E Taetae Iehova Nakon Tamuera

Iai uoman natin te Ibonga ae Rietata ae Eri aika mwaane ake a beku bwa ibonga n te umwanrianna ae tabu. Araia bon Obeni ao Bineati. A aki ongeaba n ana tua Iehova, ao a kakaraoa ae rangi ni buakaka nakoia aomata. Ngkana a uotii aia karea tibun Iteraera ibukin Iehova, ao a anaa te irikomaiu ae te kabanea n tamaroa Obeni ma Bineati i bon ibukia. E ongo Eri taekan aia mwakuri natina ma akea te bwai ae e karaoia iai. E na kariaia waakinakon te mwakuri aei Iehova?

E ngae ngke e rangi n uarereke Tamuera nakon Obeni ma Bineati, ma e aki kakairi irouia. E boni kukurei Iehova iroun Tamuera. N te tairiki teuana ngke e matu Tamuera, ao e ongo te bwanaa ae wetea arana. E teirake ao e biri nakon Eri ao e taku: ‘Aio ngai!’ Ma e taku Eri nakoina: ‘I aki weteiko. Naako oki matu.’ Ao e oki Tamuera ni matu. Imwina e a manga ongo naba weteana. Ngke e ongo Tamuera te bwanaa n te katenua n tai, e a ataia Eri bwa bon Iehova ae wetea Tamuera. E tuanga Tamuera bwa ngkana e a manga ongo te bwanaa ao e na kangai: ‘Taetae Iehova. E kakauongo am toro.’

Mangaia are e a nako ni matu Tamuera. Imwina e a ongo te bwanaa ae kangai: ‘Tamuera! Tamuera!’ E kaeka ni kangai: “Taetae bwa e kakauongo am toro.” E taku Iehova: ‘Tuanga Eri bwa N nang katuuaaea ma ana utu. E bon ataia ae a kakaraoa ae buakaka natina n au umwanrianna ae tabu ma akea te bwai ae e karaoia iai.’ N te ingabong are imwina ao e kauki mataroan te umwanrianna ae tabu Tamuera, n aron are e kakaraoia. E maaku n tuanga te ibonga ae rietata ana taeka Iehova. Ma e weteia Eri ao e titirakinna: ‘Natiu, tera are e taekinna nakoim Iehova? Kaotii ni kabane nakoiu.’ Ngaia are e a taekini bwaai ni kabane Tamuera nakoina.

E teimatoa n ikawairake Tamuera ao e memena Iehova irouna. E ataaki irouia tibun Iteraera ni kabutaa te aba bwa e a tia Iehova n rinea Tamuera bwa te burabeti ao te tia motikitaeka.