MARAKI

1 Te katanoata:

E kangai ana taeka Iehova nakon Iteraera rinanoni Maraki:*

2 “I a tia ni kaota te tangira nakoimi,”+ bon ana taeka Iehova.

Ma kam kangai: “Ko kaota te tangira nakoira n te aro raa?”

“Tiaki Etau tarin Iakoba?”+ bon ana taeka Iehova. “Ma I tangira Iakoba, 3 ao I ribaa Etau.+ Ao I kamaroaei ana maunga+ ao I katuka tibwangana bwa nneia ni maeka tiakaore* ake n te rereua.”+

4 “E ngae ngke a kangai tibun Etom, ‘Ti a tia ni kabwakaaki, ma ti na bon oki ao ni manga katei baika uruaki,’ ma e kangai ana taeka Iehova ae Atuaia taanga ni buaka,* ‘A na kateitei ma N na kabwakai, ao e na aranaki te tabo anne bwa “ana aono te buakaka” ao ngaiia a na aranaki bwa “aomata aika e kabuakakaia Iehova n aki toki.”+ 5 A na noria matami, ao kam na kangai: “E bia kamoamoaaki Iehova n aonon Iteraera.”’”

6 “‘Te nati te mwaane e karinea tamana,+ ao te toro e karinea ana toka. Ngaia are ngkana ngai te tama,+ e nga te karineaki ae I bon riai n anganaki?+ Ao ngkana ngai te toka,* e nga maakakiu* ae I bon riai n anganaki?’ bon ana taeka Iehova ae Atuaia taanga ni buaka nakoimi ngkami aika ibonga* aika kam ribaa arau.+

“‘Ma kam kangai: “Ti ribaa aram n te aro raa?”’

7 “‘N aromi ni karean i aon au baonikarea amwarake* aika kabarekaaki.’

“‘Ao kam kangai: “Ti kabarekako n te aro raa?”’

“‘Ngke kam kangai: “Bon te bwai ae riai n ribaaki ana taibora Iehova.”+ 8 Ao ngkana kam anga te man ae mataki bwa te karea, ao kam kangai: “Akea buakakana.” Ao ngkana kam kareana te man ae mwauku ke ae e aoraki, ao kam kangai: “Akea buakakana.”’”+

“Ao boni kataia taiaoka n angan am kowana. E na kukurei iroum ke e na butimwaeiko ma te akoi?” bon ana taeka Iehova ae Atuaia taanga ni buaka.

9 “Ao ngkai taiaoka ma kam na bubutiia* te Atua, bwa e aonga n akoira. E na butimwaeingkami ma te akoi ma aeka ni karea akana i baimi akanne?” bon ana taeka Iehova ae Atuaia taanga ni buaka.

10 “Ao antai i buakomi ae e kukurei ni kaini mataroa?*+ Bwa kam na bon aki kauraa au baonikarea n akea boomi.+ I aki kimwareirei iroumi,” bon ana taeka Iehova ae Atuaia taanga ni buaka, “ao I bon aki kukurei n te karea ae te bwaintituaraoi mai baimi.”+

11 “Bwa e na kakannato arau i buakoia natannaomata man otin taai ni karokoa bungina.*+ N taabo nako ao a na kabuekaki ni kabubuaki taiani karea ao ni karaoaki taian angakarea nakon arau, bwa te bwaintituaraoi ae itiaki, ibukina bwa e na kakannato arau i buakoia natannaomata,”+ bon ana taeka Iehova ae Atuaia taanga ni buaka.

12 “Ma kam kamatauningaa*+ n aromi ni kangai, ‘E kabarekaaki ana taibora Iehova, ao a na ribaaki uaanikai ma amwarake ake iai.’+ 13 Kam kangai naba, ‘Noria! Ai kakuara!’ ao kam ngatingati iai,” bon ana taeka Iehova ae Atuaia taanga ni buaka. “Ao kam uotiia maan aika iraeaki, a mwauku, ao a aoraki. Eng, kam uotii baikanne bwa ami bwaintituaraoi! I riai ni butimwaeia mai baimi?”+ bon ana taeka Iehova.

14 “E na reke kain ane e bwaina te nanowanawana, ae iai ana man ae te mwaane ae marurung raoi n ana nanai, ma e taetae ni bau ao e kareana ae e aki marurung* nakon Iehova. Bwa bon te Uea ngai ae I kakannato,”+ bon ana taeka Iehova ae Atuaia taanga ni buaka, “ao e na kamimi ma ni kakamaaku arau i buakoia natannaomata.”+

2 “Ao ngkai ngkami aika ibonga,* aio te tua ibukimi.+ 2 Ngkana kam rawa n ongo ao kam aki kani kaaki i nanomi ae kam na neboa arau,” bon ana taeka Iehova ae Atuaia taanga ni buaka,* “ao N na karokoa i aomi te rekenikai,+ ao N na oniki kakabwaiami nakon taian rekenikai.+ Eng, I a tia n oniki kakabwaia nakon taian rekenikai, ibukina bwa kam aki kaaki i nanomi.”

3 “Noria! Ibukimi ao N na urui* ami koraa ake a unikaki,+ ao N na kamaenakoa te nakotaari i aon ubumi, ae nakotaaria maan ake kam kareania n ami toa nako, ao kam na uotaki nako iai.* 4 Ao ane kam na ataia bwa I anga te tua aei nakoimi bwa e aonga n teimatoa au berita ma tibun Rewi,”+ bon ana taeka Iehova ae Atuaia taanga ni buaka.

5 “Au berita ma ngaiia e kaineti ma te maiu ao te rau are I angania, n ikotaki ma te maaku.* A maakai, eng, a tei ni karinea arau. 6 E mena tuan* te koaua i nanoni wia,+ ao akea te buakaka ae kuneaki i riaia. A nakonako ma ngai i nanon te rau ao te eti,+ ao a rairiianako aika bati man te bure. 7 Bwa a riai rian te ibonga ni kawakina te atatai, ao a riai aomata n ukoukora te tua* mai wina,+ ibukina bwa boni ngaia ana tia uataeka Iehova ae Atuaia taanga ni buaka.

8 “Ma boni ngkami aika kam rairakinako man te kawai. Kam kabwakaia aika bati ni kaineti ma te tua.*+ Kam urua te berita are karaoaki ma tibun Rewi,”+ bon ana taeka Iehova ae Atuaia taanga ni buaka. 9 “Ngaia ae N na karaoingkami bwa kam na riribaaki ao ni mangori i mataia aomata ni kabane, ibukina bwa kam aki kawakini kawaiu ma kam inanonano ni kamanenaakin te tua.”+

10 “Tiaki bon tii temanna tamara ngaira ni kabane?+ Tiaki bon tii temanna te Atua are karikira? Mangaia ae e aera ngkai ti a babakanikawai i marenara,+ ni kamwaraea aia berita ara bakatibu? 11 E babakanikawai Iuta, ao e karaoaki te bwai ae riribaaki i Iteraera ao i Ierutarem, bwa e a tia Iuta ni kamatauningaa aron tabun* Iehova+ are E tangiria, ao e a tia ni mare ma te aine ae natin te atua ae ianena.+ 12 Ao Iehova e na koreaanako ane e karaoa aei, man ana umwanrianna Iakoba, n aki ongeia bwa antai ngaia,* ao e ngae ngkana e anga te karea ae te bwaintituaraoi nakon Iehova ae Atuaia taanga ni buaka.”+

13 “Ao iai riki te bwai teuana* ae kam karaoia, ae e a karekea rabunakin ana baonikarea Iehova n te rannimata, ma te tang, ao te ikenrawa, bwa e aonga n aki manga mutiakina ami karea ae te bwaintituaraoi ke n tarai bwaai ake mai baimi ma te kukurei.+ 14 Ao kam kangai, ‘Bwa tera bukina?’ Ibukina bwa e riki Iehova bwa te tia kakoaua i marenami ma buumi ae buumi man ami bongi n ataei, are kam babakanikawai nakoina, e ngae ngke bon raom neiei ao buum n te berita.*+ 15 Ma iai temanna ae aki karaoia, bwa iai irouna nikiran te taamnei ae raoiroi. Ao tera ae e ukoukoria te aomata anne? Boni kanoan* te Atua. Mangaia ae kawakiningkami ni kaineti ma nanomi, ao tai babakanikawai nakoia buumi ae buumi man ami bongi n ataei. 16 Bwa I ribaa* te buuraure,”+ bon ana taeka Iehova ae Atuan Iteraera, “ma te aomata ae rabuna ana kunnikai n te iowawa,”* bon ana taeka Iehova ae Atuaia taanga ni buaka. “Ao kawakiningkami ni kaineti ma nanomi, ao kam aki riai ni babakanikawai.+

17 “Kam kakuaa Iehova n ami taeka.+ Ma kam kangai, ‘Ti kakuaa n te aro raa?’ Ngke kam kangai, ‘E raoiroi i matan Iehova ane e karaoa ae buakaka, ao e kukurei irouna,’+ ke ngke kam kangai, ‘E nga te Atua ae nibwan te kaetitaeka ae riai?’”

3 “Noria! I kanakoa au tia uataeka, ao e na kaitiaka* te kawai imwaiu.+ Ao te Uea ae koaua are kam ukoukoria, e na rina n roko n ana tembora.+ Ao e na roko te tia uota taekan te berita, are kam rangi ni kimwareirei irouna. Noria! E na bon roko teuaei,” bon ana taeka Iehova ae Atuaia taanga ni buaka.*

2 “Ma antai ae e na tauraoi n te bong are e na roko iai, ao antai ae kona n tei ngkana e kaoti? Bwa e na riki bwa ai aron ana ai te tia kaitiakii biiti ao aia tobu+ taani kaitiakii kunnikai. 3 Ao e na tekateka bwa te tia kaitiaka te tirewa,+ ao e na kaitiakiia tibun Rewi, ao e na kataiia* n aron te koora ao n aron te tirewa, ao a na bon riki iroun Iehova bwa aomata aika anga te karea ae te bwaintituaraoi n te raoiroi. 4 Ao e na boni kakukurei* iroun Iehova ana karea ae te bwaintituaraoi Iuta ao Ierutarem, n aroni boong ake rimoarimoa, ao n aron ririki ake ngkoangkoa.+

5 “N na kaaningkami bwa N na motiki taekami, ao N na tauraoi n anga te kaotioti ni kaaitaraia taan tabunea,+ ni kaaitaraia taani wene ni kimoa, ni kaaitaraia taan taetae n tuea ni kewe,+ ni kaaitaraia taani babakanikawaia te tia mwakuri ae kabooaki ana mwakuri,+ te aine ae e a tia ni mate buuna, ao te teei ae akea tamana,*+ ao ni kaaitaraia te koraki ake a rawa ni buoka* te ianena.+ A aki maakai te koraki aikai,” bon ana taeka Iehova ae Atuaia taanga ni buaka.

6 “Bwa bon Iehova ngai, ao I aki bibitaki.*+ Ao ngkami bon tibun Iakoba ao kam tuai n roko n tokimi. 7 Kam rairakinako man au kaetieti man aia bong ami bakatibu ao kam aki kawakini.+ Kam na okirai, ao N na okiringkami,”+ bon ana taeka Iehova ae Atuaia taanga ni buaka.

Ma kam kangai: “Ti na oki n te aro raa?”

8 “Te koaua bwa te aomata e na kuribwaia te Atua? Ma kam boni kuribwaiai.”

Ao kam kangai: “Ti kuribwaiko n te aro raa?”

“N taiani kabwianibwai* ao n taian angabwai. 9 E na bon reke kaimi* bwa kam kuribwaiai, eng, e karaoa anne te natannaomata aei ni kabane. 10 Uota te kabwianibwai* ni kabane nako nanon te auti ni kaikobwai,+ bwa e aonga ni mena te amwarake n au auti,+ ao tuoai taiaoka ni kaineti ma aei,” bon ana taeka Iehova ae Atuaia taanga ni buaka, “n noria bwa tao N na kauki nakoimi mataroani karawa+ ao ni kabwaroa* i aomi te kakabwaia ni karokoa aki rekeni nnena ke N na aki.”+

11 “Ao N na boaa ibukimi te tia kang bwaai,* ao e na aki urua uaan abami, ao e na uaa naba te kai ae te kureebe n ami tawaana,”+ bon ana taeka Iehova ae Atuaia taanga ni buaka.

12 “A na bane natannaomata n atongingkami bwa kam kukurei,+ bwa kam na riki bwa te aba ae rangi ni kakimwareirei,” bon ana taeka Iehova ae Atuaia taanga ni buaka.

13 “A bwakarawata ami taeka n ekainako,” bon ana taeka Iehova.

Ao kam kangai: “Ti taetae n ekikonako i marenara n te aro raa?”+

14 “Kam kangai, ‘Bon akea uaan te beku iroun te Atua.+ Tera kabwaiara ae ti karekea ngkai ti kawakini mwiokoara nakoina ao ngkai ti kaotia nakon Iehova ae Atuaia taanga ni buaka, bwa ti nanokawaki ibukin ara bure? 15 Ti iangoiia ngkai aomata aika kan rarabakau bwa a kukurei. A nakoraoi naba aroia te koraki aika kakaraoa ae buakaka.+ A ninikoria ni kataa te Atua, ao akea aia kangaanga imwina.’”

16 N te tai anne ao a taetae i marenaia te koraki ake a maaka Iehova, temanna ma temanna ma raona, ao e teimatoa Iehova ni kakauongo ao n ongora. Ao e koreaki te boki ni kauring i matana+ ibukia te koraki ake a maaka Iehova ao ibukia te koraki ake a kananoi aia iango i aon* arana.+

17 “Ao a na riki bwa au aomata,”+ bon ana taeka Iehova ae Atuaia taanga ni buaka, “n te bong are I karekeia iai au aomata aika okoro.*+ N na nanoangaiia, n aron te aomata ae nanoangaa natina te mwaane ae beku irouna.+ 18 Ao ane kam na manga ataa te kaokoro i marenan te aomata ae raoiroi ma te aomata ae buakaka,+ ao i marenan ane e toro iroun te Atua ma ane e aki toro irouna.”

4 “Bwa noria! e a roko te bong ae ura n ai aroni nnen te ai,+ ae a nangi bane n riki iai akana kan rarabakau ma akana kakaraoa ae buakaka bwa ai aron te uteute ae mwau. E na boni kabuekiia te bong ae e a roko aei,” bon ana taeka Iehova ae Atuaia taanga ni buaka,* “ao e na katikuia n akea wakaaia ao n akea mwaangaia. 2 Ma ngkami aika kam karinea* arau, e na oti i aomi taain te raoiroi ma te kakamaiu are n ootana,* ao kam na ewewe n ai aroia bunia kaao aika kamarikaaki.”

3 “Ao kam na toutouia akana buakaka i aani waemi, bwa ane a na riki bwa ai aroni bubun te tano i aan nanoni waemi n te bong are I a waakina iai te mwakuri,” bon ana taeka Iehova ae Atuaia taanga ni buaka.

4 “Uringa te Tua rinanon au toro are Mote, ao kaetieti ma mooti ake I tua i Oreba ibukia tibun Iteraera ni kabane bwa a na ongeaba iai.+

5 “Noria! ae I a kanakoa Eria are te burabeti+ nakoimi imwain rokon ana bong Iehova ae kakannato ma ni kamimi ao ni kakamaaku.+ 6 Ao e na rairi nanoia taama nakoia naati mwaane,+ ao nanoia naati mwaane nakoia taama, bwa I aonga n aki roko ao n orea te aonnaba, ma n anga bwa e na uruakaki.”