Aia Ribooti Taan Tataekina Te Tautaeka N Uea
Iehova E Angania Ana Aomata te Nne ni Motirawa
TE NNE ni motirawa ae nu ae irarikin te kawai ae rinanon te maunga, bon te bwai ae kakukurei irouia taani mwananga. I Nepal, nne ni motirawa aikai a aranaki bwa taian chautara. Angiia chautara a mena irarikin te kai ae maiureirei are aranna te banyan, mangaia are a nu taabo aikai ao e raoiroi te tekateka iai. Katauraoan te tabo ae te chautara bon te mwakuri n akoi, ao a aki ataaki araia angiia aomata aika a katei taabo aikai.
Rongorongo mai Nepal a kaota aron Iehova ae te Atua n tia n riki bwa Aan te kimwareirei ao te kamaiuaki n te aro n taamnei, nakoia “taani mwananga” aika kua, ake a maiu n taai aikai.—Taian Areru 23:2.
• Nei Lil Kumari e maiu n te kaawa ae rangi n tamaroa ae arana Pokhara, are e noraki mai iai maunga aika rabunaki n te tiino aika araia te Himalaya Mountains. E raraoma ibukin aki taun te mwane ibukin ana utu, ao Nei Lil Kumari e taku bwa bon akea te bwai ae raoiroi are e kona ni kaantaningaia. Ngke e kawaraki neierei irouia kaain Ana Tia Kakoaua Iehova temanna, e riingaki nanona n te kaantaninga ae raoiroi ae mena n te Baibara, ao e waekoa ni bubutii bwa e na reirei n te Baibara.
E ngae ngkai Nei Lil Kumari e tangira te reirei n te Baibara, ma e kangaanga waakinana ibukin te kairiribai ae korakora mairouia ana utu. Ma e aki bwara nanona iai. E kakaonimaki ni kaei botaki ni Kristian neierei ao e kamanenai bwaai ake e reiakini, ao e moamoa riki taekan te aantaeka iroun te aine nakon buuna. Ibukin anne, buuna ao tinana a noria bwa ana reirei n te Baibara Nei Lil Kumari e kakabwaia te utu ae bwanin.
Buuna ao kaain ana koraki tabeman riki a tabe ngkai n reirei n ana Taeka te Atua. N taai ake a tibwa nako, Nei Lil Kumari ma kaain ana koraki ake 15 mwaitiia, a kukurei n ongora n taian reirei aika a karaoaki n te runga teuana ae booaki i Pokhara. E kangai neierei: “Mwengau e a tia n riki bwa te nne ni motirawa ibukina bwa a katiteuanaki kaain ara utu n te taromauri ae koaua, ao e a reke irou te rau n nano ni koaua.”
• E ngae ngkai e tabuaki i aan te tua n Nepal te kairiribai imarenaia aomata ake e kaokoro aroia, ma a teimatoa n rootaki iai anuani maiuia aomata. Mangaia are a mwaiti aomata ake a tangira ana reirei te Baibara ibukin boraoia aomata nako, ao te aki inanonano. Ataakin ae “te Atua E bon aki nanonano,” e rangi ni bita maiun Nei Surya Maya ma ana utu.——Mwakuri 10:34.
E rawawata nanon Nei Surya Maya ibukin te kairiribai ae ribuaka ae boto i aon kaokoron aroia aomata, ao taian rawawata ake a reitaki ma irakin nanon katei nikawai aika rangi ni matoatoa. E korakora ana onimaki Nei Surya Maya, mangaia are inanon ririki aika mwaiti, e butiia atuana aika bouannanti bwa a na buokia. Ma a aki kaekaki ana tataro. N te bong teuana ngke e tang ni bubutii buokana, tibuna te aine ae ai onoua ana ririki ni maiu are arana Nei Babita, e kawariia ma n titirakinia ni kangai: “E aera ngkai ko tang ni bubutii buokam mairouia bouannanti aika a aki kona ni karaoa te bwai teuana?”
Tinan Nei Babita e reirei n te Baibara ma temanna ae kaain Ana Tia Kakoaua Iehova. Nei Babita e ingainga ni kaoa tibuna bwa e na kaea te botaki ni Kristian. Ngke e kaea te botaki Nei Surya Maya, e mimi ngke e noria aomata aika a kaokoro nako aroia bwa a kukurei n iraorao imarenaia n akea te kairiribai. N te tai naba anne e bubutii bwa e na waakinaki te reirei n te Baibara ma ngaia ni mwengana. E ngae ngke e a ribaaki irouia aomata ake a mena irarikina ibukin anne, ma e aki bwara nanona iai; e aki naba tukaki rikirakena n te itera n taamnei ni uarereken ana konabwai ni wareware ao ni koroboki.
A a tia ni bwaka nako wanua te ririki mai imwin anne, ao onoman kaain ana utu n ikotaki ma buuna ao natina ake teniman ake a a tia ngkai n riki bwa kaain Ana Tia Kakoaua Iehova. Nei Surya Maya e a riki bwa te minita are e kabwanina ana tai iai are te regular bwaiania, ao e kukurei ngkai ni buokia aomata bwa a na kaki rawawataia, n te nne ni motirawa ni koaua ae tii reke mairoun Iehova.