Iai Te Kamaiu Ae E Na Roko?
E rangi n ataaki te ka 20 n tienture, bwa boni ngaia ae e rangi ni korakora iai karaoan mwakuri ni katuturaraa. E a taabangaki ngkai i nanon ae tao irabwi te ririki kakaraoan riaoan te tua, te buaka, te kairiribai i marenaia reeti n aomata, kabatiani kabonganan bwaai ni kamanging, te babakanikawai, ao ai te tiritiri. N reitaki ma aei, aomata a rinanon te maraki ao te rawawata ae e reke man te aoraki, te kara, ao te mate. Antai ae e nang aki kani kamaiuaki mani kangaanga aika rangi ni korakora aikai? Iai te kamaiu ae e kona ni kaantaningaki nakon taai aika imwaira?
IANGOA te miitara are e anganaki te abotoro Ioane 2,000 te ririki n nako. E korea iai ae kangai: “Noria, e mena uman te Atua irouia aomata, ao E na maeka i rouia, ao a na riki ba ana botanaomata, ao te Atua E na boni memena i rouia, ao E na kabane rannimataia te Atua ni kaoi mai mataia. Ao e na akea riki te mate, ao e na akea naba te nanokawaki, ma te tang ma te maraki: ba a mauna nako bwaai rimoa.” (Te Kaotioti 21:3, 4) Ao te burabeti ae Itaia e a kaman taekina ae kangai: “E na kamauna te mate n aki toki Iawe ae moan te maka; e na kaoi rannimataia aomata ni kabaneia; e na kamauna kamamaean ana botanaomata i aonaba ni kabutaa. Bon ana taeka Iawe.”—Itaia 25:8, BK.
Ao boni karioa bwa e na tera ae nanonaki ni kakoroan bukin ana berita te Atua! E nang boni kainaaomataaki te botannaomata, ke ni kamaiuaki man te rawawata ao te tiritiri, ao man bwaai ake a karika te karawawataaki ao te kammarakaki. Ai bon uarea ngkana ti nang aki rotaki n te aoraki, te kara, ao te mate! Ana Taeka te Atua ae te Baibara, e beritanna bwa e na reke te maiu are aki toki n te aonnaba ae a kororaoi bwaai ni kabane iai. (Ruka 23:43; Ioane 17:3) Ao e kona n reke irouia aomata ni kabane ake a tangiria. “[Te Atua e] tangiriia aomata ni kabaneia ba a na kamaiuaki, ma ni karekea atakin te koaua.”—1 Timoteo 2:3, 4.
Ngkana ti na kakabwaiaki n ana berita te Atua, ti riai ni mataata raoi n aron kakawakin ana mwakuri Iesu Kristo ni kaineti ma kamaiuara, ao ti na onimakinna naba. E taku ana taeka Iesu: “E tangiriia aomata te Atua n te aro are E anga Natina ae te rikitemanna iai, ba e aonga n aki mate ane onimakinna, ma e na reke i rouna te maiu are aki toki.” (Ioane 3:16) Ni kaineti ma ana mwakuri Iesu Kristo ae moanibaan te kakawaki aei, e taku ana taeka te abotoro Betero: “Akea te kamaiu iroun temanna; ba bon akea te ara teuana i aani karawa ae a anganaki aomata, ae ti konaki ni kamaiuaki iai, ba ti te Ara aei.” (Mwakuri 4:12) Te abotoro Bauro ao raona ae Tira a kaungaa naba nanon te aomata ae titiraki ao a kangai: “Ko na kakoaua te Uea ae Iesu, ao ko na kamaiuaki, ngkoe ma kain am auti.”—Mwakuri 16:30, 31, BK.
Eng, Iesu Kristo bon “Uean te maiu,” ao bon tii ngaia ae e kona n reke te kamaiuaki mairouna. (Mwakuri 3:15, BK) E a kanga naba n rangi ni kakawaki ana mwakuri te aomata ae tii temanna aei, ni kaineti ma kamaiuara? Karekean te kamataata i aon ana mwakuri, e na boni kakorakoraa kaantaningan te kamaiuaki iroura.
[Picture Credit Lines n iteraniba 2]
Page 3: Bombers: USAF photo; starving children: UNITED NATIONS/J. FRAND; burning battleship: U.S. Navy photo