Kabwarabwaraani Mwakoro 8

E kakabwaiaaki Toromon iroun Iehova ao e anganaki te wanawana ae bati ao te mwioko naba ibukini katean te tembora, ma teutana imwin teutana e a kitana Iehova. Ngkana te karo ngkoe, kabwarabwaraa nakon natim aroia taan taromauri ni kewe ni kaira Toromon bwa e na kitana te Atua. E a bwenaua te tautaeka n uea, ao ueea aika buakaka a a kaira te natannaomata aei bwa e na tannako man te koaua ao n taromaurii bouannanti. N te tai aei, a bati ana burabeti Iehova aika kakaonimaki ni koaua ake a bwainikirinaki ao ni kamateaki. E kaira te tautaeka n uea mai meang te Ueannaine are Ietebera bwa e na riao riki aroia n tannako man te koaua. Bon aei te tai ae kakamaaku n rongorongoia tibun Iteraera. Ma a boni bati naba ana toro Iehova ake a teimatoa ni kakaonimaki i buakoia tibun Iteraera, n ikotaki ma te Uea are Ieotiabata ao te burabeti are Eria.