‘A Tataekina Te Raoiroi Ao Te Tangira’

INANON ririki aika a tibwa nako, e korakora te waaki ni kabuakaka ae karaoaki nakoia Ana Tia Kakoaua Iehova ake a mena i Buranti. A kabonganaki taeka aika a aki koaua raoi, ao rongorongo aika mwamwana te aba, ni kabuakaka taekaia nakoia aomata. Ni moan te ririki ae 1999, Ana Tia Kakoaua Iehova ake a mena i Buranti a kabutanako katoton te turaeki teuana n te mwaiti ae 12 te mirion, ae atuna Kaaini Buranti, Kam a Tabe ni Mwamwanaki! Inanon te turaeki aei, a kaitarai taeka ni kabuakaka ake a taekinaki ibukiia.

Tabeua te bong imwin te mwakuri ni kabuti turaeki aei, e a kanakoa te reta nakon te nuutibeeba teuana Mr. Jean Bonhomme, ae te taokita ao kaain te Auti ni Maunga Tabu rimoa. E korea iai ae kangai: “N taai tabetai a kawara au auti kaain Ana Tia Kakoaua Iehova. A roko ni maroro ma ngai n taekan te raoiroi ao te tangira ae rababa nako. . . . A aki kairoroai bwa N na butimwaiia. A kaota aia koaua nakoiu ma te nimamannei, ao a akoai n ongora irou ngkana I kaota nanokokorakiu.”

E kangai Mr Bonhomme n taekan aia kaantaninga kaain Ana Tia Kakoaua Iehova ibukin bwaai n taamnei: “Te aki rabakau ni bwain te aonnaba aei irouia, e aki karika te kangaanga. Ma n te itera teuana, are te aki rabakau irouia taan tautaeka tabeman e a karika te kangaanga ae e kakamaku riki ni kaineti ma raun ao bonnanoia aomata.”