ETIRA

1 N ana moan ririki Tairati+ ae Ueani Botia, ao Iehova e a kauekea nanon Tairati are Ueani Botia bwa e aonga ni kakororaoaki ana taeka Iehova are e taekinna Ieremia,+ bwa e na katanoataa rinanon aaba ake e tautaekan, are e koreia+ naba ni kangai:

2 “E kangai ana taeka Tairati are Ueani Botia, ‘E a tia Iehova ae Atuani karawa n anganai taian tautaeka n uea ni kabane n te aonnaba,+ ao e mwiokoai bwa N na katea ana auti i Ierutarem,+ are i Iuta. 3 Ngkana iai ana aomata i buakomi ni kabane, ao ke e memena Atuana irouna, ao ke e nako Ierutarem, are i Iuta, ao ni manga katea ana auti Iehova ae Atuan Iteraera. Bon te Atua ae koaua ngaia, are e mena i Ierutarem ana auti.* 4 Ane e maeka n iruwa+ n te tabo teuana ane e mena iai, ao ke e buokaki irouia kaain rarikina,* n aroia n anganna te tirewa, te koora, bwaai, ao nanai ni man, n ikotaki ma te karea ni kan anga ibukin ana auti te Atua ae koaua,+ are i Ierutarem.’”

5 Ao a katauraoiia tibun Iuta ma tibuni Beniamin aika mataniwi i aoia aia koraki mairoun tamaia, ao ibonga* ma tibun Rewi, ake te koraki ni kabane ake a kauekeaki nanoia iroun te Atua ae koaua, bwa a na waerake ao ni manga katea ana auti Iehova, are i Ierutarem. 6 Ao a bane aomata ake i rarikia ni boutokaiia, n aroia n angania* baika karaoaki man te tirewa, te koora, ao bwaai, nanai ni man, ao baika kakawaki, i rarikin taiani karea ni kan anga ni kabane.

7 Ao te Uea are Tairati e kaotinakoi naba bwain ana auti Iehova, ake e anai Nebukaneta mai Ierutarem ni kaaki n ana auti atuana.+ 8 E kaotinakoi baikai Tairati are Ueani Botia i aan ana tararua Miteretata are te tia kawakini baika kakawaki, are e wareki mwaitiia ao n angan Tietibatara*+ are te mataniwi i aon Iuta.

9 Ao aikai mwaitini baika karinanaki: bwaene aika 30 aika koora, bwaene aika 1,000 aika tirewa, 29 bwaai riki tabeua aika nneni bwaai, 10 boora aika uarereke aika 30 aika koora, boora aika uarereke aika 410 aika tirewa, ao bwaai ni mwakuri riki tabeua aika 1,000. 11 Bon 5,400 bwaai ni kabane ake a karaoaki man te koora ao te tirewa. E uotii baikai ni kabane Tietibatara, ngke a kaotinakoaki taenikai+ mai Baburon nako Ierutarem.

2 Ao aikai taani maeka n te aono,* ake a otinako mai buakoia te koraki ake taenikai,+ ake e kairiia ngkoa Nebukaneta are Ueani Baburon bwa taenikai nako Baburon,+ ao ake a a manga oki imwina riki nako Ierutarem ao nako Iuta, temanna ma temanna nakon oin ana kaawa,+ 2 ake aomata ake a airi ma Terubabera,+ Ietua,+ Neemia, Teraia, Reeraia, Moretekai, Biritan, Mitibara, Bikiwai, Reum, ao Banaa.

Aikai mwaitiia mwaane aika tibun Iteraera:+ 3 tibuni Baroti 2,172, 4 tibun Tebatia 372, 5 tibun Araa+ 775, 6 tibuni Baatamoaba,+ ake tibun Ietua ma tibun Ioaba 2,812, 7 tibun Eram+ 1,254, 8 tibun Taatu+ 945, 9 tibun Takai 760, 10 tibuni Bani 642, 11 tibuni Bebai 623, 12 tibun Atukata 1,222, 13 tibun Atonikam 666, 14 tibuni Bikiwai 2,056, 15 tibun Arin 454, 16 tibun Aitera, ake mairoun Etekia 98, 17 tibuni Beitai 323, 18 tibun Iora 112, 19 tibun Atuum+ 223, 20 tibuni Kiba 95, 21 rorobuakani Betereem 123, 22 rorobuakan Netoba 56, 23 rorobuakan Anatota+ 128, 24 rorobuakan Atimaweta 42, 25 rorobuakani Kiriataearim, Kebira, ao Beerota 743, 26 rorobuakan Rama+ ao Keeba+ 621, 27 rorobuakani Mikemaati 122, 28 rorobuakani Betaera ao Ai+ 223, 29 rorobuakan Nebo+ 52, 30 rorobuakani Makebiti 156, 31 tibun Eram are temanna riki 1,254, 32 tibun Arim 320, 33 rorobuakan Roota, Aatita, ao Ono 725, 34 rorobuakan Ieriko 345, 35 rorobuakan Tenaa 3,630.

36 Aikai ibonga:*+ tibun Ietaia+ ake man ana utu Ietua+ 973, 37 tibun Immera+ 1,052, 38 tibuni Batiura+ 1,247, 39 tibun Arim+ 1,017.

40 Aikai tibun Rewi:+ tibun Ietua ao tibuni Katemiera,+ ake tibun Otawia 74. 41 Taan anene+ bon tibun Ataba+ 128. 42 Aikai tibuia taan teiakina mataroan te oo:+ tibun Tiarum, tibun Aitera, tibun Taremoni,+ tibun Akuba,+ tibun Atita, ao tibun Tiobai, botaia ni kabane bon 139.

43 Aikai tooro*+ n te tembora: tibun Tiiaa, tibun Atuuba, tibun Tabaote, 44 tibuni Keroti, tibun Tiaa, tibuni Baton, 45 tibun Rebana, tibun Akaba, tibun Akuba, 46 tibun Akeba, tibun Tiaremai, tibun Aanan, 47 tibuni Kitera, tibuni Kaa, tibun Reaia, 48 tibun Retin, tibun Nekota, tibuni Katiam, 49 tibun Utaa, tibuni Betea, tibuni Betai, 50 tibun Atinata, tibuia taiani Meunim, tibun Nebutim, 51 tibuni Bakebuka, tibun Akubwa, tibun Areura, 52 tibuni Batiruta, tibuni Meita, tibun Aretia, 53 tibuni Barekoti, tibun Titera, tibun Temaa, 54 tibun Netia, ao tibun Atiba.

55 Aikai tibuia ana toro Toromon: tibun Totai, tibun Tobereta, tibuni Beruta,+ 56 tibun Iaraa, tibun Tarekon, tibuni Kitera, 57 tibun Tebatia, tibun Atiro, tibuni Bokaretaatebaim, ao tibun Ami.

58 Botaia tooro* n te tembora ma tibuia ana toro Toromon bon 392.

59 Ao aikai naake a waerake mai Teremeraa, Teraaretia, Kerubim, Aton, ao Immera, ma a aikoa kona ni kaotii aia utu mairoun tamaia ao rikia, bwa tibun Iteraera ngaiia ke tiaki:+ 60 tibun Teraaia, tibun Tobia, ao tibun Nekota 652. 61 Ao aikai tibuia ibonga: tibun Abaia, tibun Akoti,+ tibuni Baretirai, are e karekea buuna mai buakoia aine ake natini Baretirai+ are te I-Kireata, ao e aranaki n araia. 62 Naakai ake a kakaaei araia ake a koreaki bwa a na katei rikia, ma a aki roko n te kunei, mangaia are a a kabaneaki man te nakoa n ibonga.*+ 63 E tuangia te kowana* bwa a aki kona n amwarake mani baika moan te tabu,+ ni karokoa ae e reke te ibonga ae kona ni karekea te ibuobuoki n te Urim ma te Tummim.*+

64 Botaia te botaki n aomata arei bon 42,360,+ 65 i rarikia aia toro aika mwaane ao aine aika 7,337. Iai naba aia tia anene aika 200, aika mwaane ma aine. 66 Aia aoti 736, aia miure 245, 67 aia kamero 435, ao aia taongki 6,720.

68 Ngke a roko n ana auti Iehova i Ierutarem, ao tabeman mataniwi i aoia aia koraki mairoun tamaia a anga taiani karea ni kan anga+ ibukin ana auti te Atua ae koaua, ibukini manga kateana ni nnena.+ 69 Ao a anga 61,000 te turakemwa* ni koora, ibukini boutokaan te mwakuri,* 5,000 te mina* n tirewa,+ ao 100 te kamwarai ibukia ibonga, n aron are e kona n reke irouia. 70 Ao ibonga, tibun Rewi, tabeman mai buakoia aomata, taan anene, taan teiakina mataroan te oo, ao tooro* n te tembora, a maeka n aia kaawa. Ao nikiraia tibun Iteraera ni kabane a maeka n aia kaawa.+

3 Ngke e a roko te kaitiua n namwakaina,+ ao a mena tibun Iteraera n aia kaawa nako ao a ikotaki i Ierutarem ma te nano ae tii teuana. 2 E teirake Ietua+ are natin Ieotataka ma raona n ibonga,* ao Terubabera+ are natin Tearetiera+ ma naake tarina, ao a katea ana baonikarea Atuan Iteraera, bwa a aonga ni kona n anga taiani karea ni kabuekaki i aona, n aron are koreaki n te Tua Rinanoni Mote+ are ana aomata te Atua ae koaua.

3 Mangaia are a katea te baonikarea ni nnena rimoa, n aki ongei maakakia botannaomata ake n aaba ake i rarikia,+ ao a anga taiani karea ni kabuekaki nakon Iehova i aona, aika taiani karea ni kabuekaki n te ingabong ao n te tairiki.+ 4 Ao a karaoa te Toa ae Umwanrianna* ni kaineti ma are e koreaki,+ ao a kareana n te bong ae koraki te mwaiti ae kaotaki ibukin taiani karea ni kabuekaki ake a kainnanoaki ibukin te bong teuana ma teuana.+ 5 Imwina ao a anga te karea ni kabuekaki are kakareanaki,+ ma taiani karea ibukini bongin nako otin namwakaina+ ao ake ibukin tain taian toa+ nakon Iehova ni kabane ake a a tia ni katabuaki, ao ake mairouia te koraki nako ake a kan anga te karea ni kan anga+ nakon Iehova. 6 A moana kareanakin taiani karea ni kabuekaki nakon Iehova mani moani bongin te kaitiua n namwakaina,+ e ngae ngke e tuai ni kaweneaki aan ana tembora Iehova.

7 A anga te mwane nakoia taani koro atibu+ ma taani karaobwai aika mwaatai,+ ao a anga te amwarake ma te moi ao te oera nakoia I-Titon ma I-Turo, ibukin uotakini kaai aika tiira n ritaari mai Rebanon nako Iobe,+ ni kaineti ma te kariaia are a anganaki iroun Tairati are Ueani Botia.+

8 N te kauoua n ririki imwin rokoia n ana auti te Atua ae koaua i Ierutarem, n te kauoua n namwakaina, ao a moana te mwakuri Terubabera are natin Tearetiera, Ietua are natin Ieotataka, ma nikiraia tariia ake ibonga ma tibun Rewi, ao ai aomata ni kabane ake a otinako man te taenikai nako Ierutarem.+ A mwiokoiia tibun Rewi aika 20 aia ririki ni waerake, bwa a na riki bwa taan tararuaa mwakurian ana auti Iehova. 9 Mangaia are a a ikotaki Ietua ma natina mwaane ao naake tarina, ao Katemiera ma natina mwaane, aika tibun Iuta, bwa a na tararuaiia taani mwakuria ana auti te Atua ae koaua, n ikotaki ma tibun Enatata,+ ma natiia mwaane ao naake tariia, aika tibun Rewi.

10 Ngke a kawenea aan ana tembora Iehova+ taani kateitei, ao a teirake ibonga n neboa Iehova ni kunnikaia n ibonga, ma taiani buu,+ ao tibun Rewi ake tibun Ataba ma timbara, ni kaineti ma ana kaetieti Tawita are uean Iteraera.+ 11 Ao a moana aia anene n ikaekaeka+ n neboa Iehova ao ni katituaraoia “bwa e raoiroi, bwa e teimatoa n aki toki ana tangira ae koaua*+ nakoia tibun Iteraera.” Ao a bane aomata n takarua n te takarua ae korakora n neboa Iehova, ibukina bwa e a kaweneaki aan ana auti Iehova. 12 A bati ibonga, tibun Rewi, ao mataniwi i aoia aia koraki mairoun tamaia, aika mwaane aika kara ake a nora te auti are mai mwaina,+ ake a tang n te bwanaa ae korakora ngke a nora aan te auti bwa e a kaweneaki, ao a bati ake a tatakarua ni kimwareirei ni kabanei takaruaia.+ 13 Mangaia are a aikoa kona aomata n ataa kaokoroni karongoaan te takarua ni kimwareirei ma karongoaan tangia aomata, bwa a tatakarua aomata n te aro ae rangi ni karongoa, n te aro ae e a ongo te aba karongoaaia mai ike e raroanako.

4 Ngke a ongo aiaia kaain Iuta ma Beniamin+ bwa te koraki ake a oki man te taenikai+ a katea te tembora ibukin Iehova ae Atuan Iteraera, 2 ao a aki tabwara ma a a kawara naba Terubabera ma mataniwi i aoia aia koraki mairoun tamaia ao a taku nakoia: “Kariaia bwa ti na kateitei ma ngkami, bwa ti taromauria* Atuami+ n ai aromi, ao ti angakarea nakoina man ana bong Etaraaton+ are Uean Aturia, are kairira n nakomai.”+ 3 Ao Terubabera ma Ietua ao nikiraia mataniwi i aoia aia koraki mairoun tamaia aika tibun Iteraera, a taku nakoia: “Akea riaimi bwa kam na raonira ni katean ana auti Atuara,+ bwa bon tii ngaira ae ti na kateia ibukin Iehova ae Atuan Iteraera, n aron are e tua nakoira te Uea are Tairati are ueani Botia.”+

4 Ao a teimatoa kaain te aba ni kamamaarai nanoia* kaain Iuta ao ni kabwarai nanoia man te kateitei.+ 5 A kabooia taan anga te taeka n reirei bwa a na ekiianako ni kamangaoi aia babaire,+ ni kabane ana bong Tairati are Ueani Botia, ni karokoa ana tautaeka Taraiati+ are Ueani Botia. 6 Ngke e moan tautaeka Aatueruti, ao a korea te bukibuki ni kaaitaraia kaain Iuta ao Ierutarem. 7 Ao n ana bong Atatokititi are Ueani Botia, ao a koroboki Bitiram, Miteretata, Tabeera, ao raona ake tabemwaang nakon te uea are Atatokititi. A raira te reta nakon te taetae n Aramwaike,+ ni koreia ni manin te Aramwaike.*

8 * Ao Reum are te mataniwi n te tautaeka ao Timtiai are te tia koroboki, a kororeta nakon te Uea are Atatokititi n ekiianako kaain Ierutarem ni kangai: 9 (Boni mairoun Reum are te mataniwi irouia mataniwi n te tautaeka ao Timtiai are te tia koroboki, ao raoia ake tabemwaang, taani moti ao taiani kauoman ni kowana, taani koroboki, kaain Ereki,+ kaaini Baburon, kaain Tiutia,+ ae taekaia I-Eram,+ 10 ao natannaomata ake nikiraia, ake e kairiia bwa taenikai teuare kakannato ma ni karineaki are Otinaba, ao ni kamaekaia ni kaawan nako Tamaria,+ ao ake tabemwaang n te aono ae Iteran te Karaanga,* ao ngkai 11 aio katoton te reta are a kanakoa nakoina.)

“Nakon te Uea ae Atatokititi mairouia am toro aika mwaane ake man te aono ae Iteran te Karaanga: Ao ngkai, 12 e bia ataaki iroun te uea ae a a tia n roko i Ierutarem I-Iutaia ake a waerake mairoum n nakoira ikai. A a manga katea te kaawa ae karitei ma ni buakaka aei, ao a a tabe ni katiai oona+ ao n onobwaia aana. 13 Ao ke e ataaki ngkai iroun te uea ae ngkana e riai bwa e na manga kateaki te kaawa aei ma ni katiaaki oona, ao ane a na aki anganga te taekiti, te angabwai,+ ke te kantoka, ao e na kerikaaki te taekiti ae rereke irouia ueea. 14 Kioina ngkai ti kakana taoron te baareti,* ao e aki riai iroura bwa ti na nora kuribwaian ana bwai te uea, mangaia ae ti kanakotaeka bwa e na ataaki te baei iroun te uea, 15 bwa e aonga ni karaoaki te kakaae i nanon te boki are taui mwin rongorongoia am bakatibu.+ Ao ko na noria n te boki ae taui mwin rongorongo ma n ataia bwa te kaawa aei bon te kaawa ae karitei, e karuanikai nakoia ueea ma taian aono,* ao a mena iai aomata aika kauekea te karitei mangkoangkoa. Anne bukina ngke e kamaunaaki te kaawa aei.+ 16 Ti a kaotia nakon te uea bwa ngkana e a manga kateaki te kaawa aei ao a katiaaki oona, ao ane e na akea mwaakam* n te aono ae Iteran te Karaanga.”+

17 E kanakotaeka te uea nakon Reum are te mataniwi irouia mataniwi n te tautaeka ma Timtiai are te tia koroboki, ao raoia ake tabemwaang ake a maeka i Tamaria ao ake tabemwaang ake n te aono ae Iteran te Karaanga, ni kangai:

“Mauri! Ao ngkai, 18 e a tia ni karauaki ni warekaki* i matau te reta are kam kanakoa nakoira. 19 I tua ao e karaoaki te kakaae ao e noraki bwa mangkoangkoa ao e korakora ana kakaaitara te kaawa aei n ekiianako ueea, ao e riiriki iai te karitei ma te kakiriwe.+ 20 Iai ngkoa ueea aika korakora i Ierutarem aika tautaekana te aono ni kabutaa are Iteran te Karaanga, ao a kakabwakaaki nakoia te taekiti, te angabwai, ao te kantoka. 21 Mangaia ae kam na tua nakoia mwaane aikai bwa a na katoka te mwakuri, bwa e aonga n aki manga kateaki te kaawa aei ni karokoa ae I tua. 22 Taratara raoi bwa kam na aki kaaka taekan te baei, bwa a aonga n aki manga ruanikai ana bwai te uea.”+

23 Ao ngke e tia ni warekaki katoton ana reta te Uea are Atatokititi i matan Reum, ma Timtiai are te tia koroboki, ao raoia, ao a waekoa n nako Ierutarem nakoia I-Iutaia ni katokiia ni bwaai ni buaka. 24 E a toki n te tai anne mwakurian ana auti te Atua are i Ierutarem, ao e teimatoa n aki waakinako ni karokoa ana kauoua n ririki n tautaeka Taraiati are Ueani Botia.+

5 Ao burabeti ake Akai+ ma Tekaria+ are tibun Ito+ a taetae ni burabeti nakoia I-Iutaia ake i Iuta ao i Ierutarem, n aran Atuan Iteraera are e kaiririia. 2 N te tai anne ao Terubabera+ are natin Tearetiera ao Ietua+ are natin Ieotataka, a a moana manga katean ana auti te Atua,+ are i Ierutarem, ao ana burabeti te Atua a raonia naakai ma ni boutokaiia.+ 3 Ao Tatenai are te kowana n te aono are Iteran te Karaanga,* ao Tietarabotenai ma raona, a roko n te tai anne irouia naakai, ao a titirakinia ni kangai: “Antai ae tua nakoimi bwa kam na katea te auti aei ao ni katiaa te kateitei aei?”* 4 Ao a a manga titirakinia ni kangai: “Antai araia mwaane ake a mwakuria te kateitei aei?” 5 Ma te Atua e tararuaiia* aia unimwaane I-Iutaia,+ ao a aki katokiia ni karokoa ae e kanakoaki te rongorongo nakon Taraiati, ao manga okin te reta mairoun te uea ni kaineti ma te baei.

6 Aio katoton te reta are a kanakoa Tatenai are te kowana n te aono are Iteran te Karaanga, ao Tietarabotenai ma raona, ake taiani kauoman ni kowana, n te aono are Iteran te Karaanga, nakon te Uea are Taraiati, 7 a kanakoa te rongorongo nakoina, ao a korea ae kangai:

“Nakon te Uea ae Taraiati:

“E bia mena iroum te rau! 8 E bia ataaki iroun te uea bwa ti nakon te aono* ae Iuta nakon ana auti te Atua ae kakannato, ao e a kateaki n atibu aika bubura aika karabinoaki nakoni nneia, ao a kanimwaki kaai n taian oo. E karaoaki te mwakuri aei irouia aomata ma te ingaingannano, ao e waakinako n aia kakorakora. 9 Ao ti titirakinia aia unimwaane ni kangai: ‘Antai ae tua nakoimi bwa kam na katea te auti aei ao ni katiaa te kateitei aei?’*+ 10 Ti titirakinia naba araia bwa ti na kaongoko, bwa ti aonga ni korei araia mwaane ake a kairiri.

11 “Ao a kaekaira ni kangai: ‘Bon ana toro ngaira Atuani karawa ma te aonnaba, ao ti a manga katea te auti are kateaki n ririki aika bati ake a a bwakanako, are e kateia temanna uean Iteraera ae kakannato ao ni katiaa.+ 12 Ma ibukina bwa ara bakatibu a kauna Atuani karawa,+ ao e a anga ngaiia nako nanoni bain Nebukaneta+ are Ueani Baburon, are te I-Kareria, are e kabwakaa te auti aei+ ao e kairiianako aomata bwa taenikai nako Baburon.+ 13 Ma e ngae n anne, n ana moan ririki n tautaeka Tairati are Ueani Baburon, ao e tua te Uea are Tairati bwa e na manga kateaki ana auti te Atua.+ 14 Irarikin anne ao te Uea are Tairati e kaotinakoi man te tembora are i Baburon bwaai aika koora ma tirewa ake bwain ana auti te Atua, ake e anai Nebukaneta mai nanon te tembora are i Ierutarem, ao n uotii nakon te tembora are i Baburon.+ Ao e anganaki baikai te mwaane ae arana Tietibatara,*+ are e mwiokoia Tairati bwa te kowana.+ 15 Ao e taku Tairati nakoina: “Anai baikai ao naako nikiri n te tembora are i Ierutarem, ao e na manga kateaki ana auti te Atua ni nnena rimoa.”+ 16 Ao e roko teuae Tietibatara ao e a kawenea aan ana auti te Atua,+ are i Ierutarem, ao man te tai anne are e a waaki naba kateana ma e tuai man tia ni karokoa ngkai.’+

17 “Ma ngkana e taku te uea bwa e raoiroi, ao ke e karaoaki te kakaae ni nnen ana bwai aika kakawaki te uea are i Baburon, bwa e na kakoauaaki bwa e bon tua te Uea are Tairati bwa e na manga kateaki ana auti te Atua i Ierutarem+ ke e aki. Ao ke e kanakoaki nakoira ana moti te uea ni kaineti ma te baei.”

6 N te tai anne ao e a tua te Uea are Taraiati bwa e na karaoaki te kakaae n te tabo are a kawakinaki iai mwini bwaai* ike a kaakaki iai baika kakawaki i Baburon. 2 Ao e a kuneaki te nira ni boki n te tabo ae nonoaki i Ekibatana, n te aono* ae Miria, ao e kangai taekan te kauring are koreaki iai:

3 “N ana moan ririki n tautaeka te Uea are Tairati, ao e a tua ae kangai te Uea are Tairati ni kaineti ma ana auti te Atua are i Ierutarem:+ ‘Ke e manga kateaki te auti bwa te tabo ae a na anganga iai taiani karea, ao e na karaoaki aana ni nnena. Rietana e riai n 60 te mwanokunibai,* ao raababana 60 te mwanokunibai,+ 4 ma atibu aika bubura aika tenua te rinan aika karabinoaki nakoni nneia, ao teuana te rinan ni kai.+ Ao ke e kabwakaaki te kabanemwane man ana auti te uea.+ 5 Ao bwaai ake koora ma tirewa ake bwain ana auti te Atua, ake e kaotinakoi Nebukaneta man te tembora are i Ierutarem ao n uotii nako Baburon,+ a na kaokaki naba bwa a na katukaki ni nneia i nanon te tembora i Ierutarem ao ni kaakaki n ana auti te Atua.’+

6 “Mangaia ae kararoaingkami ngkai mai ikanne, ngkoe ae Tatenai ae te kowana n te aono are Iteran te Karaanga,* Tietarabotenai, ao raomi ake taiani kauoman ni kowana n te aono are Iteran te Karaanga.+ 7 Tai manga kamangaoa mwakurian ana auti te Atua. A na manga katea ana auti te Atua anne ni nnena rimoa aia kowana I-Iutaia ao aia unimwaane I-Iutaia. 8 Irarikin anne, I tua ae kangai ni kaineti ma te bwai ae kam na karaoia nakoia aia unimwaane I-Iutaia aikai, ibukini manga katean ana auti te Atua anne: E riai ni waekoa ni kabwakaaki nakoia mwaane aikai boon te kabanemwane, mani nnen ana mwane te uea,+ are man te taekiti are rikoaki n te aono are Iteran te Karaanga, bwa a na waakinako n aki manga kamangaoaki.+ 9 A bon riai n teimatoa n anganaki n te bong ae koraki bwaai aika kainnanoaki, aika kaao mwaane aika ataei+ n ikotaki ma tiibu mwaane+ ao tiibutetei+ ibukin taiani karea ni kabuekaki nakon Atuani karawa, te uita,+ te taoro,+ te wain,+ ao te oera,+ n aron are a taekinna ibonga* ake i Ierutarem, 10 bwa a aonga n teimatoa n anga taiani karea aika kakukureia Atuani karawa, ao n tataro ibukini maiun te uea ma natina mwaane.+ 11 I a tia naba n tua bwa ane e urua te tua aei, ao e na buutaki tatangan ana auti ao e na tabekaki ao ni kabaeaki i aona,* ao e na karikaki ana auti bwa aia tabo n nakotaari* aomata, ibukin te bure aei. 12 Ao te Atua are kamena arana ikekei+ e na kabwakaa te uea ao aomata ake a tabeki baia n urua te tua aei ao ni kamauna ana auti te Atua anne, are i Ierutarem. Ngai ae Taraiati, I tua te baei. Ke e waekoa ni karaoaki.”

13 Ao Tatenai are te kowana n te aono are Iteran te Karaanga, Tietarabotenai,+ ao raoia, a waekoa ni karaoi bwaai nako ake e tua te Uea are Taraiati. 14 Ao a teimatoa ni kateitei aia unimwaane I-Iutaia ao e waakinako,+ bwa a kaumakaki n ana taetae ni burabeti Akai+ are te burabeti ma Tekaria+ are tibun Ito. A katiaa kateana n aron are e tua Atuan Iteraera,+ ao n aron are e tua Tairati+ ao Taraiati+ ao Atatokititi+ are Ueani Botia. 15 A katiaa te auti ni katenuani bongin te namwakaina ae Ata,* n ana kaonoua n ririki n tautaeka te Uea are Taraiati.

16 Ao a katabua ana auti te Atua ma te kimwareirei tibun Iteraera,+ aika ibonga, tibun Rewi, ma nikiraia taian taenikai ngkoa. 17 Ao a kareani kaao mwaane aika 100, tiibu mwaane aika 200, ao tiibutetei aika 400, ibukini katabuan ana auti te Atua, ao kooti mwaane aika 12 bwa te karea ni kabwarabure ibukia tibun Iteraera ni kabane, ae boraoi ma mwaitin aia baronga tibun Iteraera.+ 18 Ao a mwiokoiia ibonga n aia koraki nako ao tibun Rewi n aia koraki nako, n te beku ibukin te Atua i Ierutarem,+ n aron are koreaki n ana boki Mote.+

19 Ao a karaoa te Toa ae te Riao te koraki ake taenikai ngkoa, n te ka-14 ni bong n te moan namwakaina.+ 20 A bane ibonga ao tibun Rewi ni kaitiakiia ao akea temanna ae aki,+ mangaia are a a bane n itiaki. A tiringa te karea ibukin te Toa ae te Riao ibukia te koraki ake taenikai ngkoa ni kabane, ibukia raoia n ibonga, ao i bon ibukia. 21 Ao a amwarake mai iai tibun Iteraera ake a oki man te taenikai, n ikotaki ma ane e raonia ao ni kaokoroa mani kamwaraia natannaomata ake n te aba, bwa e na taromauria* Iehova ae Atuan Iteraera.+ 22 A kimwareirei naba ni karaoa te Toa ae te Bwerena ae Aki Karikaki+ i nanon itibong, bwa e kakimwareireiia Iehova, ao e kaira nanon uean Aturia bwa e na akoiia naakai,+ bwa e aonga ni boutokaiia* ni mwakurian ana auti te Atua ae koaua, ae Atuan Iteraera.

7 Imwini baikai n ana tai n tautaeka Atatokititi+ are Ueani Botia, ao e a oki Etira.*+ Bon natin Teraia+ teuaei, are natin Ataria, are natin Irekia,+ 2 are natin Tiarum, are natin Tatoka, are natin Aituba, 3 are natin Amaria, are natin Ataria,+ are natini Meraiota, 4 are natin Teraea, are natin Utiti, are natini Buki, 5 are natin Abitua, are natini Bineati,+ are natin Ereata,+ are natin Aaron+ are te mataniwi n ibonga.* 6 E roko teuae Etira mai Baburon. Bon te tia kaewewe* ae ataa raoi kanoan* te Tua Rinanoni Mote+ are e anga Iehova ae Atuan Iteraera. Ao te uea e angan teuaei bwaai ni kabane ake e bubutii, bwa e memena bain Iehova ae Atuana i aona.

7 A waerake nako Ierutarem n ana kaitiua n ririki n tautaeka te Uea are Atatokititi, tabeman tibun Iteraera, ibonga, tibun Rewi,+ taan anene,+ taan teiakina mataroan te oo,+ ao tooro*+ n te tembora. 8 Ao e a roko Etira i Ierutarem n te kanimaua n namwakaina, n ana kaitiua n ririki n tautaeka te uea. 9 Ni moani bongin te moan namwakaina ao e a mwananga mai Baburon, ao e roko i Ierutarem ni moani bongin te kanimaua n namwakaina, bwa e memena bain* Atuana i aona.+ 10 E a tia Etira ni katauraoa nanona* bwa e na ukoukora ana Tua Iehova ao e na maiuakinna,+ ao e na reireina te aba kaetieti ake iai ma mooti i Iteraera.+

11 E kangai katoton te reta ae e anga te Uea are Atatokititi nakon Etira are te ibonga are te tia kaewewe,* ae te aomata ae mwaatai ni kamatebwaian* ana tua Iehova ma ana kaetieti nakoia tibun Iteraera:

12 * “Atatokititi+ ae aia uea ueea, nakon Etira ae te ibonga, ae te tia kaewea* ana Tua Atuani karawa: E bia reke iroum te rau ae kororaoi. Ao ngkai 13 I a tia n tua bwa a riai n iriko aomata nako ake n aaba ake I tautaekan, aika tibun Iteraera, ma aia ibonga, ao tibun Rewi, aika a kan airi ma ngkoe nako Ierutarem.+ 14 Bwa ko kanakoaki iroun te uea ma ana tia anga taeka n reirei ake itiman, bwa ko na karaoa te kakaae bwa e iraki nanon ana Tua Atuam ane iroum,* i Iuta ao i Ierutarem ke e aki, 15 ao ko na anai tirewa ma koora ake a anga ma nanoia te uea ma ana tia anga taeka n reirei, nakon Atuan Iteraera are e mena ana tabo i Ierutarem, 16 ao tirewa ma koora ni kabane ake ko karekei* n aonon* nako Baburon, n ikotaki ma aia bwaintituaraoi aomata ao ibonga, are a anga ma nanoia nakon ana auti Atuaia are mena i Ierutarem.+ 17 Ao ko riai ni waekoa ni kabooi n te mwane anne kaao mwaane,+ tiibu mwaane,+ tiibutetei,+ ma raoia ae te karea ae te amwarake*+ ao te karea ae te moi,+ ao ko riai ni karean i aon te baonikarea are n ana auti Atuami i Ierutarem.

18 “Ao ko kona ni karaoa ane ko taku bwa e raoiroi iroum ao irouia tarim, ni kaineti ma nikiran te tirewa ao te koora, n aron ae boraoi ma nanon Atuami. 19 Ao ko na nikiri i matan te Atua i Ierutarem bwaai ni kabane ake ko anganaki ibukin te beku n ana auti Atuam.+ 20 Ao nikirani baika kainnanoaki ibukin ana auti Atuam ake ko riai n anga, ko na anga mani nnen ana bwai aika kakawaki te uea.+

21 “Ngai ae te Uea ae Atatokititi, I a tia n tua nakoia ni kabane taani kawakini baika kakawaki n te aono are Iteran te Karaanga,* bwa a na waekoa ni karaoaki bwaai nako ake e bubutii iai nakoimi Etira+ are te ibonga, ae te tia kaewea* ana Tua Atuani karawa, 22 ao tokina 100 te tarena* n tirewa, te uita ae 100 te bwai ni baire ae te kore,* te wain+ ae 100 te bwai ni baire ae te bwate,* te oera+ ae 100 te bwai ni baire ae te bwate, ao te taoro+ n aron te mwaiti ae kainnanoaki. 23 E bia karaoaki ma te ingaingannano bwaai nako ake e tua Atuani karawa ibukin ana auti Atuani karawa,+ bwa e aonga n aki roko te un n ekinako aaba ake e tautaekan te uea ao n ekiianako natina mwaane.+ 24 Ao kam kauringaki riki bwa kam aki kariaiakaki ni kairoroa te taekiti, te angabwai,+ ke te kantoka mairouia ibonga ma tibun Rewi, taani katangitang,+ taan teiakina te mataroa, tooro* n te tembora,+ ao taani mwakuria ana auti te Atua.

25 “Ao ngkoe ae Etira, kabongana te wanawana ane iroum* are mairoun Atuam, n rineiia iai taani moti ao taani motikitaeka bwa a na motiki taekaia aomata ni kabane ake n te aono are Iteran te Karaanga, ake aomata ni kabane ake a atai ana tua Atuam, ao kam riai n reireina ane e aki atai.+ 26 Ao ane e aki kakairi n ana Tua Atuam ao n ana tua te uea, e riai ni waekoa ni motikaki taekana, ae tao te mate, te kakioakinako, te tuuaa n te mwane, ke te kabureaki.”

27 E bia karaoiroaki Iehova ae Atuaia ara bakatibu, are e karina i nanon te uea te kani katamaroaa ana auti Iehova are i Ierutarem!+ 28 Ao e a tia ni kaotiota nakoiu te tangira ae koaua,* i matan te uea+ ao ana tia anga taeka n reirei,+ ao ana aomata te uea ake tooka aika korakora ni kabane. Mangaia are I kaninikoriaai,* ibukina bwa e memena i aou bain Iehova ae Atuau, ao I ikotiia mai buakoia tibun Iteraera mwaane aika taani kairiri* bwa a na waerake ma ngai.

8 Ao aikai mataniwi i aoia aia koraki mairoun tamaia, ma araia te koraki ake a koreaki n te kateiriki ake a irai ni waerake mai Baburon n ana tai n tautaeka te Uea are Atatokititi:+ 2 mai buakoia tibuni Bineati+ boni Keritiom, mai buakoia tibun Itama+ bon Taniera, mai buakoia tibun Tawita bon Atuti, 3 mai buakoia tibun Tekania, are mai buakoia tibuni Baroti bon Tekaria, ao iai raona mwaane aika 150 aika koreaki araia, 4 mai buakoia tibuni Baatamoaba+ bon Erieoenai are natin Teraea, ao iai raona mwaane aika 200, 5 mai buakoia tibun Taatu+ bon Tekania are natin Iaatiara, ao iai raona mwaane aika 300, 6 mai buakoia tibun Arin+ bon Ebeta are natin Ionatan, ao iai raona mwaane aika 50, 7 mai buakoia tibun Eram+ bon Ietiaia are natin Atariia, ao iai raona mwaane aika 70, 8 mai buakoia tibun Tebatia+ bon Tebaria are natini Mikaere, ao iai raona mwaane aika 80, 9 mai buakoia tibun Ioaba bon Obaria are natin Ieiera, ao iai raona mwaane aika 218, 10 mai buakoia tibuni Bani bon Teromita are natin Iotibeia, ao iai raona mwaane aika 160, 11 mai buakoia tibuni Bebai+ bon Tekaria are natini Bebai, ao iai raona mwaane aika 28, 12 mai buakoia tibun Atukata+ bon Ioaanan are natin Akatan, ao iai raona mwaane aika 110, 13 mai buakoia tibun Atonikam+ ake taiani kabane, ao aikai araia: Eribereta, Ieeiera, ao Temaia, ao iai raoia mwaane aika 60, 14 ao mai buakoia tibuni Bikiwai+ bon Utai ao Taabuta, ao iai raoia mwaane aika 70.

15 I ikotiia i rarikin te karaanga are raanga nako Aawa,+ ao ti kaembwa iai i nanon tenibong. Ma ngke I a tuoia aomata ma ibonga* ao akea temanna tibun Rewi ae I noria ikekei. 16 Mangaia are I a kanaanako bwa a na weteaki Erietera, Ariera, Temaia, Erenatan, Iariba, Erenatan, Natan, Tekaria, ao Meturam, aika mwaane aika mataniwi, ao Ioiariba ma Erenatan aika taan angareirei. 17 Ao I tua nakoia ni kaineti ma Ito are te tia kairiri n te tabo ae arana Katibaia. I tuangia bwa a na tuanga Ito ma tarina ake tooro* n te tembora ake i Katibaia, bwa a na kairiia nakoira taani beku n ana auti Atuara. 18 Kioina ngkai e memena bain* Atuara i aora, ao a kaira te mwaane ae wanawana mai buakoia tibuni Maari+ are tibun Rewi are natin Iteraera, ae arana Terebaia+ ma natina ao tarina, ao botaia 18 mwaane, 19 ao Atiabaia ma raona ae Ietiaia mai buakoia tibuni Merari,+ ao tarina ma natiia, ao botaia bon 20 mwaane. 20 Ao iai 220 tooro* n te tembora ake e anga Tawita ma tooka bwa a na mwakuria aia beku tibun Rewi, ake a a bane n rineaki n araia.

21 I a katanoataa ngkanne te aki mamatam n te karaanga are Aawa, bwa ti na kananorinanoira i matan Atuara, ao n ukera te kairiri mairouna ibukini mwanangara, i bon ibukira, ao ibukia ara koraki n ataei, ao ibukin ara bwai ni kabane. 22 I maamaa ni bubutiia te uea ibukia tautia ma taan toka i aoia aoti bwa a na kawakinira i nanoni kawaira mairouia aiara, ibukina bwa ti a tia ni kangai nakon te uea: “E memena bain* Atuara i aoia akana ukoukoria ni kabane,+ ma korakorana ao unna e na ekiianako ni kabane akana kitanna.”+ 23 Mangaia are ti aki mamatam ao ti bubutiia Atuara ibukin te baei, ao e ongo n ara bubutii.+

24 I a kaokoroia ngkai 12 mai buakoia mataniwi n ibonga,* aika Terebaia ao Atiabaia,+ n ikotaki ma tariia aika tengaun. 25 Ao I katinea nakoia te tirewa ma te koora ao bwaai, ake taian angabwai nakon ana auti Atuara, ake e anga te uea ma ana tia anga te taeka n reirei, ao ana aomata ake tooka ma tibun Iteraera ni kabane ake a mena ikekei.+ 26 Mangaia ae I katinea nako nanoni baia 650 te tarena* n tirewa, 100 bwaai aika karaoaki man te tirewa ae 2 te tarena booia, 100 te tarena ni koora, 27 ao 20 boora aika uarereke aika koora ae 1,000 te tariki* boona, ao 2 bwaai aika karaoaki man te buraati ae raoiroi, ae uraura ae raneanea, ae titeboo kakawakina ma te koora.

28 Ao I taku nakoia: “Kam itiaki* nakon Iehova,+ ao a tabu naba bwaai aikai, ao te tirewa ma te koora boni karea ni kan anga nakon Iehova ae Atuaia ami bakatibu. 29 Tararuai raoi ni karokoa ae kam katinei i mataia mataniwi n ibonga ma tibun Rewi, ao aia toka tibun Iteraera ake mai buakoia aia koraki mairoun tamaia ake i Ierutarem,+ i nanon taian ruu* ake n ana auti Iehova.” 30 Ao ibonga ma tibun Rewi a anaa te tirewa ao te koora ma bwaai ake a a tia ni katineaki nakoia, bwa a na uotii nako Ierutarem nakon ana auti Atuara.

31 N tokina ao ti a kitana te karaanga ae Aawa+ nako Ierutarem n te ka-12 ni bong n te moan namwakaina,+ ao e memena bain Atuara i aora, ao e kamaiuira mai nanoni baia aiara ma taani kakaran i aoni kawaira. 32 Mangaia are ti roko i Ierutarem+ ao ti tiku iai tenibong. 33 Ao n te kaaua ni bong ao ti katinea te tirewa ma te koora ao bwaai i nanon ana auti Atuara,+ ao ti angani Meremota+ are natin Uriia are te ibonga, ao raona Ereata are natini Bineati, ao raoia tibun Rewi ake Iotabata+ are natin Ietua ma Noaria are natini Binnui.+ 34 A bane ni warekaki bwaai ao a katineaki, ao e a koreaki mwin rawawataia ni kabane. 35 Ao te koraki ake a otinako man te taenikai ngkoa, a anga taiani karea ni kabuekaki nakon Atuan Iteraera, aika kaao mwaane aika 12+ ibukia tibun Iteraera ni kabane, tiibu mwaane aika 96,+ tiibutetei aika mwaane aika 77,+ ao kooti mwaane aika 12 bwa te karea ni kabwarabure. Baikai ni kabane bon te karea ni kabuekaki nakon Iehova.+

36 Ao ti anga ana tua te uea+ nakoia ana teterabi* te uea ma taiani kowana n te aono are Iteran te Karaanga,*+ ao a boutokaiia aomata ma ana auti te Atua ae koaua.+

9 Ngke a tia naba ngkekei ni karaoaki baikai, ao a roko irou tooka ao a taku: “A aki kaokoroia tibun Iteraera, ibonga,* ao tibun Rewi, mairouia botannaomatan aaba ao aia mwakuri aika riribaaki,+ ake tibuni Kanaan, tibun Eta, taiani Beritaite, I-Iebuti, tibun Ammon, I-Moaba, I-Aikubita,+ ao taian Amoraite.+ 2 A anaiia tabeman natiia aine bwa buuia ao buuia natiia mwaane.+ A a tia naakai aika te kanoa* aika itiaki*+ n reitaki ma botannaomatan aaba.+ A moamoa riki n te bure n aki kakaonimaki aei tooka ao taan tautaeka aika taiani kauoman.”

3 Ngke I ongo naba ngkekei te baei, ao I a raeuaa kunnikaiu ao au kunnikai ae akea baina, ao I routi tabeua irannatuu ma buaiu, ao I tekateka ma te buannano. 4 Ao aomata nako ake a karinei* ana taeka Atuan Iteraera a ikotaki n otabwaniniai ibukin aia aki kakaonimaki aomata ake a oki man te taenikai, ngke I tabe n tekateka ma te buannano ni karokoa tain te karea ae te amwarake n te tairiki.+

5 Ao I teirake mani bwaibwainrangiu, n tain te karea ae te amwarake+ n te tairiki, ma kunnikaiu ae raeuaaki ao au kunnikai ae akea baina ae raeuaaki naba, ao I katorobubua ao I arori baiu nakon Iehova ae Atuau. 6 Ao I taku: “Ngkoe ae Atuau, I namakina te maamaa ao te bwainrang n euta matau nakoim ngkoe ae Atuau, bwa a a bati ara kairua i etan atura ao a a tabukirake ara bure nako karawa.+ 7 E korakora ara bure man aia bong ara bakatibu ni karokoa te bong aei.+ Ao ibukin ara kairua, ti a kanakoaki ngaira ma ara uea ao ara ibonga, nako nanoni baia uean aaba ake tabeua, nakon te kabaang,+ nakon te kataenikaiaki,+ nakon te kuribwaiaki,+ ao nakon te bwaibwainrang, n aron ae riki n te bong aei.+ 8 Ma i nanon te tai ae kimototo ngkai, ao e a tia n roko te akoaki mairoun Iehova ae Atuara n arona ni kariaia te nikira bwa e na reke birinakoia, ao n arona n anganira te tabo ae mano raoi n ana tabo ae tabu,+ bwa e na kaotai matara Atuara ao ni kaoka korakorara teutana ngkai ti tautoronaki. 9 Bwa e ngae ngke tooro ngaira,+ ma e aki kitanira Atuara ngkai ti tautoronaki. Ma e karababaa nakoira ana tangira ae koaua* i mataia ueani Botia,+ bwa e na kaoka korakorara bwa ti aonga ni katea ana auti Atuara,+ ao ni manga katei taabo ake iai aika uruaki, ao e na anganira te oo ae te atibu* i Iuta ao i Ierutarem.

10 “Ma tera ngkai ae ti kona n taekinna Atuara, imwini baika riki aikai? Bwa ti a tia ni kitan am tua, 11 ake ko anganira rinanoia am toro aika burabeti, ni kangai: ‘Te aba ane kam nang rinnako n abanna bon te aba ae aki itiaki ibukin aki itiakia botannaomatan aaba, ibukin aia mwakuri aika riribaaki ake a kaonna iai mai tabona nako tabona, ni kamwaraia.+ 12 Mangaia ae tai anga natimi aine nakoia natiia mwaane, ao tai butimwaeia naba natiia aine ibukia natimi mwaane.+ Ao kam na bon aki naba ukera aia raoi ke mweraoia,+ bwa kam aonga n rikirake ni korakora ao n amwarake n raoiroin te aba ma n abanna ibukia natimi n aki toki.’ 13 Ao imwini bwaai ni kabane aika roko i aora ibukin ara mwakuri aika bubuaka ao ara bure ae korakora, bwa ko aki katuuaaeira ngkoe ae Atuara ni kaineti ma ara kairua,+ ao ko a tia ni kariaia ngaira aika ti mena ikai bwa a na reke birinakora,+ 14 ao te koaua ngkanne bwa ti na manga urui am tua ao n imaremare ma botannaomata aika kakaraoi baika riribaaki aikai?+ Tiaki bwa ko na rangi n un iroura ao ni boni kamaunaira raoi, n akea te nikira ae ko na katikua ke te aomata temanna ae e na reke maiuna? 15 Ko raoiroi ngkoe ae Iehova ae Atuan Iteraera,+ bwa bon te nikira ngaira aika reke maiura ni karokoa te bong aei. Aikai ngaira i matam i buakon ara bure, bwa ti aki kona n tei i matam ibukin aei.”+

10 Ngke e tabe n tataro Etira+ ao ni kaotii buure, ma n tang ao ni wene ni bobaraaki i matan ana auti te Atua ae koaua, ao a a ikotaki mwaane aika uanao ma aine ao ataei aika tibun Iteraera n otabwaninia teuaei, bwa a korakai n tang aomata. 2 Ao Tekania are natin Ieiera+ are temanna i buakoia kanoan Eram,+ e taku nakon Etira: “Ti a tia n aki kakaonimaki nakon Atuara n arora ni mare* ma aine aika ianena mai buakoia botannaomatan te aba.+ Ma n aki ongea aei, ao bon iai naba te kantaninga ibukia tibun Iteraera. 3 Ti na karaoa ngkai te berita ma Atuara+ bwa ti na kanakoia buuaine ni kabane ao naake a bungiaki irouia naakai, n aron ae boraoi ma ana kaetieti Iehova ao te koraki ake a karinea* ana tua Atuara.+ Ti na karaoa ae boraoi ma te Tua. 4 Teirake bwa bon tabem te baei, ao bon raora ngkoe. Ko na korakora ao waaki.”

5 Ao e teirake Etira ao e tua bwa a na taetae n tuea mataniwi n ibonga,* tibun Rewi, ao tibun Iteraera ni kabane, bwa a na karaoa te baere e a tia n taekinaki.+ Mangaia are a a taetae n tuea. 6 Ao e teirake Etira mai matan ana auti te Atua ae koaua ao e nakon ana ruu* Ieoanan are natin Eriatiba. Ma e ngae ngke e nako ikekei, ma akea te amwarake ae e kanna ke te ran ae e nimma, bwa e tanginiwenei ibukin aia aki kakaonimaki aomata ake a oki man te taenikai.+

7 Ao a karaoa te katanoata rinanon Iuta ao Ierutarem ni kabutaa, bwa a na ikotaki i Ierutarem aomata nako ake taenikai ngkoa. 8 Ao ane e aki roko i nanon tenibong ao a na anaaki* ana bwai ni kabane, ao e na kakioakinako mai buakon te botaki n aomata ake taenikai, n aron aia moti tooka ma unimwaane.+ 9 Mangaia are a a bane n ikotaki mwaane aika tibun Iuta ao Beniamin i Ierutarem i nanon tenibong, ae taekan te karuaiwa n namwakaina ae 20 iai bongin te namwakaina. A bane aomata n tekateka ni katawanangin ana auti te Atua ae koaua, ao a rurubenebene ibukini kakawakin te botaki anne ao ibukin te karau ae korakora.

10 Ao e a teirake Etira are te ibonga ao e taku nakoia: “Kam a tia n aki kakaonimaki n aromi ni mare ma aine aika ianena,+ ai ngaia are kam a kauaataoa riki aia bure tibun Iteraera. 11 Kaotii ngkai ami bure nakon Iehova ae Atuaia ami bakatibu ao karaoa nanona. Kaokoroingkami mairouia botannaomatan te aba ao mairouia buuaine aika ianena aikai.”+ 12 Ao e kaeka te botaki n aomata n te bwanaa ae korakora ni kangai: “Bon tabera bwa ti na karaoa raoi ae ko taekinna. 13 Ma a bati aomata ao bon tain te kakarau. E a kangaanga te tei i tinaniku, ao e na aki kainnanoa tii tebongina ke uabong te baei, bwa ti a tia ni karitei n te baei n te aro ae riao. 14 Mangaia ae taiaoka ma kariaia ara toka bwa a na tei ibukin te botaki n aomata aei,+ ao ke a roko n te tai ae baireaki aomata ni kabane ake n ara kaawa ake a mare ma aine aika ianena, n ikotaki ma unimwaane ao taani moti n te kaawa teuana ma teuana, ni karokoa ae ti rairaanako uraraken unin Atuara mairoura ni kaineti ma te baei.”

15 Ma a kaitaraa aei Ionatan are natin Ataera ao Iateira are natin Tikewa, ao a boutokaiia naakai Meturam ma Tiabetai+ ake tibun Rewi. 16 Ma a karaoa are e a tia ni kariaiakaki naake taenikai ngkoa. Ao Etira are te ibonga ma naake mataniwi i aoia aia koraki mairoun tamaia ake a bane n rineaki n araia, a ikotaki ni kaokoroia ni moani bongin te katebwina n namwakaina bwa a na nenera taekan te baei. 17 Ao ni moani bongin te moan namwakaina ao a a tia ni kaetii taekan aroia mwaane ni kabane ake a mare ma aine aika ianena. 18 Ao e kuneaki bwa iai tabeman mai buakoia natiia ibonga aika mare ma aine aika ianena:+ mai buakoia natin Ietua+ are natin Ieotataka ma naake tarina, boni Maateia, Erietera, Iariba, ao Ketaria. 19 Ma a berita* naakai bwa a na kanakoia buuia, ao kioina ngke a bure, a anga temanna te tiibu mwaane man te nanai ibukin aia bure.+

20 Mai buakoia tibun Immera+ bon Aanani ao Tebaria, 21 ao mai buakoia tibun Arim+ boni Maateia, Eria, Temaia, Ieiera, ao Utia, 22 ao mai buakoia tibuni Batiura+ bon Erioenai, Maateia, Itimaera, Netanera, Iotabata, ao Ereatia. 23 Ao mai buakoia tibun Rewi bon Iotabata, Timei, Keraia, (ae taekani Kerita), Betaea, Iuta, ao Erietera, 24 ao mai buakoia taan anene bon Eriatiba, ao mai buakoia taan teiakina mataroan te oo bon Tiarum, Terem, ao Uri.

25 Ao mai buakoia tibun Iteraera, mai buakoia tibuni Baroti+ bon Ramia, Itiaea, Marekiia, Miiamin, Ereata, Marekiia, ao Benaia, 26 ao mai buakoia tibun Eram+ boni Matania, Tekaria, Ieiera,+ Aberi, Ieremota, ao Eria, 27 ao mai buakoia tibun Taatu+ bon Erioenai, Eriatiba, Matania, Ieremota, Tabata, ao Atitia, 28 ao mai buakoia tibuni Bebai+ bon Ieoanan, Aanania, Tabai, ao Atirai, 29 ao mai buakoia tibuni Bani boni Meturam, Maruka, Ataia, Iatuba, Teara, ao Ieremota, 30 ao mai buakoia tibuni Baatamoaba+ bon Atena, Kerai, Benaia, Maateia, Matania, Betarera, Binnui, ao Manate, 31 ao mai buakoia tibun Arim+ bon Erietera, Itiia, Marekiia,+ Temaia, Timeone, 32 Beniamin, Maruka, ao Temaria, 33 ao mai buakoia tibun Atuum+ boni Matenai, Maatata, Tabata, Eribereta, Ieremai, Manate, ao Timei, 34 ao mai buakoia tibuni Bani boni Maatai, Amram, Uera, 35 Benaia, Beteia, Kerui, 36 Wania, Meremota, Eriatiba, 37 Matania, Matenai, ao Iaatu, 38 ao mai buakoia tibuni Binnui bon Timei, 39 Teremia, Natan, Ataia, 40 Makenatebai, Tiatiai, Tiarai, 41 Atareru, Teremia, Temaria, 42 Tiarum, Amaria, ao Ioteba, 43 ao mai buakoia tibun Nebo bon Ieeiera, Matitia, Tabata, Tebina, Iaatai, Ioera, ao Benaia. 44 Naakai ni kabane ake a karekeia buuia aika ianena,+ ao a kanakoia buuia aikai n ikotaki ma natiia.+