E Rinea Tauro Iesu

Tauro boni kaain Rom ae bungiaki i Tareto. Bon te Baritaio temanna ae mwaatai n te Tua n Iutaia, ao e riribaiia Kristian. E katikiia mwaane ao aine aika Kristian man aia auti, ao e karinia n te karabuuti. E tei naba ni matakuakinia te koraki ake a un ao a karebanaa te tia rimwini Kristo ae Tetebano, ni karokoa ae mate.

Ma e aki rau nanon Tauro ngkai e katikiia Kristian tii i aon Ierutarem. E butiia te ibonga ae rietata bwa e na kanakoa nako Tamateko bwa e na kakaaeia Kristian ikekei. Ngke e a uakaan Tauro ma te kaawa, ao e a rina naba n otabwaniniaki n te oota, ao e a bwaka i aontano. E ongo te bwanaa ae kangai: “Tauro, e aera ngkai ko bwainikirinai?” E titiraki ni kangai Tauro: “Antai ngkoe?” E kaeka ni kangai: ‘Bon Iesu ngai. Naako Tamateko ao ane ko na ataa te bae ko riai ni karaoia.’ E a rina naba ni mataki Tauro, ao e a riai n tauaki baina ni kairaki nakon te kaawa.

IIai te Kristian ae kakaonimaki i Tamateko ae arana Anania. E tuanga teuaei Iesu n te miitara ni kangai: ‘Nakon ana auti Iuta n te kawai ae arana Eti, ao kakaaea Tauro.’ E taku Anania: ‘Te Uea, I ataa taekan te aomata anne! E kakarinia taan rimwim n te karabuuti!’ Ma e taku Iesu: ‘Naako kawaria. I a tia n rinea Tauro bwa e na tataekina te rongorongo ae raoiroi nakoia natannaomata aika bati.’

Ngaia are e a nakon Tauro Anania ao e taku: ‘Tauro ae tariu, e kanakoai Iesu bwa N na kaurei matam.’ Ao e a rina naba n noraaba Tauro. E reiakina taekan Iesu ao e a riki bwa te tia rimwina. E a tia ngkai ni bwabetitoaki Tauro bwa te Kristian, ngaia are e a moana ana uarongorongo n taian tinakoka ma raona ni Kristian. Ko kona n iangoa kubanakoia I-Iutaia ngke a nora Tauro n reireinia aomata taekan Iesu? A taku: ‘Tiaki teuaei are aki toki ni kakioia taan rimwin Iesu?’

E uarongorongo Tauro i nanon tenua te ririki nakoia aomata ake a maeka i Tamateko. A ribaa Tauro I-Iutaia ao a baireia bwa a na tiringnga. Ma a ongo taekan te babaire anne taari, ao a buokia bwa e na rabanako. A kaaki i nanon te bwaene ao a nnaia rikaaki rinanoni bwangabwangan oon te kaawa.

Ngke e a roko Tauro i Ierutarem, ao e kataia ni kawariia taari ikanne. Ma a maakua taari. Iai te tia rimwin Iesu ae akoi ae arana Barenaba, are e a kaira Tauro nakoia abotoro ao n anai nanoia bwa e a boni bitaki Tauro. E a moana tataekinan te rongorongo ae raoiroi Tauro ma te ingainga, ma kaain te ekaretia i Ierutarem. Imwina riki, e a kinaaki n arana ae Bauro.