NAKOIA I-EBETO

1 Ngai ae Bauro ae ana abotoro Kristo Iesu n ana kantaninga te Atua, nakoia te koraki aika itiaki* ao aika kakaonimaki i Ebeto,+ aika taan rimwini Kristo Iesu:

2 Ke e mena iroumi te akoi ae rianako ma te rau mairoun te Atua ae Tamara, ao te Uea ae Iesu Kristo.

3 E na karaoiroaki te Atua ae Atuan ao Taman ara Uea ae Iesu Kristo, bwa e kakabwaiaira n taiani kakabwaia nako i karawa rinanon te taamnei ae raoiroi, ibukina bwa taan rimwini Kristo ngaira,+ 4 n arona ngke e rineira ni katiteuanaira ma Kristo mai mwaini moan rikin te botannaomata, bwa ti aonga n itiaki n akea buakakara,+ ao ni kaotiota te tangira i matana. 5 Bwa e a kamani baireia bwa ti na+ natinaki irouna+ rinanon Iesu Kristo, n aron nanona are e kukurei iai,+ 6 bwa e aonga ni karaoiroaki ibukin ana akoi ae rianako+ are e tituaraoi n anganira rinanon teuare tangiraki irouna.+ 7 Bwa ibukin teuaei ao e a reke iroura te kainaomataaki n te kaboomwi rinanon raraana,+ eng, ae kabwaraan ara bure+ ni kaineti ma korakoran ana akoi ae rianako te Atua.

8 E tituaraoi n anganira ana akoi ae rianako ni kabatiaa n ikotaki ma te wanawana ao te ataibwai ni kabane, 9 n arona ni kaota nakoira te bwai ae raba ae tabu+ ae taekan ana kantaninga. E boraoi te bwai ae raba aei ma ae e tangiria ao ae e kantaningaia 10 ibukini katean te babaire* ibukin te tararua ngkana a koro raoi taai aika baireaki, are e na ikotii iai bwaai nako i nanon te Kristo, aika bwaini karawa ao bwain aon te aba,+ eng, a na manga ikotaki i nanona 11 ao ti rineaki naba i nanona bwa taani bwaibwai,+ bwa ti a kaman rineaki ni kaineti ma ana kantaninga teuare kakaraoi bwaai nako n aron are e motikia ni kaineti ma nanona, 12 bwa e aonga ni karaoiroaki mimitongin te Atua rinanora, ngaira ake ti moani kabotoi ara kantaninga i aon te Kristo. 13 Ma kam kabotoa naba ami kantaninga i aon teuaei imwin ongoraeakinan taekan te koaua iroumi, ae te rongorongo ae raoiroi ae taekani kamaiuami. Imwini kakoauaana iroumi, ao rinanon naba teuaei, kam a kanikinaeaki+ n te taamnei ae raoiroi are beritanaki, 14 ae te bwai ni kakoaua ibukin reken tibwangara,*+ ibukini kainaomataaia ana aomata te Atua+ n te kaboomwi,+ bwa e aonga ni karaoiroaki mimitongina.

15 Anne naba bukina ae ngke I ongo taekan ami onimaki ibukin te Uea ae Iesu, ao te tangira are kam kaotiotia nakoia te koraki aika itiaki* ni kabane, 16 ao I aki toki ni katituaraoi ibukimi. I teimatoa ni mwaneweingkami n au tataro, 17 bwa e na anganingkami te Tama ae mimitong ae Atuan ara Uea ae Iesu Kristo, te wanawana n atai baike a kaotiotaki irouna ni kaineti ma te atatai ae eti ibukina.+ 18 E kauka nanomi bwa kam na noraaba bwa kam aonga n ataa te kantaninga are e weteingkami nako iai, ao mimitongin te kaubwai are e katauraoia bwa tibwangaia te koraki aika itiaki,*+ 19 ao mwaakana ae akea n ai arona nakoira ngaira aika taan onimaki.+ E noraki arona anne ni mwamwakurin te mwaaka ae korakora aei, 20 are e kabongana ni kaineti ma te Kristo ngke e kautia mai buakoia maate ao e katekatekaa i angaataina+ i karawa, 21 i aoia tautaeka ni kabane ma taiani mwaaka ma mwioko ao ueea ma aara nako,+ tiaki tii n te waaki ae ngkai i aon te aba* ma n are e na roko naba. 22 E kaaki naba bwaai ni kabane i aani waeni Kristo,+ ao e karaoia bwa te atu i aoni bwaai ni kabane aika irekereke ma te ekaretia+ 23 are rabwatana,+ are e onrake n aroarona, ae boni ngaia ae rotii bwaai ni kabane.

2 Irarikin anne, e anganingkami te maiu te Atua e ngae ngke kam mate ibukin ami kairua ao ami bure,+ 2 ake kam nakonako ngkoa iai n irira te waaki ae ngkai* i aon te aba,+ n ai aron ana iango te tia tautaeka ae mwaaka i aon te nano ae taabangaki n aron te ang,+ ae te nano*+ ae mwamwakuri ngkai i nanoia natin te aki ongeaba. 3 Eng, bon arora naba anne ngkoa i buakoia ngke ti bane n irira kaibwabwarun rabwatara,+ ni karaoi baike e tangiri te rabwata ma te iango,+ bwa bon rikiara bwa natin te rekenikai ngaira+ n ai aroia aomata tabemwaang. 4 Ma te Atua are moan te nanoanga,+ ibukin ana tangira ae korakora are e tangirira iai,+ 5 e anganira te maiu ao e katiteuanaira ma te Kristo, e ngae ngke ti mate n ara bure+—n te akoi ae rianako are kam kamaiuaki iai. 6 Ao e kautiira ao e katekatekaira ma Kristo Iesu i karawa kioina ngkai taan rimwina ngaira.+ 7 Bwa n rokon taiani waaki i aon te aba,* ao te Atua e nang kaota korakoran ana akoi ae rianako rinanon ana atataiaomata* nakoira ngkai taan rimwini Kristo Iesu ngaira.

8 Ni koauana, kam kamaiuaki n te akoi ae rianako aei rinanon te onimaki,+ ma e aki reke aei mani baike kam karaoi, ma bon ana bwaintangira te Atua. 9 Eng, e aki reke man taiani mwakuri,+ bwa e kaawa n reke ana anga te aomata ni kamoamoa iai. 10 Bwa bon ana mwakuri* ngaira, ao ibukina bwa taan rimwini Kristo Iesu+ ngaira, ti karikaki ibukini mwakuri aika raraoi,+ ake e a kamani baireia te Atua ibukira bwa ti na nakonako iai.

11 Mangaia ae uringnga bwa kam bungiaki ngkoa bwa aomata aika tiaki I-Iutaia. Ao kam taekinaki irouia ake a “korotobibiaki” ni baia aomata bwa kam “aki korotobibiaki.” 12 N te tai arei, kam aki ataa Kristo ao kam ianena ma te botannaomata ae Iteraera, ao kioina ngkai kam ianena, akea tibwangami n taiani berita n te motintaeka,+ ao kam maeka n te aonnaba n akea ami kantaninga ao n akea ataakin te Atua iroumi.+ 13 Taan rimwini Kristo Iesu ngkami ake kam raroanako ngkoa ma te Atua, ma kam a kaan ngkai rinanon raraan te Kristo. 14 Bwa e karekea te rau nakoira Kristo,+ are teuare katiteuanaia koraki aika uoua+ ao e urua te oo* are i marenaia are e kaokoroia ngkoa.+ 15 Ngke e kareana rabwatana ao e kamauna iai te Tua ae karika te kairiribai, ae kanoana taiani kaetieti ma mooti, bwa e aonga ni karaoiia koraki aika uoua bwa te aomata ae tii temanna ae boou ae katiteuanaaki ma ngaia+ ao e karekea te raoi, 16 ao e kakororaoa raoiakinaia koraki aika uoua aikai ma te Atua, ni botiia n te rabwata ae tii teuana rinanon te kai ni kammaraki,*+ ibukina bwa rinanoni matena ao e kamatea te baere karika te kairiribai.+ 17 Ao e roko n tataekina te rongorongo ae raoiroi ae taekan te raoi nakoimi ngkami ake kam raroanako ngkoa, ao nakoia ake a kaan, 18 ibukina bwa akea tukara ni kaania te Tama rinanon teuaei, ngaira aika koraki aika uoua, n te taamnei ae tii teuana.

19 Mangaia ae ai tiaki ianena ngkami ke iabatera,+ ma ai bon raoia n ababa+ te koraki aika itiaki* ngkami, ao kaaini batan te Atua.+ 20 Ao kam kateaki i aon aan te kateitei ae taekaia abotoro ma burabeti,+ ao Kristo Iesu bon atibun te maninganinga are e aana te kateitei.+ 21 E tabe n rikirake bwa te tembora ae tabu ibukin Iehova*+ te kateitei ae bwanin ae a katomaaki raoi bwaina nako,+ ni katiteuanaaki ma Kristo. 22 Ni katiteuanaakimi ma ngaia, kam a tabe ni kateaki naba bwa te tabo ae e na maekanaki iroun te Atua rinanon taamneina.+

3 Ibukin aei, ao ngai ae Bauro ae I karabuutinaki+ ibukini Kristo Iesu ao ibukimi, ngkami aika aomata aika tiaki I-Iutaia— 2 ngkana ngaia bwa kam a bon tia n ongo taekan te mwioko ae I anganaki+ ni kaineti ma ana akoi ae rianako te Atua ibukini kabwaiami, 3 bwa e kaotaki nakoiu te bwai ae raba ae tabu n te kaotioti, n aron are I korea taekana teutana mai mwaina. 4 Mangaia ae ngkana kam wareka aei, kam kona iai n ataa aron au atatai n te bwai ae raba ae tabu+ ae taekan te Kristo. 5 E aki kaotaki te bwai ae raba aei nakoia natiia aomata n rooro ake ngkoa, n aron ae e a tia ni kaotaki ngkai nakoia ana abotoro aika itiaki ma burabeti rinanon te taamnei,+ 6 ae taekan ae a na riki aomata aika tiaki I-Iutaia bwa taan uaia n ababa, ma ni kaaina te rabwata ae tii teuana,+ ao n ibuokanibwai ma ngaira n te berita, ngkai a a riki bwa taan rimwini Kristo Iesu rinanon te rongorongo ae raoiroi. 7 I riki bwa te minita ibukin aei, ni kaineti ma te bwaintituaraoi ae akea boona ae ana akoi ae rianako te Atua are I anganaki ngke e anganai mwaakana.+

8 I anganaki te akoi ae rianako aei,+ ngai ae I mangori riki nakon te aomata ae te kabanea ni mangori i buakoia te koraki aika itiaki*+ ni kabane, bwa I aonga n tataekina te rongorongo ae raoiroi nakoia natannaomata aika tiaki I-Iutaia ae taekani kaubwain te Kristo ae rianako, 9 ao ni kaota nakoia aomata nako mwakurian te bwai ae raba ae tabu+ are e a kamani karabaaki mangkoangkoa iroun te Atua,* are e karikii bwaai ni kabane. 10 E riki aei bwa e aonga ni kaotaki wanawanan te Atua+ ae kakaokoro nako arona rinanon te ekaretia,+ nakoia tautaeka ao mwaaka n tautaeka ake i karawa. 11 E kaineti aei ma te kantaninga ae akea tokina are e baireia ae irekereke ma Kristo+ Iesu ae ara Uea, 12 bwa rinanona ao ti a kona iai n taetae n aki maaku ao n akea tukara,+ ngkai ti onimakina Kristo. 13 Mangaia ae I butiingkami bwa e na aki bwara nanomi ni karawawataau aei ibukimi, bwa boni kamoamoaami rawawatau.+

14 Ibukin aei ao I katorobubua nakon te Tama, 15 are a bane n riki* irouna utu ake i karawa ao aika i aon te aba. 16 I tataro bwa e na kakorakorai riki nanomi+ n te mwaaka ae reke rinanon taamneina, ni kaineti ma mimitongina ae rianako, 17 ao e na mena i nanomi te Kristo rinanon ami onimaki ao ami tangira.+ Ao I bubutii naba bwa kam na kateimatoaaki+ ma ni kaneneaki wakaami i aon aan te kateitei,+ 18 bwa kam aonga ni mataata raoi ma te koraki aika itiaki* ni kabane, n raababan ao n abwakin ao n rietan ao n nanon te koaua, 19 ao n ataa ana tangira te Kristo+ ae moanibaa riki nakon te atatai, bwa kam aonga ni bane ni kaonaki n aroaro nako ake e anga te Atua.

20 E kona ni karaoa ae rangi ni bati riki te Atua nakon are ti bubutii ke are ti iangoia,+ ibukini mwaakana ae mwamwakuri i nanora.+ 21 Mangaia ae e na neboaki rinanon te ekaretia ao rinanon naba Kristo Iesu n rooro nako n aki totoki. Amen.

4 Mangaia ae I butiingkami ngai ae I karabuutinaki+ ibukin te Uea, bwa kam na nakonako n te aro ae tau+ ma weteami are kam weteaki iai, 2 n te nanorinano n taai nako+ ao n te nimamannei, ao n te taotaonakinnano,+ n taotaon nanomi i marenami n te tangira,+ 3 ni kaingaingai nanomi ni maiuakina te aro ni katiteuanaaki rinanon te taamnei n te bwai ni kabaebae are te raoi.+ 4 Tii teuana te rabwata+ ao tii teuana te taamnei,+ n aron naba ae tii teuana te kantaninga+ ae kam weteaki nako iai. 5 Tii temanna te Uea,+ tii teuana te onimaki, tii teuana te bwabetito, 6 tii temanna te Atua ae te Tama ae Tamaia aomata ni kabane, ae mwaaka i aoia ni kabane ao e mwamwakuri rinanoia ao i nanoia ni kabane.

7 Ao ti anganaki n tatabemanira nako te akoi ae rianako ni kaineti ma aron te Kristo ni bairea nakoira te bwaintituaraoi ae akea boona.+ 8 Bwa e kangai: “Ngke e rierake nakon te tabo ae rietata ao e kairiianako taenikai. E anga mwaane ake a a riki bwa bwaai n tituaraoi.”+ 9 Ao tera ae nanonaki n te taeka ae “e rierake”? Tiaki bwa e ruo naba nako naano, ae taekan te aonnaba? 10 Bwa teuare ruo boni ngaia naba are e rierake+ nakoni nnena ae rangi n rietata riki nakon taiani karawa,+ bwa e aonga ni kakoroi bukini bwaai ni kabane.

11 Ao e anga temwangina bwa abotoro,+ ao temwangina bwa burabeti,+ ao temwangina bwa taani kabuta te euangkerio,*+ ao temwangina bwa taani kawakintiibu ao taan angareirei,+ 12 ibukini kaetani kawaia* te koraki aika itiaki,* bwa a na beku ibukia tabemwaang, ao ibukini kateimatoaan rabwatan te Kristo,+ 13 ni karokoa ae ti bane ni karekea te katiteuanaaki* n te onimaki ao n te atatai ae eti ibukin Natin te Atua, n riki bwa ai aron te aomata ae ikawai raoi+ ao n rota kororaoin ikawain te Kristo. 14 Mangaia ae ti aki riai n tiku n aroia ataei, n uouotaki kaanga n naao ao ni katiotioaki n reirei aika ai aron taian ang+ aika riki man aia nanowanawana aomata ae bureburea te aba, ao keewe aika oteaki ibukini kairaia aomata nakon te kairua. 15 Ma ngkai ti tataekina te koaua, ti na rikirake n ikawai ni bwaai ni kabane i nanon teuare te atu are Kristo, ni bwainan te tangira.+ 16 Bwa rinanon teuaei,+ e katiteuanaaki te rabwata ae bwanin ao a bane n ibuobuoki tomatomana nako ni karaoa ae kainnanoaki. Ngkana a bane bwain te rabwata n tatabeua nako ni mwamwakuri raoi, e buokaki te rabwata iai bwa e na rikirake i nanon te tangira.+

17 Mangaia ae I taekina aei ao ni kaotia nakoimi i matan te Uea, bwa kam na aki manga nakonako n aroia kaain te aonnaba ngkai a nakonako+ n aia iango aika akea uaaia.*+ 18 A rotongitong nanoia ao a ianena ma te maiu are mairoun te Atua ibukina bwa a ronnano ao a matoatoa nanoia. 19 Ibukin aki bwerengakia n te aroaro ni maiu ae riai, a arona te aroaro ae kammaira*+ ni kakaraoi mwakuri aika kamwara n aekaia nako ma te nanonrang.

20 Ma tiaki anne aron te Kristo are kam reireinaki 21 ngkana te koaua bwa kam a tia n ongora ma n reireinaki baika boraoi ma te koaua are e reirei iai Iesu. 22 Kam reireinaki bwa kam riai ni kaaki te aroaro* nikawai+ ae tabe ni kabuakakaaki riki ni kaibwabwaruna* ae mwamwanaa te aba, ae boraoi ma aroni maiumi ngkoa.+ 23 Ao kam riai n teimatoa ni kabooui nanomi* ae ngaia ae kaira ami iango,+ 24 ao kam riai ni karina te aroaro* ae boou+ ae karaoaki ni kaineti ma nanon te Atua ao e boraoi ma te itiaki ni koaua ao te kakaonimaki ni koaua.

25 Mangaia ae ngkai kam a tia ni kaaki te mwamwanaa te aba, ao ke e atoatonga te koaua temanna ma temanna nakon raona+ ibukina bwa boni kaain te rabwata ae tii teuana ngaira.+ 26 Ngkana kam un ao tai bure iai.+ Tai kariaia unimi bwa e na ooaki ni bungin taai,+ 27 ao tai kakatokaa boran te Riaboro.*+ 28 Ke e tai manga iraa te tia iraa, ma ke e mwakuri korakora ni karaoa te mwakuri ae raoiroi ni baina,+ bwa e aonga n reke naba ana bwai ae e na angan ane e kainnano.+ 29 E na tai otinako te taeka ae buakaka mai wimi,+ ma tii te taeka ae raoiroi ae e na kateimatoa te aba n aron ae e kainnanoaki, bwa a aonga ni buokaki iai akana ongora.+ 30 Ao tai karawawataa naba te taamnei ae raoiroi mairoun te Atua,+ are kam kanikinaeaki+ iai ibukin te bong are kam na kainaomataaki iai n te kaboomwi.+

31 Kam na kaaki te riribai ae korakora n aekana nako, te marakinnano,+ te un, te takakaa, ao te tinaraa,+ n ikotaki ma baika bubuaka ni kabane.+ 32 Ma kam na iakoakoi i marenami, n atataiaomata+ ao n tauraoi n ikabwarabure i marenami n aron naba te Atua ngke e tauraoi ni kabwarai ami bure rinanoni Kristo.+

5 Mangaia ae riiki bwa taani katotonga aron te Atua,+ ngkai naati aika tangiraki ngkami, 2 ao kam na teimatoa n nakonako n te tangira,+ n aron te Kristo ngkai e tangirira* naba+ ao e anga boni ngaia ibukira* bwa te karea ae boiarara nakon te Atua.+

3 N aron ae riai ibukia aomata aika itiaki,*+ e na aki taekinaki i buakomi te wene ni bure* ma te kamwara n aekana nako, ke te nanonrang,+ 4 ke aroaro aika kanuka ke te taetae n nanobaba ke te manikangare buaka,+ aika baika aki riai, ma e raoiroi riki te katituaraoi.+ 5 Bwa kam ataa aei, eng kam bon ataia raoi, bwa akea te tia wene ni bure,*+ ke te aomata ae kamwara, ke te aomata ae nanonrang,+ ae nanona bwa te tia taromaurii boua, ae e na bwaibwai n ana Tautaeka n Uea te Kristo ao te Atua.+

6 E na tai mwamwanaingkami te aomata n taeka aika akea uaaia, bwa e nang roko unin te Atua i aoia natin te aki ongeaba ibukini baikanne. 7 Mangaia ae tai ibuokanibwai ma ngaiia, 8 bwa kam rotongitong ngkoa, ma kam a oota ngkai+ ibukina bwa ana bwai te Uea ngkami.+ Teimatoa n nakonako bwa natin te oota, 9 bwa uaan te oota bon te raoiroi n aekana nako ao bwainakin te eti ma te koaua.+ 10 Teimatoa n tuoa bwa tera ae e kukurei+ iai te Uea, 11 ao tai manga ibuokanibwai ni mwakuri aika akea uaaia aika bwain te rotongitong,+ ma n oneani mwin anne, kam na kaotii buakakani baikanne, 12 bwa e kanuka naba taekinan aia mwakuri ake a karaba ni karaoi. 13 Ao a kaotaraeaki bwaai ni kabane n te oota, mangaia are a a bane n oota bwaai nako ake a kaotaraeaki. 14 Mangaia ae e taekinaki ni kangai: “Uti ngkoe ae ko matu, ao teirake mai buakoia maate,*+ ao e na kaotako te Kristo n te oota.”+

15 Mangaia ae taratarai raoi aromi n nakonako, bwa kam na aki nakonako bwa aomata aika nanobaba ma kam na nakonako bwa aomata aika wanawana, 16 ni kabonganai raoi ami tai ni kabane,*+ ibukina bwa a bubuaka boong aikai. 17 Mangaia ae kam na aki nanobaba ma kam na teimatoa n ataa nanon Iehova.*+ 18 Ao tai koro ni manging n te wain,+ ike e mena iai te kaibwabwaru, ma kam na teimatoa ni kaonaki n te taamnei. 19 Kam na taetae i marenami n taian areru, ma nebonebo nakon te Atua, ma kuuna+ aika bwain te onimaki, n anene+ ao ni karaoiroa Iehova* ma nanomi ni kabane,+ 20 n aran ara Uea ae Iesu Kristo, ni katituaraoa n taai nako+ Atuara ae Tamara ibukini bwaai ni kabane.+

21 Aantaeka i marenami+ ibukini maakakini Kristo. 22 Ke a aantaeka buuaine nakoia buuia,+ n aroia n aantaeka nakon te Uea, 23 ibukina bwa te buu te mwaane bon atuni buuna,+ n aron naba te Kristo ngkai atun te ekaretia,+ are rabwatana, are te tia kamaiu iai. 24 Ni koauana, n aron te ekaretia ngkai e aantaeka nakon te Kristo, ao ke a aantaeka naba buuaine nakoia buuia, ni bwaai ni kabane. 25 Buumwaane, teimatoa n tangiriia buumi,+ n aron naba te Kristo ngkai e tangira te ekaretia ao e anga boni ngaia ibukina,+ 26 bwa e aonga ni katabua* ni kaitiakia n te ran rinanon te taeka,+ 27 n te aro bwa e na anga bon nakoina te ekaretia ae tamaroa, ae akea baarekana ke bwarukurukuna, ke baika ai aroni baikai,+ ma e itiaki ao akea waewaeana.+

28 N aron naba aei, a riai buumwaane n tangiriia buuia n aron tangiran oin rabwataia. Te mwaane ae tangira buuna ao e tangiria naba i bon irouna, 29 bwa akea te mwaane ae ribaa oin rabwatana,* ma e wantongaia ma n nabeia, n aron naba ae e karaoia te Kristo nakon te ekaretia, 30 ibukina bwa boni bwain rabwatana ngaira.+ 31 “Ibukin aei ao e na kitana tamana ma tinana te mwaane ao e na nim* ma buuna, ao a na riki n tii te irikona naaka uoman.”+ 32 Moan te kakawaki te bwai ae raba ae tabu aei.+ I taetae ni kaineti ma Kristo ao te ekaretia.+ 33 Mangaia ae ngkami aika buumwaane, e riai n tangira buuna temanna ma temanna+ n arona n tangiria i bon irouna, ao ai arona naba bwa e riai te buu te aine ni korakora karineani buuna irouna.+

6 Ataei, kam na ongeaba irouia ami karo+ n te aro ae boraoi ma nanon te Uea, bwa e raoiroi aei. 2 “Karinea tamam ma tinam”+ bon aei te moan tua ae raonaki n te berita ae kangai: 3 “Bwa a aonga n nakoraoi bwaai ni kabane ibukim,* ao ko aonga n tiku ni maan i aon te aba.” 4 Ao ngkami aika taama, kam na tai kaunia natimi,+ ma kam na kaikawaiia i nanon ana reirei ni kaetieti+ ao ana kaungaunga* Iehova.*+

5 Tooro, kam na ongeaba irouia ami toka aika aomata,*+ ma te karinerine ao te maaku ma nanomi ni koaua, n aromi n ongeaba iroun te Kristo, 6 tiaki tii ngkana kam taraaki bwa aongkoa kam na kakukureiia aomata,*+ ma n aroia ana toro Kristo aika kakaraoa nanon te Atua ma nanoia ao korakoraia ni kabane.+ 7 Riiki bwa tooro aika nanoraoi, n aron ae kaanga kam toro iroun Iehova*+ ao tiaki aomata, 8 bwa kam bon ataia bwa e na karekea kaniwangana temanna ma temanna mairoun Iehova,* n ana mwakuri ae raoiroi ae e karaoia,+ e ngae ngkana te toro ngaia ke te inaomata. 9 Ao ngkami naba aika tooka, teimatoa ni kaotiota te nano ae tii te arona nakoia ami toro, ao tai kakamaakuia, bwa kam ataia bwa e mena i karawa ami Toka are aia Toka naba,+ ao akea te inanonano irouna.

10 Ni kabaneana, I kaumakingkami bwa kam na teimatoa ni karekea korakorami+ iroun te Uea ao ni korakorani mwaakana. 11 Kam na karini ami bwai ni buaka nako+ ake mairoun te Atua, bwa kam aonga ni kona n tei n nene ni kaaitarai ana bwai n nanowanawana* te Riaboro, 12 ibukina bwa ti aki kabokorakora*+ ma te iriko ao te raraa ma ti kabokorakora ma taian tautaeka, mwaaka n tautaeka, taan tautaekana te aonnaba ae rotongitong aei, ao taanga n taamnei+ aika buakaka i karawa. 13 Ibukin aei, karini bwaai ni buaka nako ake mairoun te Atua,+ bwa kam aonga ni kona n nanomwaaka n te bong ae buakaka ngkana e a roko, ao ngkana kam a tia raoi ni karaoi bwaai ni kabane aika riai bwa kam na karaoi, ao kam na tei n nene.

14 Mangaia ae kam na tei n nene, ma kabaean nukami ae te koaua,+ ao karina nangoani bwabwaami ae bwainan te raoiroi,+ 15 ao nangoani waemi ae te tauraoi n tataekina te rongorongo ae raoiroi ae taekan te rau.+ 16 Irarikini baikai ni kabane, taua te otanga ae bubura ae te onimaki+ bwa kam aonga ni kona iai n tiringi kanoan nako ana kainikatebe* aika uramwaaka teuare buakaka.+ 17 Butimwaea naba te bwara ni buaka ae te kamaiuaki,+ ao ana kabaang te taamnei ae ana taeka te Atua,+ 18 ao kam na teimatoa naba n tataro+ ni kairakimi n te taamnei n aeka n tataro nako ma te kakorakora n tataro ni bubutii.+ Ao ibukin aei kam na botumwaaka ni kamarurungingkami ao ni kakorakoraingkami n tataro ibukia te koraki aika itiaki* ni kabane. 19 Tataro naba ibukiu, bwa N na anganaki au taeka ngkana I kaurea wiu, bwa I aonga ni kona n taetae ma te ninikoria, ni kaota te bwai ae raba ae tabu ae taekan te rongorongo ae raoiroi,+ 20 are te tia tei ngai ibukina,+ ae I kabaeaki n taian taurekereke. Tataro ibukiu bwa I aonga n taekinna ma te ninikoria n aron are I riai n taekinna iai.

21 E na kaongoraeingkami bwaai ni kabane Tukiko,+ ae te tari ae tangiraki ao te minita ae kakaonimaki iroun te Uea, bwa kam aonga n ataa arou ao baika I tabe ni kakaraoi.+ 22 I kamwanangaa teuaei nakoimi ibukin aei, bwa kam aonga n atai arora ao e na kabebetei iai nanomi.

23 Ke e mena irouia taari, te rau ma te tangira ae raonaki n te onimaki mairoun te Atua ae te Tama, ao mairoun te Uea ae Iesu Kristo. 24 Ke e mena te akoi ae rianako irouia te koraki nako ake a tangira ara Uea ae Iesu Kristo n te tangira ae aki kona ni mauna.