“Ti na Kanga ni Kona ni Kamarurungiia Kaain Ara Ekaretia?”
A MWAITI aomata aika a aki mimi n te titiraki aei ae e tabekaki n taai aika a tibwa nako n te maekatin ni Katorika are e boreetiaki i Buranti ae te Famille Chrétienne (te Utu ni Kristian). Te Karetinare Hume i Buritan, e arania taian ekaretia bwa “kaanga aintoa aika a tabe ni matu.” E taekinaki bwa katean koraki tabeua inanon te ekaretia aika a na kaotioti nakoia aomata tabemwaang, e kona ni katoka te nimatutu aei. Te berebitero temanna i Itare e arana te waaki aei bwa “Tataekinan te rongorongo nakoia aomata rinanon waaki aika boou.” E ngae ngkai te bobe e kaungai nanoia aomata nakon waaki aikai, ma a aki bane aomata n nora riain kabuta nakoan aia onimaki.
N taai aika a tibwa nako, Pigi Perini, are e mwiokoaki n te ekaretia i Milan Itare, e kawara Aberika ao e tuangaki iroun te tina ni Katorika iai ae kangai: “I a tia ni mena ikai inanon 40 te ririki, ao I a tokanikai n aki atonga iai aran Iesu, bwa I rawa ni kamatauninga te katei n Aberika.” E kangai te aomata are e mwiokoaki arei: “Ti aki manga tataekina Iesu ngkai, ti aki manga kaotioti ibukin Iesu, ao ti a manga aki tataekina te euangkerio!” Ibukia aomata aika mwaiti, tataekinan te rongorongo bon anuani maiuiia ae kakawaki, ae te bwai ae kamarurungiia n te aro n taamnei. E kaotia ae kangai Pigi Perini: “Ko kaitiboo ma aomata aika uoman aika a tabe n taekina Kristo n te makete, ke a uouota te Baibara i aani baia, ao ko a bon taetae ni kangai: Noria, boni kaain Ana Tia Kakoaua Iehova!”
Mirion ma mirion mwaitiia aomata ngkai aika a kukurei ni maroroakina taekan Ana Taeka te Atua ma Ana Tia Kakoaua Iehova. Akea te nanououa bwa taani Kakoaua a a tia naba ni bairea waakinan maroro i aon te Baibara n am kaawa. N aron are e karaoaki n te moan tienture, Kristian aika a ingainga nanoia aikai a kaungai nanoia imarenaia, bwa a na tataekina aia onimaki nakoia aomata tabemwaang. Aia tabo ni botaki (aika a aranaki bwa Maneaba n Uea), bon taabo aika kakukurei, ao taabo n iraorao. Bukin tera ngkai ko aki kaea te botaki teuana ae baireaki irouia Ana Tia Kakoaua Iehova, ma n noria bwa ko na kanga ni kararoa te taningaroti ibukin bwaai n taamnei?