E a Kamaunaaki Ierutarem

A aki toki ni kitana Iehova kaain Iuta ao n taromaurii atua aika kewe. Ma e teimatoa Iehova ni buokiia i nanon ririki aika bati. E kanakoia burabeti aika bati bwa a na anga te kauring nakoia, ma a aki ongo ao a kakanikoia burabeti. E kangaa Iehova ni katoka aroia n taromaurii bouannanti?

E buakana te natannaomata teuana imwin teuana ueani Baburon ae Nebukaneta. N te moantai are e buakana iai Ierutarem, e taua te Uea ae Ieoiakin, tooka, taani buaka, ao taani karaobwai, ao e bane ni kairiia nako Baburon. E bane n anai naba baika kakawaki man ana tembora Iehova. Imwina ao Nebukaneta e a kaueaa Tetekia i Iuta.

N te moantai, e ongeaba Tetekia iroun Nebukaneta. Ma e anganaki te taeka n reirei Tetekia irouia natannaomata ake i rarikina ao burabeti ni kewe bwa e na karitei nakoni Baburon. E kauringnga naba Ieremia ni kangai: ‘Ngkana ko karitei, e na roko te rongo, te tiritiri, ao te aoraki ae kamamate i Iuta.’

E tautaeka Tetekia i nanoni wanua te ririki ao imwina e a baireia bwa e na karitei nakoni Baburon. E bubutiia ana taanga ni buaka Aikubita bwa e na buokia. Ao e kanakoa ana taanga ni buaka Nebukaneta bwa e na buakana Ierutarem ao a a kaembwa ni katobibia te kaawa. E taku Ieremia nakon Tetekia: ‘E taku Iehova bwa ngkana ko taenikai nakoni Baburon, ao e na reke maium ma te kaawa. Ma ngkana ko aki, ane a na kabueka Ierutarem kaaini Baburon ao n tauko bwa aia taenikai.’ E taku Tetekia: ‘N na aki taenikai!’

Teuana ma te iterana te ririki imwina, a a roko ana taanga ni buaka Baburon n urui oon Ierutarem ao ni kabuekia. A kabueka naba te tembora, a kamateia aomata aika bati, ao a kairiianako nga ma nga bwa aia taenikai.

E birinako Tetekia mai Ierutarem, ma a kakioa kaaini Baburon. E reke irouia i rarikin Ieriko ao a kairia nakon Nebukaneta. Ao ueani Baburon e kamateia natin Tetekia i bon i matana. Imwina ao Nebukaneta e kamataki matan Tetekia ao e karinna n te karabuuti, ike e a mate iai rimwi riki. Ma e berita Iehova nakoia kaain Iuta ni kangai: ‘Imwin 70 te ririki ao N na kaokingkami nako Ierutarem.’

Tera ae riki nakoia rooro n rikirake ake a kairaki bwa taenikai i Baburon? A na teimatoa ni kakaonimaki ni koaua nakon Iehova?