E Ongeaba n Taai Nako Iesu

E bebete te ongeaba n taai nako irouia am karo?— E kangaanga n tabetai. Ko ataia ae e ongeaba Iesu iroun Iehova ao irouia ana karo aika i aon te aba?— Ko kona ni buokaki man ana katoto bwa ko na ongeaba irouia am karo e ngae ngkana e kangaanga karaoana. Ti na reiakina riki taekan aei.

Imwain rokon Iesu i aon te aba ao e maeka i karawa ma Tamana ae Iehova. Ma iai naba ana karo Iesu i aon te aba. Araia bon Ioteba ao Maria. Ko ataia bwa a kanga n riki bwa ana karo?—

E kamwaingaki maiun Iesu iroun Iehova mai karawa nako nanoni biroton Nei Maria, n te aro are e a kona iai ni bungiaki ao ni maeka i aon te aba. Bon te kakai te mwakuri aei! E a moanna n rikirake Iesu i nanoni birotoni Maria, n aron rikirakeia merimeri i nanoni biroton tinaia. E kaania ruaiwa te namwakaina imwina ao e a bungiaki Iesu. Aei aroia n riki bwa ana karo Iesu i aon te aba, Maria ma buuna ae Ioteba.

Ngke ai tibwa 12 ana ririki Iesu, ao e karaoa te bwai teuana ae kaota korakoran tangiran Tamana ae Iehova. E riki aei ngke a karaoa mwanangaia ae abwabwaki nako Ierutarem ibukin te Toa ae te Riao, Iesu ma ana utu. Ngke a nang okira aia kaawa, ao a aikoa kona Ioteba ma Maria ni kunea Iesu n taabo nako. Ko ataia bwa e mena ia?—

A kawaekoaia n okira Ierutarem Ioteba ma Maria ao ni kakaaea Iesu n taabo nako. A a rangi n raraoma kioina ngkai a aikoa kona ni kunea. Ma tenibong imwina ao a a kunea n te tembora! Ko ataia bwa bukin tera ngke e mena Iesu n te tembora?— Ibukina bwa e kona n reiakina iai taekan Tamana ae Iehova. E tangira Iehova ao e kan reiakina arona ni kakukureia. E ongeaba n taai nako Iesu iroun Iehova, e ngae ngke e a ikawai ao n ataeinimwaane. E ongeaba naba Iesu e ngae ngkana e a kangaanga aei irouna, ao e irekereke ma ruanikaini maiuna. Te koaua bwa e ongeaba naba Iesu iroun Ioteba ma Maria?— Eng, e taekinaki n te Baibara bwa e ongeaba.

Tera ae ko kona n reiakinna man ana katoto Iesu?— Ko riai n ongeaba irouia am karo e ngae ngkana e kangaanga karaoana. Ko na karaoa anne?—