NAKOIA I-KOROTE

1 Ngai ae Bauro ae ana abotoro Kristo Iesu n ana kantaninga te Atua, ma tarira ae Timoteo,+ 2 I koroboki nakoia te koraki aika itiaki* ao taari aika kakaonimaki aika taan rimwini Kristo i Korote:

Ke e mena iroumi te akoi ae rianako ma te rau mairoun te Atua ae Tamara.

3 Ti aki toki ni kaitaua te Atua ae Taman ara Uea ae Iesu Kristo ngkana ti tataro ibukimi, 4 kioina ngkai ti ongo taekan ami onimaki ni kaineti ma Kristo Iesu ma ami tangira ibukia te koraki aika itiaki* ni kabane, 5 ibukin te kantaninga are kamenaaki imwaimi i karawa.+ Kam ongo taekan te kantaninga aei ngkoa ngke e taekinaki te koaua nakoimi ae taekan te rongorongo ae raoiroi 6 are roko iroumi. E tabe ni karikiuaa ma n rarakarake n te aonnaba+ ni kabutaa te rongorongo ae raoiroi, n aron are e riki naba i buakomi, man te bong are kam ongo ao n ataa raoi iai te koaua ibukin ana akoi ae rianako te Atua. 7 Anne ae kam reiakinna mairoun Ebabera+ are raora n toro ae tangiraki, ae ana minita ae kakaonimaki te Kristo are e onei mwira. 8 E kaota naba nakoira ami tangira ae reke rinanon taamnein te Atua.

9 Anne bukina naba ae man te bong are ti ongo iai ao ti aki toki n tataro ibukimi+ ma ni bubutii bwa kam na kaonaki n te atatai ae eti+ ibukin ana kantaninga te Atua, n te wanawana ni kabanea ao n te ataibwai are e anga taamnein te Atua,+ 10 bwa kam aonga n nakonako n te aro ae tau i matan Iehova* ni karekea iai kakukureiana ni bwaai ni kabane, ngkai kam teimatoa ni karikiuaa ni mwakuri nako aika raraoi, ao n rikirake n te atatai ae eti n taekan te Atua.+ 11 Ao kam bia kakorakoraaki n te mwaaka ae kam kainnanoia ae reke mani mimitongini mwaakana,+ bwa kam aonga n nanomwaaka ni bwaai ni kabane ma te taotaonakinnano ao te kimwareirei, 12 ngkai kam kaitaua te Tama are katauingkami bwa kam na ibuokanibwai n tibwangaia te koraki aika itiaki*+ ake a mena n te oota.

13 E kamaiuira mani mwaakan te rotongitong+ ao e uotira nakon ana tautaeka n uea Natina are e tangiria, 14 are e reke mairouna kainaomataara n te kaboomwi, are kabwaraan ara bure.+ 15 Boni ngaia katotongan te Atua ae aki nonoraki,+ ae te moanibung i buakoni baika karikaki ni kabane,+ 16 ibukina bwa nikirani bwaai ake i karawa ao i aon te aba, a boni karikaki rinanon teuaei, aika baika nonoraki ao baika aki nonoraki,+ e ngae ngke taiani kaintokanuea ke taian nakoa n uea ke taian tautaeka ke taiani mwaaka ni kairiri. A bane ni karikaki baikai rinanon+ ao ibukin teuaei. 17 Ao bon iai ngaia imwaini baikai ni kabane,+ ao a bane n riki baikai rinanon teuaei, 18 ao boni ngaia atun te rabwata, ae te ekaretia.+ Boni ngaia moani bwaai nako, ae te moanibung mai buakoia maate,+ bwa e aonga n riki bwa te moanibwai ni bwaai nako, 19 ibukina bwa e kukurei te Atua bwa a na kororaoi bwaai ni kabane i nanon teuaei,+ 20 ao rinanon teuaei e a raoiakini bwaai ni kabane+ te Atua bon nakoina, ngke e karekea te raoi rinanon raraan+ teuaei are kawawaeaki i aon te kai ni kammaraki,* n aki ongeia bwa bwain te aonnaba ke bwaini karawa.

21 Ni koauana, kam a tia ngkoa n ianena ma te Atua ao kam kairiribai nakoina, ibukina bwa kam kaatuui ami iango i aoni mwakuri aika bubuaka. 22 E a tia ngkai te Atua ni karekea te raoi rinanon rabwatan teuaei ni matena, bwa e aonga ni kaotingkami bwa kam itiaki ao akea kabuakakaami ma bukinami i matana,+ 23 ngkana kam teimatoa i nanon te onimaki+ ma ni kateimatoaaki i aon aana+ ao ni kaneneaki,+ n aki kamwaingaki man te kantaninga ae reke man te rongorongo ae raoiroi ane kam ongora anne, ae tataekinaki n taabo nako aika i aani karawa.+ I a riki bwa te minita ngai ae Bauro bwa N na tataekina te rongorongo ae raoiroi aei.+

24 I a kimwareirei ngkai ni marakiu ibukimi,+ ao I taku bwa e tuai koro rawawatau i rabwatau ibukin te Kristo ni kaineti ma rabwatana,+ ae taekan te ekaretia.+ 25 I a riki bwa te minita ibukin te ekaretia aei n aron te mwioko+ mairoun te Atua, are I anganaki ibukimi bwa N na kakororaoa tataekinan ana taeka te Atua, 26 ae te bwai ae raba ae tabu+ are karabaaki ngkoa man taiani waaki ake i aon te aba*+ ao man rooro ake a a bwakanako. Ma e a kaotaki ngkai nakoia ana koraki aika itiaki.*+ 27 Ao e kukurei te Atua ni kaotia nakoia te koraki aika itiaki taekan te kaubwai ae mimitong ae reitaki ma te bwai ae raba ae tabu+ aei ae tabe ni kaotiotaki i buakoia natannaomata. Te baei boni katiteuanaakimi ma Kristo are nanona kantaningaan reken te mimitong+ ma ngaia. 28 Bon teuaei are ti tataekinna, ao ti kaungaia aomata nako ma n reireinia ma te wanawana ni kabanea, bwa ti aonga ni kaotiia nakon te Atua bwa aomata aika kororaoi aroia ni katiteuanaakia ma Kristo.+ 29 Ao ibukin aei I mwakuri korakora ni kakorakoraai rinanoni mwaakana ae mwamwakuri i nanou.+

2 Bwa I tangiringkami bwa kam na ataa arou ae I rangi ni kakorakoraai ibukimi ao ibukia naake i Raorikeia+ ao ibukia te koraki nako ake a tuai n norai.* 2 E riki aei bwa e na kabebeteaki nanoia+ ao a na boo nanoia n te tangira,+ ao e na reke irouia te kaubwai ae rianako are reke man aia atatai ae mataata ma ni koaua raoi, bwa e aonga n reke irouia te atatai ae eti ibukin te bwai ae raba ae tabu ae ana bwai te Atua, ae taekani Kristo.+ 3 Bwa a karauaki ni karabaaki i nanon teuaei baika kakawaki ni kabane aika nako man te wanawana ao te atatai.+ 4 I taekina aei nakoimi bwa e na aki burebureingkami temanna n taeka n anainano. 5 E ngae ngke akea rabwatau i buakomi, ma e mena nanou iroumi, ao I kimwareirei n noran aromi ae kam bwabwaina te babaire ae raoiroi+ ao a matoatoa ami onimaki i nanoni Kristo.+

6 Mangaia ae ngkai kam a tia ni butimwaea Kristo Iesu ae te Uea ao kam na teimatoa n nakonako ni katiteuanaaki ma ngaia, 7 ni kaneneaki wakaami ao ni kakorakoraaki i nanon teuaei+ ao ni kateimatoaaki n te onimaki,+ n aron are kam a tia n reireinaki iai, ao ke e taonako katituaraoan+ te Atua iroumi.

8 Kam na tarataraingkami bwa e na aki kataenikaingkami* temanna ni wanawanan aon te aba ao n te mwamwanaa te aba ae akea uaana,+ ae boto i aon aia katei nikawai aomata ao i aoni baike a boboto iai aia waaki kaain te aonnaba, ma tiaki ni kaineti ma Kristo, 9 ibukina bwa e mena i nanona kororaoin aroaron te Atua ae tabwanin raoi.+ 10 Mangaia ae a reke iroumi bwaai ni kabane rinanona, are teuare te atu i aoia taian tautaeka ma mwaaka+ ni kabane. 11 Ao kam korotobibiaki naba n reitakimi ma ngaia n te korotobibi ae aki karaoaki ni baia aomata, ma e karaoaki rinanoni kaakian te rabwata ae bubure,+ bwa boni ngaia anne aron te korotobibi ae bwainaki irouia ana toro Kristo.+ 12 Bwa kam taunaki ma ngaia n ana bwabetito,+ ao n reitakimi ma ngaia kam uaia naba iai ni kautaki+ ma ngaia rinanon onimakinan te baere kakororaoaki ni mwaakan te Atua, are ngaia are e kautia mai buakoia maate.+

13 E ngae ngke kam mate n ami bure ao n aki korotobibian rabwatami, ma e kamaiuingkami te Atua ao e katiteuanaingkami ma teuarei.+ E tituaraoi te Atua ni kabwarai ara bure ni kabane,+ 14 ao e kamauna te tua are koreaki+ are kanoana taiani moti,+ are e kaaitaraira.+ E uotianako mairoura ngke e bobitiia i aon te kai ni kammaraki.*+ 15 E tokanikai i aoia taian tautaeka ma mwaaka rinanon te kai ni kammaraki,* ma ni kaotaraea taenikaia+ i mataia aomata ngke e kairiia n te mwaati n tokanikai.

16 Mangaia ae ke e tai motika taekami temanna n te bwai ae kam kanna ao ae kam nimma,+ ke ni kaineti ma kawakinan te toa teuana ke te toa ibukin te oti n namwakaina+ ke te bongi n taabati+ teuana. 17 Boni bannani* baika nang roko baikanne,+ ma bon te bwai* ni koaua te Kristo.+ 18 E na tai rawea kaniwangami+ temanna ae kani bakaaea te nanorinano ke e kan taromauria anera,* ae e “kabotoa arona i aoni”* baike e nori. E boni kainikatonga n akea bukina ae riai ibukin iaiangoani bwaai n rabwata irouna, 19 ao e aki nim ma te atu.+ E rikirake te rabwata ni kabanea iroun teuare te atu, n te rikirake are e anga te Atua, kioina ngkai a bane ni katomaaki bwaina nako n taian toma ao taian ia, ao a bane ni karekeaki baike a kainnanoi.+

20 Ngkana kam a tia ni kaai ni mate ma Kristo ni kaineti ma baike a boboto iai aia waaki kaain te aonnaba,+ ao e aera bwa kam maiu n aroia kaain te aonnaba, n aantaeka n taiani moti+ ake a kangai: 21 “Tai taua ke ni katoongnga, ke n ringnga”? 22 Bwa baikai boni baika baireaki ni kabane bwa a na mauna ni kabonganaakia, ni kaineti ma aia tua aomata ao aia angareirei.+ 23 E ngae ngke a taraa ni boto i aon te wanawana mooti aikai kioina ngkai a taromauri n te aro ae boraoi ma oin nanoia ao a bakaaea te nanorinano ao a karawawataa rabwataia,+ ma bon akea bongaia ni kaineti ma buakanakin tangirani kaibwabwarun te rabwata.

3 Ngkana ngaia bwa kam kautaki ma te Kristo,+ ao teimatoa n ukoukori bwaini karawa, ike e tekateka iai te Kristo i angaatain te Atua.+ 2 Kaatuui ami iango i aoni bwaini karawa,+ ao tiaki i aoni bwain aon te aba.+ 3 Bwa kam mate ao e karabaaki maiumi i nanon te Kristo ni kaineti ma nanon te Atua. 4 Ngkana e a kaotaki te Kristo, are ngaia maiura,+ ao ane kam na kaotaki naba ma ngaia n te mimitong.+

5 Mangaia ae kam na kamate bwain rabwatami+ aika bwain aon te aba, ae kaineti ma te wene ni bure,* te kamwara, bwaruan te wewene ni bure,+ te kani karaoa ae iowawa, ao te nanonrang ae taromauriani bouannanti. 6 Bwa i aoni kawaina n roko unin te Atua ibukini baikanne. 7 Bwa anne naba ngkoa aroaromi* ni maiumi* mai mwaina.+ 8 Ma kam riai ngkai ni kaaki baikai ni kabane mairoumi, ae te un, te marakinnano, te buakaka,+ te taetae ni kamarakinano,+ ao te taetae ae kammaira+ mai wimi. 9 Tai kewekewe i marenami.+ Buuta te aroaro* nikawai+ ma ana mwakuri nako, 10 ao karina i aomi te aroaro ae boou,+ are e tabe ni kaboouaki rinanon te atatai ae eti, ni katotongan Teuare karaoia,+ 11 ike akea iai te I-Kuriiti ke te I-Iutaia, te korotobibi ke te aki korotobibi, te ianena, te I-Tekute,* te toro, ke te inaomata, ma Kristo boni bwaai nako ao e mena i nanoni bwaai nako.+

12 Mangaia ae ngkai bon ana aomata te Atua ngkami aika kam rineaki+ aika kam itiaki ma n tangiraki, ao kam na karina i aomi te atataiaomata ae nako man te nanoanga,+ te akoi, te nanorinano,+ te nimamannei,+ ao te taotaonakinnano.+ 13 Teimatoa n taotaon nanomi i marenami ao tauraoi n ikabwarabure+ ngkana iai bukini ngurenguremi i marenami,+ n aron Iehova* ngke e tauraoi ni kabwarai ami bure, ao kam riai naba ni karaoa anne.+ 14 Ma irarikini baikai ni kabane, kam na karina i aomi te tangira,+ bwa bon te bwai ni kabaebae ae katiteuanaia aomata n te aro ae kororaoi.+

15 Ke e taua naba taekan nanomi*+ ana rau te Kristo, bwa kam weteaki nakon te rau anne n te rabwata ae tii teuana, ao kam na kaotiota ami kakaitau. 16 Ke e kabatiaaki i nanomi ana taeka te Kristo ae karekea te wanawana ni kabanea. Teimatoa n angareirei ao n ikaungaunga i marenami n taian areru+ ma nebonebo nakon te Atua, ao anene aika bwain te onimaki aika aneneaki ma te kakaitau,* n anene ma nanomi ni kabane nakon Iehova.*+ 17 Ngkana kam taetae ke kam mwakuri, ao karaoi bwaai ni kabane n aran te Uea ae Iesu, ni kaitaua naba te Atua ae te Tama rinanona.+

18 Ngkami aika buuaine, kam na aantaeka nakoia buumi+ n aron ae riai i matan te Uea. 19 Ngkami aika buumwaane, teimatoa n tangiriia buumi+ ao e na aki korakora unimi* nakoia.+ 20 Ngkami aika ataei, kam na ongeaba irouia ami karo ni bwaai ni kabane,+ bwa e kakukurei aei iroun te Uea. 21 Ngkami aika taama, kam na tai kaunia* natimi+ bwa e kaawa n rawawata nanoia.* 22 Ngkami aika tooro, kam na ongeaba ni bwaai ni kabane nakoia ami toka+ aika aomata,* tiaki tii ngkana a tataraingkami bwa aongkoa kam na kakukureiia aomata,* ma mai nanomi ni koaua ae raonaki ni maakakin Iehova.* 23 Ane kam karaoia ao karaoia ma nanomi ao korakorami ni kabane, kaanga ibukin Iehova,*+ ao tiaki ibukia aomata, 24 bwa kam ataia ae kam na karekea te kaniwanga ae tibwangami+ mairoun Iehova.* Kam na toro iroun te Toka ae Kristo. 25 Ni koauana, ane e karaoa ae kairua ao e na manga okiraki n uaan ana kairua are e karaoia,+ bwa e aki inanonano+ te Atua.

4 Ngkami aika tooka, teimatoa ni karaoa ae raoiroi ao ae eti nakoia ami toro, ngkai kam ataia bwa iai naba ami Toka i karawa.+

2 Botumwaaka n tataro,+ ao teimatoa ni kamarurungingkami iai ma te katituaraoi.+ 3 Ao kam na tataro naba ibukira,+ bwa e aonga ni kauka te mataroa te Atua ibukin ara rongorongo bwa ti aonga n taekina te bwai ae raba ae tabu ae taekan te Kristo, are boni ngaia ae I kabaeaki ni karabuutinaki iai,+ 4 ao I aonga ni kaotiotia raoi n aron ae I bon riai n taekinna iai.

5 Kam na nakonako ma te wanawana i mataia akana i ao,* ni kabonganai raoi ami tai ni kabane.*+ 6 A na raonaki n taai nako ami taeka n te atataiaomata ao n taoronaki,+ bwa kam aonga n ataa aromi ni kaeka ae riai nakoia aomata n tatabemania nako.+

7 E na kaongoraeingkami taekau ni kabane tariu ae tangiraki ae Tukiko,+ ae te minita ae kakaonimaki ao raou n toro iroun te Uea. 8 I a kanakoa teuaei nakoimi bwa kam aonga n atai arora, ao e aonga ni kabebetei nanomi. 9 Raona ni mwananga Onetimo+ ae tariu ae tangiraki ae kakaonimaki are e mena i buakomi ngkoa. A na kaongoingkami rongorongon ikai ni kabane.

10 E kamauringkami Arititareko+ ae raou ni kabaeaki, ao Mareko+ naba are ai tarini Barenaba, (are kam tuangaki bwa kam na butimwaeia+ raoi ngkana e roko iroumi), 11 ao Iesu ae aranaki naba bwa Ioutito, ake te koraki ake a korotobibiaki. Tii naakai raou ni mwakuri ibukin ana Tautaeka n Uea te Atua, ao a riki bwa nibwani kabebetean nanou.* 12 E kamauringkami Ebabera+ ae ana toro Kristo Iesu are e mena i buakomi ngkoa. E aki toki ni kakorakoraa n tataro ibukimi, bwa n tokina ao ane kam na teimatoa ni kororaoi* ao ni kakoauaa raoi ana kantaninga te Atua ni kabane. 13 Bwa I kaotiota taekan teuaei bwa e rangi ni kakorakoraa ibukimi ao ibukia naake i Raorikeia ao ake i Ierabori.

14 E kamauringkami Ruka+ ae te taokita ae tangiraki, ao Tema+ naba. 15 Aanga au kamauri nakoia taari i Raorikeia ao Nei Numba ma te ekaretia are n ana auti.+ 16 Ao ngkana e tia ni warekaki te reta aei i buakomi, baireia bwa e na warekaki+ naba n aia ekaretia kaain Raorikeia ao kam na wareka naba te reta are mai Raorikeia. 17 Kam na tuanga naba Arekibo+ ni kangai: “Mutiakina am mwakuri ni minita are ko butimwaeia ngkai te tia rimwin te Uea ngkoe, bwa ko aonga ni kakororaoia.”

18 Aio ai bon au kamauri, ngai ae Bauro ae I koreia n oini baiu.+ Kam na ururinga kabaeakiu.+ Ke e mena iroumi ana akoi ae rianako te Atua.