E Aera Ngkai Ti Raira te Baibara ae Te Rairai ae te Aonnaba ae Boou?

A kakamanenai ma ni boreeti ao n tibwatibwai kibun te Baibara aika kakaokoro nako Ana Tia Kakoaua Iehova i nanon ririki aika bati. Ma imwin anne, ti a noria bwa ti kainnanoa te rairai ae boou are e na buokiia aomata n reiakina “te atatai ae eti ibukin te koaua” are bon nanon te Atua ibukia aomata nako. (1 Timoteo 2:3, 4) Ngaia are n 1950, ti a moana kaotinakoan mwakoron ara Baibara n te taetae ae kamanenaaki ni boong aikai ae Te Rairai ae te Aonnaba ae Boou. E a tia n rairaki te Baibara aei n te aro ae eti raoi n taetae aika raka i aon 130 mwaitiia.

E Kainnanoaki te Baibara ae kai ota te aba iai. A bibitaki taetae imwin te tai ae maan, ao a bati rairai n te Baibara ake iai taeka aika aki mataata raoi ao a aikoa kamanenaaki ake e kangaanga te ota iai. A a tia naba ni kuneaki nira ni boki rimoa aika eti riki ao ni boraoi riki nanoia ma Baibara ake n te moantai ike a a ota riki iai aomata n te Baibara n Ebera, Aramwaike ao Kuriiti.

E kainnanoaki te Baibara ae boraoi ma ana taeka te Atua. N oneani mwin are a na bitii ana taeka te Atua aika kairaki koreaia rinanon te taamnei, a riai taan rairai ni kakaonimaki n tou mwini moani koroboki aika n te Baibara. Ma e ngae n anne, e aki kamanenaaki aran te Atua ae Iehova, n angiini kiibu n te Koroboki ae Tabu.

E kainnanoaki te Baibara ae na kamoamoaaki iai te tia Koreia. (2 Tamuera 23:2) E a tia Te Rairai ae te Aonnaba ae Boou ni kaoka aran Iehova are e oti 7,000 tabun te tai ni Baibara rimoa aika nira ni boki, n aron ae kaotaki n te katoto ae mai nano. (Taian Areru 83:18) Imwin te botumwaaka i nanon ririki aika bati, e a rangi ni kakukurei warekan te Baibara aei ao e a mataata iai ana iango te Atua. E ngae ngkana iai ke akea iroum te Baibara ae Te Rairai ae te Aonnaba ae Boou n am taetae, ma ti kaungako bwa ko na karaoa am babaire ae uaana ibukini warekan Ana Taeka Iehova ni katoabong.​—Iotua 1:8; Taian Areru 1:2, 3.

• E aera ngke ti iangoia bwa e kainnanoaki te rairai ae boou ibukin te Baibara?

• Tera te bwai ae uaana ae e riai ni karaoia ni katoabong ane e kan reiakina nanon te Atua?