KARAKI 100

Iesu N Te Oo-n-aroka

IMWIN kitanan te ruu are i eta iroun Iesu ma ana abotoro, ao a a nako n te oo-n-aroka are Ketetemane. E a bati aia tai n roroko ikai mai mwaina. N te tai aei ao e tuangia ana abotoro Iesu bwa a na teimatoa n tantani ao n tataro. E kararoaa teutana ma ngaiia, ao e a bobaraki naba i aontano n tataro.

Imwina ao e a manga okiriia ana abotoro Iesu. N am iango tera ae a karaoia ana abotoro? A tabe ni matu! Tenua ana tai Iesu n tuangia bwa a riai n tantani, ma ni katoa okina ao e a bon nonoriia naba ni matu. E taku Iesu nakoia ni kabanean okina: ‘E reke naba matumi n te tai aei? E a tau bwa e a roko te tai are N nang tauaki iai irouia au kairiribai.’

N te tai naba anne ao akea bwa e a ongo naba te aba karongoaia aomata aika bati. Noria! Ae a a roko mwaane ma aia kabaang ao aia kai! Ao a uouotii ooi bwa kaotaaia. Ngke a a uakaan, ao e a keerake naba temanna irouia ao n nako ni kawara Iesu. E kaboria ma ngaia, n aron ae ko noria ikai. Teuaei bon Iuta Itekariota! E aera ngke e kaboria ma Iesu?

E titirakinna Iesu ni kangai: ‘Iuta, ko kamwaneai n te kaboria?’ Eng, te kaboria bon te kanikina. E kaotaki nakoia mwaane ake raon Iuta bwa bon Iesu arei, are a kan taua. Mangaia are a keerake ana kairiribai Iesu ao a taua. Ma e aki kariaia Betero bwa a na taua Iesu. E buuta ana kabaang are e uouotia, ao e a orea naba iai te mwaane are i rarikina. E bootua atun teuarei, ma e bwabu taningana are te atai ni bwaka. Ma e riinga taningan teuarei Iesu ao e a mao naba.

E taku Iesu nakon Betero: ‘Kaoka am kabaang nakoni nnena. Ko aki ataia bwa I kona n tuanga Tamau bwa e na kanakomaia ngaa ma ngaa anera bwa a na kamaiuai?’ Eng e boni kona! Ma e aki tuanga te Atua Iesu ibukina bwa e ataia bwa e a bon roko te tai are e nang tauaki iai irouia ana kairiribai. Mangaia are e kariaia bwa a na kairia nako. Ti na noria bwa tera ae nang riki ngkai nakon Iesu.

Mataio 26:​36-56; Ruka 22:​39-53; Ioane 18:​1-12.