Kabwarabwaraani Mwakoro 14

A kabutaanako te rongorongo ae raoiroi ae taekan te Tautaeka n Uea Kristian ake rimoa, nako tabon aonnaba. E anga te kairiri nakoia Iesu ibukin te tabo are a na uarongorongo iai, ao e buokiia rinanon te kakai bwa a na reireinia aomata n oin aia taetae. E angania Iehova te ninikoria ao te mwaaka bwa a na tokanikai i aoni bwainikirinaia aika korakora.

E anga Iesu te miitara nakon te abotoro Ioane ae kaota mimitongin Iehova. N te miitara riki teuana, e nora Ioane te Tautaeka n Uea ae bwaini karawa ni kataenikaia Tatan ao ni katoka ana waaki n tautaeka n aki toki. Ao Ioane e nora Iesu n tautaeka bwa te Uea ma raona ake 144,000. E nora naba Ioane te aonnaba ni kabutaa ae e a riki bwa te bwaretaiti, ike a a bane iai aomata n taromauria Iehova ma te rau ao te katiteuanaaki.