ANA MOAN RETA IOANE

1 Ti koroboki nakoimi n taekina taekan teuare iai man te moantai, are e uota te taeka ae karekea te maiu,+ are ti ongora irouna, are ti noria ni matara, are ti tarataraia ao ti ringnga ni baira, 2 (eng, e kaotaki te maiu are aki toki nakoira ao ti a noria ao ti a kaotioti+ ibukina ao ni kaongoingkami taekana. E nako te maiu ae aki toki+ aei mairoun te Tama, ao e kaotaki nakoira), 3 ao ti kaongoingkami naba te baere ti a tia n noria ao n ongo,+ bwa kam aonga ni katiteuanaaki* naba ma ngaira. Ao ti katiteuanaaki naba iai ma te Tama ao Natina ae Iesu Kristo.+ 4 Ao ti korei baikai bwa e aonga ni kororaoi kimwareireira.

5 Aio te rongorongo are ti ongo irouna ao ti taekinna nakoimi: bon te oota te Atua+ ao akea naba teutana te rotongitong irouna. 6 Ma ngkana ti kangai, “Ti katiteuanaaki ma ngaia,” ma ti teimatoa n nakonako n te roo, ao ti boni kewe, ao ti aki karaoa ae koaua.+ 7 Ma ngkana ti nakonako n te oota n arona ngkai e mena n te oota, ao iai te katiteuanaaki i marenara, ao e kaitiakira raraan Natina ae Iesu man te bure ni kabane.+

8 Ma ngkana ti kangai, “Akea ara bure,” ao ti burebureira i bon iroura+ ao e aki mena te koaua i nanora. 9 E kakaonimaki te Atua ao e raoiroi, mangaia ae ngkana ti kaotii ara bure, ao e na kabwarai ara bure ao e na kaitiakira man te buakaka ni kabane.+ 10 Ma ngkana ti kangai, “Ti tuai ni bure,” ao ti karikia iai bwa te tia kewe, ao e aki mena ana taeka i nanora.

2 Au ataei aika uarereke, I korei baikai nakoimi bwa kam aonga n aki bure.* Ma ngkana iai ae e bure, ao iai te tia buokira* ae mena iroun te Tama, ae Iesu Kristo,+ ae te aomata ae raoiroi.+ 2 Ao boni ngaia te karea ni kan raoi*+ ibukin ara bure,+ ma tiaki tii ara bure ma aia bure naba kaain te aonnaba ni kabane.+ 3 Ao ti ataia bwa ti ataa teuaei, n aei: ngkai ti teimatoa ni kakairi n ana tua. 4 Ane e kangai: “I ataa teuaei,” ma e aki kakairi n ana tua, ao bon te tia kewe, ao e aki mena te koaua i nanona. 5 Ma ane e kakairi n ana taeka teuaei, ao e boni kakororaoaki tangiran te Atua+ irouna. Ibukin aei, ti a ataia iai bwa ti katiteuanaaki ma ngaia.+ 6 Ane e taku bwa e teimatoa ni katiteuanaaki ma teuaei, ao e riai n nakonako naba n aron are e nakonako iai teuaei.+

7 Ngkami aika kam tangiraki, I aki korea te tua ae boou nakoimi, ma I korea te tua nikawai are mena iroumi man te moantai.+ Te tua nikawai aei bon te taeka are kam a tia n ongo. 8 Ma e ngae n anne, I korea nakoimi te tua ae boou, ae te tua ae koaua iroun Iesu ao iroumi naba, ibukina bwa e tabe ni maunanako te rotongitong ao e a anga ootana te oota ni koaua.+

9 Ane e taku bwa e mena n te oota ma e ribaa+ tarina, ao e teimatoa ni mena n te rotongitong.+ 10 Ane e tangira tarina ao e teimatoa ni mena n te oota,+ ao akea te bwai ae e na karekea bwakana. 11 Ma ane e ribaa tarina ao e mena n te rotongitong ao e nakonako n te rotongitong,+ ao e aki ataa ike e na nako iai,+ ibukina bwa a kamatakiaki matana n te rotongitong.

12 I koroboki nakoimi ngkami aika ataei aika uarereke, ibukina bwa a a tia ni kabwaraaki ami bure ibukin arana.+ 13 I koroboki nakoimi ngkami aika kaaro ibukina bwa kam a ataa teuare iai man te moantai. I koroboki nakoimi ngkami aika rorobuaka n ataei, ibukina bwa kam a tia ni kataenikaia teuare buakaka.+ I koroboki nakoimi ngkami aika ataei aika uarereke, ibukina bwa kam a ataa te Tama.+ 14 I koroboki nakoimi ngkami aika kaaro ibukina bwa kam a ataa teuare iai man te moantai. I koroboki nakoimi ngkami aika rorobuaka n ataei, ibukina bwa kam korakora+ ao e teimatoa ni mena i nanomi+ ana taeka te Atua, ao kam a tia ni kataenikaia teuare buakaka.+

15 Kam na tai tangira aia waaki kaain te aonnaba ke waakina nako.+ Ngkana iai ae e tangira aia waaki kaain te aonnaba, ao e aki mena tangiran te Tama i nanona,+ 16 ibukina bwa aia bwai nako kaain te aonnaba, ae ana kaibwabwaru te rabwata+ ma baika a tangiri maata+ ma te kainikatonga ni kaubwain te maiu aei,* a aki riki mairoun te Tama, ma a riki boni mairouia kaain te aonnaba. 17 Ma a tabe ni maunanako kaain te aonnaba ma baike a tatangiri,+ ma e teimatoa n aki toki ane e kakaraoa nanon te Atua.+

18 Ataei aika uarereke, ai bon te kabanea n tai aei, ao n aron are kam ongo bwa e na roko+ te tia kaitaraa Kristo, ao a a bati ngkai taani kaitaraa Kristo aika kaoti,+ mangaia ae ti a ataia iai bwa ai bon te kabanea n tai aei. 19 A mena i buakora ngkoa ma a a otinako mairoura bwa ai tiaki raora,*+ bwa ngke arona bwa raora, ao a na teimatoa n tiku iroura. Ma a otinako bwa e aonga n oti raoi bwa bon tiaki raora aomata ni kabane.+ 20 Ao kam a tia ngkami ni kabiraki iroun teuare tabu,+ ao iai te atatai iroumi ni kabane. 21 I koroboki nakoimi, tiaki ibukina bwa kam aki ataa te koaua,+ ma ibukina bwa kam ataia, ao ibukina bwa akea te kewe ae nako man te koaua.+

22 Antai te tia kewe? Tiaki bon te aomata are taku bwa tiaki Iesu te Kristo?+ Boni ngaia te tia kaitaraa Kristo+ ae kakeaa te Tama ao te Nati. 23 Ane e kakeaa te Nati ao e aki katiteuanaaki naba ma te Tama.+ Ma ane e kaotiotia bwa e onimakina te Nati+ ao e katiteuanaaki naba ma te Tama.+ 24 Ao e riai n teimatoa ni mena i nanomi te baere kam ongo man te moantai.+ Ngkana e teimatoa ni mena i nanomi te baere kam ongo man te moantai, ao kam na teimatoa ni katiteuanaaki ma te Nati ao ni katiteuanaaki naba ma te Tama. 25 Ao irarikina, te baere e beritanna nakoira bon te maiu n aki toki.+

26 Baika I korei nakoimi, bon taekaia te koraki ake a kataia ni burebureingkami. 27 E kabiringkami te Atua n taamneina+ ao e teimatoa te taamnei ni mena i nanomi, ao kam aki kainnanoa temanna bwa e na reireiningkami. Ma kam reireinaki ni bwaai ni kabane rinanoni kabirakimi irouna, ao e koaua ao e aki kewe, ao kam riai n teimatoa ni katiteuanaaki ma ngaia+ ni kaineti ma reireinakimi ni kabirakimi.+ 28 Mangaia ae ataei aika uarereke, kam na teimatoa ni katiteuanaaki ma ngaia, bwa ngkana e a kaotaki ao ti na aki maaku n taetae+ ao ti na aki nuka irouna ngkana e a oki ma n tiku.* 29 Ngkana kam ataia bwa e raoiroi, ao kam ataia naba bwa bon natina aomata nako ake a kakaraoa ae raoiroi.+

3 Taraa aron ana tangira te Tama ae kaotia nakoira+ ngke e kariaia bwa ti na atongaki bwa natin te Atua!+ Ao bon natina ngaira. Anne bukina ae a aki ataira+ iai kaain te aonnaba ibukina bwa a aki ataa te Atua.+ 2 Ngkami aika kam tangiraki, bon natin te Atua ngaira+ ngkai, ma e tuai moa ni kaotaki bwa tera arora rimwi.+ Ma ti ataia bwa ngkana e a kaotaki teuaei, ao ti nang riki n ai arona, ibukina bwa ti nangi bon nora raoi arona. 3 Ao aomata nako ake a kabotoi aia kantaninga i aon teuaei, a kaitiakiia iai i bon irouia,+ n ai aron teuaei ae itiaki.

4 Ane e kakaraoa ae bure ao e ririaon naba te tua, ao te bure bon riaoan te tua. 5 Kam ataia naba bwa e kaotaki teuarei bwa e na kamaunai ara bure,+ ao bon akea te bure i nanona. 6 Ane e teimatoa ni katiteuanaaki ma teuaei, ao e aki kakaraoa ae bure,+ ao akea ae e kakaraoa ae bure ae e a tia n nora teuaei ke n ataia. 7 Ataei aika uarereke, ke e tai burebureingkami temanna. Ane e kakaraoa ae raoiroi ao e bon raoiroi, n aron teuarei ngkai e raoiroi. 8 Ane e kakaraoa ae bure ao e nako mairoun te Riaboro, bwa bon te Riaboro are bubure man te moantai.*+ Ibukin aei, ao e a kaotaki Natin te Atua, bwa e aonga n urui* ana mwakuri te Riaboro.+

9 Ane e bungiaki mairoun te Atua ao e aki kakaraoa ae bure,+ bwa e mena i nanona te koraa* are mairoun te Atua, ao e aki kona ni kakaraoa ae bure, bwa e bungiaki mairoun te Atua.+ 10 A kaotaraeaki natin nako te Atua ao natin nako te Riaboro, n aei: Ane e aki kakaraoa ae raoiroi ao e aki nako mairoun te Atua, ao e aki naba nako mairoun te Atua ane e aki tangira tarina.+ 11 Bwa bon aei te rongorongo are kam ongo man te moantai, ae ti riai n itangitangiri i marenara,+ 12 tiaki n ai aroni Kain are nako mairoun teuare buakaka are e kamatea tarina.+ Ao tera bukini kamateana irouna? Ibukina bwa a bubuaka ana mwakuri+ ma a raraoi ana mwakuri tarina.+

13 Kam na tai kubanako taari ngkai a ribaingkami kaain te aonnaba.+ 14 Ti ataia bwa ti a tia ni kitana te mate ao n nakon te maiu,+ ibukina bwa ti tangiriia taari.+ Ane e aki tangira tarina ao e teimatoa n tiku n te mate.+ 15 Ane e ribaa tarina ao bon te tia tiriaomata,+ ao kam bon ataia bwa akea te maiu are aki toki iroun te tia tiriaomata.+ 16 Ti a ataa te tangira, n aei: ngkai e anga maiuna* teuarei ibukira,+ ao ti riai naba ngaira n anga maiura* ibukia tarira.+ 17 Ma ngkana iai ae e reke arona ni bwain te aonnaba aei aika tau ibukini karekeani maiuna, ao e nora tarina bwa e kainnano ma e rawa ni kaota ana nanoanga nakoina, ao e na kangaa ni mena tangiran te Atua i nanona?+ 18 Ataei aika uarereke, ti aki riai n itangitangiri n tii te taeka ke n te wi,+ ma ti riai n itangitangiri n te mwakuri+ ao n te koaua.+

19 Ti na ataia iai bwa ti nako man te koaua, ao ti na karaui* nanora i matana 20 ni kaineti ma baike a na kabuakakaira iai nanora, ibukina bwa e rianako riki aron te Atua nakon nanora ao e atai bwaai ni kabane.+ 21 Ngkami aika kam tangiraki, ngkana e aki kabuakakaira nanora, ao ti na aki maaku n taetae nakon te Atua,+ 22 ao te baere ti butiia, ti na boni karekea mairouna,+ ibukina bwa ti kakairi n ana tua ao ti kakaraoa ae kakukurei i matana. 23 Ma bon aei ana tua: ae ti na onimakina aran Natina ae Iesu Kristo+ ao ti na itangitangiri i marenara+ n aron are e tua nakoira. 24 Ma ane e kakairi n ana tua ao e teimatoa ni katiteuanaaki ma ngaia, ao ngaia e katiteuanaaki ma te aomata anne.+ Ao ti a ataia bwa e teimatoa ni katiteuanaaki ma ngaira rinanon taamneina are e anganira.+

4 Ngkami aika kam tangiraki, tai waekoa ni kakoauai taeka nako aika taraa n reke rinanon te taamnei,*+ ma tuoi moa taeka* aikai n nori bwa a bon nako mairoun te Atua+ ke a aki, bwa a bati burabeti ni kewe aika kaoti n te aonnaba.+

2 Kam na ataa te taeka ae reke rinanon te taamnei bwa boni mairoun te Atua, n aei: A nako mairoun te Atua taeka nako aika reke rinanon te taamnei, aika kaota tauani bukin Iesu Kristo bwa e roko n te rabwata.+ 3 Ma taeka nako aika reke rinanon te taamnei aika aki kaota tauani bukin Iesu, a aki nako mairoun te Atua,+ ma bon ana taeka te tia kaitaraa Kristo are kam a tia n ongo bwa e na roko,+ ao e a mena ngkai n te aonnaba.+

4 Ataei aika uarereke, kam bon nako mairoun te Atua, ao kam a tia ni kataei aia kai+ te koraki anne, ibukina bwa e kakannato riki teuare katiteuanaaki ma ngkami+ nakon teuare katiteuanaaki ma kaain te aonnaba.+ 5 A nako nakanne mai buakoia kaain te aonnaba,+ anne bukina ae a taekin iai aia taeka kaain te aonnaba ao a ongo kaain te aonnaba irouia.+ 6 Ti nako ngaira mairoun te Atua. Ane e reke irouna ataakin te Atua ao e ongo iroura,+ ma ane e aki nako mairoun te Atua ao e aki ongo iroura.+ Anne arora n atai kaokoron taeka nako aika koaua aika reke rinanon te taamnei, ao taeka nako aika kewe aika reke rinanon te taamnei.+

7 Ngkami aika kam tangiraki, ti bia teimatoa n itangitangiri i marenara,+ ibukina bwa e nako te tangira mairoun te Atua, ao a bungiaki mairoun te Atua aomata nako ake a tatangira ao a ataa te Atua.+ 8 Ane e aki tatangira ao e aki ataa te Atua, bwa te Atua bon te tangira.+ 9 E kaotaki ana tangira te Atua ibukira, n aei: ngkai e kanakomaia Natina ae te rikitemanna+ te Atua nako buakoia kaain te aonnaba bwa ti aonga ni karekea te maiu rinanona.+ 10 Aio aron te tangira aei, bwa e tangirira te Atua ao e kanakoa Natina bwa te karea ni kan raoi*+ ibukin ara bure,+ ao e aki karaoa aei ibukina bwa ti tangiria.

11 Ngkami aika kam tangiraki, ngkana ngaia bwa e tangirira te Atua n te aro aei, ti riai ngkanne n itangitangiri i marenara.+ 12 Akea temanna ae e a tia n nora te Atua n te taina.+ Ngkana ti teimatoa n itangitangiri i marenara, ao e mena iroura te Atua, ao e kakororaoaki ana tangira i nanora.+ 13 Ti a ataia bwa ti teimatoa ni katiteuanaaki ma ngaia, ao ngaia e katiteuanaaki ma ngaira, n aei: ibukina bwa e a tia n anganira taamneina. 14 Irarikin anne, ti a tia n noria bwa e kanakomaia Natina te Tama bwa te tia kamaiuia kaain te aonnaba, ao ti kaotiota naba taekan anne.+ 15 Ane e kaotiota Iesu bwa Natin te Atua,+ ao e na teimatoa te Atua ni katiteuanaaki ma te aomata anne ao ngaia e na katiteuanaaki ma te Atua.+ 16 Ma ti a ataa ngaira ana tangira te Atua ibukira+ ao ti kakoauaa.

Te Atua bon te tangira,+ ao ane e teimatoa n tatangira ao e teimatoa ni katiteuanaaki ma te Atua, ao e teimatoa naba te Atua ni katiteuanaaki ma ngaia.+ 17 N te aro aei ao e kakororaoaki te tangira i nanora, bwa ti aonga n taetae n aki maaku*+ n te bong ni motikitaeka, bwa aroni Kristo ao ai bon arora naba i buakoia kaain te aonnaba aei. 18 Akea te maaku n te tangira,+ ma e kaaki* te maaku i ao te tangira ae kororaoi, ibukina bwa e taua inaomatara te maaku. Ni koauana, ane e mamaaku ao e tuai ni kakororaoaki n te tangira.+ 19 Ti kaotiota te tangira, ibukina bwa e tangirira moa te Atua.+

20 Ngkana iai ae e kangai: “I tangira te Atua,” ma e ribaa tarina, ao bon te tia kewe.+ Bwa ane e aki tangira tarina+ ae e a tia n noria, ao e aki kona n tangira te Atua ae e tuai n noria.+ 21 Ao aei te tua ae ti anganaki mairouna, bwa ane e tangira te Atua, ao e riai naba n tangira tarina.+

5 E bungiaki mairoun te Atua+ ane e kakoauaa ae Iesu bon te Kristo, ao ane e tangira teuare anga te maiu, e tangira naba ane e bungiaki mairoun teuarei. 2 Ngkana ti tangira te Atua ao ni kakairi n ana tua, ao ti ataia iai bwa ti tangiriia natin te Atua.+ 3 Bwa bon aei tangiran te Atua, ae ti na kakairi n ana tua,+ ao a aki rawawata ana tua,+ 4 ibukina bwa a tokanikai i aoia kaain te aonnaba,+ aomata nako ake* a bungiaki mairoun te Atua. Ao te tokanikai aei ae kataei aia kai kaain te aonnaba bon ara onimaki.+

5 Antai ae kona ni kataei aia kai kaain te aonnaba?+ Tiaki bon ane e onimakina Iesu bwa Natin te Atua?+ 6 Bon Iesu Kristo are nakomai n te ran ao n te raraa, ao tiaki tii n te ran,+ ma te ran ao te raraa.+ Ao e kaotioti+ ibukin aei te taamnei, ibukina bwa te taamnei bon te koaua. 7 Bwa bon taani kaotioti baika tenua aikai: 8 ae te taamnei,+ ao te ran,+ ao te raraa,+ ao a boraoi aia kaotioti baika tenua aikai.

9 E boni kakannato riki ana kaotioti te Atua nakon aia kaotioti aomata ae ti butimwaeia, ibukina bwa ana kaotioti te Atua aei, e boni kaotioti ibukin Natina. 10 Ane e onimakina Natin te Atua ao iai te kaotioti i nanona. Ane e aki onimakina te Atua ao e karika te Atua bwa te tia kewe,+ ibukina bwa e aki kakoauaa te kaotioti are e anga te Atua ibukin Natina. 11 Ao aei ae kaotiotaki, ae te Atua e anganira te maiu are aki toki,+ ao e reke te maiu aei rinanon Natina.+ 12 Ane e butimwaea te Nati ao iai irouna te maiu are aki toki, ma ane e aki butimwaea Natin te Atua ao akea irouna te maiu are aki toki.+

13 I korei baikai nakoimi bwa kam aonga n ataia bwa iai iroumi te maiu are aki toki,+ ngkami aika kam onimakina aran Natin te Atua.+ 14 Ao ti aki nanokokoraki iroun* te Atua+ n aei, bwa ngkana ti bubutiia te bwai teuana ae boraoi ma nanona ao e bon ongo iroura.+ 15 Ao ngkana ti a ataia bwa e ongo iroura ni kaineti ma baike ti butiia, ao ti ataia bwa a na bon reke iroura baike ti bubutii, kioina ngkai ti bubutii nakoina.+

16 Ngkana iai temanna ae nora tarina bwa e bure n te bure ae e aki reke iai te mate, ao e na bubutii ibukina ao e na anganaki te maiu iroun te Atua,+ eng e kaineti aei nakoia akana bure n te bure ae aki karekea te mate. Ma iai te bure ae karekea te mate.+ Ao bon aei te bure ae I aki tuanga temanna bwa e na tataro ibukina. 17 Mwakuri nako aika buakaka bon te bure,+ ma iai te bure ae aki karekea te mate.

18 Ti ataia bwa a aki kakaraoa ae bure aomata nako ake a bungiaki mairoun te Atua, ma e kawakinia teuare bungiaki mairoun te Atua,* ao e aki kona n ringia*+ teuare* buakaka. 19 Ti ataia bwa ti nako mairoun te Atua, ma a bane kaain te aonnaba ni mena i aani mwaakan teuare buakaka.+ 20 Ma ti ataa Natin te Atua bwa e a tia n roko,+ ao e a tia n anganira te ataibwai* bwa ti aonga ni karekea te atatai ibukin Teuare koaua.+ Ao ti katiteuanaaki ma Teuare koaua rinanon Natina ae Iesu Kristo. Boni ngaia te Atua ae koaua ao nibwan te maiu are aki toki.+ 21 Ataei aika uarereke, kawakiningkami mani bouannanti.+