AKAI

1 N ana kauoua n ririki n tautaeka te Uea are Taraiati, n te kaonoua n namwakaina ae teuana iai bongin te namwakaina, ao e a roko ana taeka Iehova iroun Terubabera+ are natin Tearetiera are te kowana i Iuta, ao iroun te ibonga ae rietata* ae Iotua are natin Ieotataka, rinanon Akai*+ are te burabeti ae kangai:

2 “E kangai ana taeka Iehova ae Atuaia taanga ni buaka,* ‘A taku aomata aikai, “E tuai n roko te tai ae e na kateaki* iai ana auti* Iehova.”’”+

3 Ao e a manga roko riki ana taeka Iehova rinanon Akai+ are te burabeti, ae kangai: 4 “Aio ngkai ami tai ni maeka n ami auti aika katamaroaaki ni kaai aika raraoi ao te auti aei e a wene n uruaki?+ 5 E kangai ngkai ana taeka Iehova ae Atuaia taanga ni buaka, ‘Mutiakini* kawaimi. 6 Kam uniki koraa aika bati ma tii teutana ae kam taia.+ Kam amwarake ma kam aki rauaki. Kam moi ma kam aki nuai. Kam karini kunnikai ma akea ae e abue. Ao ane e anga ngaia bwa e na mwakuri ni kabooaki, e karini boona n te baeki ae kiribwangabwanga.’”

7 “E kangai ana taeka Iehova ae Atuaia taanga ni buaka, ‘Mutiakini* kawaimi.’

8 “‘Waerake nakon te maunga ao uotiimai kaai.+ Ao katea te auti+ bwa I aonga ni kukurei iai ao n neboaki,’+ bon ana taeka Iehova.”

9 “‘Kam kantaningaa ae bati ma kam karekea ae uarereke, ao ngkana kam uotia nako nanon te auti ao I ukianako.+ Bwa tera bukina?’ bon ana taeka Iehova ae Atuaia taanga ni buaka. ‘Ibukina bwa e uruaki au auti, ao ngkami n tatabemaningkami kam biriaitua n tabeakin oin ami auti.+ 10 Mangaia ae e taua aoina karawa ane i etami, ao te aonnaba e taua uaana. 11 Ao I teimatoa ni wetea te mwautakataka nako aon te aonnaba, nako aoni maunga, nako aon te uita,* nako aon te wain ae boou, nako aon te oera, nako aon te bwai ae rikirake man te tano, nako aoia aomata ma maan, ao nako aon aia bekutata ni kabane baimi.’”

12 Ao Terubabera+ are natin Tearetiera+ ao te ibonga ae rietata ae Iotua are natin Ieotataka,+ ao nikiraia aomata ni kabane, a ongo ni bwanaan Iehova ae Atuaia, ao n ana taeka Akai are te burabeti, ibukina bwa Iehova ae Atuaia e kanakoa teuaei. Ao a a kaotiota te maaku aomata ibukin Iehova.

13 Ao Akai are ana tia uataeka Iehova e taekina te rongorongo aei nakoia aomata ni kaineti ma mwiokoana mairoun Iehova: “‘I a memena iroumi,’+ bon ana taeka Iehova.”

14 Ao Iehova e kauekea nanon+ Terubabera are natin Tearetiera are te kowana i Iuta,+ ao nanon te ibonga ae rietata ae Iotua+ are natin Ieotataka, ao nanoia nikiraia aomata ni kabane. Ao a a roko ao ni moana mwakurian ana auti Atuaia, ae Iehova ae Atuaia taanga ni buaka.+ 15 E riki aei n te ka-24 ni bong n te kaonoua n namwakaina n ana kauoua n ririki n tautaeka te Uea are Taraiati.+

2 N te kaitiua n namwakaina ae 21 iai bongin te namwakaina, ao e roko ana taeka Iehova rinanon Akai+ are te burabeti, ae kangai, 2 “Taiaoka tuanga Terubabera+ are natin Tearetiera are te kowana i Iuta,+ ao te ibonga ae rietata* ae Iotua+ are natin Ieotataka,+ ao nikiraia aomata, ni kangai: 3 ‘Antai te nikira i buakomi ae e nora te auti* aei n tamaroana are rimoa?+ Tera aron taraana ngkai iroumi? Tiaki e taraa n ae ai akea bongana ni kabotauaki ma tamaroana are rimoa?’+

4 “‘Ma ko na korakora ngkai Terubabera,’ bon ana taeka Iehova ‘ao ko na korakora ngkoe ae te ibonga ae rietata ae Iotua ae natin Ieotataka.’

“‘Ao ngkami aika kaain te aba, kam na korakora,’+ bon ana taeka Iehova, ‘ao mwakuri.’

“‘Bwa I a memena iroumi,’+ bon ana taeka Iehova ae Atuaia taanga ni buaka.* 5 ‘Uringa te baere I beritanna nakoimi ngke kam otinako mai Aikubita,+ ao e memena taamneiu iroumi.*+ Tai maaku.’”+

6 “Bwa e kangai ana taeka Iehova ae Atuaia taanga ni buaka, ‘Iai riki te tai teuana, ai bon tii teutana riki, ao N na kamwaeieiea karawa ma te aonnaba ao taari ma aon te aba ae mwau.’+

7 “‘Ao N na ioioiia natannaomata ni kabane ao a na rin n te auti aei aia bwai aika rangi ni kakawaki* natannaomata ni kabane,+ ao N na kaona te auti aei n te mimitong,’+ bon ana taeka Iehova ae Atuaia taanga ni buaka.

8 “‘Au bwai te tirewa, ao au bwai te koora,’ bon ana taeka Iehova ae Atuaia taanga ni buaka.

9 “‘E na korakora riki tamaroan te auti ae boou aei nakon are rimoa,’+ bon ana taeka Iehova ae Atuaia taanga ni buaka.

“‘Ao N na karokoa te rau n te tabo aei,’+ bon ana taeka Iehova ae Atuaia taanga ni buaka.”

10 N te ka-24 ni bong n te karuaiwa n namwakaina, n ana kauoua n ririki n tautaeka Taraiati, ao e roko ana taeka Iehova iroun Akai+ are te burabeti, ae kangai: 11 “E kangai ana taeka Iehova ae Atuaia taanga ni buaka, ‘Taiaoka titirakinia ibonga taekan te tua+ ni kangai: 12 “Ngkana e uouota te irikomaiu ae tabu te mwaane temanna n rabin ana kunnikai ae rukumakirake, ao e boo ana kunnikai ma te kariki ke te tuubu ke te wain ke te oera ke te aeka n amwarake riki teuana, ao e na tabu te baenne?”’”

A kaeka ibonga ni kangai: “E aki!”

13 E titiraki ngkanne Akai ni kangai: “Ngkana iai te aomata temanna ae kamwara bwa e ringa rabwatan te aomata* ae mate, ao e taua teuana mai buakoni baikai, e na kamwara te baenne?”+

A kaeka ibonga ni kangai: “E na boni kamwara.”

14 Ngaia are e taku Akai: “‘Anne aron te botannaomata aei, ao anne aron te natannaomata aei i matau,’ bon ana taeka Iehova, ‘ao anne naba aron aia mwakuri ni kabane baia. A bane ni kamwara karea ake a karean ikanne.’

15 “‘Ma taiaoka ngkai, mutiakina* te baei ni moa man te bong aei: Imwain ae e katokaaki te atibu teuana i aon te atibu teuana n ana tembora Iehova,+ 16 tera arona ngkoa? Ngke e roko temanna n te bwariko ni uita,* ao e kantaningaa 20 te bwai ni baire, ao ngaia bon tii 10, ao ngke e roko temanna ni nnen te wain bwa e na itia 50 te bwai ni baire mani nnen te wain, ao ngaia bon tii 20.+ 17 I orei aia mwakuri ni kabane baimi. I kanakoa nakoimi te kabuebue, te mannaoraki,+ ao te karau ae te aiti, ma bon akea temanna i buakomi ae e rairaki nakoiu,’ bon ana taeka Iehova.

18 “‘Taiaoka ma mutiakina* te baei ni moa man te bong aei, man te ka-24 ni bong n te karuaiwa n namwakaina, man te bong are e kaweneaki iai aan ana tembora Iehova,+ ao mutiakina te baei: 19 Bon iai naba ngkai taiani koraa n te auti ni kaikobwai?*+ A tuai man uaa te kai ae te kureebe, te aroka ae te biiku, te kai ae te bamkuranete,* ao te aroka ae te oriwa, tiaki ngaia? N na karokoa te kakabwaia man te bong aei.’”+

20 Ao e roko ana taeka Iehova iroun Akai n te kauatai n te ka-24 ni bong n te namwakaina,+ ae kangai: 21 “Kangai nakon Terubabera are te kowana i Iuta, ‘N nang kamwaeieiea karawa ma te aonnaba.+ 22 N na kabwakai kaintokanuean taian tautaeka n uea ao ni kamaunai korakoran aia tautaeka n uea natannaomata,+ ao N na kabwakaa te kaa ni buaka ma taan toka i aona, ao a na bwaka aoti ma taan toka i aoia, temanna ma temanna n ana kabaang tarina.’”+

23 “‘N te bong anne,’ bon ana taeka Iehova ae Atuaia taanga ni buaka, ‘N na kairiko ngkoe ae au toro ae Terubabera+ ae natin Tearetiera,’+ bon ana taeka Iehova, ‘ao N na karaoiko bwa kaanga te mwamwa ae te bwai ni kanikina, ibukina bwa boni ngkoe teuare I rineia,’ bon ana taeka Iehova ae Atuaia taanga ni buaka.”