TEKARIA
1 N te kawanua n namwakaina n ana kauoua n ririki n tautaeka Taraiati,+ ao e roko ana taeka Iehova iroun Tekaria*+ are te burabeti, are natini Berekia are natin Ito, ae kangai: 2 “E a korakora unin Iehova irouia tamami.+
3 “Kangai nakoia, ‘E kangai ana taeka Iehova ae Atuaia taanga ni buaka:* “‘Okirai,’ bon ana taeka Iehova ae Atuaia taanga ni buaka, ‘ao N na manga okiringkami,’+ bon ana taeka Iehova ae Atuaia taanga ni buaka.”’
4 “‘Tai riki bwa ai aroia tamami ake a tataekina ae kangai burabeti ake rimoa nakoia: “E kangai ana taeka Iehova ae Atuaia taanga ni buaka, ‘Rairakinako* taiaoka mani kawaimi aika bubuaka, ao man ami mwakuri aika bubuaka.’”’+
“‘Ma a aki ongo ao a aki mutiakinai,’+ bon ana taeka Iehova.
5 “‘A nga ngkai tamami? Ao te koaua bwa a maiu n aki toki burabeti? 6 Ma ni kaineti ma au taeka ao au moti ake I tua nakoia au toro ake burabeti, tiaki a nori kakoroani bukia tamami?’+ Ngaia are a okirai ao a taku: ‘E a tia Iehova ae Atuaia taanga ni buaka ni karaoa nakoira ae boraoi ma kawaira ao ara mwakuri nako, n aron are e motikia bwa e na karaoia.’”+
7 N te ka-24 ni bong n te ka-11 n namwakaina, ae taekan te namwakaina ae Tebata,* n ana kauoua n ririki n tautaeka Taraiati,+ ao e roko ana taeka Iehova iroun Tekaria are te burabeti, are natini Berekia are natin Ito, ae kangai: 8 “I nora te miitara n te bong. Iai te mwaane temanna ae toka i aon te aoti ae uraura ao e tei n aki kakammwakuri i buakon aroka aika motere n te mwarua, ao a mena i akuna aoti aika uraura, a uraura ni buraun, ao a mainaina.”
9 Ngaia are I taku: “Au uea, antai taan toka i aoia aoti aikai?”
Ao e kaeka ni kangai te anera are taetae ma ngai: “N na kaotia nakoim bwa antai naakai.”
10 Ao e taku teuare tei n aki kakammwakuri i buakon aroka aika motere: “Naakai ake e kanakoia Iehova bwa a na ririaki n te aonnaba.” 11 Ao a taku nakekei nakon ana anera Iehova are tei i buakon aroka aika motere: “Ti a tia n ririaki n te aonnaba, ao noria! e rau te aonnaba ni kabutaa ao e aki kakiriweaki.”+
12 Ngaia are e taku ana anera Iehova: “Iehova ae Atuaia taanga ni buaka, ko na maanra n tautaua am nanoanga mai Ierutarem ao mani kaawa ake i Iuta,+ ake ko un irouia i nanon ririki aika 70 aikai?”+
13 Ao Iehova e kaeka n taeka aika akoi ao ni karaunano nakon te anera are taetae ma ngai. 14 Ao e tuangai ae kangai te anera are taetae ma ngai: “Takarua ni kangai, ‘E kangai ana taeka Iehova ae Atuaia taanga ni buaka: “I ingainga ibukin Ierutarem ao ibukin Tion n te ingainga ae korakora.+ 15 I rangi n un irouia natannaomata ake tabeua ake a rau.+ I bon tii un teutana irouia au aomata, ma natannaomata+ akanne a kammarakiia n te aro ae riaon are I iangoia.”’+
16 “Mangaia ae e kangai ana taeka Iehova: ‘“N na okira Ierutarem ma te nanoanga,+ ao e na kateaki au auti i nanon neiei,”+ bon ana taeka Iehova ae Atuaia taanga ni buaka, “ao e na katikaki te kora ni baire i aon Ierutarem.”’+
17 “Takarua riki ao kangai, ‘E kangai ana taeka Iehova ae Atuaia taanga ni buaka: “E na manga taonako te raoiroi n au kaawa nako, ao Iehova e na manga kabebetea Tion+ ao ni manga rinea Ierutarem.”’”+
18 Ao I tararake ao I nori kooro aika aua.+ 19 Ngaia are I titirakina te anera are taetae ma ngai ni kangai: “Baikara baikai?” E kaeka ni kangai: “Bon aikai kooro ake a kamaeinikunia kaain Iuta,+ Iteraera,+ ao Ierutarem.”+
20 Ao Iehova e kaotiia nakoiu taani karaobwai aika mwaatai aika aman. 21 Ao I titiraki ni kangai: “Tera ae a roko iai naakai bwa a na karaoia?”
E taku: “Aikai kooro ake a kamaeinikunia kaain Iuta n te aro ae akea ae e kona n euta atuna. A na roko naake te korakina bwa a na kakamaakuia, ao a na kabwakai koroia natannaomata ake a karietatai koroia n ekaanako te aba ae Iuta, bwa a aonga ni kamaeinikunia kaaina.”
2 Ao I tararake ao I nora te mwaane temanna ae mena te kora ni baire+ i nanoni baina. 2 Ngaia are I titiraki ni kangai: “Ko na nakea?”
E kaeka ni kangai: “N na bairea Ierutarem bwa N na noria bwa raababara ao abwakira neiei.”+
3 Ao akea bwa e a otinako te anera are taetae ma ngai, ao e roko te anera riki temanna ni kawaria. 4 Ao e taku nakoina: “Birinako nako ikekei ao tuanga te rorobuaka n ataei arei ni kangai, ‘“E na kaainaki Ierutarem+ n aroni kaawa aika akea ooia, ibukina bwa a na mwaiti aomata ma te nanai ni man i nanon neienne.+ 5 Ao N na riki iroun neienne,” bon ana taeka Iehova, “bwa te oo ae te ai n otabwaninia ni kabutaa,+ ao e na mena mimitongiu i nanona.”’”+
6 “Nakomai! Nakomai! Birinako man te aba are i meang,”+ bon ana taeka Iehova.
“Bwa I a tia ni kamaenakoingkami nakon angini karawa ake aua,”+ bon ana taeka Iehova.
7 “Nakomai Tion! Rabanako ngkoe ae ko maeka ma natini Baburon te aine.+ 8 Bwa e kangai ana taeka Iehova ae Atuaia taanga ni buaka,* are teuare kanakoai nakoia natannaomata ake a kuribwaingkami,+ ngke e tia ni kamimitongaki:* ‘Ane e ringingkami ao e ringa ataeini matau.*+ 9 Bwa N na katiotioa baiu ngkai n ekiianako, ao a na riki bwa bwaai ni kuri irouia naake bon aia toro.’+ Ao ane kam na bon ataia bwa e kanakoai Iehova ae Atuaia taanga ni buaka.
10 “Takarua ni kimwareirei ngkoe ae natin Tion te aine,+ bwa ae I a roko,+ ao N na maeka i nanom,”+ bon ana taeka Iehova. 11 “A bati natannaomata ake a na raona Iehova n te bong anne,+ ao a na riki bwa au aomata, ao N na maeka i nanom.” Ao ane ko na ataia bwa e boni kanakoai nakoim Iehova ae Atuaia taanga ni buaka. 12 Ao Iehova e na anaa aban Iuta bwa tibwangana i aontano ae tabu, ao e na manga rinea Ierutarem.+ 13 Kainabwabu i matan Iehova ngkami aika iriko* ni kabane, bwa e nang karaoa te mwakuri man ana tabo ni maeka ae tabu.
3 Ao e kaota nakoiu Iotua+ are te ibonga ae rietata* ae tei i matan ana anera Iehova, ao e tei Tatan+ i angaatain Iotua bwa e na kaitaraa. 2 Ao e taku ana anera Iehova nakon Tatan: “E bia boaiko Iehova ngkoe ae Tatan,+ eng, e bia boaiko Iehova are rinea Ierutarem!+ Tiaki bon te kai te mwaane aei ae buritaki ni kanakoaki mai nanon te ai?”
3 Ao Iotua e kunnikainna ni kunnikai aika kamwara, ao e tei i matan te anera. 4 E taku te anera nakoia te koraki ake a tei i matana, “Kanakoi kunnikaina akana kamwara.” Imwina ao e taku nakoina, “Noria, I a tia ni kanakoa am kairua* mairoum, ao ko na kunnikaiaki ni kunnikai aika raraoi.”+
5 Ngaia are I taku: “Ke e katokaaki te bwara ae te kunnikai ae itiaki i aon atuna.”+ Ao a katokaa te bwara ae te kunnikai ae itiaki i aon atuna, ao a kunnikaia ni kunnikai, ao e tei ana anera Iehova n uakaan. 6 Ao e taekina ae kangai ana anera Iehova nakon Iotua: 7 “E kangai ana taeka Iehova ae Atuaia taanga ni buaka,* ‘Ngkana ko nakonako ni kawaiu ao ni kakaraoi tabem i matau, ao ko na riki bwa te tia motikitaeka n au auti,+ ao n tararuai* au katawanang. Ao N na anganiko te inaomata n rinnako i buakoia te koraki aikai aika tei ikai.’
8 “‘Taiaoka ma ongora ngkoe ae te Ibonga ae Rietata ae Iotua, ngkoe ma raom akana tekateka i matam, bwa a riki mwaane aikai bwa te kanikina. Noria! Ae I a karina au toro+ ae arana Bwebwerake!+ 9 Nora te atibu are I kaaki i matan Iotua! Iai maata aika itiua i aon te atibu ae tii teuana, ao I a kaara i aona te koroboki,’ bon ana taeka Iehova ae Atuaia taanga ni buaka, ‘ao N na uotaanako ana bure te aba anne n tii tebongina.’+
10 “‘N te bong anne,’ bon ana taeka Iehova ae Atuaia taanga ni buaka, ‘ane kam na kaoia raomi ngkami n tatabemaningkami nako, nako aan arokami aika kureebe ao arokami aika biiku.’”+
4 Ao e oki te anera are taetae ma ngai ao e kautai, n aroni kautan te aomata mani matuna. 2 Ao e taku nakoiu: “Tera ae ko noria?”
Ngaia are I taku: “I mataku ao noria! te kaintaura teaina ae te koora bwaina ni kabane,+ ao iai te boora i aona mai eta. Iai taura aika itiua i aona,+ eng, itiua, ao iai bwaibu aika itiua n taura ake a toka i aona mai eta. 3 Ao iai i rarikina aroka aika oriwa aika uakai,+ tekaina mai angaatain te boora ao tekaina mai angamaingina.”
4 Ao I titirakina te anera are taetae ma ngai ni kangai: “Tera nanoni baikai au uea?” 5 Ngaia are e titiraki ni kangai te anera are taetae ma ngai: “Ko aki atai nanoni baikai?”
I kaeka ni kangai: “I aki, au uea.”
6 E taku ngkanne nakoiu: “E kangai ana taeka Iehova nakon Terubabera: ‘“A na bane n riki baikai tiaki rinanon te taanga ni buaka, ao tiaki naba n te korakora,+ ma rinanon taamneiu,”*+ bon ana taeka Iehova ae Atuaia taanga ni buaka.* 7 Antai ngkoe, ngkoe ae te maunga ae totoa? Ane ko na riki bwa te aba ae boraoi*+ i matan Terubabera.+ Ao e na kaotinakoa te atibu are mai eta* i buakon tatakaruaean ae kangai: “Ai tamaroara! Ai tamaroara!”’”
8 E a manga roko naba ana taeka Iehova irou, ae kangai: 9 “A a tia bain Terubabera ni kawenea aan te auti aei,+ ao e na boni katiaa bain teuaei.+ Ao kam na ataia bwa e boni kanakoai nakoimi Iehova ae Atuaia taanga ni buaka. 10 Bwa antai ae e ribaa bongini baika moani waakinaki aika uarereke?*+ Bwa ane a na kimwareirei ao n nora te kora ni kaeti* i nanoni bain Terubabera. Baika itiua aikai boni matan Iehova, aika biribiri n te aonnaba ni kabutaa.”+
11 Ao I titirakina teuarei ni kangai: “Tera nanon aroka aika oriwa aika uakai aikai, ae mena i angaatain ao i angamaingin te kaintaura?”+ 12 I a manga titirakinna riki n te kauatai ni kangai: “Tera nanoni mwaangan* nako aroka aika oriwa ake uakai aika kabwaroa te ran ae koora rinanoni bwaibu aika uoua aika koora?”
13 Ngaia are e titirakinai ni kangai: “Ko aki atai nanoni baikai?”
I kaeka ni kangai: “I aki, au uea.”
14 E taku: “A tei baikai ibukia aomata aika kabiraki aika uoman aika tei i rarikin Uean te aonnaba ni kabutaa.”+
5 I a manga tararake riki ao I nora te nira ni boki ae kibakiba. 2 Ao e titirakinai ni kangai: “Tera ae ko noria?”
I kaeka ni kangai: “I nora te nira ni boki ae kibakiba, ae 20 te mwanokunibai* abwakina ao 10 te mwanokunibai raababana.”
3 Ao e taku nakoiu: “Aio te rekenikai ae otinako nakon te aonnaba ni kabutaa, ibukina bwa e ngae ngke e na reke kain ane e iraa+ n aron ae koreaki n iteran te nira ni boki ae te iterana, ma a aki katuuaaeaki te koraki ake a iraa. Ao a aki katuuaaeaki te koraki ake a taetae n tuea ni kewe, e ngae ngke e na reke kain ane e taetae n tuea ni kewe,+ n aron ae koreaki n iteran te nira ni boki are te iterana. 4 ‘I a tia ni kaotinakoa,’ bon ana taeka Iehova ae Atuaia taanga ni buaka,* ‘ao e na rin n ana auti te tia iraa, ao n ana auti te aomata are taetae n tuea ni kewe n arau. E na tiku i nanon te auti anne ao e na kamauna, ma kaina, ao atibuna.’”
5 Ao e keerake te anera are taetae ma ngai ao e taku nakoiu: “Tararake taiaoka, ao noria bwa tera ae otinako.”
6 Ngaia are I titiraki ni kangai: “Tera te baenne?”
E kaeka ni kangai: “Te baei boni bwaini bairean te eba* ae otinako.” E reitia ni kangai: “Aei bon tein taraakia akana buakaka n te aonnaba ni kabutaa.” 7 Ao I nora bonotana ae mronron ae te buange bwa e tabekakirake, ao iai te aine temanna ae tekateka i nanon te baerei. 8 Ngaia are e taku: “Aran te aine aei boni Buakaka.” Ao e a manga karenakoa neiei ni kaokia nako nanon te baere bwaini bairean te eba, ao imwina e kaina matana ni bonotana are te buange.
9 Ao I tararake ao I noriia aine aika uoman aika tabe n roko, ao a kibakiba n te ang. Iai baia ni kiba aika ai aroni bain te titaoki* ni kiba. Ao a tabekaarake te baere bwaini bairean te eba i marenan te aonnaba ma karawa. 10 Mangaia are I titirakina te anera are taetae ma ngai ni kangai: “A na uota nakea bwaini bairean te eba?”
11 E kaeka ni kangai: “Nakon te aba ae Tina*+ bwa a na katea ana auti neienne, ao ngkana e a tauraoi ao e na karinaki neienne ikanne n ana tabo ae e riai ni mena iai.”
6 Ao I a manga tararake riki ao I nori kaa ni buaka aika awaa aika roko mai marenani maunga aika uoua, ao maunga akekei bon taiani buraati. 2 A uraura aoti ake a katika te moani kaa ni buaka, ao a roroo aoti+ ake a katika te kauowaa ni kaa ni buaka. 3 A mainaina aoti ake a katika te kateniwaa ni kaa ni buaka, ao a kiriwantanta ma ni matamata aoti+ ake a katika te kawaa ni kaa ni buaka.
4 I titirakina te anera are taetae ma ngai ni kangai: “Au uea, baikara baikai?”
5 E kaekaai te anera ni kangai: “Baikai bon taamnei+ aika aman mai karawa aika otinako imwin tiaia n tei i matan Uean te aonnaba ni kabutaa.+ 6 E otinako are tewaana* are a mena iai aoti aika roroo nakon te aba are i meang,+ ao a otinako ake a mainaina nakon te aba are n iteran taari, ao a otinako ake a kiriwantanta nakon te aba are i maiaki. 7 Ao a ingainga n otinako ake a matamata bwa a na ririaki ni kabutaa te aonnaba.” Ngaia are e taku: “Naako ririaki ni kabutaa te aonnaba.” Ao a a ririaki ni kabutaa te aonnaba.
8 Ao e takarua nakoiu ao e taku: “Noria, e a kerikaaki unin Iehova n ekaanako te aba are i meang, ibukia aoti ake a nako ikekei.”
9 E a manga roko naba ana taeka Iehova irou, ae kangai: 10 “Anai mairoun Eretai, Tobiia, ao Ietaia, baike a uotii mairouia aomata ake a taenikai. Ao n te bong anne ko riai n nakon ana auti Iotia are natin Tebania, ike a mena iai naake a roko mai Baburon akanne. 11 Ko riai n anaa te tirewa ma te koora ao karaoa te baunuea,* ao katokaa i aon atun Iotua+ are natin Ieotataka, are te ibonga ae rietata.* 12 Ao kangai nakoina,
“‘E kangai ana taeka Iehova ae Atuaia taanga ni buaka:* “Ao aei te mwaane ae arana Bwebwerake.+ E na bwebwerake boni man ana tabo, ao e na katea ana tembora Iehova.+ 13 Boni ngaia ae e na katea ana tembora Iehova, ao boni ngaia ae e na karineaki. E na tekateka i aon ana kaintokanuea+ ao e na riki bwa te tia tautaeka. E na riki naba bwa te ibonga, ao e na karaoi mwakuri aika uoua aikai n te aro ae e na karekea te rau nakoia aomata. 14 Ao e na riki te baunuea* bwa kanuringan* Erem, Tobiia, Ietaia,+ ao En are natin Tebania, n ana tembora Iehova. 15 Ao te koraki ake a raroanako a na roko ao n ibuobuoki ni katean ana tembora Iehova.” Ao kam na ataia bwa e boni kanakoai nakoimi Iehova ae Atuaia taanga ni buaka. Ao e na bon riki anne ngkana kam aki kabwaka n ongo ni bwanaan Iehova ae Atuami.’”
7 Ao n ana kaaua n ririki n tautaeka te Uea ae Taraiati, ao e roko ana taeka Iehova iroun Tekaria+ n te kaaua ni bong n te karuaiwa n namwakaina, ae taekan te namwakaina ae Kitirewi.* 2 Ao kaaini Betaera a kanakoa Tiaretera ao Rekemmereka ma ana rorobuaka, bwa e na bubutii ibukin ana akoi* Iehova, 3 ao ni kangai nakoia ibongan* ana auti* Iehova ae Atuaia taanga ni buaka* ao nakoia burabeti: “I riai n tanginiwenei n te kanimaua n namwakaina+ ao n rawa nakon te amwarake, n aron are I karaoia i nanon ririki aika rangi ni bati?”
4 E a manga roko naba irou ana taeka Iehova ae Atuaia taanga ni buaka, ae kangai: 5 “Kangai nakoia kaain te aba ni kabane ao nakoia ibonga, ‘Ngke kam aki ngkoa mamatam ma n tanginiwenei n te kanimaua n namwakaina ao n te kaitiua n namwakaina+ i nanon 70 te ririki,+ te koaua bwa kam bon aki mamatam ibukiu? 6 Ao ngke kam amwamwarake ngkoa ma ni momoi, tiaki kam bon amwarake i bon ibukimi ao ni moi i bon ibukimi? 7 Tiaki kam bon riai n ongeaba n taeka ake e taekin Iehova rinanoia burabeti ake rimoa,+ ngke e kaainaki ngkoa Ierutarem ma kaawan neiei ake i rarikina ao a rau, ao ngke e kaainaki naba te Nekebo* ma te Tiebira?’”*
8 E a manga roko naba ana taeka Iehova iroun Tekaria, ae kangai: 9 “E kangai ana taeka Iehova ae Atuaia taanga ni buaka, ‘Motikitaeka n te kaetitaeka ae riai ni koaua,+ ao bwaina te tangira ae koaua*+ ao te nanoanga i marenami. 10 Tai babakanikawaia te aine ae e a tia ni mate buuna ke te teei ae akea tamana,*+ te iruwa+ ke te aomata ae maiu ni kainnano,+ ao tai bairea i nanomi karaoan ae buakaka i marenami.’+ 11 Ma a teimatoa n rawa n ongo,+ ao a imanono n tannako,+ ao a kaini taningaia bwa a aonga n aki ongo.+ 12 A karaoi nanoia bwa ai aron te taiman,*+ ao a aki ongeaba n te tua* ma ana taeka Iehova ae Atuaia taanga ni buaka, ake e kanakoi n taamneina rinanoia burabeti ake rimoa.+ Mangaia ae e a roko te un ae korakora mairoun Iehova ae Atuaia taanga ni buaka.”+
13 “‘N aroia ngke a aki ongo ngke I* wewete,+ ao I aki naba ongo ngke a a wewete,’+ bon ana taeka Iehova ae Atuaia taanga ni buaka. 14 ‘Ao I kamaenakoia n te angibuaka nako buakoia natannaomata ni kabane ake a aki kinaia,+ ao e a tiku imwia te aba n aki kaainaki, ao akea temanna ae mwananga rinanona ke n oki.+ Bwa a bita te aba ae tatangiraki ni karikia bwa te bwai ni kakamaaku.’”
8 E a manga roko naba ana taeka Iehova ae Atuaia taanga ni buaka,* ae kangai: 2 “E kangai ana taeka Iehova ae Atuaia taanga ni buaka, ‘N na ingainga ibukin Tion n te ingainga ae korakora,+ ao N na ingainga ibukin neiei n te un ae korakora.’”
3 “E kangai ana taeka Iehova, ‘N na okira Tion+ ao ni maeka i Ierutarem,+ ao e na aranaki Ierutarem bwa kaawan te koaua,*+ ao e na aranaki ana maunga Iehova ae Atuaia taanga ni buaka bwa te maunga ae tabu.’”+
4 “E kangai ana taeka Iehova ae Atuaia taanga ni buaka, ‘A na manga tekateka unimwaane ma unnaine ni maraen nako Ierutarem, temanna ma temanna ma okona i nanoni baina, ibukini mwaitin aia ririki.*+ 5 Ao a na onrake maraen te kaawa irouia ataei aika mwaane ma aine aika takaakaro iai.’”+
6 “E kangai ana taeka Iehova ae Atuaia taanga ni buaka, ‘E ngae ngke e taraa n rangi ni kangaanga irouia nikiraia aomata aikai ni boong akanne, ma te koaua bwa e na taraa naba n rangi ni kangaanga irou?’ bon ana taeka Iehova ae Atuaia taanga ni buaka.”
7 “E kangai ana taeka Iehova ae Atuaia taanga ni buaka, ‘Ae I a kamaiuia au aomata man aaba ake i mainiku ao i maeao.*+ 8 Ao N na karinia ao a na maeka i Ierutarem,+ ao a na riki bwa au aomata ao N na riki bwa Atuaia,+ n te koaua* ao n te raoiroi.’”
9 “E kangai ana taeka Iehova ae Atuaia taanga ni buaka, ‘Ke a korakora baimi,*+ ngkami aika kam ongo ngkai taeka aikai mai wia burabeti,+ aika taeka aika titeboo ma ake a taekinaki ngkoa n te bong are e kaweneaki iai aan ana auti Iehova ae Atuaia taanga ni buaka, bwa e na kateaki te tembora. 10 Bwa imwain te tai anne, ao akea boon te mwakuri ae kabwakaaki ibukin te aomata ke te man,+ ao e karuanikai te roko ao te nako ibukia taani kakaaitara, bwa I rairiia mwaane ni kabane bwa a na ekiianako i bon i marenaia.’
11 “‘Ma N na aki ngkai karaoa nakoia nikiraia aomata aikai, aron are I karaoia ni boong ake rimoa,’+ bon ana taeka Iehova ae Atuaia taanga ni buaka. 12 ‘Bwa e na unikaki te koraa ae uota te rau, ao e na karikiuaa te kai ae te kureebe, ao e na anga uaana te aonnaba,+ ao karawa e na anga aoina. Ao N na kabwaibwaiia nikiraia aomata aikai ni baikai ni kabane.+ 13 Ao n aron are kam riki bwa te katoto i buakoia natannaomata ni kaineti ma te taetae ni karekekai,+ ngkami aika tibun Iuta ao tibun Iteraera, ao ai arona naba bwa N na kamaiuingkami, ao kam na riki bwa te bwai ni kakabwaia.+ Tai maaku!+ A bia korakora baimi.’*+
14 “Bwa e kangai ana taeka Iehova ae Atuaia taanga ni buaka, ‘“N aron are I a tia ni motikia bwa N na karokoa te kabuanibwai i aomi ibukina bwa a kaunai ami bakatibu,” bon ana taeka Iehova ae Atuaia taanga ni buaka, “ao I aki uringaaba teutana,+ 15 ao ai arona naba bwa I motikia n te tai aei bwa N na karaoa ae raoiroi nakon Ierutarem ao nakoia tibun Iuta.+ Tai maaku!”’+
16 “‘Aikai baika kam riai ni karaoi: Tataekina te koaua i marenami,+ ao a riai ni karikirakea te koaua ma te rau taiani moti ake ni mataroan ami oo.+ 17 Tai bairea i nanomi karaoan te bwai ae karawawata i marenami,+ ao tai tangira te taetae n tuea ni kewe,+ bwa I ribai baikai ni kabane,’+ bon ana taeka Iehova.”
18 E a manga roko naba irou ana taeka Iehova ae Atuaia taanga ni buaka, ae kangai: 19 “E kangai ana taeka Iehova ae Atuaia taanga ni buaka, ‘Te aki mamatam are n te kaaua n namwakaina,+ ao te aki mamatam are n te kanimaua n namwakaina,+ ao te aki mamatam are n te kaitiua n namwakaina,+ ao te aki mamatam are n te katebwina n namwakaina,+ a na riki bwa taai ni kimarimari ao ni kimwareirei ibukia tibun Iuta, aika tooa ni kakatonga.+ Mangaia ae tangira te koaua ao te rau.’
20 “E kangai ana taeka Iehova ae Atuaia taanga ni buaka, ‘E na bon roko te tai ae a na roko iai botannaomata ao kaaini kaawa aika bati, 21 ao a na nako kaain te kaawa teuana nakoia te koraki ake kaain te kaawa riki teuana, ao ni kangai: “Ti na ingainga n nako ni bubutii ibukin ana akoi* Iehova, ao n ukoukora Iehova ae Atuaia taanga ni buaka. Ti na nako naba ngaira.”+ 22 Ao a na roko i Ierutarem botannaomata aika bati ma natannaomata aika korakora n ukoukora Iehova ae Atuaia taanga ni buaka,+ ao ni bubutii ibukin ana akoi* Iehova.’
23 “E kangai ana taeka Iehova ae Atuaia taanga ni buaka, ‘Ni boong akanne ao aomata aika tengaun man aia taetae ni kabane natannaomata,+ a na taua rabin ana kamwarai* temanna te I-Iutaia.* Eng, a na taua ni kamatoaa, ao ni kangai: “Ti kan iriingkami,+ bwa ti ongo ae e mena iroumi te Atua.”’”+
9 Te katanoata:
“E ekaanako te aba ae Ateraka ana taeka Iehova,
Bwa e memena matan Iehova i aoia aomata,+
Ao i aoia aia baronga nako tibun Iteraera,
3 Ao Turo e katea oin ana nono.
E katabuka te tirewa n aroni bubun te tano,
Ao te koora n aron tanon taiani kawai.+
4 Noria! Ane e na uotiinako ana bwai neiei Iehova,
Ao e na orea ana taanga ni buaka neiei ni kabwakaa i taari,*+
Ao e na kabuekaki neiei n te ai.+
5 E na noria Atikeron ao e na maaku.
E na korakai ni maraki Kaata,
Ao Ekiron naba, ibukina bwa e a kamaamaeaki ana kantaninga neiei.
E na mate te uea mai Kaata,
Ao e na aki kaainaki Atikeron.+
6 E na maeka te natintamwa i Atoto,
Ao N na katiaa aron nanorietan te I-Biritia.+
7 N na kanakoa te raraa mai nanoni win te I-Biritia anne,
Ao baika koro n ribaaki mai marenani wina,
Ao e na tiku ngaia bwa te nikira ibukin Atuara,
Ao e na riki bwa ai aron te mataniwi* i Iuta,+
Ao Ekiron bwa ai aron te I-Iebuti.+
8 N na katea au umwanrianna n tantania* au auti,+
Bwa e aonga n akea ae e na rinanona ao akea ae e na oki.
Akea te tia kammwakuriia aomata* ae e na manga rinanona,+
Bwa I a tia ngkai n nora te baei* ni matau.
9 Ko na rangi ni kimwareirei ngkoe ae natin Tion te aine.
Takarua n tokanikai ngkoe ae natin Ierutarem te aine.
Noria! E a nakoim am uea.+
10 N na uotaanako te kaa ni buaka mai Eberaim,
Ao te aoti mai Ierutarem.
E na uotakinako te kainikatebe ni buaka.
Ao e na katanoataa te rau nakoia natannaomata.+
E na moa ana tautaeka man taari teuana nakon taari teuana,
11 Ao ngkoe ae te aine,* n raraan am berita are i marenam ma ngai,
Ao N na kaotinakoia am aomata aika taiani bure man te mwarua ae akea te ran iai.+
12 Okira te nono ngkami aika taiani bure aika iai ami kantaninga.+
N te bong aei ao I a tuangko ae kangai,
‘Ngkoe ae te aine, N na manga kabooa mwin tibwangam ni kauouaa mwaitina.+
13 Bwa N na kabwaoua* Iuta bwa au kainikatebe.
N na anaa Eberaim bwa kanoan te kainikatebe,
Ao N na kautiia natim ngkoe ae Tion
Bwa a na ekiianako natim ngkoe ae Kuriiti,
Ao N na karikiko bwa ai aron ana kabaang te tia buaka.’
14 Ao e na kaotia Iehova bwa e memena irouia,
Ao e na otinako kanoan ana kainikatebe n aron te itirua.
E na katanga te buu te Uea ae Moan te Rietata ae Iehova,+
Ao e na kanenei ma te angibuaka mai maiaki.
15 E na tei ibukia Iehova ae Atuaia taanga ni buaka,*
Ao a na kabwauti ma ni kataenikai taiani bana.+
A na kimwareirei ao n tatakarua n aron ae kaanga a moi wain,
Ao a na kaonaki n aron te boora,
N aroni maninganingan nako te baonikarea.+
16 E na kamaiuia Iehova ae Atuaia n te bong anne,
Bwa kaanga te nanai n tiibu ae ana aomata.+
Bwa a na riki bwa kaanga atibu aika kakawaki ake n te baunuea, aika raneanea n ana tano.+
17 Bwa ai korakorara ana raoiroi,+
Ao ai korakorara tamaroana!
10 “Bubutiia Iehova te karau n tain te karau are n tain te abue.
Bon Iehova ae karaoi nangin te buaka,
Ae kabwakaa te karau ibukia aomata,+
Ao e anga arokan te tawaana nakoia aomata nako.
2 Bwa a taetae ni mwamwanaa te aba* bouannanti aika terebim,*
Ao a nori miitara aika kewe taani kaiwa.
A taekini mii aika akea manenaia,
Ao a kataia ni kabebetea te nano ma a matebuaka.
Anne bukina ae a na tiotionako iai n aroia tiibu.
A na karawawataaki, bwa akea te tia kawakintiibu.
3 E urarake uniu irouia taani kawakintiibu
Ao N na kaetii taekaia taani kairiri* aika karawawataa te aba.
Bwa e a manga mutiakinia ana nanai Iehova+ ae Atuaia taanga ni buaka,* aika tibun Iuta,
Ao e karaoiia bwa ai aron ana aoti ae korakora n te boo ni buaka.
E roko mairouna te kainikatebe ni buaka,
Ao a bane n ikotaki n otinako mairouna mataniwi* nako.
5 Ao a na riki bwa ai aroia taani buaka,
N toutoui bokabokan taiani kawai n te boo ni buaka.
6 N na karekea kakannatoia tibun Iuta,
Ao N na kamaiuia tibun Ioteba.+
N na manga kaokiia
Bwa N na nanoangaiia.+
Ao a na riki bwa kaanga ai aron ae I tuai mani kaaki taekaia,+
Bwa bon Iehova ngai ae Atuaia, ao N na kaekaia.
7 A na riki tibun Eberaim bwa ai aron te tia buaka ae korakora,
Ao a na kakatonga nanoia n aron ae kaanga ibukin te wain.+
A na nora te baei natiia ao a na kakatonga.
A na kimwareirei nanoia iroun Iehova.+
8 ‘N na katiitii ibukia ao n ikotiia ni kabane.
Bwa N na manga kabooia,+ ao a na kamwaitaki,
Ao a na teimatoa ni kamwaitaki.
9 E ngae ngke I kamaenakoia i buakoia botannaomata n aron te koraa,
Ma a na uringai n taabo aika raroa,
Ao a na manga oki korakoraia ma natiia ao a na oki.
10 N na kaokiia man te aba are Aikubita
Ao n ikotiia mai Aturia.+
11 E na rinanon taari ma te rawawata,
Ao e na orei naao i taari,+
Ao e na kabwatakatakai taabo aika nano ni kabane n te Naire.
E na karuoaki i nano nanorietan Aturia,
Ao e na nako te oko n uea are mai Aikubita.+
11 “Kauki mataroam ngkoe ae Rebanon,
Bwa a aonga ni kabuekaki n te ai am kai aika tiira.
2 Tanginiwenei ngkoe ae te kai ae te mwaiango bwa e a bwaka te kai ae te tiira.
A a kamaunaaki aroka aika totoa!
Tanginiwenei ngkami aroka aika oke ake i Batian,
Bwa e a kamaunaaki te buakonikai ae matenten!
3 Ongora! Bon tanginiweneia taani kawakintiibu,
Bwa e a bua kakannatoia.
Ongora! Boni bekoraraia raian aika ataei,
Bwa a a kamaunaaki buakoako aika matenten ake i rarikin te Ioretan.
4 “E kangai ana taeka Iehova ae Atuau, ‘Kawakinia tiibu aika katauaki ibukin te kamateaki,+ 5 ake a kamateaki irouia taani kabooia+ ao a aki reke iai n te bure. Ao a taku te koraki ake a kaboonakoia naakai,+ “E bia karaoiroaki Iehova, bwa N nang kaubwai.” Bon akea nanoangaaia irouia taani kawakinia.’+
6 “‘Bwa N na aki manga nanoangaiia kaain te aba,’ bon ana taeka Iehova. ‘Mangaia ae N na kabwakaa temanna ma temanna nako nanoni bain raona ao ana uea, ao a na urua te aba aei, ao N na aki kamaiuia mai nanoni baia.’”
7 Ao I a moana kawakinan te nanai are katauaki ibukin te kamateaki,+ ibukimi ngkami aika kam karawawataaki mai buakon te nanai. Ngaia are I anai kaai aika uaai, ao I arana teaina bwa Akoaki, ao are teaina bwa Katiteuanaaki,+ ao I a moana kawakinan te nanai. 8 Ao I kabaneia taani kawakintiibu ake teniman n tii teuana te namwakaina, bwa I* a aki kona n taotaona nanou irouia, ao a* riribaai naba. 9 Ao I taku: “N na aki teimatoa ni kawakiningkami. Ke e mate ane e a kaani mate, ao ke e mauna ane e a kaani mauna. Ao akana nikiraia, ke a kang irikoia i bon i marenaia.” 10 Mangaia are I anaa au kai are arana Akoaki+ ao I koreia, n urua au berita are I a tia ni karaoia ma botannaomata ni kabane. 11 Ngaia are e a uruaki n te bong anne, ao te koraki ake a karawawataaki mai buakon te nanai ake a matakuakinai, a ataia ae bon ana taeka Iehova.
12 Ao I taku nakoia: “Ngkana kam taku bwa e raoiroi ao anganai boou, ma ngkana e aki ao taua.” Ao a kabwakaa* boou ae 30 te mwakoro n tirewa.+
13 Ao e taku Iehova nakoiu: “Karenakoi ni nnen te mwane, ae te boo ae rangi ni bati are a kabooai iai.”+ Ngaia are I anaa te mwakoro n tirewa are 30 arei ao I karenakoi ni nnen te mwane are n ana auti Iehova.+
14 Ao I korea au kai are te kauoua are arana Katiteuanaaki,+ n urua te itaritari are i marenan Iuta ao Iteraera.+
15 Ao e taku Iehova nakoiu: “Anaa ngkai ana bwai ni mwakuri te tia kawakintiibu are akea bonganana.+ 16 Bwa I a kateirakea te tia kawakintiibu temanna n te aba. E na aki tabeakinia tiibu ake a a kaani mate,+ ao e na aki ukoukoriia ake a ataei, ke ni kamarurungia ake a ikoaki,+ ke ni kaamwarakeia ake a kona n tei. Ma e na kana irikon ane e marikarika+ ao n raebitii waeia tiibu.+
17 Ke e reke kain au tia kawakintiibu ae akea manenana,+ ae kitana te nanai!+
E na oreaki anganibaina n te kabaang ao matana ae te atai.
E na boni mamaara raoi anganibaina,
Ao e na boni mataki* raoi matana ae te atai.”
12 Te katanoata:
“E kangai ana taeka Iehova ni kaineti ma Iteraera,” bon ana taeka Iehova,
Are Teuare taakina karawa,+
Ao e kawenea aan te aonnaba,+
Ao e karaoa te maiu ae i nanon te aomata:
2 “Ae I a karaoa Ierutarem bwa te mwangko* ae karangarangaia botannaomata nako aika i rarikina, ao e na otabwaniniaki Iuta n ikotaki ma Ierutarem.+ 3 N te bong anne ao N na karaoa Ierutarem bwa te atibu ae tinebu* nakoia botannaomata ni kabane. A na boni bane n ikoaki kakaiaki akana tabekia,+ ao a na bane n ikotaki natannaomatan te aonnaba n ekaanako neiei.+ 4 N te bong anne,” bon ana taeka Iehova, “N na oreiia aoti nako n te takaka ao taan toka i aoia n te rangirang. N na teimatoa ni katokai matau i aoia tibun Iuta, ma N na oreiia aia aoti nako botannaomata n te mataki. 5 Ao ane a na kangai aia mataniwi* tibun Iuta i nanoia, ‘Boni korakorara kaain Ierutarem ae reke mairoun Atuaia ae Iehova ae Atuaia taanga ni buaka.’*+ 6 N te bong anne ao N na karaoiia aia mataniwi tibun Iuta bwa kaanga te bwaata ae ura i buakoni kaai, ao kaanga te oi ae ura n te rinan ni uita* ae e a tia ni koreaki,+ ao a na kabuekiia botannaomata nako akana i rarikina ake man te angaatai ao ake man te angamaing,+ ao a na maeka kaain Ierutarem n oin aia tabo i Ierutarem.+
7 “Ao Iehova e na kamaiui moa aia umwanrianna tibun Iuta, n te aro are e na aki rangi n riao riki karineaia* ana aomata Tawita ao karineaia* kaain Ierutarem, nakoni karineaia tibun Iuta. 8 N te bong anne ao e na riki Iehova bwa te bwai ni kamanomano ae otabwaninia kaain Ierutarem.+ N te bong anne ao ane e bwaka* mai buakoia e na riki ni korakora n aron Tawita, ao a na korakora ana aomata Tawita n aron te Atua, n aron ana anera Iehova are e kairiia aomata.+ 9 Ao n te bong anne ao N na boni kamaunaia natannaomata ni kabane ake a roko n ekaanako Ierutarem.+
10 “N na kabwaroa nako aoia ana aomata Tawita ao nako aoia kaain Ierutarem te taamnei ae karekea te akoaki ao te kakorakora n tataro ni bubutii, ao a na taraa teuare a ewaria,+ ao a na tanginiwenei ibukina n aron ae a tanginiwenei ibukin te nati te mwaane ae te rikitemanna. Ao e na korakora nanokawakia ibukina n aroia n nanokawaki ibukin te nati te mwaane ae te karimoa. 11 N te bong anne ao e na korakora te tanginiwenei i Ierutarem, n aron te tanginiwenei i Ataterimmon n te Tabo ae Aoraoi ae Mekito.+ 12 Ao e na tanginiwenei te aba anne, te utu teuana ma teuana i bon irouia, te utu are ni batan Tawita i bon irouia, ao aia aine i bon irouia, te utu are ni batan Natan+ i bon irouia, ao aia aine i bon irouia, 13 te utu are ni batan Rewi+ i bon irouia, ao aia aine i bon irouia, aia utu tibun Timei+ i bon irouia, ao aia aine i bon irouia, 14 ao nikiraia naba utu ni kabane ake a tiku, te utu teuana ma teuana i bon irouia, ao aia aine i bon irouia.
13 “N te bong anne ao e na kenaki te mwanibwa ibukia ana aomata Tawita ao kaain Ierutarem, ibukini kaitiakaia man te bure ao te kamwara.+
2 “N te bong anne,” bon ana taeka Iehova ae Atuaia taanga ni buaka,* “N na kamaunai araia bouannanti man te aba,+ ao a na aki manga uringaki. Ao N na kanakoia burabeti+ ma te taamnei ae kamwara man te aba. 3 Ao ngkana e a manga taetae naba ni burabeti te mwaane temanna, ao a na kangai nakoina tamana ma tinana ake a karikia, ‘Ko na aki maiu, ibukina bwa ko taekini keewe n aran Iehova.’ Ao tamana ma tinana ake a karikia a na ewaria ibukin ana taetae ni burabeti.+
4 “N te bong anne ao e na maamaa te burabeti temanna ma temanna n ana miitara ngkana e taetae ni burabeti. Ao a na aki bwainia n te kunnikai ni burabeti ae buraerae,+ bwa a aonga ni mwamwanaa te aba. 5 Ao e na kangai, ‘Tiaki te burabeti ngai. Bon te mwaane ngai ae I ribanaa te tano, ibukina bwa e kabooai te mwaane temanna ngke I uarereke bwa te toro.’ 6 Ao ngkana e titirakinna temanna ni kangai, ‘Baikara ikoaki akana i marenan angam akanne?’* ao e na kaeka ni kangai, ‘Ikoakiu aika reke n aia auti raoraou.’”*
7 “Ngkoe ae te kabaang, ko na uti n ekaanako au tia kawakintiibu,+
N ekaanako te mwaane ae raoraou,” bon ana taeka Iehova ae Atuaia taanga ni buaka.
“Orea te tia kawakintiibu,+ ao ke e maenako te nanai.*+
Ao N na raira baiu n ekiianako akana mangori.”
8 “Ao n te aba ni kabutaa,” bon ana taeka Iehova,
“A na koreakinako iai ake uoua te katenimwakoro ao a na mauna.*
Ao e na katukaki iai are te katenimwakoro.
9 Ao N na kaira are te katenimwakoro rinanon te ai,
Ao N na kaitiakiia n aron te tirewa ae kaitiakaki,
Ao n tuoia n aron te koora ae tuoaki.+
A na wetea arau
Ao N na kaekaia.
N na kangai, ‘Bon au aomata ngaiia,’+
Ao ngaiia a na kangai, ‘Bon Atuara Iehova.’”
14 “Noria! E a roko te bong, ae ana bong Iehova, ike a nang tibwatibwaaki iai i nanom bwaai ni kuri ake mairoum.* 2 N na ikotiia natannaomata ni kabane bwa a na buaka n ekaanako Ierutarem, ao e na tauaki te kaawa, ao a na kuribwaiaki auti ao a na tauaki aine. Ao a na nako iteraia kaain te kaawa nakon te taenikai, ma a na aki kairakinako man te kaawa te koraki ake nikiraia aomata.
3 “E na otinako Iehova ao e na buakania natannaomata akanne,+ n aron ae e buaka n te bong ni buaka.+ 4 N te bong anne ao a na tei waena i aon te Maunga ae Oriweta,+ ae kaitaraa Ierutarem mai mainiku. Ao e na bwenaua mai nukana te Maunga ae Oriweta, mai mainiku* nako maeao,* ao e a reke iai te mwarua ae rangi n abwabwaki. Ao e na mwaing iteran te maunga nako meang, ao are iterana nako maiaki. 5 Kam na birinako nakon te mwarua are i marenan au maunga, bwa e na rokoroko mwaruani maunga akanne i Aatera. Ane kam na birinako n aron are kaanga kam birinako ngkoa ibukin te mwaeiei n ana bong Utia are Uean Iuta.+ Ao e na roko Iehova ae Atuau ao a na raonna te koraki aika itiaki* ni kabane.+
6 “N te bong anne ao e na akea te oota+ ae tamaroa, a na bwanin* bwaai. 7 Ao e na riki bwa te bong ae tii tebongina ae ataaki bwa ana bong Iehova.+ E na aki ngaina ao e na aki naba bong, ao e na bon oota naba n te tairiki. 8 N te bong anne ao a na raanganako mai Ierutarem+ raan ni kamaiu,+ iterana nakon taari* are mai mainiku+ ao iterana nakon taari are mai maeao.*+ E na riki anne n tain te kabuebue ao n tain te kamwaitoro. 9 Ao e na Uea Iehova i aon te aonnaba ni kabutaa.+ N te bong anne ao e nang taromauriaki Iehova bwa te Atua n tii ngaia,+ ao tii teuana arana.+
10 “E na riki te aba ni kabutaa bwa ai aron te Arabaa,*+ mai Keeba+ nako Rimmon+ i maiakin Ierutarem, ao e na teirake neiei ma ni maekanaki ni bon ana tabo,+ ni moa man te Mataroa ae Beniamin+ ni karokoa ana tabo te Mataroa ae te Moan, ni karokoa te Mataroa ae te Maninganinga, ao man ana Taua Ananera+ ni karokoa ana nne ni kamanti kureebe* te uea. 11 Ao a na maekana neiei aomata, ao e na aki manga reke te rekenikai ae te kamaunaaki,+ ao e na maekanaki Ierutarem ma te mweraoi.+
12 “Ao aei te rekenikai ae kamamate are e na karekei kaia iai botannaomata ni kabane Iehova ake a buakana Ierutarem:+ A na mka irikoia ngkana a bon tabe n tei i aoni waeia, a na mka kanoani mataia i nanon nibwaia, ao a na mka neweia i nanoni wia.
13 “N te bong anne ao e na butanako i buakoia te mangaongao mairoun Iehova, ao a na taui baia raoia ngaiia n tatabemania nako, ao baia a na ekinako baia raoia.*+ 14 A na ira naba te buaka tibun Iuta i Ierutarem, ao a na ikotaki ni kabane kaubwaia natannaomata ake i rarikina ni kabutaa, ae te koora ma te tirewa ao kunnikai, n te mwaiti ae rangi ni bati.+
15 “Ao e na roko naba te rekenikai ae kamamate ae aron te rekenikai anne i aoia aoti, miure, kamero, taongki, ao nanai ni man ni kabane ake a mena n taiani kaembwa akanne.
16 “Ao aomata nako ake a tiku bwa nikira mai buakoia natannaomata ni kabane ake a roko n ekaanako Ierutarem, a na waewaerake ni katoa ririki+ ni bobaraaki nakon* te Uea ae Iehova ae Atuaia taanga ni buaka,*+ ao ni bukamarua te Toa ae Umwanrianna.*+ 17 Ma ngkana iai mai buakoia utu n te aonnaba ae e aki waerake nako Ierutarem ni bobaraaki nakon te Uea ae Iehova ae Atuaia taanga ni buaka, ao e na aki bwaka te karau i aoia.+ 18 Ao ngkana e aki waerake ao e aki rin te utu mai Aikubita, ao e na akea naba te karau irouia. Ma e na reke irouia te rekenikai ae kamamate are e karekei kaia iai natannaomata Iehova ake a aki waerake ni bukamarua te Toa ae Umwanrianna. 19 E na riki anne bwa te tuuaa ibukin ana bure Aikubita ao aia bure natannaomata ni kabane ake a aki waerake ni bukamarua te Toa ae Umwanrianna.
20 “N te bong anne ao a na koreaki taeka aika ‘Nibwan te itiaki* Iehova!’+ i aon taiani beero ake irouia aoti. Ao a na riki bwaata ni kuuka*+ ake n ana auti Iehova bwa kaanga boora+ ake i matan te baonikarea. 21 Ao a na bane n tabu bwaata ni kuuka* i Ierutarem ao i Iuta, ao a na riki bwa ana bwai Iehova ae Atuaia taanga ni buaka, ao a na bane n rin te koraki ake a angakarea ao a na kabonganai tabeua ibukin te kaburoburo. N te bong anne ao e nang akea tibuni Kanaan* n ana auti Iehova ae Atuaia taanga ni buaka.”+
Ae Nanona, “E a Tia Iehova n Uringnga.”
Ke, “Tabaota.” Nora Nanon Taeka.
Ke, “Kam na oki.”
Nora Buk. B15.
Ke, “Tabaota.” Nora Nanon Taeka.
Ebera, “imwin te mimitong.”
Ke, “ringa kanoani matau.”
Ke, “aomata.”
Nora Nanon Taeka, “Ibonga ae rietata.”
Ke, “bure.”
Ke, “Tabaota.” Nora Nanon Taeka.
Ke, “mwiokoaki i aon; tantani.”
Nora Nanon Taeka, “Taamnei.”
Ke, “Tabaota.” Nora Nanon Taeka.
Ke, “te tabo ae aoraoi.”
Ke, “te atibu are te kabanea mai eta.”
Ke, “baika uarereke?”
Ebera, “te atibu; te buange.”
Ae taekani mwaangan nako te aroka ake a onrake n uaaia.
Teuana te mwanokunibai titeboo ma 44.5 te tientemita (17.5 te inti). Nora Buk. B14.
Ke, “Tabaota.” Nora Nanon Taeka.
Ebera, “te eba,” ae taekinaki ikai e kaineti nakoni nnen te bwai ke te bwaene ae kabonganaaki ibukini bairean teuana te eba. Teuana te eba titeboo ma 22 te rita. Nora Buk. B14.
Nora Nanon Taeka, “Maan.”
Ae taekani Baburon.
Ae taekan te kaa ni buaka.
Ke, “te baunuea ae moan te tamaroa.”
Nora Nanon Taeka, “Ibonga ae rietata.”
Ke, “Tabaota.” Nora Nanon Taeka.
Ke, “te baunuea ae moan te tamaroa.”
Ke, “te kauring ibukin.”
Nora Buk. B15.
Ke, “kamaraua ubun.”
Nora Nanon Taeka.
Ke, “tembora.”
Ke, “Tabaota.” Nora Nanon Taeka.
Ke, “Maiaki,” ae taekani maiakin te Aba ni Berita.
Ke, “te aba ae rinano.”
Ke, “te tangira ae kona n onimakinaki.”
Ke, “te teei ae a a tia ni mate ana karo.”
Ke tao, “te atibu ae kakawaki ae matoatoa.”
Ke, “kaetieti.”
Ebera, “e.”
Ke, “Tabaota.” Nora Nanon Taeka.
Ke, “kakaonimaki.”
Ebera, “ibukini boong aika bati.”
Ke, “man te aba are oti iai taai, ao te aba are bung iai taai.”
Ke, “kakaonimaki.”
Ke, “Kaninikoriaingkami.”
Ke, “Kaninikoriaingkami.”
Ke, “kamaraua ubun.”
Ke, “kamaraua ubun.”
Ke, “mataniwin te kunnikai.”
Ebera, “te mwaane ae te I-Iutaia.”
Ebera, “ana tabo ni motirawa bon.”
Tao e kaineti nakon te aba ae Ateraka ke Tamateko.
Ke tao, “i aon taari.”
Te mataniwi aei bon te mataniwi n te baronga.
Ke, “auti ni buaka.”
Ke, “te tia karawawataa te aba.”
N taraana, boni karawawataaia ana aomata.
Ke, “ao e totokanikai; ao e kamaiuaki.”
Ke, “te taongki ae te mwaane.”
Ae taekan te Iuberetiti.
Ae taekan Tion, ke Ierutarem.
Ebera, “toua.”
Ke, “Tabaota.” Nora Nanon Taeka.
Ke, e kona n nanona “te baare.”
Ke, “a taekini baika irekereke ma te tabunea; te bwai ae kamimi.”
Ke, “atuaia kaain te utu; bouannanti.”
Ebera, “kooti mwaane.”
Ke, “Tabaota.” Nora Nanon Taeka.
Ebera, “te taua are n te maninganinga,” ae tei ibukin te aomata ae rangi ni kakawaki ke ni kakannato; te mataniwi.
Ebera, “te kai ibukini katineani bwaai,” ae tei ibukin te aomata ae te tia boutoka; te tia tautaeka.
Ke, “naake a kammwakuriia aomata.”
Ebera, ne’phesh, nora Nanon Taeka.
Ebera, ne’phesh, nora Nanon Taeka.
Ebera, “katinea.”
Ebera, “maabubu.”
Ke, “boora.”
Ke, “karawawata.”
Te mataniwi aei bon te mataniwi n te baronga.
Ke, “Tabaota.” Nora Nanon Taeka.
Ke, e kona n nanona “te baare.”
Ke, “tamaroaia.”
Ke, “tamaroaia.”
Ke, “ane te kabanea ni mamaara.”
Ke, “Tabaota.” Nora Nanon Taeka.
Ebera, “i marenani baim?” Ae taekan ae mena i aon te bwaabwaa ke i aon te nuka.
Ke, “naake a tangirai.”
Ke, “tiibu.”
Ke, “mate.”
Ae taekan te kaawa ae taekinaki n te kibu 2.
Ke, “otin taai.”
Ebera, “taari.”
Ke, “tabu.”
Ke, “aki kakammwakuri,” n aron ae kaanga e buraoki n te mwaitorotoro.
Ae taekan Taari ae Mate.
Ae taekan Taari ae te Meriteranian.
Ke, “te rereua ae aoraoi.”
Ke, “nnen ana wain.”
Ke, “ao te mwaane temanna e na eweka are temanna.”
Ke, “n taromauria.”
Ke, “Tabaota.” Nora Nanon Taeka.
Ke, “Taabo ni Katantan Aika Aki Teimaan.”
Ke, “tabu.”
Ke, “bwaata ni kuuka aika tangainanako mataia.”
Ke, “bwaata ni kuuka aika tangainanako mataia.”
Ke tao, “te tia iokinibwai.”