E Aera Ngkai Ti Kunnikainira Raoi Nakon Ara Bobotaki?

Ko nora aroia Ana Tia Kakoaua Iehova n taamnei aika n te boroutia aei ni kunnikainia raoi ni kaean aia bobotaki? E aera ngkai ti rangi n tabeakin raoi aron ara kunnikai ao katamaroaara?

Ti kaota iai karinean Atuara. Ni koauana, e aki kaatuua ana taratara te Atua i aon taraakin tinanikura. (1 Tamuera 16:7) Ma ngkana ti botaki n taromauria, a rangi ni korakora nanora ni kani kaota karineana ao raora n onimaki. Ngkana arona bwa ti tei i matan te tia moti n te boowi, ti bae n tuoa raoi kunnikaira bwa e na kaota karinean nakoana. N aron naba anne, ti kaota karinean “te tia Motiki taekaia kaain aonaba ni bane” ae Iehova ae te Atua ao ara tabo n taromauri, n arora ni kunnikainira raoi n ara bobotaki.​—Karikani Bwaai 18:25, BG.

Ti kaotiotii iai aroaro aika raraoi aika ti maiuakin. A kaungaaki Kristian n te Baibara bwa a na kunnikainia “n te aro ae riai ma te iangoraoi” n aroia ake a “karinea te Atua.” (1 Timoteo 2:9, 10) Nanon ae ti na kunnikainira n “te aro ae riai,” bwa ti na rarawa ni bwaini kunnikai ake a kona n iangoira iai aomata bwa ti kamoamoa, ti kamatauninga ke ti kabwakabwaka. Ti buokaki naba ni bwainan “te iangoraoi,” n rinei kunnikai aika taraaraoi ao tiaki aika taraabuaka ke n rangi n riao. Ni kaineti ma booto n reirei aikai, a boni bati naba aeka ni kunnikai aika ti kona n rinei. Ti kona ni karekea “kamoamoaan ana reirei ara tia Kamaiu” ao n “neboa te Atua” tiaki tii n ara taetaenikawai ma mani kunnikaira aika taraaraoi ao ni kantara. (Tito 2:10; 1 Betero 2:12) Ngkana ti kunnikainira raoi nakon ara bobotaki, ti a kairiia iai aomata bwa a na karinea taromaurian Iehova.

Tai kariaia bwa e na tuka rokom n te Tabo n Taromauri akean am kunnikai ae bobuaka. Tiaki nanona bwa tii kunnikai aika bobuaka ke aika rangi ni kan aika riai ni bwainaki, ma a riai n itiaki ao n taraaraoi.

• E aera bwa e kakawaki arora ni kunnikainira ibukin taromaurian te Atua?

• Baikara booto n reirei aika kairi ara iango ni kaineti ma kunnikaira ao katamaroaara?