E Kaamwarakeia Aomata Aika Nga ma Nga Iesu

Imwain raoi te Toa ae te Riao n 32 C.E., ao a a oki abotoro mani mwanangaia n uarongorongo. A a boni kua ngaia are e a katokaia Iesu n te booti nako Betetaita bwa a aonga ni motirawa. Ma ngke a a kaan ma mataniwin te bike, e a noriia Iesu nga ma nga aomata ake a ririmwia. E ngae ngke e kani kaokoroa Iesu ma ana abotoro, ma e a manga butimwaeiia naba aomata ma te akoi. E kamarurungia aika aoraki ao e angareirei naba nakoia. E reireinia Iesu taekan Ana Tautaeka n Uea te Atua n uaa e bong. Ngke e a tairiki, a a nakoina abotoro ao a taku: ‘A a bae ni baki aomata. Kanakoia bwa a aonga ni karekei kanaia.’

Ma e taku Iesu: “A aki riai n nako, ma kam na angania kanaia.” A taku abotoro: ‘Ko tangiria bwa ti na nako ni kabooi kariki ibukia?’ E taku Biribo ae te abotoro naba temanna: ‘E ngae ngkana e bati ara mwane, ma ti bon aki kona ni kabooa te kariki ae tau ibukia te koraki ae bati aei.’

E titirakinia Iesu ni kangai: ‘Mwaitira te amwarake iroura?’ E taku Anterea: ‘Tii nimaua te kariki ao uoman te ika ae uarereke. E aki tau naba aei.’ E taku Iesu: ‘Uotaamai te kariki ao te ika.’ Ao e a tuangia aomata bwa a na tekateka i aon te uteute ni kurubu aika kaka 50 kaaina ao 100. E anai kariki ma iika Iesu, e tararake nako karawa, ao e tataro. Imwina, e angania abotoro te amwarake bwa a na angania aomata. A bane n amwarake mwaane ake 5,000 ao aine ma ataei ni karokoa ae a ngae. Imwina, a botii nikiran amwarake abotoro bwa a aonga n aki taonaba. A on iai 12 bwaene! Tiaki bwa bon te kakai ae kamimi aei?

A rangi n anaaki nanoia aomata iai ao a a kani kaueaa Iesu. E ataia Iesu bwa e tuai roko te tai are e na kaueaaki iai iroun Iehova. Ngaia are e a kaokiia aomata aikai ao e tuangia ana abotoro bwa a na nako nakon iteran Namani Kariraia are teuana. A tokara aia booti ao Iesu e ararakea te maunga n tii ngaia. Bukin tera? Ibukina bwa e kani karekea ana tai n tataro nakon Tamana. E kamwawaa n taai nako ana tai Iesu ibukin te tataro e ngae naba ngke e rangi n tatabetabe.