A Bati Aika Matauninga n Ana Taeka Iesu

E angareirei Iesu n te tinakoka i Kaberenaum n taekinna bwa boni ngaia te amwarake ni koaua mai karawa. Ana taeka aei bon reitan are e taekinna ngkoa nakoia aomata ake a oki mai mainikun Namani Kariraia, ake a amwarake ni kariki ma iika ake a katauraoaki ikekei.

E reitaanako ana maroro Iesu ni kangai: “A kang manna ami bakatibu n te rereua, ma a boni mate naba.” Ni kaitaraan anne, e kabwarabwaraa ni kangai: “Boni ngai te amwarake ae maiu ae ruo mai karawa. Ane e kana te amwarake aei ao e na maiu n aki toki, bwa ni koauana, te amwarake ae N na anga bon irikou ibukini maiuia kaain te aonnaba.”​—Ioane 6:48-51.

N tain te abue n 30 C.E. ao e tuangaki Nikotemo iroun Iesu bwa e rangi n tangiriia aomata te Atua n te aro are e anga Natina bwa te tia Kamaiu. E a katereterea Iesu riaini kanakin irikona mani kaotiotan onimakinan te karea ni kaboomwi are e na karaoia. Bon anne aroni karekean te maiu are aki toki.

Ma a aki kukurei aomata n ana taeka Iesu. A titiraki ni kangai: “E na kangaa teuaei n anganira irikona bwa ti na kanna?” (Ioane 6:52) E kani kamataataia Iesu bwa bon te kaikonaki are e taekinna, ao tiaki raoi irikona ma raraana. E boni kaota ae e nanonna n te baere e a manga taekinna.

“Ngkana kam aki kana irikon Natin te aomata ao n nima raraana, ao akea te maiu i nanomi. Ane e kana irikou ma n nima raraau, ao e a reke irouna te maiu are aki toki, . . . bwa irikou bon te amwarake ni koaua, ao raraau bon te ninima ni koaua. Ane e kana irikou ma n nima raraau, e teimatoa ni katiteuanaaki ma ngai.”​—Ioane 6:53-​56.

Iangoa aron tangibuakan anne irouia I-Iutaia ake a ongora! A bae n iangoia bwa e taekina te kang aomata Iesu ke uruakan ana tua te Atua ni kaineti ma kanakin te raraa. (Karikani Bwaai 9:4; Nakoaia Ibonga 17:10, 11) Ma e aki nanona Iesu kanakin irikon te aomata ao nimakin te raraa. E kaotia bwa a riai aomata ni kabane ake a kani karekea te maiu are aki toki n onimakina te karea ni kaboomwi are e na karaoia ngkana e a anga rabwatana ae kororaoi ao ni kabwaroa maiuna ae raraana. Ma a boni bati naba taan rimwina ake a aki ota n te reirei aei. A waekoa n taku tabeman: “E rangi ni kamatauninga te taetaenikawai aei, ai antai ae e nang kan ongora iai?”​—Ioane 6:60.

Ibukina bwa e ataia Iesu ae a ngurengure tabeman taan rimwina, e a titiraki ni kangai: “E kabwakaingkami te baei? Ao e uara ngkana kam a nora Natin te aomata bwa e a waerake nako ike e mena iai ngkoa? . . . Taeka aika I atongi nakoimi boni bwain te taamnei, ao a anga te maiu. Ma iai tabeman i buakomi aika a aki kakoauaa.” Ibukin anne, a a bati taan rimwina ake a kitanna ao n aki manga iria.​—Ioane 6:61-​64.

Mangaia are e titirakinia ana abotoro ake 12 ni kangai: “Kam kan nako naba ngkami?” E kaeka Betero ni kangai: “Te Uea, ti na nakon antai? A mena iroum taeka aika kairiri nakon te maiu are aki toki. Ti kakoauako ma n ataiko bwa boni ngkoe Teuare Tabu are kanakoaki mairoun te Atua.” (Ioane 6:67-​69) Ai raoiroira kaotiotan te kakaonimaki ni koaua aei, e ngae ngke a bon aki bati n ota Betero ma abotoro ake tabeman n ana reirei Iesu aei!

E taekina aei Iesu kioina ngkai e kukurei n ana kaeka Betero: “Tiaki I rineingkami ngkami aika tengauni ma uoman? Ma temanna i buakomi bon te tia uarao.” (Ioane 6:70) E taekina Iesu taekan Iuta Itekariota bwa e kona n noria ae e a moanna n toua te kawai nakon te buakaka.

Ni koauana, e bon rau nanon Iesu n ataakin are a bon aki bwara nanoia Betero ao abotoro ake tabeman n iria ao n uataboa te mwakuri ni kakamaiu are e karaoia.