TE KAUOUA N RETA NAKON TIMOTEO

1 Ngai ae Bauro ae ana abotoro Kristo Iesu n ana kantaninga te Atua, ni kaineti ma te berita ibukin te maiu ae kona n reke rinanoni Kristo Iesu,+ 2 nakon Timoteo ae te nati ae tangiraki:+

Ke e mena iroum te akoi ae rianako, ao te nanoanga, ao te rau mairoun te Atua ae te Tama, ao Kristo Iesu ae ara Uea.

3 I katituaraoa te Atua, ae I beku irouna n aroia au bakatibu ma mataniwin nanou ae itiaki, ngkai I aki toki n uringko n au kakorakora n tataro ni bubutii ni ngaina ao ni bong. 4 Ngkai I uringa rannimatam ao I ingainga ni kan noriko, bwa e aonga ni kabatiaaki kimwareireiu. 5 Bwa I uringa am onimaki ae aki mwamwanaa te aba,+ are e mena moa i nanon tibum ae Nei Roiti ao tinam ae Eunike, ae I kakoauaa raoi bwa e mena naba i nanom.

6 Ibukin aei ao I kauringko bwa ko na kauraa ana bwaintituaraoi te Atua ane i nanom n ai aron te ai, are e reke iroum ngke I kaaki baiu i aom.+ 7 Bwa e aki anganira te Atua te nano ae mamaaku,+ ma e anganira te nano ae korakora,+ ae tatangira ao ae wanawana. 8 Mangaia ae ko na tai maamaa ni kaotiota taekan ara Uea,+ ke ni maamaa irou ngai ae I karabuutinaki ibukina, ma ko na tauraoi ni maraki+ ibukin te rongorongo ae raoiroi, n onimakinan te korakora are mairoun te Atua.+ 9 E kamaiuira ao e weteira bwa ti na riki bwa te koraki aika itiaki,*+ tiaki ibukin ara mwakuri, ma ibukin ana kantaninga ma ana akoi ae rianako.+ Ti anganaki aei ngkoangkoa ni kaineti ma Kristo Iesu. 10 Ma e a kateretereaki raoi ngkai te akoi ae rianako, ni kaotan ara tia Kamaiu ae Kristo Iesu+ are kamauna te mate+ ao e kaotaa te oota i aon te maiu+ ma te aki mka,+ rinanon te rongorongo ae raoiroi,+ 11 are I mwiokoaki iai bwa te tia uarongorongo ao te abotoro ao te tia angareirei.+

12 Anne bukina ae I maraki naba ngai ni baikai,+ ma I aki maamaa iai+ bwa I ataa Teuare I onimakinna, ao I kakoauaa raoi bwa e kona ni kawakini bwaai nako ake I mwiokoi nakoina ni karokoa te bong arei.+ 13 Ko na teimatoa n taui taeka aika koaua*+ ake ko ongo irou. Taui ma te onimaki ao te tangira ae reke n te reitaki ma Kristo Iesu. 14 Ko na kawakina te bwai ae kakawaki aei ae ko mwiokoaki iai rinanon te taamnei ae raoiroi ae memena i nanora.+

15 Ko ataia bwa a bane n tannako mairou naake n te aono n Atia,*+ n ikotaki naba ma Bukero ao Eremokene. 16 Ke e nanoangaiia kaaini batan Onetiboro+ te Uea, bwa e aki toki ni kabebeteai, ao e aki maamaa ni kabaeakiu n te taurekereke. 17 Ma ngke e mena i Rom, ao e kakorakoraa ni kakaaeai ao I reke irouna. 18 Ke e nanoangaia te Uea ae Iehova* n te bong arei. Ko bon atai ana mwakuri nako ake e karaoi i Ebeto.

2 Mangaia ae ngkoe ae natiu,+ teimatoa ni kakorakorako rinanon te akoi ae rianako are i nanoni Kristo Iesu. 2 Ko na mwiokoiia mwaane aika kakaonimaki ni baike ko ongo irou, ake a boutokaaki koauaia irouia taani kakoaua aika bati,+ ao mwaane aikai a na tau n reireinia aomata tabemwaang. 3 Tauraoi n ibuokanibwai n te maraki,+ ngkai ana tautia ae raoiroi+ Kristo Iesu ngkoe. 4 Akea te aomata ae mwakuri bwa te tautia ae e katabetabea ni waaki ni bitineti* aika akea irekerekeia ma ana mwakuri n tautia, bwa e aonga ni kakukureia teuare karina arana bwa te tautia. 5 Ao ai aron naba taian takaakaro, e na aki katokaaki ana bau ane e kauaaba, ma tii ngkana e kauaaba n te aro ae boraoi ma tuan te takaakaro.+ 6 E bon riai te tia ununiki ae mwakuri korakora, ni moani katoong uaanikai ake e uniki. 7 Iaiangoa te bae I taekinna. E na bon anganiko te Uea te ota* ni bwaai ni kabane.

8 Uringnga bwa e kautaki Iesu Kristo mai buakoia maate,+ ao boni kanoan Tawita,*+ n aron te rongorongo ae raoiroi are I taekinna,+ 9 ae I maraki ibukina ao ni kabureaki ibukina bwa kaanga te tia kamwarua.+ Ma e ngae n anne, e aki kabaeaki ana taeka te Atua.+ 10 Ibukin aei, I teimatoa n nanomwaaka ni bwaai ni kabane ibukia te koraki aika rineaki,+ bwa a aonga ni karekea naba te kamaiuaki ae kona n reke rinanoni Kristo Iesu, ao te mimitong ae akea tokina. 11 E kona n onimakinaki te taeka aei: Ngkana ti a tia ni mate ma ngaia ao ti na manga maiu naba ma ngaia,+ 12 ngkana ti teimatoa n nanomwaaka ao ti na uaia naba n tautaeka ma ngaia bwa ueea,+ ngkana ti kakeaa ao e na kakeaira naba,+ 13 ngkana ti aki kakaonimaki ao e na teimatoa ngaia ni kakaonimaki, bwa e aki kona ni kakeaa aroarona ni koaua.

14 Teimatoa ni kauringia ni baikai, ao n tuangia* i matan te Atua bwa a na aki uneakin taian taeka, ae te bwai ae akea manenana naba teutana, ibukina bwa e uruana* aia onimaki akana ongora. 15 Kakorakorako ni kaotiko bwa ko tau i matan te Atua bwa te tia mwakuri ngkoe ae akea kamaamaeam n te bwai teuana, ae ko angareirei ma ni kabwarabwaraa taekan te koaua n te aro ae eti.+ 16 Ma rarawa nakon taetae aika akea uaaia aika kakeai bongani baika tabu,+ bwa ane a na karikirakea riki kaitaraan nanon te Atua taeka aikai, 17 ao ane e na butanako aia taeka n ai aron te aoraki ae te mka. A mena naba i buakoia te koraki anne Umenaio ma Bireto.+ 18 A rairakinako man te koaua mwaane aikai, n aroia n taku bwa e a tia n roko te mangauti,+ ao a a uruana aia onimaki tabeman. 19 Ma e ngae n anne, e teimatoa n nene aan te kateitei are e kawenea te Atua, ae kanikinaeaki n te taeka ae kangai, “E ataiia aika bon ana aomata Iehova,”*+ ao, “Ke a rawa nakon te buakaka aomata nako akana taboa aran Iehova.”*+

20 Ma i nanon te auti ae bubura, ao iai naba mwangko aika karaoaki man te kai ao te kaatibu irarikini mwangko aika karaoaki man te koora ao te tirewa. Tabeua a kabonganaaki n te aro ae rine, ma tabeua n te aro ae aki rine. 21 Mangaia ae ngkana iai temanna ae kararoaa ma ake a kabonganaaki n te aro ae aki rine, ao e na riki bwa te mwangko ae e na kabonganaaki n te aro ae rine, ae katabuaki,* ae e na bongana iroun ane e na bwainna, ae katauraoaki ibukini mwakuri aika raraoi ni kabane. 22 Mangaia ae birinako mani baike a bwabwarui rooro n rikirake, ao ukoukora te raoiroi, te onimaki, te tangira, ao te rau, n ikotaki ma te koraki aika wewetea te Uea ma nanoia ae itiaki.

23 Irarikina, rarawa nakoni kaborabakau ni baba aika akea manenaia+ ngkai ko ataia bwa a karika te kauntaeka. 24 Bwa e aki riai ni kauntaeka ana toro te Uea ma e riai n nimamannei* nakoia aomata nako,+ e na tau ibukin te angareirei, e na taona nanona ngkana e karaoaki ae kairua nakoina,+ 25 ao e na arona te nimamannei n reireinia ake a rarawa.+ Tao ane a na manga anganaki rairan nanoia* iroun te Atua bwa a aonga ni kairaki nakon te atatai ae eti ibukin te koaua,+ 26 ao e na manga oki aia iango ao a na buutakinako man ana kai ni kabwaru te Riaboro, kioina ngkai a raweaki irouna bwa a na karaoa nanona.+

3 Ma ko na ataia bwa a na roko taai aika okoro aika karuanikai, ni kabaneani boong.*+ 2 Bwa ane a nang riki aomata bwa taan tangiriia i bon irouia, taani bakimwane, taani kamoamoa, taan nanorieta, taan taetae ni kabuakaka, taan aki ongeaba irouia aia karo, taani bangaomata, taan aki kakaonimaki nakoia raoia,* 3 taan aki tatangira,* taani kakanneti, taan uarao, taan aki taubaang, taan iowawa, taan riribaa te raoiroi, 4 taani kamwamwane, taan aki kani bwerengaki, taani kainikatonga, taan tangira riki kakukurein te rabwata nakon tangiran te Atua, 5 ao a baka n tangira te Atua ma a kabwaka ni maiuakina tangirana.*+ Kam na tannako mairouia naakai. 6 A teirake mai buakoia te koraki aikai, mwaane aika nanowanawana ni kawari auti ni mwamwanaiia kaaina ao n taui aroia aine aika mamaara, ake aine ake a karawawataaki n te bure, ake a kairaki ni bwaruani baika kakaokoro nako, 7 ake a aki toki n reirei, ma e aki kona n reke irouia te atatai ae eti ibukin te koaua.

8 Boni mwaane ngaiia aika buakaka aia iango aika aki tau ni kaaina te onimaki, ao a teimatoa ni kaitaraa te koaua n aroia Ianne ma Iambere ake a kaitaraa Mote. 9 Ma e na aki ririkirake aia waaki, bwa e na oti nanobabaia nakoia aomata nako, n aron naba nanobabaia mwaane ake uoman akekei.+ 10 Ma ngkoe ko toua raoi mwin au angareirei, aroni maiuu,+ au kantaninga, au onimaki, au taotaonakinnano, au tangira, nanomwaakau, 11 bwainikirinau, ao marakiu ake aekakin ake a riki nakoiu i Antioka,+ i Ikonio,+ ao i Rutetera.+ I nanomwaaka i aani bwainikirinaki aikai, ao e kamaiuai te Uea mani baikai ni kabane.+ 12 Ni koauana, a na bane naba ni bwainikirinaki te koraki ake a kani maiuakina tangiran te Atua ngkai taan rimwini Kristo Iesu ngaiia.+ 13 Ma ane a na ririkirake riki ni buakaka aomata aika buakaka ma taani mwamwanaa te aba, ni bureburea te aba ao ni burebureaki.+

14 Ma ko na teimatoa ni kakairi ni baike ko reiakin ake e anaaki nanom iai bwa ko na kakoauai,+ ngkai ko ataiia aomata aika reireiniko baikai, 15 ao ngkai ko a kaman ataa te koroboki ae tabu+ mangke te merimeri+ ngkoe bwa e kona ni kawanawanako bwa e aonga ni kamaiuko rinanon onimakinani Kristo Iesu.+ 16 E kairaki korean te Koroboki ae Tabu ni kabane iroun te Atua+ ao e manena ibukin te angareirei,+ ao ibukini boaan te aomata, ibukini kaetani bwaai, ao ibukin te reirei ni kaetieti ae boraoi ma ana kaetieti te Atua,+ 17 bwa e aonga n taubobonga iai ana aomata te Atua, ma n tauraoi raoi nakoni mwakuri aika raraoi ni kabane.

4 I tua nakoim i matan te Atua ao Kristo Iesu are katauaki bwa e na motiki taekaia+ akana maiu ma akana mate,+ rinanoni kaotana+ ao rinanon ana Tautaeka n Uea,+ 2 bwa ko na uarongorongoa te taeka,+ ni kataningamarauko iai n te tai ae nakoraoi ao n tain naba te kangaanga. Kaetiia+ aomata, boaiia, ao kaungaia ma te taotaonakinnano ni kabane ao te rabakau n angareirei.+ 3 Bwa ane e na roko te tai ae a nang aki kani butimwaea iai te reirei ae koaua,*+ ma a nang irii oin nanoia ni kabatiaia taan reireinia bwa a aonga n ongora ni baike a boni kan ongoraei.+ 4 Ane a na rawa n ongora n te koaua, ao a na butimwaei karaki aika aki koaua. 5 Ma ko na kawanawanako* ngkoe ni bwaai ni kabane, nanomwaaka i aan te kangaanga,+ karaoa ana mwakuri te tia tataekina te euangkerio,* kakororaoa raoi am mwakuri ni minita.+

6 Bwa I a tabe ni kabwaroaki n ai aron te karea ae te wain,+ ao e a kaan au tai ni kainaomataaki.+ 7 I a tia ni buaka n te buaka ae raoiroi,+ I a tia ni biri ni karokoa banen te kabobirimwaaka,+ ao I kakairi raoi n te onimaki ni Kristian. 8 E a tauraoi imwaiu mangkai te baunuea ibukin te raoiroi,+ are e na anganai bwa kaniwangau n te bong arei+ te Uea ae te tia motikitaeka ae raoiroi,+ ma tiaki tii ngai, ma te koraki nako naba ake a tangira kaotina.

9 Ko na kawaekoako n nakomai nakoiu n aki waeremwe, 10 bwa e a kaaki taekau Tema+ ibukina bwa e a tangira te waaki ae ngkai i aon te aba,* ao are e a nako Tetaronike, ao Kiretike e nako Karatia, ao Tito e nako Tarematia. 11 Ai bon tii Ruka raou. Airi ma Mareko, bwa e rangi n ibuobuoki nakoiu n te mwakuri ni minita. 12 I a tia ni kanakoa Tukiko+ nako Ebeto. 13 Ngkana ko nakomai ao uota te ninira ibukin te kamariri are I katikua i Teroa irouni Karebo, ao taian nira ni boki ma ai moarara riki ake taiani kunniman.

14 E karaoi baika bati aika bubuaka nakoiu Arekantero are te tia mwakuria te buraati. E na boni kabooi mwin ana mwakuri Iehova.*+ 15 Ko riai naba ngkoe n tarataraiko irouna, bwa e kakorakoraa ni kaitaraa ara rongorongo.

16 Ngke I moani kaekaa bukinau ao akea temanna ae tei n au itera, ma a bane ni kaaki taekau—​ke e tai tauaki bwa aia bure 17 Ma e tei i rarikiu te Uea ao e karina te mwaaka i nanou, bwa I aonga ni kakororaoa raoi tataekinan te rongorongo ae raoiroi ao a na bane n ongora iai natannaomata,+ ao I kamaiuaki mani win te raian.+ 18 E na kainaomataai te Uea mani mwakuri nako aika bubuaka, ao e na kamaiuai ibukin ana Tautaeka n Uea ae bwaini karawa.+ Ana bwai te neboaki n aki totoki. Amen.

19 Aanga au kamauri nakoni Beritika ma Akura,+ ao kaaini batan Onetiboro.+

20 E tiku Erateto+ i Korinto, ma I katuka Terobimo+ i Mireto bwa e aoraki. 21 Ko na kawaekoako n roko imwain tain te kamwaitoro.

E kamauriko Euburo ma Boute, ao Rino ma Kirauria, ao ai taari ni kabane.

22 E na raona nanom ae ko kaotiotia te Uea. E na mena iroumi ana akoi ae rianako.