Kaaro Kakoroa Raoi Tabemi Ibukia Natimi!

ATAEI a kainnanoa te kairiri ao te reirei ni kaetieti ae irianaki ma te tangira, ao riki, mairouia aia karo. Ni kaineti ma aei, te tia reirei temanna i Brazil ae arana Tania Zagury, e taekinna ni kangai: “Bon aroia ataei ni kabane te nanona moa kakaaean te kukurei. E riai n tiatianaki aroaroia anne. Bon tabeia kaaro karaoan aei, ao ngkana a aki karaoia, a na rikirake n aki kona n tauaki aroia ataei.”

Ma e kona ni kangaanga irakin nanon te reirei aei n aaba aika e bebete te kairiri iai ao e moanibwaiaki irouia aomata inaaomataia ni karaoa oin nanoia. Ao mai iia ngkanne, are a kona ni karekea buokaia iai kaaro? Kaaro aika a maaka te Atua a ataia ae natia “boni bwaai n akoi mairoun Iehova.” (Taian Areru 127:3) Mangaia are a ukeuke n ana Taeka te Atua ibukin kairakia ni kaineti ma kaikawaakiia natia. N aron anne, e kangai Taeka N Rabakau 13:24: “Ane kararoa ana kai ni kataere ao kaanga e riba natina: Ma ane tangiria ao e botumwaka ni kataerea.”

N te Baibara, te kibu n taeka ae “kai ni kataere,” e aki tii nanonaki iai te oreaki; ma e kona n tei ibukin aaro ni kaetieti n aekakia nako. Irouia ataei tabeman, n taai aika mwaiti e tii kainnanoaki kataetaeakiia ibukin kaetan aroia ae buakaka. E kangai Taeka N Rabakau 29:17, (BK): “Kakataerea natim ao e na rau arom, ao ko na bati ni kabaia irouna.”

Ataei a kainnanoa te reirei ni kaetieti ae irianaki ma te tangira bwa a aonga ni kona ni kamaunaki aroaroia aika bubuaka. Te kaetieti ae tau matoana ae e karaoaki ma te akoi, e kaota tangiran te tei iroun te karo. (Taeka N Rabakau 22:6) A na unga nanomi kaaro! Ngkana kam ira te reirei man te Baibara ae manena ao e aki kona ni kairua, kam na kakukureia nanon Iehova ae te Atua, ma ni karekea naba karineakimi irouia natimi.