E Kamanoa Etekia Ana Anera Iehova

E a tia n tautaeka te Embwaea n Aturia i aon te tautaeka n uea ni baronga ake tebwina ae Iteraera. E a tangiria ngkai Tennakeriba ae uean Aturia bwa e na tautaekana naba te tautaeka n uea ni baronga aika uoua ae Iuta. E a moanna n taui taekani kaawan Iuta teuana imwin teuana. Ma te kaawa ae e rangi n tangiria riki bon Ierutarem. Ma e aki ataia Tennakeriba ae e kamanoa Ierutarem Iehova.

E bubura ana kabwakamwane Etekia ae uean Iuta nakon Tennakeriba bwa e aonga n aki buakana Ierutarem. E ngae ngke e a tia ni butimwaea te mwane anne Tennakeriba, ma e boni kanakoa naba ana taanga ni buaka ae korakora bwa e na buakana Ierutarem. A a rangi ni maaku kaain te kaawa ibukina bwa a a kan roko kaain Aturia. E taku Etekia nakoia: ‘Tai maaku. A korakora kaain Aturia, ma e na kakorakoraira riki Iehova nakoia.’

Ao Tennakeriba e kanakoa ana tia uataeka ae te Rabetiake nako Ierutarem bwa e na kakanikoia kaaina. E tei i tinanikun te kaawa te Rabetiake ao e takarua ni kangai: ‘E bon aki kona ni buokingkami Iehova. Tai kariaia bwa kam na mwamwanaaki iroun Etekia. Bon akea te atua ae kona ni kamanoingkami mairoura.’

Ao Etekia e titirakina Iehova te bwai ae e riai ni karaoia. E kaeka Iehova ni kangai: ‘Tai maaku ibukin ana taeka te Rabetiake. E na bon aki kataenikaia Ierutarem Tennakeriba.’ Imwin anne, a a roko ana reta Etekia mairoun Tennakeriba. E kangai kanoaia: ‘Kam riai n taenikai. E aki kona ni kamaiuingkami Iehova.’ Ao Etekia e tataro ni kangai: ‘Taiaoka Iehova, kamaiuira bwa e aonga n ataaki irouia aomata ni kabane ae bon tii ngkoe te Atua ae koaua.’ E taku Iehova nakoina: ‘E na aki roko uean Aturia i Ierutarem. N na boni kamanoa au kaawa.’

E kakoauaa raoi Tennakeriba ae e nang riki Ierutarem bwa ana bwai. Ma n te tairiki teuana ao Iehova e kanakoa te anera temanna nakon te tabo are a kaembwa iai tautia i tinanikun te kaawa. E tiringia tautia aika 185,000! A a mate ana tautia aika korakora te Uea ae Tennakeriba. Ai akea riki te bwai ae e kona ni karaoia Tennakeriba ma ai tii te okira mwengana bwa e a konaaki. E kamanoa Etekia ao Ierutarem Iehova, n aron are e beritanna. Ngke arona bwa ko mena i Ierutarem, ko na onimakina Iehova?