NAKON TITO

1 Ngai ae Bauro ae ana toro te Atua, ao ana abotoro Iesu Kristo ni kaineti ma aia onimaki te koraki ake e rineiia te Atua, ao te atatai ae eti ibukin te koaua, ae boraoi ma tangiran te Atua 2 ae boto i aon te kantaninga ibukin te maiu are aki toki+ are e a kamani beritanna mangkoangkoa, te Atua ae aki kona ni kewe.+ 3 Ma ngke e a roko te tai are e baireia, ao e a kaotiota ana taeka n te mwakuri n uarongorongo are I mwiokoaki iai,+ n aron are e tua ara tia Kamaiu ae te Atua. 4 I korea te reta aei nakon Tito ae te nati ni koaua ni kaineti ma te onimaki ae ti ibuokanibwai iai:

Ke e mena iroum te akoi ae rianako ma te rau mairoun te Atua ae te Tama ao Kristo Iesu ae ara tia Kamaiu.

5 I katikuko i Kirete bwa ko aonga ni kaetii bwaai aika kairua* ao ni mwiokoiia tabeman bwa unimwaane, n te kaawa teuana ma teuana, n aron are I tua nakoim: 6 E riai unimwaanen te ekaretia n* akea kabuakakaana, ni buuna te aine ae tii temanna, a na onimaki natina ao akea bukinaia ni kaineti ma te kaibwabwaru* ke te karitei.+ 7 Bwa e riai n akea kabuakakaan te mataniwi* ngkai ana toro* te Atua ngaia, e na aki kakanneti,+ e na aki kakaiun,+ e na aki kokoro ni manging, e na aki iowawa,* e na aki nanonrang ni kani karekea arona n te babakanikawai, 8 ma e na akoakoiia+ aomata,* e na tangira te raoiroi, e na iangoraoi,*+ e na bwabwaina te eti, e na kakaonimaki ni koaua,+ e na taubaang,+ 9 e na taua raoi bukin te taeka ae koaua* n arona n angareirei,+ bwa e aonga ni kona ni kaungaunga n te reirei ae manena,*+ ao ni boaiia+ akana kaitaraa te reirei aei.

10 Bwa a mwaiti aomata aika karitei, taani kaubwarantiko, ao taani bureburea te aba, ai moarara riki te koraki ake a taua bukin te korotobibi.+ 11 E riai ni kainaki wia aomata aikai ibukina bwa a teimatoa n uruani aia onimaki taian utu, n aia angareirei i aoni baike a aki riai n taekin, ibukini karekean aroia n te babakanikawai. 12 E taku temanna irouia ae bon oin aia burabeti: “Kaaini Kirete bon taani kewe, ao maan aika moaanti aika tiritiri, ao te koraki ni buabeka ma n taningaroti.”

13 E koaua te kaotioti aei, mangaia ae ko na teimatoa ni boaiia n te aro ae matoatoa bwa a aonga ni marurung n te onimaki, 14 ao n aki mutiakin aia karaki n ototo I-Iutaia ma aia tua aomata ake a rairakinako man te koaua. 15 A bane n itiaki bwaai nakoia aomata aika itiaki,+ ma akea te bwai ae itiaki nakoia aomata aika kamwara ao aika aki onimaki, bwa a kaai ni kamwara aia iango ao mataniwin nanoia.+ 16 A taekinna i mataia aomata bwa a ataa te Atua, ma a kakeaa n aia mwakuri,+ ibukina bwa a riribaaki ao a aki ongeaba, ao a aki tau nakon aeka ni mwakuri aika raraoi ni kabane.

2 Mangaia ae ko na teimatoa n taekina ae boraoi ma te reirei ae manena.*+ 2 A riai mwaane ake a a kara n taubaang ni bwaai ni kabane, a na wanawana, a na bwaina te iangoraoi, e na korakora aia onimaki ma aia tangira ao nanomwaakaia. 3 A riai naba aine ake a a kara n arona te aroaro ae riai ae bwabwainaki irouia taan onimaki, a na aki uarao, a na aki tautoronaki n te wain ae bati, ao a na angareirei i aoni baika raraoi, 4 bwa a aonga n reireinia* ateiaine bwa a na tangiriia buuia, a na tangiriia natiia, 5 a na bwaina te iangoraoi, a na bwaina te aroaro ni maiu ae riai, a na mwamwakuri ni bataia,* a na raoiroi, a na aantaeka irouia oini buuia,+ bwa e aonga n aki kabuakakaaki ana taeka te Atua.

6 Teimatoa naba ni kaumakiia rorobuaka n ataei bwa a na iangoraoi,+ 7 ao kaotiko ni bwaai ni kabane bwa te banna ni katoto ngkoe ni karaoani mwakuri aika raraoi. Ko na angareirei n taekan te bwai ae itiaki* ma ni karaoi bwaai nako ma te kakorakora,+ 8 ni kabongana te taetaenikawai ae manena* ae aki kona n tiribureaki,+ bwa a aonga ni kamaamaeaki te koraki ake a kaaitarako, ao e na akea te bwai ae kamwara* ae a na taekinira iai.+ 9 Ke a aantaeka tooro irouia aia toka ni bwaai ni kabane,+ ni kataia ni kakukureiia, n aki kabootaeka, 10 a na aki anaibwai mairouia,+ ma a na kaotiotia raoi bwa a kona n onimakinaki, bwa a aonga ni karekea kamoamoaan ana reirei ara tia Kamaiu ae te Atua, ni bwaai ni kabane.+

11 Bwa e a tia ni kaotaki ana akoi ae rianako te Atua, ae karekea te kamaiuaki nakoia aeka n aomata ni kabane.+ 12 E kataneiaira bwa ti na rawa nakoni bwaai ni kabane ake a kaitaraa nanon te Atua ao nakon tangirani bwain aon te aba,+ ao e kataneiaira bwa ti na maiuakina te iangoraoi ao te eti ao tangiran te Atua n te waaki ae ngkai i aon te aba,*+ 13 ngkai ti kariariaa te kantaninga ae kakukurei+ ao mimitongini kaotin te Atua ae kakannato, ao mimitongini kaotin ara tia Kamaiu ae Iesu Kristo 14 are anga ngaia ibukira+ bwa e na kainaomataira*+ man aeka ni mwakuri aika bubuaka ni kabane, ao ni kaitiakiia te koraki ake a na riki bwa oin ana aomata aika okoro, aika ingainga ni kani karaoi mwakuri aika raraoi.+

15 Teimatoa n tataekini baikai ao kaungaunga ma ni boaa te aba ni mwaakan nakoam.+ Tai kariaia temanna bwa e na kakeaa bongam.

3 Teimatoa ni kauringia bwa a na aantaeka ao n ongeaba nakon taian tautaeka ao mwaaka+ n tautaeka, ao a na tauraoi nakoni mwakuri aika raraoi ni kabane, 2 a na aki taetae ni kabuakakaa temanna, ke ni kan unun, ma a na aki imanono,+ a na kaotiota te nimamannei nakoia aomata nako.+ 3 Bwa ti nanobaba naba ngaira ngkoa, ti aki ongeaba, ti burebureaki, ti tautoronaki n taiani kaibwabwaru ao tangirani kakukureian te rabwata, ti bwabwaini aroaro aika bubuaka ao te bakantang, ti riribaaki ao ti kairiribai i marenara.

4 Ma ngke e kaotaki ana akoi ara tia Kamaiu ae te Atua+ ma ana tangira ibukia aomata, 5 (tiaki ibukini mwakuri aika raoiroi ake ti karaoi,+ ma ibukin ana nanoanga),+ e a kamaiuira iai ngkanne rinanoni kaitiakara* ae kairira nakon te maiu+ ao rinanon naba manga kaboouara rinanon te taamnei ae raoiroi.+ 6 E kabatiaa* kabwaroan te taamnei aei i aora, rinanon Iesu Kristo ae ara tia Kamaiu,+ 7 bwa ti aonga n riki bwa taani bwaibwai+ ni kaineti ma te kantaninga ibukin te maiu are aki toki,+ ngkana ti a tia n atongaki bwa ti raoiroi rinanon ana akoi ae rianako.+

8 A boni kona n onimakinaki baika taekinaki, ao I tangiringkami bwa kam na teimatoa n taekini baikai ni kamatoai, bwa a aonga ni kaatuui iaiangoani karaoani mwakuri aika raraoi te koraki ake a onimakina te Atua. A raraoi baikai ao a manena nakoia aomata.

9 Ma rarawa nakon titiraki ni baba ma taiani kateiriki ma te kaiangatoa ao kauntaekaakin te Tua, bwa bon akea manenaia ao akea uaaia.+ 10 Ma ibukini ngkanne te aomata ae kabutiinako reirei aika kewe,+ tinanikua teuanne+ ngkana ko a tia ni kauoua reireiana*+ 11 ngkai e ataaki bwa e a tia n rairakinako te aomata anne ao e bure, bwa e karekea n te bure i bon irouna.

12 Ngkana I kanakoa Aretema ke Tukiko+ nakoim, ao kawaekoako kawarai i Nikobori, bwa I iangoia bwa N na tiku iai n tain te kamwaitoro. 13 Katauraoi raoi bwaai ibukini mwanangan Tena are rabakau n te Tua ao Aboro, bwa a aonga n aki tare n te bwai teuana.+ 14 Ao ke a reireinaki naba ara aomata bwa a na kateimatoaia ni mwakuri aika raraoi, bwa a aonga n ibuobuoki ni karekei baika kainnanoaki n te tai ae karina,+ ao e aonga n uaana+ aia mwakuri.

15 A bane ni kamauriko te koraki aika mena i rarikiu. Aanga au kamauri nakoia akana tangirira aika kaain te onimaki.

Ke e mena iroumi ni kabane te akoi ae rianako.