TE KAOTIOTI NAKON IOANE

1 Te kaotioti* mairoun Iesu Kristo, ae e anganna te Atua,+ bwa e na kaotii nakoia ana toro+ bwaai aika a na waetata n roko. Ao e kanakoa ana anera bwa e na kaotia rinanon taiani kanikina, nakon ana toro ae Ioane+ 2 are kaotiota ana taeka te Atua ao ana kaotioti Iesu Kristo, eng, ake bwaai ni kabane ake e nori. 3 A a kukurei akana wareware ni kabaibati n te taetae ni burabeti aei ao akana ongora taekana, ao akana kakairi ni baike a koreaki iai,+ bwa e a kaan te tai ae baireaki.

4 Ngai ae Ioane, nakoia ekaretia aika itiua+ ake n te aono n Atia:*

Ke e mena iroumi te akoi ae rianako ao te rau mairoun “Teuare iai ngkai ao iai ngkoa ao ae e na manga roko,”+ ao man taian taamnei ake itiua+ ake a mena i matan ana kaintokanuea, 5 ao mairoun Iesu Kristo, ae “te tia Kakoaua ae Kakaonimaki,”+ “te moanibung mai buakoia maate,”+ ao “te tia Tautaeka i aoia uean aonnaba.”+

Ana bwai teuare tangirira+ ao are kainaomataira man ara bure rinanon raraana+— 6 ao e karaoira bwa te tautaeka n uea+ ao ibonga*+ ibukin Atuana ae Tamana,—eng, ana bwai te mimitong ma te mwaaka n aki toki. Amen.

7 Noria! Ane e na roko ma naang,+ ao a na bane maata n noria ao a na noria naba naake a ewaria, ao a na bane barongan te aonnaba n ororei bwanibwania n rawawata ibukina.+ Eng, Amen.

8 E taku Iehova* ae te Atua: “Ngai te Arebwa ao te Omeka,*+ ae Teuare iai ngkai ao iai ngkoa ao ae e na manga roko, ae Moan te Mwaaka.”+

9 Ngai ae Ioane ae tarimi ae te tia ibuokanibwai ma ngkami n te rawawata+ ao n te tautaeka n uea+ ao n te nanomwaaka,+ ngkai te tia rimwin Iesu ngai.+ I mena n te atimwakoro ae arana Batemoti ibukin tataekinan te Atua ao kaotiotan Iesu. 10 I kaonaki n te taamnei ae raoiroi ao I roko kaanga n ana bong te Uea, ao I ongo te bwanaa ae korakora mai akuu ae ai aron tangin te buu 11 ae kangai: “Ane ko noria ao koreia n te nira ni boki ao kanakoa nakoia ekaretia ake itiua: i Ebeto,+ i Temurena,+ i Berekamo,+ i Tuateira,+ i Tareteiti,+ i Biraterebia,+ ao i Raorikeia.”+

12 I rairaki bwa N na noria bwa antai are taetae nakoiu, ao ngke I rairaki ao I nori kaintaura aika koora aika itiua,+ 13 ao e mena temanna ae kaanga natin te aomata i buakoni kaintaura,+ ae kunnikainna n te kunnikai ae rokoroko i waena, ao e kabaeaki bwabwaana n te roo ae koora. 14 Ao e mainaina atuna ma irana n aroni buraen te tiibu ae mainaina n ai aron te tino, ao a takarokaro matana n ai aron te ai,+ 15 ao waena ai aron te buraati ae raneanea+ ngkana e kabuekaki n te ai ni nnen te ai ae uramwaaka, ao bwanaana ai aroni karongoaan raan aika bati. 16 Ao e taui itoi aika itiua ni baina are te atai,+ ao e otinako mai wina te kabaang ae abwabwaki ae kakang ae uaitera wina,+ ao burana* ai aron taai ngkana e kirokiro riringana.+ 17 Ngke I noria, ao I bwaka i waena kaanga te mate.

Ao e katokaa baina are te atai i aou ao e taku: “Tai maaku. Boni ngai te Moan+ ao te Kabane,+ 18 ao teuare maiu ngai,+ ao I mate+ ngkoa, ma noria! I a maiu n aki totoki ngkai,+ ao iai irou kiingin te mate ao kiingin te Ruanimate.*+ 19 Mangaia ae korei baike ko nori, ao baika riki ngkai ao baika a na riki imwini baikai. 20 Ni kaineti ngkanne ma te bwai ae raba ae tabu, ake itoi ake itiua ake ko nori i baiu are te atai ao kaintaura ake itiua ake koora: A tei itoi ake itiua ibukia aia anera ekaretia aika itiua, ao kaintaura ake itiua a tei ibukin ekaretia aika itiua.+

2 “Ko na korea ae kangai nakon ana anera+ te ekaretia are i Ebeto:+ Aikai baika e taekin teuare taui itoi aika itiua i baina are te atai, ao e nakonako i buakoni kaintaura aika koora aika itiua:+ 2 ‘I atai am mwakuri ma am bekutata, ao nanomwaakam, ao arom n aki kona n taona nanom nakoia aomata aika buakaka, ao arom ni kataiia te koraki ake a taku bwa abotoro ngaiia,+ ma bon tiaki, ao ko kuneia bwa bon taani kewe. 3 Ko kaotiota naba te nanomwaaka, ao ko botumwaaka ibukin arau+ ao e aki bwara nanom.+ 4 Ma e ngae n anne, iai te bwai ae N na waeiko iai, bwa ko a tia ni kabuaa te tangira are reke iroum n te moantai.

5 ‘“Mangaia ae uringa aroni bwakam ae korakora ao raira nanom+ ao karaoi mwakuri ake ko karaoi n te moantai. Ma ngkana ko aki raira nanom+ ao N na nakoim ao N na kanakoa am kaintaura+ mani nnena. 6 Ma bon iai iroum te bwai ae raoiroi: bwa ko ribai aia mwakuri kaain te koraki n Aro ake raon Nikorao,+ ake I ribai naba ngai. 7 Ane iai taningana ao ke e ongo ana taeka te taamnei ae raoiroi nakoia ekaretia:+ Ane e tokanikai+ ao N na kariaia bwa e na kana uaan te kai ni kamaiu+ are n ana bwaretaiti te Atua.’

8 “Ko na korea ae kangai nakon ana anera te ekaretia are i Temurena: Aikai baika e taekin teuare ‘te Moan ao te Kabane’+ are e mate ao e a manga maiu:+ 9 ‘I ataa rawawatam ao karakon am bwai, ma ko boni kaubwai,+ ao I ataa naba aia kabuakaka te koraki ake a taku bwa I-Iutaia ngaiia, ma bon tiaki bwa bon ana tinakoka Tatan ngaiia.+ 10 Tai maakui baike ko nangi maraki iai.+ Noria! Ane e na teimatoa te Riaboro ni kaakiia tabeman i buakomi n te karabuuti bwa e aonga ni korakora kataakimi, ao kam aonga n rawawata tengaun te bong. Kaotiko bwa ko kakaonimaki ni karokoa matem, ao N na anganiko te bau are te maiu.+ 11 Ane iai taningana ao ke e ongo+ ana taeka te taamnei ae raoiroi nakoia ekaretia: Ane e tokanikai+ ao e na bon aki reke irouna te mate ae te kauoua.’+

12 “Ko na korea ae kangai nakon ana anera te ekaretia are i Berekamo: Aikai baika e taekin teuare iai irouna te kabaang ae abwabwaki ae kakang ae uaitera wina:+ 13 ‘I ataa ike ko maeka iai, bwa e mena iai ana kaintokanuea Tatan. Ma ko bon taua naba bukin arau,+ ao ko aki kakeaa onimakinau+ n ana bong naba au tia kakoaua are Antibati are kakaonimaki,+ are e kamateaki+ n te tabo are kam maeka iai ike e maeka iai Tatan.

14 ‘“Ma e ngae n anne, iai bwaai tabeua aika N na waeiko iai, bwa iai iroum ikanne te koraki aika taua bukin ana reirei Baraam+ are reireina Baraka+ bwa e na kaaki te bwai ni kabwakabwaka i mataia tibun Iteraera, bwa a na kang baike a kareanaki nakoia bouannanti ma ni karaoa te wene ni bure.*+ 15 Ao n aron anne, iai naba iroum te koraki aika taua bukin aia reirei te koraki n Aro ake raon Nikorao.+ 16 Mangaia ae raira nanom. Ma ngkana ko aki ao N na waekoa n roko iroum ao N na buakania n te kabaang ae abwabwaki ae otinako mai wiu.+

17 “‘Ane iai taningana ao ke e ongo ana taeka te taamnei ae raoiroi nakoia ekaretia:+ Ane e tokanikai+ ao N na anganna te manna teutana man are karabaaki,+ ao N na anganna te atibu ae mainaina, ao iai te ara ae boou ae koreaki i aon te atibu aei ae akea temanna ae ataia ma tii te aomata are anganaki.’

18 “Ko na korea ae kangai nakon ana anera te ekaretia are i Tuateira:+ Aikai baika e taekin Natin te Atua, are a takarokaro matana n ai aron te ai,+ ao waena ai aron te buraati ae raneanea:+ 19 ‘I atai am mwakuri, ao am tangira ao am onimaki ao am mwakuri ni minita ao nanomwaakam, ao am mwakuri aika ngkai, bwa a bati riki nakon ake ko karaoi n te moantai.

20 “‘Ma e ngae n anne, iai te bwai ae N na waeiko iai, bwa ko taona nanom nakon Nei Ietebera,+ are e aranna i bon irouna bwa te burabeti n aine, ao e reireinia au toro ma ni burebureiia bwa a na karaoa te wene ni bure*+ ao a na kang baike a kareanaki nakoia bouannanti. 21 Ao I anganna ana tai n rairannano, ma e aki kan raira nanona man ana wene ni bure.* 22 Noria! N nang kaaoraka neiei, ao N na karokoa te rawawata ae korakora i aoia te koraki ake a wene ni kimoa ma neiei, ngkana a aki rairi nanoia man ana mwakuri neiei are e burebureiia iai. 23 Ao N na tiringia natina n te aoraki ae kamamate, bwa a aonga n ataia ekaretia ni kabane bwa boni ngai teuae tutuoi iango aika raba* ma naano, ao N na anganingkami n ai aron ami mwakuri n tatabemaningkami nako.+

24 “‘Ma I kangai nakoimi ngkami ake i Tuateira ake te koraki nako ake kam aki butimwaea ana reirei Ietebera, ao kam aki atai baika atongaki irouia temwangina bwa “ana bwai Tatan aika nano”:+ N na aki katokaa te rawawata teuana i aomi. 25 Ma e ngae n anne, taua ni kamatoaa te bwai ane iroumi ni karokoa rokou.+ 26 Ao ane e tokanikai ma ni kakairi n au mwakuri ni karokoa te toki, ao N na anganna te mwaaka n tautaeka i aoia natannaomata,+ 27 n arou naba ae I anganaki te mwaaka mairoun Tamau, ao ane e na kaiririia aomata n aron te tia kawakintiibu ae iai okona ae te biti,+ n te aro are a na maerikiriki n aroni mwangko aika taano. 28 Ao N na anganna te itoi ni ngaina.+ 29 Ane iai taningana ao ke e ongo ana taeka te taamnei ae raoiroi nakoia ekaretia.’

3 “Ko na korea ae kangai nakon ana anera te ekaretia are i Tareteiti: Aikai baika e taekin teuare iai irouna taamnein te Atua aika itiua+ ao itoi aika itiua:+ ‘I atai am mwakuri bwa ko atongaki* bwa ko maiu, ma ko boni mate.+ 2 Taratara raoi+ ao kakorakorai bwaai akana nangi mate, bwa I noria bwa a tuai ni kororaoi* am mwakuri aika ko karaoi i matan Atuau. 3 Mangaia ae teimatoa n uringi baike ko karekei ao baike ko ongo, ao teimatoa ni kawakini,+ ao raira nanom. Ma ngkana ko bon aki kamarurungko ao N na roko n ai aron te tia iraa,+ ao ane ko na bon aki ataia naba teutana bwa te tai raa ae N na roko iai iroum.+

4 “‘Ma e ngae n anne, iai tabeman* i Tareteiti ake a aki kabaarekai aia kunnikai,+ ao a na nakonako ma ngai ni bwaimainaina,+ ibukina bwa a bon tau nako iai. 5 Ane e tokanikai+ ao e na kunnikainna n te kunnikai ae mainaina,+ ao N na aki kamauna arana man te boki ni kamaiu,+ ma N na tei ibukin arana i matan Tamau ao i mataia ana anera.+ 6 Ane iai taningana ao ke e ongo ana taeka te taamnei ae raoiroi nakoia ekaretia.’

7 “Ko na korea ae kangai nakon ana anera te ekaretia are i Biraterebia: Aikai baika e taekin teuare tabu,+ are koaua,+ are iai irouna ana kiing Tawita,+ are e kauki mataroa n te aro are akea ae e na kaini, ao e kaini n te aro are akea ae e na kauki: 8 ‘I atai am mwakuri—noria! I kaaki imwaim te mataroa ae uki,+ ae akea ae e kona ni kainna. Ao I ataia ae iai korakoram teutana ao ko kawakina au taeka ao ko aki kakeaa arau. 9 Noria! N na tebonia te koraki ake kaain ana tinakoka Tatan ake a taku bwa I-Iutaia ngaiia, ma bon tiaki+ bwa a kewe—noria! N na tebonia bwa a na roko ni bobaraaki i waem ni karineko ao N na kaotia nakoia bwa I tangiriko. 10 N na kawakiniko naba n te tai ni kataaki+ are e na roko i aon te aonnaba ni kabutaa, ni kataiia aomata ake a maeka n te aonnaba, ibukina bwa ko mutiakina taekan nanomwaakau.*+ 11 N na waekoa n roko.+ Teimatoa n taua ni kamatoaa te bwai ane iroum, bwa e aonga n aki anaaki am baunuea iroun temanna.+

12 “‘Ao N na karaoa ane e tokanikai—bwa te boua n ana tembora Atuau, ao akea te bwai ae e na kanakoa mai iai, ao N na korea i aon teuaei aran Atuau+ ao aran ana kaawa Atuau, ae te Ierutarem ae Boou,+ ae ruo mai karawa mairoun Atuau, ao arau naba ae boou.+ 13 Ane iai taningana ao ke e ongo ana taeka te taamnei ae raoiroi nakoia ekaretia.’

14 “Ko na korea ae kangai nakon ana anera te ekaretia are i Raorikeia:+ Aikai baika e taekin te Amen,+ are te tia kakoaua+ ae kakaonimaki ao e koaua,+ are ana moani karikibwai te Atua:+ 15 ‘I atai am mwakuri, bwa ko aki mwaitoro ao ko aki bue. Ko bia mwaitoro ke ni bue. 16 Mangaia ae ngkai ko abue ao ko aki mwaitoro+ ke ni bue,+ ao N nangi mumutaiko mai wiu. 17 Ibukina bwa ko kangai, “I kaubwai+ ao a rereke kaubwaiu ao I aki kainnanoa te bwai teuana,” ma ko aki ataia ae ko kaawa ao ko kananoanga ao ko maiu ni kainnano ao ko mataki ao akea karabaam, 18 ao I reireiniko bwa ko na kabooa irou te koora ae kaitiakaki n te ai bwa ko aonga ni kaubwai, ao kunnikai aika mainaina bwa ko aonga ni kunnikaiko ao e na aki otara te baere ko na kamaamaeaki iai ngkai akea karabaam,+ ao te kabira ni mata bwa ko na kabira iai matam+ bwa ko aonga n noraaba.+

19 “‘I boaiia akana I tangiriia ni kabane ma n angania te reirei ni kaetieti.+ Mangaia ae ko na ingainga ao raira nanom.+ 20 Noria! I tei i matan te mataroa ni karebwerebwe. Ngkana iai ae e ongo bwanaau ma ni kauka te mataroa, ao N na rin n ana auti ao N na amwarake ni katairiki ma ngaia, ao ngaia ma ngai. 21 Ane e tokanikai+ ao N na kariaia bwa e na tekateka ma ngai n au kaintokanuea,+ n arou naba ae I tokanikai ao I tekateka+ ma Tamau n ana kaintokanuea. 22 Ane iai taningana ao ke e ongo ana taeka te taamnei ae raoiroi nakoia ekaretia.’”

4 Imwin aei ao akea bwa I a nora te mataroa ae uki i karawa, ao te moani bwanaa are I ongo ae taetae nakoiu ai aron tangin te buu, ae kangai: “Nakomai rierake, ao N na kaotii nakoim bwaai aika a na riki.” 2 Imwin aei ao I rina ni kairaki n te taamnei ae raoiroi, ao akea bwa I a nora te kaintokanuea ae mena ni nnena i karawa, ao iai ae e tekateka i aona.+ 3 Ao taraan Teuare tekateka iai, ai aron te atibu ae te iatiba*+ ma te atibu ae te tarerio,* ao e otabwaniniaki te kaintokanuea n nei wirara ae ai aron taraan te atibu ae te emerote.*+

4 E otabwaniniaki te kaintokanuea arei ni kaintokanuea aika 24, ao I noriia unimwaane aika 24+ aika kunnikaiaki ni kunnikai aika mainaina, n tekateka i aoni kaintokanuea aikai, ao a toka baunuea aika koora i aon atuia. 5 E nako man te kaintokanuea te iti+ ma te baa ao bwanaa,+ ao iai taura aika itiua aika taian ai aika ura i matan te kaintokanuea, ao a tei baikai ibukin taamnein te Atua aika itiua.+ 6 Iai te bwai ae kaanga marawa ae te kiraati+ ae ai aron te kirutitaro,* i matan te kaintokanuea.

E nukaaki te kaintokanuea* ma n otabwaniniaki irouia baika maiu aika aman+ aika buta ni maata i moaia ao i akuia. 7 Te moan ni baike a maiu ai aron te raian,+ ao te kauoman ni baike a maiu ai aron te kao mwaane ae ataei,+ ao iai ubun are te kateniman ni baike a maiu+ ae ai aron ubun te mwaane, ao te kaaman ni baike a maiu+ ai aron te ikare ae kikiba.+ 8 Ao kaka oneai baia ni kiba, baika maiu aika aman aikai, ao a buta baia ni maata, i aoia ao i aaia.+ Ao a teimatoa ni kangai ni ngaina ao ni bong: “E tabu, e tabu, e tabu Iehova*+ ae te Atua ae Moan te Mwaaka, are iai ngkoa, ao iai ngkai ao ae e na manga roko.”+

9 Ni katoatai are a anga iai te nebonebo ma te karinerine ma te katituaraoi baika maiu aikai, nakon Teuare tekateka i aon te kaintokanuea, are Teuare maiu n aki totoki,+ 10 ao a kakatorobubua ni bobaraaki unimwaane ake 24+ i matan Teuare tekateka i aon te kaintokanuea, ao a taromauria Teuare maiu n aki totoki, ao a tewenakoi aia baunuea nako matan te kaintokanuea, ao a kangai: 11 “Ko riai n anganaki te neboaki+ ma te karineaki+ ma te mwaaka,+ ngkoe ae Iehova* ae Atuara, ibukina bwa ko karikii bwaai ni kabane,+ ao ibukin nanom, ao a a riki baikai bwa ko karikii.”

5 Ao I nora te nira ni boki ae korobokiaki nanona ao akuna ao e kabaeaki ni kamatoaaki ni bwaai ni kanikina aika itiua, ao e mena i bain Teuare tekateka i aon te kaintokanuea+ ae baina are te atai. 2 Ao I nora te anera ae korakora bwa e kangai n te bwanaa ae nene: “Antai ae tau ni kauka te nira ni boki ma ni kabwarai bwaai ni kanikina ake iai?” 3 Ma bon akea temanna i karawa ke i aon te aba ke i aantano ae e kona ni kauka te nira ni boki ke n taraia ao ni warekia. 4 Ao I korakai n tang ibukina bwa akea temanna ae tau ni kauka te nira ni boki ke n taraia ao ni warekia. 5 Ma e taku nakoiu temanna mai buakoia unimwaane akekei: “Tai tang. Noria! E tokanikai+ te Raian man te baronga are Iuta,+ are wakaan+ Tawita,+ mangaia ae e tau ni kauka te nira ni boki ma bwaai ni kanikina ake iai ake itiua.”

6 Ao I nora te tiibutetei+ ae kaanga e a tia ni kamateaki,+ ae tei n uakaan ma* te kaintokanuea ao baike a maiu ake aman ao unimwaane,+ ao iai itiai korona ao itiua matana, ao a tei maata akanne ibukin taamnein te Atua aika itiua+ ake a a tia ni kanakoaki nakon te aonnaba ni kabutaa. 7 E aki tabwara te Tiibutetei ma e a keerake naba n anaa te nira ni boki mai bain Teuare tekateka n te kaintokanuea, are baina are te atai.+ 8 Ngke e anaa te nira ni boki, ao a katorobubua ni bobaraaki baike a maiu ake aman ao unimwaane ake 24+ i matan te Tiibutetei, ao a toa ni kaka teuana te abi ao boora aika koora aika on ni baika boiarara. (A tei baika boiarara ibukin aia tataro te koraki aika itiaki.*)+ 9 Ao a anenea te kuna ae boou+ ni kangai: “Ko bon tau n anaa te nira ni boki ao ni kauki bwaai ni kanikina ake iai, bwa ko kamateaki ao ko kabooia aomata n raraam bwa ana bwai te Atua+ mai buakoia baronga nako ma taetae ma natannaomata ma botannaomata,+ 10 ao ko karaoiia bwa te tautaeka n uea+ ao ibonga* ibukin Atuara,+ ao a na kairiri bwa ueea+ n tautaekana te aonnaba.”

11 Ao I noriia anera aika rangi ni bati n otabwaninia te kaintokanuea ma baike a maiu ake aman, ao n otabwaninia unimwaane, ao I ongo naba bwanaaia. Mwaitiia bon irabwi ma irabwi tenga* ao nga ma nga,+ 12 ao a kangai n te bwanaa ae korakora: “E bon tau n reke iroun te Tiibutetei are kamateaki,+ te mwaaka ma te kaubwai ma te wanawana ma te korakora ma te karineaki ma te mimitong ma te karaoiroaki.”+

13 Ao I ongo bwa a kangai bwaai ni kabane aika karikaki, i karawa ao i aon te aba ao i aantano+ ao i marawa, eng, bwaai ni kabane ake a mena iai: “Ana bwai Teuare tekateka i aon te kaintokanuea+ ma te Tiibutetei+ te karaoiroaki ma te karineaki+ ma te mimitong ao te mwaaka n aki totoki.”+ 14 Ao a kangai baike a maiu ake aman: “Amen!” ao a katorobubua ni bobaraaki unimwaane ma n taromauri.

6 Ao I nora te Tiibutetei+ ngke e kauka teuana mai buakoni bwaai ni kanikina ake itiua,+ ao I ongo bwa e kangai temanna mai buakoia baike a maiu ake aman+ n te bwanaa ae ai aron rebwen te baa: “Nakomai!” 2 Ao akea bwa I a nora te aoti ae mainaina,+ ao iai ana kainikatebe teuare toka i aona, ao e anganaki te baunuea,+ ao e mwananga bwa e na bon tokanikai.+

3 Ngke e kauka te kauoua ni kanikina, ao I ongo bwa e kangai are te kauoman mai buakoia baike a maiu:+ “Nakomai!” 4 Ao e a manga roko te aoti temanna ae uraura, ao e kariaiakaki teuare toka i aona bwa e na uotaanako te rau man te aonnaba bwa a aonga n ikamamate aomata, ao e anganaki te kabaang ae abwabwaki.+

5 Ngke e kauka te katenua ni kanikina,+ ao I ongo bwa e kangai are te kateniman mai buakoia baike a maiu:+ “Nakomai!” Ao akea bwa I a nora te aoti ae roroo, ao iai te kainikatine i bain teuare toka i aona. 6 I ongo te bwanaa ae kaanga mai buakoia baike a maiu ake aman ae kangai: “Boon teuana te kuate* ni uita teuana te tenariati,*+ ao boon tenua te kuate ni baare teuana te tenariati, ao tai tuka kakarekean te oera ae te oriwa ma te wain.”+

7 Ngke e kauka te kaaua ni kanikina, ao I ongo bwanaan are te kaaman mai buakoia baike a maiu bwa e kangai:+ “Nakomai!” 8 Ao akea bwa I a nora te aoti ae maii, ao aran teuare toka i aona, te Mate. Ao e rimwiaki iroun te Ruanimate* n uakaan ma ngaia. Ao a anganaki te mwaaka i aoni kaamwakoron te aonnaba, bwa a na tiritiri n te kabaang ae abwabwaki ao n te rongo+ ao n te aoraki ae kamamate ao irouia maan ni kaakang.+

9 Ngke e kauka te kanimaua ni kanikina, ao I nori raraaia*+ te koraki ake a kamateaki ae mena i nanoaan te baonikarea,+ ake a kamateaki ibukini kakaonimakia nakon ana taeka te Atua, ao ibukin aia mwakuri ni kaotioti are a kakaraoia.+ 10 A takarua n te bwanaa ae korakora, ni kangai: “Te Uea ae Moan te Rietata ae ko tabu ma ni koaua,+ n ningai te tai ae ko nangi motikitaeka iai ao n irantangai raraara mairouia te koraki aika maeka n te aonnaba?”+ 11 Ao a anganaki te kamwarai ae mainaina n tatabemania nako,+ ao a tuangaki bwa a na motirawa ni kamaania riki teutana, ni kakakoroi mwaitiia raoia n toro ma tariia ake a nang kamateaki naba n ai aroia.+

12 Ao I noria ngke e kauka te kaonoua ni kanikina, ao e riki te mwaeiei ae korakora, ao e a roroo taai n ai aron te raerobwa* ae karaoaki mani buraen te man,* ao e a uraura namwakaina n ai aron te raraa,+ 13 ao a a bwaka itoini karawa nako aon te aba, n ai aron te aroka ae te biiku ngkana e ioioaki ni kabwakaaki uaana aika koroubu, n te ang ae korakora. 14 Ao e buanako karawa n ai aron te nira ni boki ngkana e rukumaki,+ ao a bane ni mwemwekaki nako mani nneia maunga ao abamwakoro.+ 15 Ao a karabaia n taian nangananga ao i buakon taiani bwaa ake ni maunga ueea ake n te aonnaba, bwakuaku, mataniwi n te taanga ni buaka, naake a kaubwai, naake a korakora, tooro ni kabane, ao aomata ake a inaomata ni kabane.+ 16 Ao a kaokioka ae kangai nakoni maunga ao taiani bwaa: “Bwakarira+ ao karabaira mai matan Teuare tekateka i aon te kaintokanuea+ ao man unin te Tiibutetei,+ 17 ibukina bwa e a roko te bong ae kakannato ae bongin unia,+ ao ai antai ae kona n tei?”+

7 Imwin aei ao I noriia anera aika aman aika tei ni maninganingan te aonnaba ake aua, ao a taui ni kamatoai angin te aonnaba ake aua, bwa e na aki kare te ang nakon te aonnaba ke nako marawa ke nakon te aroka tekaina. 2 Ao I nora te anera temanna bwa e kaotirake mai ike e oti iai taai,* ao iai irouna te kai ni kanikina ae ana bwai te Atua ae maiu, ao e takarua n te bwanaa ae korakora nakoia anera ake aman ake a kariaiakaki bwa a na urua te aonnaba ao marawa, 3 ni kangai: “Tai urua te aonnaba ke marawa ke taian aroka, ni karokoa tiara ni kanikinaeia+ ana toro Atuara i aon ramwaia.”+

4 Ao I ongo bwa mwaitiia te koraki ake a kanikinaeaki, bon 144,000,+ ao a kanikinaeaki man aia baronga nako tibun Iteraera:+

5 A kanikinaeaki 12,000 man te baronga are Iuta,

12,000 man te baronga are Reuben,

12,000 man te baronga are Kata,

6 12,000 man te baronga are Atera,

12,000 man te baronga are Nabetari,

12,000 man te baronga are Manate,+

7 12,000 man te baronga are Timeon,

12,000 man te baronga are Rewi,

12,000 man te baronga are Itakara,

8 12,000 man te baronga are Teburun,

12,000 man te baronga are Ioteba,

ao 12,000 man te baronga are Beniamin aika kanikinaeaki.

9 Imwin aei ao akea bwa I a noriia te koraki ae uanao, ae akea temanna ae kona ni warekiia. A nako mai buakoia natannaomata ma baronga ma botannaomata ma taian taetae,+ ao a tei i matan te kaintokanuea ao i matan te Tiibutetei, ao a kunnikainia n te kamwarai ae mainaina,+ ao baani baam i nanoni baia.+ 10 Ao a tatakarua n te bwanaa ae korakora ni kangai: “Ti bae iroun Atuara ibukini kamaiuara, are e tekateka i aon te kaintokanuea,+ ao iroun te Tiibutetei.”+

11 A bane anera n tei n otabwaninia te kaintokanuea ao n otabwaninia unimwaane akekei+ ma baike a maiu ake aman, ao a katorobubua ni bobaraaki i matan te kaintokanuea ma n taromauria te Atua, 12 ni kangai: “Amen! Ana bwai Atuara te karaoiroaki ma te neboaki ma te wanawana ma te katituaraoaki ma te karineaki ma te mwaaka ma te korakora, n aki totoki.+ Amen.”

13 Ao e kaekaai temanna mai buakoia unimwaane akekei ni kangai: “Antai te koraki aikai aika kunnikainia n te kamwarai ae mainaina,+ ao a nako mai ia?” 14 Ao I taku naba ngkekei nakoina: “Au uea, ko bon ataia ngkoe.” Ao e taku nakoiu: “A nako te koraki aikai mai buakon te rawawata ae korakora,+ ao a a tia n teboki aia kamwarai ao ni kamainainai n raraan te Tiibutetei.+ 15 Anne bukina ae a mena iai i matan ana kaintokanuea te Atua, ao ni beku irouna n ana tembora ni ngaina ao ni bong, ao e na taakina ana umwanrianna i aoia+ Teuae tekateka i aon te kaintokanuea.+ 16 A na aki manga baki ke n taka, a na aki naba rotakibuaka n riringan taai ke n te kabuebue ae korakora,+ 17 ibukina bwa e na kawakinia+ te Tiibutetei+ are mena i rarikin* te kaintokanuea, ao e na kairiia nakoni koburake n ran ni kamaiu.+ Ao e na kaoa te rannimata ni kabane mai mataia te Atua.”+

8 Ngke e+ kauka te kaitiua ni kanikina,+ ao e boo te kainabwabu i karawa i nanon tao te itera n aoa. 2 Ao I noriia anera aika itiman+ aika tei i matan te Atua, ao a anganaki buu aika itiua.

3 Ao e roko te anera riki temanna ao e tei i rarikin te baonikarea,+ ao e taua te bwai ni kabueki baika boiarara ae te koora, ao e anganaki baika boiarara aika rangi ni bati+ bwa e na kareanna i aon te baonikarea are te koora+ are i matan te kaintokanuea, ngke a ongoraeaki aia tataro te koraki aika itiaki* ni kabane. 4 Ao e aetorake bubuni baika boiarara mai bain te anera, ma aia tataro+ te koraki aika itiaki,* nako matan te Atua. 5 Ma e anaa te bwai ni kabueki baika boiarara te anera, ao e kanoaia n te ai man te baonikarea ao e karenakoa te ai nako aon te aba. Ao akea bwa e a rebwe te baa ao e a itirua karawa ao a a taetae bwanaa,+ ao e a mwaeiei aon te aba. 6 Ao a katauraoiia anera ake itiman ake iai irouia buu ake itiua,+ bwa a na katang.

7 E katanga ana buu are te moan anera. Ao e kabwakaaki nako aon te aba te karau ae te aiti ma te ai aika renganaki n te raraa,+ ao e kabuekaki katenimwakoron aon te aba, ao a kabuekaki katenimwakoroni mwaitin aroka, ao a bane ni kabuekaki aroka aika kiriin.+

8 E katanga ana buu te kauoman n anera. Ao e karenakoaki nako marawa te bwai ae ai aron te maunga ae totoa ae urarake n te ai.+ Ao e riki bwa te raraa katenimwakoroni marawa,+ 9 ao a mate katenimwakoroni mwaitiia maan aika maiu i marawa,+ ao a urubekebeke katenimwakoroni mwaitini kaibuke.

10 E katanga ana buu te kateniman n anera. Ao e bwaka mai karawa te itoi ae totoa ae ura n ai aron te taura, ao e bwaka i aoni katenimwakoroni mwaitini karaanga ao i aoni koburake n ran.+ 11 Aran te itoi aei bon te Mao. Ao a a mao katenimwakoron raan, ao a bati aomata aika mate man te ran, ibukina bwa a kamaoaki raan.+

12 E katanga ana buu te kaaman n anera. Ao e oreaki ni karooaki katenimwakoron taai+ ao katenimwakoron namwakaina ao katenimwakoroni mwaitin itoi, bwa a aonga ni karooaki katenimwakoroia+ ao e aonga n aki oota katenimwakoron te ngaina iai, ao ai aron naba te bong.

13 Ao akea bwa I a nora te ikare bwa e kibakiba i nukani karawa* ao I ongo bwa e kangai n te bwanaa ae korakora: “Te rekenikai, te rekenikai, te rekenikai,+ nakoia te koraki ake a maeka i aon te aba, ngkai a nang katang aia buu anera aika teniman!”+

9 E katanga ana buu te kaniman n anera.+ Ao I nora te itoi ae bwaka mai karawa nako aon te aba, ao e anganaki kiingin te mwarua are te kinono.*+ 2 E kauka te mwarua are te kinono,* ao e aetorake te bubu man te mwarua ae ai aroni bubuni nnen te ai ae uramwaaka, ao e a karooaki taai+ ao te ea naba, ni bubun te mwarua. 3 Ao a otinako rokati man te bubu nako aon te aba,+ ao a anganaki te mwaaka, ae titeboo ma mwaakaia tikaobian aika i aon te aba. 4 A tuangaki bwa a na aki uruani arokan aon te aba ke uteute ke kaai, ma a na tii kammarakiia te koraki ake a aki kanikinaeaki ramwaia n ana kai ni kanikina te Atua.+

5 Ao a aki kariaiakaki rokati bwa a na tiringia naakai, ma a na kammarakiia nimaua namwakaina, ao kammarakaia ai aroni kammarakan te aomata ae tenaaki iroun te tikaobian.+ 6 Ni boong akanne ao a na ukoukora te anga aomata ae a na mate iai ma a na aki kunea, ao a na kani mate ma e na bibirinako te mate mairouia.

7 Ao taraakia rokati aikai ai aroia aoti aika tauraoi nakon te buaka,+ ao iai i aon atuia baunuea aika kaanga koora, ao ubuia kaanga ubuia aomata, 8 ao iai iraia ae kaanga iraia aine. Ao wia kaanga wia raian,+ 9 ao iai nangoani bwabwaaia ae kaanga te nangoa ni bwabwaa ae te biti. Ao karongoaani baia ni kiba ai aroni karongoaaia kaa ni buaka aika katikaki irouia aoti aika kabirimwaakaia nakon te buaka.+ 10 Ao iai naba bukia ma aia kainnewa aika boitin n aroia tikaobian, ao iai mwaakaia ni bukia ae a kona ni kammarakiia iai aomata nimaua namwakaina.+ 11 Ao iai te uea i aoia, ae aneran te kinono.*+ Arana Abaton* n te taetae n Ebera, ma Aborion* n te taetae ni Kuriiti.

12 E a tia n nako te moan rekenikai. Noria! A na roko uoua riki rekenikai+ imwini baikai.

13 E katanga ana buu+ te kaonoman n anera.+ Ao I ongo te bwanaa teuana mai buakoni kooro* ake n te baonikarea are te koora+ are mena i matan te Atua, 14 ao e kangai nakon te kaonoman n anera are iai irouna te buu: “Kabwaraia anera aika aman aika kabaeaki i rarikin te karaanga are abwabwaki are Iuberetiti.”+ 15 Ao a kabwaraaki anera ake aman, ake a a tia ni katauraoaki imwain te aoa ma te bong ma te namwakaina ma te ririki, bwa a na kamateia katenimwakoroni mwaitiia aomata.

16 I ongo bwa mwaitiia kaain te taanga ni buaka ake a toka i aoia aoti, bon uabubua te mirion.* 17 Ao aei aroia aoti ake I noriia n te miitara ma te koraki ake a toka i aoia: Iai nangoani bwabwaaia naakai aika uraura n ai aron te ai ao a buruu ao a babobo, ao atuia aoti ai aron atuia raian,+ ao e otinako mai wia te ai ma te bubu ma te burimton.* 18 A mate katenimwakoroni mwaitiia aomata ni baika kamamate aika tenua aikai, aika te ai ao te bubu ao te burimton, ake a otinako mai wia. 19 Bwa e mena mwaakaia aoti aikai i wia ao i bukia, bwa bukia ai aroia naeta aika iai atuia, ao a kammarakiia aomata ni baikai.

20 Ma nikiraia te koraki ake a aki tiringaki ni baika kamamate aikai, a aki rairi nanoia mani mwakuri ake a karaoi ni baia, ao a aki katoka taromauriaia taimonio ma bouannanti ake koora ma tirewa, ma buraati, ma atibu ao kaai, ake a aki kona n noraaba ke n ongo ke n nakonako.+ 21 Ao a aki rairi nanoia man aia tiritiri ke man aia tabunea, ke man aia wene ni bure* ke man aia mwakuri n iraa.

10 Ao I nora te anera riki temanna ae korakora ae ruo mai karawa, ae ramwaneaki* n te nang, ao e mena nei wirara i etan atuna, ao ubuna ai aron taai,+ ao rangana* ai aroni boua aika taian ai, 2 ao iai te nira ni boki ae uarereke ae uki i nanoni baina. Ao e kaaki waena are te atai i aoni marawa, ma waena are te maing i aon te aba, 3 ao e takarua n te bwanaa ae korakora n ai aroni bekoraran te raian.+ Ao ngke e takarua, ao a rebwe baa ake itiua+ ao a taetae ni bwanaaia.

4 Ao ngke a taetae baa ake itiua, ao ngke N nang korei ao I ongo te bwanaa mai karawa+ ae kangai: “Kaini baike a taekini baa ake itiua kaanga ni kanikinaei, ao tai korei.” 5 E katea baina are te atai nako karawa, te anera are I noria bwa e tei i aoni marawa ao i aon te aba, 6 ao e taetae n tuea iroun Teuare maiu n aki totoki,+ are e karika karawa ma kanoana ao te aonnaba ma kanoana ao marawa ma kanoana,+ ni kangai: “E a toki te tai n tataninga. 7 Ma ni boong ake e nang katanga iai ana buu+ te anera are te kaitiman,+ ao e a kakoroaki bukin te bwai ae raba ae tabu+ are e tataekinna te Atua bwa te rongorongo ae raoiroi nakoia ana toro ake burabeti.”+

8 Ao e a manga taetae riki nakoiu te bwanaa are I ongo mai karawa+ ao e kangai: “Naako anaa te nira ni boki are uki are mena i bain te anera are tei i aoni marawa ao i aon te aba.”+ 9 Ao I nako ni kawara te anera ao I tuangnga bwa e na anganai te nira ni boki are uarereke arei. Ao e taku nakoiu: “Anaia ao kanna,+ ao ane e na mao iai birotom, ma e na karewe i wim n ai aron aia karewe manibeeru.” 10 I anaa te nira ni boki are uarereke mai bain te anera ao I kanna,+ ao e karewe i wiu n ai aron aia karewe manibeeru,+ ma ngke I a tia ni kanna, ao e a mao iai birotou. 11 Ao a taku nakoiu: “Ko riai n taetae ni burabeti riki ni kaineti ma botannaomata ao natannaomata ma taian taetae ao ueea aika bati.”

11 Ao I anganaki te kaibwabwaa ae ai aron te oko*+ ao e taku: “Teirake ao anaa abwakin ana tembora* te Atua ao te baonikarea ao warekiia te koraki ake a taromauri i nanona. 2 Ma ibukini ngkanne te katawanang are i tinanikun te tembora, katikua ao tai anaa abwakina, ibukina bwa a a tia n anganaki natannaomata, ao ane a na toutoua te kaawa ae tabu+ i aani waeia i nanon 42 namwakaina.+ 3 N na kanakoia uoman au tia kakoaua bwa a na taetae ni burabeti i nanon 1,260 te bong, aika kunnikainia n te raerobwa.”* 4 A kaikonakaki naakai n aroka ake oriwa ake uakai+ ao kaintaura aika uoua,+ ao a tei i matan Uean aonnaba.+

5 Ngkana iai ae e kani kammarakiia naakai, ao e otinako te ai mai wia ni kamaunaia akana kairiribai nakoia. Ngkana iai ae e kani kammarakiia, ao e na kamateaki n te aro aei. 6 Iai irouia naakai te mwaaka ni bonota karawa,+ bwa e aonga n aki bwaka te karau+ n aia bongi n taetae ni burabeti, ao iai mwaakaia i aon raan n te aro are a kona ni bitii nakon te raraa,+ ao mwaakaia n orea aon te aba ni baika kamamate n aekaia nako n taai ake a bon taku.

7 Ngkana e a bane aia kaotioti, ao e nangi buakania te man ae tiritiri ae waerake man te kinono,* ao e na tokanikai i aoia ao e na kamateia.+ 8 Ao a na wene rabwataia n te kawai ae totouaki are kawain te kaawa are kakannato are aranaki n te aro ni kaikonaki bwa Totom ao Aikubita, ike e kamateaki naba iai aia Uea i aon te kai. 9 Ao a na taratarai rabwataia naakai i nanon tenua ao te iterana te bong,+ aomata mai buakoia botannaomata ma baronga ma taian taetae ma natannaomata, ao a na aki kariaia bwa a na kaweneaki rabwataia n te ruanimate. 10 Ao ane a na kimwareirei aomata aika maeka i aon te aba ao a na bukamaru ni mateia naakai, ao a na kanakoi bwaintangira i marenaia, ibukina bwa a a tia burabeti aika uoman aikai ni kammarakiia aomata aika maeka i aon te aba.

11 Imwin tenua ao te iterana te bong ao e rin i nanoia te korakora ae te maiu* are mairoun te Atua,+ ao a teirake i aoni waeia, ao a a rotaki n te maaku ae korakora te koraki ake a noriia. 12 Ao a ongo te bwanaa ae korakora mai karawa bwa e kangai nakoia: “Nakomai rierake.” Ao a rierake nako karawa n te nang, ao a noraki irouia* taani kairiribai nakoia. 13 N te aoa naba arei, ao e roko mwaeiein aon te aba ae korakora, ao e bwaka katebwinani mwakoron te kaawa, ao a mate 7,000 aomata n te mwaeiei, ao a a maaku ake nikiraia ao a neboa te Atua are i karawa.

14 E a tia te kauoua n rekenikai.+ Noria! E a waekoa n roko te katenua n rekenikai.

15 E katanga ana buu te kaitiman n anera.+ Ao a taetae bwanaa aika korakora i karawa ni kangai: “E a riki te tautaeka n uea ae tautaekania kaain te aonnaba, bwa ana Tautaeka n Uea ara Uea+ ma ana Kristo,+ ao e na tautaeka bwa te uea n aki totoki.”+

16 Ao a katorobubua ni bobaraaki n taromauria te Atua, unimwaane ake 24+ ake a tekateka i aon aia kaintokanuea i matan te Atua, 17 ao a kangai: “Ti katituaraoiko Iehova* ae te Atua ae Moan te Mwaaka, are teuare iai ngkai+ ao iai ngkoa, ibukina bwa ko a tia ni kabongana mwaakam ae korakora ao ni moana am tautaeka bwa te uea.+ 18 Ma a un natannaomata, ao e roko unim ma te tai ae baireaki ibukia maate bwa a na motikaki iai taekaia, ao te tai are ko na angania iai am toro ake burabeti+ kaniwangaia,+ ma te koraki aika itiaki* ao te koraki aika maaka aram, aika mangori ao aika kakannato, ao te tai naba are ko na kamaunaia iai te koraki ake a urua* te aonnaba.”+

19 Ao e kaukaki ana tembora* te Atua i karawa, ao e noraki te ati ni berita n ana tembora.+ Ao e itirua ao e rebwe te baa ao a taetae bwanaa, ao e riki te mwaeiei ma te karau ae te aiti ae korakora.

12 Ao e noraki te kanikina i karawa ae rianako arona: Ae te aine+ ae ramwaneaki* n taai, ao e mena namwakaina i aani waena, ao iai te baunuea i aon atuna, aika itoi aika 12, 2 ao e bikoukou. Ao e takarua n tang bwa e ariri ni maraki bwa e nangi bung.

3 Akea bwa e a manga noraki te kanikina riki teuana i karawa, ae te rakon* ae korakora ae uraura,+ ae itiua atuna ao tengauni korona ao iai baunuea aika itiua i aon atuna nako, 4 ao bukina e uaakina katenimwakoron itoini+ karawa, ao e tewenakoi nako aon te aba.+ Ao e teimatoa n tei te rakon i matan te aine+ are e nangi bung, bwa e na onga natin neiei ngkana e bung.

5 Ao e bungia te nati te mwaane,+ ae e na kaiririia natannaomata ni kabane n aron te tia kawakintiibu ae iai okona ae te biti.+ Ao e buritaki* natina n uotakinako nakon te Atua ao nakon ana kaintokanuea. 6 Ao e birinako te aine nakon te rereua, ike e mena iai nnena are e katauraoia te Atua, ao a na kaamwarakea iai 1,260 te bong.+

7 Ao e boo te buaka i karawa. A buakana te rakon Mikaere*+ ma ana anera, ao te rakon ma ana anera a buakania 8 ma a aki tokanikai,* ao e a aikoa manga reke aia tabo i karawa. 9 Mangaia are e a tewenakoaki te rakon are korakora,+ are te naeta nikawai,+ are arana te Riaboro+ ao Tatan,+ are e burebureiia kaain te aonnaba ni kabutaa.+ E tewenakoaki nakon te aonnaba,+ ao a tewenakoaki naba ana anera ma ngaia. 10 Ao I ongo te bwanaa ae korakora i karawa ae kangai:

“E a roko ngkai te kamaiu+ mairoun Atuara ma mwaakana ao ana Tautaeka n Uea,+ ao mwaakan ana Kristo, ibukina bwa e a tewenakoaki te tia bukinia tarira, are e bukinia i matan Atuara ni ngaina ao ni bong!+ 11 Ao a tokanikai i aona,+ n raraan te Tiibutetei+ ao n te taeka are a kaotiotia,+ ao a aki tangiri maiuia*+ e ngae ngke a nang kamateaki. 12 Mangaia ae kam na kimwareirei n aei, ngkami aika taiani karawa ao ngkami aika kam maeka iai! E na reke kain aon te aba ma marawa,+ ibukina bwa e a tia n ruo te Riaboro nakoimi, ao e a korakora unna ngkai e ataia bwa e a kimototo ana tai.”+

13 Ao ngke e a ataia te rakon bwa e a tewenakoaki nakon te aonnaba,+ ao e a bwainikirina te aine+ are bungia te nati te mwaane. 14 Ma e anganaki te aine bain te ikare ni kiba aika uaai aika totoa,+ bwa e aonga ni kibanako nakon te rereua nakoni nnena, ike e na kaamwarakeaki iai n teuana te tai ao n taai ao n te itera n tai,*+ ike e a raroa iai ma te naeta.+

15 Ao e katiinakoa te ran te naeta mai wina ae ai aron te karaanga, bwa e na rimwin te aine bwa e aonga ni bwabwa neiei n te karaanga. 16 Ma e roko aontano ni buoka te aine, ao e kaurea wina aontano ao e onga te karaanga are e katiinakoa te rakon mai wina. 17 Ngaia are e rangi n un te rakon iroun te aine, ao e nako ni buakania nikiraia kanoan* neiei,+ ake a kakairi n ana tua te Atua ao a mwiokoaki n te mwakuri ni kaotiota taekan Iesu.+

13 Ao e tei te rakon n aki kakammwakuri i aon te bike.

Ao I nora te man ae tiritiri+ ae otirake mai taari,+ ae tengauni korona ao itiua atuna, ao iai baunuea aika tengaun i aoni korona, ao iai aara aika kamatauningaa te Atua i aon atuna nako. 2 Ao te man ae tiritiri are I noria ai aron te rebwari, ma waena ai aroni waen te bea, ao wina ai aroni win te raian. Ao te rakon+ e angan te man ae tiritiri mwaakana ao ana kaintokanuea ao mwaakana n tautaeka ae korakora.+

3 I nora atuna teuana bwa kaanga e kaikoakaki n te aro ae kakaiaki, ma e a manga kamaoaki ikoakina are e nangi mate iai,+ ao a bane kaain te aonnaba n ririmwin te man ae tiritiri aei ni miiakinna. 4 Ao a taromauria te rakon ibukina bwa e anga te mwaaka n tautaeka nakon te man ae tiritiri, ao a taromauria te man ae tiritiri n taeka aikai: “Antai ae ai aron te man ae tiritiri, ao antai ae kona ni buakanna?” 5 E anganaki te wi ae tataekini baika kainikatonga ma taiani kabuakaka, ao e anganaki naba te mwaaka ae e na mwamwakuri iai i nanon 42 namwakaina.+ 6 Ao e kaurea wina n taetae ni kabuakakaa+ te Atua, ni kabuakakaa arana ma ana tabo ni maeka ao te koraki naba ake a maeka i karawa.+ 7 E kariaiakaki bwa e na buakania te koraki aika itiaki* ao n tokanikai i aoia,+ ao e anganaki te mwaaka n tautaeka i aoia baronga nako, ma botannaomata, ma taian taetae, ao natannaomata. 8 Ao ane a na bane n taromauria te man arei aomata ake a maeka n te aonnaba. Mangke e moan riki te botannaomata, ao akea temanna i buakoia ae e koreaki arana n ana boki ni kamaiu+ te Tiibutetei are kamateaki.+

9 Ane iai taningana ao ke e ongo.+ 10 Ane e katauaki bwa e na taenikai ao e na nako bwa te taenikai. Ane e tiritiri n te kabaang* ao e riai n tiringaki n te kabaang.+ Aei are e kainnanoaki iai te nanomwaaka+ ao te onimaki+ irouia te koraki aika itiaki.*+

11 Ao I nora temanna riki te man ae tiritiri ae otirake mai aantano ao iai korona aika uaai aika kaanga koron te tiibutetei, ma e taetae n ai aron te rakon.+ 12 Ao e mwamwakuria ni kabane mwaakan te moani man are tiritiri,+ i matan te moani man arei. Ao e kaira te aonnaba ma kaaina bwa a na taromauria te moani man are tiritiri are kamaoaki ikoakin atuna are e nangi mate iai.+ 13 Ao e karaoi kanikina aika rangi ni kamimi, n te aro ae e kona naba ni kabwakaa te ai mai karawa nako aon te aba i mataia aomata.

14 E burebureiia aomata ake a maeka n te aonnaba n taiani kanikina ake e kariaiakaki bwa e na karaoi i matan te man are tiritiri, ao e tuangia aomata ake a maeka n te aonnaba bwa a na karaoa katotongan+ te man are tiritiri are ikoaki n te kabaang ma e boni maiu naba.+ 15 Ao e kariaiakaki bwa e na karina te ikeike* irouni katotongan te man are tiritiri, bwa e aonga n taetae katotongan te man are tiritiri ao ni karekea kamateaia te koraki ni kabane ake a rawa n taromauria katotongan te man are tiritiri.

16 E kairoroiia aomata ni kabane aika mangori ao aika kakannato, ao aika kaubwai ao aika maiu ni kainnano, ao aika inaomata ao aika tooro, bwa e na kanikinaeaki baia are te atai ke aon ramwaia,+ 17 bwa e aonga n akea temanna ae kona ni boobwai ke ni kaboonakoi bwaai, ma tii te aomata are iai te kanikina irouna, ae aran+ te man are tiritiri, ke waren arana.+ 18 Aei are e kainnanoaki iai te wanawana: Ane iai ana ataibwai ao ke e warebwaia waren aran te man are tiritiri, bwa bon ana ware te aomata, ao te ware anne bon 666.+

14 Ao akea bwa I a nora te Tiibutetei+ ae tei i aon te Maunga ae Tion,+ ao raona 144,000+ ae e koreaki arana ma aran Tamana+ i aon ramwaia. 2 Ao I ongo te karongoa mai karawa ae ai aroni karongoaan raan aika bati ao ai aron rebwen te baa ae korakora. Ao te baere I ongo, ai aroni bwanaaia taan anene aika anene ma ni katang aia abi. 3 Ao a anenea te kuna ae kaanga te kuna ae boou+ i matan te kaintokanuea ao i mataia baike a maiu ake aman+ ao unimwaane,+ ao akea temanna ae kona ni kamatenikuna te kuna anne ma tii naake 144,000+ ake a kabooaki mai aon te aba. 4 A aki kamwaraeia irouia aine te koraki aikai, bwa ni koauana, a tuai ni boo ma aine.+ A teimatoa te koraki aei n ririmwin te Tiibutetei n aki ongeia bwa taabo raa ike e nako iai.+ A kabooaki naakai+ mai buakoia aomata, bwa moan uaa+ nakon te Atua ao nakon te Tiibutetei, 5 ao akea te mwamwanaa te aba i nanoni wia, ao akea buakakaia.+

6 Ao I nora te anera riki temanna ae kibakiba i nukani karawa,* ao iai irouna te rongorongo ae raoiroi ae teimatoa n aki totoki, ae e na taekinna nakoia aomata ake a maeka n te aonnaba, nakoia natannaomata nako ao baronga ao taian taetae ao botannaomata.+ 7 E kangai n te bwanaa ae korakora: “Kam na maaka te Atua ao anganna te neboaki, ibukina bwa e a roko te tai ae e na motikitaeka iai,+ mangaia ae taromauria Teuare karaoa karawa ma aonnaba ma marawa+ ma koburake n ran.”

8 Ao e rimwina te anera riki temanna ae te kauoman ao e kangai: “E a bwaka! E a bwaka+ Baburon ae Kakannato,+ are neiere kamoiia natannaomata ni kabane ni wainin te kaibwabwaru* are wainin ana wene ni bure!”*+

9 Ao e rimwia te anera riki temanna ae te kateniman ao e kangai n te bwanaa ae korakora: “Ngkana iai ae e taromauria te man ae tiritiri+ ma katotongana, ao e tane te kanikina i aon ramwana ke i baina+ 10 ao e na moi naba ni wainin unin te Atua are kabwaroaki n aki renganaki, nako nanoni mwangkon unna.+ Ao e na kammarakaki te aomata anne n te ai ma te burimton*+ i mataia anera aika tabu ao i matan te Tiibutetei. 11 Ao e na aetorake n aki totoki bubuni kammarakaia*+ te koraki ake a taromauria te man ae tiritiri ma katotongana, ao ake e tane i aoia kanikinaean aran te man aei, ao a na aki motirawa ni ngaina ao ni bong.+ 12 Aei are e kainnanoaki iai te nanomwaaka irouia te koraki aika itiaki*+ ake a kawakin ana tua te Atua, ao a kakairi n ana onimaki+ Iesu.”

13 Ao I ongo te bwanaa mai karawa ae kangai, “Korea ae kangai: A a kukurei maate ake a mate ni katiteuanaakia ma te Uea+ mai mwini ngkai. E taku te taamnei, eng, ke a motirawa man aia bekutata, bwa e airi ma ngaiia aia mwakuri.”

14 Ao akea bwa I a nora te nang ae mainaina, ao e tekateka i aon te nang temanna ae kaanga natin te aomata,+ ao iai te baunuea ae koora i aon atuna ao te biti n tai ae kakang i baina.

15 Ao e otinako te anera riki temanna man te tembora* ao e takarua n te bwanaa ae korakora ni kangai nakon teuare tekateka i aon te nang: “Arora baim ma am biti n tai bwa e a roko tain taiakin uaan te aonnaba, bwa a a tawaa raoi.”+ 16 Ao e arora baina ma ana biti n tai nako aon te aba teuare tekateka i aon te nang, ao e a taiaki uaan te aonnaba.

17 Ao e a manga otinako te anera riki temanna man te tembora* are i karawa, ao iai naba ana biti n tai ae kakang.

18 Ao e a manga otinako te anera riki temanna mai ike e mena iai te baonikarea ao iai mwaakana i aon te ai. Ao e takarua n te bwanaa ae korakora ni kangai nakon teuare iai ana biti n tai ae kakang: “Arora baim ma am biti n tai ane kakang ao ikotii amwini kureeben te aonnaba, bwa a a tawaa uaaia.”+ 19 Ao e arora baina te anera ma ana biti n tai nako aon te aba ao e ikotii kureeben te aonnaba, ao e tewenakoi i nanon te nne ni kamanti kureebe ae rangi ni bubura ae tei ibukin unin te Atua.+ 20 Ao e toutouaki te nne ni kamanti kureebe i tinanikun te kaawa, ao e raanga te raraa man te nne ni kamanti kureebe ao e iabutirake n te aro ae e a rotii bweeia aoti, n te raroa ae 1,600 te titeitia.*

15 Ao I nora te kanikina riki teuana i karawa ae rianako arona ao moanibaan te raoiroi, ae anera aika itiman+ ma baika kamamate aika itiua. Boni kabaneani baika kamamate baikai, ibukina bwa e nang karokoaki iai n tokina unin te Atua.+

2 Ao I nora te bwai ae kaanga marawa ae te kiraati+ ae renganaki n te ai, ao te koraki ake a tokanikai+ i aon te man are tiritiri ma katotongana+ ao waren arana,+ a tei i rarikini marawa are te kiraati, ao a taui abi ake mairoun te Atua. 3 Ao a anenea kunani Mote+ are ana toro te Atua ao kunan te Tiibutetei+ ae kangai:

“A kakannato am mwakuri+ ngkoe Iehova* ae te Atua ae Moan te Mwaaka+ ao a kamimi. A raraoi kawaim ao a koaua,+ ngkoe ae te Uea n aki totoki.+ 4 Ai antai ae e na aki maakuko Iehova* ao n neboa aram, ngkai bon tii ngkoe ae ko kakaonimaki ni koaua?+ Bwa ane a na bane natannaomata n roko ao n taromauri i matam,+ ibukina bwa a a tia ni kaotaki am moti aika raraoi.”

5 Imwin aei ao I noria bwa e a kaukaki i karawa+ te tabo ae tabu n te umwanrianna* ae mena iai te bwai ni kakoaua,+ 6 ao a otinako man te tabo ae tabu anera aika itiman ake iai irouia baika kamamate aika itiua,+ ao a kunnikaiaki n te rinen ae itiaki ae raneanea, ao a kabaeaki bwabwaaia n te roo ae koora. 7 Ao temanna mai buakoia baike a maiu ake aman, e angania anera aika itiman aikai boora aika itiua aika koora, aika onrake n unin te Atua+ are maiu n aki totoki. 8 Ao e a onrake te tabo ae tabu n te bubu ibukini mimitongin te Atua+ ao ibukini mwaakana, ao akea temanna ae kona n rin n te tabo ae tabu ni karokoa tokini baika kamamate aika itiua+ ake irouia anera ake itiman.

16 Ao I ongo te bwanaa ae korakora ae nako man te tabo ae tabu*+ ae kangai nakoia anera ake itiman: “Kam na nako ni kabwaroi booran unin te Atua aika itiua i aon te aba.”+

2 E nako te moan anera ni kabwaroa kanoan ana boora i aon te aba.+ Ao a riki kaboa aika kammaraki aika kakaiaki+ i aoia aomata ake e tane i aoia ana kanikina te man ae tiritiri+ ao ake a taromauria katotongana.+

3 E kabwaroa kanoan ana boora te anera are te kauoman i nanoni marawa.+ Ao e riki marawa+ bwa kaanga raraan+ te aomata ae mate, ao a bane ni mate maan* aika maiu, eng, baike i nanona.

4 E kabwaroa kanoan ana boora te anera are te kateniman i nanoni karaanga ma koburake n ran,+ ao a a riki bwa te raraa.+ 5 Ao I ongo bwa e kangai te anera are iai mwaakana i aon raan: “Ko raoiroi ao ko kakaonimaki ni koaua,+ ngkoe Teuare iai ngkai ao iai ngkoa,+ bwa ko karaoi mooti aikai,+ 6 ibukina bwa a a tia ni katiinakoi raraaia te koraki aika itiaki* ao burabeti,+ ai ngaia ae ko a angania te raraa bwa a na nimma.+ A bon tau n anganaki.”+ 7 Ao I ongo bwa e kangai te baonikarea: “Eng, a koaua ao a raraoi am motikitaeka*+ ngkoe ae Iehova* ae te Atua ae Moan te Mwaaka.”+

8 E kabwaroa kanoan ana boora te anera are te kaaman i aon taai,+ ao e a kariaiakaki taai bwa e na kabuekiia aomata n te ai. 9 Ao a kabuekaki aomata n te kabuebue ae korakora, ma a taetae ni kabuakakaa aran te Atua, are iai mwaakana i aoni baika kamamate aikai, ao a aki rairi nanoia n anganna neboana.

10 E kabwaroa kanoan ana boora te anera are te kaniman i aon ana kaintokanuea te man are tiritiri. Ao e a karooaki ana tautaeka n uea,+ ao a a tenatenai neweia aomata ibukini marakia, 11 ma a taetae ni kabuakakaa te Atua are i karawa ibukini marakia ao ibukini kaboaia, ao a aki rairi nanoia man aia mwakuri.

12 E kabwaroa kanoan ana boora te anera are te kaonoman i aon te karaanga are abwabwaki are Iuberetiti,+ ao e a bwatakataka ranna+ bwa e na katauraoa kawaia ueea+ ake a na kaoti mai ike oti iai taai.*

13 Ao I nori rongorongo* aika tenua aika kamwara aika ai aroia biraoki aika otinako mai win te rakon+ ao mai win te man are tiritiri ao mai win te burabeti ni kewe. 14 Bon rongorongo mairouia taimonio, aika rongorongo aika karaoi kanikina+ ao a kawariia ueea n te aonnaba ni kabutaa bwa a na ikotiia nakon te buaka+ n te bong ae kakannato ae ana bong te Atua ae Moan te Mwaaka.+

15 “Noria! I a roko n ai aron rokon te tia iraa.+ E a kukurei ane e teimatoa n tantani+ ao ni kawakina ana kauaatao, bwa e na aki nakonako n akea karabaana ma n tarataraaki te baere e na kamaamaeaki iai irouia aomata.”+

16 Ao a ikotiia nakon te tabo ae aranaki n te taetae n Ebera bwa Aremaketon.*+

17 E kabwaroa kanoan ana boora te anera are te kaitiman n te ea. Ao e nako te bwanaa ae korakora man te tabo ae tabu*+ man te kaintokanuea, ae kangai: “E a tia!” 18 Ao e itirua ao e rebwe te baa ao a taetae bwanaa, ao e riki te mwaeiei ae korakora ae tuai man riiriki mangke a moan riki aomata n te aonnaba,+ ae te mwaeiei ae taabangaki ae moan te korakora. 19 Ao e tabwenaua te kaawa are kakannato+ nakon tenimwakoro, ao a bwaka aia kaawa natannaomata. Ao te Atua e uringa taekani Baburon are Kakannato,+ bwa e na anganna te mwangko are kanoana te wain are wainin unna.+ 20 Ao a bane naba ni birinako abamwakoro, ao a aki manga kuneaki maunga.+ 21 Ao e bwaka te karau ae te aiti ae korakora mai karawa i aoia aomata,+ ao aitina tao titeboo tinebuna ma teuana te tarena,* ao a taetae aomata ni kabuakakaa te Atua ibukin te bwai ae kamamate aei ae te karau ae te aiti,+ bwa e a bon rangi ni korakora.

17 Ao e kawarai temanna mai buakoia anera ake itiman ake iai aia boora ake itiua,+ ao e taetae nakoiu ni kangai: “Nakomai, N na kaota nakoim motikan taekan te kabekaau are kakannato are tekateka i aon raan aika bati,+ 2 are a wewene ni bure*+ ma ngaia uean aonnaba, ao a koro ni manging kaain te aonnaba n te wain are wainin ana wene ni bure.”*+

3 Ao e kairainako rinanon te taamnei nakon te rereua. Ao I nora te aine ae tekateka i aon te man ae tiritiri ae uraroo ae onrake n aara aika kabuakakaa te Atua, ao itiua atun te man anne ao tengauni korona. 4 E kunnikainna te aine n te beboo ao te uraroo,+ ao e katamaroaaki n te koora ma atibu aika rangi ni kakawaki ao moomin te bwaeao,+ ao e mena i baina te mwangko ae koora ae onrake ni baika koro n ribaaki, ma baika kamwara ake mwin ana wene ni bure.* 5 E koreaki i aon ramwan neiei te ara ae raba nanona ae kangai: “Baburon ae Kakannato, ae tinaia kabekaau+ ma baika koro n ribaaki i aon te aba.”+ 6 Ao I nora te aine aei bwa e koro ni manging n raraaia te koraki aika itiaki* ao n raraaia ana tia kakoaua Iesu.+

Ao ngke I noria, ao I rangi ni mimi. 7 Ngaia are e taku te anera nakoiu: “E aera ngkai ko mimi? N na tuangko te bwai ae raba ae taekan te aine aei+ ma te man ae tiritiri ane e tekateka i aona, ae itiua atuna ao tengauni korona:+ 8 Te man ae tiritiri ane ko noria, bon iai ngkoa ma ai akea ngkai, ma e na manga waerake man te kinono,+ ao e na manga kamaunaaki. Ao kaain te aonnaba ake a aki koreaki araia n te boki ni kamaiu+ mani moan rikin te botannaomata, ngke a nora te man ae tiritiri bwa iai ngkoa ma ai akea ngkai, ao e na manga kaoti, ao a na mimi.

9 “Aei are e a kainnanoaki iai te iango* ae iai wanawanana: Nanon atu ake itiua+ boni maunga aika itiua, ike e tekateka i aoia te aine. 10 Ao a tei ibukia ueea aika itiman: A a tia ni bwaka niman, bon iai ngkai are temanna, ao e tuai n roko are temanna riki, ma ngkana e roko ao e na tiku i nanon te tai ae uarereke. 11 Ao te man ae tiritiri are iai ngkoa ao ai akea ngkai,+ boni ngaia te kawaniman n uea, ma e riki mairouia ueea ake itiman, ao e na manga kamaunaaki.

12 “A tei kooro ake tengaun ake ko nori, ibukia ueea aika tengaun, aika tuai ni karekei aia tautaeka n uea, ma a na karekei mwaakaia n uea ma te man are tiritiri ibukin teuana te aoa. 13 Bon tii teuana aia iango, mangaia are a angan te man are tiritiri mwaakaia, ao mwaakaia n tautaeka. 14 Ao a na buaka naakai ma te Tiibutetei,+ ma e na kataei aia kai te Tiibutetei ibukina bwa boni ngaia aia Toka tooka ao aia Uea ueea.+ Ao a na tokanikai+ naba ma ngaia te koraki ake a weteaki, ake a rineaki, ake a kakaonimaki.”+

15 Ao e taku nakoiu: “Raan akana ko nori, ike e tekateka i aoia te kabekaau, a tei ibukia botannaomata ao aomata aika uanao ao natannaomata, ao taian taetae.+ 16 Ao a na ribaa te kabekaau,+ kooro ake tengaun+ ake ko nori ma te man ae tiritiri,+ ao a na kuribwaia ma ni buuta karabaana, ao a na kana irikona ao a na kabuekia ni kabanea n te ai.+ 17 Bwa e kaaki i nanoia te Atua te kani kakoroa bukin ana iango,+ eng, a na kakoroa naba bukin aia iango ae tii teuana aei n aroia n angan te man are tiritiri aia tautaeka n uea,+ ni karokoa kakoroani bukin ana taeka te Atua. 18 Ao e tei te aine+ are ko noria, ibukin te kaawa ae kakannato ae tautaeka i aoia uean te aonnaba.”

18 Imwin aei ao I nora te anera riki temanna ae ruo mai karawa ae korakora mwaakana, ao e kaotaaki te aonnaba ni mimitongina. 2 Ao e takarua n te bwanaa ae korakora ni kangai: “E a bwaka! E a bwaka Baburon ae Kakannato,+ ao e a riki bwa aia tabo ni maeka taimonio ao te tabo ae a mena iai taamnei nako aika kamwara* ao nneia mannikiba nako aika kamwara aika ribaaki!+ 3 Bwa a bane natannaomata ni mwane ni wainin te kaibwabwaru* are wainin ana wene ni bure,*+ ao a wene ni bure uean aonnaba ma ngaia,+ ao a a kaubwai taan iokinibwai* n te aonnaba, ni korakorani kaubwaina ae e aki maamaa iai.”

4 Ao I ongo te bwanaa riki teuana ae nako mai karawa ae kangai: “Au aomata,+ kam na otinako mai nanona ngkana kam aki kan ibuokanibwai ma ngaia n ana bure ao ngkana e aki kan reke kaimi ni baika kamamate ake a na reke irouna.+ 5 Bwa a a uaatao ana bure ao a a rota karawa,+ ao te Atua e uringi ana mwakuri n ribuaka* neiei.+ 6 Karaoa nakoina aron are e a tia ni karaoia nakoia tabemwaang,+ eng, kamwaitia riki nakoina uoua te tai ibukini baike e a tia ni karaoi.+ Kamwaita nakoina renganan nimana te wain uoua te tai, i nanon te mwangko+ are e a tia n rengana iai te wain.+ 7 Kammarakia ao karawawataa nanona n aroni mwaitin are e kamoamoaa iai i bon irouna ao n arona ni maiu ni kaubwai n aki maamaa iai. Bwa e teimatoa ni kangai i nanona: ‘I tautaeka bwa te ueannaine, ao tiaki ngai te aine ae e a tia ni mate buuna, ao e bon aki kona n rawawata nanou.’+ 8 Anne bukina ae a na roko irouna baika kamamate n tii tebongina, ae te mate ao te rawawatannano ao te rongo, ao e na kabuekaki ni kabanea n te ai,+ ibukina bwa e korakora Iehova* ae te Atua are motika taekana.+

9 “Ao uean aonnaba ake a wene ni bure* ma ngaia ma ni maiu ni kaubwai ma neiei n aki maamaa iai, a na tang ao a na ororei bwanibwania n rawawata ibukina, ngkana a nora bubuni buena. 10 A na tei i kiraroa bwa a maaka kammarakana ao a na kangai: ‘Ai kaawara, ai kaawara ngkoe ae Baburon ae te kaawa ae ko kakannato+ ae ko korakora, ibukina bwa e a roko motikan taekam n tii teuana te aoa!’

11 “Ao a tang naba taan iokinibwai n te aonnaba ao a nanokawaki ibukin neiei, bwa ai akea ae e na manga kabooi riki aia bwai ni kabane, 12 ae aia bwai ni kabane ae te koora, te tirewa, atibu aika rangi ni kakawaki, moomin te bwaeao, te rinen ae raoiroi, te kunnikai ae beboo, te tirika, ao te kunnikai ae uraroo, ao bwaai nako aika karaoaki mani kaai aika boiarara, ao bwaai n aekaia nako aika karaoaki man te aiwere,* ao mani kaai aika rangi ni kakawaki, te buraati, te biti, ao te mabora, 13 ao te tineman naba, te amomum,* baika boiarara, te bwaa ae boiarara, te ribano,* te wain, te oera ae te oriwa, te burawa ae mte, te uita, kaao, tiibu, aoti, taiani kaa, tooro, ao maiuia* naba aomata. 14 Eng, a a bua mairoum uaanikai aika raraoi ake ko* bwarui, ao a a maunanako mairoum amwarake ni kabane aika moan raraoi ao baika moanibaa n tamaroa, ao a na aki manga reke.

15 “Ao taan iokinibwai ake a kaboonakoi baikai ake a kaubwai mairoun neiei, a na tei i kiraroa bwa a maaka kammarakana ao a na tang ma n nanokawaki ibukina 16 ni kangai: ‘Ai kaawara, ai kaawara te kaawa ae kakannato ae kunnikaiaki n te rinen ae raoiroi, n te beboo, ao n te uraroo, ao e kabatiaaki katamaroaana ni bwaai ni katamaroa aika koora, n atibu aika rangi ni kakawaki, ao ni moomin te bwaeao,+ 17 ibukina bwa e a kuribwaiaki kaubwaina aika rangi ni bati n tii teuana te aoa!’

“Ao kaaben ni kaibuke nako, ma aomata nako aika boborau, ao kaimoa ao te koraki nako ake a karekei maiuia i taari, a tei i kiraroa 18 ao a takarua ngke a nora bubuni buena ao a taku: ‘Iai riki te kaawa ae ai aron te kaawa ae kakannato aei?’ 19 Ao a kaaurakei taano nako aon atuia ao a takarua n tang ma n nanokawaki, ao a taku, ‘Ai kaawara, ai kaawara te kaawa ae kakannato, ae a bane ni kaubwai irouna te koraki ake iai aia kaibuke, ibukini kaubwaina, bwa e a kuribwaiaki n tii teuana te aoa!’+

20 “Kimwareirei ibukina ngkoe ae karawa,+ ao ngkami naba te koraki aika kam itiaki*+ ao ngkami aika abotoro, ao ngkami aika burabeti, ibukina bwa e a motika taekana te Atua ibukimi!”+

21 Ao e tabeka te atibu te anera temanna ae korakora, ae ai aron te atibu ni kamantinti ae rangi ni bubura, ao e karenakoa nako marawa ao e kangai: “E na tewenakoaki Baburon ae te kaawa ae kakannato ni kabwakaaki n te aro ae tawe, ao e na aki manga noraki.+ 22 Ao a na aki manga ongoraeaki i nanom bwanaaia taan anene aika katang aia abi, taani katangitang tabemwaang, taani katang kaibwabwaa, ao taani katang aia buu. Ao a na aki manga noraki taani karaobwai i nanom, ao e na aki manga ongoraeaki tangin te atibu ni kamantinti. 23 Ao e na aki manga oota ootan te taura i nanom, ao e na aki manga ongoraeaki i nanom bwanaan te tia mare te mwaane ao te tia mare te aine, bwa bon aomata aika kakannato i aon te aba am tia iokinibwai, ao a bane ni burebureaki natannaomata n am tabunea.+ 24 Eng, e kuneaki i nanon neiei raraaia burabeti ma te koraki aika itiaki*+ ao te koraki nako ake a a tia ni kamateaki i aon te aba.”+

19 Imwin aei ao I ongo te bwai ae kaanga te bwanaa ae korakora ae bwanaaia te koraki aika mwaitikurikuri i karawa. A taku: “Kam na karaoiroa Iah!*+ Ana bwai Atuara te kamaiu ma te neboaki ma te mwaaka, 2 ibukina bwa a koaua ana motikitaeka ao a raraoi.+ Bwa e a tia ni karekea kain te kabekaau are kakannato are kamwaraea te aonnaba n ana wene ni bure,* ao e a irantangai raraaia ana toro aika mena i bain neiei.”*+ 3 Ao a a manga kangai ngkekei naba n te kauatai: “Kam na karaoiroa Iah!*+ Ao e aetorake bubuni buen neiei n aki totoki.”+

4 Ao a katorobubua ni bobaraaki unimwaane ake 24+ ma baike a maiu ake aman,+ n taromauria te Atua are tekateka i aon te kaintokanuea, ao a taku: “Amen! Kam na karaoiroa Iah!”*+

5 Ao e otinako naba te bwanaa man te kaintokanuea ae kangai: “Karaoiroa Atuara, ngkami ni kabane aika ana toro+ aika kam maakua, aika mangori ma aika kakannato.”+

6 Ao I ongo te bwai ae kaanga te bwanaa ae bwanaaia te koraki aika mwaitikurikuri i karawa ae kaanga karongoaan raan aika bati, ao kaanga rebwerebwen te baa ae rangi ni korakora. A taku: “Kam na karaoiroa Iah,*+ ibukina bwa e a moana tautaekana bwa te uea,+ Iehova* ae Atuara ae Moan te Mwaaka!+ 7 Ti na kimwareirei ao ti na kakatonga, ao ti na anganna neboana, ibukina bwa e a roko ana tai ni mare te Tiibutetei ao e a tauraoi neiere buuna nakon te mare. 8 Eng, e kariaiakaki neiei bwa e na kunnikainna n te rinen ae raoiroi ae raneanea ae itiaki, bwa e tei te rinen ae raoiroi ibukin aia mwakuri aika raraoi te koraki aika itiaki.”*+

9 Ao e taku nakoiu, “Korea ae kangai: A a kukurei akana kaoaki nakon te baka n amwarake ibukin ana mare te Tiibutetei.”+ Ao e taku naba nakoiu: “A boni koaua ana taeka te Atua aikai.” 10 Ao I katorobubua ni bobaraaki i waena bwa N na taromauria. Ma e taku nakoiu: “Taratara raoi! Tai karaoa anne!+ Bon te toro naba ngai n ai arom ao n ai aroia tarim ake a mwiokoaki n te mwakuri ni kaotiota taekan Iesu.+ Taromauria te Atua!+ Bwa e kauekea te taetae ni burabeti kaotiotan taekan Iesu.”+

11 Ao I nora karawa bwa e uki, ao akea bwa I a nora te aoti ae mainaina.+ Ao aran teuare toka i aona, Kakaonimaki+ ao Koaua,+ ao e momotikitaeka ma ni buaka n te raoiroi.+ 12 A takarokaro matana n ai aron te ai,+ ao iai baunuea aika bati i aon atuna. Iai arana ae koreaki ae akea temanna ae ataia ma bon tii ngaia, 13 ao e kunnikainna n te kauaatao ae memea* n te raraa, ao e aranaki bwa Ana Taeka+ te Atua. 14 Ao e rimwiaki irouia te taanga ni buaka ake i karawa aika toka i aoia aoti aika mainaina, ao a kunnikaiaki n te rinen ae raoiroi ae mainaina ae itiaki. 15 Ao e otinako mai wina te kabaang ae abwabwaki ae kakang,+ ae e na oreiia iai natannaomata, ao e na kaiririia n aron te tia kawakintiibu ae iai okona ae te biti.+ E toutoua naba te nne ni kamanti kureebe are nnen te un are unin te Atua ae Moan te Mwaaka.+ 16 Ao iai arana ae koreaki i aon ana kauaatao, eng, i aoni boton rangana, ae aia Uea ueea ao aia Toka tooka.+

17 Ao I nora te anera riki temanna ae tei n taai, ao e takarua n te bwanaa ae korakora ao e taku nakoia mannikiba ni kabane aika kibakiba i nukani karawa:* “Banemai ikotaki nakon ana baka n amwarake te Atua,+ 18 bwa kam na kang irikoia ueea ao irikoia mataniwi n te taanga ni buaka ao irikoia aomata aika korakora+ ao irikoia aoti ao irikoia taan toka i aoia,+ ao irikoia aomata ni kabane, aika inaomata ao aika tooro ao aika mangori ao aika kakannato.”

19 Ao I nora te man are tiritiri ma uean aonnaba ma aia taanga ni buaka, aika ikotaki bwa a na buakana teuare toka i aon te aoti ma ana taanga ni buaka.+ 20 Ao e tauaki te man ae tiritiri, ma te burabeti ni kewe+ are karaoi kanikina aika kamimi i matan te man ae tiritiri, are e burebureiia te koraki ake e reke irouia ana kanikina te man ae tiritiri+ ao te koraki ake a taromauria katotongana.+ A bane n tewenakoaki ngke a maiu nako nanon te nama ae te ai ae ura n te burimton.*+ 21 Ma a kamateaki ake nikiraia n ana kabaang ae abwabwaki teuare toka i aon te aoti,+ are te kabaang are otinako mai wina. Ao a bane ni ngae mannikiba n irikoia.+

20 Ao I nora te anera ae ruo mai karawa ma kiingin te kinono,+ ao iai te taurekereke ae abwabwaki i baina. 2 E taua te rakon+ are te naeta nikawai,+ are te Riaboro+ ao Tatan,+ ao e kabaea i nanon 1,000 te ririki. 3 Ao e karenakoa i nanon te kinono+ ao e kaina te kinono ao e kanikinaea, bwa e aonga n aki manga burebureiia riki natannaomata, ni karokoa koron ririki ake 1,000. Imwin aei ao e riai ni kabwaraaki ibukin teutana te tai.+

4 Ao I nori kaintokanuea, ao a anganaki naake a tekateka i aoia te mwaaka ni motikitaeka. Ao I noriia aomata* ake a kamateaki* ibukini kaotiotan Iesu ao ibukin tataekinan taekan te Atua, ao te koraki ake a aki taromauria te man ae tiritiri ke katotongana, ae e aki tane te kanikina i aon ramwaia ao i baia.+ Ao a a manga maiu ao a tautaeka bwa ueea ma te Kristo+ i nanon 1,000 te ririki. 5 (A aki maiu nikiraia maate+ ni karokoa koron ririki ake 1,000.) Bon te moani mangauti aei.+ 6 A a kukurei ma n itiaki* akana reke irouia te moani mangauti.+ Ai akea mwaakan+ te mate ae te kauoua i aoia,+ ma a na riki bwa ana ibonga*+ te Atua ao te Kristo, ao a na tautaeka ma ngaia bwa ueea i nanon ririki ake 1,000.+

7 N te tai are a a koro raoi iai ririki ake 1,000, ao e na kabwaraaki Tatan mani karabuutinakina, 8 ao e na otinako ni burebureiia natannaomata ake a mena ni maninganingan te aonnaba ake aua, ake Koka ao Makoka, ao e na ikotiia nakon te buaka. Mwaitiia te koraki aei ai aron tanon taari. 9 Ao a kabutaa te aonnaba ao a otabwaninia aia kaembwa te koraki aika itiaki* ma te kaawa are tangiraki. Ma e bwaka te ai mai karawa ao e kabuekiia.+ 10 Ao e tewenakoaki te Riaboro are burebureiia, nako nanon te nama ae te ai ma te burimton,* ike a a kamani mena iai te man ae tiritiri+ ao te burabeti ni kewe,+ ao a na kammarakaki* ni ngaina ao ni bong n aki totoki.

11 Ao I nora te kaintokanuea ae mainaina ae rianako arona, ma Teuare tekateka i aona.+ Ao e birinako te aonnaba ma karawa mai matan teuare tekateka,+ ao e a aikoa manga reke nneia. 12 Ao I noriia maate aika kakannato ao aika mangori, n tei i matan te kaintokanuea, ao a kaukaki nira ni boki. Ma e a manga kaukaki te nira ni boki riki teuana, ae te boki ni kamaiu.+ A motikaki taekaia maate mani baike a koreaki n taian nira ni boki ni kaineti ma aia mwakuri.+ 13 Ao marawa, e anga maate ake i nanona, ao te mate ma te Ruanimate,* a anga maate ake i nanoia, ao a motikaki taekaia n tatabemania nako ni kaineti ma aia mwakuri.+ 14 Ao e tewenakoaki te mate ma te Ruanimate* nako nanon te nama ae te ai.+ Te nama ae te ai+ e tei ibukin te mate ae te kauoua.+ 15 Ma ane e aki koreaki arana n te boki ni kamaiu,+ ao e na tewenakoaki nako nanon te nama ae te ai.+

21 Ao I nora karawa ae boou ao te aonnaba ae boou,+ bwa e a tia ni mauna karawa nikawai ao te aonnaba nikawai,+ ao ai akea marawa.+ 2 I nora naba te kaawa ae tabu ae Ierutarem ae Boou bwa e ruo mai karawa mairoun te Atua,+ ao e katauraoaki bwa kaanga te tia mare te aine ae katamaroaaki imwaini buuna.+ 3 Ao I ongo te bwanaa ae korakora man te kaintokanuea ae kangai: “Noria! E a mena ana umwanrianna te Atua irouia aomata, ao e na maeka ma ngaiia ao a na riki bwa ana aomata. Ao te Atua e na boni memena irouia.+ 4 Ao e na kaoa te rannimata ni kabane mai mataia,+ ao e nang akea riki te mate,+ ke te nanokawaki ke te tang ke te maraki.+ A a mauna bwaai rimoa.”

5 Ao e taku Teuare tekateka i aon te kaintokanuea:+ “Noria! I a kabooui bwaai ni kabane.”+ Ao e a manga kangai: “Korei, bwa a kakaonimaki* taeka aikai ao a koaua.” 6 Ao e taku nakoiu: “A a tia! Boni ngai te Arebwa ao te Omeka,* te moa ao te toki.+ Ane e taka ao N na anganna te ran ae akea boona mani koburaken te ran ni kamaiu.+ 7 Ane e tokanikai ao e na reke tibwangana ni baikai, ao N na riki bwa Atuana ao e na riki bwa natiu. 8 Ma te koraki aika mamaaku ao aika akea aia onimaki+ ao aika koro n ribaaki ibukina bwa a kamwara, ao taan tiriaomata,+ ao taani wene ni bure,*+ ao taan tabunea, ao taan taromaurii bouannanti, ao taani kewe ni kabane,+ a na reke tibwangaia n te nama ae ura iai te ai ma te burimton.*+ E tei aei ibukin te mate ae te kauoua.”+

9 Ao e roko temanna mai buakoia anera ake itiman ake iai irouia boora ake itiua ake a onrake ni baika kamamate aika itiua+ ake mai mwaina, ao e taku nakoiu: “Nakomai bwa N na kaota nakoim te tia mare te aine ae buun te Tiibutetei.”+ 10 Mangaia are e a uotainako rinanon te taamnei, nakon te maunga ae totoa ma n rietata, ao e kaota nakoiu te kaawa ae tabu ae Ierutarem ae ruo mai karawa mairoun te Atua,+ 11 ao e mimitong ni mimitongin te Atua.+ Raneaneana ai aron raneanean te atibu ae moan te kakawaki, ae ai aron te atibu ae te iatiba* ae raneanea n aron raneanean te kirutitaro.*+ 12 Iai oona ae rietata ae totoa ao iai mataroana aika 12, ao iai anera aika 12 ni mataroana nako, ao a koreaki aara ni mataroa aikai ake aran aia baronga tibun Iteraera ake 12. 13 Ao tenua mataroana mai mainiku, ao tenua mataroana mai meang, ao tenua mataroana mai maiaki, ao tenua mataroana mai maeao.+ 14 Ao iai atibu aika 12 aika a aana oon te kaawa, ae iai aara aika 12 i aoia, ake araia ana abotoro+ te Tiibutetei ake 12.

15 Ao teuare taetae nakoiu e taua te kai ni baire ae te kaibwabwaa ae te koora, bwa e na anaa abwakin te kaawa ma mataroana nako ma oona.+ 16 Ao aua rarikin te kaawa aei, ao e boraoi anauna ma raababana. Ao e anaa abwakin te kaawa n te kaibwabwaa, bwa 12,000 te titeitia.* E boraoi anauna ma raababana ao rietana. 17 E anaa naba abwakin oona, bwa 144 te mwanokunibai,* n ana kai ni baire te aomata ae bon ana kai ni baire naba te anera. 18 Ao e karaoaki oona man te iatiba,+ ao bon te koora ni koaua te kaawa, ae ai aron te kiraati ae itiaki. 19 E katamaroaaki aan oon te kaawa n aeka n atibu nako aika rangi ni kakawaki: aana ae te moan te iatiba, te kauoua te tabeiro,* te katenua te kareketona, te kaaua te emerote, 20 te kanimaua te taretonuka,* te kaonoua te tarerio, te kaitiua te kerutorito, te kawanua te beruro, te karuaiwa te tobati, te katebwina te kurutoberato, te katebwi ma teuana te iatinte, ao te katebwi ma uoua te ameteti. 21 Ao mataroana ake 12 boni moomin te bwaeao aika 12. A karaoaki mataroana nako ni kaka teuana moomin te bwaeao. Ao te kawai ae totouaki are kawain te kaawa, bon te koora ni koaua ae ai aron te kiraati ae itiaki.

22 I aki nora te tembora i nanon te kaawa, bwa temborana bon Iehova* ae te Atua ae Moan te Mwaaka,+ ao te Tiibutetei naba. 23 Ao e aki kainnanoaki taai ke namwakaina bwa a na oota i aon te kaawa, bwa e kaotaaki ni mimitongin te Atua,+ ao taurana bon te Tiibutetei.+ 24 Ao a na nakonako natannaomata n ootana,+ ao a na uotii mimitongia uean aonnaba nako iai. 25 A na bon aki roko n te kainaki mataroana n te ngaina, bwa akea te bong ikekei.+ 26 Ao e na uotaki mimitongia natannaomata ao karineaia nako nanona.+ 27 Ma bon akea te anga ae e na rin iai te bwai teuana ae kamwara ma ane e kakaraoa te bwai ae koro n ribaaki ma te mwamwanaa te aba,+ ma a na tii rin te koraki ake a koreaki araia n ana boki ni kamaiu te Tiibutetei.+

22 Ao e kaota nakoiu karaangan te ran ni kamaiu,+ ae itiaki n ai aron te kirutitaro,* ae raanganako man ana kaintokanuea te Atua ao te Tiibutetei,+ 2 nako nukani kawain te kaawa ae te kawai ae totouaki. Ao iai kaai ni kamaiu n iteran te karaanga aei ni kauaitera, aika a uaa 12 te tai ni katoa ririki. A bane n uaa ni katoa namwakaina. Ao baani kaai aikai boni bwainnaoraki nakoia natannaomata.+

3 Ao e nang akea te rekenikai. Ma e na mena ana kaintokanuea te Atua ao te Tiibutetei+ n te kaawa, ao a na beku irouna ana toro, 4 ao ane a na nora ubuna,+ ao e na mena arana i aon ramwaia.+ 5 Ao e nang akea naba te bong,+ ao a na aki kainnanoa ootan te taura ke ootan taai, bwa e nang kaotaia Iehova* ae te Atua,+ ao a na tautaeka bwa ueea n aki totoki.+

6 Ao e taku nakoiu: “A kakaonimaki* taeka aikai ao a koaua,+ eng, e kanakoa ana anera Iehova* ae te Atua are e kairiia burabeti+ bwa a na taetae nakoia ana toro ni kaotii bwaai aika a na waekoa n roko. 7 Noria! I a waetata n roko.+ E a kukurei ane e kakairi n taetae ni burabeti aika taekinaki n te nira ni boki aei.”+

8 Boni ngai ae Ioane ae I ongo baikai ao I nori. Ao ngke I ongo ma n nori, ao I katorobubua ni bobaraaki ma n taromauri i waen te anera are kaotii baikai nakoiu. 9 Ma e taku nakoiu: “Taratara raoi! Tai karaoa anne! Bon te toro naba ngai n ai arom ao n ai aroia tarim ake burabeti ma te koraki ake a kakairi n ae taekinaki n te nira ni boki aei. Taromauria te Atua.”+

10 Ao e tuangai naba ni kangai: “Tai kaini ke ni kanimwa te kanikina i aon taetae ni burabeti aika taekinaki n te nira ni boki aei, bwa e a kaan te tai ae baireaki. 11 Ke e teimatoa ni buakaka ane e buakaka, ao ke e teimatoa ni kamwara ane e kamwara. Ma ke e teimatoa n raoiroi ane e raoiroi, ao ke e teimatoa n itiaki* ane e itiaki.

12 “‘Noria! I a waetata n roko, ao e mena irou te kaniwanga ae N na anga nakoia aomata n tatabemania nako ni kaineti ma aia mwakuri.+ 13 Ngai te Arebwa ao te Omeka,*+ te moan ao te kabane, te moa ao te toki. 14 A a kukurei ake a a tia n teboki aia kamwarai+ bwa e aonga n reke inaomataia ni kawari kaai ni kamaiu,+ ao e aonga n reke rinia n te kaawa rinanoni mataroana.+ 15 A mena i tinanikun te kaawa kamea* ma taan tabunea ma taani wene ni bure,* ma taan tiriaomata ma taan taromaurii bouannanti ma aomata nako aika tangira te kewe ma ni bwabwainna.’+

16 “‘I kanakoa au anera nakoimi ngai ae Iesu, bwa e na kaotioti nakoimi ibukini baikai, aika baika kaineti ma taian ekaretia. Ngai wakaan Tawita ao kanoana,+ ao te itoi ni ngaina ae raneanea.’”+

17 Ao e teimatoa ni kangai te taamnei ao te tia mare te aine,+ “Nakomai!” ao ke e kangai ane e ongo, “Nakomai!” ao ke e nakomai ane e taka,+ ao ane e kan anaa te ran ni kamaiu ao ke e anaia n akea boona.+

18 “I kaotioti nakoia aomata nako ake a ongo n taetae ni burabeti aika taekinaki n te nira ni boki aei: Ngkana iai ae e karakai baikai,+ ao te Atua e na karakai naba nakoina baika kamamate ake a koreaki taekaia n te nira ni boki aei,+ 19 ao ngkana iai ae e kanakoa te bwai teuana man taetae ni burabeti aika taekinaki n te nira ni boki aei, ao e na uotaanako naba tibwangana te Atua mani kaai ni kamaiu,+ ao man te kaawa are tabu,+ ake a koreaki taekaia n te nira ni boki aei.

20 “E taku teuare kaotioti ibukini baikai, ‘Eng, I a waetata n roko.’”+

“Amen! Nakomai te Uea ae Iesu.”

21 Ke e mena ana akoi ae rianako te Uea ae Iesu irouia te koraki aika itiaki.*