Bukini Kamaunaakia I-Iutaia Aika Aki Onimaki

E katai aanga aika bati Iesu ni kaungaia iai aomata bwa a na iangoa aron reitakia ma te Atua. E a manga rio te bwai teuana imwin ana maroro ma aomata i tinanikun ana auti te Baritaio.

A taekina te kabuanibwai ae riki tabeman mai buakoia. A taekinia “kaaini Kariraia ake a kamateaki irouni [te Kowana n Rom ae Bontio] Birato ngke a kume n angakarea.” (Ruka 13:1) Tera ae a nanonna?

Tao kaaini Kariraia aikai a tiringaki ngke a aki kariaia nga ma nga I-Iutaia kamanenaan te mwane man te tembora irouni Birato ibukini kateani kawain te ran bwa e na rinnako i Ierutarem. Tao e reke te mwane aei irouna man aia kariaia taan taua taekan te tembora. A bae n iangoia naake a karakina te kabuanibwai aei bwa a reke kaia kaaini Kariraia ibukina bwa a bure ni karaoi mwakuri aika buakaka. E bon aki kariaia aei Iesu.

E titirakinia ni kangai: “N ami iango a bure rawawata riki I-Kariraia aikai nakoia kaaini Kariraia ni kabane ibukina bwa a karawawataaki ni baikai?” Ana kaeka iai a aki. Ma e taekina te bwai ae riki aei n anga te kauring iai nakoia I-Iutaia: “Ngkana kam aki rairi nanomi ao kam na kamaunaaki naba n aekaia.” (Ruka 13:2, 3) E a taekina ngkanne te kabuanibwai riki teuana Iesu n taai aika tibwa nako, ao e bae n irekereke ma kateani kawain te ran ngke e titiraki ni kangai:

“Tera aroia aomata ake 18 ake a bwakaraki n te taua i Tiroam ao a mate iai, n ami iango a bure kakaiaki riki nakoia aomata tabemwaang ake a maeka i Ierutarem?” (Ruka 13:4) Tao a iangoia te koraki bwa a mate aomata akanne ibukin oin aia mwakuri aika bubuaka. E aki kariaia naba aei Iesu. E ataia bwa iai “te tai are a riki iai baika aki kantaningaaki,” ao tao anne bukina ngkai e riki naba te kabuanibwai aei. (Te Minita 9:11) Ma a riai aomata ni karekea reireiaia man te bwai ae riki aei. E taku Iesu: “Ngkana kam aki rairi nanomi ao kam na bane ni kamaunaaki naba n ai aroia.” (Ruka 13:5) Ma e aera ngkai e katuruturua te reirei aei?

Bon iai irekerekena ma arona ni karaoa ana mwakuri ni minita, ao e kaikonaka anne n te aro aei: “Iai te mwaane temanna ae iai arokana te biiku ae unikaki i nanon ana nne ni kureebe, ao e kakaaei uaana ma akea ae e kunea. E taku ngkanne nakon te tia ribanaa te kureebe, ‘Ai tenua te ririki ngkai ae I roroko iai ni kakaaei uaan te biiku aei, ma akea ae I kunea. Koreia ni kabwakaa! E aera ngkai e na banebuaka te tano iai?’ Ma e kaeka teuarei ni kangai: ‘Te toka, katikua teuana riki te ririki, bwa N na kena rarikina ni katobibia ao ni kaamwarakea. Ngkana e karika uaana rimwi ao e raoiroi, ma ngkana e aki ao ko na koreia ni kabwakaa.’ ”​​—Ruka 13:6-9.

E a tia Iesu ni kataia ni karikirakea aia onimaki I-Iutaia i nanon tenua tabun te ririki. Ma tii tabeman aika a a riki bwa taan rimwina ao a iangoaki bwa uaa aika reke man ana mwakuri korakora. Ai ana kaaua n ririki ngkai n ana mwakuri ni minita, ao e a kakorakoraa riki. Kaanga ai aron ae e keniken ao e kaamwarakea te aroka ni katobibia te kai ae te biiku ae taekaia I-Iutaia n arona n uarongorongo ao n angareirei i Iutaia ao i Berea. Ma tera mwina? Tii tabeman I-Iutaia aika butimwaea te rongorongo. A rawa angia kaain te natannaomata aei n rairi nanoia ao a tau ngkai ni kamaunanakoaki.

E a manga kateretereaki bwa akea bitakia iai angia aomata, teutana te tai imwina n te bongi n Taabati. E tabe n reirei Iesu n te tinakoka ao e nora te aine ae bwaokooko i nanon 18 te ririki ibukina bwa e karawawataaki iroun te taimonio. E nanoangaa te aine aei ao e taku: “Neiko, ko a kamarurungaki mani mamaaram.” (Ruka 13:12) E katokaa baina Iesu i aon neiei ao e a eti naba ngkekei nukana ao e a neboa te Atua.

E un n aei te mataniwi n te tinakoka ao e taku: “Iai onobong are e riai ni karaoaki iai te mwakuri, mangaia are rooko bwa kam na kamarurungaki ni boong akanne, ma tiaki n te bongi n Taabati.” (Ruka 13:14) E bon aki kakewea te mataniwi aei ae iai mwaakan Iesu ni katoki aoraki ma e kabuakakaia aomata ngkai a roko n te bongi n Taabati! E kaekaa n te aro ae mataata Iesu ni kangai: “Taani mwamwanaa te aba, tiaki kam kabwarai ami kao ke ami taongki mani nneia n te bongi n Taabati, ao ni kairiianako ni kamoiia? Ao tiaki e riai te aine aei ae natin Aberaam, ae kabaeaki iroun Tatan i nanon 18 te ririki, ni kabwaraaki mani kabaeana aei n te bongi n Taabati?”​—Ruka 13:15, 16.

A taonaki n te maamaa taani kakaaitara, ma a kimwareirei te koraki n norakini baika kamimi ake e karaoi Iesu. E a manga taekini ngkanne taetae ni burabeti aika uoua i Iutaia aika taiani kaikonaki ni kaineti ma te Tautaeka n Uea ake e taekini ngkoa man te booti n Namani Kariraia​—Mataio 13:31-33; Ruka 13:18-21.