BWAEBWAETI
א [Areba]*
1 E a tekateka kangaa n tii ngaia, te kaawa are onrake ngkoa irouia aomata!+
E a riki kangaa bwa te aine ae e a tia ni mate buuna, neiere kau aomata ngkoa i buakoia natannaomata!+
E a tautoronaki kangaa neiere te natinuea te aine ngkoa i buakon taian aono!*+
ב [Beta]
2 E korakai n tang neiei n te bong,+ ao a rabunaki tabana n rannimatana.
Akea temanna i buakoia naake ana tangira ni kabane ae mena ikanne bwa e na kabebetea.+
A bane ni kamwanea naake bon raoraona,+ a a riki bwa taani kairiribai nakoina.
ג [Kimera]
3 E kairakinako Iuta bwa te taenikai+ i aan te rawawata ao te tautoronaki ae korakora.+
E riai ni maeka i buakoia natannaomata neiei,+ ao e aki reke irouna te tabo ni motirawa.
A bane n ooia taani bwainikirinna ngke e rawawata.
ד [Tareta]
4 A tanginiwenei taiani kawai nako Tion, ibukina bwa akea ae e roko n te toa.+
A bane ni kamaroaeaki mataroan oon neiei,+ ao a a ikenrawa ana ibonga.*
A nanokawaki ainena aika tuai ni boo ma mwaane,* ao e a korakai ni maraki neiei.
ה [Ee]
5 A a riki ngkai taani kakaitaraa neiei bwa ai ana toka,* ao akea tabeaiangaia taani kairiribai nakoina.+
Bwa e karokoa te nanokawaki Iehova iroun neiei ibukin ana bure aika bati.+
A kairakinako natina bwa taenikai imwain te tia kakaaitara.+
ו [Wau]
6 E a kitana natin Tion te aine te tamaroa ni kabane.+
Titeboo ana toka ma taian ria mwaane, ake e aki reke aia tawaana,
Ao a rianna ma te kua imwain te tia kaeiia.
ז [Taiin]
7 Ni boong ake e karawawataaki iai Ierutarem ao ngke akea mwengana, ao e a uringi
Bwaai ni kabane aika rangi ni kakawaki ake ana bwai ngkoa ni boong ake rimoa.+
Ngke a bwaka ana aomata neiei nako nanoni bain te tia kakaaitara ao ai akea te tia buokia,+
Ao a nora neiei taani kakaaitara, ao a ngareakinna* ngke e bwaka.+
ח [Eta]
8 E karaoa te bure ae kakaiaki Ierutarem.+
Anne bukina ae e a riki iai neiei bwa te bwai ae riribaaki.
Naake a taneiai ngkoa ni karinea neiei, a a iangoia bwa te bwai ae rangi n ribaaki, bwa a nora bwain rabwatana ae riai ni karabaaki.+
E ngirangira+ ao e rairakinako ma te maamaa.
ט [Teta]
9 E mena kamwaraan neiei n ririna.
E aki iangoi taai aika a na roko ibukina.+
E kakubanako bwakana, ao akea temanna ae kabebetea.
Iehova, nora karawawataau, bwa e a kamoamoaa i bon irouna te tia kairiribai.+
י [Iote]
10 E kaaki baina te tia kakaaitara i aoni kaubwain neiei ni kabane.+
Bwa e noriia natannaomata neiei aika rinnako n ana tabo ae tabu,+
Ake te koraki ake ko tua bwa a aki riai n rinnako i buakon am botaki n aomata.
כ [Kabe]
11 A bane n ikenrawa ana aomata neiei, ao a ukoukora te amwarake.+
A anga aia bwai aika kakawaki ibukin te amwarake bwa a aonga n teimatoa ni maiu.
Iehova, taraia ao noria bwa I a riki bwa te aine* ae akea manenana.
ל [Rame]
12 Akea manenana iroumi ngkami ni kabane aika kam mwananga n te kawai?
Taraia ao noria!
Iai te maraki teuana ae ai aron te maraki are I anganaki,
Are e karawawataai iai Iehova ni bongin uraraken unna?+
מ [Mem]
13 E kanakoa te ai nako nanon riiu man te tabo ae rietata,+ ao e kataenikai ni kabane.
E taakina te karaun imwaini waeu, ao e kairoroai bwa N na biri n oki rikaaki.
E karikai bwa te aine ae kitanaki.
I aoraki ni kabongnga.
נ [Nun]
14 A kabaeaki au bure n aron te amo, a ikotaki ni kabaeaki ni baina.
A katokaaki i aon roroau, ao ai akea korakorau.
E anga ngai Iehova nako nanoni baia te koraki aika I aki kona ni kaaitaraia.+
ס [Tameka]
15 E tewenakoia Iehova au aomata ni kabane aika korakora ake a mena i nanou.+
E wetea te botaki n aomata n ekainako, bwa a na kamaunaia au rorobuaka n ataei.+
E a tia Iehova n toutoua natin Iuta te aine ae tuai ni boo ma te mwaane, n te nne ni kamanti kureebe.+
ע [Aiin]
16 I tang ibukini baikai,+ ao a tiinako rannimatau.
Bwa e raroanako mairou ane e kona ni kabebeteai, ke ni kamarurungai.
A kitanaki natiu mwaane, bwa e a tokanikai te tia kairiribai.
פ [Be]
17 E arori baina Tion.+ Akea temanna ae e na kabebetea neiei.
E tua Iehova nakoia te koraki nako ake i rarikin Iakoba, bwa a na riki bwa taani kakaitaraa.+
E a riki Ierutarem irouia bwa te bwai ae riribaaki.+
צ [Tiate]
18 E raoiroi Iehova,+ bwa I karitei n ekinako ana tua.*+
Ongora ngkami aika botannaomata ni kabane, ao nora marakiu.
A a irinako bwa taenikai au ataeinnaine aika tuai ni boo ma mwaane,* ao au rorobuaka n ataei.+
ק [Kobi]
19 I wewete nakoia naake au tangira, ma a kamwaneai.+
A a mate au ibonga ao au unimwaane n te kaawa,
Ngke a tabe ni kakaaea te amwarake bwa a aonga n teimatoa ni maiu.+
ר [Reti]
20 Noria ngkoe ae Iehova, bwa e a korakora rawawatau.
E a kokoaa nanou.*
E a uruaki nanou bwa I boni karitei.+
E kamamate te kabaang i tinaniku,+ ao kaanga ai aron te mate i nanon te auti.
ש [Tiin]
21 A ongo ikenrawau aomata ao akea temanna ae e na kabebeteai.
A ongo karawawataau taani kairiribai nakoiu ni kabane.
A kimwareirei ibukina bwa ko karekea.+
Ma ko na karokoa te bong are ko taekinna,+ ike a nang riki iai n ai arou.+
ת [Tau]
22 A bia roko i matam buakakaia ni kabane, ao ko bia katuuaaeia n te aro ae korakora,+
N aron are ko katuuaaeai n te aro ae korakora ibukin au bure ni kabane.
Bwa a bati ngirangirau, ao e aoraki nanou.
א [Areba]
2 E a rabuna kangaa natin Tion te aine Iehova n nangin unna!
E kabwakaa tamaroan Iteraera mai karawa nakon te aonnaba.+
E aki uringa nneni katokaani waena+ ni bongin unna.
ב [Beta]
2 E kabwauti Iehova nnen Iakoba ni maeka ni kabane, n akea ana nanoanga.
E kabwakai n unna ae korakora ana tabo natin Iuta te aine aika nonoaki.+
E karuoa rikaaki nako aontano te tautaeka n uea+ ma tokan neiei,+ ao e kamwaraea.
ג [Kimera]
3 E koreaanako korakoran* Iteraera ni kabane n uraraken unna.
E kaoka baina ae te atai ngke e a roko te tia kairiribai.+
Ao e teimatoa n urarake unna nakon Iakoba n aron te ai ae kabueki bwaai ni kabane aika i rarikina.+
ד [Tareta]
4 E kabwaoua* ana kainikatebe n aron te tia kairiribai. E a tauraoi baina ni buaka ae te atai kaanga te tia kakaaitara,+
E teimatoa ni kamateia ni kabane te koraki ake a tatangiraki ni maata.+
Ao e kabwaroa unna n aron te ai+ nako nanon ana umwanrianna natin Tion te aine.+
ה [Ee]
5 E a riki Iehova bwa kaanga te tia kairiribai.+
E kabwauta Iteraera.
E kabwauti ana taua ni kabane.
E kamaunai ana tabo ni kabane aika nonoaki.
Ao e karika te tanginiwenei ma te bwaebwaeti ae bati i nanon natin Iuta te aine.
ו [Wau]
6 E urua ana umwanrianna+ n aron te auti ae mena n te onnaroka.
E a karokoa n tokina* ana toa.+
E karika Iehova te toa ao te bongi n taabati bwa e na mwanuokinaki i Tion,
Ao e aki mutiakina te uea ma te ibonga* n unna ae korakora.+
ז [Taiin]
7 E rawa Iehova nakon ana baonikarea.
E kaaki taekan ana tabo ae tabu.+
E kataenikai oon tauan neiei aika nonoaki, nako nanoni bain te tia kairiribai.+
A kanenei bwanaaia n ana auti Iehova,+ n aron are ni bongin te toa.
ח [Eta]
8 E motika nanona Iehova bwa e na kamauna oon natin Tion te aine.+
E katika te kora ni baire.+
E aki tautaua baina mani karokoan te kamaunanakoaki.*
Ao e karaoa te nono ni buaka ma te oo bwa a na tanginiwenei.
A a uaia ni kamamaraaki.
ט [Teta]
9 A iinako mataroan oon neiei i buakon te tano.+
E kamaunai kaini kamatoaan neiei ao e urui.
E mena ana uea neiei ma tokana i buakoia natannaomata.+
Akea te tua,* ao e aki naba reke irouia ana burabeti neiei te miitara mairoun Iehova.+
י [Iote]
10 A tekateka i aontano ni kainabwabu ana unimwaane natin Tion te aine.+
A kaaurakea te tano nako aon atuia ao a kunnikainia n te raerobwa.*+
A kabaraaki atuia nako aontano ainen Ierutarem aika tuai ni boo ma mwaane.
כ [Kabe]
11 A kakaii matau n te tang.+
E a kokoaa nanou.*
E a kabwaroaki atou i aontano ibukini bwakan te aine* ae natiia au aomata,+
Ao ibukia naati ma merimeri aika tabe ni mauna ni maraen nako te kaawa.+
ל [Rame]
12 A teimatoa n titirakinia tinaia ni kangai, “E nga te uita* ma te wain?”+
Ngke a a tabe ni mauna n aron te aomata ae ikoaki ni maraen nako te kaawa,
Ngke e nang tabe ni bua maiuia* i mwanokani bain tinaia.
מ [Mem]
13 Tera ae I kona ni kabongana bwa te bwai ni kakoaua,
Ke tera ae I kona ni kabotauko ma ngaia ngkoe ae natin Ierutarem te aine?
Tera ae I kona ni kabotauko ma ngaia ni kabebeteko, ngkoe ae natin Tion te aine ae tuai ni boo ma te mwaane?
Bwa e raababanako uruakim n aron taari.+ Antai ae kona ni kamarurungko?+
נ [Nun]
14 A kewe miitara ake a nori am burabeti ibukim ao akea nanoia,+
Ao a aki kaotaraea am kairua bwa ko aonga n aki kairakinako bwa te taenikai,+
Ma a teimatoa ni miitarai ibukim taeka aika kewe ao ni bureburea te aba.+
ס [Tameka]
15 A ubouboi baia ma te kakaniko nakoim te koraki ni kabane ake a mwananga n te kawai.+
A katiitii ma te kubanrou+ ao a ioioi atuia nakon natin Ierutarem te aine ni kangai:
“Aio te kaawa are a taekinna ni kangai, ‘E kororaoi tamaroana, ae kimwareireia kaain te aonnaba ni kabutaa’?”+
פ [Be]
16 A bane ni kaurei wia nakoim taani kairiribai nakoim.
A katiitii ao a tenai bukini mwangaia ao a kangai: “Ti kabwauta neiei.+
Aio te bong ae ti a kamani kariariaa!+ E a roko, ao ti a noria!”+
ע [Aiin]
E ururu n akea ana nanoanga.+
E kariaia te tia kairiribai bwa e na kataenikaiko ao ni kimwareirei. E karietataa korakoraia* taani kakaaitarako.
צ [Tiate]
18 A tang n takarua nanoia aomata nakon Iehova, ngkoe ae oon natin Tion te aine.
Ke a waanako rannimata n aron te karaanga ni ngaina ao ni bong.
Tai kamotirawako ao tai angani matam* te motirawa.
ק [Kobi]
19 Teirake! Ko na tang n takarua n te bong, ni moanakin te tai n tei n tantani.
Bunra nanom ni kabwaroa n aron te ran i matan Iehova.
Tabeki baim nakoina ibukini maiuia* natim,
Ake a a tabe ni mauna ibukin te rongo i tutani kawai nako.*+
ר [Reti]
20 Iehova, noriia ao taraiia am aomata ake ko katuuaaeia n te aro ae korakora.
A riai aine n teimatoa ni kang oin natiia,* ake natiia aika marurung ake a bungia,+
Ke a riai ibonga ma burabeti n tiringaki n ana tabo ae tabu Iehova?+
ש [Tiin]
21 A wene ni mate i aontano n taiani kawai te rorobuaka n ataei ao te unimwaane.+
A bwaka n te kabaang au ataeinnaine aika tuai ni boo ma mwaane,* ao au rorobuaka n ataei.+
Ko kamamate ni bongin unim, ao ko tiritiri n aki nanoanga.+
ת [Tau]
22 Ko wetea te maakunrang man taabo aika kakaokoro nako n aron ae kaanga ibukini bongin te toa.+
Akea temanna ae rabanako ke n reke maiuna ni bongin unin Iehova.+
Te koraki ake I bungia* ao ni kaikawaiia, a kamaunaaki iroun te tia kairiribai nakoiu.+
א [Areba]
3 Bon te mwaane ngai ae I nora te karawawataaki ibukina bwa e katuuaaeira te Atua n unna ae korakora.
2 E kakioainako ao e kanakonakoai n te rotongitong ao tiaki n te oota.+
3 Ni koauana, e okioki n ekainako ni baina ni kabongnga.+
ב [Beta]
4 E kamraraa irikou ma kuniu,
Ao e ototei riiu.
5 E otabwaniniai ao e katobibiai n te boitin ae kamamate+ ao n te kangaanga.
6 E taumatoaai ni katekatekaai n taabo aika roo, n aroia aomata aika mate ngkoangkoa.
ג [Kimera]
7 E kaakai i nanon te oo bwa I aonga n aki kona ni birinako,
E kabaeai ni bwaai ni kabaewae aika tinebu aika taiani buraati.+
8 Ao ngke I tang ni korakai ni kani buokaki ao e rawa nakon* au tataro.+
9 E bonotii kawaiu n atibu aika ekeaki,
E kabwaouai kawaiu.+
ד [Tareta]
10 Titeboo ngaia ma te bea ae karanai, ao te raian ae tataningaai bwa e na ewekai.+
12 E a tia ni kabwaoua* ana kainikatebe, ao e karikai bwa N na maaireaki ni kanoan te kainikatebe.
ה [Ee]
13 E ewari au kirine ni kanoan ana kainikatebe* ake a mena ni nneia.
14 I a riki bwa te bwai ni ngareakinaki irouia botannaomata ni kabane, ao mwaneweni kunaia ni kabongnga.
15 E kaonai ni baika mangingi, ao e katibutauaai n te kai ae mao.+
ו [Wau]
16 E kabwakai wiu n te kirikiri,
Ao e karaoai bwa N na kawakawa i buakon te mannang.+
17 Ko taua mairou te rau, ao I mwaninga te bwai ae raoiroi.
18 Mangaia are I kangai: “E a mauna karineau, ao kantaningaan naba Iehova irou.”
ז [Taiin]
19 Uringa rawawatau ao arou ngke akea mwengau,+ ma te kai ae mao ao te boitin ae kamamate.+
20 Ko* na bon uringnga ao ni baraaki n taraai.+
21 I ururinga te baei i nanou, ao anne bukina ae N na kaota iai te nano ni kan tataninga.+
ח [Eta]
23 A boou ni katoa ingabong.+ E bati am kakaonimaki.+
24 I* taku, “Bon tibwangau Iehova,+ ao anne bukina ae N na kaota iai te nano ni kan tataningaia.”+
ט [Teta]
25 E raoiroi Iehova nakon ane e kabotoa ana kantaninga i aona,+ nakon te aomata* ae teimatoa n ukoukoria.+
26 E raoiroi kantaningaan ana kakamaiu Iehova+ ma te kainabwabu.*+
27 E raoiroi iroun te aomata bwa e na uota te amo n ana tai n roro n rikirake.+
י [Iote]
28 Ke e tekateka n tii ngaia ma n teimatoa ni kainabwabu ngkana e a katokaa i aona te uota ae rawawata te Atua.+
29 Ke e bobaraaki i aontano,+ bwa tao e na iai te kantaninga.+
30 Ke e anga tabana nakon ane e oreia, ao ke e kaonaki n te kamaamaeaki.
כ [Kabe]
31 Bwa e na aki tewenakoira Iehova n aki toki.+
32 E ngae ngke e a tia ni karekea te nanokawaki, ma e na bon nanoanga naba ni kaineti ma ana tangira ae koaua* ae rangi ni bati.+
33 Bwa tiaki nanona ni kani karawawataia natiia aomata ke ni kananokawakiia.+
ל [Rame]
34 Kamanatuaakia aomata ni kabane aika taiani bure aika n te aonnaba, i aani waen te aomata temanna,+
35 Tauan te kaetitaeka ae riai mairoun te aomata i matan Teuare Moan te Rietata,+
36 Ao babakanikawaian te aomata n ana tangitang,
Boni baika e aki kona ni kariaia Iehova.
מ [Mem]
37 Antai ngkanne ae kona n taetae ao e a riki naba, ngkana e aki tua Iehova?
38 A aki uaia n otinako mai win Teuare Moan te Rietata
Baika bubuaka ao baika raraoi.
39 E aera ngkai e riai te aomata ae maiu ni ngurengure ni kangaanga aika riki bwa mwin ana bure?+
נ [Nun]
40 Ti bia neneri ao n tuoi raoi kawaira,+ ao ti bia okira Iehova.+
41 Ti bia bubutiia te Atua are i karawa ma nanora ae koaua, ao n tabeki baira+ ni kangai:
42 “Ti a tia ni bure ao ni karitei,+ ma ko tuai ni kabwarai buure.+
ס [Tameka]
44 Ko tuka kawaram n te nang, n te aro are a aikoa kona ara tataro n ribuakona.+
45 Ko karaoira bwa kaanga maange ao baika akea manenaia i buakoia botannaomata.”
פ [Be]
46 A bane taani kairiribai nakoira ni kaurei wia n ekiranako.+
47 A a riki bwaai ni kakamaaku ma taiani mwarua, ao te kamaroaeaki ma te uruakaki,+ bwa tibwangara.+
48 A waanako mai matau raan aika raanga ibukin uruakin te aine ae natiia au aomata.+
ע [Aiin]
49 A teimatoa n tiinako rannimatau, ao a aki kona ni katokaki,+
50 Ni karokoa ae e taraa naano Iehova ao n noria mai karawa.+
51 A karika nanokawakiu matau, ibukia aine ni kabane aika natin au kaawa.+
צ [Tiate]
52 A kaeai n akea bukina taani kairiribai nakoiu n aron te mannikiba.
53 A karokoa n tokina maiuu i nanon te mwarua, ao a teimatoa ni karekareai n taian atibu.
54 E bwaro te ran i aon atuu, ao I taku: “E a bon tia arou!”
ק [Kobi]
55 I wetea aram ngkoe ae Iehova, mai kabin te mwarua.+
56 Ongo bwanaau, ao tai kaina taningam nakon tangiu ni kani buokaki, ibukini kabebeteau.
57 Ko kaan n te bong are I weteiko iai. Ko taku: “Tai maaku.”
ר [Reti]
58 Ko tei ibukiu ngkoe ae Iehova, ao ko a manga kabooa maiuu.+
59 Ko nora te kairua ae karaoaki nakoiu ngkoe ae Iehova, taiaoka anganai te kaetitaeka ae riai.+
60 Ko nora aron nako aia karekekai, ma aia babaire ni kabane n ekainako.
ש [Tin] ke [Tiin]
61 Ko ongo aia kakaniko, ngkoe ae Iehova, ao aia babaire ni kabane n ekainako,+
62 A kabongnga taani kakaitaraai n ekainako n aia taeka ma aia wirikiriki.
63 Taraiia, a bwainingareai ni kunaia ngkana a tekateka ke ngkana a tei!
ת [Tau]
64 Ko na angania booni mwin aia mwakuri, ngkoe ae Iehova.
65 Ko na kamatoatoai nanoia, bwa kaanga anne rekenikaia iroum.
66 Ko na ukoukoriia n unim ao ko na kamaunaia mai aan ana karawa Iehova.
א [ʼAreba]
4 E a maabubu kangaa te koora ae raneanea, ae te koora ae raoiroi!+
A a raea kangaa atibu aika tabu*+ i tutani kawai nako!*+
ב [Beta]
2 Ni kaineti ngkanne ma mwaane ake natin Tion aika rangi ni kakawaki, ake a tauaki rawawataia ngkoa ni kabotauaki ma* te koora ae kaitiakaki,
A a iangoaki kangaa bwa mwangko aika taiani kaatibu,
Ae ana mwakuri bain te tia karaomwangko!
ג [Kimera]
3 A kammammaia naba natiia taian tiakaore,*
Ma e tiritiri te aine ae natiia au aomata,+ n ai aron te aotireti* n te rereua.+
ד [Tareta]
4 Ao newen te teei ae kammammaaki e nimta ngangarakena ibukin te taka.
A bubutii te amwarake ataei+ ma akea temanna ae angania naba teutana.+
ה [Eeʼ]
5 A wene ni baki* i nanoni kawai te koraki ake a amwamwarake raraoi ngkoa.+
A wene i aon te bwariko ni mannang te koraki ake a kaikawaaki ni kunnikaia aika uraroo.+
ו [Wau]
6 E korakora riki katuuaaean* te aine ae natiia au aomata nakon te katuuaa ibukin ana bure Totom,+
Are e kamaunaaki n teuana te tekan, ao akea temanna ae buokia.+
ז [Taiin]
7 A itiaki riki ana Natiraite+ nakon te tino, ao a mainaina riki nakon rannimamman te man.
A ribaura riki nakon te ane,* ao titeboo ngaiia ma te tabeiro* ae karaneaneaaki.
ח [Eta]
8 A rotongitong riki taraaia nakon te mannang.*
A aikoa kinaaki i nanoni kawai.
A mwautakataka kunia i aon riia,+ ao e a riki n ai aron te kai ae mwauteretere.
ט [Teta]
9 A kabwaia riki naake a mate n te kabaang nakoia naake a mate n te baki,+
Ake te koraki ake a mamaara, ake a ewaraki ibukin akean te amwarake man te tawaana.
י [Iote]
10 A kaburoia oin natiia baia aine ake a atataiaomata.+
A a riki bwa kanaia n tanginiwenei n taini bwakan te aine are natiia au aomata.+
כ [Kabe]
11 E a kaota unna Iehova,
Ao e kabwaroa uraraken unna.+
Ao e kauraa te ai i Tion are e kabueki aan neiei.+
ל [Rame]
12 A aki kakoauaa ueea aika n te aonnaba ao taani maeka ni kabane n te aba ae maiureirei,
Ae e na rin te tia kakaaitara ao te tia kairiribai ni mataroan oon Ierutarem.+
מ [Mem]
13 E riki anne ibukin aia bure ana burabeti neiei, ao aia kairua ana ibonga,*+
Ake a katutui raraaia aomata aika raoiroi ake a maeka i nanona.+
נ [Nun]
14 A tiotionako i nanoni kawai n ai aroia mataki.+
A kabarekaaki n te raraa,+
N te aro are akea temanna ae kona n ringi aia kunnikai.
ס [Tameka]
15 A takarua nakoia ni kangai: “Naako! Kam kamwara! Naako! Naako! Tai ringira!”
Bwa a riki n akea mwengaia ao a tiotionako.
A taku aomata i buakoia natannaomata: “A aki kona n tiku ma ngaira ikai.*+
פ [Be]
16 E kamaenakoia ubun Iehova.+
E nang aki manga taraiia ma te nanoanga.
Ao mwaane a na aki karineia ibonga,+ ao a na aki akoiia unimwaane.”+
ע [ʽAiin]
17 A a kai naba matara n taratara nako ibukin te ibuobuoki ma e matebuaka.+
Ti taratara nako ma n taratara nako ibukin te ibuobuoki mairoun te natannaomata ae aki kona ni kamaiuira.+
צ [Tiate]
18 A kaeira taani kairiribai nakoira+ mangaia are ti aki kona n nakonako ni maraen nako te kaawa.
A a kaan tokira, ao a a bane ara bong, bwa ti a roko n tokira.
ק [Kobi]
19 A birimwaaka riki taani kaeira nakoia ikare aika i karawa.+
A kakioira i aoni maunga ao a kakaran imwaira n te rereua.
ר [Reti]
20 E a bwaka i nanon aia mwarua ae bubura+ te ikeike ae te maiu, ae ana kabiraki Iehova,+
Are teuare ti taekinna ni kangai: “Ti na maeka i aan nuuna i buakoia natannaomata.”
ש [Tin]
21 Ko na kakatonga ma ni kimwareirei ngkoe ae natin Etom te aine,+ n arom ni maeka n te aba ae Uti.
Ma e na rirarikim naba te mwangko,+ ao ko na koro ni manging ao ko na kaota bwain rabwatam ae riai ni karabaaki.+
ת [Tau]
22 E a roko n tokina katuuaaeam ibukin am kairua, ngkoe ae natin Tion te aine.
E na aki manga kairikonako teuanne nakon te taenikai.+
Ma e na rairakia am kairua, ngkoe ae natin Etom te aine.
E na kaotii am bure.+
5 Iehova, uringa te baere e a tia ni bwakarira.
Taraa ao nora bwaibwainrangira.+
2 A anganaki ianena tibwangara, ao iabatera ara auti.+
3 Ti a riki bwa ataei aika a a tia ni mate ara karo ao akea tamara, ao tinara ai aroia aine ake a a tia ni mate buuia.+
4 Ti riai ni kabooa moira ni bon oin ara ran,+ ao e a kabooaki naba ae bon oin ara aia.
5 A a mena i roroara taani kaeira,
Ti a nimamate ma ti aki anganaki te motirawa.+
6 Ti arora baira nakon Aikubita+ ao nakon Aturia+ bwa e aonga n reke te kariki ae tau ibukini kanara.
7 Ai akea ara bakatibu ake a karaoa te bure, ma ti riai n uouotii aia kairua.
8 A tautaeka ngkai i aora tooro, ao akea temanna ae e na buritiira mai nanoni baia.
9 A a ruanikai maiura* ibukini karekeani kanara,+ ibukin te kabaang are n te rereua.
10 A a kabuebue kunra n ai aron te nne ni kanaiai, ibukin te baki ae korakora.+
11 A kabwainrangaki* buuaine ake i Tion, ao aine ake ni kaawa ake i Iuta ake a tuai ni boo ma mwaane.+
12 A katineaki tooka ni baia,+ ao a aikoa karineaki unimwaane.+
13 A uouota te atibu ni kamantinti rorobuaka n ataei, ao a tatanako ataeinimwaane ibukin uotaia te aia ae tinebu.
14 A a nako unimwaane mani mataroan te kaawa,+ ao a aikoa katangitang rorobuaka n ataei.+
15 E a nako te kimwareirei mai nanora, ao e a onikaki ara mwaie nakon te tanginiwenei.+
16 E a bwaka te baunuea mai atura. E a reke kaira ibukina bwa ti a tia ni bure!
17 Ibukin aei ao e a aoraki nanora,+
Ao ibukini baikai ao a a rikirake ni maabubu matara,+
18 Ibukin te Maunga ae Tion are e a aki kaainaki,+ ao a aiwaa ngkai i aona taian arobeke.*
19 Iehova, ko tekateka n te kaintokanuea n aki toki.
Ao ai uana nako naba am kaintokanuea man te rorona nakon te rorona.+
20 E aera ngkai ko mwanuokinira n aki toki, ao ni kaaki taekara i nanon te tai ae rangi ni maan?+
21 Kaokira nakoim ngkoe ae Iehova, ao ti na tauraoi n okiriko.+
Kabooui ara bong n aron ake ngkoa.+
22 Ma ko a bon rawa nakoira.
Ao e teimatoa ni korakora unim iroura.+
Mwakoro 1-4 bon taian anene ni bwaebwaeti aika baireaki n rinanin te man ni wareware n te taetae n Ebera.
Ke, “aono aika tautaekanaki.”
Nora Nanon Taeka.
Ke, “ateiainena.”
Ebera, “atuna.”
Ke, “kakatonga.”
E taekinaki Ierutarem bwa aongkoa te aine.
Ebera, “wina.”
Ke, “au ateiaine.”
Ebera, “kanoannanou.”
Ebera, “koron nako.”
Ebera, “toua.”
Ke, “kamauna.”
Nora Nanon Taeka.
Ebera, “man te kabwautaki.”
Ke, “kaetieti.”
Nora Nanon Taeka.
Ebera, “kanoannanou.”
Te kario ae taekinaki iai te bwai teuana bwa aongkoa te aomata, ae tao e kaota te nanoanga ke te atataiaomata.
Ke, e kona n nanona “te baare.”
Ebera, ne’phesh, nora Nanon Taeka.
Ebera, “koroia.”
Ebera, “te aine ae natini matam.”
Ebera, ne’phesh, nora Nanon Taeka.
Ebera, “i taboni kawai ni kabane.”
Ke, “uaaia.”
Ke, “au ateiaine.”
Ke, “a marurung ngke I bungia.”
Ke, “tuka; totokoa.”
Ke tao, “karikai bwa te aba ae aki ribanaaki.”
Ebera, “toua.”
Ebera, “naati mwaane.”
Ebera, ne’phesh, nora Nanon Taeka.
Ke, “tangira ae kona n onimakinaki.”
Ebera, ne’phesh, nora Nanon Taeka.
Ebera, ne’phesh, nora Nanon Taeka.
Ke, “tataninga ma te taotaonakinnano.”
Ke, “tangira ae kona n onimakinaki.”
Ke, “atibun te tabo ae tabu.”
Ebera, “i taboni kawai ni kabane!”
Ke, “ake a rangi ni kakawaki ngkoa n ai aron.”
Nora Nanon Taeka, “Maan.”
Nora Nanon Taeka, “Maan.”
Ebera, “kamaroaeaki.”
Ebera, “ana kairua.”
Nora Nanon Taeka.
Nora Nanon Taeka, “Atibu aika rangi ni kakawaki.”
Ebera, “te roroo.”
Nora Nanon Taeka.
Ke, “ni maeka ikai bwa ianena.”
Ebera, ne’phesh, nora Nanon Taeka.
Ke, “tauaki.”
Te man ae aekakin te kamea.