REIREI 14

Katereterean Reirei Aika Kakawaki

Ebera 8:1

KABWARABWARAANA: Buokiia taan ongora bwa a na ota ni baike ko taekin n am kabwarabwara, ao katereterei aron irekereken reirei aika kakawaki ma tiam ao am boto n iango n am kabwarabwara.

ARONI KARAOANA:

Tiam n am reirei. Iangoia bwa tera tiam n am kabwarabwara. Ko na reireinia taan ongora, ko na kairiia bwa a na kakoauaa te bwai teuana, ke ko na kaungaia? Imwina karaoia n teina anne. Taraia bwa reirei aika kakawaki ake ko na taekin a na buokiko ni kakororaoa tiam anne.

Titirakiniko ni kangai: ‘Baikara titiraki ake a na bae n tabeki taan ongora ibukin te reirei aei? Iangoia bwa tera aia moan titiraki ke aia taeka n totoko ae a na tabekia, ao tera riki aia titiraki ao aia taeka n totoko imwina.’ Imwina, barongai am reirei ake ko na taekin bwa a na toma raoi ma aia titiraki ao aia taeka n totoko bwa a aonga n iriria taan ongora, n ota iai, ao ni butimwaeia.
Katuruturua te boto n iango n am kabwarabwara. Okioki n taekina am boto n iango i nanon am tai ni kabwarabwara, ke ni kamanenai taeka aika titeboo nanoia ma ngaia.
Katereterei reirei aika kakawaki n te aro ae kai ota. Tii kabonganai reirei aika kakawaki aika irekereke raoi ma am boto n iango. Rinei mwaitin am reirei aika kakawaki aika kona ni kamatataaki raoi n te tai ae baireaki. Tai kabatiai reirei aika kakawaki ake ko na taekin, katereterea raoi te reirei ae kakawaki teuana ma teuana, motirawa teutana imwain taekinan are imwina, ao kairekerekei raoi.

Ko kona naba n taekin reirei aika kakawaki n am moantaeka ni buokiia taan ongora bwa a na atai, ke manga taekin n am motika bwa a aonga n uringi.