Ti Riai n Ataia bwa Antai te Atua
E AKI anaaki nanom n nora karawa ae a kirimtoo iai itoi n te tairiki? Ko aki kukurei n aroki boin uee aika boiarara ma ni kakaokoro mataia? Ko aki kukurei n ongo tangitangia mannikiba ao mwakaikain baani kaai ngkana e karekareiia te ang? Ao ai kamimi ra iangoaia kuua aika korakora ao manin taari ni kabane! Ao ai manga aomata aika karikaki ma mataniwin nanoia ao kaburoroia ae rangi ni kamimi arona. Ko na kanga ngkoe ni kabwarabwarai aron rikin bwaai ni kabane aika kamimi aika otabwaninira?
A kakoauaa tabeman bwa a manennanti rikin bwaai aikai ni kabane. Ma ngkana ngaia anne, ao bukin tera bwa aomata, a kona n tangiri bwaai n taamnei ao a kakoauaa naba te Atua?
“E a kamani mena tangiran te Aro i nanoia aomata ao e noraki aei i rouia aomata ni kabane aika kaubwai ma aika aki-kaubwai, ao aika bubura ma ake a uarereke aia reirei.” Taeka aikai, a kabwarabwaraa raoi mwin ana ukeuke Professor Alister Hardy, are e koreaki n ana boki ae The Spiritual Nature of Man. I mwin ukeuke tabeua i aon te kaburoro, taan rabakau tabeman a taekinna bwa tao e karinaki i nanoia aomata tangiran te Aro. E oti ae kangai n te boki ae atuna Is God the Only Reality?: “Kakaaean manenan te maiu rinanon te Aro . . . e waakinaki irouia natannaomata ni kabane, man moan rikia aomata ni karokoa ngkai.”
Iangoa are e taekinna te aomata ae wanawana temanna, 2,000 te ririki n nako. E korea ae kangai: “A bane baata ni kateaki irouia aomata; ao ane katei bwaai ni kabane bon te Atua.” (Ebera 3:4) Ao e taekinaki naba ae kangai ni moani kibun te Baibara: “Ngke a tuai ni karikaki bwaai, ao E karika karawa ma aonaba te Atua.”—Karikani Bwaai 1:1.
Ma antai raoi te Atua? A bobuaka aia iango botannaomata ni kaineti ma te titiraki aei. Ngke e titirakinaki te roro-n-rikirake ae te I-Tiaban, ae arana Yoshi bwa antai te Atua, ao e kaeka ni kangai: “I aki koaua raoi iai. Boni kaain te Aro ae te Buddhist ngai, ao e aki rangi ni kakawaki irou ataakin ae antai te Atua.” E kaotia naba Yoshi bwa a mwaiti aomata aika a arana Buddha bwa te Atua. Nick, ae te tia bitineti ae ai 60 ana ririki, e kakoauaa te Atua ao e iangoia bwa kaanga te mwaaka ae korakora. Ngke e tuangaki bwa e na kabwarabwaraa ana atatai ibukin te Atua, ao e aki waekoa ni kaeka Nick, ma e a tibwa kaeka imwin tabeua te tai man taku: “Ai kangaanga ra kaekaan te titiraki anne irou. I tii ataia bwa bon iai te Atua.”
Tabeman aomata “a taromauri baika a karikaki iroun te Atua, ao tiaki te tia Karikiriki.” (I-Rom 1:25, Today’s English Version) Mirion ma mirion mwaitiia aomata a taromauria aia bakatibu ake a a tia ni mate, ao a kakoauaa bwa e rangi n raroa nako te Atua mairouia. A mwaiti atua aika mwaane ao aine n te Aro n Hindu. A tataromauriaki tabeman riki atua n aroia Tiati ao Ereme irouia aomata, n aia tai ana abotoro Iesu Kristo. (Mwakuri 14:11, 12, BK) A mwaiti Aaro ni Krititentom aika reirei bwa te Atua bon te Temanna–n–teniman, ae kaainaki iroun te Atua te Tama, te Atua te Nati, ao te Atua te Taamnei ae Raoiroi.
E koaua ana taeka te Baibara bwa ‘a maiti atua ao uea.’ Ma e ngae n anne, e a manga taekina naba ae kangai: “Iroura ngaira bon ti temanna te Atua, ae te Tama, are e kariki bai ni kabane.” (1 I-Korinto 8:5, 6, BK) Eng, bon tii temanna te Atua ae koaua. Ma antai ngaia? Aekakira aroarona? E kakawaki iroura bwa ti na atai kaekaan titiraki aikai. E taekinna naba Iesu n ana tataro nakon te Atua aei, ae kangai: “Aio te maiu are aki toki, te ataiko ae te Atua ae ti temanna ae koaua, ao Iesu Kristo, ae Ko kanakomaia.” (Ioane 17:3) Bon iai bukina ae ti riai ni kakoauaa bwa maiura n aki toki, e boto i aon ataakin te koaua ibukin te Atua.