TEBANIA
1 Ana taeka Iehova ae roko iroun Tebania* are natini Kutii are natini Ketaria are natin Amaria are natin Etekia, n ana bong Iotia+ are natin Amon+ are uean Iuta, ae kangai:
2 “N na boni kamaunai raoi bwaai nako mai aon te aba,” bon ana taeka Iehova.+
3 “N na kamauna te aomata ao te man.
N na kamaunaia mannikiba ake i annang ao ikan taari,+
Ao bwaai ni kabwakabwaka*+ n ikotaki ma aomata aika buakaka.
Ao N na kanakoia aomata mai aon te aba,” bon ana taeka Iehova.
4 “N na arora baiu n ekaanako Iuta
Ao n ekiianako kaain Ierutarem ni kabane,
Ao N na kamauna man te tabo aei nikiran* nako Baara,+
Ao araia aia ibonga atua aika ianena n ikotaki ma ibonga,+
5 Ao te koraki ake a bobaraaki i aon taian taubuki nakoni bwaini karawa,+
Ao te koraki ake a bobaraaki ao a tuea bwa a na kakaonimaki ni koaua nakon Iehova,+
Ao a tuea naba bwa a na kakaonimaki ni koaua nakoni Marekam,+
6 Ao te koraki ake a rairakinako man irirakin Iehova,+
Ao ake a aki ukoukora Iehova ke n titirakinna.”+
7 Kainabwabu i matan te Uea ae Moan te Rietata ae Iehova, bwa e a kaan ana bong Iehova.+
E a tia ni katauraoa te karea Iehova, ao e a tia ni katabuia* te koraki ake e kaoia.
8 “Ni bongin ana karea Iehova ao N na kaetii taekaia tooka,
Natin te uea aika mwaane,+ ao te koraki ni kabane ake a bwainia ni kunnikai n ianena.
9 N na kaetii taekaia aomata nako ake a tamwarakea te bao* n te bong anne,
Ake te koraki ake a kaon aia auti aia toka n te iowawa ma te mwamwanaa te aba.
10 N te bong anne,” bon ana taeka Iehova,
“E na iai karongoaan te tang man te Mataroa n Ika,+
Ao te tanginiwenei mani Kauouani Mwakoron te kaawa,+
Ao karongoaan te rebwetaua man taian tabuki.
11 Tanginiwenei ngkami aika kaaini Maketeti,*
Bwa a bane ni katiaaki aroia* taan iokinibwai,
Ao a bane ni kamaunaaki te koraki ake a taua rawawatan te tirewa.
12 N te tai anne ao N na karaua n nenera Ierutarem ma taian taura,
Ao N na kaetii taekaia te koraki ake a aki muti,* ake a kangai i nanoia,
‘E na aki karaoa ae raoiroi Iehova, ao e na aki karaoa ae buakaka.’+
13 A na kuribwaiaki kaubwaia ao a na uruakaki aia auti.+
A na katei auti, ma a na aki maeka iai.
Ao a na ununiki ni nne ni kureebe, ma a na aki moi n te wain mai iai.+
14 E a kaan ana bong Iehova ae kakannato!+
E a kaan ao e rangi ni waekoa!*+
E karawawata karongoaan ana bong Iehova.+
Ao e takarua n te bong anne te tia buaka.+
15 Te bong anne boni bongin te un ae korakora,+
Bongin te rawawata ma te maraki,+
Bongin te angibuaka ma te kamaroaeaki,
Bongin te rotongitong ma te roo,+
Bongin te uananginang ma te rotongitong ae matenten,+
16 Bongin tangin te buu ma rongoaan te buaka,+
N ekinako kaawa aika nonoaki ao n ekinako taua aika rietata ake ni maninganingan te oo.+
17 N na karawawataia aomata,
Ao a na nakonako n aroia mwaane aika mataki,+
Ibukina bwa a bure nakon Iehova.+
18 E aki kona aia tirewa ma aia koora ni kamaiuia ni bongin unin Iehova ae korakora.+
Bwa e na kabuekaki te aonnaba ni kabutaa n ain ingaingan nanona,+
Ibukina bwa e na karokoa te kamaunaaki, eng ae rangi ni korakora, i aoia kaain te aonnaba ni kabane.”+
2 Imwain ae e kakororaoaki te moti,
Imwain ae e a bunginako te bong n aroni kunin te uita,
Imwain rokon uraraken unin Iehova i aomi,+
Ao imwain rokoni bongin unin Iehova i aomi,
3 Kam na ukoukora Iehova+ ngkami ni kabane aika kam nimamannei* n te aonnaba,
Aika kam kakairi n ana tua* aika raraoi.
Ukoukora te raoiroi ao ukoukora te nimamannei.*
Tao ane kam na karabaaki iai ni bongin unin Iehova.+
4 Bwa e na riki Kaata bwa te kaawa ae kitanaki,
Ao e na kamaroaeaki Atikeron.+
5 “Ke e reke kaia te koraki aika maeka n te aono are i mataniwin te aba, ae te natannaomata aika taiani Keritaite!+
E ekingkami nako ana taeka Iehova.
Ngkoe ae Kanaan ae abaia I-Biritia, N na boni kamaunako,
Bwa e aonga n akea kaaim temanna n tiku.
6 Ao e na riki te aono are i mataniwin te aba bwa taian tawaana,
Ma mwanibwa ibukia taani kawakintiibu, ao ooia tiibu aika taian atibu.
7 E na riki bwa aia aono nikiraia tibun Iuta,+
Ike a na amwamwarake iai.
A na wene n autin nako Atikeron n te tairiki,
Bwa e na mutiakinia* Iehova ae Atuaia,
Ao e na ikotiia ni kaokiia aia taenikai.”+
8 “I a tia n ongo ana kabuakaka Moaba+ ao aia kaunun tibun Ammon,+
Ake a kakanikoia au aomata ao ni kamoamoa n ekaanako aia aono.+
9 Mangaia ae ngkai bon iai ngai,” bon ana taeka Iehova ae Atuaia taanga ni buaka,* ae Atuan Iteraera,
“E na riki Moaba bwa ai aron Totom,+
Ao tibun Ammon bwa ai aroni Komora,+
Ae nnen aroka aika kateketeke, te mwarua ae tarika, ao te aba ae aki kona ni maekanaki n aki toki.+
A na kuribwaiaki irouia nikiraia au aomata,
Ao a na tauaki aia tabo irouia nikiraia au natannaomata.
10 Anne ae e na reke irouia bwa mwin nanorietaia,+
Ibukina bwa a kakaniko ao ni karietataia n ekiianako ana aomata Iehova ae Atuaia taanga ni buaka.
11 E na kamimi ma ni kakamaaku Iehova irouia,
Bwa e na kakeai bongaia* atuan nako te aonnaba,
Ao a na bane aia abamwakoro natannaomata ni bobaraaki* nakoina,+
Teuana ma teuana mani nneia.
12 Ao ngkami aika I-Itiobia, kam na kamateaki naba n au kabaang.+
13 E na arora baina nako meang ao ni kamauna Aturia,
Ao e na kamaroaea Ninewe+ n aron te rereua ae mwauteretere.
14 A na wene i nanon neiei nanai ni man, aika aeka ni man ni kabane aika moaanti.*
E na tiku iai n te tairiki te berikan* ma te man ae te baokubain i buakoni bouan neiei aika bwaka.
E na anene te bwanaa n te kamaama.
E na iai mwin te uruaki n te kawai n rin,
Bwa e na kaotii raubabana aika tiira.
15 Aei bon te kaawa ae kamoamoa ae tekateka ma te mweraoi,
Ao e taku i nanona neiei, ‘Boni ngai ao akea riki temanna.’
E a riki kangaa bwa te bwai ni kakamaaku,
Ao aia tabo ni wene maan aika moaanti!
A na katiitii aomata nako ake a rirarikin neiei, ao ni kateitea aia timoi.”+
3 Ke e reke kain te kaawa ae karitei, e kabarekaaki, ao e karawawataa te aba!+
2 E aki kan ongo neiei n te bwanaa teuana,+ ao e aki butimwaea te reirei ni kaetieti teuana.+
E aki onimakina Iehova+ ao e aki kaania ma Atuana.+
3 Bon raian aika bekorara tokan neiei ake a mena i nanona.+
Boni kameaanti n te bong ana tia motikitaeka neiei.
A aki katuka te ri naba teaina bwa a na kangkantia n te ingabong.
4 Boni mwaane aika akiako ma ni mwamwanaa te aba ana burabeti neiei.+
5 E raoiroi Iehova i nanon te kaawa, ao akea te bure ae e karaoia.+
N te ingabong ae koraki ao e kaotii ana moti,+
Bwa a aki kabwaka n aron ootan te ngaina.
Ma e aki mamaamaa te aomata ae aki raoiroi.+
6 “I kamaunaia natannaomata, ao a tiku n aki kaainaki aia taua ake ni maninganingan te oo.
I urui kawaia bwa e aonga n akea temanna ae e na mwananga rinanoia.
A a tiku aia kaawa n uruaki ao akea te aomata iai, ao ai akea kaaia.+
7 I taku, ‘Ane ko na boni maakai ao ko na butimwaea te reirei ni kaetieti,’*+
Bwa e aonga n aki kamaunaaki ana tabo ni maeka neiei.+
I riai ni kaeta taekan neiei ibukini* baikai ni kabane.
Ma a rangi n ingainga riki ni karaoa ae buakaka.+
8 ‘Mangaia ae teimatoa ni kantaningaai,’*+ bon ana taeka Iehova,
‘Ni karokoa te bong are I teirake iai bwa N na anai bwaai ni kuri,*
Bwa au moti, N na bon ikotiia natannaomata ao N na ikotiia tautaeka n uea,
Bwa N na kabwaroa i aoia bonon nanou, ae uraraken uniu ni kabane.+
Bwa e na kabuekaki te aonnaba ni kabutaa n ain ingaingan nanou.+
9 Bwa n te tai anne ao N na bita aia taetae botannaomata nakon te taetae ae itiaki,
Bwa a aonga n taboa aran Iehova,
10 A na uota te bwaintituaraoi nakoiu man aononi karaanga ake i Itiobia,
Te koraki ake a bubutii nakoiu, ae te aine are natiia au aomata aika kamaenakoaki.+
11 Ko na aki kamaamaeaki n te bong
Ibukin am mwakuri ni kabane ake ko karitei iai nakoiu,+
Bwa n te tai anne N na kamwaawaia mairoum taani kamoamoa aika kainikatonga,
Ao ko na aki manga kainikatonga riki n au maunga ae tabu.+
12 N na kariaia te natannaomata ae nanorinano ma ni mangori bwa e na tiku iroum,+
Ao a na kamanoia n aran Iehova.
13 A na aki kakaraoa ae buakaka+ nikiraia tibun Iteraera.+
A na aki taekina te kewe ao e na aki naba kuneaki te newe ae mwamwanaa te aba i wia.
A na amwarake ao ni wene, ao akea temanna ae e na kakamaakuia.”+
14 Takarua ni kimwareirei ngkoe ae natin Tion te aine!+
Takarua n tokanikai ngkoe ae Iteraera!
Kimwareirei ao kakatonga ma nanom ni kabane ngkoe ae natin Ierutarem te aine!+
15 E a tia Iehova ni kanakoa mairoum te motikitaeka n ekikonako.+
E a tia ni katannakoia aiam.+
E memena iroum Iehova ngkoe ae Uean Iteraera.+
Ko nang aki manga maaka te kabuanibwai teuana.+
16 N te bong anne ao e na taekinaki ae kangai nakon Ierutarem:
“Tai maaku ngkoe ae Tion.+
Tai kabwakai baim.
17 E memena Iehova ae Atuam iroum.+
E na kakamaiu ngkai boni ngaia Teuare korakora.
E na kakatonga ibukim ma te kimwareirei ae bati.+
E na kainabwabu* n ana tangira.
E na kimarimari ibukim ma te takarua ni kimwareirei.
18 N na ikotiia te koraki ake a nanokawaki ngkai a aki irii am toa.+
A aki roko iroum ibukina bwa a kabuakakaaki ibukin neienne.+
19 Noria! N te tai anne ao N na ekiianako te koraki ni kabane ake a karawawatako.+
N na karikiia bwa te bwai ni kamoamoaaki ao ni karekei atongaia*
N aaba nako ake a kamaamaeaki iai.
20 N te tai anne ao N na kariningkami,
N te tai are I ikotiingkami iai ni kabane.
Bwa N na karekei atongami* ao ni karikingkami bwa te bwai ni kamoamoaaki+ i buakoia botannaomata ni kabane n te aonnaba,
Ngkana I ikotiia ni kaokiia i matami ami koraki ake a taenikai,” bon ana taeka Iehova.+
Ae nanona, “E a Tia Iehova ni Karabaa (Kaikoa).”
N taraana boni bwaai ke mwakuri aika irekereke ma taromauriani bouannanti.
Ke, “mwin.”
Ke, “kaokoroia ibukin te Atua.”
Ke “bwia; nangoa.” Tao baon ana kaintokanuea te uea.
N taraana mwakoron Ierutarem ae uakaan ma te Mataroa n Ika.
Ebera, “kainabwabuaki.”
Ebera, “te koraki ake a aki kakammwakuri i aon tangkongkoia,” n aron are n te bukibuki ni wain.
Ke, “e ienikuri n roko!”
Ebera, “kanoannanoia.”
Ke, “aomata aika nanorinano.”
Ebera, “ana moti.”
Ke, “te nanorinano.”
Ke, “ni kirokiron te tawanou.”
Ke, “e na tabeakinia.”
Ke, “Tabaota.” Nora Nanon Taeka.
Ke, “kabakiia.”
Ke, “taromauri.”
Ebera, “aia man ni kabane te natannaomata.”
Nora Nanon Taeka, “Maan.”
Nora Nanon Taeka.
Ke, “te kaetaki.”
Ke, “katuuaaea neiei ibukini.”
Ke, “taotaona nanom n taningaai.”
Ke tao, “teirake bwa te tia kaotioti.”
Ebera, “toro irouna ma te anga teuana i rarikin te anga teuana.”
Ke, “aki karongoa; rau; rauaki.”
Ebera, “araia.”
Ebera, “arami.”