TE MOAN RETA NAKOIA I-TETARONIKE

1 Bauro ma Tirouano*+ ao Timoteo,+ nakon aia ekaretia I-Tetaronike ae katiteuanaaki ma te Atua ae te Tama ao te Uea ae Iesu Kristo:

Ke e mena iroumi te akoi ae rianako ma te rau.

2 Ti aki toki ni kaitaua te Atua ngkana ti mwanewei taekami ni kabane n ara tataro,+ 3 bwa ti aki toki n uringa ami mwakuri ae nako man ami onimaki ao ami bekutata ae kairaki n te tangira, ao nanomwaakami, ae boto i aon ami kantaninga+ ibukin ara Uea ae Iesu Kristo, i matan Atuara ae Tamara. 4 Taari aika kam tangiraki iroun te Atua, ti ataia bwa kam rineaki irouna 5 ibukina bwa e aki roko iroumi n tii te taetae te rongorongo ae raoiroi ae ti tataekinna, ma e raonaki naba n te mwaaka ao n te taamnei ae raoiroi, ao e a ueke iai kakoauaana ae korakora. Ao kam bon atai aroarora ake ti aroni i buakomi ibukini kabwaiami. 6 Ao kam riki bwa taani kakairi iroura+ ma te Uea,+ bwa kam butimwaea te taeka ma te kimwareirei are reke rinanon te taamnei ae raoiroi, e ngae ngke kam kaaitara ma te rawawata ae bati,+ 7 ai ngaia ae kam a riki bwa te banna ni katoto nakoia taan onimaki ni kabane ake i Maketonia ao i Akaia.

8 Ni koauana, e aki tii tataekinaki ana taeka Iehova* iroumi i Maketonia ao i Akaia, ma e butanako naba taekan onimakinan te Atua iroumi n taabo nako,+ ai ngaia ae ai akea te bwai ae ti riai n taekinna. 9 Bwa a aki toki n taekin arora ngke ti moan roko i buakomi, ma aromi ngke kam rairaki man ami bouannanti nakon te Atua,+ bwa kam aonga n toro iroun te Atua ae koaua ae maiu, 10 ao n tataningaa Natina mai karawa+ are e kautia mai buakoia maate, ae Iesu, are e kamaiuira man te un ae i aoni kawaina n roko.+

2 Kam bon ataia taari bwa e aki matebuaka rokora iroumi.+ 2 Bwa e ngae ngke ti a tia ni kammarakaki ma ni bwainikirinaki i Biribi,+ n aron ae kam ataia, ao ti a kaninikoriaaki iroun Atuara bwa ti na tataekina nakoimi ana rongorongo ae raoiroi+ i buakon te kakaaitara ae bati. 3 Bwa e aki boto ara kaungaunga ae ti anga i aon iango aika kairua ke baika kamwara, ke te mwamwanaa te aba. 4 Ma kioina ngkai ti a tia n tuoaki iroun te Atua ma n noraki bwa ti tau ni mwiokoaki n te rongorongo ae raoiroi, ao ti a taetae n te aro ae ti na kakukureia te Atua are tuoi nanora, ao tiaki n ae ti na kakukureiia aomata.+

5 Kam bon ataia bwa ti aki roko n te taetae ni karang ke ni baka n raoiroi bwa e aonga n raba nanonrangira,+ ao e kakoaua n aei te Atua! 6 Ti aki naba ukera kamoamoaara irouia aomata, ke iroumi, ke irouia tabemwaang, e ngae ngke ti kona ni karawawataingkami n te kabanemwane ae bati ibukira ngkai ana abotoro Kristo ngaira.+ 7 Ma ti aki, bwa ti nabeingkami ma te nimamannei ni menara i buakomi n aron te tina ae kaamwarakeia natina ma ni mwannanoiia. 8 Ibukin tangirami ae korakora iroura, ti a motikia* bwa ti na anganingkami tiaki tii ana rongorongo ae raoiroi te Atua, ma boni ngaira naba,+ kioina ngkai kam rangi n tangiraki iroura.+

9 Kam boni bae taari n uringa ara bekutata ma te korakai. Ngke ti tataekina ngkoa ana rongorongo ae raoiroi te Atua nakoimi ao ti mwakuri naba ni ngaina ao ni bong bwa ti aonga n aki karawawataa temanna i buakomi n te kabanemwane ae bati.+ 10 Taani kakoaua ngkami ao te Atua naba, ibukin arora ni kakaonimaki ni koaua ma n raoiroi ao n akea kabuakakaara, ae ti kaotiotia nakoimi ngkami aika taan onimaki. 11 Kam ataia raoi bwa ti aki toki ni kaungaingkami n tatabemaningkami nako+ ao ni kabebeteingkami ma ni kaumakingkami, n aron te karo+ nakoia natina, 12 bwa kam aonga n teimatoa n nakonako n te aro ae tau ma nanon te Atua,+ are weteingkami nakon ana Tautaeka n Uea+ ma mimitongina.+

13 Anne bukina ae ti bon aki toki naba iai ni katituaraoa te Atua,+ ibukina bwa ngke kam butimwaea ana taeka are kam ongoraeakinna mairoura, ao kam butimwaeia bwa ana taeka te Atua, ao tiaki aia taeka aomata, bwa bon ana taeka raoi te Atua ae mwamwakuri i nanomi ngkami aika taan onimaki. 14 Bwa kam kakairi taari n aia katoto kaain ana ekaretia te Atua ake i Iutaia ake a katiteuanaaki ma Kristo Iesu, ibukina bwa kam karawawataaki irouia kaain abami+ ni baike a karawawataaki naba iai tarimi aikai irouia I-Iutaia, 15 ake a tiringa naba te Uea ae Iesu+ ma burabeti ao a bwainikirinira naba.+ Ao a karaoi mwakuri aika aki kakukureia te Atua ao a ekaanako te baere a kakabwaiaaki iai aomata nako, 16 n aroia ni kataia n tukira man tataekinan te rongorongo nakoia aomata aika tiaki I-Iutaia bwa a aonga n aki kamaiuaki aomata aikai.+ Ao ibukin anne a aki toki ni kabatiai aia bure, ao n tokina e a roko unin te Atua i aoia.+

17 Ma ngke ti karaureaki ma ngkami taari i nanon tabeua te tai, ao ti aki noringkami ma ti ururingingkami. Ibukin tangirami ae bati ao ti a kakorakoraira ni karekea te anga ae ti na manga noringkami iai.* 18 Ao ibukin anne ti kani kawaringkami, eng ngai ae Bauro, ao ti kataia n roko tiaki tii te taina ma uatai, ma e tutuka kawaira Tatan. 19 Bwa tera ara kantaninga ke kimwareireira ke te baunuea ae ti kakatonga iai i matan ara Uea ae Iesu ngkana e a oki ma n tiku?* Tiaki boni ngkami?+ 20 Bon ara bwai ni kamoamoa ngkami ao ara bwai ni kimwareirei.

3 Mangaia ae ngke ti a aki kona n taon riki nanora, ti taku bwa ai bon te kabanea n raoiroi ae ti nang tiku n tii ngaira i Atenai,+ 2 ao ti kanakoa tarira ae Timoteo+ nakoimi ae ana minita* te Atua ae e tataekina te rongorongo ae raoiroi ibukin te Kristo, bwa e na kateimatoaingkami* ao ni kabebeteingkami ni kaineti ma ami onimaki, 3 bwa e aonga n akea temanna ae e na kaingingaki n taiani bwainikirinaki aikai. Bwa kam bon ataia ae ti aki kona n totokoi rawawatara ni baikai.*+ 4 Bwa ngke ti mena iroumi ao ti a kaman tutuangingkami naba ae ti na boni bae n rinanon te karawawataaki, ao n aron ae kam ataia e bon riki anne.+ 5 Anne bukina ae ngke I a aki kona n taona riki nanou ao I a kanaanako bwa I aonga n ataa taekan ami kakaonimaki,+ bwa tao e a tia ni kariringkami+ n aanga tabeua te tia Kariri ke e tuai, ao e a kaawa ni matebuaka ara mwakuri korakora.

6 Ma e a tibwa oki ngkai Timoteo mairoumi,+ ao e a tia ni kaongoraeira te rongorongo ae raoiroi ae taekan ami kakaonimaki ao ami tangira, ao aromi ae kam teimatoa n uringira n taai nako, ao ingaingami naba ni kan norira n ai arora naba ni kan noringkami. 7 Anne bukina taari ae e ngae ngkai ti karawawataaki* ao ti bwainikirinaki, ma a kabebeteaki nanora ni kaineti ma aroaromi ao ibukin ami kakaonimaki.+ 8 Ibukina bwa a a manga maiu nanora ngkai kam teimatoa ni katiteuanaaki ma te Uea. 9 Bwa ti na kangaa ni kaota ara kakaitau nakon te Atua ibukimi, ibukin te kimwareirei ae bati ae ti a namakinna ngkai ibukimi i matan Atuara? 10 Ti kakorakoraira naba n tataro ni bubutii ni ngaina ao ni bong bwa ti kan noringkami,* bwa ti na kakororaoi baike a tuai ni kororaoi n ami onimaki.+

11 E bia kanakoraoa kawaira nakoimi Atuara ae Tamara ao ara Uea ae Iesu. 12 Ao e bia karikirakeingkami n te tangira te Uea, eng, e na kabatiai ami tangira i marenami+ ao nakoia aomata nako, n ai arora naba ngkai ti rangi n tangiringkami, 13 bwa e aonga ni kateimatoai nanomi bwa a na itiaki ao e na akea kabuakakaami i matan Atuara+ ae Tamara, ngkana e a oki ma n tiku* ara Uea ae Iesu+ ma ana koraki aika itiaki* ni kabane.

4 Ni kabaneana taari, ngkai kam a tia ni karekei kaetieti mairoura ibukin aromi n nakonako n te aro ae e na kakukureia te Atua,+ ti butiingkami ma n onnoningkami n aran te Uea ae Iesu, bwa kam na teimatoa n ririkirake iai. 2 Bwa kam atai taiani kaetieti* ake ti anganingkami mairoun te Uea ae Iesu.

3 Bwa bon ana kantaninga te Atua bwa kam riai n itiaki*+ ao n rawa nakon te wene ni bure.*+ 4 Kam riai n ataa aron tauan oin rabwatami+ n tatabemaningkami nako n aron ae boraoi ma katabuami+ ao n te aro ae rine, 5 ao tiaki n te nanonrang ni bwarua te wene ni bure+ n aroia natannaomata ake a aki ataa te Atua.+ 6 Akea temanna ae e na riaon ae riai ao n uruana aron tarina ni kaineti ma te baei, ibukina bwa bon te tia karekekai Iehova* ibukini baikai ni kabane, n aron are ti a kaman tuangingkami ao ni kakorakoraira naba n anga te kauring nakoimi. 7 Bwa e aki weteira te Atua nakon te kammaira, ma e weteira nakoni katabuara.+ 8 Mangaia ae te aomata ae rawa nakon aei, e aki rawa nakon te aomata ma e rawa nakon te Atua+ are anganingkami taamneina ae raoiroi.+

9 Ni kaineti ngkanne ma te itangitangiri n tari,+ kam aki kainnanoira bwa ti na koroboki nakoimi, bwa kam reireinaki iroun te Atua bwa kam na itangitangiri.+ 10 Kam boni karaoa anne nakoia taari ni kabane n taabo nako i Maketonia. Ma ti kaumakingkami taari bwa kam na teimatoa ni karaoia ao ni kabatiaa riki. 11 Katea naba tiami ae te maeka n rau+ ao te aki reberake n roko n tabeia aomata tabeman,+ ma kam na mwamwakuri ni baimi+ n aron are ti tua nakoimi, 12 bwa kam aonga n nakonako n te aro ae riai i mataia akana i ao,*+ ao n akea kainnanomi n te bwai teuana.

13 Ma ti aki tangiringkami taari bwa kam na ronnano ni kaineti ma te koraki aika matunako n te mate,+ bwa kam aonga n aki nanokawaki n aron ae riki irouia tabemwaang ae akea aia kantaninga.+ 14 Bwa ngkana ti kakoauaa ae e mate Iesu ao e a mangauti,+ ao ai arona naba bwa a na kautaki iroun te Atua te koraki ake a katiteuanaaki ma Iesu bwa a na raona Iesu.+ 15 Bwa ti tuangingkami aei n ai aron ana taeka Iehova,* bwa ngaira aika ti maiu ake ti na kauia okin ma tikun* te Uea, ti na bon aki kautaki nako karawa imwaia te koraki ake a a tia ni matunako n te mate, 16 ibukina bwa e na ruo mai karawa te Uea ao e na tua ni bwanaana ae bwanaani mataniwia anera+ ao e na taua ana buu te Atua, ao a na uti moa te koraki ake a mate ake a katiteuanaaki ma Kristo.+ 17 Imwina riki ao ngaira ake ti na kauia te tai anne, ti nang uotakinako ma ngaiia n naang+ bwa ti na kaitiboo ma te Uea+ n te ea, mangaia ae ti nangi memena iroun te Uea n taai nako.+ 18 Ngaia are teimatoa ni kabebeteingkami i marenami, n taeka aikai.

5 Taari, ni kaineti ngkanne ma taai ao boong ake a motikaki, kam aki kainnanoa korean taekana nakoimi. 2 Bwa kam bon ataia raoi bwa e na roko ana bong Iehova*+ n ai aron rokon te tia iraa n te tairiki.+ 3 Bwa n te tai are a kangai iai, “Iai te rau ao iai te mweraoi!” ao e na rina ni bwakariia te kamaunanakoaki,+ n aron rokon aririn te aine ae bikoukou, ao e na aki reke birinakoia. 4 Ma ngkami taari kam aki mena n te rotongitong, n te aro are kam na kauiaaki n te bong arei n aroia taan iraa, 5 bwa natin te oota ao te ngaina ngkami ni kabane.+ Tiaki ana bwai te rotongitong ke te tairiki ngaira.+

6 Mangaia ae ti na tai matunako n aroia tabemwaang,+ ma ti na taratara+ ao ni kawanawanaira.*+ 7 Bwa akana matu, a mamatu n te tairiki, ao akana koro ni manging, a kokoro ni manging n te tairiki.+ 8 Ma ngaira ake ana bwai te ngaina, ti na teimatoa ni kawanawanaira ao ni karina nangoani bwabwaara ae te onimaki ma te tangira, ao te bwara ni buaka ae te kantaninga ibukin te kamaiuaki,+ 9 ibukina bwa e aki rineira te Atua bwa ti na katuuaaeaki,* ma e rineira bwa ti aonga ni kamaiuaki+ rinanon ara Uea ae Iesu Kristo. 10 E mate ibukira+ bwa ti aonga ni maeka ma ngaia, e ngae ngke tao ti teimatoa n taratara ke ti matunako n te mate.+ 11 Mangaia ae teimatoa ni kaungaingkami* i marenami ao ni kateimatoaingkami,+ n aron ae kam boni kakaraoia.

12 Ao ti butiingkami taari bwa kam na karineia akana mwakuri korakora i buakomi, akana kairiri i aomi n ana mwakuri te Uea ma n reireiningkami ni kaetiingkami. 13 Kam na angania karineaia ae bati ma te tangira, ibukin aia mwakuri.+ Kam na raoi i marenami.+ 14 Ma n te itera are teuana ti kaumakingkami taari bwa kam na anga te kauring nakoia* te koraki aika karaoa ae aki riai,+ taetae ni kabebeteia akana rawawata nanoia,* boutokaiia akana mamaara, ao bwaina te taotaonakinnano nakoia aomata nako.+ 15 Tarataraingkami bwa e na akea temanna ae kabooa mwin te buakaka n te buakaka nakon temanna,+ ma ukoukora te bwai ae raoiroi n taai nako i marenami, ao nakoia aomata nako.+

16 Kam na kimwareirei n taai nako.+ 17 Kam na tataro n aki toki.+ 18 Katituaraoi ibukini bwaai ni kabane,+ bwa bon anne ana kantaninga te Atua ibukimi, ngkai taan rimwini Kristo Iesu ngkami. 19 Tai tutuka ana mwakuri* te taamnei i nanomi.+ 20 Tai kakeai bongan taian taetae ni burabeti.+ 21 Katai raoiroini bwaai ni kabane+ ao taua ae raoiroi. 22 Kam na rawa nakon te buakaka n aekana nako.+

23 Ke e boni kakororaoa katabuami* te Atua ae karekea te rau. Ke e kateimatoaaki te nano, te maiu,* ao te rabwata, ane iroumi taari, n te aro bwa kam na aki kona ni kabuakakaaki n te bwai teuana ngkana e a oki ma n tiku* ara Uea ae Iesu Kristo.+ 24 E na boni karaoa anne Teuare weteingkami, bwa e kakaonimaki nakon ana taeka.

25 Taari, kam na teimatoa n tataro ibukira.+

26 Kamauriia taari ni kabane n te kaboria* ae itiaki.

27 I kabaeingkami n aran te Uea, bwa e na warekaki te reta aei nakoia taari ni kabane.+

28 Ke e mena iroumi ana akoi ae rianako ara Uea ae Iesu Kristo.