Kinikani Uita n te Bongi n Taabati

A a mwananga ngkai Iesu ma taan rimwina ni kaineta meang nako Kariraia. Bon tain te abue ao a a rikirake uita n taian tawaana. A a baki taan rimwina ngaia are a kiniki amwi ni uita tabeua ni kang. Ma bon te bongi n Taabati aei, ao iai Baritaio ake a noriia.

Uringnga are a kani kamatea Iesu tabeman I-Iutaia n taai aika tibwa nako i Ierutarem ni buki­nna bwa e urua te bongi n Taabati. A manga tabeka ngkai aia bukibuki Baritaio n te baere a karaoia taan rimwina ni kangai: “Noria! A karaoa ae tabuaki karaoana n te bongi n Taabati taan rimwim.”​—Mataio 12:2.

A taku Baritaio bwa kinikan te uita ao bubuana n te bai ni kanaki, bon te mwakuri n tai ao ni kaaki kun. (Te Otinako 34:21) N te moantai, te bongi n Taabati bon te bong ae kakimwareirei ae kaungaa te onimaki, ma a bitia Baritaio bwa te bwai ni karawawata n aia babaire aika matoatoa ni kaineti ma mwakuri aika a aki riai ni karaoaki iai. E taekini katoto Iesu ni kaineti ma aia iango aika kairua ni kaotia bwa e aki kantaningaia Iehova ae te Atua bwa e na kamanenaaki Ana tua ibukin te bongi n Taabati n te aro anne.

E taekina te katoto teuana Iesu are taekan Tawita ma ana aomata. Ngke e a baki Tawita ma raona, a motirawa n te umwanrianna ae tabu ao a kang bwerena ake a kaotiotaki. A a tia ni kamwaingaki bwerena akanne man te tabo are a katabuaki iai nakon Iehova ao n oneaki mwia n aika boou, ao a kawakinaki bwa tii kanaia ibonga. Ma ni kaineti ma baika riki n te tai anne, a aki kabuakakaaki Tawita ma ana aomata ngke a kang.​—Nakoaia Ibonga 24:5-9; 1 Tamuera 21:1-6

Ibukin te kauoua ni katoto, e taku Iesu: “Kam aki wareka taekaia ibonga n te Tua bwa a mwamwakuri n te tembora n te bongi n Taabati, ma a aki bure iai?” Te bwai ae nanonna bwa n te bongi n Taabati ao a boni kamateia maan ibonga ibukin aia angakarea ao ni karaoi mwakuri riki tabeua n te tembora. E taku Iesu: “Ma I tuangingkami bwa iai ikai temanna ae kakannato riki nakon te tembora.”​—Mataio 12:5, 6; Warekaia Iteraera 28:9.

E a manga taekina riki kanoan te Baibara ae kangai: “Ngke arona bwa kam ataa nanon ae ‘I tangira te nanoanga ao tiaki te angakarea,’ ao kam aki kona ni kabuakakaia akana akea aia bure.” E motikia ni kangai: “Bwa Uean te bongi n Taabati Natin te aomata.” E nanona iai Iesu rokon ana kairiri n ana Tautaeka n Uea ae rau ae maanna tenga te ririki.​—Mataio 12:7, 8; Otea 6:6.

A a tia ni karawawataaki aomata n tautoronakia i aan ana kairiri Tatan ae irianaki ma te iowawa ao te buaka ae rangi ni bati. Ai kaokorora anne ma ana tai n tautaeka Kristo n te bongi n Taabati ae kakannato are e nang karokoa te tai ni motirawa are ti a kamani kariariaa ao ni kainnanoia!