NEEMIA

1 Ana taeka Neemia*+ are natin Akaria: N te namwakaina ae Kitirewi* n te ka-20 n ririki, ao I mena i Tiutian*+ ae te tabo ae nonoaki.* 2 N te tai anne ao a a roko mai Iuta, Aanani+ are temanna i buakoia tariu ma mwaane riki tabeman, ao I titirakinia taekaia nikiraia I-Iutaia ake a reke birinakoia man te kataenikaiaki,+ ao taekan naba Ierutarem. 3 A kaeka ni kangai: “A rangi ni karawawataaki ao ni bwaibwainrang te koraki ake a tiku n te aono* ikekei, ake a reke maiuia man te kataenikaiaki.+ E a uruaki oon Ierutarem,+ ao a a tia ni kabuekaki mataroan oona n te ai.”+

4 Ngke I ongo naba ngkekei taeka aikai, ao I tekateka ma n tang ao n tanginiwenei i nanon tabebong, ao I teimatoa n aki mamatam+ ma n tataro i matan Atuani karawa. 5 I taku: “Ngkoe ae Iehova ae Atuani karawa, ae te Atua ae kakannato ao ae kamimi ma ni kakamaaku, ae e kakawakina ana berita ao ni kaota te tangira ae koaua* nakoia te koraki ake a tangiria ma ni kawakin ana tua,+ 6 taiaoka ma katanimaia taningam ao a bia ure matam bwa ko na ongora n ana tataro am toro ae I tataroia nakoim n te bong aei, ni ngaina ao ni bong,+ ni kaineti ma tibun Iteraera ake am toro, ngkai I tabe ni kaotii buure ake a karaoi tibun Iteraera n ekikonako iai. Ti a tia ni bure ngai ma ana utu tamau.+ 7 Ti a bon tia ni karaoa ae buakaka n ekikonako+ n arora n aki kawakin am tua, am kaetieti, ao am moti, ake ko angan am toro are Mote.+

8 “Taiaoka ma ururinga te taeka are ko tua* nakon am toro are Mote are kangai: ‘Ngkana kam aki kakaonimaki ao N na kamaenakoingkami i buakoia botannaomata.+ 9 Ma ngkana kam okirai ma ni kakairi n au tua ao n ongeaba iai, ao e ngae naba ngkana a maenako ami aomata nako tabon aonnaba, ma N na manga ikotiia+ mai ikekei ao ni kairiia nakon te tabo are I rineia bwa e na mena iai arau.’+ 10 Bon am toro ao am aomata ake ko a manga kabooia ni mwaakam ae korakora ao ni baim ae korakora.+ 11 Taiaoka ma katanimaia taningam ngkoe ae Iehova nakon ana tataro am toro, ao nakon aia tataro am toro aika rangi ni kimwareirei ni maaka aram. Ao taiaoka ma angan am toro te tokanikai n te bong aei, ao e bia kaota nanoangaau te mwaane aei.”+

Bon te tia uouota ana mwangko te uea ngai.+

2 N te namwakaina ae Nitian,* n ana ka-20 n ririki+ n tautaeka te Uea ae Atatokititi,+ ao e a kani moi n te wain te uea, ao n aron ae I taneiai iai I tabeka te wain ao I angan te uea.+ Ma I tuai man ubu n nanokawaki mai mwaina i matana. 2 Ngaia are e taku te uea nakoiu: “E aera ngkai ko a rangi n ubu n nanokawaki ao ko aki aoraki? Akea riki ma tii rawawatan te nano.” Ao I a rangi ni maaku.

3 Ao I taku nakon te uea: “E na abwabwaki maiun te uea! E aera ngkai I aki riai n ubu n nanokawaki ngkai e a urubekebeke te kaawa are a kaiiaki iai au bakatibu, ao a a tia ni kabuekaki mataroan oona n te ai?”+ 4 Ao e taku te uea nakoiu: “Tera ae ko ukoukoria?” I aki tabwara ma I a tataro naba nakon Atuani karawa.+ 5 I taku ngkanne nakon te uea: “Ngkana e kukurei iai te uea, ao ngkana e reke akoan am toro iroum, ao kanakoai nako Iuta, nakon te kaawa are a kaiiaki iai au bakatibu, bwa I aonga ni manga kateia.”+ 6 E taku ngkanne te uea nakoiu, ao e tekateka i rarikina te ueannaine: “Maanra mwanangam, ao ko na oki n ningai?” Mangaia are e kukurei te uea ni kanakoai+ ao I a anganna maanin te tai.+

7 Ao I taku nakon te uea: “Ngkana e kukurei iai te uea ao I bia anganaki reeta ibukia kowana ake n te aono are Iteran te Karaanga,*+ bwa a na kariaia bwa N na toua te kawai ae akea te kangaanga iai ni karokoa ae I roko i Iuta, 8 n ikotaki naba ma te reta nakon Ataba are te tia kawakina Ana Buakonikai te Uea, bwa e aonga n anganai kaai ibukin taian tatanga ibukini mataroan oon te Tabo ni Kamaiu+ are n te Auti,* ao ibukin oon te kaawa,+ ao ibukin te auti are N na nako iai.” Mangaia are e anganai baikai te uea,+ bwa e memena bain Atuau i aou.+

9 N tokina ao I a roko irouia kowana ake n te aono are Iteran te Karaanga ao I angania ana reta te uea. Ao te uea e kamwanangaia naba ma ngai mataniwi n te taanga ni buaka ao taan toka i aoia aoti. 10 Ngke a ongo taekan aei Tanebarata+ are te Oronaite ma Tobia+ are te mataniwi* are tibun Ammon,+ ao a rangi n aki kukurei ngkai e a roko te aomata temanna bwa e na karaoa ae raoiroi ibukia tibun Iteraera.

11 Imwin te tai ae maan ao I a roko i Ierutarem, ao I tiku iai i nanon tenibong. 12 Ao I teirake ngke e a bong, ngai ma mwaane tabeman ake raou, ao I aki tuanga temanna te baere e karinna i nanou Atuau bwa N na karaoia ibukin Ierutarem, ao akea te man temanna irou ma tii are I toka i aona. 13 Ao I otinako ngke e a bong rinanon te Mataroa ae te Mwarua,+ rimatan Ana Koburake n Ran te Naeta ae Bubura nakoni Mataroan te Bwariko ni Mannang,+ ao I tuoi oon Ierutarem ake a uruaki, ma mataroan oona ake a kabuekaki n te ai.+ 14 Ao I mwananga nakoni Mataroan te Koburake n Ran+ ao nakon Ana Nei te Uea, ao e a aki kona n rikekei te man are I toka i aona bwa e a ribwa. 15 Ma I reitaanako kawaiu ni waerake i nanon te mwarua+ ngke e a bong, ao I teimatoa n tuoa te oo. Imwin anne ao I a oki rikaaki n rin rinanon te Mataroa ae te Mwarua, ao I a oki.

16 A aki ataa te tabo are I nako iai taan tautaeka ake taiani kauoman,+ ao te bwai are I karaoia, bwa I tuai n taekina te bwai teuana nakoia I-Iutaia, ibonga,* bwaanuea, taan tautaeka ake taiani kauoman, ao nikiraia taani mwakuri. 17 N tokina ao I a taku nakoia: “Kam kona n nora te rawawata ae ti a mena iai, ae aron Ierutarem n urubekebeke, ao mataroan oona ake a a tia ni kabuekaki n te ai. Nakomai, ti na manga katea oon Ierutarem, bwa e aonga n aki reitinako te bwaibwainrang aei.” 18 Ao I tuangia aroni bain Atuau ni memena i aou,+ ao ana taeka naba te uea ake e taekin nakoiu.+ Ngaia are a taku: “Ti a teirake ni katea te oo.” Mangaia are a kakorakoraia* ibukin te mwakuri ae raoiroi.+

19 Ao ngke a ongo taekan aei Tanebarata are te Oronaite ma Tobia+ are te mataniwi* are tibun Ammon,+ ao Ketem are te I-Arabia,+ ao a a kakanikoira+ ma ni kabuakakaira ao a taku: “Tera ae kam karaoia? Kam karitei nakon te uea?”+ 20 Ma I kaeka ni kangai: “Bon Atuani karawa ae Ngaia ae e na anganira te tokanikai,+ ao ngaira aika ana toro, ti na teirake ni katea te oo. Ma akea ami bwai iai, ao akea naba riaimi, ke kanuringami* i Ierutarem.”+

3 Ao e teirake Eriatiba+ are te ibonga ae rietata* ma tarina ake ibonga, bwa a na katea te Mataroa n Tiibu.+ A katabua+ ao a katei mataroana. A katabua ni karokoa te Taua ae Mea+ ao ni karokoa Ana Taua Ananera.+ 2 Ao a onobwaia te oo mai rarikia naakai rorobuakan Ieriko,+ ao mai rarikia naakai bon Takura are natin Imri.

3 Ao a katea te Mataroa n Ika+ natin Atenaa ake mwaane, ao a kanimwi kaai iai+ ao a karaoi mataroana, bwaini kainana, ao kaini kamatoaana. 4 Ao e karaoa te onobwai mai rarikia naakai Meremota+ are natin Uriia are natin Akoti, ao e karaoa te onobwai mai rarikia naakai Meturam+ are natini Berekia are natini Metetabera, ao e karaoa te onobwai mai rarikia naakai Tatoka are natini Baana. 5 Ao a karaoa te onobwai mai rarikia naakai I-Tekoa,+ ma a aki karinanoia aia rorobuaka ake a kakannato n uataboa* aia beku aia toka.

6 A onobwaia Mataroan te Kaawa+ Nikawai Ioiata are natini Betea ao Meturam are natini Betoteia. A kanimwi kaai iai ao a karaoi mataroana, bwaini kainana, ao kaini kamatoaana. 7 A karaoa te onobwai mai rarikia naakai Meratia are te I-Kibeon+ ao Iaiton are te I-Meronota, ao rorobuakani Kibeon ma Mitiba+ ake a mena i aani mwaakan* te kowana are n te aono are Iteran te Karaanga.*+ 8 E karaoa te onobwai mai rarikia Utiera are natin Areaia, ae temanna i buakoia taani karaobwai n te koora. E karaoa te onobwai mai rarikin teuaei Aanania, ae temanna i buakoia taani motiboi.* Ao a kaboraoa* kawain Ierutarem ni karokoa te Oo ae Raababa.+ 9 Ao e karaoa te onobwai mai rarikia naakai Rebaia are natin Uura, ae te toka n iteran aonon Ierutarem. 10 Ao e karaoa te onobwai mai rarikia naakai Ietaia are natin Arumaba bon i moan ana auti, ao e karaoa te onobwai mai rarikin teuaei Atuti are natin Atiabeneia.

11 Ao a karaoa te onobwai nakoni mwakoron* riki teuana te oo Marekiia are natin Arim+ ma Atiuba are natini Baatamoaba,+ n ikotaki ma te Taua n Ai n Umum.+ 12 Ao e karaoa te onobwai mai rarikia Tiarum are natin Aroeti, ae te toka n iteran aonon Ierutarem, ngaia ma natina aine.

13 Ao a onobwaia te Mataroa ae te Mwarua+ Anun ma kaain Tanoa.+ A kateia ao a karaoi mataroana, bwaini kainana, ao kaini kamatoaana, ao a onobwaia 1,000 te mwanokunibai* n te oo ni karokoa Mataroan te Bwariko ni Mannang.+ 14 E onobwaia Mataroan te Bwariko ni Mannang Marekiia are natin Rekaba, ae te toka n aononi Betaakerim,+ e kateia ao e karaoi mataroana, bwaini kainana, ao kaini kamatoaana.

15 E onobwaia Mataroan te Koburake n Ran+ Tiarun are natini Korotie, ae te toka n aononi Mitiba,+ e kateia ma taubukina ao e karaoi mataroana, bwaini kainana, ao kaini kamatoaana, ao e onobwaia naba oon te Nei ae Kawain te Ran*+ nakon Ana Onnaroka te Uea,+ ao ni karokoa te Kaintamwarake+ ae ruo rikaaki man Ana Kaawa Tawita.+

16 E karaoa te onobwai imwin teuaei Neemia are natin Atubuka, ae te toka n aononi Betatuura,+ ni moa man Ana Nne ni Mate Tawita*+ ni karokoa te nei+ are karaoaki, ao ni karokoa Aia Auti Aomata Aika Korakora.

17 A karaoa te onobwai imwin teuaei tibun Rewi ake a mena i aan Reum are natini Bani. Ao e karaoa te onobwai mai rarikin teuaei Atiabaia ae te toka n iteran aononi Keira,+ ibukin ana aono. 18 A karaoa te onobwai imwin teuaei naake tariia ake a mena i aani Bawai are natin Enatata, ae te toka n iteran aononi Keira.

19 E onobwai mai rarikin teuaei Etia are natin Ietua,+ ae te toka i Mitiba n te mwakoro riki teuana are i moan te kawai n ararakea te Nne ni Bwai ni Buaka are ni Bouan te Oo.+

20 E karaoa te mwakuri ma te ingaingannano imwin teuaei Baruka are natin Tabai,+ ao e onobwaia te mwakoro riki teuana ni moa mani Bouan te Oo ni karokoa mataroan ana auti Eriatiba+ are te ibonga ae rietata.

21 E onobwaia te mwakoro riki teuana imwin teuaei Meremota+ are natin Uriia are natin Akoti, ni moa mani mataroan ana auti Eriatiba ni karokoa tokin ana auti Eriatiba.

22 Ao a karaoa te onobwai imwin teuaei ibonga, ake mwaane man aonon te Ioretan.*+ 23 A karaoa te onobwai imwia naakai Beniamin ma Atiuba, bon i matan aia auti. E karaoa te onobwai imwia naakai Ataria are natini Maateia are natin Ananiaa, bon i rarikin ana auti. 24 E onobwaia te mwakoro riki teuana imwin teuaei Binnui are natin Enatata, ni moa man ana auti Ataria ni karokoa Bouan te Oo+ ao ni karokoa maninganingan oon te kaawa.

25 E karaoa te onobwai Barara are natin Utiaai i moani Bouan te Oo ao te taua are toma ma ana Auti* te Uea,+ are te kateitei mai eta are mena n Aia Katawanang Taan Tantani.+ Imwin teuaei boni Betaia are natini Baroti.+

26 Ao tooro* n te tembora+ ake a maeka i Oobera+ a karaoa te onobwai ni karokoa are i moani Mataroan te Ran+ are mai mainiku ao te taua are terenako.

27 A karaoa te onobwai imwia naakai I-Tekoa+ n te mwakoro riki teuana, ni moa mai moan te taua are abwabwaki are terenako ni karokoa oon Oobera.

28 A karaoa te onobwai i etan te Mataroa n Aoti+ ibonga, temanna ma temanna bon i moan aia auti.

29 E karaoa te onobwai imwia naakai Tatoka+ are natin Immera, bon i moan ana auti.

Ao e karaoa te onobwai imwin teuaei Temaia are natin Tekania are te tia tararuaa te Mataroa ae Mainiku.+

30 A onobwaia te mwakoro riki teuana imwin teuaei Aanania are natin Teremia ao Anun are ana kaonoman n nati Tarabwa.

E karaoa te onobwai imwin teuaei Meturam+ are natini Berekia, bon i moan ana auti.*

31 E karaoa te onobwai imwin teuaei Marekiia ae temanna i buakoia te koraki aika taani karaobwai n te koora, ni karokoa aia auti tooro* n te tembora+ ao taan iokinibwai, are i moan te Mataroa n Tutuo, ao ni karokoa te ruu are i aon taubukini maninganingan oon te kaawa.

32 Ao a karaoa te onobwai taani karaobwai n te koora ao taan iokinibwai, i marenan te ruu are i aon taubukini maninganingan oon te kaawa ma te Mataroa n Tiibu.+

4 Ngke e ongo naba ngkekei Tanebarata+ ae ti a manga katea te oo, ao e a un ao e rangi ni maraki nanona, ao e teimatoa ni kakanikoia I-Iutaia. 2 Ao e taku i mataia tarina ma te taanga ni buaka mai Tamaria: “Tera ae a karaoia I-Iutaia aika akea korakoraia aikai? A na karaoa aei n tii ngaiia? A na anga taiani karea? E na bane aia mwakuri i nanon tebongina? A na kaoki korakoran atibu aika a a tia ni bue aika mena i buakoni bwariko ni mmwammwa n atibu aika bubu?”+

3 Ao e taku Tobia+ are tibun Ammon+ are tetei i rarikin teuaei: “Ngkana e kona te arobeke* n tamwarakea te baere a kateia, ao ane e na urua aia oo ae te atibu ni kabwakaa.”

4 Ko na ongo ngkoe ae Atuara bwa ti a kabuakakaaki.+ Ao kaoka aia kabuakaka nako aon atuia,+ ao aanga ngaiia bwa bwaai ni kuri ao taenikai n te aba teuana. 5 Ao tai rabun aia bure ke ni kariaia bwa e na mauna aia bure mai matam,+ bwa a kabuakakaia taani kateitei.

6 Mangaia are ti teimatoa ni katea te oo ao e a toma te oo ni kabane ao ni manga katea iteran rietana, ao a teimatoa aomata ni kabanei nanoia n te mwakuri.

7 Ngke a ongo naba ngkekei Tanebarata ma Tobia,+ ao I-Arabia+ ma tibun Ammon ao I-Atoto,+ bwa e boni waakinako onobwaian oon Ierutarem ao a a bonotaki bwangabwanga, ao a a rangi n un. 8 Ao a ikotaki ni babaire bwa a na roko ni buakana Ierutarem ao ni kakiriwea. 9 Ma ti tataro nakon Atuara, ao ti teimatoa ni kateiia taan tantani imwaia naakai ni ngaina ao ni bong.

10 Ma a kangai kaain Iuta: “Ai akea korakoraia taani mwakuri,* ao e a rangi ni bati te mmwammwa n atibu. Ti na bon aki kona ni katea te oo.”

11 Ao a teimatoa ni kangai aiara: “Ti na bon roko i buakoia imwain ae a ataia ke n norira, ao ti na kamateia ao ni katoka te mwakuri.”

12 N te tai are a rin iai I-Iutaia ake a maeka i rarikia, ao a okioki* n tuangira naakai ni kangai: “Ane a na bon roko iroura man itera nako.”

13 Mangaia are I teimatoa ni kateiia mwaane n taabo ake taiani kabanea n rinano mai akun te oo, ake taabo ake a tangaina, ao I kateiia n aia utu nako ma aia kabaang, aia kainiwai, ao aia kainikatebe. 14 Ngke I noria bwa a maaku, ao I aki tabwara ma I a teirake naba ao I taku nakoia bwaanuea,+ taan tautaeka ake taiani kauoman, ao nikiraia aomata: “Tai maakuia.+ Ururinga Iehova ae kakannato ao ae kamimi ma ni kakamaaku,+ ao buaka ibukia tarimi, natimi mwaane ao natimi aine, buumi, ao mwengami.”

15 Ngke a a tia n ongo aiara ae ti a ataa te bwai are a karaoia, ao e a tia ni kamangaoi aia babaire te Atua ae koaua, ao ti a manga bane n okira mwakurian te oo. 16 Ni moa man te bong anne ao a kakaraoa te mwakuri iterani mwaitiia au rorobuaka,+ ao ake iterani mwaitiia a taui kainiwai, otanga, kainikatebe, ao a kunnikainia ni kunnikai ni buaka. Ao a tei tooka+ i akuia ni boutokaiia kaain Iuta ni kabane 17 ake a tabe ni katea te oo. Ao naake taan uouotii baika rawawata a karaoa te mwakuri ni baia teaina, ao a taua te bwai ni buaka* ni baia are teaina. 18 Ao a bae aia kabaang taani kateitei n tatabemania nako i bebeeia ngke a tabe ni kateitei. Ao e tei i rarikiu te tia katanga te buu.+

19 Ao I taku nakoia bwaanuea, taan tautaeka ake taiani kauoman, ao nikiraia aomata: “E bubura te mwakuri ao e abwabwaki, ao ti uamaenako i aon te oo, ao ti marangaranga. 20 Ngkana kam ongo tangin te buu, ao ikotaki ni kabane nakon te tabo are ti mena iai. E na boni buaka Atuara ibukira.”+

21 Mangaia are ti teimatoa ni mwakuri ao naake iteran te mwaiti a taui kainiwai, mangke e tabwena mainiku ni karokoa otin taian itoi. 22 Ao I taku nakoia aomata n te tai anne: “Ke a tiku n te tairiki i nanon Ierutarem te mwaane temanna ma temanna ma ana tabonibai, ao a na tantani ibukira n te tairiki, ao ni mwakuri n te ngaina.” 23 Ao ti aki roko n te buutii kunnikaira ngai ma naake tariu, ao naake au tabonibai+ ma taan tantani ake a irai, ao a teimatoa ni mena ara bwai ni buaka ni baira ae te atai n tatabemanira nako.

5 Ma e korakora tangia aomata ma buuia ao a a ngurengure ni kaaitaraia tariia ake I-Iutaia.+ 2 A taku tabeman: “Ti a rangi ni bati ngaira ma natira mwaane ao natira aine. Ti riai ni karekea te uita* bwa ti na kanna ao ti na teimatoa ni maiu.” 3 A taku ake tabemwaang: “Ti anga ara tawaana ma ara nne ni kureebe ao ara auti bwa bwaai ni kaboomwi, bwa e aonga n reke te uita n tain taren te amwarake.” 4 Ma a taku ake tabemwaang: “Ti a tia n tangomwane ibukin ara tawaana ma ara nne ni kureebe, bwa te angabwai ibukin te uea.+ 5 Bon titeboo ngkai irikora ao raraara ma tarira,* ao natira bon aekakia naba natiia, ma ti riai ngaira ni kanakoia natira mwaane ma natira aine bwa a na tautoronaki,+ ao a a kaman tautoronaki tabeman natira aine. Ma bon akea korakorara ni katoka aei, ibukina bwa a a bwainaki ara tawaana ma ara nne ni kureebe irouia tabemwaang.”

6 I a rangi n un ngke I ongo tangia ma taeka aikai. 7 Mangaia are I iaiangoi baikai i nanou, ao I kauntaekaia ma bwaanuea ao taan tautaeka ake taiani kauoman, ao I taku nakoia: “Kam kairoroa te bakao* mairouia oin tarimi+ n tatabemaningkami nako.”

Irarikin anne ao I bairea te botaki ae bubura ibukini kaetan te baei. 8 Ao I taku nakoia: “Ti a tia ni kabooia ni kaokiia tarira aika I-Iutaia ake a kaboonakoaki ngkoa nakoia natannaomata, ma ngkami ngkai kam nang kaboonakoia oin tarimi,+ ao te koaua bwa a na manga kaboonakoaki ni kaokaki nakoira?” Ao a aki ngongongo, ao akea te bwai ae a kona n taekinna. 9 Ao I taku: “E aki raoiroi te bwai ae kam karaoia. Tiaki kam riai n nakonako ni maakakin Atuara,+ bwa a aonga n aki kona ni kabuakakaira natannaomata ake aiara? 10 Irarikina, ngai ma naake tariu ao naake au tabonibai, ti kataarauia naba nakanne n te mwane ao n te uita. Taiaoka ma ti a katoka te katangobwai ae bakaonaki.+ 11 Taiaoka ma manga kaoki nakoia n te bong naba aei aia tawaana,+ aia nne ni kureebe, aia nne n oriwa, ao aia auti, n ikotaki ma bakaon* te mwane, te uita, te wain ae boou, ao te oera, ake kam kataarauia iai.”

12 Ao a kaeka ni kangai: “Ti na manga kaoki baikai nakoia ao ti na aki tangiri booni mwia. Ti na karaoa raoi ane ko taekinna.” Mangaia are I weteiia ibonga* ao I kairiia mwaane akanne bwa a na taetae n tuea bwa a na kawakina te berita aei. 13 I taeaanako naba rabin au kunnikai* ao I taku: “Ane e aki kakororaoa nanon te berita aei ao e bia taeianako n te aro aei te Atua ae koaua mai nanon ana auti ao man ana bwai nako. E na taeakinako n te aro aei ma n tiku n akea ana bwai.” Ao e kangai te botaki n aomata: “Amen!”* Ao a karaoiroa Iehova, ao a karaoa are a beritanna aomata akekei.

14 Ao man te bong are e mwiokoai iai bwa N na riki bwa aia kowana+ n te aba ae Iuta, man ana ka-20 n ririki n tautaeka+ te Uea are Atatokititi+ ni karokoa ana ka-32 n ririki,+ ao I aki roko n te kana te amwarake are bwaunan te kowana ae riai n anganaki, ngai ma naake tariu i nanon 12 te ririki.+ 15 Ma a karawawataia aomata kowana ake imwaiu, ao a teimatoa n anai mairouia 40 te tiekera* n tirewa ibukin te amwarake ao te wain ni katoabong. A karawawataia naba aomata naake aia tabonibai. Ma ngai I aki karaoa anne+ ibukini maakakin te Atua.+

16 Irarikin anne, I anga baiu ni mwakuria te oo aei, ao akea te tawaana ae reke iroura.+ A bane au tabonibai n ikotaki ikekei ibukin te mwakuri. 17 Iai I-Iutaia ma taan tautaeka ake taiani kauoman aika 150 mwaitiia, aika a amwamwarake n au taibora, n ikotaki naba ma te koraki ake a roko iroura mai buakoia natannaomata. 18 E katauraoaki ibukiu* ni katoabong temanna te kao mwaane, tiibu aika rangi n raoiroi aika onoman, ao mannikiba, ao te wain ae bati n aekana nako teuana te tai ni katoa tebwina te bong. N aki ongei baikai ni kabane, ma I bon aki roko n te kairoroa te amwarake are bwaunan te kowana ae riai n anganaki, ibukina bwa a a kaman uota te uota ae rawawata aomata n aia beku. 19 Uringai ngkoe ae Atuau ma te akoaki,* ibukini bwaai ni kabane ake I karaoi ibukia aomata aikai.+

6 Ngke a kaongoaki naba ngkekei Tanebarata,+ Tobia, Ketem are te I-Arabia,+ ao nikiraia taani kairiribai nakoira ae I a tia ni manga katea te oo,+ ao ai akea nikiran taiani bwangabwanga iai, (e ngae ngke I tuai ni karaoi mataroa ni mataroan te oo ni karokoa te tai anne),+ 2 ao a aki tabwara Tanebarata ma Ketem ma a a kanakoa naba te rongorongo ae kangai nakoiu: “Nakomai, ao ti na bairea te tai ae ti na uaia ni kaitiboo iai ni kaawa ake n te Tabo ae Aoraoi i Ono.”+ Ma a bairea ae a na kaikoakai. 3 Ngaia are I a kanakoia taan uataeka nakoia ni kangai: “I tabe ni karaoa te mwakuri ae abwabwaki, ao I a aki kona n nako. E aera ngkai e na toki te mwakuri ngkai N na kitanna ni kawaringkami?” 4 A kanakoa nakoiu te aeka n rongorongo anne aua te tai, ao I anga naba te kaeka ae aron anne ni katoatai.

5 Ao Tanebarata e kanakoa nakoiu ana tabonibai ma te rongorongo naba anne n te kanimaua n tai, ma te reta ae uki i nanoni baina. 6 E koreaki iai ae kangai: “E a tia n ongo te aba i buakoia natannaomata ao e taekinna naba Ketem,+ bwa kam bairea ae kam na karitei+ ngkoe ma I-Iutaia. Anne bukina ae kam katea iai te oo, ao ni kaineti ma rongorongo aikai, ko na riki ngkoe bwa aia uea. 7 Ko a tia naba ni mwiokoiia burabeti bwa a na katanoataa taekam ni kabutaa Ierutarem ni kangai, ‘Iai te uea i Iuta!’ Ao e na kaongoaki te uea taekani baikai. Mangaia ae nakomai, ao ti na uaia ni maroroakina taekan te baei.”

8 Ma I kanakoa te kaeka nakoina ae kangai: “Akea te bwai teuana ae riki mai buakoni bwaai akana ko taekin. Ko a boni karioi man am iango.”* 9 Bwa a bane ni kataia ni kakamaakuira, bwa a kangai: “Ane a na mamaara baia n te mwakuri, ao e na aki tia.”+ Ao I a tataro ngkai, kakorakorai baiu.+

10 Ao I nakon ana auti Temaia are natin Teraaia are natini Meetabera, are e kainaki ikekei. E taku: “Ti na bairea te tai ae ti na kaitiboo iai n ana auti te Atua ae koaua i nanon te tembora, ao ti na kaini mataroan te tembora, bwa a nang roko bwa a na tiringko. A na roko n tiringko n te tairiki.” 11 Ma I taku: “E riai ni birinako te mwaane ae ai arou? E kona n rinnako n te tembora te mwaane ae ai arou ao ni maiu?+ N na aki rinnako!” 12 Ao I a ataia ae bon tiaki te Atua ae kanakoa teuaei, ma a kabooa Tobia ma Tanebarata+ bwa e na taekina te taetae ni burabeti aei ni kaitaraai. 13 E kabooaki teuaei bwa e na kakamaakai ao ni karekeai n te bure, bwa e aonga n reke angaia ake a kona iai ni kabuakakaa taekau, bwa a aonga ni kabuakakaai.

14 Ururinga Tobia+ ma Tanebarata ngkoe ae Atuau, ma mwakuri aikai, ao Noaria naba are te burabeti n aine, ma nikiraia burabeti ake a teimatoa ni kataia ni kakamaakai.

15 Mangaia are e a tia te oo n 25 iai bongin Erura,* i nanon 52 te bong.

16 Ngke a ongo naba ngkekei taekan aei taani kairiribai nakoira ni kabane, ao ngke a noria natannaomata ni kabane ake i rarikira, ao a a rangi ni maamaa,*+ ao a ataia ae e tia te mwakuri aei n ana ibuobuoki Atuara. 17 Ni boong akanne ao a kanakoi reeta aika bati bwaanuea+ ake i Iuta nakon Tobia, ao e kaekaekai Tobia. 18 A bati i Iuta aika a taetae n tuea bwa a na raoi ma teuaei, bwa boni buun natin Tekania are natin Araa.+ Ao natina te mwaane ae Ieoanan e mare ma natini Meturam+ are natini Berekia. 19 Ao a tutuangai naba baika raraoi ibukin teuaei, ao a kaokaongoa te bwai ae I taekinna. Ao e kakanakoi reeta nakoiu Tobia ni kakamaakai.+

7 Ngke e tia naba ngkekei manga katean te oo,+ ao I a katei mataroa,+ ao a a rineaki taan teiakina mataroan te oo,+ taan anene,+ ao tibun Rewi.+ 2 Ao I a mwiokoa tariu are Aanani+ bwa e na tararuaa Ierutarem, n ikotaki ma Aanania are te mataniwi n te Tabo ni Kamaiu,+ bwa bon te mwaane ngaia ae moan te onimakinaki ao e mamaaka riki te Atua ae koaua+ nakoia ake tabemwaang. 3 Mangaia are I taku nakoia: “A aki riai ni kaukaki mataroan oon Ierutarem ni karokoa kabuebuen te ngaina, ao i nanon aia tai n tei n tantani a riai ni kaini mataroa ni bwaini kainana. Ao mwiokoiia kaain Ierutarem bwa taan tantani, bwa a na tei n aia tabo n tantani n tatabemania nako ao i moan aia auti nako.” 4 Ao e mwawaawa te kaawa ma ni bubura, ao a karako aomata aika mena iai,+ ao a tuai ni manga kateaki auti.

5 Ma e kaaki i nanou Atuau te kan ikotiia bwaanuea, ao taan tautaeka ake taiani kauoman, ao aomata, bwa a na koreaki araia n te kateiriki.+ Ao I kunea te boki ae koreaki araia iai n te kateiriki te koraki ake a moani waerake, ao I kunea ae koreaki i nanona ae kangai:

6 Ao aikai taani maeka n te aono,* ake a otinako mai buakoia te koraki ake taenikai, ake e kairiia ngkoa Nebukaneta+ are Ueani Baburon bwa taenikai,+ ao ake a a manga oki imwina riki nako Ierutarem ao nako Iuta, temanna ma temanna nakon oin ana kaawa,+ 7 ake aomata ake a airi ma Terubabera,+ Ietua,+ Neemia, Ataria, Raamia, Namani, Moretekai, Biritan, Mitibereta, Bikiwai, Neum, ao Banaa.

Aikai mwaitiia mwaane aika tibun Iteraera:+ 8 tibuni Baroti 2,172, 9 tibun Tebatia 372, 10 tibun Araa+ 652, 11 tibuni Baatamoaba,+ ake tibun Ietua ma tibun Ioaba+ 2,818, 12 tibun Eram+ 1,254, 13 tibun Taatu 845, 14 tibun Takai 760, 15 tibuni Binnui 648, 16 tibuni Bebai 628, 17 tibun Atukata 2,322, 18 tibun Atonikam 667, 19 tibuni Bikiwai 2,067, 20 tibun Arin 655, 21 tibun Aitera, ake mairoun Etekia 98, 22 tibun Atuum 328, 23 tibuni Beitai 324, 24 tibun Ariba 112, 25 tibuni Kibeon+ 95, 26 rorobuakani Betereem ma Netoba 188, 27 rorobuakan Anatota+ 128, 28 rorobuakani Betaatimaweta 42, 29 rorobuakani Kiriataearim,+ Kebira, ao Beerota,+ 743, 30 rorobuakan Rama ao Keeba+ 621, 31 rorobuakani Mikemaati+ 122, 32 rorobuakani Betaera+ ao Ai+ 123, 33 rorobuakan Nebo are teuana 52, 34 tibun Eram are temanna riki 1,254, 35 tibun Arim 320, 36 rorobuakan Ieriko 345, 37 rorobuakan Roota, Aatita, ao Ono,+ 721, 38 ao rorobuakan Tenaa 3,930.

39 Aikai ibonga:*+ tibun Ietaia ake man ana utu Ietua 973, 40 tibun Immera 1,052, 41 tibuni Batiura+ 1,247, 42 tibun Arim+ 1,017.

43 Aikai tibun Rewi:+ tibun Ietua ake mairouni Katemiera,+ ake tibun Otewa 74. 44 Taan anene+ bon tibun Ataba+ aika 148. 45 Ao taan teiakina mataroan te oo,+ bon tibun Tiarum, tibun Aitera, tibun Taremoni, tibun Akuba,+ tibun Atita, ao tibun Tiobai, aika 138.

46 Aikai tooro* n te tembora:+ tibun Tiiaa, tibun Atuuba, tibun Tabaote, 47 tibuni Keroti, tibun Tia, tibuni Baton, 48 tibun Rebana, tibun Akaba, tibun Tiaremai, 49 tibun Aanan, tibuni Kitera, tibuni Kaa, 50 tibun Reaia, tibun Retin, tibun Nekota, 51 tibuni Katiam, tibun Utaa, tibuni Betea, 52 tibuni Betai, tibuia taiani Meunim, tibun Nebutetim,* 53 tibuni Bakebuka, tibun Akubwa, tibun Areura, 54 tibuni Batirita, tibuni Meita, tibun Aretia, 55 tibuni Barekoti, tibun Titera, tibun Temaa, 56 tibun Netia, ao tibun Atiba.

57 Aikai tibuia ana toro Toromon:+ tibun Totai, tibun Tobereta, tibuni Berita, 58 tibun Iara, tibun Tarekon, tibuni Kitera, 59 tibun Tebatia, tibun Atiro, tibuni Bokaretaatebaim, ao tibun Amon.* 60 Botaia tooro* n te tembora+ ma tibuia ana toro Toromon bon 392.

61 Ao aikai naake a waerake mai Teremeraa, Teraaretia, Kerubim, Aton, ao Immera, ma a aikoa kona ni kaotii aia utu mairoun tamaia ao rikia, bwa tibun Iteraera ngaiia ke tiaki:+ 62 tibun Teraaia, tibun Tobia, ao tibun Nekota, 642. 63 Ao mai buakoia ibonga: tibun Abaia, tibun Akoti,+ tibuni Baretirai, ae e karekea buuna mai buakoia aine ake natini Baretirai+ are te I-Kireata, ao e aranaki n araia. 64 Naakai ake a kakaaei araia ake a koreaki bwa a na katei rikia, ma a aki kona n reke, mangaia are a a kabaneaki man te nakoa n ibonga.*+ 65 E tuangia te kowana*+ bwa a aki kona n amwarake mani baika moan te tabu,+ ni karokoa ae e reke te ibonga ae kona ni karekea te ibuobuoki n te Urim ma te Tummim.*+

66 Botaia te botaki n aomata bon 42,360,+ 67 i rarikia aia toro mwaane ao aia toro aine+ aika 7,337. Iai naba aia tia anene aika 245, aika mwaane ma aine.+ 68 Aia aoti 736, aia miure 245, 69 aia kamero 435, ao aia taongki 6,720.

70 A angabwai nakon te mwakuri tabeman mataniwi i aoia aia koraki mairoun tamaia. E anga te kowana* ibukini boutokaan te mwakuri*+ 1,000 te turakemwa* ni koora, 50 taiani boora, ao 530 te kamwarai ibukia ibonga.+ 71 Ao tabeman mataniwi i aoia aia koraki mairoun tamaia a anga 20,000 te turakemwa ni koora ao 2,200 te mina* n tirewa, ibukini boutokaan te mwakuri.* 72 Ao nikiraia aomata a anga 20,000 te turakemwa ni koora, 2,000 te mina n tirewa, ao 67 te kamwarai ibukia ibonga.

73 Ao ibonga, tibun Rewi, taan teiakina mataroan te oo, taan anene,+ tabeman mai buakoia aomata, tooro* n te tembora, ao nikiraia tibun Iteraera ni kabane, a maeka n aia kaawa.+ Ngke e a roko te kaitiua n namwakaina,+ ao a a maeka tibun Iteraera n aia kaawa.+

8 A ikotaki ngkanne aomata ni kabane ma te nano ae tii teuana n te marae i moani Mataroan te Ran,+ ao a tuanga Etira+ are te tia kaewewe* bwa e na uota bokin te Tua Rinanoni Mote,+ are e tua Iehova nakoia tibun Iteraera+ bwa a na kakairi iai. 2 Ai ngaia are e a uota te Tua Etira are te ibonga* nako matan te botaki n aomata+ aika mwaane ma aine, ao te koraki nako ake a kona n ongora ao n ota, ni moani bongin te kaitiua n namwakaina.+ 3 Ao e wareware ni kabaibati mai iai+ i moan te marae are i moani Mataroan te Ran, mangke e tabwena mainiku ni karokoa ae tawanou, nakoia mwaane, aine, ao aomata ni kabane ake a kona n ota, ao a kakauongo raoi+ aomata ni baike a warekaki mani bokin te Tua. 4 Ao e tei Etira are te tia kaewewe* i aon te bao ae te kai ae karaoaki ibukin te botaki anne, ao ake a tei i rarikina i angaataina boni Matitia, Tiema, Anaia, Uria, Irekia, ao Maateia, ao i angamaingina boni Betaia, Mitiaera, Marekiia,+ Atuum, Atebarana, Tekaria, ao Meturam.

5 E kauka te boki Etira i mataia aomata ni kabane, bwa e mena i etaia aomata ni kabane. Ngke e kaukia ao a bane n teirake aomata. 6 Ao Etira e karaoiroa Iehova ae te Atua ae koaua are Teuare kakannato, ao a bane ni kaeka aomata ni kangai, “Amen!* Amen!”+ ao a tabekirake baia. Ao a katorobubua ni bobaraaki i aontano nakon Iehova. 7 Ao tibun Rewi aika Ietua, Bani, Terebaia,+ Iamin, Akuba, Tiabetai, Oria, Maateia, Kerita, Ataria, Iotabata,+ Aanan, ao Beraaia, a kabwarabwaraa te Tua nakoia aomata,+ ngke a bon tei naba aomata. 8 Ao a teimatoa ni wareware ni kabaibati man te boki, man ana Tua te Atua ae koaua, ni kabwarabwaraa raoi ao ni kaota ae nanonaki iai, mangaia are a buokiia aomata bwa a na ota n te baere e warekaki.*+

9 Ao Neemia are te kowana* n te tai anne, ma Etira+ are te ibonga are te tia kaewewe,* ao tibun Rewi ake taan reireinia aomata, a taku nakoia aomata ni kabane: “E tabu te bong aei nakon Iehova ae Atuami.+ Tai tanginiwenei ke n tang.” Bwa a bane n tang aomata ngke a ongo taekan te Tua. 10 E taku nakoia: “Naako kang bwaai aika rangi n raoiroi* ao nima te bae karewe, ao kanakoi tibwanga aika amwarake+ nakoia te koraki ake akea aia katauraoi, bwa e tabu te bong aei nakon ara Uea, ao tai nanokawaki, bwa bon ami nono* te kimwareirei are e anga Iehova.” 11 Ao tibun Rewi a kainabwabuia aomata ni kabane ni kangai: “Tai karongoa! bwa e tabu te bong aei, ao tai nanokawaki.” 12 Mangaia are a a bane n nako aomata bwa a na amwarake ma ni moi, ao a na kanakoi tibwanga aika amwarake ma n reitaanako kimwareireia ae bati,+ bwa a a ota n taeka ake a kaotaki nakoia.+

13 Ao n te kauoua ni bong ao a a ikotaki aia mataniwi aomata ni kabane i aoia aia koraki mairoun tamaia, ibonga, ao tibun Rewi, i rarikin Etira are te tia kaewewe* bwa a na karekei riki otaia n taekan te Tua. 14 Ao a kunea bwa e koreaki i nanon te Tua are e tua Iehova rinanoni Mote, bwa a riai tibun Iteraera ni mamaeka i nanon umwanrianna* n tain te toa are n te kaitiua n namwakaina,+ 15 ao a riai n tataekina ao ni katanoataa+ ae kangai rinanon aia kaawa ni kabane ao Ierutarem ni kabutaa: “Otinako nakon te aono ae maungaunga ao uotiimai mwaanga aika bati baaia man aroka aika oriwa, aroka aika bwaain, ao aroka aika motere, ao aroka aika baam, ma mwaanga aika bati baaia man aroka ake tabeua riki bwa a na karaoaki iai umwanrianna, ni kaineti ma ae e koreaki.”

16 Mangaia are a otinako aomata ao a uotii baikai bwa a na karaoi iai aia umwanrianna, ngaiia n tatabemania nako i aon taubukin aia auti, ao i nanon aia katawanang, i nanoni katawanangin ana auti te Atua ae koaua,+ i nanoni maraeni Mataroan te Ran,+ ao i nanoni maraen te Mataroa ae Eberaim.+ 17 Mangaia are a a karaoi umwanrianna te botaki n aomata ake a oki man te kataenikaiaki ao a mamaeka n umwanrianna, bwa a tuai mani karaoa te aekaki aei tibun Iteraera man ana bong Iotua+ are natin Nun ni karokoa te bong arei, ai ngaia are e a boo atin te kimwareirei ae bati.+ 18 Ao e wawarekaki bokin ana Tua te Atua ae koaua+ n te bong ae koraki, man te moani bong ni karokoa te kabanea ni bong. Ao a karaoa te toa i nanon itibong, ao e karaoaki te botaki ae okoro n te kawanua ni bong, n aron are baireaki.+

9 A a ikotaki tibun Iteraera n 24 iai bongin te namwakaina aei, ao a aki mamatam ma ni kunnikainia n te raerobwa* ao a kamraraa te tano i aon atuia.+ 2 A kaokoroia ngkanne kanoaia tibun Iteraera aikai mairouia ianena ni kabane,+ ao a teirake ma ni kaotii oin aia bure ao aia kairua tamaia.+ 3 Ao a teirake n aia tabo ao a wareware ni kabaibati mani bokin ana Tua+ Iehova ae Atuaia, i nanon tenua te aoa* n te ngaina arei, ao a kaotii aia bure i nanon tenua riki te aoa ma ni bobaraaki nakon Iehova ae Atuaia.

4 A tei Ietua, Bani, Katemiera, Tebanaia, Bunni, Terebaia,+ Bani, ao Kenani, i aon aia bao+ tibun Rewi ae karietaaki, ao a tang n te bwanaa ae korakora nakon Iehova ae Atuaia. 5 Ao a taku tibun Rewi aika Ietua, Katemiera, Bani, Atiabeneia, Terebaia, Oria, Tebanaia, ao Betaea: “Teirake ao karaoiroa Iehova ae Atuami n aki totoki.+ Ao ke a karaoiroa aram ae mimitong, ae e tau ni karaoiroaki riki ao ni karineaki.

6 “Bon tii ngkoe Iehova,+ ko karaoa karawa, eng karawani karawa, ao bwaai ni kabane* ake iai, te aonnaba ma bwain aona ni kabane, ao marawa ma bwain nanona ni kabane. Ko kateimatoai maiuia ni kabane, ao a bobaraaki nakoim bwaini karawa ni kabane.* 7 Boni ngkoe Iehova ae te Atua ae koaua, are ko rinea Aberam+ ao ko kairia ni kaotinakoa mai Ura+ are abaia I-Kareria ao ko aranna bwa Aberaam.+ 8 Ko nora nanona ae kakaonimaki i matam,+ ai ngaia are ko karaoa te berita ma ngaia bwa ko na anganna abaia tibuni Kanaan, tibun Eta, taian Amoraite, taiani Beritaite, I-Iebuti, ao taiani Kirekataite, bwa e na angania kanoana,*+ ao ko kawakin am berita, ibukina bwa ko raoiroi.

9 “Mangaia are ko nora karawawataaia ara bakatibu i Aikubita,+ ao ko ongo tangia n Taari ae Uraura. 10 Ao ko karaoi kanikina ma kakai n ekaanako Barao ma ana toro ni kabane ao kaain abana ni kabane,+ bwa ko ataia bwa a kan rarabakau+ n ekiianako am aomata. Ko karekea atongan aram ae teimatoa ni karokoa te bong aei.+ 11 Ao ko bwenauaa taari imwaia, n te aro are a a rianna nakon iterana are teuana i aon te aba ae mwau,+ ao ko tewenakoia taani kaeiia naakai i kabini marawa n ai aron te atibu ae karenakoaki nakon taari ae buaka.+ 12 Ko kairiia n te ngaina n te boua ae te nang, ao n te tairiki n te boua ae te ai bwa ko kaotaa te kawai ae a riai n nako iai.+ 13 Ao ko ruo nako aon te Maunga ae Tinai+ ao ko taetae ma ngaiia mai karawa+ ao ko angania mooti aika raraoi, tuua aika boto i aon te koaua,* ao taeka aika raraoi ma kaetieti.+ 14 Ko kaota nakoia am bongi n Taabati+ ae tabu, ao ko angania kaetieti, taeka, ao te tua rinanon am toro are Mote. 15 Ko angania te amwarake mai karawa ngke a baki,+ ao ko kaotinakoa te ran man te bwaa ngke a taka,+ ao ko tuangia bwa a na rin ao n abana te aba are ko taetae n tuea* bwa ko na angania.

16 “Ma a kan rarabakau+ ara bakatibu ao a imanono,*+ ao a aki kan ongo n am kaetieti. 17 A rawa n ongo,+ ao a aki uringi am mwakuri aika rangi ni kamimi ake ko karaoi i buakoia, ma a imanono* ao a rinea te mataniwi temanna bwa a na oki nakon tautoronakia i Aikubita.+ Ma boni ngkoe te Atua ae ko tauraoi ni kabwarai buure,* ko atataiaomata* ma n nanoanga, ko iremwe n un ao e bati iroum te tangira ae koaua,*+ ao ko aki kitania.+ 18 E ngae naba ngke a karaoa aia kao te teei ae te bouannanti ae te biti* ao a kangai, ‘Aio Atuam are kairiko ni kaotinakoko man te aba are Aikubita,’+ ao a karaoi mwakuri n aki karinerine aika korakora, 19 ma ko aki naba kitania n te rereua ibukin am nanoanga ae korakora.+ E aki roko n te kitana etaia te boua ae te nang n te ngaina bwa e na kairiia i nanon te kawai, ke te boua ae te ai n te bong bwa e na kaotaa te kawai are a riai n toua.+ 20 Ao ko anga taamneim ae raoiroi bwa e na kawanawanaia,+ ao ko aki taua am manna mairouia,+ ao ko angania te ran ngke a taka.+ 21 Bwa ko kakarekei kanaia n te rereua i nanon 40 te ririki.+ Akea te bwai ae a tare iai. A aki roko n te mane aia kunnikai+ ao a aki naba tibu waeia.

22 “Ko angania naakai taian tautaeka n uea ma botannaomata, ao ko tibwatibwaa nakoia te aba teuana ma teuana,+ n te aro are a abana aban Taion+ are aban uean Etiibon,+ n ikotaki ma aban Oka+ are ueani Batian. 23 Ao ko kabatiaia natiia n ai aron itoini karawa.+ Ao ko kairiia nakon te aba are ko a tia ni beritanna nakoia aia bakatibu bwa a na rin iai ao n abanna.+ 24 Mangaia are a rin iai natiia ma n abanna,+ ao ko kataenikaiia tibuni Kanaan+ ake kaain te aba i mataia naakai, ao ko anga ngaiia ma aia uea ao botannaomatan te aba nako nanoni baia naakai, bwa a na karaoa nakoia are a bon taku. 25 Ao a taui kaawa aika nonoaki+ ao te aba+ ae maiureirei* ao a bwaini auti aika on n aeka ni bwai nako aika raraoi, mwarua n ran ake a a kamani kenaki, nne ni kureebe, nne n oriwa,+ ao kainnamwarake aika bati. Mangaia are a amwarake ao a nuai ao a marikarika ao a kimwareirei ni koaua n raoiroim ae bati.

26 “Ma a aikoa ongeaba ao a karitei nakoim+ ma ni katinanikua am Tua.* A tiringia am burabeti ake a anga te kauring nakoia bwa a aonga ni kaokiia nakoim, ao a karaoi mwakuri n aki karinerine aika korakora.+ 27 Ibukin aei ao ko a anga ngaiia nako nanoni baia taani kakaaitaraia,+ ake a teimatoa ni karawawataia.+ Ma a tang nakoim n aia tai ni karawawataaki ao ko ongo mai karawa, ao ko karekeia taani kamaiuia ibukin am nanoanga ae korakora, bwa a na kamaiuia mai nanoni baia taani kakaaitaraia.+

28 “Ma ngke a kabebeteaki naba ngkekei, ao a a manga karaoa ae buakaka i matam,+ ao ko kitania i nanoni baia taani kairiribai nakoia, ake a taui aroia.*+ Ao a oki ao a weteiko ibukini buokaia,+ ao ko ongo mai karawa ao e bati am tai ni kamaiuia ibukin am nanoanga ae korakora.+ 29 E ngae ngke ko anga te kauring nakoia bwa ko aonga ni kaokiia nakon am Tua, ma a kan rarabakau ao a rawa n ongo n am kaetieti,+ ao a bure nakon am taeka, are e na maiu te aomata ngkana e kakairi iai.+ Ma a imanono n anga akuia ao ni kamatoatoai roroaia, ao a rawa n ongo. 30 Ko karababaa am taotaonakinnano nakoia+ i nanon ririki aika bati ao ko teimatoa n anga te kauring nakoia rinanon taamneim irouia am burabeti, ma a rawa n ongo. N tokina ao ko a anga ngaiia nako nanoni baia botannaomatan aaba.+ 31 Ao ko aki kamaunaia ibukin am nanoanga ae korakora+ ke ni kitania, bwa bon te Atua ngkoe ae ko atataiaomata* ma n nanoanga.+

32 “Ao ngkai, ngkoe ae Atuara, ae te Atua ae kakannato, ae mwaaka, ao ae kamimi ma ni kakamaaku, are e kakawakina ana berita ma ni kaotiota te tangira ae koaua,*+ a na tai atongaki bwa a uarereke iroum kangaanga ni kabane ake a roko iroura, irouia ara uea, ara toka,+ ara ibonga,*+ ara burabeti,+ ara bakatibu, ao am aomata ni kabane man aia bong uean Aturia+ ni karokoa te bong aei. 33 Ko raoiroi n aki ongei bwaai ni kabane ake a roko iroura, bwa ko bwabwaina te kakaonimaki, ma boni ngaira aika ti kakaraoa ae buakaka.+ 34 Ni kaineti ngkanne ma ara uea, ara toka, ara ibonga, ao ara bakatibu, a aki kawakina am Tua, ke ni mutiakin am kaetieti ke am kauring ake ko anga bwa te kauring nakoia. 35 E ngae ngke iai aia tautaeka n uea ngkoa ao a kimwareirei n te raoiroi ae bati are ko angania, ao a mena n te aba ae raababa ma ni maiureirei* are ko angania, ma a bon aki toro iroum+ ao a aki rairakinako man aia mwakuri aika bubuaka. 36 Mangaia are ai tooro ngaira+ n te bong aei, eng, tooro n te aba are ko angania ara bakatibu bwa a na kaakang uaana ma baika raraoi ake iai. 37 Uaana aika bati bon ibukia ueea aika ianena ake ko kamenaia i aora ibukin ara bure.+ A taui aron rabwatara ao aroia ara nanai ni man n aron are a bon taku, ao a a korakora rawawatara.

38 “Mangaia are ibukini baikai ni kabane, ti a karaoa te berita ae matoatoa+ n te koroboki, ae kakoauaaki n aia bwai ni kanikina ara toka, tibun Rewi, ao ara ibonga.”+

10 Aikai te koraki ake a kakoauaa te berita ao ni kaaki aia bwai ni kanikina iai:+

9 Aikai naba tibun Rewi: Ietua are natin Atuania, Binnui mai buakoia natin Enatata, Katemiera+ 10 ao tariia aika Tebanaia, Oria, Kerita, Beraaia, Aanan, 11 Miika, Reoba, Atiabaia, 12 Takura, Terebaia,+ Tebanaia, 13 Oria, Bani, ao Beninu.

14 Aikai aia mataniwi aomata: Baroti, Baatamoaba,+ Eram, Taatu, Bani, 15 Bunni, Atukata, Bebai, 16 Atoniia, Bikiwai, Arin, 17 Aitera, Etekia, Atiura, 18 Oria, Atuum, Beitai, 19 Ariba, Anatota, Nebai, 20 Makebiati, Meturam, Eitira, 21 Metetabera, Tatoka, Iarua, 22 Beratia, Aanan, Anaia, 23 Ootea, Aanania, Atiuba, 24 Aroeti, Bira, Tiobeki, 25 Reum, Atiabena, Maateia, 26 Aiia, Aanan, Anan, 27 Maruka, Arim, ao Banaa.

28 Ao nikiraia aomata, aika ibonga, tibun Rewi, taan teiakina mataroan te oo, taan anene, tooro* n te tembora, ao aomata nako ake a kaokoroia mairouia botannaomatan aaba bwa a na kakairi n ana Tua te Atua ae koaua,+ n ikotaki ma buuia, natiia mwaane, ao natiia aine, ake te koraki ni kabane ake a kona n ota n te taetae n tuea,* 29 a raonia tariia, ake aia rorobuaka aika kakannato, ao a kabaeia n te rekenikai ao n te taetae n tuea bwa a na nakonako n ana Tua te Atua ae koaua, are e anganaki te aba rinanoni Mote, are ana toro te Atua ae koaua, ao ni kakairi raoi n ana kaetieti ni kabane Iehova are ara Uea, ana moti, ao ana babaire. 30 Ti na aki anga natira aine nakoia botannaomatan te aba, ao ti na aki anaiia natiia aine ibukia natira mwaane.+

31 Ngkana a uotiimai aia bwai botannaomatan te aba ma uita* n aekaia nako bwa a na kaboonakoi n te bongi n Taabati, ao ti na aki kabooa te bwai teuana mairouia n te bongi n Taabati+ ke n te bong ae tabu.+ Ti na angan te aba aei te motirawa n te kaitiua n ririki+ ao ni mwaninga taekan taian taarau ni kabane.+

32 Ti kaaki naba te uota i aora bwa ti bon riai ngaira n tatabemanira nako n anga katenimwakoron te tiekera* ni katoa ririki ibukin te beku n ana auti* Atuara,+ 33 ibukin te bwerena*+ are kauaataoaki, te karea ae te amwarake*+ are kakareanaki, te karea ni kabuekaki ae kakareanaki ni boongi n Taabati,+ ni bongin nako otin namwakaina,+ ibukin tooa ake a baireaki taia,+ ibukini bwaai aika tabu, ibukin te karea ni kabwarabure+ bwa e na karaoaki iai karekeani kabwaraan aia bure tibun Iteraera, ao ibukini mwakuri ni kabane n ana auti Atuara.

34 Ti ukoukora naba te kanikina* mairoun te Atua ni kaineti ma karekean te aia ae a riai n uotia ibonga, tibun Rewi, ao aomata nakon ana auti Atuara, ni kaineti ma ara koraki mairouia tamara, n taia aika baireaki ni katoa ririki, bwa a na kabueki i aon ana baonikarea Iehova ae Atuara, ni kaineti ma are e koreaki n te Tua.+ 35 Ti na uotii naba moan uaanikai aika tawaa mai abara ao moan uaanikai aika tawaa mani kainnamwarake n aekaia nako, ni katoa ririki nakon ana auti Iehova,+ 36 n ikotaki ma aia karimoa natira mwaane ma aia karimoa ara nanai ni man,+ ni kaineti ma are koreaki n te Tua, ao aia karimoa ara kao ma ara tiibu. Ti na kairiia nakon ana auti Atuara, nakoia ibonga ake a beku n ana auti Atuara.+ 37 Ti riai naba n uotii nakoia ibonga moan ara burawa aika aki manti raoi,+ ara angabwai, uaanikai mani kainnamwarake n aekaia nako,+ te wain ae boou, ao te oera,+ nakon taian ruu ni kaikobwai* ake n ana auti Atuara,+ n ikotaki ma te kabwianibwai mai abara nakoia tibun Rewi,+ bwa bon tibun Rewi ake a ririkoi taiani kabwianibwai man ara kaawa n ununiki ni kabane.

38 Ao e riai te ibonga ae tibun Aaron, n raonia tibun Rewi ngkana a rikoa te kabwianibwai tibun Rewi, ao a riai tibun Rewi n uota katebwinani mwakoron te kabwianibwai nakon ana auti Atuara,+ nakon taian ruu* ake n te auti ni kaikobwai. 39 Bwa a riai tibun Iteraera ao natiia tibun Rewi n uota te angabwai+ ae te uita, te wain ae boou, ao te oera,+ nakon taian ruu ni kaikobwai,* ike a mena iai bwaai ni mwakuri n te tabo ae tabu, n ikotaki ma ibonga ake a beku, taan teiakina mataroan te oo, ao taan anene. Ti motikia i nanora bwa ti na aki kaaki taekan ana auti Atuara.+

11 Ao a maeka aia toka aomata i Ierutarem, ma a ukoukora te kanikina* mairoun te Atua+ nikiraia aomata bwa a na katebenakoia kaka temanna mai buakoia kaka tengaun bwa a na maeka i Ierutarem,+ ae te kaawa ae tabu, ao ake kaka ruaman a na tiku ni kaawa ake tabeua. 2 Ao aomata a kakabwaiaia mwaane ni kabane ake a anganano bwa a na maeka i Ierutarem.

3 Ao aikai mataniwin te aono* ake a maeka i Ierutarem. (Nikiraia tibun Iteraera, ibonga,* tibun Rewi, tooro* n te tembora,+ ao tibuia ana toro Toromon,+ a maeka ni kaawan Iuta ake tabeua riki, temanna ma temanna n oin ana tabo n ana kaawa.+

4 A maeka naba i Ierutarem tabeman kaain Iuta ao Beniamin.) Mai buakoia kaain Iuta bon Ataiaa are natin Utia are natin Tekaria are natin Amaria are natin Tebatia are natini Maararera are temanna mai buakoia tibuni Bereti,+ 5 ao Maateia are natini Baruka are natini Korotie are natin Atiaia are natin Ataia are natin Ioiariba are natin Tekaria are man te utu are Tiera. 6 Tibuni Bereti ni kabane ake a maeka i Ierutarem bon 468 mwaane aika konabwai.

7 Ao aikai tibuni Beniamin: Tiaru+ are natini Meturam are natin Ioeta are natini Betaia are natini Koraia are natini Maateia are natin Itiera are natin Ietiaia, 8 ao imwin teuaei bon ana utu Kabai ma Tarai, ae botaia 928, 9 ao aia mataniwi bon Ioera are natin Tikeri, ao te kauoman ni mataniwi n te kaawa bon Iuta are natin Atenua.

10 Mai buakoia ibonga: Bon Ietaia are natin Ioiariba, Iakin,+ 11 Teraia are natin Irekia are natini Meturam are natin Tatoka are natini Meraiota are natin Aituba,+ are te tia kairiri n ana auti* te Atua ae koaua, 12 ao tariia ake a karaoa te mwakuri n te auti bon 822, ao Ataia are natin Ieroam are natini Beraria are natin Amti are natin Tekaria are natini Batiura+ are natini Marekiia, 13 ao tarina ake mataniwi i aoia aia koraki mairoun tamaia bon 242, ao Amatitai are natin Atareru are natin Aatai are natini Metiremota are natin Immera, 14 ao tariia ake mwaane ake a korakora ma n ninikoria bon 128, ao aia mataniwi bon Taberiera are kaain te utu ae kakannato.

15 Ao mairouia tibun Rewi: Bon Temaia+ are natin Atiuba are natin Atirikam are natin Atiabaia are natini Bunni, 16 ao a tararuaa te mwakuri are i tinanikun ana auti te Atua ae koaua Tiabetai+ ma Iotabata+ ake mai buakoia mataniwia tibun Rewi, 17 ao Matania+ are natini Mika are natin Taberi are natin Ataba,+ bon te tia kaira te anene, are e kakaira te nebonebo n tain te tataro,+ ao Bakibukia bon te kauoman i buakoia tarina, ao Abeta are natin Tiammua are natini Karara are natin Ierutun.+ 18 Mwaitiia tibun Rewi ni kabane n te kaawa ae tabu bon 284.

19 Ao taan teiakina mataroan te oo bon Akuba ma Taremoni,+ ao tariia ake a teimatoa n tantani ni mataroan te oo bon 172.

20 A mena nikiraia tibun Iteraera, ibonga, ao tibun Rewi, ni kaawan Iuta ake tabeua, temanna ma temanna n tibwangana are e bwaibwai iai. 21 A maeka naake tooro* n te tembora+ i Oobera,+ ao taan tararuaia tooro* n te tembora bon Tiiaa ma Kitiba.

22 Te mataniwi irouia tibun Rewi i Ierutarem bon Utiti are natini Bani are natin Atiabaia are natini Matania+ are natini Miika are temanna i buakoia natin Ataba, ake taan anene, boni ngaia te tia tararuaa te mwakuri n ana auti te Atua ae koaua. 23 Bwa iai ana tua te uea ibukia,+ ao iai te bwauna ae baireaki ibukia taan anene n aron ae kainnanoaki ni katoabong. 24 Ao Betaea are natini Metetabera are temanna i buakoia tibun Teera are natin Iuta, bon te tia anga te taeka n reirei nakon te uea* ibukini bwaai nako aika irekereke ma aomata.

25 Ni kaineti ngkanne ma taabo ni maeka ao tawaana ake iai, tabeman kaain Iuta a maeka i Kiriataareba+ ma kaawa ake a mena i aana,* i Ribon ma kaawa ake a mena i aana, i Iekabeteera+ ma taabo ni maeka ake iai, 26 i Ietua, i Morata,+ i Betabereta,+ 27 i Atatuara,+ i Beerateba ma kaawa ake a mena i aana,* 28 i Tikeraka,+ i Mekona ma kaawa ake a mena i aana,* 29 i Enrimmon,+ i Toraa+ ao i Iaremuta, 30 i Tanoa,+ i Aruram ma taabo ni maeka ake iai, i Rakiti+ ma tawaana ake iai, ao i Ateka+ ma kaawa ake a mena i aana.* A maeka* mai Beerateba ni karokoa te Mwarua ae Innom.+

31 Ao a maeka kaaini Beniamin i Keeba,+ Mikemati, Aiaa, Betaera+ ma kaawa ake a mena i aana,* 32 Anatota,+ Nobo,+ Ananiaa, 33 Atiora, Rama,+ Kitaim, 34 Aatita, Teboim, Nebarata, 35 Roota, ao Ono,+ ao n aia mwarua taani karaobwai aika mwaatai. 36 Ao aia koraki tabeman tibun Rewi ake mai Iuta a kamwaingaki nako Beniamin.

12 Aikai ibonga* ma tibun Rewi ake a waerake ma Terubabera+ are natin Tearetiera+ ao Ietua:+ Teraia, Ieremia, Etira, 2 Amaria, Maruka, Atuti, 3 Tekania, Reum, Meremota, 4 Ito, Kinnetoi, Abiia, 5 Miiamin, Maaria, Bireka, 6 Temaia, Ioiariba, Ietaia, 7 Tiaru, Amoka, Irekia, ao Ietaia. Naakai boni mataniwi i aoia ibonga ao i aoia naake tariia n ana bong Ietua.

8 Tibun Rewi bon Ietua, Binnui, Katemiera,+ Terebaia, Iuta, ao Matania,+ are e kaira te anene ni katituaraoi ma naake tarina. 9 Ao a tei n tantani tariia ake Bakibukia ma Unni ni kaaitaraia naakai.* 10 Ietua bon taman Ioiakim, ao Ioiakim bon taman Eriatiba,+ ao Eriatiba bon taman Ioiata.+ 11 Ao Ioiata bon taman Ionatan, ao Ionatan bon taman Iarua.

12 N ana bong Ioiakim ao bon aikai ibonga, ake mataniwi i aoia aia koraki mairoun tamaia: Ae e tei ibukin Teraia+ boni Meria, ibukin Ieremia bon Aanania, 13 ibukin Etira+ boni Meturam, ibukin Amaria bon Ieoanan, 14 ibukini Maruki bon Ionatan, ibukin Tebanaia bon Ioteba, 15 ibukin Arim+ bon Atena, ibukini Meraiota bon Erekai, 16 ibukin Ito bon Tekaria, ibukini Kinneton boni Meturam, 17 ibukin Abiia+ bon Tikeri, ibukini Miniamin bon . . . ,* ibukini Moaria boni Biretai, 18 ibukini Bireka+ bon Tiammua, ibukin Temaia bon Ieonatan, 19 ibukin Ioiariba boni Matenai, ibukin Ietaia+ bon Utiti, 20 ibukin Tarai boni Karai, ibukin Amoka bon Ebere, 21 ibukin Irekia bon Atiabaia, ao ibukin Ietaia bon Netanera.

22 N ana bong Eriatiba, Ioiata, Ioaanan, ma Iarua,+ ao a a koreaki araia tibun Rewi ake mataniwi i aoia aia koraki mairoun tamaia, ao ai aroia naba ibonga, rikaaki ni karokoa ana tautaeka Taraiati are te I-Botia.

23 A koreaki taekaia tibun Rewi ake a mataniwi i aoia aia koraki mairoun tamaia n te boki are rongorongon aia tai, rikaaki ni karokoa ana bong Ioaanan are natin Eriatiba. 24 Aia mataniwi tibun Rewi bon Atiabaia, Terebaia, ao Ietua+ are natini Katemiera,+ ao a tei naake tariia ni kaaitaraia bwa a na anga te karaoiroi ao te katituaraoi ni kaineti ma ana kaetieti Tawita+ are ana aomata te Atua ae koaua, ao a kaaitara taan tantani te korakina ma taan tantani ake te korakina. 25 A tei n tantani Matania,+ Bakibukia, Obaria, Meturam, Taremoni, ao Akuba,+ bwa taan teiakina mataroan te oo,+ ao a tantani n taian ruu ni kaikobwai ake i rarikini mataroan te oo. 26 A beku naakai n ana bong Ioiakim are natin Ietua+ are natin Iotataka, ao n ana bong Neemia are te kowana ao Etira+ are te ibonga are te tia kaewewe.*

27 A ukoukoriia tibun Rewi ngke e nang katabuaki oon Ierutarem, ao a kairiia nako Ierutarem man taabo nako ake a maeka iai bwa a na bukamarua te katabu ma te kimwareirei, n taian anene ni katituaraoi,+ ao n taian timbara, bwaai ni katangitang aika iai karaiia, ao taian abi. 28 Ao a ikotaki natiia taan anene* man te aono,* are mai rarikin Ierutarem ni kabutaa, man aia tabo nako ni maeka I-Netoba,+ 29 mai Betakirekara,+ ao man taian tawaana ake i Keeba+ ao i Atimaweta,+ bwa a katei aia tabo ni maeka taan anene i rarikin Ierutarem ni kabutaa. 30 Ao a kaitiakiia i bon irouia ibonga ma tibun Rewi, ao a kaitiakiia aomata+ ma mataroan te oo,+ ao te oo.+

31 Ao I kairiia tokan Iuta ni kawaerakeia nako aon taubukin te oo. Ao I mwiokoiia taan anene ni katituaraoi aika uakoraki aika bati kaaia ao te koraki aika a na rimwia naakai, ao a nakonako ake te korakina nakon te angaatai i aon te oo ni kaineta Mataroan te Bwariko ni Mannang.+ 32 Ao e nakonako i akuia Otiaia ma iterani mwaitiia tokan Iuta, 33 n ikotaki ma Ataria, Etira, Meturam, 34 Iuta, Beniamin, Temaia, ao Ieremia. 35 Ao raoia bon tabeman mai buakoia natiia ibonga ma uotaia taiani buu,+ are Tekaria are natin Ionatan are natin Temaia are natini Matania are natini Mikaia are natin Takura are natin Ataba,+ 36 ao naake tarina ake Temaia, Atareru, Mirarai, Kirarai, Maai, Netanera, Iuta, ao Aanani, ma ana bwai ni katangitang Tawita+ are ana aomata te Atua ae koaua, ao e rimoaia Etira+ are te tia kaewewe.* 37 Ao a ararake i rarikini Mataroan te Koburake n Ran+ ni Kaintamwaraken+ Ana Kaawa Tawita,+ n te kawai n ararakea te oo are i etan ana Auti Tawita ao nako aoni Mataroan te Ran+ nako mainiku.

38 Taan anene ni katituaraoi ake te korakina a nakonako ni kaaitaraia,* ao I ririmwia ma iterani mwaitiia aomata, i aon te oo ni waerake nako etan te Taua n Ai n Umum+ ao nako aon te Oo ae Raababa,+ 39 ao ni waerake nako etan te Mataroa ae Eberaim+ ao nako aoni Mataroan te Kaawa Nikawai+ ao nako aon te Mataroa n Ika,+ Ana Taua Ananera,+ te Taua ae Mea, ao nako aon te Mataroa n Tiibu,+ ao a toki n Aia Mataroa Taan Tantani.

40 N tokina ao a a tei taan anene ni katituaraoi aika uakoraki aikai i matan ana auti te Atua ae koaua, ao ngai naba, ao raou iterani mwaitiia taan tautaeka aika taiani kauoman, 41 ao ibonga aika Eriakim, Maateia, Miniamin, Mikaia, Erioenai, Tekaria, ao Aanania, ma taiani buu, 42 ao Maateia, Temaia, Ereata, Utiti, Ieoanan, Marekiia, Eram, ao Etia. Ao a anene n takarua taan anene i aan ana kairiri Ietiraia.

43 N te bong anne ao a anga taiani karea aika rangi ni bati ao a kimwareirei,+ bwa e kakimwareireiia te Atua ae koaua n te kimwareirei ae bati. A kimwareirei naba+ aine ma ataei, n te aro are e a kona n ongo te aba te kimwareirei are i Ierutarem mai kiraroa.+

44 N te bong anne ao a rineaki mwaane bwa a na tararuai auti ni kaikobwai+ ake nnen taian angabwai,+ taiani moan uaa,+ ao taiani kabwianibwai.+ Bwa a na ikotii nako iai man taian tawaana ake ni kaawa nako, taian tibwanga ake a baireaki n te Tua+ ibukia ibonga ao tibun Rewi,+ bwa e a boo atin te kimwareirei i Iuta, ibukia ibonga ma tibun Rewi ake a beku. 45 Ao a a moana karaoan aia mwakuri ake mairoun Atuaia ao tabeia ni kaineti ma kaitiakaia aomata nako, ao ai aroia naba taan anene ma taan teiakina mataroan te oo, ni kaineti ma ana kaetieti Tawita ma natina ae Toromon. 46 Bwa ngkoangkoa n ana bong Tawita ma Ataba, ao iai taani kairi* ibukia taan anene ao ibukin te anene n nebonebo ao ni katituaraoi nakon te Atua.+ 47 Ao a bane tibun Iteraera n ana bong Terubabera+ ao n ana bong Neemia, n anganga te amwarake nakoia taan anene+ ao taan teiakina mataroan te oo,+ ni kaineti ma are e kainnanoaki ni katoabong. A kaokoroa naba te amwarake ibukia tibun Rewi,+ ao tibun Rewi a kaokoroa te amwarake ibukia kanoan Aaron.

13 N te bong anne ao e a warekaki ana boki Mote ao a ongora aomata,+ ao e kuneaki ae mwakoro iai ae a aki riai tibun Ammon ke tibuni Moaba+ ni kaaina ana botaki n aomata te Atua ae koaua,+ 2 bwa a aki anga te kariki ao te ran nakoia tibun Iteraera, ma n oneani mwin anne, a kabooa Baraam bwa e na kamaraiaia.+ Ma e bita te kamaraia anne Atuara nakon te kakabwaia.+ 3 Ngke a bon ongo naba ngkekei taekan te Tua, ao a a kaokoroia te koraki nako ake kanoaia ianena*+ mai buakoia tibun Iteraera.

4 Ao imwain aei, ao te ibonga* are tararuai taian ruu ni kaikobwai* ake n ana auti* Atuara+ bon Eriatiba,+ are ana koraki Tobia.+ 5 E katauraoa te ruu ni kaikobwai* teuana ae bubura ibukin teuaei, are te tabo are a kakatuka ngkoa iai te karea ae te amwarake, te ribano,* ao bwaai ni mwakuri, ao katebwinani mwakoron* te uita,* te wain ae boou, ao te oera,+ ake baike a riai n anganaki tibun Rewi,+ taan anene, ao taan teiakina mataroan te oo, n ikotaki naba ma te angabwai ibukia ibonga.+

6 Ao n taai aikai ni kabane ao I aki mena i Ierutarem, bwa I nakon te uea n ana ka-32 n ririki+ n tautaeka Atatokititi+ are Ueani Baburon, ao tabeua te tai imwina riki I a bubutii anaakin au motirawa. 7 Ao I a roko i Ierutarem ao I nora te bwai ae rangi ni buakaka are e a tia ni karaoia Eriatiba+ ibukin Tobia,+ n arona ni katauraoa te ruu ni kaikobwai ibukin teuaei n te katawanang are n ana auti te Atua ae koaua. 8 E rangi n aki kakukurei te baei irou, ngaia are I a tetewenakoi bwain ana auti Tobia i tinanikun te ruu ni kaikobwai.* 9 Imwin anne ao I tua, ao a kaitiakii taian ruu ni kaikobwai,* ao I kaoki nako iai bwain ana auti te Atua ae koaua,+ ma te karea ae te amwarake ao te ribano.*+

10 I kunea naba bwa a aikoa anganganaki tibwangaia+ tibun Rewi,+ ngaia are a a nako tibun Rewi ao taan anene ake a beku, nakon aia tawaana+ n tatabemania nako. 11 Ngaia are I a boaiia taan tautaeka ake taiani kauoman+ ao I taku: “E aera ngkai e a kaakaki taekan ana auti te Atua ae koaua?”+ Ao I ikotiia tibun Rewi ao I kaokiia nakon tabeia. 12 Ao a bane kaain Iuta n uotii ni karini katebwinani mwakoron+ te uita, te wain ae boou, ao te oera, nakon ruu ni kaikobwai.+ 13 Ao I mwiokoa Teremia are te ibonga, ma Tatoka are te tia kaewewe,* ao Betaia are temanna i buakoia tibun Rewi, bwa a na tararuai taian ruu ni kaikobwai, ao Aanan are natin Takura are natini Matania bwa aia tia ibuobuoki, bwa a iangoaki mwaane aikai bwa a kona n onimakinaki. Tabeia naakai bwa a na karaoa te tibwatibwa nakoia tariia.

14 Ko na uringai+ ngkoe ae Atuau ni kaineti ma te baei, ao tai kamaunai au mwakuri aika kaota te tangira ae koaua* are I karaoia ibukin ana auti Atuau ma beeku ake iai.*+

15 Ni boong akanne ao I noriia kaain Iuta n toutoui kureebe n te nne ni kamanti kureebe n te bongi n Taabati,+ ao a uotii ni karin taian uita ao ni katokai i aoia taongki, ao a uotii taiani wain, kureebe, biiku, ao ai uota n aekaia nako, nako nanon Ierutarem n te bongi n Taabati.+ Ngaia are I a anga te kauring nakoia ni kaineti ma kaboonakoan taian tianaki n te bong anne.* 16 Ao I-Turo ake a maeka n te kaawa a uotii ni karin iika ao bwaai n iokinibwai n aekaia nako, ao a kaboonakoi n te bongi n Taabati+ nakoia kaain Iuta ake a mena i Ierutarem. 17 Ngaia are I a boaiia bwaanuean Iuta ao I taku nakoia: “E aera ngkai kam karaoa te bwai ae buakaka aei, ma n urua naba te bongi n Taabati? 18 Tiaki aei are a karaoia ngkoa ami bakatibu, ai ngaia are e a karokoa iai te kabuanibwai aei ni kabane i aora Atuara, ao i aon naba te kaawa aei? Kam a karakaa riki ngkai te urarake n un n ekiianako tibun Iteraera n aromi n urua te bongi n Taabati.”+

19 Ai ngaia are n te tai naba are e nang roo iai mataroan oon Ierutarem imwain te bongi n Taabati, ao I tua bwa a na kainaki mataroa. Ao I taekina naba are a aki riai ni kauki ni karokoa ae e a bwakanako te bongi n Taabati. Ao I kateiia tabeman au tabonibai ni mataroan te oo, bwa a aonga n akea uota aika a na karinaki n te bongi n Taabati. 20 Ngaia are a a tiku i tinanikun Ierutarem n te tairiki taan iokinibwai ao taani kaboonakoi bwaai n aekaia nako, te taina ke uatai. 21 I a anga ngkanne te kauring nakoia ao I taku nakoia: “E aera ngkai kam a tiku i matan te oo n te tairiki? Ngkana kam a manga karaoia riki, ao N na kanakoingkami ma te matoa.” Man te tai anne ao a aikoa manga roko n te bongi n Taabati.

22 Ao I tuangia tibun Rewi bwa a riai ni kakaitiakiia i bon irouia, ao n roko n tantani ni mataroan te oo bwa a na kateimatoa tabun te bongi n Taabati.+ Ko na uringa naba te baei ibukiu Atuau, ao nanoangaai ni kaineti ma am tangira ae bati ae koaua.*+

23 Ni boong naba akanne ao I noriia I-Iutaia ake a mare ma aine+ ake I-Atoto,+ tibun Ammon, ao tibuni Moaba.+ 24 A taetae n Atoto iterani mwaitiia natiia, ao ake iterana a taetae n aia taetae botannaomata ake a kakaokoro, ma akea i buakoia ae e kona n taetae n aia taetae I-Iutaia. 25 Ngaia are I a boaiia ao I taetae ni karekei kaia, ao I oreiia mwaane tabeman+ ao I routi tabeua irannatuia, ao I kairoroiia bwa a na taetae n tuea iroun te Atua ni kangai: “Kam aki riai n anga natimi aine nakoia natiia mwaane, ao kam aki riai ni butimwaea temanna mai buakoia natiia aine ibukia natimi mwaane ke i bon ibukimi.+ 26 Tiaki bon ibukini baikai are e bure naba iai Toromon are Uean Iteraera? Bon akea te uea ae ai arona+ i buakoia natannaomata aika bati, ao e tangiraki iroun Atuana,+ n te aro are e a karikia te Atua bwa te uea i aoia tibun Iteraera ni kabane. Ma a karekea naba teuaei n te bure buuna ake ianena.+ 27 E a bon aki kona ni kakoauaaki ae kam kona ni karaoa te aro ae rangi ni buakaka aei, n aki kakaonimaki nakon Atuara n aromi ni mare ma aine aika ianena, tiaki ngaia?”+

28 E riki temanna te mwaane mai buakoia natin Ioiata+ are natin Eriatiba+ are te ibonga ae rietata,* bwa buun natin Tanebarata+ are te Oronaite. Mangaia are I a kakionakoa mairou.

29 Ko na uringia ngkoe ae Atuau, ibukina bwa a kamwaraea te nakoa n ibonga, ao te berita naba are karaoaki ma ibonga+ ao tibun Rewi.+

30 Ao I kaitiakiia mani kamwaraia nako ianena ao I angania ibonga tabeia ma tibun Rewi, temanna ma temanna ma ana beku,+ 31 ao I bairea karekean te aia+ n taai aika baireaki ao ibukini moan uaanikai aika tawaa.

Uringai ngkoe ae Atuau ma te akoaki.*+