TE KAUOUA N RETA NAKOIA I-TETARONIKE

1 Bauro ma Tirouano* ao Timoteo,+ nakon aia ekaretia I-Tetaronike ae katiteuanaaki ma te Atua ae Tamara ao te Uea ae Iesu Kristo:

2 Ke e mena iroumi te akoi ae rianako ma te rau mairoun te Atua ae te Tama, ao te Uea ae Iesu Kristo.

3 Ti bon riai ni katituaraoa te Atua n taai nako ibukimi taari. E bon riai ibukina bwa e rianako rikiraken ami onimaki, ao e rikirake naba ami tangira ni kabaneingkami ao i marenami n tatabemaningkami nako.+ 4 Ibukin anne, ti kamoamoaingkami+ nakoia taian ekaretia ake ana ekaretia te Atua, ibukin nanomwaakami ma ami onimaki ni bwainikirinami ni kabane ao n taiani kangaanga* ake kam karawawataaki iai.*+ 5 E kakoauaaki iai bwa e eti ana motikitaeka te Atua, ao ibukin anne kam na atongaki bwa kam tau ibukin ana Tautaeka n Uea te Atua, are kam maraki ibukina.+

6 Bwa e bon eti ae te Atua e na manga angania te koraki ake a karawawataingkami te rawawata.+ 7 Ma kam na anganaki ngkami aika kam karawawataaki te kabebeteaki ma ngaira, ngkana e a kaotaki te Uea ae Iesu+ mai karawa ma ana anera aika mwaaka+ 8 n te ai ae uramwaaka, ngkana e a karekei kaia te koraki ake a aki ataa te Atua, ma ake a aki ira nanon te rongorongo ae raoiroi ae taekan ara Uea ae Iesu.+ 9 A na rinanon te rekenikai ae motikaki te koraki aei, ae te kamaunaaki n aki toki+ mai matan te Uea ao mani mimitongini mwaakana, 10 n te tai are e na roko iai bwa e na kamimitongaki n ikotaki ma ana koraki aika itiaki,* ao bwa a na miroaroa irouna n te bong arei te koraki ake a onimaki ni kabane, ibukina bwa kam onimakina te kaotioti are ti anganingkami.

11 Anne bukina ae ti tataro iai n taai nako ibukimi, bwa e aonga n atongingkami te Atua bwa kam tau nakoni weteami irouna,+ ma ni kakororaoi baika raraoi ni kabane ake e kani karaoi ni mwaakana, ao ni kakororaoi ami mwakuri nako ake kam karaoi man ami onimaki. 12 E riki aei bwa e aonga ni karaoiroaki aran ara Uea ae Iesu n reitaki ma ngkami, ao ngkami naba n reitaki ma ngaia, ni kaineti ma ana akoi ae rianako Atuara ao te Uea ae Iesu Kristo.

2 Ma ni kaineti ngkanne taari ma okin ao tikun* ara Uea ae Iesu Kristo+ ao ikotakira bwa ti na mena ma ngaia,+ ti butiingkami 2 bwa e na aki waekoa ni mangaongao ami iango ao kam na aki naba kubanrou n te kaotioti ae taraa n reke rinanon te taamnei,*+ ke n te rongorongo ae taekinaki ke ae koreaki n te reta bwa kaanga mairoura, ae taekinaki iai bwa aongkoa e a roko ana bong Iehova.*+

3 E na tai katikingkami nako* temanna n te aro teuana, ibukina bwa e na aki roko te bong arei ngkana e tuai n roko moa te tannako man te koaua,+ ao ngkana e tuai naba ni kaotaki teuare kakaraoa ae buakaka,+ are natin te kamaunaaki.+ 4 Bon te tia kaaitara teuaei ae karietataa i bon irouna i aoia akana atongaki ni kabane bwa aongkoa atua, ke baika taromauriaki, n te aro are e tekateka n ana tembora te Atua, ma ni kaotiotia bwa kaanga te atua temanna ngaia i mataia aomata. 5 Kam aki uringnga ae ngke I mena i rarikimi ao I tutuangingkami baikai?

6 Ao kam a ataia ngkai bwa tera ae tutuka teuare kakaraoa ae buakaka, bwa e aonga ni kaotaki teuaei ngkana e a roko raoi ana tai. 7 E koaua bwa e raba moa ana mwakuri teuae kakaraoa ae buakaka ae e tabe ni waakinna ngkai.+ Ao e na raba ni karokoa ae e kamwawaaki teuare karaoa te tutuki iai. 8 Ao ngkanne, e nang kaotaki iai teuare kakaraoa ae buakaka, are e na katiaaki arona ma ni kamaunaaki iroun te Uea ae Iesu n te mwaaka are otinako mai wina,+ n te tai are e a kaotaki iai+ bwa e a oki ma n tiku.* 9 Ma menan teuare kakaraoa ae buakaka ikai boni man ana mwakuri Tatan,+ n te mwakuri ni kakai ni kabane, ao kanikina ni kewe ma baika kamimi+ 10 ao aeka ni mwakuri aika buakaka nako aika mwamwanaa te aba.+ A karaoaki baikai nakoia te koraki ake i aoni kawaia ni mauna, bwa tuuaaia ngkai a aki butimwaea ao n tangira te koaua, bwa a aonga ni kamaiuaki iai. 11 Anne bukina ae e kariaia iai te Atua bwa a na burebureaki n te bwai ae mwamwanaa te aba, bwa a aonga ni kakoauaa te kewe+ 12 bwa a aonga ni bane ni motikaki taekaia ibukina bwa a aki kakoauaa te koaua ma a kukurei n te buakaka.

13 Mangaia ae taari aika kam tangiraki iroun Iehova,* ti bon riai ni katituaraoa te Atua n taai nako ibukimi, ibukina bwa e rineingkami te Atua+ man te moantai ibukin te kamaiuaki ngke e katabuingkami*+ n taamneina, ao ibukin naba onimakinan te koaua iroumi. 14 E weteingkami nakon te kantaninga aei rinanon te rongorongo ae raoiroi are ti tataekinna, bwa kam aonga ni karekea mimitongin ara Uea ae Iesu Kristo.+ 15 Mangaia ae taari, kam na tei n nene+ ao kawakini baike kam reireinaki iai,+ rinanon ara taeka ke ara reta. 16 Irarikin anne, ke e kabebetei nanomi ara Uea ae Iesu Kristo ao te Atua ae Tamara, ake a tangirira+ ao n anganira te kabebeteaki n aki toki ma te kantaninga ae raoiroi+ rinanon te akoi ae rianako, 17 ao ke a kateimatoaingkami* ni mwakuri nako aika raraoi ma taeka aika raraoi.

3 Ni kabaneana taari, kam na teimatoa n tataro ibukira+ bwa e aonga ni waekoa ni butanako ana taeka Iehova*+ ao n neboaki, n aron naba ae riki i buakomi, 2 ao ti aonga naba ni kamanoaki mairouia aomata aika iowawa ao aika buakaka,+ bwa a aki bane n onimaki aomata.+ 3 Ma e kakaonimaki te Uea nakon ana taeka, ao e na kakorakoraingkami ma ni kamanoingkami mairoun teuare buakaka. 4 Ma ngaira aika taan rimwin te Uea, ti onimakiningkami bwa kam kakororaoi ara kaetieti ao kam na teimatoa ni kakororaoi. 5 Ke e teimatoa te Uea ni kanakoraoa kairan nanomi nakon tangiran te Atua+ ao nakon te nanomwaaka+ bwa kam aonga ni beku ibukin te Kristo.

6 Ao ti anganingkami taiani kaetieti taari n aran ara Uea ae Iesu Kristo, bwa kam na kararoaingkami mairouia taari ni kabane ake a nakonako n te aro ae aki riai+ ao tiaki n te aro ae boraoi ma kaetieti ake kam* karekei mairoura.+ 7 Bwa kam bon ataa te aro ae kam riai ni kakairi iai iroura,+ ibukina bwa ti aki maiuakina te aro ae aki riai i buakomi, 8 ke ni kana kanan temanna n aki kabooa.+ Ma ni kaitaraan anne, ti bekutata ma te korakai ni ngaina ao ni bong bwa ti aonga n aki karawawataa temanna i buakomi n te kabanemwane ae bati.+ 9 Tiaki nanona bwa akea riaira ni butimwaea te bwai teuana,+ ma ti karaoa aei bwa ti kan anga ngaira bwa banna ni katoto nakoimi bwa kam na kakairi iroura.+ 10 Ni koauana, ngke ti mena i rarikimi ao ti aki toki n tua nakoimi ae kangai: “Ngkana iai ae e aki kani mwakuri ao ke e tai amwarake.”+ 11 Bwa ti ongo bwa iai tabeman aika karaoa ae aki riai i buakomi,+ aika aki mwamwakuri, ma a reberake n roko ni baike a aki kaineti nakoia.+ 12 Ti tua nakoia aomata akanne ao ni kaungaia i nanon te Uea ae Iesu Kristo, bwa a na tabeakini baika kaineti nakoia ao n amwarake ni kanaia ake a karekei man aia mwakuri.+

13 Ao ngkami taari, tai kabwarai nanomi ni kakaraoan ae raoiroi. 14 Ma ngkana iai temanna ae aki ongeaba nakon ara taeka rinanon te reta aei, ao mamataukiroa te aomata anne, ao katoka te iraorao ma ngaia+ bwa e aonga ni maamaa. 15 Ao tai iangoia bwa te tia kairiribai, ma teimatoa n reireinna+ ngkai te tari ngaia.

16 Ke e teimatoa n anganingkami te rau n aanga nako, te Uea ae kakarekea te rau.+ Ke e raoningkami ni kabane te Uea.

17 Aio bon au kamauri, ngai ae Bauro ae I koreia n oini baiu.+ Bon tabonibaiu ae kanikinaean au reta nako.

18 Ke e mena iroumi ni kabane ana akoi ae rianako ara Uea ae Iesu Kristo.