoa naba ana rongorongo te Finnish Association of Landscape Industries nakon te botaki ni kanako-rongorongo ae kangai: “Ni kaawa aika kakaokoro i aon te aba aei, ao angiin aia Mwaneaba n Uea Ana Tia Kakoaua Iehova, a bon rangi n tamaroa taraakia. Tararuakin raoi rarikina ni katobibia, e katika mataia aomata ngkana a rirarikina. Teuana mai buakon te katoto iai, bon te Mwaneaba n Uea are i Tikkurila ma ana oo-n-aroka ae rangi n rianako tamaroana. Aron tein te kateitei ao te aba ni katobibia rarikina, a taraa n rau ao n aki tabeitera naba.”
I Finland iai Mwaneaba n Uea aika 233 mwaitiia, ao a mwaiti mai buakoia aika otabwaniniaki n oo-n-aroka aika tikiraoi. Ma taabo aikai a tikiraoi ni koaua, ibukina bwa bon taabo are e waakinaki iai te taromauri ni koaua ao te reirei man te Baibara. Ana Tia Kakoaua Iehova ni katobibia te aonnaba, are e raka i aon onoua te mirion mwaitiia ngkai, a iaiangoa aia Mwaneaba n Uea ae kateaki raoi ke ae bon tau tamaroana, bwa taabo aika rangi n taatangiraki irouia. Bon aio bukina are a ingainga iai nanoia, ni kani mwakuri korakora ibukin katamaroaan aia tabo aikai. A teimatoa n uki mataroan nako te Mwaneaba n Uea, nakoia aomata ni kabane n am kaawa!