TE KAUOUA N UEA

1 Imwini maten Aaba ao a a karitei tibuni Moaba+ nakoia tibun Iteraera.

2 N te tai anne ao e bwaka Aatia mani warawaran ana ruu are i aon taubukin ana auti i Tamaria ao e ikoaki. Mangaia are e a kanakoia taan uataeka ao e taku nakoia: “Naako titirakina Baaratebuba are atuan Ekiron+ n ukeria bwa N na marurung man te ikoaki aei ke N na aki.”+ 3 Ma e taku ana anera Iehova nakon Eria*+ are te I-Titibe: “Teirake ao naako kawariia ana tia uataeka uean Tamaria, ao kangai nakoia, ‘Akea te Atua i Iteraera ngkai kam nangi nako n titirakina Baaratebuba are atuan Ekiron?+ 4 Mangaia ae e kangai ana taeka Iehova: “Ko na aki kitana te nne ni wene ane ko wene iai, bwa ko na boni mate.”’” Ao e a nako Eria.

5 Ngke a a oki taan uataeka nakon teuarei ao e a taku naba nakoia: “E aera ngkai kam a oki?” 6 A kaeka ni kangai nakoina: “Iai te mwaane temanna ae waerake ni kawarira ao e taku nakoira, ‘Naako okira te uea are kanakoingkami ao tuangnga ni kangai, “E kangai ana taeka Iehova: ‘Akea te Atua i Iteraera ngkai ko a kanaanako bwa e na titirakinaki Baaratebuba are atuan Ekiron? Mangaia ae ko na aki kitana te nne ni wene ane ko wene iai, bwa ko na boni mate.’”’”+ 7 Ao e titirakinia nakekei ni kangai: “Aekakira te mwaane ane waerake ni kawaringkami ao n taekin taeka akanne nakoimi?” 8 Mangaia are a taku nakekei nakoina: “Te mwaane ae bwainna n te kunnikai ae buraerae,+ ao e kabaea nukana+ n te roo ae te kau.” Ao e a taku naba teuaei: “Bon Eria are te I-Titibe.”

9 Ao te uea e kanakoa te mataniwi i aoia 50 ma ana rorobuaka aika 50 nakon teuarei. Ngke e waerake nakoina ao e tabe n tekateka teuarei i aon taubukin te maunga. Ao e taku nakon teuarei: “Ana aomata te Atua ae koaua,+ e kangai ana taeka te uea, ‘Ruuo.’” 10 Ma e kaeka Eria nakon te mataniwi i aoia 50 ni kangai: “Ngkana ngaia bwa ana aomata te Atua ngai, ao ke e bwaka te ai mai karawa+ ni kabuekiko ma am rorobuaka akana 50.” Ao e a bwaka naba te ai mai karawa ao e kabuekia ma ana rorobuaka ake 50.

11 Ao te uea e a manga kanakoa riki te mataniwi i aoia 50 ma ana rorobuaka aika 50 nakon teuarei. E nako ao e taku nakon teuarei: “Ana aomata te Atua ae koaua, e kangai ana taeka te uea, ‘Kawaekoako ruuo.’” 12 Ma e kaeka Eria nakoia ni kangai: “Ngkana ngaia bwa ana aomata te Atua ae koaua ngai, ao ke e bwaka te ai mai karawa ni kabuekiko ma am rorobuaka akana 50.” Ao e a bwaka naba ana ai te Atua mai karawa ao e kabuekia ma ana rorobuaka ake 50.

13 Ao te uea e a manga kanakoa riki te mataniwi i aoia 50 ae te kateniman ma ana rorobuaka aika 50. Ma e waerake te mataniwi i aoia 50 ae te kateniman aei ao e katorobubua i matan Eria ma ni bubutiia akoana ao e taku nakoina: “Ana aomata te Atua ae koaua, taiaoka ma e bia rangi ni kakawaki i matam maiuu ao maiuia* am toro aika 50 aikai. 14 E a tia ni bwaka te ai mai karawa ni kabuekiia mataniwi i aoia 50 ake uoman ake imwaiu, ma aia koraki ake kaka 50, ma e bia rangi ni kakawaki ngkai maiuu* i matam.”

15 Ao ana anera Iehova e tuanga Eria ni kangai: “Ruuo ma ngaia. Tai maakua.” Mangaia are e teirake ao e ruo ma teuarei nakon te uea. 16 E taku ngkanne Eria nakon te uea, “E kangai ana taeka Iehova: ‘Ibukina bwa ko kanakoia taan uataeka bwa a na titirakina Baaratebuba are atuan Ekiron+ n aron ae kaanga bon akea te Atua i Iteraera+ are ko na titirakinna ana taeka, mangaia ae ko na aki kitana te nne ni wene ane ko wene iai, bwa ko na boni mate.’” 17 Mangaia are e a mate teuaei ni kaineti ma ana taeka Iehova are e taekinna Eria, ao ibukina bwa akea natina te mwaane, e a riki Ioram*+ bwa te uea n onea mwina n ana kauoua n ririki n tautaeka Ioram+ are natin Ieotiabata are uean Iuta.

18 Ni kaineti ngkanne ma nikiran rongorongon Aatia+ ma te bwai are e karaoia, tiaki a koreaki n te boki are rongorongon aia tai uean Iteraera?

2 Ngke e nang uotaanako Eria+ nako karawa* Iehova n te ukeukennanti,+ ao a otinako mai Kirekara+ Eria ma Eritai.+ 2 E taku Eria nakon Eritai: “Tiiku ikai taiaoka, bwa e kanakoai Iehova nako Betaera.” Ma e taku Eritai: “Ngkai bon iai Iehova ao ngkai ko* maiu, ao N na bon aki kitaniko.” Mangaia are a ruo rikaaki nako Betaera.+ 3 Ao a otinako nakon Eritai natiia burabeti* ake i Betaera ao a taku nakoina: “Ko ataia ae e nang uotaanako am toka Iehova n te bong aei man nakoana ae am tia kairiri?”+ Ao e kaeka ni kangai: “I a kaman ataia. Kam na kainabwabu.”

4 E a taku ngkai Eria nakoina: “Eritai, tiiku ikai taiaoka, bwa e kanakoai Iehova nako Ieriko.”+ Ma e taku: “Ngkai bon iai Iehova ao ngkai ko* maiu, ao N na bon aki kitaniko.” Mangaia are a a nako Ieriko. 5 Ao a kawara Eritai natiia burabeti ake i Ieriko ao a taku nakoina: “Ko ataia ae e nang uotaanako am toka Iehova n te bong aei man nakoana ae am tia kairiri?” Ao e kaeka ni kangai: “I a kaman ataia. Kam na kainabwabu.”

6 E a taku ngkai Eria nakoina: “Tiiku ikai taiaoka, bwa e kanakoai Iehova nakon te Ioretan.” Ma e taku: “Ngkai bon iai Iehova ao ngkai ko* maiu, ao N na bon aki kitaniko.” Mangaia are a a uaia n nako. 7 A nako naba 50 mai buakoia natiia burabeti ao a tei ni mataku mai kiraroa, ngke a tabe naake uoman n tei i rarikin te Ioretan. 8 E anaa ngkanne ana kunnikai ni burabeti+ Eria ao e niniria ao e orea iai te ran, ike e a bwenaua iai nakon te angamaing ao nakon te angaatai, n te aro are a a uaia ni mwananga i aon te tano ae mwau nakon iterana are teuana.+

9 Ngke a roko naba ngkekei n iterana are teuana, ao e a taku Eria nakon Eritai: “Butiiai te bwai ae ko tangiria bwa N na karaoia ibukim imwain ae I uotakinako mairoum.” Mangaia are e taku Eritai: “Taiaoka e kona n reke irou te taamnei ae raoiroi+ ane iroum ni kauoua mwaitina?”*+ 10 E kaeka ni kangai: “Ko bubutii te bwai ae kangaanga. Ngkana ko norai n te tai are I a uotakinako iai mairoum, ao e na bon riki nakoim te aro anne, ma ngkana ko aki ao e na bon aki riki.”

11 Ngke a tabe n nakonako ma ni kakaraki i nanon nakonakoia, ao e a rina naba n roko te kaa ni buaka ae ura ma aoti aika ura+ ao a karaureia naaka uoman aikai. Ao e waerake Eria n te ukeukennanti nako karawa.*+ 12 Ngke e tarataraia Eritai ao e a takarua naba ni kangai: “Tamau, tamau! Ana kaa ni buaka Iteraera ma ana taan toka i aoia aoti!”+ Ngke e a aikoa kona n noria, ao e taui oin ana kunnikai ao e raeuai.+ 13 Imwin anne ao e tabeka ana kunnikai ni burabeti+ Eria are e bwaka mai aona, ao e oki rikaaki ma n tei i mataniwin te Ioretan. 14 E anaa ngkanne teuaei ana kunnikai ni burabeti Eria are e bwaka mai aona ao e orea iai te ran ao e taku: “E nga Iehova ae Atuan Eria?” Ngke e orea te ran ao e a bwenaua naba nakon te angamaing ao nakon te angaatai, n te aro are e a mwananga Eritai nakon iterana are teuana.+

15 Ngke a nora teuanne mai kiraroa natiia burabeti ake i Ieriko, ao a taku: “E a mena i aon Eritai te taamnei ae raoiroi are iroun Eria.”+ Mangaia are a a nako ni butimwaeia ao ni bobaraaki nako aontano i matana. 16 A taku nakoina: “Aikai mwaane aika konabwai aika 50 mwaitiia aika raoia am toro. Kanakoia taiaoka bwa a na ukoukora am toka. Tao e a tia taamnein* Iehova n tabekiarake ao ni kaaki i aon te maunga teuana ke n te mwarua teuana.”+ Ma e taku: “Tai kanakoia.” 17 Ma a teimatoa ni kaumakia ni karokoa ae e a maamaa, ngaia are e a taku: “Kanakoia.” A kanakoia mwaane ake 50, ake a a ukoukoria i nanon tenibong, ma a aki roko n te kunea. 18 Ngke a a oki nakoina ao e mena i Ieriko.+ Ao e taku nakoia: “Tiaki I bon tuangingkami bwa kam na aki nako?”

19 Imwina riki ao a taku mwaanen te kaawa nakon Eritai: “E bon noria au toka bwa e raoiroi nnen te kaawa,+ ma e buakaka te ran ao e kanoabo* te aba aei.” 20 Ngaia are e taku: “Uotaamai te boora ae uarereke ae boou ao kaaki te taoro i nanona.” Mangaia are a a uotia nakoina. 21 E a otinako ngkanne nakon te koburake n ran ao e karenako te taoro i nanona+ ao e taku: “E kangai ana taeka Iehova, ‘I karaoa te ran aei bwa e na raoiroi. E na aki manga karika te mate ke te kanoabo.’”* 22 Ao e teimatoa n raoiroi te ran arei ni karokoa te bong aei, ni kaineti ma te taeka are taekinaki iroun Eritai.

23 Ao e waerake mai ikekei nako Betaera. Ngke e tabe n nakonako ao a a otinako naba man te kaawa ataeinimwaane aika uarereke tabeman, ao a a kaenaenaa+ ao a tataekina ae kangai nakoina: “Waerake ngkoe te mara n atu! Waerake ngkoe te mara n atu!” 24 N tokina ao e a tanrikaaki n taraiia ao e karereantia n aran Iehova. Ao a a otinako naba man te buakonikai taiani bea aika aine aika uoman+ ao a raebitia 42 mai buakoia ataei akekei.+ 25 Ao e reitaanako mwanangana mai ikekei nakon te Maunga ae Karemera,+ ao e a okira Tamaria mai ikanne.

3 E a riki Ioram+ are natin Aaba bwa uean Iteraera i Tamaria n ana ka-18 n ririki n tautaeka Ieotiabata are uean Iuta, ao e tautaeka i nanon 12 te ririki. 2 E teimatoa ni karaoa ae buakaka teuaei i matan Iehova, ma e aki roko ni buakakan tamana ke tinana, bwa e kanakoa bouani Baara ae tabu are e karaoia tamana.+ 3 Ma e nimti ana bure Ieroboam are natin Nebata are e karekeia iai tibun Iteraera n te bure.+ E aki roko n te kitan.

4 Ao Metia are ueani Moaba bon te tia tararuaia tiibu, ao e anganga tiibutetei aika 100,000 ao tiibu mwaane aika aki koroburaeaki aika 100,000 bwa te angabwai nakon uean Iteraera. 5 Ngke e boni mate naba ngkekei Aaba,+ ao e a karitei naba ueani Moaba nakon uean Iteraera.+ 6 Mangaia are e otinako te Uea are Ioram n te bong anne mai Tamaria ao e ikotiia tibun Iteraera ni kabane. 7 E kanakotaeka naba nakon Ieotiabata are Uean Iuta ni kangai: “E karitei nakoiu ueani Moaba. Ko kan irai ni buakana Moaba?” Ao e taku: “N na mwananga.+ Bon titeboo ngai ma ngkoe, titeboo au aomata ma am aomata, ao titeboo au aoti nako ma am aoti.”+ 8 Ao e titiraki ni kangai: “Te kawai raa ae ti na waerake iai?” E kaeka ni kangai: “Te kawai are n rereuan Etom.”

9 E a nako ngkanne uean Iteraera ma uean Iuta ao uean Etom.+ Imwini mwanangaia ni katobibi i nanon itibong, ao ai akea te ran ibukia tautia ao ibukia maan aika manana ake a ririmwi. 10 E taku uean Iteraera: “Ai kananoangara te aba! E a tia Iehova n ikotiia ueea aika teniman aikai tii ibukin ae e na anga ngaiia nako nanoni baia I-Moaba!” 11 Mangaia are e taku Ieotiabata: “Iai ikai ana burabeti Iehova ae ti kona n titirakina Iehova rinanona?”+ Ao e kaeka temanna ana toro uean Iteraera ni kangai: “Iai Eritai+ are natin Tiabata, are e kakabwaroa ngkoa te ran i aoni bain Eria.”*+ 12 E taku ngkanne Ieotiabata: “E mena ana taeka Iehova iroun teuanne.” Ai ngaia are e a ruo rikaaki uean Iteraera ma Ieotiabata ao uean Etom bwa a na kawaria.

13 E taku Eritai nakon uean Iteraera: “Tera irekerekeu ma ngkoe?*+ Naako nakoia ana burabeti tamam ao nakoia ana burabeti tinam.”+ Ma e taku uean Iteraera nakon teuaei: “Tiaki ngaia anne, bwa e a tia Iehova n ikotiia ueea aika teniman aikai bwa e na anga ngaiia nako nanoni baia I-Moaba.” 14 Ao e taku Eritai: “Ngkai bon iai Iehova ae Atuaia taanga ni buaka* are I toro irouna,* ao ngke arona bwa I aki mutiakina te Uea ae Ieotiabata+ are uean Iuta, ao N na bon aki taraiko ke n tabe iroum.+ 15 Kairaamai nakoiu ngkai te tia katanga te abi.”*+ Ngke e boni katangitang naba ngkekei te tia katanga te abi, ao e a roko naba bain Iehova i aon teuaei.+ 16 Ao e taku, “E kangai ana taeka Iehova: ‘Kena te mwanono ae abwabwaki teuana imwin teuana i nanon te mwarua aei, 17 bwa e kangai ana taeka Iehova: “Kam na aki nora te ang ao kam na aki nora te karau, ma e na bon on te mwarua aei n te ran,+ ao kam na moi mai iai, ngkami ma ami nanai ni man, ao ami man riki ake tabeua.”’ 18 Ma aei bon te bwai ae uarereke i matan Iehova,+ bwa ane e na anga naba Moaba nako nanoni baimi.+ 19 Kam riai n orei ni kabwakai kaawa nako aika nonoaki+ ma kaawa nako aika rangi n raoiroi, ao kam riai ni korei ni kabwakai kaai nako aika raraoi, ao kam riai ni katoki koburake n ran ni kabane, ao kam riai n urui mwakoron nako aaba aika raraoi n taian atibu.”+

20 Ao n te ingabong, n taini kareanakin te karea ae te amwarake* n te ingabong,+ ao e a rina naba n roko te ran man te itera are nako mai Etom, ao e a on te aba arei n te ran.

21 A ongo I-Moaba ni kabane ae a a waerake ueea akekei bwa a na buakania, ngaia are a ikotiia mwaane ni kabane ake a kona ni buaka,* ao a a tei n tian te aba. 22 Ngke a a utimwaaka n te ingabong arei, ao e a riringa aon te ran, ao e a taraa n uraura te ran n ai aron te raraa irouia I-Moaba ake a mena n te itera are kaaitaraia. 23 Ao a taku: “Bon te raraa! A a bon tia ueea akekei n ikamamate i marenaia n te kabaang. Mangaia ae ngkami aika I-Moaba, ti a nako ni kuribwai!”+ 24 Ngke a a rin naakai n aia kaembwa tibun Iteraera, ao a teirake tibun Iteraera ao a a oreiia I-Moaba, ao a birinako naakai mairouia.+ A kaneneinako n rin i Moaba ao ni kamateia I-Moaba ngke a tabe ni mwananga. 25 A urui kaawa ni kabwakai, ao a karenakoi atibu mwaane n tatabemania nako nakoni mwakoron nako aaba aika raraoi, ni kaoni n atibu. A katoki koburake n ran ni kabane,+ ao a korei ni kabwakai kaai nako aika raraoi.+ N tokina ao e a tii tiku n tei ooni Kiriareteta+ ae te atibu, ao a a katobibia taani bana ao a kabwakaa.

26 Ngke e noria ueani Moaba bwa e nang konaaki n te buaka, ao e a kairiia mwaane aika uakabaang aika 700 bwa a na niniaanako uean Etom,+ ma a aki kona. 27 Mangaia are e a anaa natina te mwaane ae te karimoa are e na tautaeka n onea mwina, ao e a anga bwa te karea ni kabuekaki+ i aon te oo. Ao e a korakora te un n ekiianako tibun Iteraera, ngaia are a a nako mairoun teuaei ao a okiri abaia.

4 Ao e tang nakon Eritai te aine temanna ae buun temanna natiia burabeti,+ ao e kangai: “E a mate am toro are buu, ao ko bon ataia bwa e mamaaka Iehova am toro n taai nako.+ E a roko ngkai te tia kataarau bwa e na anaiia natiu ni kauoman bwa ana toro.” 2 Ao e taku Eritai nakon neierei: “Tera ae I kona ni karaoia ibukim? Tuangai, tera am bwai ae mena n am auti?” E kaeka neiei ni kangai: “Akea naba teuana ana bwai am toro n te auti ma tii teaina te kaatibu n oera.”+ 3 E taku ngkanne teuarei: “Naako otinako ao bubutiia kaain rarikim ni kabane aia kaatibu aika akea kanoaia. Karekei kaatibu aika bati n aron ane ko kona. 4 Imwina ao ko na rin ao kaina te mataroa imwim ma natim. Kanoai kaatibu akanne ni kabane ao kaokoroi akana onrake.” 5 Mangaia are e a nako neierei mairoun teuarei.

Ngke e a kaina te mataroa neierei imwina ma natina, ao a anganganna taiani kaatibu, ao ngaia e teimatoa ni kanoai.+ 6 Ngke a a onrake taiani kaatibu akekei ao e a taku neierei nakon natina temanna: “Uotaamai te kaatibu riki teaina.”+ Ma e taku natina nakoina: “Ai akea riki taiani kaatibu.” Ao e a toki naba te oera.+ 7 Mangaia are e rin ao e tuanga ana aomata te Atua ae koaua, ao e taku teuarei: “Naako kaboonakoa te oera anne, ao kabwarai iai am taarau, ao kam kona ni maiuakina nikiran te mwane anne ngkoe ma natim.”

8 N te bong teuana ao e a nako Eritai nako Tunem,+ ike e memena iai te aine ae kakannato, ao neiei e tebona teuaei bwa e na amwarake ikekei.+ Ni katoatai are e rikekei iai ao e a bon titiku naba n amwarake ikekei. 9 Mangaia are e a taku neiei nakoni buuna: “I ataia bwa bon ana burabeti te Atua te aomata are aki toki n ririkai arei. 10 Taiaoka ma ti na karaoa te ruu ae uarereke i aon te taubuki+ ao ti na kaaki iai te nne ni wene, te taibora, te kaintekateka, ao te kaintaura ibukina. Ao n te tai are e roko iai iroura ao e kona n tiku iai.”+

11 N te bong teuana ao e a roko ikekei, ao e nakon te ruu are i aon te taubuki bwa e na wene iai. 12 Ao e taku nakoni Keati+ are ana tabonibai: “Wetea te aine are te I-Tunem+ arei.” Mangaia are e weteia ao e a tei neiei i matana.” 13 Ao e taku teuarei nakoni Keati: “Taiaoka ma tuanga neienne ni kangai, ‘Noria ko a tia n rinanoni kangaanga aikai ni kabane ibukira.+ Tera ae e na karaoaki ibukim?+ N na taetae nakon te uea+ ke te mataniwi n te taanga ni buaka ibukim?’” Ma e kangai ana kaeka neiei: “Tiaki ngaia anne, bwa akea au kangaanga bwa I boni maeka i buakoia au koraki ma te mweraoi.” 14 Mangaia are e taku: “Tera ngkanne ae e kona ni karaoaki ibukin neiei?” Ao e taku Keati: “Noria, bon akea natina te mwaane,+ ao e a kara buuna.” 15 E a taku naba ngkekei teuarei: “Weteia.” Mangaia are e a wetea neiei ao e a tei n te mataroa. 16 Ao e taku: “N taina naba aei n te ririki ae e na roko ao ane ko na rabwata te nati te mwaane.”+ Ma e taku neiei: “Tiaki ngaia anne au toka, ae ana aomata te Atua ae koaua! Tai taekini keewe nakon am toro.”

17 Ma e a bikoukou te aine arei ao e bungia te nati te mwaane n taina naba arei n te ririki are imwina, n aron are e tuangnga Eritai. 18 E a ikawairake te teei arei, ao n te bong teuana ao e a nakon tamana are mena i rarikia taan ikotii uaa. 19 E teimatoa ni kangai nakon tamana: “Atuu! E maraki atuu!” Ao e taku tamana nakon te tabonibai: “Uotia nakon tinana.” 20 Mangaia are e uotia n oki nakon tinana, ao e tekateka i aon toaniwaen tinana ni karokoa ae tawanou, ao imwina e a mate.+ 21 Ao e waerake neiei ao e kawenea i aon te nne ni wene are nnen ana aomata te Atua ae koaua,+ ao e kaina te mataroa imwina ao e nako. 22 Ao e wetea buuna neiei ao e taku: “Kanakoai taiaoka ma te tabonibai temanna ao te taongki temanna, ao kariaia bwa N na waekoa n nako nakon ana aomata te Atua ae koaua ao I a manga oki.” 23 Ma e taku teuarei: “Bukin tera bwa ko na nako n noria n te bong aei? Tiaki ngkai te oti n namwakaina+ ke te bongi n taabati.” Ma e taku neiei: “A nakoraoi bwaai ni kabane.” 24 Mangaia are e katokaa neiei te kaintoka i aon te taongki ao e taku nakon ana tabonibai: “Kawaekoako ni mwananga. Tai karaurau ni karokoa ae I tuangko.”

25 Mangaia are e a nako neiei nakon ana aomata te Atua ae koaua n te Maunga ae Karemera. Ngke e nora naba ngkekei neiei mai kiraroa ana aomata te Atua ae koaua, ao e a taku naba nakoni Keati are ana tabonibai: “Noria! Ao arei te aine are te I-Tunem. 26 Taiaoka ma ko na biri ni butimwaeia ao titirakinna ni kangai, ‘Ko marurung? E marurung buum? E marurung natim?’” Ao e kaeka neiei ni kangai: “A bane ni marurung.” 27 Ngke e roko neiei iroun ana aomata te Atua ae koaua n te maunga, ao e a taui naba ngkekei waen teuarei.+ Ngaia are e keerake Keati bwa e na totokoa neiei ni kanakoa, ma e taku ana aomata te Atua ae koaua: “Katikua ma arona, bwa e korakora rawawatan nanona,* ao e karabaa te baei mairou Iehova ao e aki tuangai.” 28 Ao e taku neiei: “I boni bubutii ngkoa te nati te mwaane nakon au toka? Tiaki I kangai ngkoa, ‘Ko na tai anganai te kantaninga ae kairua’?”+

29 E a taku naba ngkekei teuarei nakoni Keati: “Kabaei am kunnikai i aoni bebeem+ ao taua okou aei ni baim ao naako. Ngkana ko kaitiboo ma temanna ao tai kamauria, ao ngkana iai ae e kamauriko ao tai kaekaa. Naako ao kaaki okou aei i aon ubun te teinimwaane.” 30 Ma e taku tinan te teinimwaane: “Ngkai bon iai Iehova ao ngkai ko* maiu, ao N na bon aki kitaniko.”+ Mangaia are e teirake teuarei ao e nako ma neiei. 31 E nako Keati n rimoaia ao e kaaki te oko i aon ubun te teinimwaane, ma akea te kakarongoa ke te kaeka.+ E nako n oki ao e kaitiboo ma Eritai ao e tuangnga ni kangai: “E aki uti te teinimwaane.”

32 Ngke e rin i nanon te auti Eritai ao e wene ni mate te teinimwaane i aoni nnen teuaei ni wene.+ 33 E rinnako ao e kaina te mataroa imwia ao e a tataro nakon Iehova.+ 34 E a toka ngkanne i aon te nne ni wene ao e wene i aon te teei, ao e kabooa wina ma win te teinimwaane, ao matana ma matana, ao nanoni baina ma nanoni baina, ao e teimatoa ni wene i aona, ao e a moanna n abue rabwatan te teei.+ 35 E a ririaki i nanon te auti, ao e a manga toka i aon te nne ni wene ao ni wene riki i aona. E a mwatie te teinimwaane arei itiua te tai ao imwina e a kaurei matana.+ 36 Ao Eritai e wetea Keati ao e taku: “Wetea te aine are te I-Tunem arei.” Mangaia are e weteia ao e a rin neiei nakoina. E taku ngkanne teuarei: “Tabeka natim.”+ 37 Ao e rin neiei ni bobaraaki i rarikini waen teuarei ao ni katorobubua nako aontano i matana, ao imwina e a tabeka natina neierei ao e otinako.

38 Ngke e oki Eritai nako Kirekara, ao e a roko te rongo n te aba.+ A tekateka i matana natiia burabeti+ ao e taku nakon ana tabonibai:+ “Kauraa te bwaata ae bubura ao kaburoa iai te tuubu ibukia natiia burabeti.” 39 Mangaia are e nako temanna mai buakoia nakon te tawaana bwa e na kiniki taian rengarenga, ao e nora te aroka teuana ae riki n aki akaka ao e anai uaana ni kanoaa iai ana kunnikai. E a oki ngkanne ao e korokorei nako nanon te bwaata n tuubu, ma e aki ataia bwa baikara baikekei. 40 Imwina riki ao a itia nakoia mwaane akekei bwa a na kanna, ma n te tai are a kana iai te tuubu arei ao a a takarua naba ni kangai: “Ana aomata te Atua ae koaua, e boitin kanoan te bwaata.” Ao a aikoa kona ni kanna. 41 Mangaia are e taku: “Uota teutana te burawa.” Ngke e a tia ni kabwakaa i nanon te bwaata ao e taku: “Itia nakoia aomata.” Ao ai akea te bwai ae kamamate i nanon te bwaata.+

42 E roko te mwaane temanna mai Baaratiaritia,+ ao e uotii ibukin ana aomata te Atua ae koaua, kariki aika baare+ aika 20 aika karaoaki mani moan uaanikai aika tawaa, n ikotaki ma teaina te baeki ni uita* aika menaai.+ E taku ngkanne Eritai: “Angania aomata aikai bwa a aonga n amwarake.” 43 Ma e taku ana tabonibai: “N na kangaa ni kaaki te baei i mataia mwaane aika 100?”+ Ao e taku teuarei: “Angania aomata bwa a aonga n amwarake, bwa e kangai ana taeka Iehova, ‘Ane a na amwarake ao e na nikirana.’”+ 44 Ngaia are e a kaaki i mataia, ao a amwarake ao e nikirana kanaia+ ni kaineti ma ana taeka Iehova.

5 Bon te mwaane ae kakannato Naaman are te mataniwi n ana taanga ni buaka uean Turia, ao e rangi ni karineaki iroun ana toka, ibukina bwa e anga te tokanikai* Iehova nakon Turia rinanon teuaei. Bon te tia buaka ae korakora ma bon te rebera* teuaei. 2 Ngke a kuribwai n te taina I-Turia ao a kairaanako te teinnaine temanna ae uarereke man te aba ae Iteraera bwa aia taenikai, ao e a riki bwa ana toro buun Naaman. 3 E taku te teinnaine aei nakon ana toka te aine: “Tera ngke e nako au toka ni kawara te burabeti+ are i Tamaria! Ao ane e na katoka reberana.”+ 4 Mangaia are e* nako ni kaongoa ana toka, ao e tuangnga te bwai are e taekinna te teinnaine are mai Iteraera.

5 E taku ngkanne uean Turia: “Naako ngkai! Ao N na kanakoa te reta nakon uean Iteraera.” Mangaia are e nako teuarei ao e uotii tebwina te tarena* n tirewa, 6,000 te mwakoro ni koora, ao kunnikai aika tebwina. 6 E uota te reta nakon uean Iteraera, ae kangai: “Irarikin te reta ae roko iroum aei, ao I kanakoa naba Naaman ae au toro, bwa ko aonga ni katoka reberana.” 7 Ngke e wareka naba ngkekei te reta arei uean Iteraera, ao e a raeuai naba kunnikaina ao e taku: “Ngai ngkai te Atua, ae N na kamatea te aba ke ni kateimatoa te maiu?+ Bwa e kanakoa te aomata aei nakoiu, ao e tuangai bwa N na katoka reberana! Kam kona n noria bwa e ukoukora te kauntaeka ma ngai.”

8 Ma ngke e ongo Eritai are ana aomata te Atua ae koaua, bwa e raeuai kunnikaina uean Iteraera, ao e a kanakotaeka naba ngkekei nakon te uea ni kangai: “Bukin tera ngkai ko raeuai kunnikaim? Taiaoka ma kanakomaia teuanne nakoiu bwa e aonga n ataia ae bon iai te burabeti i Iteraera.”+ 9 Mangaia are e a roko Naaman ma ana aoti ao ana kaa ni buaka ao n tei i rarikini mataroan ana auti Eritai. 10 Ma e kanakoa te tia uataeka Eritai nakon teuaei bwa e na tuangnga ae kangai: “Naako tebokiko itiua te tai+ n te Ioretan,+ ao e na okira arona irikom ao ko na itiaki.” 11 E a un iai Naaman ao e a nako ao e taku: “I kangai i bon irou, ‘E na otinako nakoiu ao e na tei ikai ma n taboa aran Iehova ae Atuana, ao e na katiotioa baina i aon te tabo ae rebera bwa e na katokia.’ 12 Tiaki a raoiroi riki karaangan Tamateko+ ake te Abanaa ma te Bareba, nakon aia ran ni kabane tibun Iteraera? Tiaki I kona n tebotebo iai ao I a itiaki naba?” Ao e rairaki ao e nako ma te un ae korakora.

13 A a kawaria ngkai ana toro ao a taku: “Tamau, ngke arona bwa e tuangko te burabeti bwa ko na karaoa te bwai ae rangi ni kaokoro, tiaki ko na boni karaoia? Ai riaira riki ngkanne aei, bwa e tii kangai nakoim, ‘Tebotebo ao ko na itiaki’?” 14 Ngaia are e a ruo ma n tebo* n te Ioretan itiua te tai ni kaineti ma ana taeka ana aomata te Atua ae koaua.+ Ao e a okira arona irikona n ai aron irikon te teinimwaane,+ ao e a itiaki.+

15 Imwin anne ao e a oki nakon ana aomata te Atua ae koaua,+ ngaia ma te koraki ni kabane ake raona ni mwananga,* ao e tei i matana ao e taku: “I a ataia ngkai bwa bon akea te Atua n taabo nako n te aonnaba ma bon tii i Iteraera.+ Taiaoka ngkai ma butimwaea te bwaintituaraoi* mairoun am toro.” 16 Ma e taku Eritai: “Ngkai bon iai Iehova ae I toro* irouna ao N na bon aki butimwaeia.”+ E tebonna bwa e na butimwaeia ma e bon teimatoa n rawa. 17 N tokina ao e a taku Naaman: “Ngkana ko aki, ao taiaoka kariaia bwa e na anganaki am toro tanon te aba aei ae e uotaki irouia miure aika uoman, bwa e na aki manga anga te karea ni kabuekaki ke te karea teuana am toro nakoia atua riki tabeman, ma tii nakon Iehova. 18 Ma e bia kabwaraa ana bure am toro Iehova ibukin te bwai ae tii teuana aei: Ngkana e rin au toka i nanon ana auti* Rimmon bwa e na katorobubua iai, ao e totokoia n anganibaiu, mangaia are I bon riai naba ni bobaraaki n ana auti Rimmon. Ngkana I katorobubua n ana auti Rimmon ao taiaoka ma e bia kabwaraa ana bure am toro Iehova ibukin aei.” 19 Ngaia are e taku teuarei nakoina: “Naako ma te rau.” Imwin nakona mairoun teuarei ao e a raroa teutana, 20 ao e a kangai naba i bon irouna Keati+ are ana tabonibai Eritai ae ana aomata te Atua ae koaua:+ ‘Noria e a kanakoa Naaman are te I-Turia+ au toka, ao e aki butimwaei mairouna baike e uotii. Ngkai bon iai Iehova, ao N na biri n rimwina ao n anaa te bwai teuana mairouna.’ 21 Ao Keati e a kaea Naaman. Ngke e nora te aomata temanna Naaman bwa e biri n rimwina, ao e a ruo naba man ana kaa ni buaka ni butimwaeia ao e taku: “A nakoraoi bwaai ni kabane?” 22 E kaeka ni kangai: “A bane n nakoraoi. E kanakoai au toka, ao e kangai, ‘Noria! A a tibwa roko irou ngkai naba rorobuaka n ataei aika uoman mai buakoia natiia burabeti man aonon Eberaim ae maungaunga. Taiaoka ma angania teuana te tarena n tirewa ao uoua te kunnikai.’”+ 23 E taku Naaman: “Anai uoua te tarena.” Ao e teimatoa n tebonna,+ ao e a kabaei uoua te tarena n tirewa i nanoni baeki aika uaai, ao kunnikai aika uoua, ao e angania ana tabonibai aika uoman, ake a a uotii n rimoana.

24 Ngke e a roko i Ooberao* ao e anai mai nanoni baia nakekei ao e kaaki n te auti ao e kanakoia mwaane akekei. Ngke a a nako nakekei, 25 ao e nako n rin ao e tei i rarikin ana toka. E a taku ngkai Eritai nakoina: “Ko nako mai ia Keati?” Ma e taku: “E aki nakon te tabo teuana am toro.”+ 26 E taku Eritai nakoina: “Tiaki e boni mena nanou ma ngkoe ikekei, ngke e ruo te aomata arei man ana kaa ni buaka bwa e na butimwaeiko? Aio ngkai te tai ni butimwaea te tirewa ke ni butimwaei kunnikai ke nne n oriwa ke nne ni kureebe ke tiibu ke kaao ke tooro mwaane ke tooro aine?+ 27 Ane e na nimtiko ngkai reberan Naaman+ ma kanoam n aki toki.” Ao e a otinako naba ngkekei mai matana bwa ai te rebera, ae mainaina n aron te tino.+

6 A taku natiia burabeti+ nakon Eritai: “Noria! E a rangi n ribwa ibukira te tabo ae ti mena iai ma ngkoe. 2 Taiaoka ma kanakoira nakon te Ioretan. Ti na anai kaka teaina te kai mai ikekei ngaira n tatabemanira nako, ao ti na karaoa ikekei te tabo ae ti na kona ni maeka iai.” Ao e taku: “Naako.” 3 E taku temanna i buakoia: “Ko aki kan iriia am toro taiaoka?” Ao e taku: “N na iri.” 4 Mangaia are e nako ma ngaiia, ao a a roko n te Ioretan ao a a korei kaai ni kabwakai. 5 Ngke e tabe temanna i buakoia ni korea te kai ni kabwakaa, ao e a bwaka naba win te tanai nako nanon te ran ao e a takarua naba ni kangai: “Akea ngaira au toka, bwa te bwai ae tangoaki te baei!” 6 E taku ana aomata te Atua ae koaua: “E bwaka ia?” Mangaia are e kaota te tabo nakoina. E korea ngkanne te mwakoro ni kai teaina ao e karenakoa ikekei ao e a betirake iai win te tanai. 7 E taku: “Aekia.” Mangaia are e kaenakoa baina teuarei ao e anaia.

8 Ao e a nako uean Turia bwa e na buakania tibun Iteraera.+ E maroro ma ana toro ao e taku: “N na katei au umwanrianna ma ngkami n te tabo arei ao n te tabo arei.” 9 Ao e kanakotaeka ana aomata te Atua ae koaua+ nakon uean Iteraera ni kangai: “Taratara raoi bwa ko na aki rirarikin te tabo aei, bwa aei te tabo ae a nangi ruo nako iai I-Turia.” 10 Mangaia are e kanakotaeka uean Iteraera nakon te tabo are e a tia ana aomata te Atua ae koaua n anganna te kauring ibukina. E teimatoa n anganga te kauring nakoina, ao e kakararoaa ikekei n taai tabeua.*+

11 E rangi ni kauna uean* Turia te baei, mangaia are e a weteiia ana toro ao e taku nakoia: “Tuangai! Antai i buakora ae e tei n ana itera uean Iteraera?” 12 Ao e taku ana toro temanna: “Akea i buakora, au toka ae te uea! Bon Eritai are te burabeti are i Iteraera, ae e tuanga uean Iteraera baike ko taekin i nanon am ruu ni matu.”+ 13 E taku: “Naako ao kakaaea bwa e mena ia bwa I aonga ni kanakoia mwaane bwa a na taua.” Imwina riki ao e a kaongoaki ae kangai: “E mena i Totan.”+ 14 E aki tabwara ma e a kanakoia naba aoti ma kaa ni buaka nako ikekei, n ikotaki ma te taanga ni buaka ae rangi ni bati. A roko n te tairiki ao a otabwaninia te kaawa.

15 Ngke e utimwaaka ana tabonibai* ana aomata te Atua ae koaua ao e otinako, ao e a nora te taanga ni buaka ma aoti ao kaa ni buaka bwa a otabwaninia te kaawa. E a taku naba te tabonibai nakoina: “Akea ngaira au toka! Tera ae ti na karaoia?” 16 Ma e taku: “Tai maaku!+ Bwa a bati riki aika raonira nakoia ake a raonia.”+ 17 Ao e a tataro Eritai ao e kangai: “Iehova, taiaoka kaurei matana bwa e aonga n noraaba.”+ E kaurei naba ngkekei matan te tabonibai arei Iehova ao e a noraaba, ao noria! e on te aono ae maungaunga aei irouia aoti ma kaa ni buaka aika ura+ aika otabwaninia Eritai.+

18 Ngke a a ruo I-Turia nakoina, ao e tataro Eritai nakon Iehova ao e taku: “Taiaoka ma orea te natannaomata aei n te mataki.”+ Mangaia are e oreiia n te mataki, n aron are e bubutii iai Eritai. 19 E a taku ngkai Eritai nakoia: “Tiaki aio te kawai, ao tiaki aio te kaawa. Rimwiai, bwa N na kairingkami nakon te aomata are kam kakaaea.” Ma e kairiia nako Tamaria.+

20 Ngke a a roko i Tamaria ao e taku Eritai: “Iehova, kaurei mataia bwa a aonga n noraaba.” E kaurei naba ngkekei mataia Iehova, ao a a noria bwa a a mena i nukan Tamaria. 21 Ao e taku uean Iteraera nakon Eritai ngke e noriia nakekei: “Tamau, I a kamateia, I a kamateia?” 22 Ma e taku: “Ko na tai kamateia. Ko kakamateia n am kabaang ao n am kainikatebe aomata aika ko kairiia bwa am taenikai? Angania te kariki ao te ran, bwa a aonga n amwarake+ ao a na okira aia toka.” 23 Ngaia are e karaoa te baka n amwarake ae bubura ibukia, ao a amwarake ao a moi, ao imwina e kanakoia bwa a na okira aia toka. Ao a aki roko n te manga oki taani kuribwai aika I-Turia+ nakon te aba ae Iteraera.

24 Imwin anne ao e a ikotiia ana taanga ni buaka* ni kabane Benataata are uean Turia, ao a waerake n otabwaninia Tamaria.+ 25 Ao iai te rongo ae korakora+ i Tamaria, ao a a otabwaninia te aba aei ni karokoa ae ai boon atun te taongki+ 80 te mwakoro n tirewa, ao boon nakotaarin te taobe ae te kaamwakoro te bwai ni baire ae te bainte,* ai 5 te mwakoro n tirewa. 26 Ngke e nakonako uean Iteraera i aon te oo, ao e a takarua naba te aine temanna nakoina ni kangai: “Buokira au toka ae te uea!” 27 Ao e kaeka ao e taku: “Ngkana e aki buokiko Iehova, ao N na karekea mai ia buokam? Man te tabo ni kaaki kun ni uita? Ke man te nne ni kamanti ibukin te wain ke te oera?” 28 Ao te uea e titirakina neierei ni kangai: “Tera ae riki iroum?” E kaeka neierei ni kangai: “E taku te aine aei nakoiu, ‘Aanga natim bwa ti na kanna n te bong aei, ao ti a kana natiu ningabong.’+ 29 Ngaia are ti kaburoa natiu ao ti kanna.+ I a taku ngkanne nakoina n te bong are imwina, ‘Aanga natim bwa ti na kanna.’ Ma e karabaa natina.”

30 Ngke e ongo naba ngkekei te uea ana taeka te aine arei, ao e a raeuai naba kunnikaina.+ Ngke e nakonako i aon te oo, ao a noria aomata bwa e bwainna n te raerobwa* i aan ana kunnikai.* 31 Ao e taku: “E bia katuuaaeai te Atua ao ni kamwaitia riki, ngkana e teimatoa n tiku atun Eritai are natin Tiabata i aona n te bong aei!”+

32 E tekateka Eritai n ana auti ao a tekateka unimwaane ma ngaia. Ao te uea e kanakoa te mwaane temanna bwa e na rimoana, ma imwain rokon te tia uataeka arei ao e a taku naba Eritai nakoia unimwaane: “Kam nora aron natin te tia tiritiri aei+ ngkai e a kanakoaki bwa e na kabakua roroau? Taraia bwa ngkana e roko te tia uataeka ao kaina te mataroa, ao taua te mataroa ni kamatoaa n tukia. Tiaki boni mwakaikaini waen ana toka ane e rimwina?” 33 Ngke e tabe n taetae ma ngaiia, ao e a roko naba irouna te tia uataeka arei, ao e taku te uea: “Boni mairoun Iehova te kabuanibwai aei. Bukin tera bwa I riai n tataningaa riki Iehova?”

7 E a taku ngkai Eritai, “Ongora n ana taeka Iehova. E kangai ana taeka Iehova: ‘N taina naba aei ningabong i rarikini mataroan* oon Tamaria, ao boon te burawa ae mte ae teuana te bwai ni baire ae te tiea* bon teuana te tiekera,* ao boon te baare ae uoua te bwai ni baire ae te tiea bon teuana te tiekera.’”+ 2 Ao e taku nakon ana aomata te Atua ae koaua te mataniwi are ana tia ibuobuoki te uea:* “E ngae ngkana e riai Iehova ni kauka mataroan te ran are i karawa, ma e na kona n riki aei?”*+ Ngaia are e taku: “Ko na noria ni matam,+ ma ko na bon aki amwarake mai iai.”+

3 Ao iai rebera aika aman i rarikini mataroan oon te kaawa,+ ao a taku i marenaia: “E aera ngkai ti na tekateka ikai ni karokoa ae ti mate? 4 Ngkana ti kangai, ‘Ti a nako nanon te kaawa,’ ngkai e roko te rongo n te kaawa,+ ao ane ti na mate ikekei. Ao ngkana ti tekateka ikai ao ti na boni mate naba. Mangaia ae ti a nako nakon aia kaembwa I-Turia. Ngkana a kamaiuira ao ti na maiu, ma ngkana a kamateira ao ti na mate.” 5 A teirake ngkanne n te tairiki ngke e a rotongitong ao a a rinnako n aia kaembwa I-Turia. Ngke a a roko i tabon aia kaembwa I-Turia, ao bon akea temanna te aomata ikekei.

6 Bwa e karaoiia kaain aia kaembwa I-Turia Iehova bwa a na ongo rurungaan taiani kaa ni buaka ao taian aoti, ae karongoaan te taanga ni buaka ae rangi ni bati.+ Mangaia are a taku i marenaia: “Noria! E a tia uean Iteraera ni kabooia aia uea tibun Eta ao uean Aikubita bwa a na roko ni buakanira!” 7 A teirake naba ngkekei ao a birinako n te tairiki arei ngke e a rotongitong, ao a katikui n aroia aia umwanrianna, aoti, taongki, ao te kaembwa ni kabane, ao a birinako n rawei maiuia.*

8 Ngke a a roko rebera aikai i tabon te kaembwa, ao a rinnako n te umwanrianna teuana ao a amwarake ma ni moi iai. A uotaanako mai iai te tirewa, te koora, ao kunnikai, ao a nako ni karabai. Ao a a manga oki ao a rinnako n te umwanrianna riki teuana ao a uotiinako bwaai mai iai ao a nako ni karabai.

9 N tokina ao a a taku i marenaia: “E aki riai te bwai ae ti karaoia aei. Te bong aei boni bongin te rongorongo ae raoiroi! Ngkana ti tabwarabwara ao n tataninga riki ni karokoa te karangaina, ao ti bon riai ni katuuaaeaki. Ti a nako ngkai ni karokoa te rongorongo aei n ana auti te uea.” 10 Mangaia are a a nako ao a takaruaia taan teiakina mataroan oon te kaawa ao a tuangia ni kangai: “Ti nako n rin n aia kaembwa I-Turia, ma akea te aomata temanna ikekei, ao ti bon aki ongo naba teutana bwanaan temanna. Bon tii aoti ma taongki aika bae, ao umwanrianna aika katukaki n aroia.” 11 Ao a a takarua naba ngkekei taan teiakina mataroan te oo, ao e a roko te rongorongo i nanon ana auti te uea.

12 E teirake naba ngkekei te uea n te tairiki arei ao e taku nakoia ana toro: “Taiaoka ma kariaia bwa N na tuangingkami te bwai ae a karaoia nakoira I-Turia. A ataia ae ti a bora ni baki,+ mangaia are a kitana te kaembwa bwa a na karabaia n te tawaana, bwa a kangai, ‘Ane a na otinako man te kaawa, ao ti na raweiia ngkai a maiu ao n rinnako i nanon te kaawa.’”+ 13 Ao e taku temanna ana toro: “Taiaoka ma kariaia tabeman rorobuaka bwa a na anai nikiraia aoti aika niman aika n te kaawa. Noria! E na bon titeboo naba tokia ma tibun Iteraera ni kabane aika uanao aikai aika tiku ikai. Noria! E na bon titeboo naba tokia ma tibun Iteraera ni kabane aika uanao aikai aika a a tia ni mate. Ti na kaotinakoia ao ti na noria.” 14 Mangaia are a anai kaa ni buaka aika uowaa ma aoti, ao e a kaotinakoia te uea nakon aia kaembwa I-Turia ao e kangai: “Naako noria.” 15 A ririmwia ni karokoa te Ioretan, ao e on te kawai arei ni kabutaa n taiani kunnikai ma bwaai ake a karenakoi I-Turia ngke a takaka ni birinako. A oki taan uataeka ao a kaongoa te uea.

16 Ao a a otinako aomata ao a kuribwaia aia kaembwa I-Turia, n te aro are boon te burawa ae mte ae teuana te bwai ni baire ae te tiea bon teuana te tiekera, ao boon te baare ae uoua te bwai ni baire ae te tiea bon teuana te tiekera, ni kaineti ma ana taeka Iehova.+ 17 Ao te uea e mwiokoa te mataniwi are ana tia ibuobuoki bwa e na tararuaa mataroan te oo, ma a toubekaia aomata n uaa matena ni mataroan te oo, n aron ana taeka ana aomata te Atua ae koaua are e tuanga te uea ngke e ruo nakoina. 18 E bon riki n aron are e taekinna ana aomata te Atua ae koaua nakon te uea ni kangai: “N taina naba aei ningabong ni mataroan oon Tamaria, ao boon te baare ae uoua te bwai ni baire ae te tiea bon teuana te tiekera, ao boon te burawa ae mte ae teuana te bwai ni baire ae te tiea bon teuana te tiekera.”+ 19 Ma e kangai ngkoa te mataniwi arei nakon ana aomata te Atua ae koaua: “E ngae ngkana e riai Iehova ni kauka mataroan te ran are i karawa, ma e na kona n riki te aekaki aei?”* Ngaia are e taku Eritai: “Ko na noria ni matam, ma ko na bon aki amwarake mai iai.” 20 Ao bon anne te bwai ae riki nakoina, ibukina bwa a toubekaia aomata n uaa matena ni mataroan te oo.

8 Ao e taku Eritai nakon te aine are e kamaiua* ngkoa natina:+ “Teirake ao naako, ngkoe ma kaaini batam, ao maeka bwa te ianena n te tabo are ko kona ni mena iai, bwa e taekina te rongo Iehova,+ ao e na bon roko i aon te aba i nanon itiua te ririki.” 2 Mangaia are e teirake te aine arei ao e karaoa are e taku ana aomata te Atua ae koaua. E nako ma kaaini batana ao a maeka i abaia I-Biritia+ i nanon itiua te ririki.

3 Ngke a a koro ririki aika itiua ao e a oki te aine arei mai abaia I-Biritia ao e a nako n tangitang nakon te uea ibukin ana auti ao ana tawaana. 4 E a taetae ngkai te uea nakoni Keati are ana tabonibai ana aomata te Atua ae koaua, ni kangai: “Taiaoka ma karakin nakoiu bwaai ni kabane aika kakannato ake e karaoi Eritai.”+ 5 Ngke e tabe ni karakina nakon te uea arona ni kamaiua te aomata are mate,+ ao e a roko naba iroun te uea te aine are e kamaiua ngkoa natina, n tangitang ibukin ana auti ao ana tawaana.+ E a taku naba Keati: “Au toka ae te uea, ao aei te aine arei, ao aei natina are e kamaiua Eritai.” 6 Ao te uea e titirakina te aine arei ao e karaki neierei nakoina. Ao te uea e karekea te mataniwi temanna ibukin neiei ao e tuanga teuaei ni kangai: “Kaoki ana bwai neiei ni kabane ao uaan nako te tawaana man te bong are e kitana iai te aba ni karokoa ngkai.”

7 E nako Eritai nako Tamateko+ ngke e aoraki uean Turia are Benataata.+ Mangaia are e a kaongoaki ae kangai: “E a tia n roko ikai ana aomata te Atua ae koaua.”+ 8 Ao e taku te uea nakon Atiaera:+ “Uota te bwaintangira aei ao naako kawara ana aomata te Atua ae koaua.+ Titirakina Iehova rinanon teuanne, ni kangai, ‘N na marurung man te aoraki aei?’” 9 E nako Atiaera ni kawaria ao e uota te bwaintangira, aika bwain Tamateko aika raraoi n aekaia nako, aika uotaia kamero aika 40. E nako ao e tei i matana ao e taku: “E kanakoai nakoim natim are Benataata are uean Turia bwa N na titirakiniko ni kangai, ‘N na marurung man te aoraki aei?’” 10 E kaeka ni kangai Eritai nakon teuaei: “Naako ao tuangnga ni kangai, ‘Ko na boni marurung,’ ma e a tia Iehova ni kaotia nakoiu bwa e na boni mate.”+ 11 Ao e teimatoa teuaei n taraa Atiaera ni karokoa ae e a maamaa. Ao e a tang ana aomata te Atua ae koaua. 12 E titiraki ni kangai Atiaera: “E aera ngkai e a tang au toka?” E kaeka ni kangai: “Ibukina bwa I bon ataa te iowawa ae ko na karaoia nakoia tibun Iteraera.+ Ko na kabueki n te ai aia tabo aika nonoaki, ko na kamateia n te kabaang aia rorobuaka aika rangi n raoiroi, ko na tiringia aia ataei n te aro ae iowawa, ao ko na bwenai birotoia aia aine aika bikoukou.”+ 13 E taku Atiaera: “E na kangaa ni karaoa te mwakuri anne am toro ngkai bon tii te kamea ngaia?” Ma e taku Eritai: “E a tia Iehova ni kaotia nakoiu bwa ko na uea i aon Turia.”+

14 Ao e kitana Eritai ao e okira ana toka, are e a kangai nakoina: “Tera ae e taekinna nakoim Eritai?” E kaeka ni kangai: “E tuangai bwa ko na boni marurung.”+ 15 Ma n te bong are imwina ao e anaa te rabuna Atiaera, ao e kateboa n te ran ao e rabuna* iai ubuna ni karokoa ae e mate.+ Ao e a riki Atiaera bwa te uea n onea mwina.+

16 N ana kanimaua n ririki n tautaeka Ioram+ are natin Aaba are uean Iteraera, ngke e uea Ieotiabata i aon Iuta, ao e a riki bwa te uea Ioram+ are natin Ieotiabata are uean Iuta. 17 Bon 32 ana ririki ngke e a riki bwa te uea, ao e tautaeka i Ierutarem i nanoni wanua te ririki. 18 E nakonako ni kawaia uean Iteraera,+ n aron are a karaoia ana utu Aaba,+ bwa e riki natin Aaba te aine bwa buuna,+ ao e teimatoa teuaei ni karaoa ae buakaka i matan Iehova.+ 19 Ma e aki kani kamauna te tautaeka n uea ae Iuta Iehova ibukin Tawita are ana toro,+ kioina ngke e a tia ni berita nakoina bwa e na anga te taura nakoina+ ma natina n taai nako.

20 N ana bong teuaei ao e a karitei Etom n ekaanako Iuta+ ao e a karekea oin ana uea.+ 21 Mangaia are e mwananga Ioram nako Taiara ma ana kaa ni buaka ni kabane, ao e teirake n te bong ao e kataei aia kai tibun Etom ake a otabwaninia ma mataniwin taiani kaa ni buaka, ao a birinako kaain te taanga ni buaka nakon aia umwanrianna. 22 Ma e teimatoa Etom ni karitei n ekaanako Iuta ni karokoa te bong aei. E karitei naba Ribena+ n te tai anne.

23 Ao nikiran rongorongon Ioram ma bwaai ni kabane ake e karaoi, tiaki a koreaki n te boki are rongorongon aia tai uean Iuta? 24 Ao e a wene ni motirawa Ioram i rarikia ana bakatibu, ao e kaiiaki i rarikia ana bakatibu n Ana Kaawa Tawita.+ Ao e a riki natina are Aatia+ bwa te uea n onea mwina.

25 N ana ka-12 n ririki n tautaeka Ioram are natin Aaba are uean Iteraera, ao e a riki bwa te uea Aatia are natin te Uea are Ioram are uean Iuta.+ 26 Bon 22 ana ririki Aatia ngke e riki bwa te uea, ao e tautaeka i Ierutarem i nanon teuana te ririki. Aran tinana Atariia+ are tibun* te Uea are Omri+ are uean Iteraera. 27 E nakonako teuaei ni kawaia ana utu Aaba,+ ao e teimatoa ni karaoa ae buakaka i matan Iehova, n aroia ana utu Aaba, bwa ana koraki teuaei kaain ana utu Aaba, bwa e mare+ nako iai. 28 Mangaia are e mwananga teuaei ma Ioram are natin Aaba bwa a na buakana Atiaera are Uean Turia i Ramotakireata,+ ma a kaikoaka Ioram+ I-Turia. 29 Mangaia are e a oki te Uea are Ioram nako Ietireera+ bwa e na kamarurungnga man ikoakina are a kaikoakia iai I-Turia i Rama, ngke e buaka ma te Uea are Atiaera are uean Turia.+ Ao Aatia are natin Ioram are uean Iuta e ruo rikaaki nako Ietireera bwa e na nora Ioram are natin Aaba, ibukina bwa e ikoaki* teuaei.

9 Ao Eritai are te burabeti e wetea temanna natiia burabeti ao e taku nakoina: “Kabaei am kunnikai i aoni bebeem ao kawaekoako n anaa nnen te bwaa aei ao naako Ramotakireata.+ 2 Ngkana ko roko ikekei, ao kakaaea Ieu+ are natin Ieotiabata are natin Nimti, ao naako riin ao kateirakea mai buakoia tarina ao kairia nakon te ruu are mai nanona riki. 3 Ko na anaa ngkanne nnen te bwaa ao kabwaroa i aon atuna ao kangai, ‘E kangai ana taeka Iehova: “I kabiriko bwa uean Iteraera.”’+ Ao imwina, kauka te mataroa ao birinako ao tai baenikai.”

4 Mangaia are e a touaanako kawaina ana tabonibai te burabeti arei nako Ramotakireata. 5 Ngke e a roko, ao a tekateka ikekei mataniwi n te taanga ni buaka. Ao e taku teuaei: “Iai te rongorongo nakoim, ngkoe ae te mataniwi.” E titiraki ni kangai Ieu: “Nakon antai i buakora?” E taku teuaei: “Nakoim ngkoe ae te mataniwi.” 6 Mangaia are e teirake Ieu ao e nako n rin n te auti, ao e kabwaroa te bwaa te tabonibai arei i atuna ao e taku nakoina, “E kangai ana taeka Iehova ae Atuan Iteraera: ‘I kabiriko bwa te uea i aoia ana aomata Iehova, i aon Iteraera.+ 7 Ko riai ni kamateia ana utu Aaba are am toka, ao N na irantangai raraaia au toro ake burabeti ao ana toro Iehova ni kabane ake a mate i aani bain Ietebera.+ 8 Ao a na mate kaain ana utu Aaba ni kabane, ao N na kamaunaia man ana utu Aaba, mwaane* ni kabane n ikotaki ma aika akea korakoraia ao aika mamaara i Iteraera.+ 9 Ao N na karaoiia ana utu Aaba bwa ai aroia ana utu Ieroboam+ are natin Nebata, ao ai aroia ana utu Baata+ are natin Aiia. 10 Ni kaineti ngkanne ma Ietebera, a na kanna kamea ni mwakoron te aba are i Ietireera,+ ao akea ae e na kaiia neiei.’” Imwina ao e kauka te mataroa ao e birinako.+

11 Ngke e a okiriia ana toro ana toka Ieu, ao a titirakinna ni kangai: “A nakoraoi bwaai ni kabane? E aera ngkai e kawariko te aomata are rangirang arei?” E kaekaia ni kangai: “Kam bon ataa te aeka n aomata arei ma aron ana taetae.” 12 Ma a taku: “Tiaki anne te koaua! Tuangira taiaoka.” Ao e taku: “E kangai ana taeka nakoiu, ao e reitia ni kangai, ‘E kangai ana taeka Iehova: “I kabiriko bwa te uea i Iteraera.”’”+ 13 Mangaia are a ienikuri n anai aia kunnikai ngaiia n tatabemania nako ao a kaaki i aana i aon te bwai n tamwarake ae akea rabunana,+ ao a katanga te buu ao a taku: “E a riki Ieu bwa te uea!”+ 14 Ao Ieu+ are natin Ieotiabata are natin Nimti, e a bairea te karitei nakon Ioram.

Ao e tantani Ioram i Ramotakireata+ ngaia ma tibun Iteraera ni kabane, ibukin te Uea are Atiaera+ are uean Turia. 15 Imwina riki ao e a oki te Uea are Ioram nako Ietireera+ bwa e na kamaoa ikoakina are a kaikoakia iai I-Turia ngke e buakana te Uea are Atiaera are uean Turia.+

E a taku ngkai Ieu: “Ngkana kam* kariaia, ao tai karekea birinakon temanna man te kaawa ni kaongongo taekan te baei i Ietireera.” 16 Ao e toka Ieu i aon ana kaa ni buaka ao e nako Ietireera, bwa e wene ikekei Ioram ma ikoakina, ao e ruo rikaaki Aatia are uean Iuta bwa e na nora Ioram. 17 Ao ngke e tei te tia tantani i aon te taua i Ietireera, ao e noriia ana rorobuaka Ieu aika uanao bwa a a tabe n uakaan. Ao e a taku naba: “I noriia rorobuaka aika uanao.” E taku Ioram: “Rinea temanna te tia toka i aon te aoti ao kanakoa bwa e na kawariia, ao ke e kangai nakoia, ‘Kam roko ma te raoi?’” 18 Mangaia are e nako te tia toka i aon te aoti arei ni kawara teuarei ao e taku: “E kangai ana taeka te uea, ‘Kam roko ma te raoi?’” Ma e taku Ieu: “Tera am bwai n ‘te raoi’? Nakomai rimwiu!”

E kaongora ngkanne te tia tantani ni kangai: “E roko te tia uataeka irouia, ma e a aki oki.” 19 Mangaia are e a manga kanakoa te kauoman n aomata ae toka i aon te aoti, are e a kangai ngke e kawariia: “E kangai ana taeka te uea, ‘Kam roko ma te raoi?’” Ma e taku Ieu: “Tera am bwai n ‘te raoi’? Nakomai rimwiu!”

20 E kaongora ngkanne te tia tantani ni kangai: “E roko te tia uataeka irouia ma e a aki oki, ao te biri aei titeboo ma biribirin ana kaa ni buaka Ieu are tibun* Nimti, bwa e kabiribiria n aron te aomata ae rangirang.” 21 E taku Ioram: “Katauraoi!” Mangaia are e a katauraoaki ana kaa ni buaka, ao e a otinako Ioram are uean Iteraera ma Aatia+ are uean Iuta ngaiia n tatabemania nako i aon aia kaa ni buaka bwa a na kawara Ieu. Ao a boo ma ngaia ni mwakoron aban Nabota+ are te I-Ietireera.

22 E taku Ioram ngke e nora naba ngkekei Ieu: “Kam roko ma te raoi Ieu?” Ma e taku: “E na kangaa n reke te raoi ngkana e teimatoa ni karaoa te wene ni bure* Ietebera+ are tinam ao e kabatiaa ana tabunea?”+ 23 E aki tabwara Ioram ma e a rairaanako naba ana kaa ni buaka bwa e na birinako, ao e taku nakon Aatia: “Ti a tia ni mwamwanaaki, Aatia!” 24 E anaa ana kainikatebe Ieu i baina ao e katebea Ioram i marenan angana, ao e otinako kanoan te kainikatebe mai buroona, ao e bwaka teuaei i nanon ana kaa ni buaka. 25 E taku ngkanne nakoni Bitekara are ana mataniwi: “Tabekia ao karenakoa i nanon ana tawaana Nabota are te I-Ietireera.+ Uringnga are ti kaai n ririmwin Aaba are tamana ngai ma ngkoe, ngke e bon taekina te taeka aei Iehova n ekianako ni kangai:+ 26 ‘“Ngkai I bon nora raraan Nabota+ ao raraaia natina ngkoananoa,” bon ana taeka Iehova, “ao N na irantangai+ raraaia ni karekea kaim n te mwakoro n aba aei,” bon ana taeka Iehova.’ Mangaia ae tabekia ngkai ao karenakoa nako nanon te mwakoro n aba anne, ni kaineti ma ana taeka Iehova.”+

27 Ngke e nora te bwai ae riki Aatia+ are Uean Iuta, ao e birinako n rirarikin autin te onnaroka. (Imwina riki ao Ieu e kakioa teuaei ao e taku: “Oreia naba!” Mangaia are a oreia i nanon ana kaa ni buaka i aoni kawaina nako Kura, are mena i rarikin Ibeream.+ Ma e reitaanako birinakona nako Mekito ao e a mate ikekei. 28 Ao a uotianako ana toro n te kaa ni buaka nako Ierutarem, ao a kaiia n ruanimatena i rarikia ana bakatibu n Ana Kaawa Tawita.+ 29 N ana ka-11 n ririki n tautaeka Ioram are natin Aaba ao e a riki Aatia+ bwa uean Iuta.)

30 Ngke e a roko Ieu i Ietireera,+ ao e a ongo taekan anne Ietebera.+ Mangaia are e karani matana n te been* ae roroo ao e katamaroaa atuna, ao e baraaki n taraa naano man te kamaama. 31 Ngke e a rin Ieu ni mataroan te oo ao e a taku neiei: “E nakoraoi aron Timri, are te tia tiringa ana toka?”+ 32 E tararake n taraa te kamaama teuaei ao e taku: “Antai ae mena n au itera? Antai?”+ A aki tabwara mataniwi aika uoman ke teniman ma a a baraaki naba n taraa teuaei. 33 E taku: “Karenakoa neienne nako naano!” Ngaia are a karenakoa nako naano, ao e teberaki aon te oo ma taian aoti n raraan neiei, ao e toutoua neiei n ana aoti. 34 Imwin anne ao e nako n rin ao e amwarake ao e moi. E a taku ngkanne: “Taiaoka ma tabeakina te aine ae maraia aei ao kaiia. Bwa bon natin te uea neiei.”+ 35 Ma ngke a a nako bwa a na kaiia, ao akea te bwai ae a kunea ma ai tii tabwanouna n tiku ma waena ao nanoni baina.+ 36 Ngke a a oki ao a tuanga teuaei ao e taku: “E kakororaoaki n aei ana taeka Iehova+ are e taekinna rinanon ana toro are Eria are te I-Titibe ngke e kangai, ‘A na kana irikon Ietebera kamea n te mwakoro n aba are i Ietireera.+ 37 Ao e na riki rabwatan Ietebera bwa kaanga nakotaarin te man n te tawaana n te mwakoro n aba are i Ietireera, bwa a aonga n aki kangai: “Ao aei Ietebera.”’”

10 Ao iai natin Aaba+ mwaane aika 70 i Tamaria. Mangaia are e kororeta Ieu ao e kanakoi nako Tamaria nakoia tooka ake i Ietireera, unimwaane,+ ao taani kawakinia natin Aaba, ao e kangai: 2 “N rokon te reta aei iroumi ngkai, ao a na bae ni mena i buakomi natin ami toka, n ikotaki ma kaa ni buaka, aoti, te kaawa ae nonoaki, ao bwaai ni buaka. 3 Rinea ae te kabanea n raoiroi ao ae te kabanea n tau* i buakoia natin ami toka, ao katokaa i aon ana kaintokanuea tamana. Ao kam na buaka ibukia ana utu ami toka.”

4 Ma a taonakinako n te maaku ao a taku: “Noria! Ngkana a aki kona n tei ueea aika uoman imwaina,+ ao ti na kangaa ngaira n tei?” 5 Mangaia are e a kanakoa te rongorongo te mataniwi n te baareti,* te kowana n te kaawa, unimwaane, ao taani kawakinia naati akekei, nakon Ieu ae kangai: “Bon am toro ngaira, ao ti na karaoi bwaai ni kabane akana ko tuangira. Ti na aki kaueaa temanna. Karaoa ane ko taku bwa e raoiroi i matam.”

6 E a korea ngkanne te kauoua n reta nakoia ae kangai: “Ngkana au aomata ngkami ao kam kan ongo irou, ao kam na uotii atuia natin nako ami toka ao kawarai ningabong n taina naba aei i Ietireera.”

A mena ngkai natin te uea ake 70 i rarikia mwaanen te kaawa aika kakannato, ake a kaikawaiia. 7 Ngke e roko naba ngkekei irouia te reta, ao a a anaiia naba natin te uea ao a kamateia, ake mwaane+ ake 70, ao a nnei atuia i nanoni bwaene ao a kanakoi nakon teuarei i Ietireera. 8 E rin te tia uataeka ao e tuanga teuarei ni kangai: “A a tia n uotii atuia natin te uea.” Mangaia are e taku: “Karaoi bwa uabwariko i rarikini mataroan oon te kaawa ni karokoa ae ingabong.” 9 Ngke e otinako n te ingabong ao e tei i mataia aomata ni kabane, ao e taku: “Akea ami bure.* Eng, boni ngai ae I bairea te karitei nakon au toka, ao I kamatea,+ ma antai ae kamateia naakai ni kabane? 10 Kam na ataia ngkanne, bwa akea teuana mai buakon ana taeka Iehova, ake e taekin Iehova n ekaanako ana utu Aaba ae e na aki kakoroaki bukina,*+ ao Iehova e karaoa te baere e taekinna rinanon ana toro are Eria.”+ 11 Ao Ieu e kamateia ni kabane nikiran ana utu Aaba ake i Ietireera, n ikotaki ma ana rorobuaka ni kabane aika kakannato, raona nako, ao ana ibonga nako,+ ni karokoa ae ai akea nikiraia ana koraki ni maiu.+

12 Ao e teirake ao e reitaanako kawaina nako Tamaria. Ao e mena imwaina aia auti taani kawakintiibu ni korei buraeia tiibu.* 13 E kaitiboo ikanne Ieu ma tarin nako Aatia+ are Uean Iuta, ao e taku nakoia, “Antai ngkami?” A taku nakekei: “Bon tarini ngaira Aatia, ao i aoni kawaira ngkai n ruo rikaaki bwa ti na titiraki bwa a nakoraoi bwaai ni kabane ibukia natin te uea aika mwaane ma natin te ueannaine aika mwaane ke a aki.” 14 E aki tabwara ma e a taku naba: “Tauia nakanne ngkai a maiu!” Mangaia are a tauia ngke a maiu ao a kamateia i rarikini mwanibwan aia auti taani kawakintiibu ni korei buraeia tiibu, bon rorobuaka aika 42. Akea temanna i buakoia ae e kamaiua.+

15 Ngke e nako mai ikekei ao e a kaitiboo ma Ieonataba+ are natin Rekaba,+ are e roko bwa e na kawaria. Ngke e kamauria* ao e taku nakoina: “E bane* raoi nanom nakoiu, n ai aron nanou ae bane nakoim?”

E kaeka ni kangai Ieonataba: “E bane.”

“Ngkana ngaia anne ao anganai baim.”

Mangaia are e anganna baina, ao e katikia Ieu ni katokaa i rarikina n te kaa ni buaka. 16 Ao e taku: “Ko na irai ao ko na nora au aki taotaonakinnano nakoia te koraki ake a kaitaraa* Iehova.”+ Mangaia are a kaira Ieonataba i rarikin Ieu n ana kaa ni buaka. 17 Ao e a roko i Tamaria, ao e a kamateia ni kabane nikiraia ana utu Aaba ake i Tamaria ni karokoa ae e boni kamaunaia,+ ni kaineti ma ana taeka Iehova are taekinna nakon Eria.+

18 Irarikin anne e ikotiia aomata ni kabane Ieu ao e taku nakoia: “E taromauria Baara teutana Aaba,+ ma e na korakora riki taromauriana iroun Ieu. 19 Mangaia ae weteiia nakoiu ana burabeti ni kabane Baara,+ taan taromauria ni kabane, ao ana ibonga ni kabane.+ Tai kariaia bwa e na aki kaoti temanna i buakoia, bwa iai au angakarea ae abwabwaki nakoni Baara. E na boni mate ane e aki kaoti.” Ma e karaoa te aro n nanowanawana Ieu bwa e na kamaunaia taan taromauria Baara.

20 E reitia ni kangai Ieu: “Katanoataa* te botaki ae okoro ibukini Baara.” Mangaia are a katanoataa. 21 Imwin anne ao e a kanakotaeka Ieu nako Iteraera ni kabutaa, ao a a roko taan taromauria Baara ni kabane. Akea temanna i buakoia ae e aki roko. A rin i nanon ana auti* Baara,+ ao e on ana auti Baara mai tabona nako tabona. 22 E taku nakon te tia tararuaa te ruu ni kunnikai: “Kaotinakoi kunnikai ibukia taan taromauria Baara ni kabane.” Mangaia are e kaotinakoi kunnikai ibukia. 23 Ao a rin Ieu ma Ieonataba+ are natin Rekaba i nanon ana auti Baara. E a taku ngkai nakoia taan taromauria Baara: “Tuoa raoi ao taraia bwa e na akea taan taromauria Iehova ikai, tii taan taromauria Baara.” 24 N tokina ao a a rinnako bwa a nang anga taiani karea ma karea ni kabuekaki. E a tia Ieu ni kateiia i tinaniku ana rorobuaka aika 80 ao e taku: “Ngkana e reke birinakon temanna i buakoia aomata aika I katikuia i nanoni baimi aikai, ao e na anaaki maiumi bwa oneani mwini maiuna.”*

25 Ngke e tia naba ngkekei n anga te karea ni kabuekaki, ao e a taku naba Ieu nakoia tautia* ma mataniwi: “Rinnako ao kamateia! Tai kariaia bwa e na birinako temanna!”+ Ao tautia ma mataniwi a kamateia te koraki akekei n te kabaang ao a tewenakoia ni kaotinakoia, ao a reitinako ni karokoa te ruu* ae tabu are mai nanon riki ana auti Baara. 26 A kaotinakoi ngkanne boua aika tabu+ ake n ana auti Baara ao a kabueka teaina ma teaina.+ 27 A kabwakaa naba bouani Baara ae tabu,+ ao a kabwakaa ana auti Baara,+ ao a karikia bwa taian tabo n nakotaari, ao e tiku ni karokoa te bong aei.

28 Ao Ieu e kamauna Baara mai Iteraera. 29 Ma e bon aki rairakinako Ieu man ana bure nako Ieroboam are natin Nebata are e karekeia iai tibun Iteraera n te bure, ni kaineti ma kaao ataei aika koora ake i Betaera ao i Tan.+ 30 Mangaia are e taku Iehova nakon Ieu: “Ibukina bwa ko karaoa ae raoiroi ao ko karaoa ae eti i matau, n arom ni kakororaoi bwaai ni kabane aika i nanou aika irekereke ma ana utu Aaba,+ ao ane a na tekateka natim mwaane ni kaintokanuean Iteraera ni karokoa te kaaroro.”+ 31 Ma e aki tabe Ieu ma te kakairi n ana Tua Iehova ae Atuan Iteraera ma nanona ni kabane.+ E aki rairakinako man ana bure nako Ieroboam are karekeia iai tibun Iteraera n te bure.+

32 Ni boong akekei ao e a kariaia Iehova tauan aia aono tibun Iteraera teutana imwin teutana. E teimatoa Atiaera ni buakania n aonon nako abaia tibun Iteraera,+ 33 man te Ioretan nako mainiku, ae te aba ae Kireata ni kabutaa, are abaia tibuni Kata, tibun Reuben, ao tibuni Manate,+ mai Aroera are i rarikin te Mwarua ae Arenon nako Kireata ao Batian.+

34 Ao nikiran rongorongon Ieu ao bwaai ni kabane ake e karaoi ao ana mwakuri aika korakora ni kabane, tiaki a koreaki n te boki are rongorongon aia tai uean Iteraera? 35 Ao e a wene ni motirawa Ieu i rarikia ana bakatibu, ao a kaiia i Tamaria. E a riki natina are Ieoaatia+ bwa te uea n onea mwina. 36 Abwakin ana tai* n tautaeka Ieu i aoia tibun Iteraera i Tamaria bon 28 te ririki.

11 Ao ngke e noria Atariia+ are tinan Aatia bwa e a mate natina,+ ao e a teirake naba ni kamaunaia ni kabane taiani kanoa ake bwaanuea.*+ 2 Ma Nei Ioetieba are natin te Uea are Ioram, are mwaanen Aatia, e anaa Ioati+ are natin Aatia ao e iraea mai buakoia natin te uea aika mwaane ake a nang kamateaki, ao e katikua ma ana tia tobwa i nanon te ruu ni matu teuana. E reke angaia ni karabaa mairoun Atariia, ngaia are e a aki kamateaki. 3 E teimatoa ni karabaaki ma neierei n ana auti Iehova i nanon onoua te ririki, ngke e tautaeka n te aba Atariia.

4 N te kaitiua n ririki ao e kanaanako Ieoiata nakoia mataniwi i aoia kaka tebubua, ake taani kamanoa te uea* ma tautian* te baareti,+ bwa a na kawaria n ana auti Iehova. E karaoa te boraraoi* ma ngaiia ao e kairoroiia bwa a na taetae n tuea n ana auti Iehova, ao imwina e a kaota natin te uea nakoia.+ 5 E tua nakoia ni kangai: “Aio te bwai ae kam na karaoia: A na tei n te bongi n Taabati katenimwakoromi ao a na tantania raoi ana auti* te uea,+ 6 ake te katenimwakoro are te korakina a na mena ni Mataroan Aana, ao te katenimwakoro ake te korakina riki a na mena ni mataroan te oo are i akuia tautian te baareti. Kam na uateina tantanian te auti. 7 Ao ake uakoraki ake a bon riai n aki tei n te bongi n Taabati, a riai n tantania raoi ana auti Iehova bwa a na kamanoa te uea. 8 Kam riai n otabwaninia te uea n itera nako, temanna ma temanna ma ana bwai ni buaka i baina. E na kamateaki ane e rin i buakoia tautia. Kam na raona te uea n taabo ake e nako iai.”*

9 Ao mataniwi i aoia kaka tebubua+ aikai a karaoa raoi te bwai are e tua Ieoiata are te ibonga.* Ao ngaiia n tatabemania nako a kairiia aia rorobuaka ake a tei n te bongi n Taabati, n ikotaki ma ake a aki tei n te bongi n Taabati, ao a rinnako nakon Ieoiata are te ibonga.+ 10 Ao te ibonga e a angania mataniwi i aoia kaka tebubua taiani kainiwai ma otanga aika mronron ake ana bwai te Uea are Tawita, ake a mena n ana auti Iehova. 11 Ao a a tei tautian te baareti+ n aia tabo, temanna ma temanna ma ana bwai ni buaka i baina, ni moa man iteran te auti are te angaatai nakon iteran te auti are te angamaing, i rarikin te baonikarea+ ao i rarikin te auti, n otabwaninia te uea. 12 Imwina ao Ieoiata e a kaira natin te uea+ ni kaotinakoa, ao e katokaa i aona te baunuea ao te Bwai ni Kakoaua,*+ ao a kaueaa ao ni kabiria. Ao a ubouboi baia ao a taku: “E na abwabwaki maiun te uea!”+

13 Ngke e ongo karongoaaia aomata ni biri Atariia, ao e a nako naba nakoia aomata ake n ana auti Iehova.+ 14 Ao e a nora te uea n tei ikekei i rarikin te boua ni kaineti ma te katei.+ A mena i rarikin te uea mataniwi ma taani katangitang n te buu,+ ao a bane kaain te aba ni kimwareirei ao ni katang taiani buu. Ngaia are e a raeuai kunnikaina Atariia ao e takarua ni kangai neiei: “Kam karitei! Kam karitei!” 15 Ma e tua Ieoiata are te ibonga nakoia mataniwi i aoia kaka tebubua,+ ake a rineaki bwa mataniwi n te taanga ni buaka, ao e taku nakoia: “Kaotinakoa neienne mai buakoia tautia, ao ngkana iai ane e rimwina ao kamatea n te kabaang!” Bwa e kangai te ibonga: “Tai kamatea neienne n ana auti Iehova.” 16 Mangaia are a taua neierei ao ngke e a roko n te tabo are a riirin iai aoti n ana auti* te uea,+ ao e a tiringaki naba iai.

17 Ao e karaoa te berita Ieoiata i marenan Iehova ao te uea ao aomata,+ bwa a na teimatoa n riki bwa ana aomata Iehova, ao e karaoa naba te berita i marenan te uea ma aomata.+ 18 Imwin anne ao a bane kaain te aba n roko n ana auti* Baara ao n urui ana baonikarea,+ a kamaeinikuni raoi bouannantina,+ ao a tiringa Maatan are ana ibonga Baara+ i matan taiani baonikarea.

Ao te ibonga e a rineiia mataniwin ana auti Iehova.+ 19 Irarikin anne ao e kairiia mataniwi i aoia kaka tebubua,+ ake taani kamanoa te uea,* tautian te baareti,+ ao kaain te aba ni kabane bwa a na kaira te uea man ana auti Iehova, ao a roko n ana auti* te uea ni kawaini mataroan aia oo tautian te baareti. Ao e a tekateka i aon aia kaintokanuea ueea.+ 20 Mangaia are a bane ni kimwareirei kaain te aba ao e a rau te kaawa, bwa a a tia ni kamatea Atariia n te kabaang n ana auti te uea.

21 Bon itiua ana ririki Ioati+ ngke e riki bwa te uea.+

12 N ana kaitiua n ririki n tautaeka Ieu,+ ao e a riki Ioati+ bwa te uea, ao e tautaeka i Ierutarem i nanon 40 te ririki. Aran tinana Tibiaa are mai Beerateba.+ 2 E teimatoa ni karaoa ae eti Ioati i matan Iehova ni kabane boong ake e reireinna iai Ieoiata are te ibonga.* 3 Ma a aki kanakoaki taabo aika rietata,+ ao a bon teimatoa naba aomata n angakarea ao ni kabueki karea ni kabubui n taabo aika rietata.

4 Ao e taku Ioati nakoia ibonga: “Anai taiani mwane ni kabane aika uotaki nakon ana auti Iehova ibukin taiani karea aika tabu,+ ae te mwane ae a riai n anga aomata n tatabemania nako,+ te mwane are e anga te aba bwa te boo ae katautauaki ibukin te aomata,* ao taiani mwane ni kabane ake a uotii aomata n tatabemania nako nakon ana auti Iehova ibukin nanoia.+ 5 A na anaia ibonga mairouia aia tia angamwane* ao ni kamanena ibukin onobwaian te auti, ngkana iai te uruaki.”*+

6 N ana ka-23 n ririki n tautaeka te Uea ae Ioati, ao a tuai ni karaoa te onobwai ibonga nakon uruakin te auti.+ 7 Ao te Uea ae Ioati e wetea Ieoiata+ are te ibonga ao ibonga ake tabeman riki ao e taku nakoia: “E aera ngkai kam a aki karaoa te onobwai nakon uruakin te auti? Mangaia ae tai manga anaa riki te mwane mairouia ami tia angamwane ma tii ngkana e kabonganaaki te mwane anne ibukin onobwaian te auti.”+ 8 Ai ngaia are a a kariaia ibonga bwa a na aki manga anaa te mwane mairouia aomata ao n aki tabe ma onobwaian te auti.

9 E anaa ngkanne te kaibwaoki+ Ieoiata are te ibonga ao e kabwangabwangaa matana, ao e kaaki i rarikin te baonikarea man te angaatai ngkana e rin te aomata i nanon ana auti Iehova. Anne te tabo are ibonga ake a teiakina te mataroa, a kakabwakai iai taiani mwane ni kabane ake a uouotaki nako nanon ana auti Iehova.+ 10 Ngkana a noria bwa e a rangi ni bati te mwane i nanon te kaibwaoki, ao e na bae n roko ana tia koroboki te uea ma te ibonga ae rietata* n anaa* te mwane are uouotaki nakon ana auti Iehova ao ni warekia.+ 11 Ao a na anga te mwane are e a tia ni warekaki arei nakoia te koraki ake a mwiokoaki bwa mataniwi n te mwakuri are karaoaki ibukin ana auti Iehova. Ao a kabooia iai taani mwakuria te kai ao taani kateitei ake a mwakuri n ana auti Iehova,+ 12 n ikotaki naba ma taani mwakuria te atibu ao taani koro atibu. A kabooi naba kaai ao atibu aika ekeaki ibukin onobwaian uruakin ana auti Iehova, ao ni kabongana te mwane ibukini kabanemwane ni kabane ake a reke ni kaineti ma onobwaian te auti arei.

13 Ma akea te mwane ae uouotaki nakon ana auti Iehova ae kabonganaaki ibukini karaoani beetin aika tirewa, taati ibukini kamatean taura, boora, taiani buu,+ ke bwaai n aekaia nako aika karaoaki man te koora ke bwaai aika karaoaki man te tirewa ibukin ana auti Iehova.+ 14 A tii anga nakoia te koraki ake a karaoa te mwakuri, ao a onobwaia iai ana auti Iehova. 15 Ao a aki karaoa aia kakaae i aoia mwaane ake a bubutimwaea te mwane bwa a na angania taani mwakuri, bwa a kona n onimakinaki naakai.+ 16 Ma e aki uouotaki nakon ana auti Iehova te mwane ibukin te karea ni kabooa mwin te bure+ ao te mwane ibukin te karea ni kabwarabure, bwa bon aia bwai ibonga.+

17 N te tai anne ao e nako Atiaera+ are uean Turia ni buakana Kate+ ao e taua, ao imwina e a baireia bwa e na buakana* Ierutarem.+ 18 Mangaia are e anai karea aika tabu ni kabane Ioati are Uean Iuta ake a a tia ni katabui ana bakatibu teuaei ake Ieotiabata, Ioram, ao Aatia, ake uean Iuta, n ikotaki ma bon ana karea aika tabu teuaei ao koora ni kabane ake a kona n reke ni nneni baika kakawaki ake n ana auti Iehova ao n ana auti* te uea, ao e kanakoi nakon Atiaera are uean Turia.+ Mangaia are e a nako teuaei mai Ierutarem.

19 Ni kaineti ngkanne ma nikiran rongorongon Ioati ao bwaai ni kabane ake e karaoi, tiaki a koreaki n te boki are rongorongon aia tai uean Iuta? 20 Ma a ikotaki ana toro Ioati n ekianako+ ao a kamatea n te auti are te Miro,*+ n te kawai are ruo rikaaki nako Tiiraa. 21 Bon ana toro ae Iotaka are natin Timeata ao Ieotabata are natin Tiomera ake a oreia ao a kamatea.+ A kaiia i rarikia ana bakatibu n Ana Kaawa Tawita, ao e a riki natina are Amatia bwa te uea n onea mwina.+

13 N ana ka-23 n ririki n tautaeka Ioati+ are natin Aatia+ are uean Iuta, ao e a riki Ieoaatia are natin Ieu+ bwa uean Iteraera i Tamaria, ao e tautaeka i nanon 17 te ririki. 2 E teimatoa ni karaoa ae buakaka i matan Iehova, ao e teimatoa n ana bure Ieroboam are natin Nebata, are e karekeia iai tibun Iteraera n te bure.+ E aki rairakinako mai iai. 3 Mangaia are e urarake unin Iehova+ irouia tibun Iteraera+ ao e a anga ngaiia nako nanoni bain te Uea ae Atiaera+ are uean Turia, ao nako nanoni baini Benataata+ are natin Atiaera, ni boong akanne ni kabane.

4 Imwina riki ao e a onnon Ieoaatia ibukin ana akoi* Iehova ao e ongo Iehova irouna, bwa e a tia n nora karawawataaia tibun Iteraera iroun uean Turia.+ 5 Mangaia are e a karekea Iehova te tia kamaiuia+ ae e na kainaomataia mai aani bain Turia, ao a a kona tibun Iteraera ni maeka ni mwengaia n aron are mai mwaina.* 6 (Ma a aki kitana aia bure kaain ana utu Ieroboam are e karekeia iai tibun Iteraera n te bure.+ A teimatoa n te bure aei,* ao e teimatoa n tei te kai ae tabu*+ i Tamaria.) 7 Ai tii 50 nikiraia ana tia toka i aoia aoti Ieoaatia ake kaain ana taanga ni buaka, 10 ana kaa ni buaka, ao 10,000 ana tautia aika taan rianna, ibukina bwa e a tia uean Turia ni kamaunaia,+ n toutouia kaanga ai aroni bubun te tano n te tai ni kaaki kun ni uita.+

8 Ni kaineti ngkanne ma nikiran rongorongon Ieoaatia, ma bwaai ni kabane ake e karaoi ma ana mwakuri aika korakora, tiaki a koreaki n te boki are rongorongon aia tai uean Iteraera? 9 Ao e a wene ni motirawa Ieoaatia i rarikia ana bakatibu ao a kaiia i Tamaria,+ ao e a riki natina are Ioati bwa te uea n onea mwina.

10 N ana ka-37 n ririki n tautaeka Ioati+ are Uean Iuta, ao e a riki Ioati are natin Ieoaatia bwa uean Iteraera i Tamaria, ao e tautaeka i nanon 16 te ririki. 11 E teimatoa ni karaoa ae buakaka i matan Iehova, ao e aki kitan ana bure ni kabane Ieroboam are natin Nebata, are e karekeia iai tibun Iteraera n te bure.+ E teimatoa* i nanoni buure aikai.

12 Ni kaineti ngkanne ma nikiran rongorongon Ioati, ma bwaai ni kabane ake e karaoi ma ana mwakuri aika korakora, ao arona ni buakana Amatia are Uean Iuta,+ tiaki a koreaki n te boki are rongorongon aia tai uean Iteraera? 13 Ao e a wene ni motirawa Ioati i rarikia ana bakatibu, ao e a tekateka Ieroboam*+ i aon ana kaintokanuea teuaei. Ao e kaiiaki Ioati i Tamaria i rarikia uean Iteraera.+

14 Ngke e a mamaara Eritai+ n te aoraki are e a boni mate iai, ao e a ruo Ioati are uean Iteraera ni kawara teuaei, ao e tang i aona ao e taku: “Tamau, tamau! Ana kaa ni buaka Iteraera ma ana taan toka i aoia aoti!”+ 15 Ao e taku Eritai nakoina: “Anaa te kainikatebe ao kanoan nako te kainikatebe.” Mangaia are e anaa te kainikatebe ma kanoan nako te kainikatebe. 16 Ao e taku nakon uean Iteraera: “Taua te kainikatebe ni baim.” Mangaia are e taua ni baina, ao imwin anne e kaaki baina Eritai i aoni bain te uea. 17 Ao e taku: “Kauka te kamaama are kaitaraa mainiku.” Mangaia are e kaukia teuarei. E a taku Eritai: “Katebe!” Ngaia are e a katebe teuarei. E a taku ngkanne: “Kanoan ana kainikatebe Iehova n tokanikai,* ae kanoan te kainikatebe n tokanikai i aon* Turia! Ane ko na orea* Turia i Abeki+ ni karokoa ae ko karokoa n tokina.”

18 E reitia ni kangai: “Anai kanoan te kainikatebe,” ngaia are e anai. Imwina ao e taku nakon uean Iteraera: “Orea aontano.” Ngaia are e orea aontano teuarei tenua te tai ao e a toki naba. 19 Ao e un ana aomata te Atua ae koaua iroun teuarei ao e taku: “Ko bon riai n orea aontano nimaua ke onoua te tai! Ao ane ko na orea iai Turia ni karokoa ae ko karokoa n tokina, ma ngkai, ane ko na orea Turia tii tenua te tai.”+

20 Imwin anne ao e a mate Eritai ao e kaiiaki. Ao iai taani kuribwai aika I-Moaba+ aika roroko n rin n te aba ni moan te ririki.* 21 Ngke a tabe mwaane tabeman ni kaiia te mwaane temanna ao a a noriia naba taani kuribwai akekei, mangaia are a waekoa ni karenakoa teuarei ni nnen Eritai ni kaweneaki ao a birinako. Ngke e boo rabwatan teuarei ma riin Eritai, ao e a maiu naba teuarei+ ao e a teirake.

22 Ao e karawawataia tibun Iteraera+ te Uea are Atiaera+ are uean Turia, ni kabane ana bong Ieoaatia. 23 Ma e karababaa Iehova ana akoi ao ana nanoanga nakoia,+ ao e kaota tabeakinaia ibukin ana berita ma Aberaam,+ Itaaka,+ ao Iakoba.+ E aki kani kamaunaia, ao e aki tewenakoia mai matana ni karokoa te bong aei. 24 Ngke e a mate te Uea are Atiaera are uean Turia, ao e a riki natina are Benataata bwa te uea n onea mwina. 25 Ao Ioati are natin Ieoaatia e anai ni kaoki mairouni Benataata are natin Atiaera kaawa ake e anai n te buaka teuaei mairoun Ieoaatia are tamana. E orea* teuaei tenua te tai Ioati,+ ao e a manga kaoki aia kaawa tibun Iteraera.

14 N ana kauoua n ririki n tautaeka Ioati+ are natin Ieoaatia are uean Iteraera, ao e a riki bwa te uea Amatia are natin Ioati are Uean Iuta. 2 Bon 25 ana ririki ngke e riki bwa te uea, ao e tautaeka i Ierutarem i nanon 29 te ririki. Aran tinana Ioaatin are kaain Ierutarem.+ 3 E teimatoa ni karaoa ae eti i matan Iehova, ma tiaki n aron Tawita+ are ana bakatibu. E karaoi bwaai nako ake e karaoi Ioati are tamana.+ 4 Ma a aki kanakoaki taabo aika rietata,+ ao a bon teimatoa naba aomata n angakarea ao ni kabueki karea ni kabubui n taabo aika rietata.+ 5 N te tai are e a boni matoa raoi iai te tautaeka n uea i aana, ao e a kamateia naba ana toro ake a kamatea tamana are te uea.+ 6 Ma e aki kamateia natiia taan tiritiri akekei ni kaineti ma ana tua Iehova are e koreaki ni bokin te Tua Rinanoni Mote, are kangai: “A aki riai ni kamateaki taama ibukia natiia, ao a aki riai ni kamateaki naati ibukia tamaia, ma e riai ni kamateaki temanna ma temanna ibukin oin ana bure.”+ 7 Ao e kamateia I-Etom+ n te Mwarua ae Taari,+ aika mwaane aika 10,000, ao e taua Teeira n te buaka,+ ao e a aranaki te kaawa anne bwa Ioketeera ni karokoa te bong aei.

8 Imwin anne ao e kanakoia taan uataeka Amatia nakon Ioati are natin Ieoaatia are natin Ieu are uean Iteraera, ao e kangai: “Nakomai bwa ti na aitara ni boo ni buaka.”*+ 9 E kanakoa te rongorongo Ioati are Uean Iteraera nakon Amatia are Uean Iuta, ae kangai: “E kanakotaeka te uteute ae kateketeke i Rebanon nakon te kai ae te tiira i Rebanon, ni kangai, ‘Aanga natim te aine nakon natiu te mwaane bwa buuna.’ Ma e rikekei te man ae tiritiri temanna mai Rebanon ao e toutoua te uteute are kateketeke. 10 E koaua ae ko orea Etom ni kabwakaa,+ ai ngaia ae e a kainikatonga iai nanom. Kimwareirei ni kamoamoaam ma ko na tiku n oin am auti.* E aera ngkai ko na kauekea te kabuanibwai ao ni bwaka, ni kabwakaa Iuta ma ngkoe?” 11 Ma e aki kan ongo Amatia.+

Mangaia are e a waerake Ioati are Uean Iteraera, ao e aitara ni boo ni buaka ma Amatia are Uean Iuta i Betatemeti,+ are kaawan Iuta.+ 12 A konaaki kaain Iuta irouia kaain Iteraera, ngaia are e a birinako temanna ma temanna nakoni mwengana.* 13 Ao Ioati are Uean Iteraera e taua Amatia are Uean Iuta, are natin Ioati are natin Aatia, i Betatemeti. Imwina ao a nako Ierutarem, ao e kabwangabwangaa oon Ierutarem man te Mataroa ae Eberaim+ nakon te Mataroa ae te Maninganinga,+ 400 te mwanokunibai.* 14 Ao e anai koora ni kabane ma tirewa ao bwaai ni kabane ake a reke n ana auti Iehova, ao ni nneni baika kakawaki ake n ana auti* te uea, n ikotaki ma taenikai. Imwina ao e a okira Tamaria.

15 Ni kaineti ngkanne ma nikiran rongorongon Ioati ma te bwai are e karaoia ma ana mwakuri aika korakora, ao arona ni buakana Amatia are Uean Iuta, tiaki a koreaki n te boki are rongorongon aia tai uean Iteraera? 16 Ao e a wene ni motirawa Ioati i rarikia ana bakatibu, ao e kaiiaki i Tamaria+ i rarikia uean Iteraera, ao e a riki natina are Ieroboam*+ bwa te uea n onea mwina.

17 Ao Amatia+ are natin Ioati are uean Iuta, e maiu i nanon 15 riki te ririki imwini maten Ioati+ are natin Ieoaatia are uean Iteraera.+ 18 Ni kaineti ngkanne ma nikiran rongorongon Amatia, tiaki a koreaki n te boki are rongorongon aia tai uean Iuta? 19 Imwina riki ao e a baireaki te karitei n ekaanako+ teuaei i Ierutarem, ao e birinako teuaei nako Rakiti, ma a kanakoia mwaane n rimwina nako Rakiti ao a kamatea ikekei. 20 Mangaia are a uotia rikaaki i aoia aoti ao e kaiiaki i Ierutarem i rarikia ana bakatibu n Ana Kaawa Tawita.+ 21 Ao a bane kaain Iuta n anaa Ataria*+ are ai 16 ana ririki,+ ao a kaueaa n onea mwin tamana are Amatia.+ 22 E a manga katea Erati+ ao e kaokia nako Iuta imwini kaiiakin te uea* i rarikia ana bakatibu.+

23 N ana ka-15 n ririki n tautaeka Amatia are natin Ioati are uean Iuta, ao e a riki bwa te uea i Tamaria Ieroboam+ are natin Ioati are Uean Iteraera, ao e tautaeka i nanon 41 te ririki. 24 E teimatoa ni karaoa ae buakaka i matan Iehova. E aki kitan ana bure ni kabane Ieroboam are natin Nebata, are e karekeia iai tibun Iteraera n te bure.+ 25 E a manga kaoka tian abaia tibun Iteraera mai Reboamata*+ ni karokoa Naman te Arabaa,*+ ni kaineti ma te taeka are e taekinna Iehova ae Atuan Iteraera rinanon ana toro are Iona,+ are natin Amitai, are te burabeti mai Kataebere.+ 26 Bwa e nora karawawataaia tibun Iteraera ae rangi ni korakora Iehova.+ Bon akea temanna ae tiku ni buokiia tibun Iteraera, ai akea naba aomata aika akea korakoraia ke aika mamaara. 27 Ma e a tia ni berita Iehova bwa e na aki kamaunai araia tibun Iteraera mai aani karawa.+ Mangaia are e kamaiuia ni bain Ieroboam are natin Ioati.+

28 Ni kaineti ngkanne ma nikiran rongorongon Ieroboam ma bwaai ni kabane ake e karaoi ma ana mwakuri aika korakora, ao arona ni buaka ma arona ni manga kaoka Tamateko+ ao Amata+ nakoia tibun Iuta i Iteraera, tiaki a koreaki n te boki are rongorongon aia tai uean Iteraera? 29 Ao e a kaiiaki Ieroboam i rarikia ana bakatibu, i rarikia uean Iteraera, ao e a riki natina are Tekaria+ bwa te uea n onea mwina.

15 N ana ka-27 n ririki n tautaeka Ieroboam* are Uean Iteraera, ao e a riki bwa te uea Ataria*+ are natin Amatia+ are Uean Iuta.+ 2 Bon 16 ana ririki ngke e riki bwa te uea, ao e tautaeka i Ierutarem i nanon 52 te ririki. Aran tinana Iekoria ae kaain Ierutarem. 3 E teimatoa ni karaoa ae eti i matan Iehova, n aron are e karaoia tamana are Amatia.+ 4 Ma a aki kanakoaki taabo aika rietata,+ ao a bon teimatoa naba aomata n angakarea ao ni kabueki karea ni kabubui n taabo aika rietata.+ 5 Ao Iehova e karawawataa te uea ao e teimatoa n riki teuaei bwa te rebera+ ni karokoa te bong are e mate iai, ao e tiku n te auti ae kaokoro,+ ao e mataniwi i aon te auti* Iotam+ are natin te uea, ni momotiki taekaia kaain te aba.+ 6 Ni kaineti ngkanne ma nikiran rongorongon Ataria+ ma bwaai ni kabane ake e karaoi, tiaki a koreaki n te boki are rongorongon aia tai uean Iuta? 7 Ao e a wene ni motirawa Ataria i rarikia ana bakatibu,+ ao a kaiia i rarikia ana bakatibu n Ana Kaawa Tawita, ao e a riki natina are Iotam bwa te uea n onea mwina.

8 N ana ka-38 n ririki n tautaeka Ataria+ are Uean Iuta, ao e a riki Tekaria+ are natin Ieroboam bwa uean Iteraera i Tamaria, ao e tautaeka i nanon onoua namwakaina. 9 E karaoa ae buakaka i matan Iehova n aron are a karaoia ana bakatibu. E aki kitan ana bure Ieroboam are natin Nebata are e karekeia iai tibun Iteraera n te bure.+ 10 Ao e a bairea te karitei Tiarum are natin Iabeti n ekaanako teuaei ao e kamatea+ i Ibeream.+ Imwini kamatean teuaei ao e a riki bwa te uea n onea mwina. 11 Ni kaineti ngkanne ma nikiran rongorongon Tekaria, a koreaki n te boki are rongorongon aia tai uean Iteraera. 12 E kakororaoaki iai ana taeka Iehova are taekinaki nakon Ieu are kangai: “Ane a na tekateka natim mwaane ni kaintokanuean Iteraera+ ni karokoa te kaaroro.”+ Ao e bon riki te aro anne.

13 E riki Tiarum are natin Iabeti bwa te uea n ana ka-39 n ririki n tautaeka Utia+ are Uean Iuta, ao e tautaeka i Tamaria i nanon teuana raoi namwakaina. 14 Ao Menaem are natini Kaari e waerake mai Tireta+ nako Tamaria ao e kamatea Tiarum+ are natin Iabeti i Tamaria. Imwini kamatean teuaei ao e a riki bwa te uea n onea mwina. 15 Ni kaineti ngkanne ma nikiran rongorongon Tiarum ma te karitei are e kauekea, a koreaki n te boki are rongorongon aia tai uean Iteraera. 16 N te tai anne ao e roko Menaem mai Tireta ao e orea Tibitiaa ma aomata ni kabane ake iai ao aonona, ibukina bwa a aki uki nakoina mataroan oona. E oreia ni kabwakaa ao e bwenai birotoia aine aika bikoukou ake iai.

17 N ana ka-39 n ririki n tautaeka Ataria are Uean Iuta, ao e a riki Menaem are natini Kaari bwa uean Iteraera, ao e tautaeka i Tamaria i nanon tebwina te ririki. 18 E teimatoa ni karaoa ae buakaka i matan Iehova. E aki kitan ana bure ni kabane Ieroboam are natin Nebata are e karekeia iai tibun Iteraera n te bure,+ ni kabane ana bong. 19 Ao e roko n te aba Bura+ are Uean Aturia, ao Menaem e angani Bura 1,000 te tarena* n tirewa, bwa kabooani mwin ana boutoka teuaei ni kakorakoraa mwaakana n taua te tautaeka n uea.+ 20 Mangaia are e karekei tirewa Menaem mai Iteraera n arona n anai mairouia mwaane aika kakannato aika kaubwai.+ E angan uean Aturia kaka 50 te tiekera* n tirewa ibukin te mwaane temanna ma temanna. Ao e a rairakinako uean Aturia ao e a aki tiku n te aba. 21 Ni kaineti ngkanne ma nikiran rongorongoni Menaem+ ma bwaai ni kabane ake e karaoi, tiaki a koreaki n te boki are rongorongon aia tai uean Iteraera? 22 Ao e a kaiiaki Menaem i rarikia ana bakatibu, ao e a riki natina are Bikaia bwa te uea n onea mwina.

23 N ana ka-50 n ririki n tautaeka Ataria are Uean Iuta, ao e a riki Bikaia are natini Menaem bwa uean Iteraera i Tamaria, ao e tautaeka i nanon uoua te ririki. 24 E teimatoa ni karaoa ae buakaka i matan Iehova. E aki kitan ana bure Ieroboam are natin Nebata, are e karekeia iai tibun Iteraera n te bure.+ 25 Ao Bika+ are natin Remaria are ana mataniwi, e bairea te karitei nakon teuaei ao e kamatea i Tamaria n te taua ae nonoaki are n ana auti* te uea, ngaia ma Arekoba ao Arie. Iai raona mwaaneni Kireata aika 50, ao imwini kamatean teuaei ao e a riki bwa te uea n onea mwina. 26 Ni kaineti ngkanne ma nikiran rongorongoni Bikaia ma bwaai ni kabane ake e karaoi, a koreaki n te boki are rongorongon aia tai uean Iteraera.

27 N ana ka-52 n ririki n tautaeka Ataria are Uean Iuta, ao e a riki Bika+ are natin Remaria bwa uean Iteraera i Tamaria, ao e tautaeka i nanon 20 te ririki. 28 E teimatoa ni karaoa ae buakaka i matan Iehova, ao e aki kitan ana bure Ieroboam are natin Nebata, are e karekeia iai tibun Iteraera n te bure.+ 29 N ana bong Bika are Uean Iteraera, ao Tikaratabiretiera+ are Uean Aturia e a ninia ao n taua Ion, Aberabetamaaka,+ Ianoa, Keteti,+ Atiora, Kireata,+ ao Kariraia, ake abaia ni kabane tibun Nabetari,+ ao e kairiia kaaina bwa taenikai nako Aturia.+ 30 Ao e kauekea te karitei Ootea+ are natin Eera n ekaanako Bika are natin Remaria, ao e oreia ma ni kamatea ao e a riki bwa te uea n onea mwina n ana ka-20 n ririki n tautaeka Iotam+ are natin Utia. 31 Ni kaineti ngkanne ma nikiran rongorongoni Bika ma bwaai ni kabane ake e karaoi, a koreaki n te boki are rongorongon aia tai uean Iteraera.

32 N ana kauoua n ririki n tautaeka Bika are natin Remaria are uean Iteraera, ao e a riki bwa te uea Iotam+ are natin Utia+ are Uean Iuta. 33 Bon 25 ana ririki ngke e riki bwa te uea, ao e tautaeka i Ierutarem i nanon 16 te ririki. Aran tinana Ierutia are natin Tatoka.+ 34 E teimatoa ni karaoa ae eti i matan Iehova, n aron are e karaoia tamana are Utia.+ 35 Ma a aki kanakoaki taabo aika rietata, ao a bon teimatoa naba aomata n angakarea ao ni kabueki karea ni kabubui n taabo aika rietata.+ Bon teuaei are katea mataroan oon ana auti Iehova are mai eta.+ 36 Ni kaineti ngkanne ma nikiran rongorongon Iotam ma te bwai are e karaoia, tiaki a koreaki n te boki are rongorongon aia tai uean Iuta? 37 Ni boong akanne ao Iehova e a kanakoa Retin are uean Turia ma Bika+ are natin Remaria, bwa a na ekaanako Iuta.+ 38 Ao e a wene ni motirawa Iotam i rarikia ana bakatibu, ao e kaiiaki i rarikia ana bakatibu n Ana Kaawa Tawita are ana bakatibu. Ao e a riki natina are Aati bwa te uea n onea mwina.

16 N ana ka-17 n ririki n tautaeka Bika are natin Remaria, ao e a riki bwa te uea Aati+ are natin Iotam are Uean Iuta. 2 Bon 20 ana ririki Aati ngke e riki bwa te uea, ao e tautaeka i Ierutarem i nanon 16 te ririki. E aki karaoa ae eti i matan Iehova ae Atuana n aron are e karaoia Tawita are ana bakatibu.+ 3 Ma e nakonako ni kawaia uean Iteraera,+ ao e kabueka naba natina te mwaane n te ai,*+ ni kakairi n aia mwakuri aika riribaaki natannaomata+ ake e kakioianako Iehova mai mwaia tibun Iteraera. 4 E teimatoa naba n angakarea ao ni kabueki karea ni kabubui n taabo aika rietata,+ n taian tabuki, ao i aan nako kaai aika manguroro.+

5 N te tai anne ao a waerake bwa a na buakana Ierutarem,+ Retin are Uean Turia ao Bika are natin Remaria are uean Iteraera. A otabwaninia Aati n ekianako, ma a aki kona n taua te kaawa. 6 N te tai anne ao e a manga kaoka Erati+ nako Etom te Uea are Retin, ao imwina e kakioianako I-Iutaia* ni kaotinakoia mai Erati. Ao a rin I-Etom i Erati ao a maeka iai ni karokoa te bong aei. 7 Mangaia are e kanakoia taan uataeka Aati nakon Tikaratabiretiera+ are Uean Aturia, ao e kangai: “Bon am toro ngai ao natim. Waerake ao kamaiuai mai nanoni bain uean Turia ao mai nanoni bain uean Iteraera, aika a buakanai.” 8 E anai ngkanne tirewa ma koora Aati ake a kona n reke n ana auti Iehova, ao ni nneni baika kakawaki ake n ana auti* te uea, ao e kanakoa te bwai ni kamaraato nakon uean Aturia.+ 9 E butimwaea ana bubutii teuaei uean Aturia, ao e waerake nako Tamateko ao e taua, ao e kairiia kaaina bwa taenikai nako Kiri,+ ao e kamatea Retin.+

10 Ao e nako te Uea are Aati ni kawara Tikaratabiretiera are Uean Aturia i Tamateko. Ngke e nora te baonikarea ae mena i Tamateko te Uea are Aati, ao e a kanakoa naba taamnein te baonikarea arei nakon Uriia are te ibonga,* ni kaota teina ma aroni karaoana.+ 11 Ao e katea te baonikarea+ Uriia+ are te ibonga n aron ana kaetieti ni kabane te Uea are Aati are kanakoi mai Tamateko. E katiaa katean te baonikarea Uriia are te ibonga imwain okin te Uea are Aati mai Tamateko. 12 Ngke e oki te uea mai Tamateko ao e nora te baonikarea arei, ao e kaania te baonikarea arei ao e anga taiani karea i aona.+ 13 Ao e teimatoa ni kabueki ni kabubui ana karea ni kabuekaki ao ana karea ae te amwarake, i aon te baonikarea arei. E kabwaroa naba ana karea ae te moi ao ni katimtimwi raraan ana karea n raoi* i aona. 14 Ao e kamwainga te baonikarea are te buraati+ are mena i matan Iehova mani nnena are i moan te auti, mai marenan ana baonikarea arei ao ana auti Iehova, ao e kaaki n iteran ana baonikarea arei mai meang. 15 E tua te Uea are Aati nakon Uriia+ are te ibonga ni kangai: “Kabueka te karea ni kabuekaki are n te ingabong ni kabubua i aon te baonikarea ae kakannato aei,+ ao te karea naba ae te amwarake+ are n te tairiki, ana karea ni kabuekaki te uea ao ana karea ae te amwarake, n ikotaki ma karea ni kabuekaki, te karea ae te amwarake, ao te karea ae te moi ae aia karea aomata ni kabane. Ko riai naba ni katimtimwi i aona raraan ni kabane taiani karea ni kabuekaki ao raraan ni kabane taiani karea ake tabeua. Ni kaineti ngkanne ma te baonikarea are te buraati, N na iangoia bwa tera ae N na karaoia nako iai.” 16 Ao e karaoi bwaai nako Uriia are te ibonga ake e tua te Uea are Aati.+

17 Irarikin anne ao e korokorei oon rarikin taiani kaa n uabwai te Uea are Aati+ ao e kanakoi taiani beetin mai iai.+ Ao e karuoa nnen te ran are buburakaei are arana Taari mai aoia kaao mwaane aika taiani buraati+ ake e toka i aoia, ao e kaaki i aon te nangoa ae te atibu.+ 18 Ao te tabo are rabunaki ibukin te bongi n Taabati are e kateaki n te auti, ao kawain te uea n rin are mai tinaniku, e kamwaingi teuaei ni kanakoi man ana auti Iehova. E karaoa anne ibukin uean Aturia.

19 Ni kaineti ngkanne ma nikiran rongorongon Aati ma te bwai are e karaoia, tiaki a koreaki n te boki are rongorongon aia tai uean Iuta?+ 20 Ao e a wene ni motirawa Aati i rarikia ana bakatibu, ao e kaiiaki i rarikia ana bakatibu n Ana Kaawa Tawita, ao e a riki natina are Etekia*+ bwa te uea n onea mwina.

17 N ana ka-12 n ririki n tautaeka Aati are Uean Iuta, ao e a riki Ootea+ are natin Eera bwa uean Iteraera i Tamaria, i nanon ruaiwa te ririki. 2 E teimatoa ni karaoa ae buakaka i matan Iehova, ma e aki roko ni buakakaia uean Iteraera ake imwaina. 3 Ao e waerake Tiaremanetera are Uean Aturia n ekaanako teuaei,+ ao e a riki Ootea bwa ana toro, ao e a anganganna te angabwai.+ 4 Ma e a ataia uean Aturia ae e irekereke Ootea ma te karitei, bwa e kanakoia taan uataeka nakon Tio are Uean Aikubita,+ ao e a aki anganga te angabwai nakon uean Aturia n aron ririki ake mai mwaina. Ao uean Aturia e kaina teuaei ao ni kabaea n te karabuuti.

5 E ninia te aba ni kabutaa uean Aturia ao e nako Tamaria ao e otabwaninia n ekianako i nanon tenua te ririki. 6 N ana karuaiwa n ririki n tautaeka Ootea, ao e a taua Tamaria uean Aturia.+ E a kairiia ngkanne tibun Iteraera bwa taenikai+ nako Aturia, ao e kamaekaia i Aiira ao i Abora i rarikin te karaanga ae Kotan+ ao n aia kaawa nako I-Miria.+

7 E riki aei ibukina bwa a a tia tibun Iteraera ni bure nakon Iehova ae Atuaia, are e kairiia ni kaotinakoia man te aba are Aikubita mai aani mwaakani Barao are uean Aikubita.+ A taromaurii* atua riki tabeman,+ 8 a kakairi n aia katei natannaomata ake e kakioianako Iehova mai mwaia tibun Iteraera, ao a kakairi n aia katei uean Iteraera ake a a tia ni karaoi.

9 A ukeri tibun Iteraera baika aki eti iroun Iehova ae Atuaia. A teimatoa ni katei taabo aika rietata n aia kaawa ni kabane,+ ni moa man te taua n tantani nakon te kaawa ae nonoaki.* 10 A teimatoa ni katei aia boua aika tabu ao aia kai aika tabu*+ i aon nako tabuki aika rietata ao i aan nako kaai aika manguroro,+ 11 ao a kabueki karea ni kabubui n taabo aika rietata ni kabane, n aron are a karaoia natannaomata ake e kakioianako Iehova mai mwaia bwa taenikai.+ A teimatoa ni karaoi baika buakaka ni kauna Iehova.

12 A teimatoa n toro irouia bouannanti aika kamwara*+ ake e tuangia ni kangai Iehova ibukia: “Kam na tai taromauria.”+ 13 E teimatoa Iehova n anga te kauring nakoia tibun Iteraera ao tibun Iuta rinanoia ana burabeti ni kabane ma taan nori miitara,+ ni kangai: “Kam na rairaki mani kawaimi aika buakaka!+ Kawakin au kaetieti ao au moti, ni kaineti ma te tua ni kabane are I tua nakoia ami bakatibu ao are I kanakoi nakoimi rinanoia au toro aika burabeti.” 14 Ma a aki kan ongo ao a teimatoa n imanono n aron imanonoia* aia bakatibu ake a aki kaota onimakinan Iehova ae Atuaia.+ 15 A teimatoa n rawa nakon ana tua ao ana berita+ are e karaoia ma aia bakatibu, ao ana kauring ake e anga bwa te kauring nakoia,+ ao a teimatoa ni kakairi irouia bouannanti aika akea manenaia+ ao a a riki naba n akea manenaia,+ ni kakairi irouia natannaomata ake i rarikia ni kabutaa, ake e tua Iehova nakoia bwa a na aki kakairi irouia.+

16 A teimatoa ni kitan ana tua ni kabane Iehova ae Atuaia ao a karaoi bouannanti aika biiti* aika kaao ataei aika uoman,+ ao te kai ae tabu,*+ ao a bobaraaki nakoni bwaini karawa ni kabane+ ao a toro irouni Baara.+ 17 A kabuekiia naba natiia mwaane ma natiia aine n te ai,*+ ao a kakaiwa+ ma n ukeri kanikinaeani baika tuai n riki, ao a teimatoa n anga ngaiia* nakoni karaoan ae buakaka i matan Iehova ni kaunna iai.

18 Mangaia are e a rangi n un Iehova irouia tibun Iteraera n te aro are e a kamwaawaia mai matana.+ E aki kariaia temanna bwa e na tiku, ma tii te baronga are Iuta.

19 Ao tibun Iuta a aki naba kawakin ana tua Iehova ae Atuaia,+ a nakonako naba n taiani katei ake a kakairi iai tibun Iteraera.+ 20 E rawa Iehova nakoia kanoan Iteraera ni kabane, ao e kabwainrangia ao e anga ngaiia nako nanoni baia taani kuribwai, ni karokoa ae e a bon tewenakoia mai matana. 21 E raeuaia tibun Iteraera man ana utu Tawita, ao a kaueaa Ieroboam are natin Nebata.+ Ma e rairiianako tibun Iteraera Ieroboam man irirakin Iehova, ao e karekeia n te bure ae kakaiaki. 22 Ao a teimatoa tibun Iteraera n nakonako n ana bure ni kabane Ieroboam ake e karaoi.+ A aki roko n te kitan 23 ni karokoa ae e a kamwaawaia tibun Iteraera Iehova mai matana, n aron are e taekinna rinanoia ana toro ni kabane aika burabeti.+ Mangaia are a a kairakinako tibun Iteraera mai abaia bwa taenikai nako Aturia,+ ike a a tiku iai ni karokoa te bong aei.

24 Ao uean Aturia e kairiia aomata mai Baburon, Kutu, Awa, Amata, ao Tebarewaim,+ ao e kamaekaia ni kaawan nako Tamaria n onei mwia tibun Iteraera. A abana Tamaria ao a maeka ni kaawana nako. 25 Ngke a moani maeka ikekei ao a aki maaka* Iehova. Ngaia are e a kanakoia raian Iehova nako buakoia,+ ao a tiringia tabeman mai buakoia aomata. 26 E kaongoaki uean Aturia ae kangai: “A aki ataa aron te waaki n taromauri* ibukin Atuan te aba arei natannaomata ake ko kairiia bwa taenikai ao ni manga kamaekaia ni kaawan nako Tamaria. Mangaia are e teimatoa ni kanakoia raian nako buakoia ao a kamateia, ibukina bwa akea i buakoia ae e ataa aron te waaki n taromauri ibukin Atuan te aba arei.”

27 Mangaia are e a tua uean Aturia ni kangai: “Karekea temanna mai buakoia ibonga* ake kam kairiia bwa taenikai mai ikekei, ao kaokia bwa e na maeka ikekei ao n reireinia aron te waaki n taromauri ibukin Atuan te aba arei.” 28 Mangaia are e a oki bwa e na maeka i Betaera+ temanna mai buakoia ibonga ake a kairiia bwa taenikai mai Tamaria, ao e a reireinia aroia ae a riai ni maaka* iai Iehova.+

29 Ma a boni karaoi oin atuaia natannaomata aika kakaokoro nako, ake a katikui n aia auti n taromauri n taabo aika rietata ake a karaoi I-Tamaria. A karaoa anne natannaomata aika kakaokoro nako n aia kaawa ake a maeka iai. 30 Mangaia are a karaoa Tukotabenota rorobuakani Baburon, a karaoa Nerekara rorobuakani Kutu, a karaoa Atima rorobuakan Amata,+ 31 ao I-Awa a karaoa Nibeati ma Taretaka. Ao I-Tebarewaim a kakabuekiia natiia n te ai nakon Aterammereka ao Anammareka ake atuan Tebarewaim.+ 32 E ngae ngke a maaka Iehova, ma a rineiia ibonga ibukin taabo aika rietata mai buakoia aia aomata, ao a beku naakai ibukia n auti n taromauri ake n taabo aika rietata.+ 33 Mangaia are a maaka Iehova, ma a bon taromaurii oin atuaia, ni kaineti ma aron aia waaki n taromauri* natannaomata ake a kanakoaki mai buakoia.+

34 A kakairi n aron aia waaki n taromauri* ake mai mwaina ni karokoa te bong aei. Akea i buakoia ae e taromauria* Iehova ao akea ae e kakairi n ana taeka, n ana moti, n te Tua, ao n te kaetieti are e anga Iehova nakoia tibun Iakoba, are e bita arana nakon Iteraera.+ 35 Ngke e karaoa te berita Iehova ma ngaiia,+ ao e tua ni kangai nakoia: “Kam na tai maakuia atua riki tabeman, ao kam na tai bobaraaki nakoia ke n toro irouia, ke n angakarea nakoia.+ 36 Ma bon Iehova ae Ngaia ae kam riai ni maakua,+ are e kairingkami ni kaotinakoingkami man te aba are Aikubita n te mwaaka ae korakora ao n te bai ae aroraki,+ ao kam riai ni bobaraaki nakoina, ao kam riai n angakarea nakoina. 37 Ao kam riai ni kakairi raoi n taai nako n taeka, ni mooti, n te Tua, ao n te kaetieti, ake e korei ibukimi,+ ao kam na tai maakuia atua riki tabeman. 38 Ao kam na tai mwanuokina te berita are I karaoia ma ngkami,+ ao kam na tai maakuia atua riki tabeman. 39 Ma kam riai ni maaka Iehova ae Atuami, bwa boni ngaia ae e na kamaiuingkami mai nanoni baia taani kairiribai nakoimi ni kabane.”

40 Ma a aki ongeaba ao a kakairi n aron aia waaki n taromauri* are mai mwaina.+ 41 Mangaia are a a maaka Iehova+ natannaomata aikai, ma a bon toro naba irouia aia bouannanti aika kaaraki. Ao natiia ma tibuia a karaoa are a karaoia aia bakatibu, ni karokoa te bong aei.

18 N ana katenua n ririki n tautaeka Ootea+ are natin Eera are uean Iteraera, ao e a riki bwa te uea Etekia+ are natin te Uea are Aati.+ 2 Bon 25 ana ririki ngke e riki bwa te uea, ao e tautaeka i Ierutarem i nanon 29 te ririki. Aran tinana Abi* are natin Tekaria.+ 3 E teimatoa ni karaoa ae eti i matan Iehova,+ n aron are e karaoia Tawita are ana bakatibu.+ 4 Boni ngaia are e kanakoi taabo aika rietata,+ e kamaeinikuni boua aika tabu, ao e korea te kai ae tabu* ni kabwakaa.+ E kamantinta naba te naeta are te buraati are e karaoia ngkoa Mote,+ bwa a kakabueki ni kabubui karea tibun Iteraera nakon te baenne ni karokoa te tai anne, ao e araranaki bwa te bouannanti ae te naeta ae te buraati.* 5 E onimakina Iehova+ ae Atuan Iteraera. Bon akea n ai arona i buakoia uean Iuta ni kabane ake imwina, ke i buakoia naake imwaina. 6 E nimta raoi Iehova.+ E aki rairakinako man irirakina. E teimatoa ni kawakin tuua ake e anga Iehova nakoni Mote. 7 Ao e memena Iehova irouna. Ao e bwabwaina te wanawana n taabo ake e nako iai. E karitei nakon uean Aturia ao e rawa n toro irouna.+ 8 E kataenikaiia naba I-Biritia+ ni karokoa Kaata ma aonona nako, man te taua n tantani nakon te kaawa ae nonoaki.*

9 N ana kaaua n ririki n tautaeka te Uea are Etekia ae taekan ana kaitiua n ririki n tautaeka Ootea+ are natin Eera are uean Iteraera, ao e a waerake Tiaremanetera are Uean Aturia n ekaanako Tamaria, ao e a otabwaninia.+ 10 Ao a taua+ ngke a a koro ririki aika tenua. N ana kaonoua n ririki n tautaeka Etekia ae ana karuaiwa n ririki n tautaeka Ootea are Uean Iteraera, ao e a tauaki Tamaria. 11 Ao uean Aturia e a kairiia tibun Iteraera bwa taenikai+ nako Aturia, ao e kamaekaia i Aiira ao i Abora i rarikin te karaanga ae Kotan ao n aia kaawa nako I-Miria.+ 12 E riki aei ibukina bwa a aki ongo ni bwanaan Iehova ae Atuaia, ma a teimatoa n urua ana berita, ake bwaai ni kabane ake e tua Mote are ana toro Iehova.+ A aki kan ongo ke n ongeaba.

13 N ana ka-14 n ririki n tautaeka te Uea are Etekia, ao e a waerake Tennakeriba are uean Aturia+ n ekinako kaawa ni kabane ake i Iuta aika nonoaki, ao e taui.+ 14 Mangaia are e a kanakotaeka Etekia are Uean Iuta nakon uean Aturia i Rakiti, ni kangai: “I bure. Kitanai ao tai ekainako, ao N na anganiko te bwai ane ko tuangai.” Ao uean Aturia e tuanga Etekia are Uean Iuta, te tuuaa ae 300 te tarena* n tirewa ao 30 te tarena ni koora. 15 Mangaia are e anga Etekia tirewa ni kabane ake a kona n reke n ana auti Iehova, ao ni nneni baika kakawaki ake n ana auti* te uea.+ 16 N te tai anne ao e a kanakoi* mataroa Etekia ake n ana tembora+ Iehova, ma bouani mataroa ake e boni kanimwi aoia n rabuni* Etekia are Uean Iuta,+ ao e angan uean Aturia.

17 Ao uean Aturia e kanakoa te Taretan,* te Rabatarita,* ao te Rabetiake,* ma te taanga ni buaka ae rangi ni bati mai Rakiti,+ nakon te Uea are Etekia are mena i Ierutarem.+ A waerake naakai nako Ierutarem ao a tei ni kawain te ran man te nei are mai eta, are n te kawai ae totouaki nakon ana tawaana te tia kaitiakii kunnikai.+ 18 Ngke a wewetea te uea naakai bwa e na otinako, ao e a otinako Eriakim+ are natin Irekia are te mataniwi i aoia kaaini batan te uea,* ao Tiebenaa+ are te tia koroboki, ao Ioa are natin Ataba are te tia korei mwin rongorongo.

19 Mangaia are e taku te Rabetiake nakoia: “Taiaoka ma kangai nakon Etekia, ‘E kangai ana taeka te uea ae kakannato, ae uean Aturia: “Tera ae boto iai am aki nanokokoraki?+ 20 Ko taku, ‘Bon iai au babaire ao korakorau ni buaka,’ ma bon akea uaan taeka aikai. Antai ae ko onimakinna, ngkai ko aki maaku ni karitei nakoiu?+ 21 Noria! Ko onimakina ana boutoka te kaibwabwaa ae manatua ae Aikubita,+ ae ngkana e raraia te aomata ao e a ribunako naba i nanoni baina ao n teke iai. Anne aroni Barao are uean Aikubita nakoia te koraki nako ake a onimakinna. 22 Ao ngkana kam kangai nakoiu: ‘Ti onimakina Iehova ae Atuara,’+ tiaki boni ngaia are a kanakoaki ana tabo aika rietata ao ana baonikarea iroun Etekia,+ ngke e kangai nakoia tibun Iuta ao kaain Ierutarem, ‘Kam riai ni bobaraaki i matan te baonikarea ae i Ierutarem aei’?”’+ 23 Mangaia ae taiaoka ngkai ni karaoa te kauaaba ni katuuaa aei ma au toka ae uean Aturia: N na anganiko aoti aika 2,000 ngkana ko kona ni karekeia taan toka i aoia aika tau mwaitiia.+ 24 Ko na kangaa ngkanne ni kaokaanako temanna te kowana ae te kabanea ni mangori i buakoia ana toro au toka, ngkai ko onimakina Aikubita ibukin taiani kaa ni buaka ao ibukia taan toka i aoia aoti? 25 Ao te koaua bwa akea ana kariaia Iehova ngkai I a waerake n ekaanako te tabo aei bwa N na kamauna? Bon Iehova ae kangai nakoiu: ‘Waerake n ekaanako te aba anne ao kamauna.’”

26 Ao e taku Eriakim are natin Irekia, ao Tiebenaa,+ ao Ioa, nakon te Rabetiake:+ “Taiaoka ma taetae nakoia am toro n te taetae n Aramwaike,*+ bwa ti ota iai. Tai taetae nakoira n aia taetae I-Iutaia ngkai a ongora aomata aika i aon te oo.”+ 27 Ma e taku te Rabetiake nakoia: “Tii ami toka ao ngkami ae e kanakoai au toka bwa N na taekin taeka aikai nakoimi? Tiaki bon nakoia naba mwaane akana tekateka i aon te oo akanne, ake te koraki ake a na boni kang oin nakotaaria ao ni moi n oini mimia ma ngkami?”

28 Ao e tei te Rabetiake ao e takarua n aia taetae I-Iutaia ni kangai: “Ongora n ana taeka te uea ae kakannato ae uean Aturia.+ 29 E kangai ana taeka te uea, ‘Tai kariaia Etekia bwa e na mwamwanaingkami, bwa e aki kona ni kamaiuingkami mai nanoni baiu.+ 30 Ao tai kariaia Etekia bwa e na kairingkami bwa kam na onimakina Iehova, ngkana e kangai: “E na boni kamaiuira Iehova, ao e na bon aki kanakoaki te kaawa aei nako nanoni bain uean Aturia.”+ 31 Tai ongo iroun Etekia, bwa e kangai ana taeka uean Aturia: “Karekea te raoi ma ngai ao taenikai,* ao ane e na amwarake temanna ma temanna iroumi man oin ana kai ae te kureebe, ao man oin arokana ae te biiku, ao ni moi n te ran man oin ana mwarua n ran, 32 ni karokoa ae I roko ao I kairingkami nakon te aba ae ai aron oin abami,+ ae te aba ae mena iai te uita* ma te wain ae boou, te aba ae mena iai te kariki ma nne ni kureebe, ao te aba ae a mena iai aroka aika oriwa ma aia karewe manibeeru.* Ao ane kam na maiu ao kam na aki mate. Tai ongo iroun Etekia bwa e burebureingkami ngkai e kangai, ‘E na kamaiuira Iehova.’ 33 Iai i buakoia atuaia natannaomata ae e kamaiua abana mai nanoni bain uean Aturia? 34 A nga atuan Amata+ ao Arebata? A nga atuan Tebarewaim,+ Ena, ao Iwa? A kamaiua Tamaria mai nanoni baiu?+ 35 Antai mai buakoia atuan nako aaba aika a kamaiui abaia mai nanoni baiu, ngkai e na kamaiua Ierutarem mai nanoni baiu Iehova?”’”+

36 Ma a teimatoa ni kainabwabu aomata ao a aki taekina te taeka teuana ni kaekaa iai, bwa e tua ae kangai te uea, “Kam na tai kaekaa.”+ 37 Ma Eriakim are natin Irekia are te mataniwi i aoia kaaini batan te uea,* ao Tiebenaa are te tia koroboki, ao Ioa are natin Ataba are te tia korei mwin rongorongo, a nako ni kawara Etekia ma kunnikaia aika raeuaaki ao a tuangnga ana taeka nako te Rabetiake.

19 Ngke e ongo naba ngkekei te baei te Uea are Etekia, ao e raeuai kunnikaina ao e rabunna n te raerobwa,* ao e rinnako n ana auti Iehova.+ 2 Ao e kanakoa Eriakim are te mataniwi i aoia kaaini batan te uea,* ao Tiebenaa are te tia koroboki, ao aia unimwaane ibonga,* aika rabunia n te raerobwa, nakon Itaia are te burabeti+ are natin Amoti. 3 Ao a taku nakoina: “E kangai ana taeka Etekia, ‘Bon te bongi n rawawata te bong aei, te bong ni boaaki,* ao te bong ni bwainrang, bwa a a tauraoi ataei ni bungiaki,* ma ai akea te korakora ni bung.+ 4 Tao ane e na ongo Iehova ae Atuam ana taeka ni kabane te Rabetiake, are e kanakoaki iroun uean Aturia are ana toka bwa e na kakanikoa te Atua ae maiu,+ ao ane e na kaeta taekana Iehova ae Atuam ibukin taeka ake e ongo. Mangaia ae ko na tabeka am tataro+ ibukia te nikira ake a tiku ni maiu.’”

5 Mangaia are a a rinnako ana toro te Uea are Etekia nakon Itaia,+ 6 ao e taku Itaia nakoia: “Kam riai ni kangai nakon ami toka, ‘E kangai ana taeka Iehova: “Tai maaku+ ibukin taeka ake ko ongo, ake taeka ake a taekin ana toro uean Aturia ni kamatauningaai iai.+ 7 N na karina ngkai te iango teuana n ana iango, ao ane e na ongo te rongorongo teuana ao e na okira oin abana, ao N na kabwakaa n te kabaang n oin abana.”’”+

8 Ngke e ongo te Rabetiake bwa e a tia uean Aturia ni kitana Rakiti,+ ao e a oki nakoina ao e a kunea ngke e buakana Ribena.+ 9 E a ongo ngkai te uea taekan Tireaka are Uean Itiobia, ae kangai: “Ae e a otinako ngkai bwa e na buakaniko.” Mangaia are e a manga kanakoia taan uataeka+ nakon Etekia ao e kangai: 10 “Aio te bwai ae kam riai n taekinna nakon Etekia are Uean Iuta, ‘Tai kariaia Atuam ae ko onimakinna bwa e na mwamwanaiko ngkai e kangai: “E na aki kanakoaki Ierutarem nako nanoni bain uean Aturia.”+ 11 Noria! Ko a tia n ongo baike a karaoi uean Aturia nakon aaba ni kabane, n aroia ni kamaunai.+ N am iango ko na boni kamaiuaki? 12 Te koaua bwa a kamaiuaki irouia atuaia natannaomata ake a kamaunaaki irouia au bakatibu? E a nga Kotan, Aran,+ Retieba, ao kaain Eten ake i Terata? 13 E nga uean Amata, uean Arebata, ao ueani kaawan nako Tebarewaim, ao uean Ena, ao uean Iwa?’”+

14 E anai reeta Etekia mai nanoni baia taan uataeka ao e wareki. Imwina ao e a waerake Etekia nakon ana auti Iehova, ao e taakini baikai* i matan Iehova.+ 15 Ao e a tataro Etekia+ nakon Iehova ao e taku: “Iehova ae Atuan Iteraera, ae ko tekateka n te kaintokanuea i etaia* kerubim,*+ bon tii ngkoe te Atua ae koaua ae tautaeka i aoia tautaeka n uea ni kabane aika n te aonnaba.+ Ko karaoa karawa ma te aonnaba. 16 Katanimaia taningam ngkoe ae Iehova ao ongora!+ Kaurei matam ngkoe ae Iehova+ ao noria! Ongora n taeka ake e kanakoi Tennakeriba ni kakanikoa iai te Atua ae maiu. 17 Bon te koaua Iehova, ae a a tia uean Aturia ni kamaunaia natannaomata ao abaia.+ 18 Ao a karenakoi atuaia i nanon te ai, ibukina bwa bon tiaki atua+ ma bon aia mwakuri baia aomata,+ ae te kai ma te atibu. Anne bukina ae a kona n urui iai. 19 Ma ko bia kamaiuira ngkai taiaoka Iehova ae Atuara mai nanoni baina, bwa e aonga n ataaki irouia tautaeka n uea ni kabane aika n te aonnaba ae bon tii ngkoe te Atua, ngkoe ae Iehova.”+

20 Ao e kanakoa te rongorongo aei Itaia are natin Amoti nakon Etekia ni kangai: “E kangai ana taeka Iehova ae Atuan Iteraera, ‘I ongo am tataro+ nakoiu ni kaineti ma Tennakeriba are Uean Aturia.+ 21 Aio ana taeka Iehova are taekinna n ekaanako teuanne:

“E ribaiko natin Tion te aine ae tuai ni boo ma te mwaane ao e kakanikoko.

E ioioa atuna nakoim natin Ierutarem te aine.

22 Antai ae ko kakanikoa ao n taetae ni kamatauningaa?+

Bon nakon Teuare Tabu i Iteraera!+

23 Ko a tia ni kakanikoa Iehova+ rinanoia am tia uataeka+ ao ko kangai:

N na korei ni kabwakai tiira aika rietata ake iai, ao kaai aika mwaiango aika rangi n raoiroi.

N na rin n taabo ni motirawa ake iai ake taiani kabanea n raroanako, ake buakonikaina aika tamaroa.

25 Ko tuai n ongo? E a kamani motikaki* mangkoangkoa.+

I a kamani katauraoia* mani boong ake a a tia n nako.+

N nang karokoa ngkai.+

Ane ko na onei kaawa aika nonoaki nakon taabo aika kamaroaa aika urubekebeke.+

26 Ane a na akea korakoraia kaaia.

A na maakunrang ao ni kamaamaeaki.

29 “‘Ao aei te kanikina ibukim:* Ane kam na amwarake n te ririki aei n ane e rikirake i bon irouna,* ao n te kauoua n ririki kam na kana te uita* ane rikirake mai iai,+ ma n te katenua n ririki ao kam na uniki koraa ma n tai, ao kam na ununiki n ami nne ni kureebe ma ni kang uaaia.+ 30 A na karibui wakaaia rikaaki ao ni karikii uaa ni waerake te koraki ake tibun Iuta ake a reke birinakoia, ake te koraki ake a a tiku bwa nikira.+ 31 Bwa e na otinako te nikira mai Ierutarem ao naake a reke maiuia man te Maunga ae Tion. E na karaoa aei ingaingan nanon Iehova ae Atuaia taanga ni buaka.*+

32 “‘Mangaia ae e kangai ana taeka Iehova ni kaineti ma uean Aturia:+

33 E na oki n te kawai are e roko mai iai.

E na aki rin n te kaawa aei,” bon ana taeka Iehova.

35 Ni bon te tairiki naba anne ao e a otinako ana anera Iehova ni kamateia mwaane aika 185,000 n aia kaembwa I-Aturia.+ Ngke a a utimwaaka aomata n te moaningabong, ao a a noriia maate ni kabane.+ 36 Mangaia are e a nako Tennakeriba are Uean Aturia ao e a okira Ninewe+ ma n tiku ikekei.+ 37 Ao ngke e bobaraaki teuaei n ana auti* Nitiroka are atuana, ao a a kamatea naba n te kabaang+ oin natina ake Aterammereka ma Tiaretera, ao imwina a birinako nakon te aba ae Ararata.+ Ao e a riki natina are Etaraaton+ bwa te uea n onea mwina.

20 Ni boong akekei ao e a aoraki Etekia ao e a kaani mate.+ E roko te burabeti are Itaia are natin Amoti ao e taku nakoina, “E kangai ana taeka Iehova: ‘Aanga te kaetieti nakoia kaaini batam bwa ane ko nangi mate, ao ko na aki marurung.’”+ 2 Ngaia are e katannako ni kaitaraa te oo ao e a tataro nakon Iehova ni kangai: 3 “I butiiko Iehova, ma taiaoka uringa arou n nakonako i matam ma te kakaonimaki ao te nano ae tabwanin raoi, ao I karaoa ae raoiroi i matam.”+ Ao e a korakai n tang Etekia.

4 Ngke e tuai n roko Itaia n te katawanang are i nukan ana baareti te uea, ao e a roko naba irouna ana taeka Iehova ae kangai:+ 5 “Naako oki ao kangai nakon Etekia are te tia kairiri i aoia au aomata, ‘E kangai ana taeka Iehova ae Atuan Tawita are am bakatibu: “I ongo am tataro. I nori rannimatam.+ Ao ngkai N nang kamarurungko.+ Tenibong mangkai ao ko na waerake nakon ana auti Iehova.+ 6 N na kaabwabwaka riki maium* n ririki aika 15, ao N na kamaiuko ma te kaawa aei mai nanoni bain uean Aturia,+ ao N na kamanoa te kaawa aei i bon ibukiu ao ibukin Tawita are au toro.”’”+

7 Ao e taku Itaia: “Uotii biiku aika bati aika buabuaaki aika mwau.” Mangaia are a uotii ao a kaaki i aon te kaboa, ao imwina e a ririkirake ni marurung.+

8 E titiraki Etekia nakon Itaia ni kangai: “Tera te kanikina+ ae e na kaotia bwa e na boni kamarurungai Iehova ao N na boni waerake nakon ana auti Iehova tenibong mangkai?” 9 E kaeka ni kangai Itaia: “Aio te kanikina mairoun Iehova ae e na kaotia nakoim bwa e na boni kakororaoa ana taeka Iehova are e a tia n taekinna: Ko tangira te nuu ae i aon te bwai n tamwarake bwa e na keerake tebwina te mwaneka, ke e na kerikaaki tebwina te mwaneka?”+ 10 E taku Etekia: “Bon te bwai ae bebete ngkana e na keerake te nuu tebwina te mwaneka, ma e aki bebete ngkana e na kerikaaki te nuu tebwina te mwaneka.” 11 Ao Itaia are te burabeti e wetea Iehova, ao e karaoa te nuu are i aon ana bwai n tamwarake Aati bwa e na kerikaaki tebwina te mwaneka imwini kerikaakina i aon te bwai n tamwarake.+

12 N te tai anne ao e kanakoi reeta ma te bwaintangira Berotakabaratan are natini Baratan are ueani Baburon nakon Etekia, bwa e ongo ae e aoraki Etekia.+ 13 E butimwaeiia* taan uataeka akekei Etekia ao e kaneweabaia ni nnen nako ana bwai aika kakawaki,+ aika tirewa, koora, oeran te batiam ma aeka ni bwaa riki aika rangi ni kakawaki, ana bwai ni buaka, ao bwaai ni kabane ake a kona n reke ni nnen ana bwai aika kakawaki. Akea te bwai teuana i nanon ana auti* Etekia ao n abana are e tautaekanna ni kabutaa ae e aki kaotia nakoia.

14 Imwin anne ao e a rin Itaia are te burabeti nakon te Uea are Etekia ao e titirakinna ni kangai: “Tera ae a taekinna mwaane aikai ao a roko mai ia?” Mangaia are e taku Etekia: “A roko man te aba ae raroa, mai Baburon.”+ 15 Imwina ao e titiraki ni kangai: “Tera ae a noria i nanon am auti?”* E kaeka Etekia ni kangai: “A nori bwaai ni kabane aika n au auti.* Akea te bwai teuana ae I aki kaotia nakoia aika ni nnen au bwai aika kakawaki.”

16 E a taku ngkai Itaia nakon Etekia: “Ongora n ana taeka Iehova,+ 17 ‘Noria! A nang roko boong ake a nang uotakinako iai bwaai ni kabane aika n am auti,* ma bwaai ni kabane ake a kawakin am bakatibu ni karokoa te bong aei nako Baburon.+ Akea ae e na katukaki,’ bon ana taeka Iehova. 18 ‘Ao a na kairakinako tabeman oin natim mwaane aika a na bungiaki,+ ao a na riki bwa mataniwi n ana baareti ueani Baburon.’”+

19 Ao e taku Etekia nakon Itaia: “E raoiroi ana taeka Iehova ane ko taekinna.”+ Ao e reitia ni kangai: “E raoiroi anne, ngkana e na iai te rau ma te mweraoi* n au tai ni maiu.”*+

20 Ni kaineti ngkanne ma nikiran rongorongon Etekia ma ana mwakuri aika korakora ni kabane, ao arona ni karaoa te nei+ ma kawain te ran, ao ni karokoa te ran i nanon te kaawa,+ tiaki a koreaki n te boki are rongorongon aia tai uean Iuta? 21 Ao e a wene ni motirawa Etekia i rarikia ana bakatibu,+ ao e a riki natina are Manate+ bwa te uea n onea mwina.+

21 Bon 12 ana ririki Manate+ ngke e riki bwa te uea, ao e tautaeka i Ierutarem+ i nanon 55 te ririki. Aran tinana Ebitiba. 2 E karaoa ae buakaka i matan Iehova, ni kakairi n aia mwakuri aika riribaaki natannaomata+ ake e kakioianako Iehova mai mwaia tibun Iteraera.+ 3 E a manga katei taabo aika rietata ake e kamaunai tamana are Etekia,+ ao e katei ana baonikarea Baara ao e karaoa te kai ae tabu*+ n aron are e karaoia ngkoa Aaba are uean Iteraera.+ Ao e bobaraaki nakoni bwaini karawa ni kabane ao e toro irouia.+ 4 E katei naba taiani baonikarea n ana auti Iehova,+ are e taetae ni kangai Iehova ibukina: “N na kaaki arau i Ierutarem.”+ 5 Ao e katei baonikarea ibukini bwaini karawa ni kabane+ ni katawanang ake uoua ake n ana auti Iehova.+ 6 Ao e kabueka natina te mwaane n te ai,* e tabunea, e ukeri kanikinaeani baika tuai n riki,+ ao e kateirakeia taan rorokoia taimonio ma taani kaiwani kanoan taai aika a na roko.+ E karaoa ae buakaka n te aro ae rangi ni korakora i matan Iehova, ni kaunna iai.

7 E karina naba te bouannanti ae kaaraki are e karaoia ae te kai ae tabu,*+ i nanon te auti, are e kangai ibukina Iehova nakon Tawita ao nakon natina are Toromon: “N na kaaki arau n aki toki n te auti aei ao i Ierutarem, are I rineia mai buakon aia baronga nako tibun Iteraera.+ 8 Ao N na aki manga kariaia waeia tibun Iteraera bwa a na mwamwananga man te aba are I angania aia bakatibu,+ ma tii ngkana a kakairi raoi ni bwaai ni kabane ake I tua nakoia,+ are te Tua ae tabwanin are e tua nakoia au toro are Mote bwa a na kakairi iai.” 9 Ma a aki ongeaba, ao e teimatoa Manate ni katiotionakoia, n arona ni kairiia bwa a na karaoi mwakuri aika rangi ni buakaka riki nakoia natannaomata ake e kamaunaia Iehova mai mwaia tibun Iteraera.+

10 E teimatoa Iehova n taetae rinanoia ana toro aika burabeti+ ni kangai: 11 “E a tia Manate are uean Iuta ni karaoi baika riribaaki aikai ni kabane, e karaoa ae buakaka riki nakoia taian Amoraite ni kabane+ ake imwaina,+ ao e karekeia tibun Iuta n te bure n ana bouannanti aika kamwara.* 12 Ngaia are e kangai ana taeka Iehova ae Atuan Iteraera: ‘Ae N nang karokoa te kabuanibwai i aon Ierutarem+ ao i aoia tibun Iuta, ae a na kubanrou* iai aomata nako ake a ongo taekana.+ 13 Ao N na katika te kora ni baire*+ i aon Ierutarem, are e kabonganaaki ibukin Tamaria,+ ao N na kabongana te bwai ni kaboraoi are e kabonganaaki ibukin ana utu Aaba,+ ao N na kaoa Ierutarem ni kaitiakia n aron temanna ae kaoa te boora ni kaitiakia, bwa e kaoia ao e kabaraakia.+ 14 Ao N na kaaki taekaia nikiraia au aomata+ ao N na anga ngaiia nako nanoni baia aiaia, ao a na riki bwa bwaai ni kuribwai ao kokona n te buaka irouia aiaia ni kabane,+ 15 ibukina bwa a karaoa ae buakaka i matau ao a teimatoa ni kaunai man te bong are a otinako iai aia bakatibu mai Aikubita, ni karokoa te bong aei.’”+

16 Irarikin ana bure Manate are e karekeia iai tibun Iuta n te bure, n arona ni karaoa ae buakaka i matan Iehova, ao e katutui naba raraaia aomata aika akea aia bure n te aro ae rangi ni bati, ni karokoa ae e a kaona Ierutarem mai tabona nako tabona.+ 17 Ni kaineti ngkanne ma nikiran rongorongoni Manate ao bwaai ni kabane ake e karaoi ma buure ake e karaoi, tiaki a koreaki n te boki are rongorongon aia tai uean Iuta? 18 Ao e a wene ni motirawa Manate i rarikia ana bakatibu, ao e kaiiaki n onnarokan ana auti, n ana onnaroka Utaa,+ ao e a riki natina are Amon bwa te uea n onea mwina.

19 Bon 22 ana ririki Amon+ ngke e riki bwa te uea, ao e tautaeka i Ierutarem i nanon uoua te ririki.+ Aran tinana Meturemeta are natin Aruuti are mai Iotebaa. 20 E teimatoa ni karaoa ae buakaka i matan Iehova, n aron are e karaoia tamana are Manate.+ 21 E teimatoa n nakonako ni kawain nako tamana ake e nakonako iai, ao e teimatoa n toro ao ni bobaraaki nakoia bouannanti aika kamwara ake e toro irouia tamana.+ 22 Ngaia are e kitana Iehova ae Atuaia ana bakatibu ao e aki nakonako ni kawain Iehova.+ 23 Imwin teutana te tai ao a a bairea te karitei ana toro Amon n ekianako ao a kamatea te uea i nanon ana auti. 24 Ma a bane ni kamateaki taani bairea te karitei nakon te Uea are Amon irouia kaain te aba, ao a kaueaa natina are Iotia n onea mwina.+ 25 Ni kaineti ngkanne ma nikiran rongorongon Amon ao te bwai are e karaoia, tiaki a koreaki n te boki are rongorongon aia tai uean Iuta? 26 Mangaia are a kaiia n ana ruanimate are n ana onnaroka Utaa,+ ao e riki natina are Iotia+ bwa te uea n onea mwina.

22 Boni wanua ana ririki Iotia+ ngke e riki bwa te uea ao e tautaeka i Ierutarem+ i nanon 31 te ririki. Aran tinana Ietita are natin Ataia are mai Botikata.+ 2 E karaoa ae eti i matan Iehova ao e nakonako ni kawain nako Tawita are ana bakatibu,+ ao e aki rairakinako mai iai nakon te angaatai ke te angamaing.

3 N ana ka-18 n ririki n tautaeka te Uea are Iotia, ao te uea e a kanakoa Tiaban are te tia koroboki, are natin Aturaia are natini Meturam, nakon ana auti Iehova+ ao e kangai: 4 “Waerake nakon Irekia+ are te ibonga ae rietata,* ao ke e rikoi taiani mwane ni kabane ake a uotaki nako nanon ana auti Iehova,+ ake a rikoi mairouia aomata taan teiakina te mataroa.+ 5 Ko na tua bwa a na anga nakoia te koraki ake a mwiokoaki bwa mataniwi n te mwakuri n ana auti Iehova, ake ngaiia aika a na angania taani mwakuri n ana auti Iehova, ake a na onobwaia uruakin* te auti,+ 6 ae taekaia taani karaobwai aika mwaatai, taani kateitei, ao taani mwakuria te atibu. Ao a na kabongana ni kabooi iai kaai ma atibu aika ekeaki ibukin onobwaian te auti.+ 7 Ma e na aki karaoaki te kakaae i aoia naakai ibukin te mwane are a anganaki, ibukina bwa a kona n onimakinaki.”+

8 Imwina riki ao e taku Irekia are te ibonga ae rietata nakon Tiaban are te tia koroboki:+ “I kunea bokin te Tua+ n ana auti Iehova.” Mangaia are e anga te boki Irekia nakon Tiaban, ao e a warekia.+ 9 Ao e nako Tiaban are te tia koroboki nakon te uea ao e tuangnga ni kangai: “A a tia am toro ni kannai taiani mwane ake a reke n te auti, ao a angania naake a mataniwi n te mwakuri n ana auti Iehova.”+ 10 E tuanga naba te uea ae kangai Tiaban are te tia koroboki: “Iai te boki+ ae e anganai Irekia are te ibonga.” Ao e a warekia Tiaban i matan te uea.

11 Ngke e ongo naba ngkekei te uea taeka ake ni bokin te Tua ao e a raeuai naba kunnikaina.+ 12 Ao e tua ae kangai te uea nakon Irekia are te ibonga ma Aikam+ are natin Tiaban, Akebora are natini Mikaia, Tiaban are te tia koroboki, ao Ataaia are ana toro te uea: 13 “Naako ao titirakina Iehova ibukiu, ibukia aomata, ao ibukia tibun Iuta ni kabane, ni kaineti ma taeka aika n te boki ae kuneaki aei. Bwa e urarake unin Iehova ae korakora iroura,+ ibukina bwa a aki ongeaba ara bakatibu n taeka aika n te boki aei ni kakairi ni bwaai ni kabane aika koreaki ibukira.”

14 Mangaia are a nako Irekia are te ibonga, Aikam, Akebora, Tiaban, ao Ataaia nakon Ureta are te burabeti n aine.+ Neiei boni buun Tiarum are natin Tikewa are natin Areati, are te tia tararuaa te ruu ni kunnikai, ao e mamaeka neiei ni Kauouani Mwakoron Ierutarem, ao a taetae ma neiei ikekei.+ 15 E taku neiei nakoia: “E kangai ana taeka Iehova ae Atuan Iteraera, ‘Tuanga te mwaane are kanakoingkami nakoiu ni kangai: 16 “E kangai ana taeka Iehova, ‘N na karokoa te kabuanibwai i aon te tabo aei ma kaaina, ake taeka ni kabane ake n te boki are e warekia uean Iuta.+ 17 Ibukina bwa a kitanai ao a kabueki karea ni kabubui nakoia atua riki tabeman+ bwa a na kaunai n aia mwakuri ni kabane baia,+ ao e na urarake uniu ae korakora n ekaanako te tabo aei ao e na aki tiringaki uniu.’”+ 18 Ma kam riai ni kangai nakon uean Iuta are e kanakoingkami bwa kam na titirakina Iehova, “E kangai ana taeka Iehova ae Atuan Iteraera: ‘Ni kaineti ngkanne ma taeka ake ko ongo, 19 ao I bon ongo naba iroum, ibukina bwa e kan ongeaba* nanom ao ko kananorinanoko+ i matan Iehova ngke ko ongo baike I taekin n ekaanako te tabo aei ma kaaina, ae a na riki bwa te bwai ni kakamaaku ao ni karekekai, ao ko raeuai kunnikaim+ ao n tang i matau, bon ana taeka Iehova. 20 Anne bukina ae N na ikotiko iai ma am bakatibu,* ao ko na kaiiaki n ruanimatem ma te rau, ao matam a na aki nora te kabuanibwai aei ni kabane ae N na karokoa i aon te tabo aei.’”’” Ao a uota te kaeka nakon te uea.

23 Ngaia are e a kanakotaeka te uea ao a weteiia ni kabane unimwaanen Iuta ao Ierutarem.+ 2 Imwin anne ao e a waerake te uea nakon ana auti Iehova ma aomata ni kabane ni moa man ae e uarereke ni karokoa ae e a kara, aika mwaane ni kabane aika tibun Iuta, kaain Ierutarem ni kabane, ibonga,* ao burabeti. E wareki nakoia ngke a ongora, taeka ni kabane ake ni bokin+ te berita+ are e kuneaki n ana auti Iehova.+ 3 E tei te uea i rarikin te boua ao e karaoa te berita* i matan Iehova,+ bwa e na kakairi iroun Iehova ao e na kawakin ana tua, ana kauring, ao ana kaetieti, ma nanona ni kabane ao maiuna* ni kabane, n arona n toui raoi mwin taeka ake n te berita ake a koreaki n te boki arei. Ao a bane aomata ni butimwaea te berita arei.+

4 Ao e tua te uea nakon Irekia+ are te ibonga ae rietata,* ibonga riki ake tabeman, ao taan teiakina te mataroa, bwa a na kaotinakoi man ana tembora Iehova bwaai nako ake a karaoaki ibukini Baara, ibukin te kai are tabu,*+ ao ibukini bwaini karawa ni kabane. Ao e kabueki i tinanikun Ierutarem i rabeeni Kiteron, ao e uotii mannangia nako Betaera.+ 5 Mangaia are e kakioianako aia ibonga atua aika ianena, ake a kateirakeaki irouia uean Iuta bwa a na kakabueki karea ni kabubui n taabo aika rietata ni kaawa ake i Iuta ao ni katobibia Ierutarem, n ikotaki naba ma naake a kakabueki karea ni kabubui nakoni Baara, nakon taai, nakon namwakaina, nakon taiani nna n itoi, ao nakoni bwaini karawa ni kabane.+ 6 E kaotinakoa naba te kai are tabu*+ man ana auti Iehova nako tabon Ierutarem, nakon te Mwarua ae Kiteron, ao e kabuekia+ n te Mwarua ae Kiteron ao e ikikia ni kamtea ni karokoa ae ai aroni bubun te tano, ao e kamaenakoa bubuna i aon ruanimateia aomata aika mangori.+ 7 E urui naba ni kabwakai aia auti mwaanen te tembora aika kakabooaki ibukin te wene ni bure,+ ake n ana auti Iehova, ike a rarangai iai aine rokin autin te kai are tabu.*

8 Ao e kaotinakoia ibonga ni kabane mani kaawa ake i Iuta, ao e kamwaraei taabo aika rietata ike a kakabueki karea iai ibonga ni kabubui, ake mai Keeba+ nako Beerateba.+ E kabwakai naba taabo aika rietata ake ni mataroan te oo ake i rarikini mataroan ana oo Iotua are te mataniwi n te kaawa, ake a mena i angamaingin te kaawa ngkana e rin te aomata ni mataroan oon te kaawa. 9 A aki beku n ana baonikarea Iehova are i Ierutarem ibongan taabo aika rietata,+ ma a kakana te bwerena ae aki karikaki i rarikia tariia. 10 E kamwaraea naba Tobeta+ are n aia Mwarua Natin Innom,*+ bwa e aonga n akea te aomata temanna ae kona ni kabueka natina te mwaane ke natina te aine n te ai nakoni Moreka.+ 11 Ao e aki kariaia aoti ake a katabui* uean Iuta nakon taai bwa a na rin n ana auti Iehova, n rinanon ana ruu* Natanmereka are te mataniwi, are e mena n te botikoo.* Ao e kabueki n te ai ana kaa ni buaka taai.+ 12 Ao e urui naba baonikarea te uea ake a katei uean Iuta i aon taubukin+ ana ruu Aati are mai eta, n ikotaki ma baonikarea ake e katei Manate ni katawanang ake uoua ake n ana auti Iehova.+ E ibeibei ni kamantintii ao e kamaenakoi bubuia i nanon te Mwarua ae Kiteron. 13 Ao e kamwaraei taabo aika rietata te uea ake i moan Ierutarem nako maiakin* te Maunga n Urubwai,* ake e katei Toromon are uean Iteraera ibukin Nei Atitoreta are atuaia I-Titon ae kamwara, ao ibukini Kemoti are atuaia I-Moaba ae kamwara, ao ibukini Mirekom+ are atuaia tibun Ammon+ ae riribaaki. 14 E kamaeinikuni boua aika tabu ao e korei kaai aika tabu*+ ni kabwakai ao e kaon aia tabo n riia aomata. 15 E urua naba te baonikarea are i Betaera, ao te tabo ae rietata are e karaoia Ieroboam are natin Nebata are e karekeia iai tibun Iteraera n te bure.+ Ngke e a tia n urua te baonikarea anne ma te tabo are rietata, ao e kabueka te tabo are rietata, ao e ikikia ni kamtea ni karokoa ae ai aroni bubun te tano, ao e kabueka te kai are tabu.*+

16 Ngke e rairaki Iotia ao e nori ruanimate i aon te maunga, ao e tua anaakin taian ri man ruanimate akekei ao e kabueki i aon te baonikarea ni kamwaraea iai, ni kaineti ma ana taeka Iehova are e taekinaki iroun ana aomata te Atua ae koaua, are e a kaman taekinna bwa a na riki baikai.+ 17 Ao e taku: “Tera atibun te ruanimate are I noria arei?” Ao a kangai mwaanen te kaawa nakoina: “Bon ruanimaten ana aomata te Atua ae koaua are e roko mai Iuta,+ are e a kaman taekini baika ko karaoi n ekaanako te baonikarea are i Betaera.” 18 Mangaia are e taku: “Katikua. Tai kariaia temanna bwa e na kuai riina.” Mangaia are a katikui riina n aki kuai, n ikotaki naba ma riin te burabeti are roko mai Tamaria.+

19 E kanakoi naba Iotia auti n taromauri ni kabane ake n taabo aika rietata, ake ni kaawan nako Tamaria,+ ake a katei uean Iteraera ni kauna iai te Atua, ao e karaoi naba nakoni baikai te aro are e karaoia i Betaera.+ 20 Mangaia are e kabaneia ibongan taabo aika rietata ake ikekei ni kareania i aoni baonikarea, ao e kabueki riia aomata i aoia.+ Imwin anne ao e a okira Ierutarem.

21 E a tua ngkai te uea nakoia aomata ni kabane ae kangai: “Karaoa te Toa ae te Riao+ nakon Iehova ae Atuami, n aron ae koreaki ni bokin te berita aei.”+ 22 Akea te Toa ae te Riao ae aron aei ae e a tia ni karaoaki mai mwin aia bong taani motikitaeka ake a momotiki taekaia tibun Iteraera, ke n aia bong ni kabane uean Iteraera ma uean Iuta.+ 23 Ma e karaoaki te Toa ae te Riao aei nakon Iehova i Ierutarem, n ana ka-18 n ririki n tautaeka te Uea are Iotia.

24 Ao Iotia e kanakoia naba taan rorokoia taimonio, taani kaiwani kanoan taai aika a na roko,+ bouannanti aika terebim,*+ bouannanti aika kamwara,* ao bwaai ni kabane aika koro n ribaaki ake a mena n te aba ae Iuta ao i Ierutarem, bwa e aonga ni kakororaoaki taekan te Tua+ ake a koreaki n te boki are e kunea Irekia are te ibonga n ana auti Iehova.+ 25 Akea te uea ae ai arona imwaina, ae e okira Iehova ma nanona ni kabane ao maiuna* ni kabane+ ao korakorana ni kabane, ni kaineti ma te tua ni kabane rinanoni Mote, ao akea naba ae ai arona ae e teirake imwina.

26 Ma e ngae n anne, e bon aki rairakinako Iehova man uraraken unna irouia kaain Iuta ibukini bwaai ni kabane aika kamatauninga ake e karaoi Manate ni kaunna iai.+ 27 E taku Iehova: “N na kamwaawaia naba kaain Iuta mai matau,+ n arou ngke I kamwaawaia tibun Iteraera.+ N na rawa nakon te kaawa aei are I rineia, ae Ierutarem, ao te auti are I kangai ngkoa ibukina, ‘E na teimatoa ni mena iai arau.’”+

28 Ni kaineti ngkanne ma nikiran rongorongon Iotia ao bwaai ni kabane ake e karaoi, tiaki a koreaki n te boki are rongorongon aia tai uean Iuta? 29 N ana bong teuaei ao e roko Barao Neko are uean Aikubita ni kawara uean Aturia i rarikin te Karaanga ae Iuberetiti, ao e otinako te Uea are Iotia bwa e na kaitaraa, ma ngke e noria Neko ao e a kamatea naba i Mekito.+ 30 Mangaia are a katokaa rabwatan teuaei ana toro n te kaa ni buaka mai Mekito, ao a uotia nako Ierutarem ni kaiia n ruanimatena. Ao kaain te aba a kaira Ieoaatia are natin Iotia ao a kabiria ao a kaueaa n onea mwin tamana.+

31 Bon 23 ana ririki Ieoaatia+ ngke e riki bwa te uea, ao e tautaeka i Ierutarem i nanon tenua namwakaina. Aran tinana Amutara+ are natin Ieremia are mai Ribena. 32 Ao e karaoa ae buakaka i matan Iehova, ni kaineti ma bwaai ni kabane ake a karaoi ana bakatibu.+ 33 Ao Barao Neko+ e kamatawarika teuaei i Ribera+ n te aba are Amata, bwa e na aki tautaeka i Ierutarem, ao imwina e karokoa te tuuaa i aon te aba ae 100 te tarena* n tirewa ao teuana te tarena ni koora.+ 34 Irarikin anne, ao Barao Neko e kaueaa natin Iotia are Eriakim n onea mwin Iotia are tamana, ao e bita aran teuaei nakon Ieoiakim, ma e kaira Ieoaatia nako Aikubita+ ike e a mate iai.+ 35 Ao e anga te tirewa ma te koora Ieoiakim nakoni Barao, ma e tua kabwakaan te taekiti man te aba bwa e aonga n angani Barao te tirewa are e tua. E rikoa te tirewa ma te koora n te mwaiti ae katauaki ibukia aomata n tatabemania nako ake n te aba, bwa e na angani Barao Neko.

36 Bon 25 ana ririki Ieoiakim+ ngke e riki bwa te uea, ao e tautaeka i Ierutarem i nanon 11 te ririki.+ Aran tinana Tebita are natini Betaia are mai Rumwa. 37 E teimatoa ni karaoa ae buakaka i matan Iehova,+ ni kaineti ma bwaai ni kabane ake a karaoi ana bakatibu.+

24 N ana bong Ieoiakim, ao e roko te Uea are Nebukaneta+ are ueani Baburon n ekianako, ao e riki Ieoiakim bwa ana toro i nanon tenua te ririki. Ma e a manga rawa nakoina ao ni karitei. 2 Ao Iehova e a kanakoia taani kuribwai aika I-Kareria,+ I-Turia, tibuni Moaba, ao tibun Ammon. E teimatoa ni kanakoia bwa a na ekiianako tibun Iuta ao ni kamaunaia, ni kaineti ma ana taeka Iehova+ are taekinna rinanoia ana toro ake burabeti. 3 E riki aei nakoia tibun Iuta ibukina bwa e bon tua Iehova, bwa e na kamwaawaia mai matana+ ibukini buure ni kabane ake e karaoi Manate,+ 4 ao ibukin naba raraaia aomata aika akea aia bure are e katutua,+ bwa e kaona Ierutarem n raraaia aomata aika akea aia bure, ao e aki kani kabwarai buure akanne Iehova.+

5 Ni kaineti ngkanne ma nikiran rongorongon Ieoiakim ma bwaai ni kabane ake e karaoi, tiaki a koreaki n te boki are rongorongon aia tai uean Iuta?+ 6 Ao e a kaiiaki Ieoiakim i rarikia ana bakatibu,+ ao e a riki natina are Ieoiakin bwa te uea n onea mwina.

7 Ao e aki roko n te manga otinako uean Aikubita mai abana, bwa e a tia ueani Baburon n anai bwaai ni kabane ake ana bwai uean Aikubita,+ ni moa mani Mwaruan Aikubita+ ni karokoa te Karaanga ae Iuberetiti.+

8 Bon 18 ana ririki Ieoiakin+ ngke e riki bwa te uea, ao e tautaeka i Ierutarem i nanon tenua namwakaina.+ Aran tinana Neutita are natin Erenatan are mai Ierutarem. 9 E teimatoa ni karaoa ae buakaka i matan Iehova, ni kaineti ma bwaai ni kabane ake e karaoi tamana. 10 N te tai anne ao a waerake n ekaanako Ierutarem ana toro te Uea are Nebukaneta are ueani Baburon, ao e a otabwaniniaki te kaawa.+ 11 Ao e roko te Uea are Nebukaneta are ueani Baburon n te kaawa, ngke a tabe ana toro n otabwaninia te kaawa.

12 Ao e otinako Ieoiakin are Uean Iuta nakon ueani Baburon,+ ngaia ma tinana, ana toro nako, ana aomata aika tooka,* ao ana mataniwi.+ Ao ueani Baburon e kairaanako teuaei bwa ana taenikai n ana kawanua n ririki n tautaeka ueani Baburon.+ 13 Ao e uotiinako mai ikekei baika kakawaki ni kabane ake n ana auti Iehova ma baika kakawaki ake n ana auti* te uea.+ E korokorei bwaai ni kabane aika koora ake e karaoi Toromon are uean Iteraera n ana tembora Iehova,+ n aron are e a kaman taekinna Iehova. 14 E kataenikaia Ierutarem ni kabutaa, ao e kairiia 10,000 bwa taenikai aika tooka* ni kabane,+ taani buaka aika korakora ni kabane, ma mwaane nako aika taani karaobwai aika mwaatai ma taani mwakuria te biti.*+ Akea aika a tiku ma tii te koraki ake taiani kabanea ni maiu ni kainnano n te aba.+ 15 Ngaia are e kairaanako Ieoiakin+ bwa te taenikai nako Baburon,+ ao e kaira naba tinan te uea, buun nako te uea, ana mataniwi nako, ao mwaane aika taiani kabanea ni kakannato n te aba, ao e kairiia bwa taenikai mai Ierutarem nako Baburon. 16 Ao ueani Baburon e kairiianako naba bwa taenikai nako Baburon taani buaka ni kabane aika 7,000 n ikotaki ma mwaane aika 1,000, aika taani karaobwai aika mwaatai ma taani mwakuria te biti,* boni mwaane ni kabane aika korakora naakai aika kataneiaaki ibukin te buaka. 17 Ao ueani Baburon e a kaueaa Matania are ai taman Ieoiakin,+ n onea mwina, ao e bita arana nakon Tetekia.+

18 Bon 21 ana ririki Tetekia ngke e riki bwa te uea, ao e tautaeka i Ierutarem i nanon 11 te ririki. Aran tinana Amutara+ are natin Ieremia are mai Ribena. 19 E teimatoa ni karaoa ae buakaka teuaei i matan Iehova, ni kaineti ma bwaai ni kabane ake e karaoi Ieoiakim.+ 20 A riki baikai i Ierutarem ao i Iuta ibukin unin Iehova, ni karokoa ae e bon tewenakoia mai matana.+ Ao e karitei Tetekia nakon ueani Baburon.+

25 N ana karuaiwa n ririki n tautaeka Tetekia, n te katebwina n namwakaina ae tebwina iai bongin te namwakaina, ao e a roko Nebukaneta+ are Ueani Baburon ma ana taanga ni buaka ni kabane n ekaanako Ierutarem.+ E kaembwa n ekianako ao e katea te oo ni buaka n otabwaninia ni kabutaa,+ 2 ao e a otabwaniniaki te kaawa ni karokoa ana ka-11 n ririki n tautaeka te Uea are Tetekia. 3 N te karuaiwa ni bong n te kaaua n namwakaina ao e a korakora te rongo+ n te kaawa, ao ai akea te amwarake ibukia kaain te aba.+ 4 E a uruakaki ni kabwangabwangaaki oon te kaawa+ ao a a bane tautia ni birinako ngke e a bong, n rinanoni mataroan te oo are i marenan oo ake uoua ake i rarikin ana onnaroka te uea, ngke a tabe I-Kareria n otabwaninia te kaawa. Ao e nako te uea ni kawain te Arabaa.*+ 5 Ma a kakioa te uea aia taanga ni buaka I-Kareria, ao a ooia n rereuan Ieriko ake a aoraoi, ao a bane n uamaenako ana taanga ni buaka mai rarikina. 6 Ao a taua te uea+ ao a kairia nakon ueani Baburon i Ribera, ao a bairea taekana. 7 Ao a kamateia natin Tetekia mwaane bon i matana, ao Nebukaneta e kamataki matan Tetekia ma ni kabaea teuaei ni bwaai ni kabaewae aika taiani buraati, ao e kairia nako Baburon.+

8 N te kanimaua n namwakaina ae itiua iai bongin te namwakaina, ae i nanon ana ka-19 n ririki n tautaeka te Uea are Nebukaneta are ueani Baburon, ao e a roko i Ierutarem Nebutaratan+ are mataniwia taan tantani, are ana toro ueani Baburon.+ 9 E kabueka ana auti Iehova+ ma ana auti* te uea,+ ao auti ni kabane ake i Ierutarem.+ E kabueki naba aia auti mwaane nako aika kakannato.+ 10 Ao a kabwakaaki oo ake a katobibia Ierutarem irouia aia taanga ni buaka I-Kareria ni kabane, ake a raona mataniwia taan tantani.+ 11 Ao Nebutaratan are mataniwia taan tantani e kairiia bwa taenikai nikiraia aomata ake a tiku n te kaawa, naake a birinako ma ni mena n ana itera ueani Baburon, ao nikiraia te botannaomata.+ 12 Ma mataniwia taan tantani e katikuia tabeman mai buakoia kaain te aba aika taiani kabanea ni maiu ni kainnano, bwa a na riki bwa taani mwakuria te nne ni kureebe ao taani mwakuri aika tautoronaki.+ 13 Ao I-Kareria a ibeibei boua ake buraati+ ake n ana auti Iehova, ao kaa n uabwai+ ma nnen te ran ae buburakaei are arana Taari ae te buraati+ ake n ana auti Iehova, ao a uotiinako buraati nako Baburon.+ 14 A anai naba nnen taiani mannang, tiaabora, taati ibukini kamatean taura, mwangko, ao bwaai ni mwakuri ni kabane aika taiani buraati ake a kabonganaaki n te mwakuri n te tembora. 15 Ao e anai baan ake nneni mwaakaron te ai mataniwia taan tantani ao boora aika koora+ ma tirewa ni koaua.+ 16 Ni kaineti ngkanne ma boua ake uaai, nnen te ran ae bubura are arana Taari, ao kaa n uabwai ake e karaoi Toromon ibukin ana auti Iehova, e a rangi n riao rawawatani buraatini baikai ni kabane.+ 17 Bon 18 te mwanokunibai* rietani kaka teaina te boua,+ ao te tiabita* are i aona bon te buraati. Bon tenua te mwanokunibai rietan te tiabita, ao te warawara ma bamkuranete* ake a katobibia te tiabita ni kabutaa bon taiani buraati ni kabane.+ Anne naba aron te boua are te kauaai ma te warawara are iai.

18 Ao mataniwia taan tantani e kairaanako naba Teraia+ are te mataniwi n ibonga,* Tebania+ are te kauoman n ibonga, ao taan teiakina te mataroa aika teniman.+ 19 Ao e kairaanako man te kaawa te mataniwi temanna are mena i aoia tautia, raoraon te uea ni kaan aika niman ake a kuneaki n te kaawa, n ikotaki naba ma ana tia koroboki te mataniwi n te taanga ni buaka, are e ikoikotiia kaain te aba, ao rorobuaka aika 60 mai buakoia kaain te aba aika mangori ake a kuneaki n te kaawa. 20 Ao Nebutaratan+ are mataniwia taan tantani e anaiia naakai ao e kairiia nakon ueani Baburon i Ribera.+ 21 Ao e oreiia naakai ueani Baburon ao e kamateia i Ribera n te aba ae Amata.+ Ngaia are a kairakinako tibun Iuta bwa taenikai mai abaia.+

22 Ao Nebukaneta are Ueani Baburon e rinea Ketaria+ are natin Aikam+ are natin Tiaban,+ bwa te mataniwi i aoia aomata ake e katikuia n te aba ae Iuta.+ 23 Ngke a ongo mataniwi ni kabane n te taanga ni buaka ma aia rorobuaka ae e a tia ueani Baburon n rinea Ketaria, ao a a roko naba irouni Ketaria i Mitiba. Naakai bon Itimaera are natin Netania, Ioaanan are natini Karea, Teraia are natin Tanumeta are te I-Netoba, ao Iaatania are natin te I-Maakata, ao raoia aia rorobuaka.+ 24 E berita Ketaria n te taetae n tuea nakoia ma aia rorobuaka ao e taku nakoia: “Tai maaka te riki bwa aia toro I-Kareria. Kam na maeka n te aba ao kam na toro iroun ueani Baburon, ao a na nakoraoi bwaai ni kabane ibukimi.”+

25 Ao n te kaitiua n namwakaina ao e a roko Itimaera+ are natin Netania are natin Eritiama are man te kanoa ake bwaanuea,* ao raona rorobuaka riki tabeman aika tengaun, ao a orea Ketaria, ao e a mate n ikotaki naba ma I-Iutaia ao I-Kareria ake raona i Mitiba.+ 26 Imwin anne ao a teirake aomata ni kabane, ni moa man ae e uarereke ni karokoa ae e a kara, n ikotaki naba ma mataniwi n te taanga ni buaka, ao a nako Aikubita+ bwa a maakuia I-Kareria.+

27 N ana ka-37 n ririki n taenikai Ieoiakin+ are Uean Iuta, n te ka-12 n namwakaina, ae 27 iai bongin te namwakaina, ao Ewiramerotaka are Ueani Baburon e a kainaomataa* Ieoiakin are Uean Iuta man te karabuuti, n te ririki are e a riki iai bwa te uea.+ 28 E tataetae ma te akoi nakon teuaei, ao e karietataa riki ana kaintokanuea nakon aia kaintokanuea ueea ake tabemwaang ake raona i Baburon. 29 Mangaia are e buutii kunnikaina ni kabureaki Ieoiakin, ao e amwamwarake i matana ni kabane ana bong ni maiu. 30 E rereke kanana mairoun te uea ni katoabong, ni kabane ana bong ni maiu.