TE MOAN UEA
1 Ao e a kara te Uea ae Tawita,+ ao e a bunginako ana ririki,* ao e ngae ngke a rarabunna n te burangketi, ma e bon aki kona naba n abue. 2 Mangaia are a taku ana toro nakoina: “Ke e kakaaeaki ibukin au toka ae te uea, te aine ae ataei ae tuai ni boo ma te mwaane, ao e na teiakina te uea ao e na riki bwa te tia tararuaia. E na wewene i anganibaim bwa e aonga n abue au toka ae te uea.” 3 A ukoukora te ataeinnaine ae baaraoi ni kabutaa aonon Iteraera, ao e a reke irouia Abitiaka+ ae te I-Tunem,+ ao a kairia n rin nakon te uea. 4 Moan te baaraoi te ataeinnaine aei, ao e a riki bwa te tia tararuaa te uea ao e teiakinna, ma e aki roko n te wene n taanga te uea ma neiei.
5 N te tai aei ao Atoniia+ are natin Akita e a karietataa i bon irouna, ao e taku: “N na riki bwa te uea!” Ao e karekei ana kaa ni buaka teuaei ma taan toka i aoia aoti ao mwaane aika 50 aika a na biribiri imwaina.+ 6 Ma e aki roko n te un nakoina* tamana ni kangai: “E aera ngkai ko karaoa aei?” E bon rangi ni botonimwaane naba teuaei, ao tinana e bungia teuaei imwin Abetarom. 7 Ao e mamaroro ma Ioaba are natin Teruia ao Abiata+ are te ibonga,* ao a buoka Atoniia ao a boutokaia.+ 8 Ma Tatoka+ are te ibonga, Benaia+ are natin Ieoiata, Natan+ are te burabeti, Timei,+ Reei, ao ana tia buaka Tawita aika korakora,+ a aki boutokaa Atoniia.
9 N tokina ao Atoniia e a kareania+ i rarikin te atibu ae Tooreta, tiibu, kaao, ao maan aika kamarikaaki, n uakaan ma Enrokera, ao e kaoia tarina ni kabane ake natin te uea aika mwaane, ao mwaane aika tibun Iuta ni kabane ake ana toro te uea. 10 Ma e aki kaoa Natan are te burabeti, Benaia ma taani buaka ake a korakora, ke Toromon are tarina. 11 E taku ngkanne Natan+ nakoni Batateba,+ are tinan Toromon:+ “Ko aki ongo ae e a riki Atoniia+ are natin Akita bwa te uea, ao e aki ataia ara toka ae Tawita? 12 Mangaia ae nakomai ngkai taiaoka, ao kariaia bwa N na tuangko, bwa ko aonga ni kamaiuko ao ni kamaiua natim are Toromon.+ 13 Ko na nako n rin nakon te Uea are Tawita ao kangai nakoina, ‘Tiaki boni ngkoe au toka ae te uea are e taetae n tuea ngkoa nakon am toro ni kangai: “E na riki natim ae Toromon bwa te uea n ruamwiu, ao boni ngaia ae e na tekateka i aon au kaintokanuea”?+ Mangaia ae e aera ngkai e a riki Atoniia bwa te uea?’ 14 N te tai are ko tabe n taetae iai ma te uea ikekei, ao I a rin naba n rimwim ni kaotii koauan am taeka.”
15 Mangaia are e a rin Batateba nakon te uea, i nanon ana ruu ni matu. Ao e a rangi ni kara te uea, ao Abitiaka+ are te I-Tunem e teiakina te uea. 16 Ao e katorobubua ni bobaraaki i aontano Batateba nakon te uea, ao e taku te uea: “Tera am bubutii?” 17 E kaeka neiei ni kangai: “Au toka, boni ngkoe are ko taetae n tuea ngkoa iroun Iehova ae Atuam nakon am toro ni kangai, ‘E na riki natim ae Toromon bwa te uea n ruamwiu, ao boni ngaia ae e na tekateka i aon au kaintokanuea.’+ 18 Ma noria! E a riki Atoniia bwa te uea, ao e aki ataia au toka ae te uea.+ 19 A mwaitikurikuri kaao mwaane, maan aika kamarikaaki, ao tiibu aika e kareani, ao e kaoia natin te uea aika mwaane ni kabane, ao Abiata are te ibonga, ao Ioaba are mataniwin te taanga ni buaka,+ ma e aki kaoa Toromon are am toro.+ 20 Ao ngkai au toka ae te uea, a mena mataia tibun Iteraera ni kabane i aom bwa ko na tuangia bwa antai ae e na ruamwin au toka ae te uea n tekateka i aon ana kaintokanuea. 21 Bwa ngkana ko aki, ao n te tai are e a wene iai ni motirawa au toka ae te uea i rarikia ana bakatibu, ao ti na iangoaki ngai ma natiu ae Toromon bwa taani kairiribai.”
22 Ao ngke e tabe n taetae nakon te uea, ao e a rin naba Natan are te burabeti.+ 23 E a tuangaki naba ngkekei te uea ni kangai: “Ao aei Natan are te burabeti!” Ao e rin i matan te uea ao e katorobubua ni bobaraaki i aontano nakon te uea. 24 Ao e taku Natan: “Au toka ae te uea, te koaua bwa ko kangai, ‘E na riki Atoniia bwa te uea n ruamwiu, ao boni ngaia ae e na tekateka i aon au kaintokanuea’?+ 25 Bwa n te bong aei ao a a mwaitikurikuri kaao mwaane, maan aika kamarikaaki, ao tiibu ake e nako ni kareani,+ ao e kaoia natin te uea aika mwaane ni kabane, ao mataniwi n te taanga ni buaka, ao Abiata are te ibonga.+ Ao ake a mena ikekei bwa a amwarake ao ni moi ma ngaia, ao a teimatoa ni kangai, ‘E na abwabwaki maiun te Uea ae Atoniia!’ 26 Ma e aki kaoai ngai ae am toro, ke Tatoka are te ibonga, ke Benaia+ are natin Ieoiata, ke Toromon are am toro. 27 Ko a tia ni bairea te baei au toka ae te uea, ao ko aki kaongoa am toro bwa antai ae riai n ruamwin au toka ae te uea n tekateka i aon ana kaintokanuea?”
28 Ao e kaeka ni kangai te Uea are Tawita: “Wetea Batateba nakoiu.” Ao e rinnako neiei ao e tei i matan te uea. 29 Ao e berita n te taetae n tuea te uea ni kangai: “Ngkai bon iai Iehova, are e kamaiuai* man taian rawawata ni kabane,+ 30 ao n aron are I taetae n tuea iai nakoim iroun Iehova ae Atuan Iteraera ni kangai, ‘E na riki natim are Toromon bwa te uea n ruamwiu, ao boni ngaia ae e na tekateka i aon au kaintokanuea n onea mwiu!’ ao bon anne te bwai ae N na karaoia n te bong aei.” 31 Ao e katorobubua ni bobaraaki i aontano Batateba nakon te uea ao e taku: “Ke e maiu n aki toki au toka ae te Uea ae Tawita!”
32 Ao e a taku naba te Uea are Tawita: “Wetea nakoiu Tatoka are te ibonga, Natan are te burabeti, ao Benaia+ are natin Ieoiata.”+ Mangaia are a a rin i matan te uea. 33 E taku te uea nakoia: “Kairiia ana toro ami toka, ao katokaa Toromon are natiu i aon au miure*+ ao kairia n ruo rikaaki nako Kion.+ 34 Ao Tatoka are te ibonga ao Natan are te burabeti a na kabiria+ ikekei bwa uean Iteraera, ao katanga te buu ao kangai, ‘E na abwabwaki maiun te Uea ae Toromon!’+ 35 Ao kam na iria n oki, ao e na rin ao n tekateka i aon au kaintokanuea ao e na uea n onea mwiu, ao N na mwiokoia bwa te tia kairiri i Iteraera ao i Iuta.” 36 E aki tabwara Benaia are natin Ieoiata ma e a taku naba nakon te uea: “Amen! Ke e kamatoaa aei Iehova ae Atuan au toka ae te uea. 37 N aron ae e a tia Iehova ni memena iroun au toka ae te uea, ao ke e memena naba iroun Toromon,+ ao ke E kakannatoa riki ana kaintokanuea nakon ana kaintokanuea au toka ae te Uea ae Tawita.”+
38 Ao a ruo rikaaki Tatoka are te ibonga, Natan are te burabeti, Benaia+ are natin Ieoiata, ao taiani Keritaite ma taiani Beretaite,+ ao a katokaa Toromon i aon ana miure te Uea are Tawita,+ ao a kairia nako Kion.+ 39 E a anaa ngkai te koro are nnen te bwaa+ Tatoka are te ibonga man te umwanrianna,+ ao e kabira iai Toromon.+ Ao a a katanga te buu, ao a a takarua aomata ni kabane ni kangai: “E na abwabwaki maiun te Uea ae Toromon!” 40 Imwin anne ao a a rimwina ni waerake aomata ni kabane, ni katangi taiani kaibwabwaa ma n rangi ni kimwareirei, n te aro are e a tabwena aontano ni karongoaaia.+
41 Ao e ongo Atoniia ma raona ni kabane ake e kaoia ngke a a tia n amwarake.+ Ao e taku Ioaba ngke e ongo naba ngkekei tangin te buu: “E aera ngkai e a rangi ni karongoa te kaawa ni kiriwe?” 42 Ngke e kume n taetae ao e a roko naba Ionatan+ are natin Abiata are te ibonga. E taku ngkanne Atoniia: “Riin bwa te mwaane ae raoiroi* ngkoe, ao ko bae n uota te rongorongo ae raoiroi.” 43 Ma e kaeka Ionatan nakon Atoniia ni kangai: “Tiaki ngaia anne! E a tia ara toka ae te Uea are Tawita ni kaueaa Toromon. 44 E a tia te uea ni kanakoa ma Tatoka are te ibonga, Natan are te burabeti, Benaia are natin Ieoiata, ao taiani Keritaite ma taiani Beretaite, ao a katokaa i aon ana miure te uea.+ 45 Ao Tatoka are te ibonga ma Natan are te burabeti a kabiria bwa te uea i Kion. Imwin anne ao a waerake mai ikekei ma te kimwareirei, ao e a rongoa te kaawa. Anne te karongoa are kam ongo. 46 Irarikin anne, e a tekateka Toromon i aon ana kaintokanuea te uea. 47 Ao teuana riki, a a tia ana toro te uea n rinnako ao ni kakabwaiaa ara toka ae te Uea ae Tawita ni kangai, ‘Ke e katamaroaa riki aran Toromon nakon aram Atuam, ao ke E kakannatoa riki ana kaintokanuea nakon am kaintokanuea!’ Ao e bobaraaki te uea i aoni nnena ni wene. 48 Ao e kangai naba te uea, ‘Ke e karaoiroaki Iehova ae Atuan Iteraera, are e a tia n rinea te aomata temanna n te bong aei bwa e na tekateka i aon au kaintokanuea, ao e a tia ni kariaia matau bwa a na nora aei!’”
49 Ao a a maakunrang te koraki nako ake a kaoaki iroun Atoniia, ao e a teirake temanna ma temanna ao n touaanako oini kawaina. 50 Ao Atoniia e maaka naba Toromon, ngaia are e teirake ao e nako n taui kooro ake n te baonikarea.+ 51 Ao e kaongoaki Toromon ae kangai: “E a taui kooro ake n te baonikarea Atoniia bwa e a maaka te Uea ae Toromon, ao e kangai, ‘Ke e taetae n tuea moa te Uea ae Toromon nakoiu bwa e na aki kamatea ana toro n te kabaang.’” 52 Ao e taku Toromon: “Ngkana e bwaina te aroaro ae riai, ao e na aki bwaka i aontano irannatuna teaina, ma ngkana e noraki te bae buakaka irouna,+ ao e na mate.” 53 Mangaia are e kanaanako te Uea are Toromon bwa e na kairaki man te baonikarea. Ao e rinnako ao e bobaraaki nakon te Uea are Toromon, ao imwina e taku Toromon nakoina: “Naako nakon am auti.”
2 Ngke e a uakaan te tai are e nangi mate iai Tawita, ao e a anga kaetieti aikai nakon natina are Toromon: 2 “I a kaani mate.* Mangaia ae ko na korakora+ ao ko na kammwaaneko.+ 3 Ko na teimatoa n ongeaba iroun Iehova ae Atuam, n nakonako ni kawaina nako ao ni kakairi n ana taeka, ana kaetieti, ana moti, ao ana kauring, ake a koreaki n te Tua Rinanoni Mote,+ ao a na nakoraoi* arom ni bwaai nako ake ko karaoi ao n taabo nako ake ko nako iai. 4 Ao e na kakororaoa ana berita Iehova are e karaoia ni kaineti ma ngai are kangai: ‘Ngkana a mutiakina aroia natim mwaane n nakonako ma te kakaonimaki i matau ma nanoia ni kabane ao korakoraia ni kabane,+ ao e na bon teimatoa n iai temanna mani kanoam* ae e na tekateka i aoni kaintokanuean Iteraera.’+
5 “Ko ataa raoi naba te bwai are e karaoia Ioaba are natin Teruia nakoiu, are te bwai are e karaoia nakoia mataniwi ake uoman n aia taanga ni buaka tibun Iteraera, ake Abenera+ are natin Nera ao Amataa+ are natin Ietere. E tiringia ni katutua te raraa+ n te tai are akea iai te buaka, ao e kaaki raraan te buaka i aon te kabaea n nuka are i bebeena ao i aoni kaau ake i waena. 6 Ko riai ni karaoa ae boraoi ma wanawanam, ao tai kariaia irana aika iaia bwa a na ruo rikaaki ma te rau nakon te Ruanimate.*+
7 “Ma ko riai ni kaotiota te tangira ae koaua* nakoia natini Baretirai+ are te I-Kireata, ao a riai ni mena i buakoia te koraki ake a amwamwarake n am taibora, bwa anne aroia ni buokai+ ngke I birinako ngkoa mairoun tarim are Abetarom.+
8 “E maeka naba i rarikim Timei are natini Keera are tibuni Beniamin mai Baurim. Boni ngaia are e taetae ni karekea kaiu n te karekekai ae kakaiaki+ n te bong are I mwananga iai nako Maanaim,+ ma ngke e roko ni kawarai n te Ioretan, ao I taetae n tuea nakoina iroun Iehova ni kangai: ‘N na aki kamateko n te kabaang.’+ 9 Ao tai katikua bwa e na aki katuuaaeaki,+ bwa te aomata ae wanawana ngkoe ao ko bon ataa te bwai ae ko riai ni karaoia nakoina. Ko riai ni karuoi rikaaki irana aika iaia nakon te Ruanimate* ma te raraa.”+
10 Ao e a wene ni motirawa Tawita i rarikia ana bakatibu, ao e kaiiaki n Ana Kaawa Tawita.+ 11 Abwakin ana tai* n tautaeka Tawita i aon Iteraera bon 40 te ririki. E tautaeka i Eberon+ i nanon 7 te ririki, ao e tautaeka i Ierutarem i nanon 33 te ririki.+
12 Ao e a tekateka Toromon i aon ana kaintokanuea Tawita are tamana, ao e a ririkirake n rangi ni korakora ana tautaeka n uea.+
13 Imwina riki ao e a roko Atoniia are natin Akita irouni Batateba are tinan Toromon. Ao e titiraki neiei ni kangai: “E raoi rokom aei?” E kaeka ni kangai teuaei: “E raoi.” 14 E taku ngkanne teuaei: “Iai te bwai ae N na tuangko.” Mangaia are e kangai neiei: “Taetae.” 15 E reitia ni kangai teuaei: “Ko bon ataia raoi bwa e na bon riki ngkoa bwa au bwai te nakoa n uea, ao a kantaningaai* tibun Iteraera ni kabane bwa N na riki bwa te uea,+ ma e nako mairou te nakoa n uea ao e a riki bwa ana bwai tariu, bwa boni mairoun Iehova ae ngaia ae e a riki iai bwa ana bwai.+ 16 Ma ngkai bon iai te bwai ae tii teuana ae N na butiiko iai. Tai rawa nakon au bubutii.” Mangaia are e taku neiei nakon teuaei: “Taetae.” 17 E taku ngkanne teuaei: “Taiaoka ma butiia Toromon are te uea bwa e na anganai Abitiaka+ are te I-Tunem bwa buu. I ataia bwa e bon aki kona n rawa nakoim.” 18 Ao e taku Batateba: “E raoiroi! N na taetae nakon te uea ibukim.”
19 Mangaia are e a rin Batateba nakon te Uea are Toromon bwa e na taetae nakoina ibukin Atoniia. E aki tabwara te uea ma e a teirake naba bwa e na butimwaea neiei ao e bobaraaki nakon neiei. Ao e tekateka i aon ana kaintokanuea ao e tua katauraoan ana kaintokanuea tinan te uea bwa e aonga n tekateka neiei i angaataina. 20 E taku ngkanne neiei: “Iai te bwai teuana ae uarereke ae N na butiiko iai. Tai rawa nakoiu.” Mangaia are e taku te uea nakoina: “Tinau, butiiai bwa N na aki rawa nakoim.” 21 E taku neiei: “Kariaia bwa ko na anga Abitiaka are te I-Tunem nakon tarim are Atoniia bwa buuna.” 22 Ao e kaekaa tinana te Uea are Toromon ni kangai: “E aera ngkai ko a bubutii Abitiaka are te I-Tunem ibukin Atoniia? Ai aron naba ae ko bubutii te nakoa n uea ibukin teuaei,+ bwa are tariu ae ikawai riki nakoiu,+ ao e boutokaaki iroun Abiata are te ibonga* ma Ioaba+ are natin Teruia.”+
23 Mangaia are e taetae n tuea te Uea are Toromon iroun Iehova ni kangai: “Ke e katuuaaeai te Atua ao ni kamwaitia riki ngkana e aki bua maiun Atoniia, ibukina bwa e butiiai te baei. 24 Ao ngkai bon iai Iehova, are e a tia ni kamatoaai raoi+ ao ni katekatekaai i aon ana kaintokanuea Tawita are tamau, ao e a tia ni katea batau,*+ n aron are e beritanna, ao e na boni kamateaki Atoniia+ n te bong aei.” 25 E aki tabwara te Uea are Toromon ma e a kanakoa naba Benaia+ are natin Ieoiata, are ngaia are e nako ni kamatea Atoniia* ao e mate.
26 Ao e taku te uea nakon Abiata+ are te ibonga: “Ko na nako nakon am tawaana ake i Anatota!+ Ko bon riai ni mate, ma N na aki kamateko n te bong aei ibukina bwa ko uouota ngkoa ana Ati te Uea ae Moan te Rietata ae Iehova i matan Tawita are tamau,+ ao ibukina bwa ko uaia ni karawawataaki ma tamau n ana kangaanga ni kabane.”+ 27 Ao Toromon e kakionakoa Abiata man ana beku n ibonga ibukin Iehova, bwa e na kakororaoa ana taeka Iehova n ekaanako batan Eeri+ i Tiro.+
28 Ngke e a roko te rongorongo iroun Ioaba, bwa Ioaba e boutokaa Atoniia+ e ngae ngke e aki boutokaa ngkoa Abetarom,+ ao e birinako Ioaba nakon ana umwanrianna Iehova+ ao e taui kooro ake n te baonikarea. 29 Ao e kaongoaki ae kangai te Uea are Toromon: “E birinako Ioaba nakon ana umwanrianna Iehova, ao e mena ikekei i rarikin te baonikarea.” Ao Toromon e kanakoa Benaia are natin Ieoiata ao e kangai: “Naako kamatea!” 30 Mangaia are e a roko Benaia n ana umwanrianna Iehova ao e taku nakoina: “E kangai te uea, ‘Otinako!’” Ma e taku: “Tiaki ngaia anne! N na mate ikai.” Ao Benaia e uota rikaaki te taeka arei nakon te uea ni kangai: “Aio ana taeka Ioaba, ao aio ana kaeka nakoiu.” 31 Ao e taku te uea nakoina: “Karaoa ane e taku, kamatea ao kaiia ao kanakoa mairou ao mani batan tamau te raraa are e katutua Ioaba n akea bukina ae riai.+ 32 E na kaoka raraana Iehova nako aon atuna, bwa e oreiia ni kamateia n te kabaang mwaane aika uoman aika raoiroi ma n tamaroa riki nakoina, n akea ataakina iroun tamau are Tawita, aika Abenera+ are natin Nera, are te mataniwi n aia taanga ni buaka tibun Iteraera,+ ao Amataa+ are natin Ietere, are te mataniwi n aia taanga ni buaka tibun Iuta.+ 33 A na oki raraaia nako aon atun Ioaba ao nako aon atuia kanoana n aki toki.+ Ma e bia mena te raoi mairoun Iehova n aki toki i aon Tawita, i aoia kanoana, batana, ao ana kaintokanuea.” 34 Ao e waerake Benaia are natin Ieoiata ao e oreia ao e kamatea, ao e kaiiaki n oin ana auti n te rereua. 35 Ao te uea e mwiokoa Benaia+ are natin Ieoiata i aon te taanga ni buaka n onea mwin teuarei, ao te uea e mwiokoa Tatoka+ are te ibonga bwa oneani mwin Abiata.
36 Ao te uea e wetea Timei+ ao e taku nakoina: “Katea am auti i Ierutarem ao maeka ikekei, ao tai otiotinako mai ikekei nakon te tabo riki teuana. 37 N te bong are ko otinako iai ao n rinanon te Mwarua ae Kiteron+ nakon iterana are teuana, ao ko na ataia bwa ko na boni mate. E na mena raraam i aon oin atum.” 38 Ao e kaeka ni kangai Timei nakon te uea: “E riai te bwai ane ko taekinna. E na karaoa am toro te bwai ane e taku au toka ae te uea.” Mangaia are e tiku Timei i Ierutarem i nanoni boong aika bati.
39 Ma ni banen ririki aika tenua ao a a birinako uoman mai buakoia ana toro Timei nakon Akiti+ are natini Maaka, are ueani Kate. Ao ngke e kaongoaki Timei ae kangai: “Noria! A mena am toro i Kate,” 40 ao e aki tabwara Timei ma e a katokaa naba te kaintoka i aon ana taongki, ao e nako ni kawara Akiti i Kate bwa e na kakaaeia ana toro. Ngke e a oki Timei mai Kate ma ana toro, 41 ao e kaongoaki Toromon ae kangai: “E a tia n otinako Timei mai Ierutarem nako Kate ao e a oki.” 42 Ao te uea e wetea Timei ao e taku nakoina: “Tiaki I kaakiko ngkoa i aan te taetae n tuea iroun Iehova ao n anga te kauring nakoim ni kangai: “N te bong are ko otinako iai mai ikai nakon te tabo riki teuana, ao ko na ataia bwa ko na boni mate’? Ao tiaki ko kangai nakoiu, ‘E riai te bwai ane ko taekinna, N na ongeaba’?+ 43 E aera ngkanne ngkai ko aki kawakina te taetae n tuea i matan Iehova ma te tua are I kateia nakoim?” 44 E taku ngkanne te uea nakon Timei: “Ko ataa raoi te mwakuri ae buakaka ni kabane are ko karaoia nakon Tawita are tamau,+ ao ane e na kaoka te buakaka anne Iehova nako aon atum.+ 45 Ma e na kakabwaiaaki te Uea ae Toromon,+ ao e na kamatoaaki raoi ana kaintokanuea Tawita i matan Iehova n aki toki.” 46 Ao e tua te uea nakoni Benaia are natin Ieoiata, ao e otinako ni kamatea ao e mate.+
Mangaia are e a kamatoaaki raoi te tautaeka n uea i nanoni bain Toromon.+
3 Ao e a imaremare Toromon ma Barao are uean Aikubita. E mare ma* natini+ Barao ao e kaira neiei nakon Ana Kaawa Tawita+ ni karokoa ae e tia ni katea ana auti,+ ma ana auti Iehova,+ ao te oo are katobibia Ierutarem.+ 2 Ma a teimatoa aomata n angakarea n taabo aika rietata,+ ibukina bwa e tuai mani kateaki te auti ibukin aran Iehova ni karokoa te tai anne.+ 3 E teimatoa Toromon n tangira Iehova n arona ni kakairi n ana tua Tawita are tamana, ma e angakarea ao ni kabueki karea ni kabubui n taabo aika rietata.+
4 E nako te uea nako Kibeon bwa e na angakarea ikekei, bwa arei te tabo ae rietata ae te kabanea ni kakawaki.*+ E anga taiani karea ni kabuekaki Toromon aika 1,000 i aon te baonikarea arei.+ 5 Ao ngke e a bong ao e kaoti Iehova nakon Toromon i Kibeon n te mii ao e taku te Atua: “Butiiai te bwai ae ko tangiria bwa N na anganiko.”+ 6 Ao e taku Toromon: “Ko a tia ni kaotiota te tangira ae koaua* ae korakora nakon am toro are Tawita are tamau, ngke e nakonako i matam ma te kakaonimaki ao te raoiroi ao te nano ae eti. Ao ko teimatoa ni kaotiota nakoina te aeka n tangira ae korakora aei ni karokoa te bong aei, n arom n anganna natina ae e na tekateka i aon ana kaintokanuea.+ 7 Ao ngkai Iehova ae Atuau, ko a tia ni kaueaa am toro n onea mwin Tawita are tamau, e ngae ngke I uarereke,* ao I ronnano.*+ 8 E mena am toro i buakoia am aomata ake ko rineiia,+ ae te natannaomata ae rangi ni bati ae aki kona n ataaki mwaitiia ke ni warekaki. 9 Mangaia ae angan am toro te nano n ongeaba bwa e na motiki taekaia am aomata,+ ao e na ataa te kaokoro i marenan ae raoiroi ma ae buakaka,+ bwa antai ae kona ni motiki taekaia am aomata aika rangi ni bati* aikai?”
10 Ao e kakukurei iroun Iehova te bwai ae e bubutii Toromon aei.+ 11 E taku ngkanne te Atua nakoina: “Ibukina bwa ko bubutii te baei, ao ko aki bubutii ibukin abwabwakini maium* ke te kaubwai ke mateia akana kairiribai nakoim, ma ko bubutii te ataibwai ibukin rinanoan taian tangitang,+ 12 ao N na karaoa ae ko bubutii iai.+ N na anganiko te nano ae wanawana ma n ataibwai,+ bwa e aonga n akea temanna ae ai arom imwaim, ao akea ae e na manga riki n ai arom.+ 13 Irarikin anne, N na anganiko naba te bwai are ko aki bubutii,+ ae te kaubwai ma te karineaki,+ bwa e aonga n aki reke te uea temanna ae ai arom, n am tai ni maiu.*+ 14 Ao ngkana ko nakonako ni kawaiu nako n arom ni kawakin au kaetieti ma au tua nako, n aron are e nakonako iai Tawita are tamam,+ ao N na anganiko naba te maiu ae abwabwaki.”*+
15 Ngke e uti Toromon, ao e a ataia ae te mii. Ao e nako Ierutarem ao e tei i matan ana ati ni berita Iehova ao e anga taiani karea ni kabuekaki ma taiani karea n raoi,*+ ao e karaoa te baka n amwarake ibukia ana toro ni kabane.
16 N te tai anne ao a rin nakon te uea aine aika kakabooaki aika uoman ao a tei i matana. 17 E taku te aine are te moan: “Taiaoka au toka, I maeka ma te aine aei n te auti ae tii teuana, ao I bung ngke e boni mena naba neiei n te auti. 18 Tenibong imwini bungiu ao e a manga bung neiei. Ti kaai n ikotaki ao akea riki temanna kaain te auti bwa bon tii ngaira uoman. 19 Ngke e a tairiki ao e a mate natin neiei bwa e taotaonna. 20 Mangaia are e teirake n te nukanibong ao e anaa natiu mai rarikiu ngke e bon tabe ni matu am toro te aine ao e kawenea i anganibaina,* ao e kawenea natina are mate i anganibaiu. 21 Ngke I a uti n te ingabong bwa N na kammammaa natiu, ao I a noria bwa e a mate. Ngaia are I a karaua n taraia n te ingabong anne ao I a noria bwa bon tiaki natiu are I bungia.” 22 Ma e taku te aine are temanna: “Tiaki ngaia anne, ngai natiu are maiu ao ngkoe natim are mate!” Ma e taku te aine are te moan: “Tiaki ngaia anne, ngkoe natim are mate ao ngai natiu are maiu.” Anne aroia ni kauntaeka i matan te uea.
23 N tokina ao e a taku te uea: “E kangai neie temanna, ‘Ngai natiu are maiu ao ngkoe natim are mate!’ ao neiene temanna e kangai, ‘Tiaki ngaia anne, ngkoe natim are mate ao ngai natiu are maiu!’” 24 E taku te uea: “Uotaamai te kabaang.” Mangaia are a uota te kabaang nakon te uea. 25 E taku ngkanne te uea: “Korea te teei ane maiu anne nakon uamwakoro, ao aanga ane te iterana nakon neiene temanna ao ane te iterana nakon are temanna.” 26 E aki tabwara te aine are bon natina are maiu ma e a bubutiia naba te uea, bwa e a roko irouna nanoangaan natina. E taku: “Taiaoka au toka! Ko riai n angan neiei te teei ane maiu anne! Tai kamatea!” Ma e taku neiere temanna: “E na aki riki bwa natiu ke natim! Ke a koreia nakon uamwakoro!” 27 Ao e kaeka te uea ni kangai: “Aanga te teei ane maiu anne nakon te aine are te moan! Tai kamatea bwa bon tinana neiei.”
28 Mangaia are a a bane n ongo tibun Iteraera taekan te motikitaeka are e karaoia te uea, ao a mimi* iroun te uea,+ bwa a noria bwa iai irouna wanawanan te Atua ni karaoa iai te kaetitaeka ae riai.+
4 E tautaeka te Uea ae Toromon i aon Iteraera ni kabutaa.+ 2 Ao aikai ana mataniwi aika rietata:* te ibonga* bon Ataria are natin Tatoka,+ 3 taani koroboki+ bon Erioreba ma Aiia ake natin Titiia, te tia korei mwin rongorongo bon Ieotiabata+ are natin Airuta, 4 te mataniwi i aon te taanga ni buaka boni Benaia+ are natin Ieoiata, ao ibonga bon Tatoka ma Abiata,+ 5 ao e mena i aoia mataniwi Ataria are natin Natan,+ ao Tabuta are natin Natan bon te ibonga ao raoraon te uea,+ 6 ao e mataniwi Aatitari n te baareti, ao e mena Atoniram+ are natin Abeta i aoia te koraki ake e tua te uea bwa a na mwakuri ibukina.+
7 Ao iai ana mataniwi Toromon aika 12 aika mataniwi i aoia tibun Iteraera ni kabane ake a kakarekea kanan te uea ma kaaini batana. Tabeia naakai n tatabemania nako bwa a na kakarekea te amwarake ibukin teuana te namwakaina n te ririki.+ 8 Ao aikai araia mataniwi aikai: Natin Uura n aonon Eberaim ae maungaunga, 9 natin Tikire are e mataniwi i Makati ao i Tiaarebim+ ao i Betatemeti ao i Eronebetaanan, 10 natin Eteta i Arutoba (e reke irouna Tokoa ao te aba ae Ebee ni kabutaa), 11 natin Abinataba n rabeen nako Toora (e riki Nei Tabaata are natin Toromon bwa buuna), 12 Baana are natin Airuta i Taanaka, i Mekito,+ ao i Betatean ni kabutaa+ are i rarikin Tareetan i aan Ietireera, mai Betatean nako Aberameorata ni karokoa aonon Iokomeam,+ 13 natini Kebera i Ramotakireata+ (a reke irouna ana kaawa Iaira+ are natini Manate aika taian umwanrianna i Kireata,+ e reke naba irouna aonon Arekoba+ are i Batian:+ 60 kaawa aika bubura ma ooia ao kaini kamatoaaia aika taiani buraati), 14 Ainataba are natin Ito i Maanaim,+ 15 Aimaati i abaia tibun Nabetari (e anaa Nei Batemata are natin naba Toromon bwa buuna), 16 Baana are natin Utiai i abaia tibun Atera ao i Bearota, 17 Ieotiabata are natini Barua i abaia tibun Itakara, 18 Timei+ are natin Eraa i abani Beniamin,+ 19 Kebera are natin Uri n te aba ae Kireata,+ ao n aban Taion+ are aia uea taian Amoraite, ao n aban Oka+ are ueani Batian. Ao iai naba te mataniwi temanna ae mwiokoaki i aoia mataniwi nako ake n te aba.
20 A rangi ni bati tibun Iuta ao tibun Iteraera n ai aron tanoni biken taari,+ ao a amwarake ao a moi ma ni kimwareirei.+
21 E tautaeka Toromon i aon aaba ni kabane ake man te Karaanga*+ nako abaia I-Biritia ao ni karokoa tian Aikubita. A uota te angabwai ao a toro iroun Toromon ni kabane ana bong ni maiu.+
22 Kanan Toromon ma kaain ana baareti ni katoabong bon te burawa ae mte ae 30 te bwai ni baire ae te kore* ao te burawa ae 60 te bwai ni baire ae te kore, 23 kaao aika kamarikaaki aika 10, kaao ake man te tawaana aika 20, ao tiibu aika 100, i rarikia taian ria tabeman, katere, robaki, ao ai mannikiba aika kamarikaaki. 24 Bwa e taui taekani bwaai nako n iteran te Karaanga*+ ae mai ikai, mai Tibitiaa nako Kaata,+ n ikotaki ma ueea ni kabane n iteran te Karaanga ae mai ikai, ao e kimwareirei n te rau n aono nako, ake i rarikina ni kabutaa.+ 25 A maeka ma te mweraoi tibun Iuta ma tibun Iteraera, temanna ma temanna i aan arokana ae te kureebe ao i aan arokana ae te biiku, mai Tan nako Beerateba, ni kabane ana bong Toromon.
26 Ao iai n ana tabo ni man Toromon 4,000* nneia aoti ibukin ana kaa ni buaka ao aoti* aika 12,000.+
27 A kakarekea mataniwi aikai kanan te Uea are Toromon ma te koraki nako ake a amwamwarake n ana taibora te Uea are Toromon. Bon te tabeakina anne tabena n ana namwakaina, ngaiia n tatabemania nako, ao a taraia bwa akea te bwai ae e na tare.+ 28 A uota naba te baare ao te uteute ae mwau nakon te tabo are e kainnanoaki iai ibukia aoti ao ibukia aoti aika birimwaaka, ngaiia n tatabemania nako ni kaineti ma tabeia.
29 Ao te Atua e angan Toromon te wanawana ma te ataibwai ae rangi ni korakora, ao te nano* ae bati iai te ataibwai n ai aron tanon aon te bike.+ 30 E rianako riki wanawanan Toromon nakoni wanawanaia kaaini Mainiku ni kabane ao wanawanaia I-Aikubita.+ 31 E wanawana riki nakoia mwaane nako, e wanawana riki nakon Etan+ are tibun Teera, ao Eman,+ Karekora,+ ao Taara, ake natini Maora aika mwaane, ao e a butanako kakannatona nakoia natannaomata ni kabane ake i rarikia.+ 32 E otei* taeka n rabakau aika 3,000+ ao mwaitini kunana+ 1,005. 33 E kona n taetae i aon taekan taian aroka, ni moa man te tiira are i Rebanon ni karokoa te utoba*+ ae riki i aon te oo, e kona n taetae i aon taekaia maan,+ mannikiba,*+ baika kawakawa,*+ ao ai iika. 34 A roroko aomata mai buakoia natannaomata nako bwa a na ongora ni wanawanan Toromon, n ikotaki ma ueea ake man te aonnaba ni kabutaa ake a ongo taekan rabakauna.+
5 Ngke e ongo Iram are uean Turo+ bwa e a tia ni kabiraki Toromon bwa te uea n onea mwin tamana, ao e a kanakoia ana toro nakon Toromon, bwa Iram bon raoraon Tawita n taai nako.*+ 2 Ao e kanakotaeka Toromon nakon Iram+ ni kangai: 3 “Ko ataia raoi bwa e aki kona Tawita are tamau ni katea te auti ibukin aran Iehova ae Atuana, ibukini buakanakina man itera nako, ni karokoa ae e a kaakiia Iehova akana kairiribai nakoina i aani waena.+ 4 Ma e a tia ngkai Iehova ae Atuau n anganai te motirawa mairouia aiau ni kabane aika i rarikiu.+ Bon akea temanna ae kaitaraai ao bon akea te bwai ae buakaka ae riki.+ 5 Mangaia ae I kani katea te auti ibukin aran Iehova ae Atuau, n aron are e beritanna Iehova nakon Tawita are tamau ni kangai: ‘Natim are N na katokaa i aon am kaintokanuea n onea mwim, boni ngaia ae e na katea te auti ibukin arau.’+ 6 Mangaia ae ko na tua nakoia am aomata bwa a na korei kaai aika tiira i Rebanon+ ibukiu. A na mwakuri au toro ma am toro, ao N na kabwakai booia am toro ni kaineti ma te mwaiti are ko baireia, bwa ko bon ataia bwa akea temanna i buakora ae ataa aroni korean taian aroka n aroia I-Titon.”+
7 Ngke e ongo Iram ana taeka Toromon, ao e rangi ni kimwareirei ao e taku: “E bia karaoiroaki Iehova n te bong aei, bwa e a tia n angan Tawita natina ae wanawana i aoia aomata aika rangi ni mwaiti aikai!”+ 8 Mangaia are e kanakotaeka Iram nakon Toromon ni kangai: “I a tia n ongo te rongorongo are ko kanakoa nakoiu. N na karaoi bwaai ni kabane ake ko tangiri ni katauraoani kaai aika tiira ao aika mwaiango.+ 9 A na uotii n ruo rikaaki au toro mai Rebanon nako taari, ao N na karaoi n ebaebani bwa a na ritaari nakon te tabo are ko tuangai. N na tua kamaenakoaia ikekei ao ko a kona n uotiinako. Ma ko na karekea te amwarake ae I butiiko ibukia kaaini batau, bwa booni mwin anne.”+
10 Mangaia are e karekei Iram kaai ni kabane aika tiira ao aika mwaiango ake e tangiri Toromon. 11 Ao Toromon e angan Iram te uita ae 20,000 te bwai ni baire ae te kore* bwa kanaia kaaini batana, ao te oera man te oriwa ae ikaki ae rangi n raoiroi ae 20 te bwai ni baire ae te kore. Anne ae e anganga Toromon nakon Iram n te ririki teuana ma teuana.+ 12 Ao Iehova e anga te wanawana nakon Toromon, n aron are E beritanna nakoina.+ Ao e mena te raoi i marenan Iram ma Toromon, ao a karaoa te boraraoi* naaka uoman aikai.
13 E tua te Uea are Toromon bwa a na mwakuri ibukina mwaane mai buakoia tibun Iteraera ni kabane. Bon 30,000 mwaane aika mwakuri.+ 14 Ao e kanakoia kaka 10,000 nako Rebanon bwa a na uatei ni katoa namwakaina. A kabanea teuana namwakaina i Rebanon ao uoua namwakaina ni mwengaia, ao e mena Atoniram+ i aoia te koraki ake e tua te uea bwa a na mwakuri ibukina. 15 Ao iai 70,000 ana toro* Toromon aika bekutata ao 80,000 ana tia koro atibu+ n taiani maunga,+ 16 n ikotaki ma ana mataniwi Toromon aika 3,300+ ake a kaira aia mwakuri taani mwakuri. 17 A ekei atibu aika bubura n aron are e tua te uea, aika atibu aika rangi ni bobuaka+ bwa a na kawenea aan+ te auti n atibu aika ekeaki.+ 18 Mangaia are a karaoa te korokoro ana tia kateitei Toromon ma ana tia kateitei Iram, ao I-Kebara+ a koro atibu ao a katauraoi kaai ma atibu ibukini katean te auti.
6 N te ka-480 n ririki imwin otinakoia tibun Iteraera man te aba are Aikubita,+ n te kaaua n ririki imwin rikin Toromon bwa uean Iteraera, n te namwakaina ae Tibi*+ (ae taekan te kauoua n namwakaina), ao e a moana katean ana auti Iehova.*+ 2 Te auti are e kateia te Uea ae Toromon ibukin Iehova bon 60 te mwanokunibai* abwakina, 20 te mwanokunibai raababana, ao 30 te mwanokunibai rietana.+ 3 Te kaman*+ are i moan te tembora* bon 20 te mwanokunibai abwakina,* ae boraoi ma raababan te auti.* Ao raababana bon tebwina te mwanokunibai ni moa mai moan te auti.
4 E karaoi kamaaman te auti aika wariki.+ 5 Irarikin anne, e katea te kateitei mai rarikina ae nim ma oon te auti ao e katobibia oon te auti, oon nako te tembora* ao te Ruu ae Moan te Tabu,*+ ao e karaoi ruun rarikina ni kabutaa.+ 6 Raababani bwian ruun rarikina are te kabanea mai nano bon nimaua te mwanokunibai, raababani bwiana are mai nuka bon onoua te mwanokunibai, ao raababani bwiana are mai eta bon itiua te mwanokunibai, bwa e karaoi nangoa ni katobibia te auti, bwa e aonga n akea te bwai teuana ae nim ma oon te auti.+
7 E kateaki te auti anne n atibu aika ekeaki ake a a kamani katauraoaki,+ bwa e aonga n aki ongo te aba rebwetatan taian aama ke tanai ke bwaai ni mwakuri riki tabeua aika biiti n te auti, ngke e kateaki. 8 Ao e mena mai maiakin* te auti mataroan te ruu are te kabanea mai nano,+ ao te kaintamwarake ae katobibi e waerake nakon te bwia are mai nuka, ao man te bwia are mai nuka ni waerake nakon te bwia are mai eta. 9 E waakinaanako katean te auti ao e katiaa.+ E kanimwi tatangan taubukin te auti ni kaai aika tiira, ao e rabuna naba te taubuki ni kairababa aika tiira.+ 10 E katei ruun rarikin te auti ni kabutaa+ aika kaka nimaua te mwanokunibai rietaia, ao a tomaaki ma te auti ni kaai aika tiira.
11 N te tai anne ao e roko ana taeka Iehova iroun Toromon ae kangai: 12 “Ni kaineti ma te auti ae ko kateia aei, ao ngkana ko kakairi n au kaetieti ma ni kakororaoi au moti ao ni kawakin au tua ni kabane n arom ni kakairi iai,+ ao N na kakororaoa naba au berita ma ngkoe are I karaoia ma Tawita are tamam,+ 13 ao N na maeka i buakoia tibun Iteraera,+ ao N na bon aki kitania au aomata aika tibun Iteraera.”+
14 E waakinaanako katean te auti Toromon ao e katiaa. 15 E karaoi oon te auti mai nanona ni kairababa aika tiira. E kanimwi kairababa aika kaai n taian oo mai nanona ni moa mai aontano n te auti ni karokoa okan nako taubukina, ao e kanimwi kairababa aika kaai aika mwaiango n rabuna iai aontano are i nanon te auti.+ 16 Ao e katea te kateitei ae 20 te mwanokunibai, mai bukin te auti, ni kairababa aika tiira, ni moa mai aontano ni karokoa taian oka, ao e katea i nanona* te ruu are mai nanona riki ae te Ruu+ ae Moan te Tabu.+ 17 Ao te tembora*+ are bon iteran naba te auti anne mai moana, bon 40 te mwanokunibai. 18 Ao e kaaraki ni kataneaki aon te kai ae te tiira are i nanon te auti n taamnein taian uaanikai aika bangke+ ma uee aika raure.+ Bon te kai ae te tiira ni kabane ao akea te atibu ae noraki.
19 Ao e katauraoa te Ruu ae Moan te Tabu+ i nanon te auti bwa e na kaaki iai ana ati ni berita Iehova.+ 20 Bon 20 te mwanokunibai abwakin te Ruu ae Moan te Tabu, 20 te mwanokunibai raababana, ao 20 te mwanokunibai rietana.+ Ao e kanimwa te koora ni koaua n rabunna iai, ao e kanimwa te kai ae te tiira n rabuna iai te baonikarea.+ 21 Ao e kanimwa te koora ni koaua+ Toromon n rabuna iai nanon te auti, ao e katikii taurekereke aika koora i moan te Ruu ae Moan te Tabu,+ are kanimwaki iai te koora n rabunaki iai. 22 E kanimwa te koora n rabuna iai te auti ni kabutaa, ni karokoa ae e a buta te auti. E kanimwa te koora n rabuna naba te baonikarea ni kabutaa,+ are mena i rarikin te Ruu ae Moan te Tabu.
23 E karaoiia kerubim* aika uoman+ i nanon te Ruu ae Moan te Tabu man te kai ae te bwaain,* ae kaka tebwina te mwanokunibai rietaia.+ 24 Bon nimaua te mwanokunibai bain te kerubim ni kiba are teaina, ao baina ni kiba are teaina bon nimaua te mwanokunibai. Mai taboni baina ni kiba are teaina nakon taboni baina ni kiba are teaina bon tebwina te mwanokunibai. 25 Bon tebwina naba te mwanokunibai bain te kerubim ni kiba are te kauoman. Titeboo abwakin ao raababani kerubim aikai ni kauoman, ao titeboo teia. 26 Rietan te kerubim temanna bon 10 te mwanokunibai, ao ai aron naba te kerubim are temanna. 27 Ao e kaaki kerubim+ aikai i nanon te Ruu ae Moan te Tabu. A taakinaki baia ni kiba kerubim aikai n te aro are e roko bain are temanna ni kiba n te oo are teuana, ao bain te kerubim are temanna ni kiba e roko n te oo are teuana. Ao a taakinaki baia ni kiba nako nukan te auti, n te aro are a uaia n toma baia ni kiba. 28 Ao e kanimwa te koora n rabuni iai aoia kerubim aikai.
29 Ao e kaari ni katanei oon ni kabane te auti, ni kabutai ruu ake uoua n taamneia taiani kerubim,+ aroka aika baam,+ ao uee aika raure.+ 30 E kanimwa te koora n rabuna iai aontano are i nanon te auti, n ruu ake uoua. 31 Ao e karaoi mataroa man te kai ae te bwaain ibukin te kawai n rin n te Ruu ae Moan te Tabu, bouan rarikina, bouani mataroana, bwa te kanimaua ni mwakoro.* 32 A karaoaki mataroa aika uoua man te kai ae te bwaain, ao e kaari ni katanei aoia n taamneia taiani kerubim, aroka aika baam, ao uee aika raure, ao e kanimwa te koora n rabuni iai aoia. Ao e ororea te koora n te aama i aoia taiani kerubim ao aroka aika baam. 33 Ao anne arona ni karaoi bouani mataroa man te kai ae te bwaain, ibukini mataroan te tembora,* ao e riki bwa te kaaua ni mwakoro.* 34 Ao e karaoi mataroa aika uoua man te kai ae te mwaiango. Iai bonotan te mataroa teuana ae uoua rukumana ae ukuki i aon nangoana, ao iai naba bonotan te mataroa are teuana ae uoua rukumana ae ukuki i aon nangoana.+ 35 E kaari ni katanei aoia n taamneia taiani kerubim, aroka aika baam, ao uee aika raure, ao e kanimwa te koora n rabuni iai aoni baike a kaaraki ni kataneaki.
36 E katea oon te katawanang+ are mai nanona n te atibu ae ekeaki ae tenua rinanna ni waerake, ao e karina naba iai terinanna kaai aika tiira.+
37 N te ka-4 n ririki n te namwakaina ae Tibi,* ao e a kaweneaki aan ana auti Iehova.+ 38 Ao n te ka-11 n ririki n te namwakaina ae Bure* (ae taekan te ka-8 n namwakaina), ao e a tia te auti ma bwaina ni kabane, ni kaineti ma aron taamneina.+ Mangaia are e kabanea itiua te ririki ni kateia.
7 Ao e kabanea 13 te ririki Toromon ni katea oin ana auti,*+ ni karokoa ae e a tia ana auti ni kabutaa.+
2 Ao e katea te Auti ae Buakonikain Rebanon+ ae 100 te mwanokunibai* abwakina, 50 te mwanokunibai raababana, ao 30 te mwanokunibai rietana, i aoni boua aika tiira ae aua rinanna. Ao iai tatanga aika tiira+ i aoni boua aikai. 3 E kanimwaki i aona ni kabutaa te kai ae te tiira, i aon taian tatanga ake a toka i aoni boua. Bon 45 mwaitiia, bwa kaka 15 n teuana te rinan. 4 Ao iai kamaama aika tenrinan, ao e kakaaitara te kamaama teuana ma te kamaama are teuana n rinan aika tenua. 5 Ao a bane ni boraoi abwakin ao raababan taiani mataroa ma bouani mataroa, n aron naba moan taiani kamaama, ake a kakaaitara n tatabeua nako n rinan aika tenua.
6 Ao e katea Autin* Taiani Boua ae 50 te mwanokunibai abwakina ao 30 te mwanokunibai raababana. Ao iai te kaman i moana ma taiani boua ao te taubuki.
7 E katea naba Autin* te Kaintokanuea+ ike e na motikitaeka iai, ae te Auti ni Motikitaeka.+ Ao a kanimwa i aona ni kabutaa te kai ae te tiira mai aontano ni karokoa taian oka.
8 E raroa teutana ma Autin te Kaintokanuea ana auti* are e na maeka iai n te katawanang are teuana,+ ao e kuri n titeboo aroni karaoaia. E katea naba te auti ae kuri n titeboo ma te Auti aei, ibukin natini Barao te aine, are e anaia Toromon bwa buuna.+
9 A bane kateitei aikai ni moa man aaia ni karokoa taubukin te oo, ao mai tinanikuia ni karokoa te katawanang are bubura,+ ni karaoaki man atibu aika rangi ni bobuaka,+ ni kaineti ma baireaia, aika atibu aika ekeaki ao ni kaboraoaki nanoia ao tinanikuia n taon taian atibu. 10 Ao a kaweneaki atibu aika buburakaei aika rangi ni bobuaka bwa aan taiani kateitei. Atibu tabeua bon tebwina te mwanokunibai baireaia, ao atibu ake tabeua wanua te mwanokunibai. 11 Ao iai atibu aika rangi ni bobuaka i etani baikai, aika ekeaki ni kaineti ma baireaia, n ikotaki ma te kai ae te tiira. 12 Ao iai te oo ae te atibu ae ekeaki ae tenua rinanna, ae katobibia te katawanang are bubura, ao terinanna kaai aika tiira, n aroni katawanangin ana auti Iehova are mai nanona,+ ao kamanin* te auti anne.+
13 E kanaanako te Uea ae Toromon nakon Iram+ ao e a kairaki teuaei mai Turo. 14 Teuaei bon natin te aine ae e a tia ni mate buuna man te baronga ae Nabetari, ao taman teuaei bon te I-Turo ae te tia mwakuria te buraati,+ ao e rangi ni bati rabakauna, ana ataibwai,+ ao mwaataina, n aekani mwakurian nako te buraati.* Mangaia are e a roko ao e a karaoi mwakuri ni kabane ake e mwiokoaki iai iroun te Uea ae Toromon.
15 E kaburoi n atoi boua ake uaai ake buraati.+ Kaka 18 te mwanokunibai rietani boua aikai, ao bon 12 te mwanokunibai abwakin te kora ni baire ae a kona ni katobibiaki iai mronronin boua aika uaai aikai, teaina ma teaina.*+ 16 Ao e karaoi tiabita* aika uoua ni buraati aika kaburoaki n atoaki, bwa e na katokai i aon taubukin taiani boua mai eta. Bon nimaua te mwanokunibai rietan te tiabita are teuana, ao nimaua te mwanokunibai rietan te tiabita are teuana. 17 Ao iai te warawara ma taurekereke aika biraki aika mena i aon te tiabita are mena i aon taiani boua mai eta.+ Itiua ibukin te tiabita are teuana, ao itiua ibukin te tiabita are teuana. 18 Ao e karaoi bamkuranete* aika uarinan ni katobibia te warawara teuana bwa e na unekenekei iai tiabita ake i aon taiani boua mai eta. E karaoa ae tii te arona nakon tiabita ake uoua. 19 Ao tein taian tiabita ake i aon taiani boua mai eta ake n te kaman, boni katotongan te kiebu ae aua te mwanokunibai rietana. 20 A mena tiabita i aon taiani boua ake uaai, i etan raoi rabwatan te tiabita mai nano ae mronron, ae toma ma te warawara. Ao iai bamkuranete aika 200 aika karinanaki ni katobibi tiabita akanne.+
21 E katei bouani kamanin te tembora.*+ E katea bouan te angaatai* ao e aranna bwa Iakin,* ao imwina e katea bouan te angamaing* ao e aranna bwa Boati.*+ 22 Ao iai i aon taiani boua mai eta katotongan te kiebu. Mangaia are e a tia mwakurian taiani boua.
23 Ao e karaoa nnen te ran ae buburakaei ae arana Taari ae te biti ae kaburoaki n atoaki.+ E mronron teina, ao bon 10 te mwanokunibai man tarana teuana nakon tarana are teuana, ao 5 te mwanokunibai rietana, ao bon 30 te mwanokunibai abwakin te kora ni baire ae e kona ni katobibiaki iai mronronna.*+ 24 Ao iai bwaai ni katamaroa aika mronron+ aika mena i aan tarana ni katobibia ni kabutaa, tebwina n teuana te mwanokunibai, ni katobibia Taari, ao uoua rinanin bwaai ni katamaroa aika mronron aika kaburoaki n atoaki n tii teuana ma ngaia. 25 Ao e toka i aoni kaao mwaane aika 12,+ a kaitaraa meang 3, a kaitaraa maeao 3, a kaitaraa maiaki 3, ao a kaitaraa mainiku 3. E toka Taari i aoia, ao bukia ni kabane a kaineta nuka. 26 Ao matentenna bon raababan te rauraunibai,* ao e karaoaki tarana ae kaanga taran te mwangko, kaanga te kiebu ae e a raure ueena. E kona n taua 2,000 te bwai ni baire ae te bwate.*
27 Ao e karaoi man te buraati kaa n uabwai aika kokokaki* aika tebwina.+ Kaka aua te mwanokunibai abwakini baikai, aua te mwanokunibai raababaia, ao tenua te mwanokunibai rietaia. 28 Ao aio aroni karaoani kaa n uabwai aikai: Iai oon nako rarikia, ao oon rarikia aikai a mena i marenani kaai aika bangaki aika taiani buraati. 29 Ao iai taamneia raian,+ kaao mwaane, ao kerubim,*+ i aon oon rarikia i marenani kaai aika taiani buraati ake a bangaki, ao iai naba te taamnei ae aekan anne i aoni kaai ake buraati ake a bangaki. Ao bon iai taiani mwae aika tinetine i etaia ao i aaia raian ma kaao mwaane. 30 Ao iai kaka aua wiran kaa n uabwai aikai, aika a minomino i aoni kaai aika taiani buraati, ao a riki baike a mena ni maninganinga ake aua bwa kautokoani baikai. Ao iai taiani kautoko i aan te beetin aika kaburoaki n atoaki ma taiani mwae, n iteraia teuana ma teuana. 31 E mena matana kaanga i nanon te nangoa ae mronron ae kaanga tein te baunuea ao baireani matana ni moa mai nanona nakon taiani kautoko ao ni waerake bon teuana te mwanokunibai. E mronron matana, ao iai nangoana ae teuana ao te iterana te mwanokunibai, ao iai taamnei aika kaaraki ni kataneaki i aoni matana. Ao e bwaoki oon rarikina, e aki mronron. 32 A mena wira ake aua i aan nako oon rarikin te kaa n uabwai, ao a nim kautokoan te wira ma te kaa n uabwai. Ao kaka teuana ao te iterana te mwanokunibai rietan taiani wira. 33 Ao a karaoaki wira aikai n ai aroni wiran te kaa ni buaka. Ao kautokoaia, tinanikuni mronronia, nainaia, ao bitin nukaia, boni biiti ni kabane aika kaburoaki n atoaki. 34 Ao iai kautoko aika aua i aoni maninganingan nako te kaa n uabwai teuana ma teuana. A kaburoaki n atoaki kautokoaia nako, bwa bwain naba rabwatan* te kaa n uabwai. 35 Ao i aon te kaa n uabwai mai eta ao iai te nangoa ae te iterana te mwanokunibai rietana ae mronron rabwatana, ao kaina ma oon rarikina ake i aon te kaa n uabwai mai eta a kaburoaki naba n atoaki, bwa bwain naba rabwatana.* 36 E kaari ni katanei nako aoni kaina ma aon oona n taamneia taiani kerubim, raian, ao kaai aika baam, ni kaineti ma te mwaawa i aoia ae kona n reke, n ikotaki ma taiani mwae ni katobibia ni kabutaa.+ 37 Anne aron teuaei ni karaoi kaa n uabwai aika tebwina.+ A bane ni kaburoaki n atoaki n te aro ae titeboo,+ titeboo baireaia ao titeboo teia.
38 E karaoi beetin aika tebwina man te buraati,+ ao a kona n taua kaka 40 te bwai ni baire ae te bwate. Kaka aua te mwanokunibai* baireani beetin aikai. Ao iai kaka teuana te beetin i aon nako taiani kaa n uabwai ake tebwina. 39 Ao e kaaki kaa n uabwai aika nimawa mai angaatain te auti, ao nimawa mai angamaingin te auti. Ao e kaaki Taari mai angaatain te auti ni kaitaraa maiakimainiku.+
40 E karaoi naba Iram+ taiani beetin, tiaabora,+ ao taiani boora.+
Mangaia are e katiai mwakuri ni kabane Iram ake e karaoi ibukin te Uea ae Toromon, ni kaineti ma ana auti Iehova.+ 41 E karaoi boua ake uaai+ ao tiabita ake kaanga tein te boora ake a mena i aoni boua ake uaai mai eta, ao warawara ake uoua+ ake a unekenekei tiabita ake uoua ake kaanga tein te boora, ake a mena i aon taiani boua mai eta, 42 bamkuranete ake 400+ ibukini warawara ake uoua, bon uarinan taiani bamkuranete ibukin te warawara teuana ma teuana, bwa e na unekenekei tiabita ake uoua ake kaanga tein te boora, ake a mena i aoni boua ake uaai, 43 kaa n uabwai ake tebwina+ ma beetin ake tebwina+ ake i aoni kaa n uabwai, 44 Taari+ ao kaao mwaane ake 12 ake i aan Taari, 45 ao nnen taiani mannang, tiaabora, taiani boora, ao bwaai ni mwakuri ni kabane, ake e karaoi Iram man te buraati ae karaneaneaaki, ibukin te Uea ae Toromon ibukin ana auti Iehova. 46 E kaburoi n atoi te uea n aonon te Ioretan n te tano ae te bokaboka i marenan Tukota ma Tareetan.
47 E aki taui rawawatani bwaai ni kabane Toromon ibukina bwa a mwaitikurikuri. E aki ataaki naba rawawatan te buraati.+ 48 E karaoi Toromon bwain nako nanon ana auti Iehova, te baonikarea+ ae te koora, te taibora ae te koora+ are e toka i aona te bwerena ae kaotiotaki, 49 kaintaura+ aika koora ni koaua, nimaai n te angaatai ao nimaai n te angamaing, i matan te Ruu ae Moan te Tabu, ao taian uee,+ taura, ao taati ake a kabonganaaki ibukin tauani wikina, bon taiani koora,+ 50 beetin, taati ibukini kamatean taura,+ boora, mwangko,+ ao baan ake nneni mwaakaron te ai,+ bon taiani koora ni koaua, ao nangoan taiani mataroa ake a minomino i aoia, ake ibukin te ruu are mai nanona,+ ae taekan te Ruu ae Moan te Tabu, ao ibukin naba mataroan te Ruu ae Tabu,*+ bon taiani koora.
51 Mangaia are e katiai mwakuri ni kabane te Uea ae Toromon ake e riai ni karaoi ibukin ana auti Iehova. Imwina ao e a uotii ni karini bwaai Toromon ake e a tia ni katabui Tawita are tamana,+ ao e karina te tirewa, te koora, ao bwaai, ni nneni baika kakawaki ake n ana auti Iehova.+
8 N te tai anne ao Toromon e a ikotiia+ aia unimwaane tibun Iteraera, mataniwi n taiani baronga ni kabane, ao naake mataniwi i aoia aia koraki mairoun tamaia, ake tibun Iteraera.+ A roko iroun te Uea are Toromon i Ierutarem bwa a na uotaarake ana ati ni berita Iehova man Ana Kaawa Tawita,+ ae taekan Tion.+ 2 A bane n ikotaki mwaane aika tibun Iteraera i matan te Uea are Toromon n tain te toa* n te namwakaina ae Etanim,* ae taekan te kaitiua n namwakaina.+ 3 Mangaia are a a bane n roko aia unimwaane tibun Iteraera, ao a tabeka te Ati ibonga.*+ 4 A uotaarake ana Ati Iehova, te umwa ni botaki,+ ao bwaai ni kabane aika tabu ake a mena n te umwanrianna. A uotii baikai ni waerake ibonga ma tibun Rewi. 5 E mena i matan te Ati te Uea are Toromon ma te botaki n aomata aika tibun Iteraera ake a weteaki bwa a na kawaria. A rangi ni bati tiibu ma kaao aika kareanaki+ ao a aki kona ni warekaki ke n ataaki mwaitiia.
6 Ao a uota ana ati ni berita Iehova nakoni nnena+ ibonga, nakon te ruu are mai nanon riki te auti, ae te Ruu ae Moan te Tabu, nako aani baia ni kiba kerubim.*+
7 Ao a taakinaki baia ni kiba kerubim i etani nnen te Ati, n te aro are a mena kerubim i etan te Ati ma kaina.+ 8 A rangi n abwabwaki kaai+ aikai n te aro are a a kona n noraki taboia man te Ruu ae Tabu are i moan te Ruu ae Moan te Tabu* ma a aki noraki mai tinaniku. Ao bon ake ikekei ni karokoa te bong aei. 9 Akea te bwai teuana n te Ati ma tii baaba aika atibu aika uoua+ ake e kaaki iai Mote+ i Oreba, ngke e karaoa te berita Iehova+ ma tibun Iteraera ngke a otinako man te aba are Aikubita.+
10 Ngke a a otinako ibonga man te tabo ae tabu, ao e a onrake ana auti Iehova+ n te nang.+ 11 A aikoa kona ibonga n teimatoa ni karaoa aia beku ibukin te nang, bwa e a onrake ana auti Iehova ni mimitongin Iehova.+ 12 N te tai anne ao e a taku Toromon: “Iehova, ko taku bwa ko na maeka n te rotongitong ae matenten.+ 13 I a tia ni katea am auti ae karietataaki, ae te tabo ae teimatoa bwa ko na maeka iai n aki toki.”+
14 Ao e tanrikaaki te uea ao e taetae ni kakabwaiaia te botaki n aomata aika tibun Iteraera, ngke a a bane n teirake te botaki n aomata aika tibun Iteraera.+ 15 E taku teuaei: “E bia karaoiroaki Iehova ae Atuan Iteraera, are teuare berita n oini wina nakon tamau are Tawita, ao e a kakoroa bukina n oini baina ngke e kangai, 16 ‘Man te bong are I kairiia iai au aomata aika tibun Iteraera ni kaotinakoia mai Aikubita, ao I aki rinea te kaawa teuana mai buakon aia baronga nako tibun Iteraera ike N na katea iai te auti bwa e na mena iai arau,+ ma I rinea Tawita bwa e na kairiia au aomata aika tibun Iteraera.’ 17 Ao iai nanon tamau are Tawita ni kani katea te auti ibukin aran Iehova ae Atuan Iteraera.+ 18 Ma e taku Iehova nakon tamau are Tawita, ‘Bon iai nanom ni kani katea te auti ibukin arau, ao ko karaoa ae raoiroi ngkai iai nanom iai. 19 Ma ko na bon aki katea te auti, ma natim te mwaane ae e na bungiaki* ae ngaia ae e na katea te auti ibukin arau.’+ 20 E a tia Iehova ni kakororaoa te berita are e karaoia, bwa I a tia n ruamwin tamau are Tawita ao I a tekateka i aoni kaintokanuean Iteraera, n aron are e beritanna Iehova. I a tia naba ni katea te auti ibukin aran Iehova ae Atuan Iteraera,+ 21 ao ni katauraoa iai nnen te Ati are e mena i nanona te berita+ are e karaoia Iehova ma ara bakatibu, ngke e kairiia ni kaotinakoia man te aba are Aikubita.”
22 Ao e tei Toromon i matan ana baonikarea Iehova i matan te botaki n aomata aika tibun Iteraera, ao e arori baina nako karawa,+ 23 ao e taku: “Ngkoe ae Iehova ae Atuan Iteraera, bon akea te Atua ae ai arom+ i karawa i eta ke i aon te aonnaba i nano, bwa ko kakawakina te berita ao ko kaotiota te tangira ae koaua*+ nakoia am toro aika nakonako i matam ma nanoia ni kabane.+ 24 Ko kakawakina te berita are ko karaoia nakon am toro are Tawita are tamau. Ko karaoa te berita anne n oini wim, ao ko kakoroa bukina n te bong aei n oini baim.+ 25 Ao ngkai ngkoe ae Iehova ae Atuan Iteraera, kawakina te berita are ko karaoia nakon am toro are Tawita are tamau, ngke ko kangai: ‘E na bon teimatoa n iai i matau temanna mani kanoam ae e na tekateka i aoni kaintokanuean Iteraera, tii ngkana a mutiakina aroia natim mwaane n nakonako i matau, n aron are ko a tia n nakonako iai i matau.’+ 26 Ao ngkai taiaoka ngkoe ae Atuan Iteraera, e bia kakoroaki bukin te berita are ko karaoia nakon am toro are Tawita are tamau.
27 “Ma te koaua bwa e na boni maeka te Atua i aon te aba?+ Noria! E aki kona ni kamwaneauako karawa, eng, karawani karawa,+ ao ai karakora riki ngkanne mwaneauam n te auti ae I kateia aei!+ 28 Kakauongo ngkai n ana tataro am toro ao ana bubutii ni kan akoaki, ngkoe ae Iehova ae Atuau, ao ongora n te tang ni kani buokaki ao n ana tataro am toro ae tataroia i matam n te bong aei. 29 A bia ure matam nakon te auti aei ni ngaina ao ni bong, nakon te tabo are ko kangai ibukina, ‘E na mena iai arau,’+ bwa ko na ongora te tataro ae e tataroia am toro ni kaitaraa te tabo aei.+ 30 Ao ongora n ana bubutii ni kan akoaki am toro ao n aia bubutii am aomata aika tibun Iteraera ae a tataroia ni kaitaraa te tabo aei, ao ko bia ongo man am tabo ni maeka i karawa,+ eng, ko bia ongo ao ni kabwarai buure.+
31 “Ngkana e bure te mwaane temanna nakon raona n aomata, ao e a kairoroaki teuanne bwa e na taetae n tuea* ao e kabaea teuanne i aan te rekenikai ni kaineti ma te taetae n tuea,* ao ngkana e boni mena naba teuanne i aan te taetae n tuea* anne ao e roko i matan am baonikarea n te auti aei,+ 32 ao ko bia ongo mai karawa ao karaoa te bwai teuana, ao motiki taekaia am toro n taekina te aomata are buakaka bwa e bure* ao ni kaoka te baere e a tia ni karaoia nako aon atuna, ao n taekina te aomata are raoiroi bwa akea ana bure* ao n anganna kaniwangana ni kaineti ma raoiroina.+
33 “Ngkana a konaaki am aomata aika tibun Iteraera irouia aiaia ibukina bwa a teimatoa ni bure nakoim,+ ao a a manga okiriko ao a neboa aram+ ao a tataro ma ni bubutiiko akoaia n te auti aei,+ 34 ao ko bia ongo mai karawa ao kabwarai aia bure am aomata aika tibun Iteraera, ao kairiia ni kaokiia nakon te aba are ko angania aia bakatibu.+
35 “Ngkana e a kainaki karawa ao ai akea te karau+ ibukina bwa a teimatoa ni bure nakoim,+ ao a tataro ni kaitaraa te tabo aei ao n neboa aram, ao n rairaki man aia bure ibukina bwa ko karinanoia,*+ 36 ao ko bia ongo mai karawa ao kabwarai aia bure am toro, aika am aomata aika tibun Iteraera, bwa ane ko na reireinia+ te kawai ae raoiroi ae a riai n nakonako iai, ao ko na karokoa te karau i aon abam+ are ko angania am aomata bwa tibwangaia.
37 “Ngkana e roko te rongo n te aba,+ ke te aoraki ae kamamate, ke a a rai aroka man te kabuebue ao a mannaoraki,+ ke e roko te nna n rokati, ke rokati* aika riao amwamwarakeia, ke ngkana a otabwaniniaki irouia aiaia ni kaawan nako te aba, ke ngkana e roko te aeka n rekenikai riki teuana ke te aoraki,+ 38 ao ngkana e karaoaki te tataro teuana ke te bubutii ni kan akoaki+ iroun te mwaane temanna ke irouia am aomata aika tibun Iteraera ni kabane, (bwa a ataa rawawatan nanoia n tatabemania nako)+ ao ngkana a arori baia nakon te auti aei, 39 ao ko bia ongo mai karawa are am tabo ni maeka,+ ao ko bia kabwarai buure+ ao ni karaoa te bwai teuana, ao n angan temanna ma temanna kaniwangana ni kaineti ma arona ni kabane,+ bwa ko ataa nanona (bon tii ngkoe ae ko atai raoi nanoia aomata nako),+ 40 bwa a aonga ni maakuko i nanoni boong ni kabane ake a maeka iai n te aba are ko angania ara bakatibu.
41 “Ao ni kaineti naba ma te ianena ae tiaki temanna i buakoia am aomata aika tibun Iteraera, ao e roko man te aba ae raroa ibukin aram,*+ 42 (bwa ane a na ongo taekan aram+ ae kakannato ao baim ae korakora ao baim ae aroraki), ao e roko ao e tataro ni kaitaraa te auti aei, 43 ao ko bia ongora mai karawa are am tabo ni maeka,+ ao karaoi bwaai ni kabane ake e bubutiiko iai te ianena anne, bwa a aonga n ataa aram ao ni maakuko+ botannaomata ni kabane n te aonnaba, n aroia am aomata aika tibun Iteraera, ao a bia ataia ae e mena aram i aon te auti ae I kateia aei.
44 “Ngkana a nako ni buaka am aomata ni kaaitaraia aiaia n aron ae ko kanakoia iai,+ ao a tataro+ nakon Iehova ni kaitaraa te kaawa are ko rineia,+ ao ni kaitaraa te auti are I kateia ibukin aram,+ 45 ao ko na ongo mai karawa aia tataro ao aia bubutii ni kan akoaki, ao karaoa te motikitaeka ibukia.
46 “Ngkana a bure nakoim (bwa akea te aomata ae aki bubure),+ ao e a rangi ni maraki nanom irouia ao ko a kitania ni katikuia irouia aiaia, ao a a kairakinako bwa taenikai irouia taani kataenikaiia nako abaia aiaia, ae te tabo ae raroa ke ae kaan,+ 47 ao a a manga oki aia iango n te aba are a kairaki nako iai bwa taenikai,+ ao a a manga okiriko+ ao ni bubutiiko akoaia i abaia taani kataenikaiia,+ ni kangai, ‘Ti a tia ni bure ao ni karaoa ae kairua, ti karaoa ae buakaka,’+ 48 ao a a manga okiriko ma nanoia ni kabane+ ao maiuia* ni kabane i abaia aiaia ake a kairiianako bwa taenikai, ao a tataro nakoim ni kaitaraa abaia are ko angania aia bakatibu, ao te kaawa are ko rineia ao te auti are I kateia ibukin aram,+ 49 ao ko na ongo mai karawa are am tabo ni maeka+ aia tataro ao aia bubutii ni kan akoaki, ao ko na karaoa te motikitaeka ibukia, 50 ao ko bia kabwarai aia bure am aomata ake a bure nakoim, ni kabwarai aia kairua ni kabane ake a karaoi nakoim. Ko na karikiia bwa bwaai ni kan nanoangaaki i mataia taani kataenikaiia, ao ane a na nanoangaiia,+ 51 (bwa bon am aomata ngaiia ao tibwangam,+ ake ko kairiia ni kaotinakoia mai Aikubita,+ mani nnen te ai ibukini kaburoan te biti).+ 52 A bia ure matam nakon ana bubutii ni kan akoaki am toro,+ ao nakon aia bubutii ni kan akoaki am aomata aika tibun Iteraera, n arom n ongora n taai ake a weteiko iai.*+ 53 Bwa ko kaokoroia bwa am aomata* mai buakoia botannaomata ni kabane n te aonnaba,+ n aron are ko taekinna rinanoni Mote are am toro, ngke ko kairiia ara bakatibu ni kaotinakoia mai Aikubita, ngkoe ae Iehova ae te Uea ae Moan te Rietata.”
54 Ao ngke e tia ngkekei Toromon n tataro nakon Iehova n te tataro aei ni kabane ma te bubutii ni kan akoaki, ao e a teirake naba mai matan ana baonikarea Iehova, ike e katorobubua iai ma baina aika aroraki nako karawa.+ 55 Ao e teirake ao e kakabwaiaa te botaki n aomata aika tibun Iteraera, n te bwanaa ae korakora ni kangai: 56 “E na karaoiroaki Iehova ae e a tia n angania ana aomata aika tibun Iteraera te tabo ni motirawa, n aron are e beritanna.+ Akea te taeka teuana ae bwaka mai buakon ana berita ni kabane aika raraoi ake e karaoi rinanoni Mote are ana toro.+ 57 E bia memena iroura Iehova ae Atuara n arona ngkoa ngke e memena irouia ara bakatibu.+ E bia aki kitanira ke ni kaaki taekara.+ 58 E bia katikii nanora nakoina,+ bwa ti na nakonako ni kawaina nako ao ni kawakin ana tua, ana kaetieti, ao ana moti, ake e tua nakoia ara bakatibu bwa ti na kakairi iai. 59 A bia ururingaki iroun Iehova ae Atuara ni ngaina ao ni bong au taeka aikai aika I bubutiia iai Iehova ibukin te kan akoaki, bwa e aonga ni karaoa te motikitaeka ibukin ana toro ao ana aomata aika tibun Iteraera n aroni kainnanoana n te bong teuana ma teuana, 60 bwa a aonga n ataia botannaomata ni kabane n te aonnaba bwa Iehova bon te Atua ae koaua.+ Akea riki temanna!+ 61 Mangaia ae ke a tabwanin raoi* nanomi+ nakon Iehova ae Atuara n aromi ni kakairi n ana kaetieti nako ao ni kawakin ana tua, n aron ae riki n te bong aei.”
62 Ao te uea ma tibun Iteraera ni kabane ake raona a anga te karea ae rangi ni bati i matan Iehova.+ 63 E anga taiani karea n raoi+ Toromon nakon Iehova: E kareani kaao aika 22,000 ao tiibu aika 120,000. Ao te uea ma tibun Iteraera ni kabane a katabua ana auti Iehova.+ 64 N te bong anne ao e a riai te uea ni katabua nukan te katawanang are i moan ana auti Iehova, bwa e a riai n anga ikanne taiani karea ni kabuekaki, te karea ae te amwarake,* ao mwakorokoroni mwaeten taiani karea n raoi, ibukina bwa e a rangi n uarereke te baonikarea are te buraati+ are i matan Iehova, ao a aikoa ono iai taiani karea ni kabuekaki, te karea ae te amwarake, ao mwakorokoroni mwaeten+ taiani karea n raoi. 65 N te tai anne ao e a karaoa te toa+ Toromon ngaia ma tibun Iteraera ni kabane, ae te botaki n aomata ae rangi ni bati kaaina mai Reboamata* ni karokoa Mwaruan Aikubita,+ i matan Iehova ae Atuara, i nanon 7 te bong ao manga 7 riki te bong, 14 te bong botana ni kabane. 66 N te bong are imwina* ao e a kaokiianako aomata. Ao a taetae ni kakabwaiaa te uea ao a okiri mwengaia ma te kimwareirei ao namakinan te kukurei i nanoia ibukini bwaai ni kabane aika raraoi+ ake e a tia ni kaotia Iehova nakon Tawita are ana toro ao ana aomata aika tibun Iteraera.
9 Ngke e tia naba ngkekei Toromon ni katea ana auti Iehova, ana auti* te uea,+ ao bwaai ni kabane ake e kani karaoi Toromon,+ 2 ao e a kaoti naba Iehova nakon Toromon n te kauatai, n arona ngke e kaoti nakoina i Kibeon.+ 3 E taku Iehova nakoina: “I ongo am tataro ma am bubutii ni kan akoaki are ko tataroia i matau. I a tia ni katabua te auti ae ko kateia aei n arou ni kaaki arau iai n aki toki,+ ao a na mena matau ma nanou iai n taai nako.+ 4 Ao ngkoe ngkana ko nakonako i matau n aron tamam are Tawita n nakonako+ ma te nano ae eti+ ao te raoiroi,+ n arom ni karaoi bwaai ni kabane aika I tua nakoim,+ ao n ongeaba n au tua ma au moti,+ 5 ao N na kateimatoa kaintokanuean am tautaeka n uea i aon Iteraera n aki toki, n aron are I beritanna nakon tamam are Tawita ni kangai, ‘E na bon teimatoa n iai temanna mani kanoam ae e na tekateka i aoni kaintokanuean Iteraera.’+ 6 Ma ngkana kam rairakinako mairou ngkami ma natimi mwaane ma n aki kawakin au tua ma au moti ake I kaaki i matami, ao kam nako n toro irouia atua riki tabeman ma ni bobaraaki nakoia,+ 7 ao N na kamaunaia tibun Iteraera mai aon te aba are I angania,+ ao N na tewenakoa mai matau te auti ae I katabua aei ibukin arau,+ ao a na riki tibun Iteraera bwa te bwai ni kakanikoaki,* ao te bwai ni bwainingareaki i buakoia botannaomata ni kabane.+ 8 Ao e na riki te auti aei bwa te auti ae urubekebeke.+ Ao a na tarataraia ma te miroaroa akana rirarikina ao a na katiitii ao a na kangai, ‘Bukin tera ngkai e karaoa aei Iehova nakon te aba aei ma te auti aei?’+ 9 Ao ane a na kangai, ‘Ibukina bwa a kitana Iehova ae Atuaia, are e kairiia aia bakatibu ni kaotinakoia man te aba are Aikubita, ao a nimtiia atua riki tabeman ao ni bobaraaki nakoia ma n toro irouia. Anne bukina ae e karokoa iai Iehova te rekenikai aei ni kabane i aoia.’”+
10 Ni banen ririki aika 20 ake e katei iai auti ake uoua Toromon, are ana auti Iehova ao ana auti* te uea,+ 11 ao Iram+ are uean Turo e kakatauraoi kaai aika tiira ao aika mwaiango ao te koora ae bati nakon Toromon, n aron are e tangiria teuaei,+ ao te Uea are Toromon e a anga kaawa aika 20 ake n te aba ae Kariraia nakon Iram. 12 Mangaia are e otinako Iram mai Turo, bwa e na nori kaawa ake e anganna Toromon, ma e aki rauaki iai.* 13 E taku: “Tariu, aeka ni kaawa raa aika ko anganai aikai?” Mangaia are a aranaki bwa te Aba ae Kabura* ni karokoa te bong aei. 14 N te tai anne ao e kanakoa 120 te tarena* ni koora Iram nakon te uea.+
15 Aio taekaia aomata ake e tua te Uea are Toromon bwa a na mwakuri ibukina,+ bwa a na katea ana auti Iehova,+ oin ana auti,* te Miro,*+ oon Ierutarem, Atiora,+ Mekito,+ ao Ketera.+ 16 (E waerake Barao are uean Aikubita ao e taua Ketera ao e kabuekia n te ai, ao e kamateia naba tibuni Kanaan+ ake a maeka n te kaawa anne. Mangaia are e anga bwa te bwaintangira ni karaure* nakon natina te aine+ are buun Toromon.) 17 Ao Toromon e a manga katea* Ketera, Betaoron are mai Nano,+ 18 Baarata,+ ao Tama are n te rereua, i nanon te aba, 19 n ikotaki naba ma ana kaawa ni kaikobwai ni kabane Toromon,+ kaawa ake nnen taiani kaa ni buaka, kaawa ake nneia taan toka i aoia aoti, ao bwaai ake e kani katei Toromon i Ierutarem, i Rebanon, ao n aaba ni kabane ake e tautaekan. 20 Ni kaineti ngkanne ma aomata ni kabane ake nikiraia taian Amoraite, tibun Eta, taiani Beritaite, taian Iwaite, ao I-Iebuti,+ ake tiaki tibun Iteraera,+ 21 ake kanoaia ake a tiku n te aba, ake te koraki ake a aikoa kona tibun Iteraera ni kamaunaia, e a tua Toromon bwa a na mwakuri ibukina bwa tooro, ni karokoa te bong aei.+ 22 Ma e aki karekeia tooro+ Toromon mai buakoia tibun Iteraera, bwa a riki bwa ana tia buaka, ana tabonibai, ana aomata aika tooka, mataniwia ana taanga ni buaka, ao mataniwia ana tia toka i aoni kaa ni buaka ma ana tia toka i aoia aoti. 23 Ao iai 550 mataniwi i aoia mataniwi, ake a kaira te mwakuri ibukin Toromon, ake taani kairiri i aoia aomata ake a karaoa te mwakuri.+
24 Ma e waerake natini Barao te aine+ man Ana Kaawa Tawita+ nakon oin ana auti neiei are e kateia Toromon ibukina. Anne te tai are e katea iai te Miro+ teuaei.
25 E anganga taiani karea ni kabuekaki ao taiani karea n raoi Toromon tenua te tai n te ririki,+ i aon te baonikarea are e kateia ibukin Iehova,+ ao e kabueki naba karea ni kabubui i aon te baonikarea are mena i matan Iehova, mangaia are e a tia te auti irouna.+
26 E kabai naba taiani nna ni kaibuke te Uea are Toromon i Etionkebera,+ are i rarikin Erota, i mataniwin te aba n Taari ae Uraura n te aba ae Etom.+ 27 Ao Iram e kanakoia ana toro ma taiani nna ni kaibuke,+ aika kaimoa aika mwaatai, bwa a na mwakuri ma ana toro Toromon. 28 A nako Obira+ ao a anaa mai ikekei 420 te tarena ni koora ao a uotia nakon te Uea are Toromon.
10 Ao te ueannaine mai Tieba e ongo taekan Toromon ao irekerekena ma aran Iehova,+ mangaia are e a roko bwa e na tuoa teuaei n titiraki aika kangaanga.*+ 2 E roko i Ierutarem ma te koraki ake raona ni mwananga*+ aika rangi ni mwaitikurikuri, ma kamero aika uouotii oeran te batiam,+ ao te koora ae mwaitikurikuri ao atibu aika rangi ni kakawaki. E rin neiei nakon Toromon ao e taekin nakoina bwaai ni kabane ake a mena i nanona. 3 Ao Toromon e kaekai ni kabane ana titiraki neiei. Bon akea te bwai ae rangi ni kangaanga iroun* te uea ae e aki kona ni kabwarabwaraa nakon neiei.
4 Ngke e a tia te ueannaine mai Tieba n nora wanawanan Toromon ni kabane,+ te auti are e kateia,+ 5 te amwarake are n ana taibora,+ tekatekaia ana toro, mwamwakuria ana touati ma kunnikaia ae okoro, taan uouotii ana mwangko, ma ana karea ni kabuekaki ake e kakareani n ana auti Iehova, ao e rangi ni miroaroa. 6 Mangaia are e taku nakon te uea: “E boni koaua te rongorongo are I ongo i abau ae taekani baika ko karaoi* ao taekani wanawanam. 7 Ma I aki onimakin rongorongo akanne ni karokoa ae I a roko ao n noria ni matau. Ao noria! I bon aki tuangaki iterana. E rangi n rianako riki wanawanam ma toronibwaim nakon te rongorongo are I ongo. 8 A a kukurei am rorobuaka, ao a a kukurei am toro akana tei i matam n taai nako n ongongora ni wanawanam!+ 9 E bia karaoiroaki Iehova ae Atuam,+ are e kukurei iroum n arona ni katokako i aoni kaintokanuean Iteraera. Ibukin ana tangira Iehova ae akea tokina ibukia tibun Iteraera, ao e a rineiko bwa te uea ae e na kairiri ma te kaetitaeka ae riai ao te raoiroi.”
10 Ao neiei e angan te uea 120 te tarena* ni koora ao oeran te batiam ae mwaitikurikuri+ ao atibu aika rangi ni kakawaki.+ E aki manga uotaki oeran te batiam ae ai aroni mwaitin are e anga te ueannaine mai Tieba nakon te Uea are Toromon.
11 Ao ana nna ni kaibuke Iram ake a uouotii koora mai Obira,+ a uotii naba kaai aika arekam*+ aika rangi ni mwaitikurikuri mai Obira, ao atibu aika rangi ni kakawaki.+ 12 Ao te uea e karaoi mani kaai aika arekam kautokoan ana auti Iehova ao ana auti* te uea, n ikotaki ma taian abi ao bwaai ni katangitang aika iai karaiia ibukia taan anene.+ A aki manga uotaki ke n noraki aeka ni kai aika arekam aikai ni karokoa te bong aei.
13 Ao te Uea are Toromon e angan naba te ueannaine mai Tieba te bwai are e tangiria ao are e bubutii iai, irarikin ake e angan neiei bwa ana bwaintituaraoi.* Imwin anne ao e a nako neiei n okira oin abana ma ana toro.+
14 Ao botan rawawatan te koora ae roroko iroun Toromon n teuana te ririki bon 666 te tarena ni koora,+ 15 irarikin riki ake mairouia taan iokinibwai ao te raka are mairouia taani boobwai, ao mairouia aia uea ni kabane I-Arabia ma taiani kowana n te aba.
16 Ao te Uea are Toromon e karaoi otanga aika 200 aika bubura man te koora ae renganaki,+ (e bane kaka 600 te tiekera* ni koora n teuana te otanga)+ 17 ao otanga aika uarereke* aika 300 man te koora ae renganaki (e bane kaka tenua te mina* ni koora n teuana te otanga ae uarereke). Ao e kaaki baikai te uea n te Auti ae Buakonikain Rebanon.+
18 E karaoa naba te kaintokanuea ae rianako arona te uea man te aiwere,*+ ao e kanimwa te koora ae e a tia ni kaitiakaki n rabunna iai.+ 19 Iai onoua baon te bwai n tamwarake nakon te kaintokanuea, ao iai i aon te kaintokanuea te bwai ae kaanga te taubuki ae mronron, ao iai nneni katokaan te bai n iteran te tabo n tekateka ni kauaitera, ao a tei raian aika uoman+ i rarikini nneni katokaan te bai. 20 Ao iai raian aika 12 aika tei i aoni baon te bwai n tamwarake ake onoua, kaka temanna i taboni baon te bwai n tamwarake ni kauaitera. Akea te tautaeka n uea teuana ae e a tia ni karaoa te bwai teuana ae ai aron aei.
21 A bane ni karaoaki man te koora ana bwai ni moi te Uea are Toromon, ao a karaoaki man te koora ni koaua bwaai ni kabane ake i nanon te Auti ae Buakonikain Rebanon.+ Akea te bwai teuana ae karaoaki man te tirewa, bwa e iangoaki te tirewa n ana bong Toromon bwa akea bonganana.+ 22 Bwa iai ana nna ni kaibuke te uea ake mai Taretiti+ aika mena i taari ake raon ana nna ni kaibuke Iram. E roroko te nna ni kaibuke mai Taretiti teuana te tai ni katoa tenua te ririki ma uotana te koora ao te tirewa, te aiwere,+ taian ebe, ao mannikiba aika bikaoki.
23 Mangaia are e kakannato riki te Uea are Toromon nakoia uean aonnaba ni kabane, ni kaubwaina+ ao ni wanawanana.+ 24 Ao a ukoukora te kan taetae ma* Toromon aomata n te aonnaba ni kabutaa bwa a na ongora ni wanawanana are e kaaki te Atua i nanona.+ 25 A uota aia bwaintangira ngaiia n tatabemania nako aika bwaai aika karaoaki man te tirewa, bwaai aika karaoaki man te koora, kunnikai, te bwai ni buaka, oeran te batiam, aoti, ao miure, ao e reitinako aei n te ririki teuana ma teuana.
26 Ao e teimatoa Toromon ni karekei kaa ni buaka ma aoti.* Iai ana kaa ni buaka aika 1,400 ao ana aoti* aika 12,000.+ Ao e kateiia ni kaawa ake nnen taiani kaa ni buaka ao n uakaan ma te uea i Ierutarem.+
27 Ao e kabatiaa te tirewa te uea i Ierutarem n ai aron te atibu, ao e kabatiaa te kai ae te tiira n ai aron aroka aika tukomorea n te Tiebira.*+
28 A kaoaki ana aoti Toromon mai Aikubita, ao ana koraki n iokinibwai te uea a karekea te nanai n aoti* ni boona ae aki bibitaki.+ 29 Boon teuana te kaa ni buaka are kaoaki mai Aikubita bon 600 te mwakoro n tirewa, ao 150 boon temanna te aoti. Ao a a manga iokinibwai baikai nakoia aia uea ni kabane tibun Eta+ ma uean Turia.
11 Ma e tangiriia aine aika bati aika ianena te Uea are Toromon,+ i rarikin are natini Barao:+ Aine aika tibuni Moaba,+ tibun Ammon,+ tibun Etom, I-Titon,+ ao tibun Eta.+ 2 A roko mai buakoia natannaomata ake e kangai ibukia Iehova nakoia tibun Iteraera: “Kam na tai nako buakoia,* ao ngaiia a aki riai n roko i buakomi, bwa ane a na bon anai nanomi bwa kam na kakairi irouia atuaia.”+ Ma e nimtiia Toromon ao e tangiriia. 3 Ao iai buuna aika 700 aika natinuea aine, ao buuna ni kewe* aika 300, ao a ananaa nanona buuna teutana imwin teutana.* 4 Ngke e a kara Toromon,+ ao a anaa* nanona buuna bwa e na kakairi irouia atua riki tabeman,+ ao e a aki tabwanin raoi nanona nakon* Iehova ae Atuana, n aron nanon Tawita are tamana. 5 Ao e a kakairi Toromon iroun Nei Atitoreta+ are atuaia I-Titon, ao Mirekom+ are atuaia tibun Ammon ae kamwara. 6 Ao e karaoa ae buakaka Toromon i matan Iehova, ao e aki irira raoi Iehova n aron are e karaoia Tawita are tamana.+
7 Anne te tai are e a katea iai te tabo ae rietata+ Toromon ibukini Kemoti, are atuaia tibuni Moaba ae kamwara i aon te maunga i moan Ierutarem, ao ibukini Moreka+ are atuaia tibun Ammon ae kamwara.+ 8 Anne te bwai ae e karaoia ibukia buuna ni kabane ake ianena, ake a kabueki aia karea ni kabubui ao a angakarea nakoia atuaia.
9 E a rangi ni maraki nanon Iehova iroun Toromon ibukina bwa e a rairakinako nanona mairoun Iehova ae Atuan Iteraera,+ are e a tia ni kaoti nakoina uatai,+ 10 ao are e anga te kauring nakoina bwa e aki riai ni kakairi irouia atua riki tabeman.+ Ma e aki ongeaba teuaei n te bwai are e tua Iehova. 11 Ao e taku Iehova nakon Toromon: “Ibukina bwa ko karaoa aei ao ko aki kawakina au berita ma au kaetieti ake I tua nakoim, ao N na bon raeuaa te tautaeka n uea mairoum, ao N na angan am toro temanna.+ 12 Ma N na aki karaoa anne n am tai ni maiu ibukin tamam are Tawita. N na bon raeuaia mai nanoni bain natim,+ 13 ma N na aki raeuaa te tautaeka n uea ni kabane.+ N na anga te baronga teuana nakon natim+ ibukin Tawita are au toro ao ibukin Ierutarem are I rineia.”+
14 Ao Iehova e a kateirakea te tia kaitaraa Toromon+ ae Atata are tibun Etom, man aia utu n uea tibun Etom.+ 15 Ngke e kataenikaia ngkoa Etom Tawita,+ ao e waerake Ioaba are mataniwin te taanga ni buaka bwa e na taunia ake a kamateaki, ao e kataia n oreiia mwaane ni kabane ake i Etom. 16 (Bwa a tiku ikekei Ioaba ma tibun Iteraera ni kabane i nanon onoua namwakaina, ni karokoa tiana ni kamaunaia* mwaane ni kabane ake i Etom.) 17 Ma e birinako Atata ma tibun Etom tabeman ake ana toro tamana, ao a nako Aikubita. Bon te teinimwaane ae uarereke n te tai anne Atata. 18 Mangaia are a mwananga mai Mirian ao a a roko i Baran. A kairiia rorobuaka mai Baran+ ao a a roko i Aikubita irouni Barao are uean Aikubita, are e a anganna te auti, e anganganna kanana, ao e anganna naba abana. 19 Ao e reke akoan Atata ae rangi ni bati irouni Barao, mangaia are e anganna tarin Tabeneti are buuna are te ueannaine* bwa e na mare ma teuaei. 20 Imwina riki ao e a bungia natin Atata ae Kenubata neiere tarin te ueannaine are Tabeneti, ao e kaikawaia* Tabeneti n ana auti Barao. Ao e tiku Kenubata n ana auti Barao i buakoia natini Barao mwaane.
21 Ao e a ongo Atata i Aikubita bwa e a wene ni motirawa Tawita i rarikia ana bakatibu,+ ao e a mate Ioaba are te mataniwi n te taanga ni buaka.+ Mangaia are e taku Atata nakoni Barao: “Kanakoai bwa I aonga n nako abau.” 22 Ma e taku Barao nakoina: “Iai te bwai ae ko tare iai ni menam irou ngkai ko a ukoukora te kan nako abam?” E kaeka teuaei ni kangai: “Akea, ma taiaoka bwa ko na kanakoai.”
23 Ao te Atua e a manga kateirakea riki temanna te tia kaitaraa Toromon+ ae Retion are natin Eriata, are e birinako mairoun ana toka are Atatetera+ are uean Tobaa. 24 E ikotiia mwaane teuaei ao e a riki bwa mataniwia taani kuribwai ngke e kataenikaiia* aomatan Tobaa Tawita.+ Mangaia are a nako Tamateko+ ni maeka iai ao n tautaeka i Tamateko. 25 Ao e riki bwa te tia kakaaitaraia tibun Iteraera ni kabane ana bong Toromon, n raona riki te iowawa are e karaoia Atata. Ao e ribaiia tibun Iteraera teuaei ngke e tautaekana Turia.
26 Ao iai naba Ieroboam+ ae natin Nebata ae tibun Eberaim mai Teretaa, ae ana toro Toromon,+ ao aran tinana Terua ae te aine ae e a tia ni mate buuna. E a karitei* naba teuaei n ekaanako te uea.+ 27 Aei bukin ana karitei teuaei n ekaanako te uea: E katea te Miro*+ Toromon ao e bonota oon Ana Kaawa Tawita are tamana.+ 28 Bon te rorobuaka ae konabwai Ieroboam. Ngke e noria Toromon bwa bon te tia mwakuri korakora te rorobuaka n ataei aei, ao e a rineia naba bwa e na mataniwi+ i aoni mwakuri ni kabane ake a kabaeaki tibun Ioteba bwa a na karaoi. 29 N te tai anne ao e otinako Ieroboam mai Ierutarem, ao e boo ma ngaia i nanon te kawai Aiia are te burabeti+ are te I-Tiro. E kunnikainna Aiia n te kunnikai ae boou, ao bon tii ngaiia uoman n te tawaana. 30 E taua te kunnikai are boou Aiia are e kunnikainna iai, ao e raeraeia nakon 12 te mwakoro. 31 Ao e taku nakon Ieroboam:
“Anaa tebwina te mwakoro bwa am bwai, bwa e kangai ana taeka Iehova ae Atuan Iteraera: ‘I a raeuaa ngkai te tautaeka n uea mai nanoni bain Toromon, ao N na anganiko tebwina te baronga.+ 32 Ma e na tiku te baronga teuana bwa ana bwai+ ibukin Tawita are au toro+ ao ibukin Ierutarem, are te kaawa are I rineia mai buakon aia baronga nako tibun Iteraera.+ 33 N na karaoa te baei ibukina bwa a a tia ni kitanai+ ao a bobaraaki nakon Nei Atitoreta are atuaia I-Titon, ao nakoni Kemoti are atuaia tibuni Moaba, ao nakoni Mirekom are atuaia tibun Ammon. Ao a aki nakonako ni kawaiu nako ni karaoa ae eti i matau ao ni kakawakin au kaetieti ma au moti n aron are e karaoia Tawita are taman Toromon. 34 Ma N na aki anaa te tautaeka n uea ni kabane mai nanoni baina, ao N na kateimatoa bwa te mataniwi i nanon ana bong ni maiu ni kabane, ibukin Tawita are au toro are I rineia,+ ibukina bwa e ongeaba n au tua ma au kaetieti nako. 35 Ma N na anaa te nakoa n uea mai nanoni bain natina ao N na anganiko, ae taekan tebwina te baronga.+ 36 N na anga teuana te baronga nakon natina, bwa e aonga n teimatoa n iai i matau ana taura au toro are Tawita i Ierutarem,+ are te kaawa are I rineia ibukiu bwa te tabo ae N na kaaki iai arau. 37 N na anaiko, ao ko na tautaekani bwaai ni kabane ake ko tangiri, ao ko na riki bwa uean Iteraera. 38 Ao ngkana ko ongeaba ni baike I tua nakoim ni kabane, ma n nakonako ni kawaiu nako ao ko karaoa ae eti i matau n arom n ongeaba n au kaetieti ma au tua nako, n aron are e karaoia Tawita are au toro,+ ao N na memena naba iroum. N na katea batam* ae teimatoa, n aron are I karaoia ibukin Tawita,+ ao N na anga tibun Iteraera nakoim. 39 Ao N na kabwainrangia kanoan Tawita ibukin te baei,+ ma tiaki n taai nako.’”+
40 Ao e kataia Toromon ni kamatea Ieroboam, ma e birinako Ieroboam nako Aikubita, nakon Titiaka+ are uean Aikubita,+ ao e tiku i Aikubita ni karokoa maten Toromon.
41 Ni kaineti ngkanne ma nikiran rongorongon Toromon ma bwaai ni kabane ake e karaoi ao wanawanana, tiaki a koreaki n te boki ae rongorongon Toromon?+ 42 Abwakin ana tai* n tautaeka Toromon i Ierutarem i aoia tibun Iteraera ni kabane bon 40 te ririki. 43 Ao e a wene ni motirawa Toromon i rarikia ana bakatibu, ao e kaiiaki n Ana Kaawa Tawita are tamana, ao e a riki natina are Reoboam+ bwa te uea n onea mwina.
12 Ao Reoboam e nako Tekem, bwa a bane n roko tibun Iteraera i Tekem+ bwa a na kaueaa.+ 2 Ngke e ongo naba ngkekei Ieroboam are natin Nebata (e boni mena naba i Aikubita ibukina bwa e birinako ngkoa ibukin te Uea are Toromon ao e maeka i Aikubita),+ 3 ao a kanaanako bwa e na weteaki. Imwin anne ao e a roko Ieroboam ma te botaki n aomata aika tibun Iteraera iroun Reoboam ao a taku: 4 “E karawawatai amora tamam.+ Ma ngkana ko kauarerekea riki te mwakuri ae rawawata are mairoun tamam, ao ko kabebetea te amo ae tinebu* are e katokaa i aora, ao ti na toro iroum.”
5 Ngaia are e taku nakoia: “Naako i nanon tenibong ao kam a manga okirai.” Mangaia are a a nako aomata.+ 6 E maroro ngkanne te Uea are Reoboam ma unimwaane ake a beku iroun tamana are Toromon ngke e maiu, ao e kangai: “Tera ami taeka n reirei ae kam na anga ni kaineti ma aroni kaekaaia aomata aikai?” 7 A kaekaa ni kangai: “Ngkana ko riki bwa aia toro aomata aikai n te bong aei, ma ni kariaia aia bubutii ao ko kaekaia n te aro ae riai, ao ane a na riki bwa am toro n taai nako.”
8 Ma e rawa nakon te taeka n reirei are a anganna unimwaane, ao e maroro ma rorobuaka n ataei ake a ikawairake ma ngaia, ao a a riki ngkai bwa ana tabonibai.+ 9 E titirakinia ni kangai: “Tera ami taeka n reirei ae kam na anga ni kaineti ma arora ae ti riai ni kaekaia iai aomata ake a kangai nakoiu, ‘Kabebetea riki te amo are e katokaa i aora tamam’?” 10 A taku nakoina rorobuaka n ataei ake a ikawairake ma ngaia: “Ko riai ni kangai nakoia aomata ake a kangai nakoim, ‘E karawawatai amora tamam, ma ko riai ngkoe ni kabebetei riki ibukira,’ ao ko riai n tuangia ni kangai, ‘E na matenten riki ukireni baiu nakoni bebeen tamau. 11 E katokaa i aomi te amo ae rawawata tamau, ma ngai N na kauaataoa riki amomi. E kataereingkami tamau ni kaai ni kataere. Ma N na karaoa ae kakaiaki riki nakon anne, bwa N na kataereingkami ni kaai ni kataere aika kakang taboia.’”
12 Ao e a roko Ieroboam ma aomata akekei ni kabane iroun Reoboam n te katenua ni bong, n aron are e taku te uea ni kangai: “Kam a manga okirai n te katenua ni bong.”+ 13 Ma e kaekaia aomata akekei te uea ma te iowawa, ao e rawa n te taeka n reirei are a anganna unimwaane. 14 E taetae nakoia n aron aia taeka n reirei rorobuaka n ataei ni kangai: “E karawawatai amomi tamau, ma ngai N na kauaataoa riki amomi. E kataereingkami tamau ni kaai ni kataere. Ma ngai N na kataereingkami ni kaai ni kataere aika kakang taboia.” 15 Mangaia are e aki ongo te uea irouia aomata akekei, bwa a riki baikai mairoun Iehova,+ bwa e aonga ni kakororaoaki te taeka are e taekinna Iehova nakon Ieroboam are natin Nebata rinanon Aiia+ are te I-Tiro.
16 Ngke a noria tibun Iteraera ni kabane bwa e rawa te uea n ongo irouia, ao a kaeka aomata nakon te uea ni kangai: “Tera tibwangara iroun Tawita? Akea ara bwai iroun natin Iete. Okiriia atuami ngkami aika tibun Iteraera. Ao ngkoe Tawita, ani bon tararuaa oini batam!” Ao a okiri mwengaia* tibun Iteraera.+ 17 Ma e teimatoa n tautaeka Reoboam i aoia tibun Iteraera ake a maeka ni kaawa ake i Iuta.+
18 Ao te Uea ae Reoboam e kanakoa Atoram+ are te mataniwi i aoia te koraki ake e tua te uea bwa a na mwakuri ibukina, ma a karebanaia n atibu n uaa matena tibun Iteraera ni kabane. Ma e reke tokan te Uea are Reoboam i aon ana kaa ni buaka ao e birinako nako Ierutarem.+ 19 Ao a teimatoa ni karitei tibun Iteraera+ n ekiianako ana utu Tawita ni karokoa te bong aei.
20 Ngke a ongo naba ngkekei tibun Iteraera ni kabane bwa e a oki Ieroboam, ao a weteia nakon te botaki n aomata ao a kateia bwa te uea i aon Iteraera ni kabutaa.+ Akea i buakoia aomata ae e boutokaa ana utu Tawita ma bon tii te baronga are Iuta.+
21 Ngke e roko Reoboam i Ierutarem, ao e a botiia naba ngkekei tibun Iuta ni kabane ma te baronga are Beniamin, aika taani buaka aika 180,000 aika a a tia ni kataneiaaki,* bwa a na buakania tibun Iteraera bwa a aonga ni kaoka te nakoa n uea nakon Reoboam are natin Toromon.+ 22 Ao e roko ana taeka te Atua ae koaua iroun Temaia+ ae ana aomata te Atua ae koaua, ae kangai: 23 “Kangai nakon Reoboam are natin Toromon are uean Iuta, ao nakoia ni kabane tibun Iuta ao Beniamin, ao nikiraia aomata, 24 ‘E kangai ana taeka Iehova: “Kam na tai waerake ni buakania tarimi aika tibun Iteraera. Kam riai n okiri ami auti n tatabemaningkami, bwa I boni karika te baei.”’”+ Mangaia are a ongo n ana taeka Iehova ao a okiri mwengaia n aron are e tuangia Iehova.
25 Ao Ieroboam e katea* Tekem+ n aonon Eberaim ae maungaunga ao e maeka iai. Ao e a manga nako mai iai ao e katea* Benuera.+ 26 E taku Ieroboam i nanona: “E nang oki ngkai te tautaeka n uea nakon ana utu Tawita.+ 27 Ngkana a teimatoa aomata aikai ni waerake n anga taiani karea n ana auti Iehova i Ierutarem,+ ao ane e na oki naba nanoia aomata aikai nakon aia toka are te Uea are Reoboam are uean Iuta. Eng, a na boni kamateai ao a na okira te Uea are Reoboam are uean Iuta.” 28 Imwin ana maroro te uea ma ana taan angareirei n ibuobuoki, ao e a karaoi kaao ataei aika uoman aika koora,+ ao e taku nakoia aomata: “E a rangi n riao ibukimi te waerake nako Ierutarem. Ngkami aika tibun Iteraera, aio Atuami are kairingkami ni kaotinakoingkami man te aba are Aikubita.”+ 29 E kaaki temanna i Betaera+ ao are temanna e kaaki i Tan.+ 30 E a karekeia n te bure te baei,+ ao a rokoroko aomata i Tan bwa a na taromauria iai are temanna.
31 Ao e katei auti n taromauri n taabo aika rietata ao e rineiia ibonga mai buakoia aomata nako, aika tiaki tibun Rewi.+ 32 Ao e karaoa naba te toa Ieroboam n te namwakaina are te kawanua, ae 15 iai bongin te namwakaina, n ai aron te toa are i Iuta.+ E angakarea i aon te baonikarea are e karaoia i Betaera+ nakoia kaao ataei ake e karaoi. Ao e kateirakeia i Betaera ibonga bwa a na beku n taabo aika rietata ake e karaoi. 33 Ao e a anga taiani karea i aon te baonikarea are e karaoia i Betaera n 15 iai bongin te kawanua n namwakaina, n te namwakaina are e boni karioa. Ao e kamatoaa te toa ibukia tibun Iteraera, ao e ararakea te baonikarea n anga iai taiani karea ma ni kabueki ni kabubui.
13 E roko i Betaera ana aomata te Atua+ mai Iuta bwa e tua Iehova, ngke e tabe Ieroboam n tei i rarikin te baonikarea+ bwa e na kabueki karea ni kabubui. 2 Ao e takarua n ekaanako te baonikarea ni kaineti ma ana taeka Iehova, ao e taku: “Te baonikarea, te baonikarea! E kangai ana taeka Iehova: ‘Noria! E na bungiaki te nati te mwaane man ana utu Tawita ae arana Iotia!+ E na kareania i aom ibongan taabo aika rietata, aika kabueki karea ni kabubui i aom, ao e na kabueki riia aomata i aom.’”+ 3 Ao e anga te kanikina* n te bong anne ni kangai: “Aio te kanikina* ae e taekinna Iehova: Noria! E na tabwenaua te baonikarea, ao a na bwaro mannang* ake i aona.”
4 Ngke e ongo naba ngkekei te uea ana taeka ana aomata te Atua ae koaua ake e takaruai n ekaanako te baonikarea are i Betaera, ao e a kanakoa naba baina Ieroboam man te baonikarea ao e taku: “Taua teuanne!”+ E a bwatakataka* naba ngkekei baina are e aroria n ekaanako iai teuarei, ao e a aki kona ni manga kaokia.+ 5 Ao e tabwenaua te baonikarea ao a bwaro mannang man te baonikarea, ni kaineti ma te kanikina* are e taekinna Iehova nakon ana aomata te Atua ae koaua.
6 E a taku ngkanne te uea nakon ana aomata te Atua ae koaua: “Taiaoka ma bubutiia* Iehova ae Atuam ibukin ana akoi, ao tataro ibukiu bwa e na kamarurungaki baiu.”+ Ao ana aomata te Atua ae koaua e a bubutiia Iehova ibukin ana akoi, ao e a kamarurungaki bain te uea n arona are rimoa. 7 E taku ngkanne te uea nakon ana aomata te Atua ae koaua: “Ko na irai nakoni mwengau ao ko na kanuaiko, ao kariaia bwa N na anganiko te bwaintangira.” 8 Ma e taku ana aomata te Atua ae koaua nakon te uea: “E ngae naba ngkana ko anganai iteran am auti ma N na bon aki naba iriko ao ni kana te kariki ke n nima te ran n te tabo aei. 9 Bwa e tua nakoiu Iehova ni kangai: ‘Ko na tai kana te kariki ke n nima te ran, ao ko na tai oki n te kawai are ko roko mai iai.’” 10 Mangaia are e nako n te kawai riki teaina, ao e aki oki n te kawai are e roko iai i Betaera.
11 Iai te burabeti temanna ae e a kara ae maeka i Betaera, ao a okira mwengaia natina ao a karakin nakoina bwaai ni kabane ake e karaoi ana aomata te Atua ae koaua n te bong arei i Betaera, ao taeka ake e taekin nakon te uea. Ngke a a tia ni karakina aei nakon tamaia, 12 ao e a titirakinia tamaia ni kangai: “Te kawai raa ae e nako iai?” Mangaia are a kaota nakoina natina te kawai are e nako iai ana aomata te Atua ae koaua are e roko mai Iuta. 13 Ao e taku nakoia natina: “Katokaa te kaintoka i aon au taongki.” A katokaa te kaintoka i aon ana taongki, ao e toka i aona.
14 E rimwin ana aomata te Atua ae koaua ao e noria n tekateka i aan te aroka ae bubura. Ao e taku nakoina: “Ngkoe ana aomata te Atua ae koaua are e roko mai Iuta?”+ E kaeka teuarei ni kangai: “Boni ngai.” 15 E taku nakoina: “Ko na irai nakoni mwengau ao ko na kana te kariki.” 16 Ma e taku teuarei: “I aki kona n iriko n oki ke ni butimwaea am kakao, ao I aki naba kona ni kana te kariki ke n nima te ran ma ngkoe n te tabo aei. 17 Bwa e tua Iehova nakoiu ni kangai: ‘Ko na tai kana te kariki ke n nima te ran ikanne. Ko na tai oki n te kawai are ko roko mai iai.’” 18 Ao e taku teuarei nakoina: “Bon te burabeti naba ngai n ai arom, ao e tuangai te anera temanna ana taeka Iehova ae kangai, ‘Kairia n oki ma ngkoe nakon am auti bwa e aonga ni kana te kariki ao n nima te ran.’” (E mwamwanaia.) 19 Mangaia are e oki ma teuarei bwa e na kana te kariki ao n nima te ran n ana auti teuarei.
20 Ngke a tekateka n te taibora, ao e a roko naba ana taeka Iehova nakon te burabeti are kaira teuarei n oki, 21 ao e takarua nakon ana aomata te Atua ae koaua are e roko mai abaia tibun Iuta, ao e kangai, “E kangai ana taeka Iehova, ‘Ibukina bwa ko karitei n ekaanako te baere e tua Iehova ao ko aki kawakina ana tua Iehova ae Atuam are anganiko, 22 ma ko oki bwa ko na kana te kariki ao n nima te ran n te tabo are ko tuangaki ni kangai ibukina, “Tai kana te kariki ke n nima te ran,” ao ane e na aki roko rabwatam n ruanimateia am bakatibu.’”+
23 Ngke e tia teuare ana aomata te Atua ae koaua ni kana te kariki ao ni moi, ao e katokaa te kaintoka te burabeti are e a kara arei i aon ana taongki te burabeti are e kairia n oki. 24 Ao e touaanako kawaina, ma e a boo naba ma te raian i nanon te kawai ao e kamatea teuarei.+ E wene rabwatana i nanon te kawai, ao e tei te taongki i rarikina. E tei naba te raian i rarikin rabwatana. 25 Ao iai mwaane ake a rirarikina ao a nora rabwatana bwa e wene i nanon te kawai ao e tei te raian i rarikin rabwatana. Ao a roko n te kaawa are e maeka iai te burabeti are e a kara arei, ao a karakina taekana.
26 Ngke e ongo naba ngkekei taekana te burabeti are e kairia n oki man te kawai, ao e a taku naba: “Bon ana aomata te Atua ae koaua teuanne are karitei n ekaanako te baere e tua Iehova,+ ao Iehova e a anga teuanne nakon te raian bwa e na tenaia ao ni kamatea, n aron ana taeka Iehova are taekinna nakoina.”+ 27 E taku ngkanne nakoia natina: “Katokaa te kaintoka i aon au taongki.” Mangaia are a katokaa te kaintoka i aona. 28 Ao e touaanako kawaina ao e kunea rabwatan teuarei ni wene i nanon te kawai, ma te taongki ao te raian aika tei i rarikina. E aki kana rabwatana te raian ao e aki naba tenaa te taongki. 29 Ao te burabeti arei e tabeka rabwatan ana aomata te Atua ae koaua, ao e katokaa i aon te taongki, ao e uotia n oki nakon ana kaawa bwa e na tanginiweneia ao ni kaiia. 30 Ngaia are e a kawenea rabwatan teuarei n ana ruanimate, ao a teimatoa n tang ni kangai ibukin teuarei: “Ai kaawara tariu!” 31 Ngke e tia ni kaiia teuarei, ao e tuangia natina ni kangai: “Ngkana I mate ao kam riai ni kaiiai n te tabo are e kaiiaki iai ana aomata te Atua ae koaua. Kawenei riiu i rarikin riina.+ 32 E na boni koro bukin ana taeka Iehova are e takaruaia teuaei n ekaanako te baonikarea are i Betaera, ao n ekinako auti n taromauri ni kabane ake n taabo aika rietata+ ake ni kaawan nako Tamaria.”+
33 E ngae naba ngke e a tia n riki aei, ma e bon aki naba kitana arona ae buakaka Ieroboam, ma e teimatoa n rineiia ibonga ibukin taabo aika rietata mai buakoia aomata nako.+ E kakateirakeia akana kan riki bwa ibonga,* ni kangai: “Ke e riki bwa temanna i buakoia ibonga n taabo aika rietata.”+ 34 Aia bure kaaini batan Ieroboam+ aei e a karika mateia ao kamaunaaia mai aon te aba.+
14 N te tai anne ao e a bwaka n aoraki Abiia are natin Ieroboam. 2 Mangaia are e taku Ieroboam nakoni buuna: “Teirake taiaoka, ao bita teim bwa a aonga n aki ataia ae buun Ieroboam ngkoe, ao naako Tiro. Noria! E mena ikekei Aiia are te burabeti. Boni ngaia are e taekinai bwa N na riki bwa te uea i aoia aomata aikai.+ 3 Uotii kariki aika tebwina, bwerena, ao aia karewe manibeeru* i nanoni nnena, ao naako nakoina. Ao e na tuangko te bwai ae e na riki nakon te teinimwaane.”
4 Ao buun Ieroboam e karaoa are e taku teuarei. E teirake ao e nako Tiro+ ao e roko n ana auti Aiia. A aki kakammwakuri kanoani matan Aiia ao e a aki kona n noraaba bwa e a kara.
5 Ma Iehova e tuanga Aiia ni kangai: “Ae e a roko buun Ieroboam bwa e na titirakiniko ibukin natina bwa e aoraki. N na tuangko te bae ko na taekinna nakoina.* Ngkana e roko ao ane e na bita teina.”
6 Ngke e ongo naba ngkekei Aiia mwakaikaini waen neierei ngke e a roko n te mataroa, ao e a taku naba: “Nakomai riin ngkoe ae buun Ieroboam. Bukin tera ngkai ko bita teim? I mwiokoaki bwa N na anganiko te rongorongo ae karawawata. 7 Naako ao tuanga Ieroboam ni kangai, ‘E kangai ana taeka Iehova ae Atuan Iteraera: “I kateirakeko mai buakoia am aomata bwa N na karikiko bwa te tia kairiri i aoia au aomata aika tibun Iteraera.+ 8 Ao I raeuaa te tautaeka n uea man ana utu Tawita ao I anganiko.+ Ma ko aki riki n aron au toro are Tawita are kakawakin au tua, ao e nakonako ni kakairi irou ma nanona ni kabane, ni kakaraoa tii ae eti i matau.+ 9 Ma ko karaoa ae buakaka riki nakoia naake imwaim ni kabane, ao ko karaoa atuam riki temanna ao bouannanti aika biiti* ni kaunai iai,+ ao boni ngai ae ko tannako mairou.+ 10 Ibukin anne ao N nang karokoa te kabuanibwai i aoia kanoam ngkoe ae Ieroboam, ao N na kamaunaia* man am utu mwaane* ni kabane n ikotaki ma aika akea korakoraia ao aika mamaara i Iteraera. Ao N na karaoa te kaitiaki n taeianako ana utu Ieroboam,+ n aron temanna ngkana e kaitiaka te nakotaari ni karokoa ae e boni babane! 11 Ana utu Ieroboam ae e mate n te kaawa a na kanna kamea, ao ane e mate n te tawaana a na kanna mannikiba ake i annang, bwa e a tia Iehova n taekinna.”’
12 “Teirake ngkai ao naako nakon am auti. Ngkana ko a rin n te kaawa, ao ane e na mate te ataei. 13 A na bane tibun Iteraera n tanginiweneia ao a na kaiia, bwa bon tii ngaia mai buakoia ana utu Ieroboam ae e na kaweneaki n te ruanimate, ibukina bwa bon tii ngaia mai buakoia ana utu Ieroboam ae e nora te bwai ae raoiroi i nanona Iehova ae Atuan Iteraera. 14 Ao Iehova e na kateirakea i bon ibukina temanna te uea i aon Iteraera ae e na katiai aroia* ana utu Ieroboam+ ni moa man te bong anne, eng, ao ngkai naba. 15 Ao Iehova e na oreiia tibun Iteraera ni kabwakaia n ai aron te maunei ae mwaeiei n te ran, ao e na taeki wakaaia tibun Iteraera man te aba ae raoiroi aei are e angania aia bakatibu,+ ao e na kamaenakoia riaon te Karaanga,*+ ibukina bwa a karaoi aia kai aika tabu*+ ni kauna iai Iehova. 16 Ao e na kitania tibun Iteraera ibukini buure ake e karaoi Ieroboam ao ni karekeia iai tibun Iteraera n te bure.”+
17 Ngaia are e teirake buun Ieroboam ao e touaanako kawaina ao e roko i Tireta. Ngke e roko ni mataroan ana auti ao e a mate naba te teinimwaane. 18 Mangaia are a kaiia ao a bane tibun Iteraera n tanginiweneia, n aron ana taeka Iehova are e taekinna rinanon ana toro are Aiia are te burabeti.
19 Ao nikiran rongorongon Ieroboam, ma arona ni buaka+ ao arona n tautaeka, a koreaki n te boki are rongorongon aia tai uean Iteraera. 20 Ao abwakin ana tai* n tautaeka Ieroboam bon 22 te ririki, ao imwina e a wene ni motirawa i rarikia ana bakatibu,+ ao e a riki natina are Nataba bwa te uea n onea mwina.+
21 N te tai anne ao e a riki Reoboam are natin Toromon bwa te uea i Iuta. Bon 41 ana ririki Reoboam ngke e riki bwa te uea, ao e tautaeka i nanon 17 te ririki i Ierutarem, are te kaawa are e rineia Iehova+ mai buakon aia baronga nako tibun Iteraera bwa te tabo ae e na kaaki iai arana.+ Aran tinan Reoboam bon Naama ae tibun Ammon.+ 22 Ao a karaoa ae buakaka kaain Iuta i matan Iehova,+ ao a kaunna riki n aia bure ake a karaoi nakon ake a karaoi aia bakatibu.+ 23 A teimatoa naba ngaiia ni katei aia tabo aika rietata, boua aika tabu, ao kaai aika tabu*+ i aon nako tabuki aika rietata+ ao i aan nako kaai aika manguroro.+ 24 Ao iai naba n te aba mwaanen te tembora aika kakabooaki ibukin te wene ni bure.+ A kakairi n aia bwai ni kabane aika riribaaki taian natannaomata ake e kakioianako Iehova mai mwaia tibun Iteraera.
25 Ao e waerake n ekaanako Ierutarem+ te Uea ae Titiaka+ are uean Aikubita, n ana kanimaua n ririki n tautaeka te Uea are Reoboam. 26 Ao e anai baika kakawaki ake n ana auti Iehova ma baika kakawaki ake n ana auti* te uea.+ E anai bwaai ni kabane n ikotaki ma otanga ni kabane aika koora ake e karaoi Toromon.+ 27 Mangaia are e karaoi otanga aika taiani buraati te Uea are Reoboam bwa oneani mwia, ao e mwiokoiia mataniwia taan tantani* ni baikai, ake a tantania mataroan ana auti te uea. 28 Ngkana e roko te uea n ana auti Iehova, ao a na uouotii baikai taan tantani, ao a na manga kaoki nakon te ruu n tantani.
29 Ao nikiran rongorongon Reoboam ma bwaai ni kabane ake e karaoi, tiaki a koreaki n te boki are rongorongon aia tai uean Iuta?+ 30 E teimatoa te buaka i marenan Reoboam ma Ieroboam.+ 31 Ao e a wene ni motirawa Reoboam i rarikia ana bakatibu, ao e kaiiaki i rarikia ana bakatibu n Ana Kaawa Tawita.+ Aran tinana Naama ae tibun Ammon.+ Ao e a riki natina ae Abiiam*+ bwa te uea n onea mwina.
15 N ana ka-18 n ririki n tautaeka te Uea are Ieroboam+ are natin Nebata, ao e a riki Abiiam bwa uean Iuta.+ 2 E tautaeka teuaei i Ierutarem i nanon tenua te ririki. Aran tinana Maaka+ are tibun Abitiarom. 3 E teimatoa n nakonako ni buure ni kabane ake e karaoi tamana, ao e aki tabwanin raoi nanona nakon* Iehova ae Atuana, n aron nanon Tawita are ana bakatibu. 4 Ma Iehova ae Atuana e anganna te taura i Ierutarem+ ibukin Tawita,+ n arona n rinea natina bwa te uea n onea mwina ao ni kateimatoa Ierutarem. 5 Bwa e karaoa ae eti Tawita i matan Iehova, ao e aki rairakinako man te bwai are E tua nakoina ni kabane ana bong ni maiu, ma tii n te baere e irekereke ma Uria are tibun Eta.+ 6 Ao iai te buaka i marenan Reoboam ma Ieroboam ni kabane ana bong ni maiu.+
7 Ni kaineti ngkanne ma nikiran rongorongon Abiiam ma bwaai ni kabane ake e karaoi, tiaki a koreaki n te boki are rongorongon aia tai uean Iuta?+ Iai naba te buaka i marenan Abiiam ma Ieroboam.+ 8 Ao e a wene ni motirawa Abiiam i rarikia ana bakatibu, ao a kaiia n Ana Kaawa Tawita. Ao e a riki natina are Ata+ bwa te uea n onea mwina.+
9 N ana ka-20 n ririki n tautaeka Ieroboam are uean Iteraera, ao e a tautaeka Ata i Iuta. 10 E tautaeka i Ierutarem i nanon 41 te ririki. Aran tibuna te unnaine Maaka+ are tibun Abitiarom. 11 E kakaraoa ae eti Ata i matan Iehova,+ n aron Tawita are ana bakatibu. 12 E kamwaawaia man te aba mwaanen te tembora aika kakabooaki ibukin te wene ni bure,+ ao e bane ni kanakoi bouannanti aika kamwara* ake a karaoi ana bakatibu.+ 13 E kabwakaa naba Maaka+ are tibuna te unnaine man nakoana ae te ueannaine, ibukina bwa e karaoa neiei ana bouannanti ae kammaira ibukin taromaurian te kai ae tabu.* Ao Ata e korea ana bouannanti ae kammaira neiei+ ni kabwakaa ao e kabuekia n te Mwarua ae Kiteron.+ 14 Ma a aki kanakoaki taabo aika rietata.+ Ma e ngae n anne, e tabwanin raoi nanon Ata nakon* Iehova ni kabane maiuna.* 15 Ao e uotii nakon ana auti Iehova bwaai ake e katabui ngaia ma tamana, aika tirewa, koora, ao bwaai riki tabeua.+
16 Ao e teimatoa te buaka i marenan Ata ma Baata+ are uean Iteraera. 17 Mangaia are e waerake Baata are Uean Iteraera n ekaanako Iuta, ao e a katea* Rama,+ bwa e na tukiia aomata bwa a na aki otinako ke n rin nakon* Ata are Uean Iuta.+ 18 Ngaia are e a anai ni kabane taian tirewa ma koora Ata ake a katukaki ni nneni baika kakawaki ake n ana auti Iehova ao ni nneni baika kakawaki ake n ana auti* te uea, ao e angania ana toro. E kanakoia ngkanne ana toro te Uea are Ata nakoni Benataata are natin Tabirimon are natin Etion are uean Turia,+ are e maeka i Tamateko, ao e kangai: 19 “Iai te boraraoi* i marenau ma ngkoe, ao i marenan tamau ma tamam. I a kanakoa ngkai nakoim te bwaintangira aika tirewa ma koora. Nakomai ao urua am boraraoi* ma Baata are Uean Iteraera, bwa e aonga ni kitanai.” 20 E ongo Benataata iroun te Uea are Ata, ao e kanakoia mataniwi n ana taanga ni buaka bwa a na ekinako kaawan Iteraera ao a kabwakaa Ion,+ Tan,+ Aberabetamaaka, Kinnereta ni kabutaa, ao aban Nabetari ni kabutaa. 21 Ngke e ongo taekan anne Baata ao e aki tabwara ma e a katoka naba katean* Rama ao e teimatoa ni maeka i Tireta.+ 22 Ao e weteiia kaain Iuta ni kabane te Uea are Ata, akea temanna ae tiku, ao a uotiinako atibun Rama ma kaina, ake e kateitei iai Baata, ao e kabonganai te Uea are Ata ni katea* iai Keeba+ are i Beniamin, ao Mitiba.+
23 Ni kaineti ngkanne ma nikiran rongorongon Ata, ana mwakuri aika korakora ni kabane ao bwaai ni kabane ake e karaoi ma kaawa ake e katei,* tiaki a koreaki n te boki are rongorongon aia tai uean Iuta? Ma ngke e a kara ao e a rotakibuaka n aorakini waena.+ 24 Ao e a wene ni motirawa Ata i rarikia ana bakatibu ao e kaiiaki i rarikia n Ana Kaawa Tawita are ana bakatibu. Ao e a riki natina are Ieotiabata+ bwa te uea n onea mwina.
25 E riki bwa te uea Nataba+ are natin Ieroboam i aon Iteraera n ana kauoua n ririki n tautaeka Ata are Uean Iuta, ao e tautaeka i aon Iteraera i nanon uoua te ririki. 26 E teimatoa ni karaoa ae buakaka i matan Iehova ao e nakonako ni kawain tamana+ ao n ana bure, are e karekeia iai tibun Iteraera n te bure.+ 27 Ao Baata are natin Aiia are tibun Itakara e a bairea te karitei nakon teuanne, ao Baata e kamatea teuanne i Kibeton,+ are aia kaawa I-Biritia, ngke a tabe Nataba ma tibun Iteraera ni kabane n otabwaninia Kibeton. 28 Mangaia are e kamatea teuanne Baata n ana katenua n ririki n tautaeka Ata are Uean Iuta, ao e a riki bwa te uea n onea mwina. 29 N te tai are e riki iai bwa te uea ao e a kamateia naba ni kabane kaain ana utu Ieroboam. E aki kariaia temanna kaain ana utu Ieroboam bwa e na tiku n ikeike, e kamaunaia ni kabane, ni kaineti ma ana taeka Iehova are e taekinna rinanon ana toro are Aiia are te I-Tiro.+ 30 E riki aei ibukini buure ake e karaoi Ieroboam ao e karekeia iai tibun Iteraera n te bure, ao ibukina bwa e rangi ni kauna Iehova ae Atuan Iteraera. 31 Ni kaineti ngkanne ma nikiran rongorongon Nataba ma bwaai ni kabane ake e karaoi, tiaki a koreaki n te boki are rongorongon aia tai uean Iteraera? 32 Ao e teimatoa te buaka i marenan Ata ma Baata are uean Iteraera.+
33 N ana katenua n ririki n tautaeka Ata are Uean Iuta, ao e a riki Baata are natin Aiia bwa te uea i aoia tibun Iteraera ni kabane i Tireta, ao e tautaeka i nanon 24 te ririki.+ 34 Ma e teimatoa ni karaoa ae buakaka i matan Iehova+ ao e nakonako ni kawain Ieroboam ao n ana bure, are e karekeia iai tibun Iteraera n te bure.+
16 Ao e roko ana taeka Iehova iroun Ieu+ are natin Aanani+ n ekaanako Baata, ni kangai: 2 “I kateirakeko mai buakon te tano ao I karikiko bwa te tia kairiri i aoia au aomata aika tibun Iteraera,+ ma ko bon teimatoa naba n nakonako ni kawain Ieroboam ao ni karekeia au aomata aika tibun Iteraera n te bure, n te aro are a a kaunai n aia bure.+ 3 Mangaia ae I a karaoa te kaitiaki n taeaanako Baata ma ana utu, ao N na karaoiia ana utu bwa ai aroia ana utu Ieroboam+ are natin Nebata. 4 Ana utu Baata ae e mate n te kaawa a na kanna kamea, ao ana utu ae mate n te tawaana a na kanna mannikiba ake i annang.”
5 Ni kaineti ngkanne ma nikiran rongorongoni Baata ma te bwai are e karaoia ao ana mwakuri aika korakora, tiaki a koreaki n te boki are rongorongon aia tai uean Iteraera? 6 Ao e a wene ni motirawa Baata i rarikia ana bakatibu, ao e kaiiaki i Tireta,+ ao e a riki natina are Eera bwa te uea n onea mwina. 7 E roko naba rinanon te burabeti are Ieu are natin Aanani, ana taeka Iehova n ekaanako Baata ma ana utu, ibukini buakakana ni kabane are e karaoia i matan Iehova ngke e kaunna n ana mwakuri baina, n riki n ai aron ana utu Ieroboam, ao ibukina naba bwa e kamatea teuaei.*+
8 N ana ka-26 n ririki n tautaeka Ata are uean Iuta, ao e a riki Eera are natini Baata bwa uean Iteraera i Tireta, ao e tautaeka i nanon uoua te ririki. 9 Ao e a bairea te karitei nakoina ana toro are Timri are te mataniwi i aon iterani mwaitin ana kaa ni buaka, ngke e mena i Tireta ni kakoroa ni manging n ana auti Arita are mataniwi i aoia kaaini batana i Tireta. 10 Ao e rin Timri ao e oreia+ ao e kamatea n ana ka-27 n ririki n tautaeka Ata are uean Iuta, ao e a riki bwa te uea n onea mwina. 11 Ngke e riki bwa te uea n te tai are e bon tekateka naba iai n ana kaintokanuea, ao e a kamateia naba ana utu Baata ni kabane. E aki kamaiua temanna naba te mwaane,* ae tao ana koraki* ke raoraona. 12 Ao Timri e kamaunaia ana utu nako Baata ni kaineti ma te taeka are e taekinna Iehova n ekaanako Baata, rinanon Ieu are te burabeti.+ 13 Aei bon ibukini buure nako ake a karaoi Baata ma natina are Eera, ao buure ake a karekeia iai tibun Iteraera n te bure ni kauna Iehova ae Atuan Iteraera n aia bouannanti aika akea manenaia.+ 14 Ni kaineti ngkanne ma nikiran rongorongon Eera, ma bwaai ni kabane ake e karaoi, tiaki a koreaki n te boki are rongorongon aia tai uean Iteraera?
15 N ana ka-27 n ririki n tautaeka Ata are uean Iuta, ao e a riki Timri bwa te uea i nanon itibong i Tireta, n te tai are a kaembwa iai kaain te taanga ni buaka n ekaanako Kibeton+ are aia kaawa I-Biritia. 16 Imwina riki ao a a ongo ae kangai kaain te taanga ni buaka ake a katei aia umwanrianna: “E bairea te karitei Timri ao e kamatea naba te uea.” Ao tibun Iteraera ni kabane a kaueaa Omri+ bwa uean Iteraera n te bong anne i nanon te kaembwa, are te mataniwi n te taanga ni buaka. 17 Ao e waerake mai Kibeton Omri ma tibun Iteraera ni kabane ake raona ao a otabwaninia Tireta. 18 Ngke e noria Timri bwa e a tauaki te kaawa, ao e nako n rin n te taua ae nonoaki are n ana auti* te uea ao e kabueka ana auti te uea ngke e boni mena i nanona ao e a mate iai.+ 19 Aei bon ibukin ana bure ake e karaoi ngke e karaoa ae buakaka i matan Iehova n arona n nakonako ni kawain Ieroboam, ao ibukin te bure are e karekeia iai tibun Iteraera n te bure.+ 20 Ni kaineti ngkanne ma nikiran rongorongon Timri ma ana karitei, tiaki a koreaki n te boki are rongorongon aia tai uean Iteraera?
21 Ngaia are a a bwenauaaki tibun Iteraera nakon uakoraki. Aomata ake te korakina a boutokaa Tibeni are natini Kinata bwa a kani kaueaa, ao ake te korakina a boutokaa Omri. 22 Ma aomata ake a boutokaa Omri a tokanikai i aoia te koraki ake a boutokaa Tibeni are natini Kinata. Ngaia are e a mate Tibeni ao e a riki Omri bwa te uea.
23 N ana ka-31 n ririki n tautaeka Ata are uean Iuta, ao e a riki Omri bwa uean Iteraera ao e tautaeka i nanon 12 te ririki. E tautaeka i Tireta i nanon onoua te ririki. 24 E kabooa maungan Tamaria mairoun Temera n uoua te tarena* n tirewa, ao e katea te kaawa teuana i aon te maunga. E arana te kaawa are e kateia bwa Tamaria,*+ bwa e ingoanna n Temera are te tia bwaibwai* n te maunga. 25 E teimatoa Omri ni karaoa ae buakaka i matan Iehova, ao e buakaka riki nakoia naake imwaina ni kabane.+ 26 E nakonako ni kawain Ieroboam ni kabane are natin Nebata, ao n te bure are e karekeia iai tibun Iteraera n te bure ni kauna Iehova ae Atuan Iteraera n aia bouannanti aika akea manenaia.+ 27 Ni kaineti ngkanne ma nikiran rongorongon Omri, te bwai ae e karaoia ma ana mwakuri aika korakora, tiaki a koreaki n te boki are rongorongon aia tai uean Iteraera? 28 Ao e a wene ni motirawa Omri i rarikia ana bakatibu, ao e kaiiaki i Tamaria, ao e a riki natina are Aaba+ bwa te uea n onea mwina.
29 E riki Aaba are natin Omri bwa te uea i Iteraera n ana ka-38 n ririki n tautaeka Ata are uean Iuta, ao e tautaeka Aaba are natin Omri i aoia tibun Iteraera i Tamaria+ i nanon 22 te ririki. 30 Ao e buakaka riki Aaba are natin Omri i matan Iehova nakoia naake imwaina ni kabane.+ 31 E nakonako teuaei n ana bure nako Ieroboam+ are natin Nebata n aron ae kaanga te bwai ae uarereke irouna, ao e anaa naba Ietebera+ are natin Etabaara are aia uea I-Titon+ bwa buuna, ao e a toro irouni Baara+ ao ni bobaraaki nakoina. 32 Irarikin anne e katea te baonikarea nakoni Baara n ana auti* Baara+ are e kateia i Tamaria. 33 E karaoa naba te kai ae tabu*+ Aaba, ao e kabatiaa riki karaoani baika bubuaka Aaba ni kauna iai Iehova ae Atuan Iteraera nakoia uean Iteraera ni kabane ake imwaina.
34 N ana bong teuaei ao Ieera are kaaini Betaera e a manga katea Ieriko. E mate natina ae ana karimoa ae Abiram ngke e kawenea aana, ao e mate natina ae ana bina ae Tekuba ngke e katei mataroana, n aron ana taeka Iehova are e taekinna rinanon Iotua are natin Nun.+
17 E a taku ngkai Eria*+ are te I-Titibe are kaaini Kireata+ nakon Aaba: “Ngkai bon iai Iehova ae Atuan Iteraera are I toro irouna,* ao e nang akea te aoi ke te karau i nanon ririki aikai, ma tii n au taeka!”+
2 Ao e roko ana taeka Iehova irouna ae kangai: 3 “Kitana ikai ao rairaki nako mainiku, ao karabako n te Mwarua ae Keritia, i mainikun te Ioretan. 4 Ko na momoi man te karaanga, ao N na tua nakoia mannikiba aika reeben bwa a na kakarekea kanam ikekei.”+ 5 E aki tabwara ma e a nako naba ao e karaoa are e taku Iehova. E nako ao e tiku i rarikin te Mwarua ae Keritia, i mainikun te Ioretan. 6 Ao a uouota te kariki ma te irikomaiu taian reeben nakoina n te ingabong, ao te kariki ma te irikomaiu n te tairiki, ao e momoi man te karaanga.+ 7 Ma imwin tabebong, ao e a bwatakataka te karaanga,+ ibukina bwa akea te karau n te aba.
8 Ao e roko ana taeka Iehova irouna ae kangai: 9 “Teirake, ao naako Tarebata are kaawan Titon ao tiiku ikanne. Noria! N na tua nakon te aine ae e a tia ni mate buuna ikanne bwa e na kakarekea kanam.”+ 10 Ai ngaia are e teirake ao e nako Tarebata. Ngke e a roko ni mataroan oon te kaawa, ao iai ikekei te aine ae e a tia ni mate buuna ae tabe n tabeaia. Ngaia are e wetea neiei ao e taku: “Taiaoka ma uotaamai te ran teutana n te mwangko bwa N na moi.”+ 11 Ngke e nako neiei bwa e na anaia, ao e a takaruaia teuaei ni kangai: “Taiaoka ma ko a uotaamai naba te mwakorona te kariki i baim.” 12 Ao e taku neiei: “Ngkai bon iai Iehova ae Atuam, ao bon akea au kariki, ma tii te abutana te burawa ae mena i nanon te kaatibu ae bubura ao te oera teutana i nanon te kaatibu ae uarereke.+ I tabeaia ngkai, ao N na nako n rin ni karaoa kanau ma natiu te mwaane. Ao imwin amwarakera ao ti na mate.”
13 E taku ngkanne Eria nakon neiei: “Tai maaku. Naako riin ao karaoa ane ko taku. Ma karaoa moa kanau te kariki ae uarereke ae mronron n nikiran am burawa, ao uotia ni kaotinakoa nakoiu. Imwina ko a kona ngkanne ni karaoa kanam ma natim. 14 Bwa e kangai ana taeka Iehova ae Atuan Iteraera: ‘E na aki bane te burawa are n te kaatibu are bubura, ao e na aki mwautakataka te oera are n te kaatibu are uarereke, ni karokoa te bong are e na kabwakaa iai te karau Iehova nako aontano.’”+ 15 Mangaia are e nako neiei ao e karaoa are e tuangnga Eria, ao e a amwamwarake i nanoni boong aika bati ngaia ma teuaei ao kaaini batana.+ 16 E aki roko n te bane te burawa are n te kaatibu are bubura, ao e aki roko n te bwatakataka te oera are n te kaatibu are uarereke, ni kaineti ma ana taeka Iehova are e taekinna rinanon Eria.
17 Imwini baikai, ao e a bwaka n aoraki natin te aine are ana auti arei, ao e a rangi ni kakaiaki aorakina n te aro are e a mate.+ 18 Ngaia are e taku neiei nakon Eria: “Tera te bwai ae ko a bon ekainako* iai, ngkoe ae ana aomata te Atua ae koaua? Ko roko bwa ko na kauringai au bure ao ni kamatea natiu?”+ 19 Ma e taku nakon neiei: “Anganai natim.” Imwina ao e anaia mai anganibain neiei ao e uotia nakon te ruu are i aon te taubuki, ike e memena iai teuaei, ao e kawenea i aoni nnena ni wene.+ 20 Ao e wetea Iehova ni kangai: “Iehova ae Atuau,+ ko karekea naba kain te aine ae e a tia ni mate buuna aei ae I memena irouna n arom ni kariaia bwa e na mate natina?” 21 Ao e rabwata te ataei tenua te tai ao e wetea Iehova ni kangai: “Iehova ae Atuau, taiaoka ma kariaia bwa e na manga oki maiun* te ataei aei.” 22 Ao e ongo Iehova n ana bubutii Eria,+ ao e a manga oki maiun* te ataei ao e a manga oki korakorana.*+ 23 E anaa te ataei Eria ao e uotia rikaaki man te ruu are i aon te taubuki nako nanon te auti ao e angan tinana. Ao e taku Eria: “Noria, e a maiu natim.”+ 24 Ngaia are e taku te aine arei nakon Eria: “I a ataia ngkai bwa boni ngkoe ana aomata te Atua+ ao e boni koaua ana taeka Iehova are ko taekinna.”
18 Imwin tabeua te tai, n te katenua n ririki,+ ao e a roko ana taeka Iehova iroun Eria, ae kangai: “Naako kaotiko nakon Aaba, ao N na kabwakaa te karau i aontano.”+ 2 Mangaia are e nako Eria ni kaotia nakon Aaba, n te tai are e a korakora iai te rongo+ i Tamaria.
3 N te tai anne, ao Aaba e wetea Obaria are te mataniwi i aoia kaaini batana. (E rangi ni mamaaka Iehova teuae Obaria, 4 ao ngke e tabe Ietebera+ ni katiai aroia* ana burabeti Iehova, ao Obaria e kairiia burabeti aika 100 ao e karabaia ni kaka 50 n te nangananga, ao e angangania te kariki ma te ran.) 5 E taku ngkanne Aaba nakon Obaria: “Naako rinanon te aba nakon taiani koburake n ran ni kabane ao nakon taiani mwarua ni kabane. Tao ti na kona ni kunei uteute aika tau ibukini kateimatoaani maiuia aoti ao miure, ao a na aki bane ni mate ara man.” 6 Mangaia are a bwenauaa te aba i marenaia are a na rinanona. Ao e nako Aaba n tii ngaia n te kawai teaina ao e nako Obaria n tii ngaia n te kawai are teaina.
7 Ngke e a touaanako kawaina Obaria ao e mena ikekei Eria bwa e na kaitiboo ma ngaia. E a boni kinaa naba ngkekei ao e katorobubua ni bobaraaki nako aontano ao e taku: “Boni ngkoe aei, au toka ae Eria?”+ 8 E kaeka ni kangai nakoina: “Boni ngai. Naako ao tuanga am toka ni kangai: ‘E a roko ikai Eria.’” 9 Ma e taku: “Tera te bure ae I karaoia ngkai ko riai n anga am toro nakon Aaba bwa e na kamateai? 10 Ngkai bon iai Iehova ae Atuam, ao bon akea te natannaomata ke te tautaeka n uea teuana ae e aki kanaanako nako iai au toka ibukini kakaaeam. Ao imwin ae a kangai, ‘Akea ikai,’ ao e kairoroa te tautaeka n uea ao te natannaomata anne bwa a na taetae n tuea bwa ko a bon aki reke irouia.+ 11 Ao ngkai ko a kangai, ‘Naako ao tuanga am toka ae kangai: “E a roko ikai Eria.”’ 12 Ngkana I kitaniko ao ane e na kairikonako taamnein Iehova+ nakon te tabo ae N na aki ataia, ao ngkana I tuanga Aaba ao e aki roko n te kuneko, ao e na boni kamateai. Ma e boni mamaaka Iehova am toro aei mangke te roro n rikirake. 13 Tiaki e a tia ni kaongoaki au toka te bwai are I karaoia ngke e tiringia ana burabeti Iehova neiere Ietebera, ao arou ni karabaia ana burabeti Iehova aika 100 ni kaka 50 n te nangananga, ao n angangania te kariki ma te ran?+ 14 Ma ngkai ko a kangai, ‘Naako ao tuanga am toka ni kangai: “E a roko ikai Eria.”’ E na boni kamateai.” 15 Ma e taku Eria: “Ngkai bon iai Iehova ae Atuaia taanga ni buaka,* are I toro irouna,* ao N na boni kaotai n te bong aei nakon teuanne.”
16 Mangaia are e nako Obaria ni kawara Aaba ao e tuangnga, ao e nako Aaba ni kawara Eria.
17 E taku Aaba n te tai are e bon nora naba iai Eria: “Ngaia ai boni ngkoe aei ae te tia uouota te kangaanga* ae korakora nako aoia tibun Iteraera?”
18 Mangaia are e taku: “I aki uouota te kangaanga nako aoia tibun Iteraera, ma boni ngkoe ma kaain ana utu tamam, n aromi ni kitan ana tua Iehova ao n iririia taiani Baara.+ 19 Ao ngkai weteiia tibun Iteraera ni kabane nakoiu nakon te Maunga ae Karemera,+ n ikotaki ma ana burabeti Baara aika 450 ao burabetin te kai ae tabu*+ aika 400, ake a amwamwarake n ana taibora Ietebera.” 20 Mangaia are e kanakoa ana taeka Aaba nakoia tibun Iteraera ni kabane ao e ikotiia burabeti akekei n te Maunga ae Karemera.
21 Ao Eria e kaania aomata ni kabane ao e taku: “Kam na maanra ni waakinako n aki momotika ami iango?*+ Ngkana Iehova bon te Atua ae koaua, ao kam na iria,+ ma ngkana Baara ao kam na iria!” Ma a aki taekina te taeka teuana aomata ni kaekaa iai. 22 E taku ngkanne Eria nakoia aomata: “Bon tii ngai nikiraia ana burabeti Iehova,+ ma ana burabeti Baara boni mwaane aika 450. 23 Ke a anganira kaao mwaane aika ataei aika uoman, ao ke a rinea temanna te kao mwaane ae ataei ao a na korokoreia ao a na kaaki i aon te aia, ma a aki riai ni kaaki te ai iai. Ao N na katauraoa ngai te kao mwaane ae ataei are temanna, ao N na kaaki i aon te aia, ma N na aki kaaki te ai iai. 24 Ao kam riai n taboa aran atuami,+ ao ngai N na wetea aran Iehova. Te Atua ane kaeka n te ai, e na kaotia bwa boni ngaia te Atua ae koaua.”+ Ao a bane ni kaeka aomata ni kangai: “E raoiroi te bwai ane ko taekinna.”
25 E a taku ngkai Eria nakoia ana burabeti Baara: “Rinea te kao mwaane temanna ae ataei ao katauraoia moa, bwa are kam mwaiti riki. Ao kam na taboa aran atuami ma kam aki riai ni kaaki te ai iai.” 26 Mangaia are a anaa te kao mwaane ae ataei are a anganaki, ao a katauraoia, ao a wewetea arani Baara man te ingabong ni karokoa ae tawanou, ni kangai: “Baara, ko na kaekaira!” Ma akea te bwanaa ao akea ae e kaeka.+ A teimatoa ni waekirere ni mwamwaie ni katobibia te baonikarea are a karaoia. 27 Ngke tao e a tawanou, ao e a kakanikoia Eria ni kangai: “Kabanea takaruami ni wewete! Bwa bon te atua!+ Tao ane e tabe n iango, ke tao ane e nako moa n rairaki* ke tao e a matu ma e riai temanna ni kautia!” 28 A wewete ni kabanea takaruaia ao a korokoreiia n taiani bekenene ao ni kainiwai, ni kaineti ma aia katei, ni karokoa tiinakon raraaia ni kabutaa i aoia. 29 Imwin tawanou ao a bon teimatoa naba n aroia are kaanga a rangirang* ni karokoa ai taini kareanakin te karea ae te amwarake n te tairiki, ma bon akea te bwanaa ao akea ae e kaeka, bon akea ae e mutiakinia.+
30 Imwin te tai ae maan ao e a taku Eria nakoia aomata ni kabane: “Kaaniai.” Mangaia are a bane aomata ni kaania teuaei. Ao e a manga karaoa uruakin ana baonikarea Iehova are e uruaki.+ 31 E anai ngkanne atibu aika 12 Eria, ae boraoi ma mwaitin aia baronga tibun Iakoba, are e roko irouna ana taeka Iehova ae kangai: “Ai Iteraera aram.”+ 32 Ao e karaoa te baonikarea n taian atibu+ n aran Iehova. Ao e kena te mwanono ae abwabwaki ni katobibia te baonikarea, ae te tabo ae bon tau buburana ibukin unikakin te koraa ae mwaitina uoua te bwai ni baire ae te tiea.* 33 Imwin anne ao e bairei raoi mwakorokoro n aia, e korokorea te kao mwaane are ataei, ao e kaaki i aon te aia.+ Ao e taku: “Kaoni kaatibu aika aai aika bubura n te ran ao kabwaroa i aon te karea ni kabuekaki ao i aoni mwakorokoro n aia.” 34 Ao e taku: “Manga karaoia riki.” Ai ngaia are a a manga karaoia riki. E a manga taku riki: “Karaoia riki n te katentai.” Ai ngaia are a a manga karaoia n te katentai. 35 Ao e raanga te ran ni katobibia te baonikarea ni kabutaa, ao e kaona naba te mwanono are abwabwaki arei n te ran.
36 Ao ngke e nangi roko taini kareanakin te karea ae te amwarake n te tairiki,+ ao e keerake Eria are te burabeti ao e taku: “Iehova ae Atuan Aberaam,+ Itaaka,+ ao Iteraera, kaotia n te bong aei bwa bon te Atua ngkoe i Iteraera, ao bon am toro ngai, ao n am taeka ae ngaia ae I karaoi iai baikai ni kabane.+ 37 Kaekaai ngkoe ae Iehova! Kaekaai bwa a aonga n ataiko aomata aikai ae boni ngkoe Iehova ae te Atua ae koaua, ao ko a manga rairi nanoia nakoim.”+
38 Ao e bwaka ana ai Iehova mai karawa ao e kabueka te karea ni kabuekaki,+ mwakorokoro n aia, atibu, ao te tano, ao e temeka te ran man te mwanono are abwabwaki arei.+ 39 Ngke a bane n noria aomata, ao a aki tabwara ma a a katorobubua naba ni bobaraaki nako aontano ao a taku: “Iehova bon te Atua ae koaua! Iehova bon te Atua ae koaua!” 40 E taku ngkanne Eria nakoia: “Tauia ana burabeti Baara akanne! Tai kariaia bwa e na rabanako temanna mai buakoia!” A aki tabwara ma a a tauia naba ao e kairiia n ruo Eria nakon te karaanga* ae Kition+ ao e kamateia ikekei.+
41 E a taku ngkai Eria nakon Aaba: “Waerake n amwarake ao ni moi bwa iai neaani bwakan te karau ae korakora.”+ 42 Mangaia are e waerake Aaba n amwarake ao ni moi, ngke e waerake Eria nako taubukini Karemera ao ni kauangi i aontano, ni kaaki ubuna i marenani bubuaniwaena.+ 43 E taku ngkanne nakon ana tabonibai: “Waerake taiaoka, ao taraa marawa.” Mangaia are e waerake teuarei n taraia ao e taku: “Bon akea naba te bwai teuana.” Bon itiua ana tai Eria ni kangai, “Naako oki.” 44 N te kaitiua n tai ao e a taku ana tabonibai: “Noria! Iai te nang ae uarereke ae ai aroni bain te aomata ae kaborake mai marawa.” E a taku ngkai: “Naako ao kangai nakon Aaba, ‘Katauraoa am kaa ni buaka! Ruuo rikaaki bwa e aonga n aki kabaenikaiko bwakan te karau!’” 45 N te tai anne ao e a roo karawa n taian nang, ao e a kare te ang, ao e a bwaka te karau ae korakora,+ ao e teimatoa Aaba n touaanako kawaina ni karokoa Ietireera.+ 46 Ma e roko bain Iehova i aon Eria, ao e kabaea ana kunnikai n ninira* bebeena, ao e biri rimoan Aaba ni karokoa Ietireera.
19 Ao Aaba+ e tuanga Ietebera+ bwaai ni kabane ake e karaoi Eria ao arona ni kamateia burabeti ni kabane n te kabaang.+ 2 Ao Ietebera e kanakoa te tia uataeka nakon Eria, ni kangai: “A bia katuuaaeai atua ao ni kamwaitia riki, ngkana I aki karaoiko n ai aroia nakanne n tatabemania nako n taina naba aei ningabong!” 3 Ao e a maaku, mangaia are e teirake ao e birinako n rawea maiuna.*+ Ao e a roko i Beerateba,+ ae kaawan Iuta,+ ao e katuka ikekei ana tabonibai. 4 E a mwananga nako i nanon tebongina nakon te rereua, ao e roko ao e tekateka i aan te aroka* teuana, ao e a bubutii bwa e nangi mate. E taku: “E a tau! Iehova, an anaa maiuu* ngkai,+ bwa I aki raoiroi riki nakoia au bakatibu.”
5 Ao e a wene ao e a matunako i aan te aroka arei. Ma e a rina naba te anera n ringa teuaei+ ao e taku nakoina: “Teirake ao amwarake.”+ 6 Ngke e taratara nako, ao e mena i etan atuna te kariki ae mronron i aon atibu aika kabuebue ao te tiaeki n ran. E amwarake ao e moi ao e a manga wene riki. 7 Imwina riki ao e a manga oki ana anera Iehova n te kauatai ao e ringnga ao e taku: “Teirake ao amwarake, bwa e na rangi n riao te mwananga aei iroum.” 8 Mangaia are e teirake ao e amwarake ao e moi, ao mani korakorana are reke n te amwarake anne, ao e a mwananga nako iai i nanon 40 te ngaina ao 40 te bong ni karokoa rokona i Oreba, are ana maunga te Atua ae koaua.+
9 Ao e rin i nanon te nangananga teuana,+ ao e tiku iai n te tairiki anne, ao noria! E roko ana taeka Iehova irouna ao e tuangnga ni kangai: “Tera ae ko karaoia ikai Eria?” 10 Ao e taku: “I rangi n ingainga ibukin Iehova ae Atuaia+ taanga ni buaka, bwa a a tia tibun Iteraera ni kakeaa bongan am berita,+ a urui am baonikarea, ao a tiringia am burabeti n te kabaang,+ ao ai bon tii ngai n tiku. Ao ngkai a a manga ukoukora anaakini maiuu.”*+ 11 Ma E taku: “Naako otinako, ao teei i aon te maunga i matan Iehova.” Ao noria! E rikekei Iehova+ ao te ang ae matoa ma ni korakora e katabwenai maunga ao e urui bwaa i matan Iehova,+ ma e aki mena Iehova i nanon te ang. Imwin te ang ao e roko te mwaeiei,+ ma e aki mena Iehova i nanon te mwaeiei. 12 Imwin te mwaeiei ao e roko te ai,+ ma e aki mena Iehova i nanon te ai. Imwin te ai ao ai te bwanaa ae maraara.+ 13 Ngke e ongo naba ngkekei Eria, ao e karabaa ubuna n ana kunnikai ni burabeti+ ao e otinako ao e tei i matan te nangananga arei. Ao e titirakinna te bwanaa arei ni kangai: “Tera ae ko karaoia ikai Eria?” 14 Ao e taku: “I rangi n ingainga ibukin Iehova ae Atuaia taanga ni buaka, bwa a a tia tibun Iteraera ni kakeaa bongan am berita,+ a urui am baonikarea, ao a tiringia am burabeti n te kabaang, ao ai bon tii ngai n tiku. Ao ngkai a a manga ukoukora anaakini maiuu.”*+
15 E taku Iehova nakoina: “Oki rikaaki ao naako nakon rereuan Tamateko. Ngkana ko roko, ao kabira Atiaera+ bwa te uea i aon Turia. 16 Ao ko riai ni kabira Ieu+ are tibun Nimti bwa uean Iteraera, ao ko riai ni kabira Eritai* are natin Tiabata mai Aberameorata bwa te burabeti ae e na onea mwim.+ 17 Ane e birinako man ana kabaang Atiaera,+ ao e na kamateaki iroun Ieu,+ ao ane e birinako man ana kabaang Ieu, ao e na kamateaki iroun Eritai.+ 18 Ao I katikuia 7,000 i Iteraera,+ ae te koraki ni kabane aika tuai ni katorobubua bubuaniwaeia nakoni Baara,+ ao a tuai ni kaboria wia ma ngaia.”+
19 Mangaia are e nako mai ikekei ao e nora Eritai are natin Tiabata ngke e tabe ni kamaraua te tano ma kaao aika ririmoana aika 24 aika a kakaai uoman, ao ngaia e airi ma ake uoman ake taiani kabane. Mangaia are e nako Eria ni kawara teuaei ao e kaaki ana kunnikai ni burabeti+ i aon teuaei. 20 Ao e kitania kaao mwaane akekei ao e biri rimwin Eria ao e taku: “Taiaoka ma kariaia bwa N na kaboria ma tamau ao tinau, ao imwina I a iriko naba.” Ao e kaekaa ni kangai: “Naako oki, bwa tera ae I karaoia ae I katokiko iai?” 21 Ngaia are e a oki rikaaki ao e anaiia kaao mwaane aika uoman ao e kareani, ao e kabongana ana bwai ni kamarautano ni kaburoi iai irikoni kaao mwaane akekei, ao e angania aomata, ao a amwarake. Imwin anne ao e teirake n rimwin Eria ao e a moana ana beku irouna.+
20 Ao Benataata+ are Uean Turia+ e ikotiia ana taanga ni buaka ni kabane n ikotaki ma ueea riki tabeman aika 32, ma aia aoti ao aia kaa ni buaka. E waerake ao e otabwaninia+ Tamaria+ ao e buakanna. 2 Ao e kanakoia taan uataeka nakon te kaawa nakon Aaba+ are uean Iteraera ao e taku nakoina: “E kangai ana taeka Benataata, 3 ‘Bon au bwai am tirewa ma am koora, n ikotaki ma buum ao natim mwaane aika taiani kabanea n tamaroa.’” 4 Ao e kaeka ni kangai uean Iteraera: “Ni kaineti ma am taeka au toka ae te uea, ao bon am bwai ngai n ikotaki naba ma au bwai ni kabane.”+
5 Imwina riki ao a a oki taan uataeka ao a taku: “E kangai ana taeka Benataata, ‘I kanakoa te rongorongo ae kangai nakoim: “Ko na anganai am tirewa, am koora, buum nako, ao natim aika mwaane.” 6 Ma tao n taina naba aei ningabong ao N na kanakoia au toro nakoim, ao a na kakaae raoi i nanon am auti ma aia auti am toro, ao ane a na taui am bwai ni kabane aika ko tangiri, ao a na uotiinako.’”
7 Ngaia are e a weteiia ni kabane unimwaanen te aba uean Iteraera ao e taku: “Kam na ataia taiaoka ao n noria bwa e kani karokoa te kabuanibwai te mwaane aei. Bwa e kairoroa anaakia buu, natiu mwaane, au tirewa, ao au koora, ao I aki rawa nakoina.” 8 Ao a taku unimwaane ni kabane ma aomata ni kabane nakoina: “Tai ongo ao tai kariaia.” 9 Mangaia are e taku nakoia ana tia uataeka Benataata: “Kangai nakon au toka ae te uea, ‘N na karaoi bwaai ni kabane ake ko moani kairoroi mairoun am toro, ma I a aki ngkanne kona ni karaoa aei.’” Ao a a nako taan uataeka akekei n uota rikaaki te taeka nakon teuarei.
10 Ao Benataata e kanakoa nakoina te rongorongo ae kangai: “A bia katuuaaeai atua ao ni kamwaitia riki, ngkana e tau tanon Tamaria n anganaki temanna ma temanna ae irirai, kaka te abutana mai iai!” 11 E kaeka uean Iteraera ni kangai: “Tuanga teuanne ni kangai, ‘Imwain ae e moanaki te buaka, ao tai kamoamoa bwa aongkoa ko a tokanikai n te buaka.’”+ 12 Ngke e ongo naba ngkekei te kaeka aei, ngke e tabe ni moi ma ueea n aia umwanrianna nako, ao e a taku naba nakoia ana toro: “Katauraoingkami nakon te buaka!” Mangaia are a a katauraoiia bwa a na buakana te kaawa.
13 Ma te burabeti temanna e kawara Aaba+ are uean Iteraera ao e taku: “E kangai ana taeka Iehova, ‘Ko noriia aomata aika uanao aikai? N na anga nako nanoni baim n te bong aei, ao ane ko na ataia bwa bon Iehova ngai.’”+ 14 E titiraki Aaba ni kangai: “Rinanon antai?” ao e kaeka teuarei ni kangai: “E kangai ana taeka Iehova, ‘Rinanoia aia tabonibai tooka ake man taian aono.’”* Ngaia are e a titiraki ni kangai: “Ao antai ae e na moana te buaka?” ao e kaeka teuarei ni kangai: “Boni ngkoe!”
15 E a warekiia ngkanne aia tabonibai tooka ake man taian aono akekei, ao bon 232 mwaitiia. Imwin anne ao e warekiia tibun Iteraera ni kabane, ao bon 7,000 mwaitiia. 16 Ao a otinako man te kaawa ngke e a tawanou ngke e tabe Benataata ni kakoroa ni manging i nanon taian umwanrianna, n ikotaki ma ueea ake 32 ake a buokia. 17 Ngke a moan otinako aia tabonibai tooka ake man taian aono, ao e aki tabwara Benataata ma e a kanakoia naba taan uataeka. Ao a kaongoa ae kangai: “A a otinako mwaane mai Tamaria.” 18 Ao e taku teuaei: “Ngkana a otinako ibukin te raoi ao kamaiuia, ke ngkana a otinako ibukin te buaka ao kam bon riai naba ni kamaiuia.” 19 Ma ngke a otinako nakekei man te kaawa, ake aia tabonibai tooka ake man taian aono, ma taanga ni buaka ake a rimwia, 20 ao a a kamateia naba aiaia ngaiia n tatabemania nako. Ao a birinako I-Turia+ ao tibun Iteraera a kaeiia naakai, ma e reke birinakon Benataata are Uean Turia ma tabeman taan toka i aoia aoti. 21 Ma e otinako uean Iteraera ao e teimatoa n oreiia aoti ni kabwakaia ma taiani kaa ni buaka, ao e karokoa te konaaki* ae korakora i aoia I-Turia.
22 Imwina riki ao te burabeti+ arei e a kawara uean Iteraera ao e taku nakoina: “Naako kakorakorako ao iangoa te bwai ae ko na karaoia,+ bwa ni moan te ririki ae e na roko,* ao ane e na waerake n ekikonako uean Turia.”+
23 E a taku ngkai ana toro uean Turia nakon teuaei: “Atuaia bon Atuan taiani maunga. Anne bukina ae a tokanikai i aora. Ma ngkana ti buakania n te aba ae aoraoi, ao ti na tokanikai i aoia. 24 Ao karaoa naba aei: Kanakoia ueea ni kabane+ mani nneia ao onei mwia irouia taiani kowana. 25 Ao ikota* te taanga ni buaka ae titeboo raoi ma am taanga ni buaka are konaaki, te aoti bwa booni mwin te aoti, ao te kaa ni buaka bwa booni mwin te kaa ni buaka. Ao ti na buakania n te aba ae aoraoi, ao ti na bon tokanikai i aoia.” Mangaia are e ongo teuaei n aia taeka n reirei ao e karaoa anne.
26 Ni moan te ririki* ao e a ikotiia I-Turia Benataata ao e waerake nako Abeki,+ bwa e na buakania tibun Iteraera. 27 A ikotaki naba tibun Iteraera ao a katauraoaki kanaia, ao a otinako n aitara ma ngaiia. Ngke a kaembwa tibun Iteraera i moaia nakekei, ao kaanga ai aroia nanai ni kooti ngaiia aika uananai aika rangi n uarereke mwaitiia, ao I-Turia a kabutaa te aba.+ 28 Ao ana aomata te Atua ae koaua e kawara uean Iteraera ao e taku: “E kangai ana taeka Iehova, ‘Ibukina bwa a kangai I-Turia: “Bon Atuan taiani maunga Iehova, ao tiaki Atuan taabo aika aoraoi,” ao N na anga aomata aika uanao aikai ni kabane nako nanoni baim,+ ao kam na bon ataia bwa bon Iehova ngai.’”+
29 A teimatoa ni kaembwa ni kaaitara ma nakekei i nanon itibong, ao n te kaitiua ni bong ao e a waaki te buaka. Ao tibun Iteraera a kamateia i nanon teuana te bong tautian Turia aika taan rianna aika 100,000. 30 Ao ake nikiraia a birinako nako Abeki+ nako nanon te kaawa. Ma e bwaka te oo i aoia mwaane aika 27,000 ake a tiku. E birinako naba Benataata ao e rin n te kaawa, ao e karabaa n te ruu ae raba.
31 Mangaia are a taku ana toro teuaei nakoina: “Noria, ti a tia n ongo bwa uean Iteraera bon ueea aika nanoanga.* Taiaoka ma kariaia bwa ti na bwaini kunnikai aika raerobwa* i aoni bebeera ao ni kaaki taian roobu i aon atura ao ti na otinako nakon uean Iteraera, ao tao ane e na kamaiuko.”+ 32 Ngaia are a kabaei kunnikai aika raerobwa i aoni bebeeia ma taian roobu i aon atuia, ao a rinnako nakon uean Iteraera ao a taku: “E kangai am toro are Benataata, ‘Taiaoka ma kariaia bwa N na maiu.’” E kaeka teuaei ni kangai: “E boni maiu? Bon tariu teuanne.” 33 Ao mwaane akekei a iangoa anne bwa te kanikina ae raoiroi ao a waekoa ni butimwaea ana taeka teuaei, ai ngaia are a taku: “Bon tarim Benataata.” Ao e taku teuaei: “Naako anaia.” Ao e otinako Benataata ni kawara teuaei, ao e katokaa n te kaa ni buaka.
34 E a taku ngkai Benataata nakoina: “N na kaoki kaawa ake e anai tamau mairoun tamam, ao ko kona ni katei am tabo ni boobwai* i Tamateko n aron are e karaoia tamau i Tamaria.”
E kaeka ni kangai Aaba: “Ibukin te boraraoi* aei ao N na kanakoko.”
Ao e karaoa te boraraoi ma ngaia ao e kanakoa.
35 Ao e taku temanna mai buakoia natiia burabeti*+ nakon raona, ni kaineti ma ana taeka Iehova: “Oreai taiaoka.” Ma e rawa teuarei n oreia. 36 Ngaia are e taku nakon teuarei: “N te tai are ko kitanai iai ao ane e na tiringko* te raian, ibukina bwa ko aki ongo ni bwanaan Iehova.” Ngke e kitana teuaei ao e a roko naba te raian irouna ao e tiringnga.
37 E a manga nora riki te mwaane temanna ao e taku: “Oreai taiaoka.” Ao teuarei e oreia ao e kaikoakia.
38 Ao e nako te burabeti arei ao e taningaa te uea i rarikin te kawai, ao e bita teina n rabuni matana ni bautia. 39 Ngke e rirarikina te uea ao e takarua nakon te uea ni kangai: “E mwananga am toro nakon te buaka ae korakora ao iai te mwaane temanna ae kitana te buaka ae e kaira te mwaane temanna nakoiu ao e taku, ‘Tararuaa teuaei. Ngkana e bua ao e na oneaki mwini maiuna ni maium,*+ ke ko na kabwakaa teuana te tarena* n tirewa.’ 40 Ao ngke e a bae n tabetabe am toro ikai ao ikekei, ao e a rina naba ni bua teuaei.” E taku uean Iteraera nakoina: “E na motikaki taekam n aron anne, bwa ko a tia ni motikia i bon iroum.” 41 Ao e waekoa ni kanakoa rabunani matana are bautaki iai, ao uean Iteraera e a kinaa teuaei bwa bon temanna ngaia i buakoia burabeti.+ 42 E taku teuarei nakoina: “E kangai ana taeka Iehova, ‘Ibukina bwa ko a tia ni kanakoa mai nanoni baim te mwaane are I taekinna bwa e riai ni kamaunaaki,+ ao e na oneaki mwini maiuna ni maium,*+ ao am aomata a na onei mwia ana aomata.’”+ 43 Ao e nako uean Iteraera nakoni mwengana+ ma te aki kukurei ao te rawawata.
21 Imwini baikai ao e a riki te bwai teuana ni kaineti ma ana nne ni kureebe Nabota ae te I-Ietireera, ae e mena i Ietireera+ n uakaan ma ana baareti Aaba are uean Tamaria. 2 E taku Aaba nakon Nabota: “Anganai am nne ni kureebe bwa N na kabongana bwa te onnaroka ibukin aroka aika kakanaki, bwa e kaan ma au auti. Ao N na anganiko te nne ni kureebe ae raoiroi riki bwa oneani mwina. Ke ngkana ko kukurei riki iai, ao N na anganiko te mwane bwa boona.” 3 Ma e taku Nabota nakon Aaba: “I bon aki kona n iangoa karaoan ae N na anganiko tibwangaia au bakatibu, bwa e katabuaka anne Iehova.”+ 4 Mangaia are e a rin Aaba n ana auti ma te aki kukurei ao te rawawata ibukin ana kaeka Nabota are te I-Ietireera nakoina, ngke e kangai: “N na aki anganiko tibwangaia au bakatibu.” Ao e wene i aoni nnena ni wene ao e katannakoa ubuna ao e rawa n amwarake.
5 E rin nakon teuaei Ietebera are buuna,+ ao e titirakinna ni kangai: “E aera ngkai ko a rangi n nanokawaki ao ko a rawa n amwarake?” 6 E kaeka ni kangai nakon neiei: “Ibukina bwa I kangai nakon Nabota are te I-Ietireera, ‘Anganai am nne ni kureebe bwa N na kabooa n te mwane. Ke ngkana ko kukurei riki iai, ao N na anganiko te nne ni kureebe teuana bwa oneani mwina.’ Ma e taku, ‘N na aki anganiko au nne ni kureebe.’” 7 E taku buuna are Ietebera nakoina: “Tiaki boni ngkoe ae ko tautaeka bwa uean Iteraera? Teirake ao amwarake, ao ke e kakatonga nanom. N na anganiko ana nne ni kureebe Nabota are te I-Ietireera.”+ 8 Ngaia are e korei reeta neiei n aran Aaba, ao e kanikinaei n ana bwai ni kanikina teuaei,+ ao e kanakoi reeta aikai nakoia unimwaane+ ma bwaanuea ake a maeka n ana kaawa Nabota. 9 E korea ae kangai n reeta akekei: “Katanoataa te aki mamatam, ao katekatekaa Nabota i moaia aomata. 10 Ao katekatekaia mwaane aika uoman aika akea uaaia i matan teuanne, ao a na kaotioti n ekaanako teuanne+ ni kangai, ‘Ko a tia n taetae ni karereantia te Atua ao te uea!’+ Ao kaotinakoa teuanne ao karebanaia n atibu n uaa matena.”+
11 Ao mwaanen ana kaawa teuarei ma unimwaane ao bwaanuea ake a maeka n ana kaawa, a karaoa are e koreaki n reeta ake e kanakoi Ietebera nakoia. 12 A katanoataa te aki mamatam ao a katekatekaa Nabota i moaia aomata. 13 Ao a rinnako mwaane aika uoman aika akea uaaia ao a tekateka i matan teuaei ao a a kaotioti n ekaanako Nabota i mataia aomata, ni kangai: “E a tia Nabota n taetae ni karereantia te Atua ao te uea!”+ Imwin anne ao a kaira teuaei nako tabon te kaawa ao a karebanaia n atibu n uaa matena.+ 14 Ao a kanakotaeka nakon Ietebera ni kangai: “E a tia ni karebanaaki Nabota n atibu n uaa matena.”+
15 Ngke e ongo naba ngkekei Ietebera bwa e a tia ni karebanaaki Nabota n atibu n uaa matena, ao e taku nakon Aaba: “Teirake ao anaa ana nne ni kureebe Nabota are te I-Ietireera+ bwa am bwai, are e rawa n anganiko bwa ko na kabooa n te mwane, bwa e a aki maiu Nabota. E a mate.” 16 Ngke e ongo naba ngkekei Aaba bwa e a mate Nabota, ao e teirake Aaba bwa e na ruo nakon ana nne ni kureebe Nabota are te I-Ietireera, n anaia bwa ana bwai.
17 Ma e roko ana taeka Iehova iroun Eria+ are te I-Titibe, ae kangai: 18 “Teirake ao ruuo naako kawara Aaba are uean Iteraera are mena i Tamaria.+ Ane e mena n ana nne ni kureebe Nabota, ike e nako iai bwa e na anaia bwa ana bwai. 19 Ko riai n tuangnga ni kangai, ‘E kangai ana taeka Iehova: “Ko a tia n tiringa te mwaane temanna+ ao ko anaa naba ana bwai?”’*+ Imwina ao kangai nakoina, ‘E kangai ana taeka Iehova, “Ane a na newenewea oin raraam taiani kamea n te tabo are a newenewea naba iai raraan Nabota.”’”+
20 Ao e taku Aaba nakon Eria: “I a reke iroum, ngkoe ae te tia kairiribai nakoiu!”+ E kaeka ni kangai teuaei: “Ko a reke irou. ‘Ibukina bwa ko motikia* bwa ko na karaoa ae buakaka i matan Iehova,+ 21 ao N nang karokoa te kabuanibwai i aom, ao N na karaoa te kaitiaki n taeianako ao ni kamaunaia man ana utu Aaba, mwaane*+ ni kabane n ikotaki ma aika akea korakoraia ao aika mamaara i Iteraera.+ 22 Ao N na karaoiia am utu bwa ai aroia ana utu Ieroboam+ are natin Nebata, ao ai aroia ana utu Baata+ are natin Aiia, bwa ko kaunai ao ko karekeia tibun Iteraera n te bure.’ 23 Ao e kangai Iehova ni kaineti naba ma Ietebera, ‘A na kana Ietebera kamea ni mwakoron te aba ae Ietireera.+ 24 Ana utu Aaba ae e mate n te kaawa a na kanna kamea, ao ane e mate n te tawaana a na kanna mannikiba ake i annang.+ 25 Ni koauana, bon akea temanna ae ai aron Aaba+ ae e a tia ni motikia* raoi bwa e na karaoa ae buakaka i matan Iehova, ao e kaungaaki irouni buuna ae Ietebera.+ 26 E karaoa te aro ae moan te riribaaki teuaei n arona ni kakairi irouia bouannanti aika kamwara,* n aron are a karaoia taian Amoraite ni kabane, ake e kakioianako Iehova mai mwaia tibun Iteraera.’”+
27 Ngke e ongo naba ngkekei Aaba taeka aikai, ao e raeuai kunnikaina ao e kaaki te raerobwa* i aon rabwatana, ao e aki mamatam ao e teimatoa ni wene i aon te raerobwa ao e nanakonako ma te bwarannano. 28 Ao e roko ana taeka Iehova iroun Eria are te I-Titibe, ae kangai: 29 “Ko nora aron Aaba ni kananorinanoa ibukiu?+ N na aki karokoa te kabuanibwai n ana tai ni maiu ibukina bwa e kananorinanoa i matau. N na karokoa te kabuanibwai i aon ana utu n ana bong natina te mwaane.”+
22 Bon akea te buaka i marenan Turia ma tibun Iteraera i nanon tenua te ririki. 2 N te katenua n ririki ao e a ruo Ieotiabata+ are uean Iuta nakon uean Iteraera.+ 3 Ao e taku uean Iteraera nakoia ana toro: “Kam ataia ae bon ara kaawa Ramotakireata?+ Ma e ngae n anne ti waeremwe n anaia ni kaokia mairoun uean Turia.” 4 E taku ngkanne nakon Ieotiabata: “Ko kan irai ni buaka i Ramotakireata?” Ao Ieotiabata e kaekaa uean Iteraera ni kangai: “Bon titeboo ngai ma ngkoe, titeboo au aomata ma am aomata, ao titeboo au aoti nako ma am aoti.”+
5 Ma e taku Ieotiabata nakon uean Iteraera: “Taiaoka ma titiraki moa+ ibukin ana taeka Iehova.”+ 6 Mangaia are e ikotiia burabeti uean Iteraera, aika mwaane aika tao 400 ao e taku nakoia: “I riai n nako ni buakana Ramotakireata, ke N na aki?” A taku nakekei: “Waerake, ao ane e na anga Iehova nako nanoni bain te uea.”
7 E taku ngkanne Ieotiabata: “Akea ikai ana burabeti Iehova? Ti na titirakina naba te Atua rinanon teuaei.”+ 8 Ao e taku uean Iteraera nakon Ieotiabata: “Ai tii temanna riki te mwaane ae ti kona n titirakina Iehova rinanona.+ Ma I ribaa teuaei+ bwa e aki kona n taetae ni burabetini baika raraoi ni kaineti ma ngai, ma tii ae buakaka.+ Boni Mikaia ae natin Imraa.” Ma e taku Ieotiabata: “E aki riai te uea n taekina anne.”
9 Ao uean Iteraera e wetea te mataniwi temanna ao e taku: “Kairaamai Mikaia are natin Imraa n te tai ae waekoa.”+ 10 Ao e tekateka uean Iteraera ma Ieotiabata are uean Iuta n aia kaintokanuea n tatabemania nako, ao a kunnikainia n aia kunnikai ueea, i rarikin te tabo ni kaaki kun ni uita n te kawai n rin ni mataroan oon Tamaria, ao a bane burabeti n tataetae ni burabeti i mataia naakai.+ 11 Ao Tetekia are natini Kennaana e karaoi ana bwai aika koron te man aika biiti, ao e taku: “E kangai ana taeka Iehova, ‘Ane ko na ewariia* I-Turia ni baikai, ni karokoa ae ko kamaunaia.’” 12 Ao a bane burabeti ake tabemwaang n taetae ni burabeti n aron naba anne, ni kangai: “Waerake nako Ramotakireata ao ane e na nakoraoi am waaki. E na anga Iehova nako nanoni bain te uea.”
13 Ao te tia uataeka are nako ni wetea Mikaia e taku nakon teuaei: “Noria! A bane n raoiroi aia taeka burabeti iroun te uea. Taiaoka ma e bia riki naba am taeka bwa ai aron aia taeka, ao taekina naba ae raoiroi.”+ 14 Ma e taku Mikaia: “Ngkai bon iai Iehova, ao N na taekina ane e taekinna Iehova nakoiu.” 15 Ao e rin nakon te uea, ao e titirakinna te uea ni kangai: “Mikaia, ti riai n nako ni buakana Ramotakireata, ke ti na aki?” E a kaeka naba ngkekei ni kangai: “Waerake ao ane e na nakoraoi am waaki. E na anga Iehova nako nanoni bain te uea.” 16 Ao e taku te uea nakon teuaei: “Ai iraua au tai ni kaakiko i aan te taetae n tuea bwa ko na aki taekina te bwai teuana nakoiu, ma tii te koaua n aran Iehova?” 17 Mangaia are e taku teuaei: “I noriia tibun Iteraera ni kabane n uamaenako i aon taiani maunga,+ kaanga ai aroia tiibu aika akea te tia kawakinia. E taku Iehova: ‘Akea aia toka naakai. Ke e oki temanna ma temanna nakon ana auti ma te raoi.’”
18 Ao e taku uean Iteraera nakon Ieotiabata: “Tiaki I a tia n tuangko ni kangai, ‘Ane e na aki taetae ni burabetini baika raraoi ni kaineti ma ngai, ma tii ae buakaka’?”+
19 Ao e taku Mikaia: “Mangaia ae ongora n ana taeka Iehova: I nora Iehova n tekateka i aon ana kaintokanuea,+ ao a bane n tei i rarikina te taanga ni buaka ake i karawa, i angaataina ao i angamaingina.+ 20 E taku ngkanne Iehova, ‘Antai ae e na mwamwanaa Aaba bwa e aonga ni waerake ao ni bwaka i Ramotakireata?’ Ao temanna e taekina te bwai teuana, ao are temanna e taekina riki te bwai teuana. 21 Imwina ao e a keerake te taamnei* temanna+ ao e tei i matan Iehova ao e taku, ‘N na mwamwanaia ngai.’ E titirakinna Iehova ni kangai, ‘Ko na kangaa ni karaoia?’ 22 E kaeka ni kangai, ‘N na nako ao n riki bwa te taamnei ae mwamwanaa te aba i wia ana burabeti ni kabane.’+ Mangaia are e taku, ‘Ko na mwamwanaia, ao irarikina ane e na nakoraoi am waaki. Naako ao karaoa anne.’ 23 Ao e a tia ngkai Iehova ni karina te taamnei ae mwamwanaa te aba i wia am burabeti aikai ni kabane,+ ma e a tia Iehova n taekina te kabuanibwai ibukim.”+
24 Ao e keerake Tetekia are natini Kennaana ao e karetabaa Mikaia ao e taku: “Te kawai raa ae e toua taamnein Iehova ngkai e kitanai bwa e na taetae ma ngkoe?”+ 25 E kaeka ni kangai Mikaia: “Noria! Ane ko na noria bwa te kawai raa n te bong are ko rin iai n te ruu ae moan te raba bwa ko na karabako iai.” 26 Ao e taku uean Iteraera: “Anaa Mikaia ao aanga ngaia nakon Amon are mataniwin te kaawa, ao nakon Ioaati are natin te uea. 27 Tuangia ni kangai: ‘E kangai ana taeka te uea: “Karina te aomata aei n te karabuuti,+ ao kaamwarakea ni bwaunana ae uarereke ae te kariki ma te ran, ni karokoa ae I oki ma te raoi.”’” 28 Ma e taku Mikaia: “Ngkana ko oki ma te raoi, ao e aki taetae Iehova ma ngai.”+ Ao e reitia ni kangai: “Kam na ataa aei ngkami aomata ni kabane.”
29 Mangaia are a a waerake nako Ramotakireata uean Iteraera ao Ieotiabata are uean Iuta.+ 30 E a taku ngkai uean Iteraera nakon Ieotiabata: “N na bita teiu ao N na nako buakon te boo ni buaka, ma ko riai ngkoe ni karina am kunnikai n uea.” Mangaia are e bita teina uean Iteraera+ ao e a rin i buakon te boo ni buaka. 31 Ao e a tia uean Turia n tua nakoia 32 mataniwin ana kaa ni buaka,+ ni kangai: “Tai buakana temanna ae mangori ke ae kakannato, ma tii uean Iteraera.” 32 Ao ngke a nora naba ngkekei Ieotiabata mataniwini kaa ni buaka akekei, ao a taku i bon irouia: “Bon aei uean Iteraera.” Mangaia are a rairaki ni buakanna, ao e a tang Ieotiabata ni kani buokaki. 33 Ngke a noria mataniwini kaa ni buaka bwa tiaki uean Iteraera, ao a aki tabwara ma a a rairaki naba mani kaeana.
34 Ma e kakatebe n aki akaka* te mwaane temanna, ao e a teke naba irouna uean Iteraera i marenan ana kunnikai ni buaka. Ngaia are e taku te uea nakon te tia kabuta ana kaa ni buaka: “Rairaki ao kaotinakoai man te boo ni buaka,* bwa I a ikoaki kakaiaki.”+ 35 E a rikirake ni korakora te buaka n te bong anne, ao e a riai te uea ni kateaki n totokoaki i nanon te kaa ni buaka, ni kaaitaraia I-Turia. Ao e titiinako raraan ikoakina nako nanon te kaa ni buaka, ao e mate ngke e a tairiki.+ 36 Ngke tao e nangi bung taai, ao e a takaruaeaki ae kangai ni kabutaa te kaembwa: “A na bane aomata n okiri aia kaawa! A na bane aomata n okiri abaia!”+ 37 Ao e a mate te uea, ao e uotaki nako Tamaria. A kaiia te uea i Tamaria. 38 Ngke a teboka te kaa ni buaka ni kaitiakia n te nei i Tamaria, ao a newenewea raraana kamea ao a tebotebo ikanne aine aika kakabooaki,* n aron are e a tia n taekinna Iehova.+
39 Ni kaineti ngkanne ma nikiran rongorongon Aaba ma bwaai ni kabane ake e karaoi ao te auti* ae te aiwere+ are e kateia, ma kaawa ni kabane ake e katei, tiaki a koreaki n te boki are rongorongon aia tai uean Iteraera? 40 Ao e a wene ni motirawa Aaba i rarikia ana bakatibu,+ ao e a riki Aatia+ are natina bwa te uea n onea mwina.
41 E riki Ieotiabata+ are natin Ata bwa uean Iuta n ana kaaua n ririki n tautaeka Aaba are uean Iteraera. 42 Bon 35 ana ririki Ieotiabata ngke e riki bwa te uea, ao e tautaeka i Ierutarem i nanon 25 te ririki. Aran tinana Atubaa are natin Tirei. 43 E teimatoa n nakonako ni kawain Ata+ ni kabane are tamana. E aki rairakinako mai iai, ao e kakaraoa ae eti i matan Iehova.+ Ma a aki kanakoaki taabo aika rietata, ao a bon teimatoa naba aomata n angakarea ao ni kabueki karea ni kabubui n taabo aika rietata.+ 44 E teimatoa n raoi Ieotiabata ma uean Iteraera.+ 45 Ni kaineti ngkanne ma nikiran rongorongon Ieotiabata ma ana mwakuri aika korakora ao arona ni buaka, tiaki a koreaki n te boki are rongorongon aia tai uean Iuta? 46 E kamwaawaia naba man te aba nikiraia mwaanen te tembora ake a kakabooaki ibukin te wene ni bure,+ ake a tiku n ana bong Ata are tamana.+
47 Akea uean Etom+ n te tai anne, ma e riki te mataniwi bwa kaanga te uea.+
48 E kanakoi naba Ieotiabata kaibuken Taretiti* nako Obira ibukin te koora,+ ma a aki nako ibukina bwa a a uruaki naba i Etionkebera.+ 49 N te tai anne ao e a taku Aatia are natin Aaba nakon Ieotiabata: “Kamwanangaia au toro ma am toro n taiani kaibuke,” ma e aki kariaia Ieotiabata.
50 Ao e a wene ni motirawa Ieotiabata i rarikia ana bakatibu ao e kaiiaki i rarikia ana bakatibu+ n Ana Kaawa Tawita are ana bakatibu, ao e a riki Ioram+ are natina bwa te uea n onea mwina.
51 E riki Aatia+ are natin Aaba bwa uean Iteraera i Tamaria n ana ka-17 n ririki n tautaeka Ieotiabata are Uean Iuta, ao e tautaeka i aoia tibun Iteraera i nanon uoua te ririki. 52 Ao e teimatoa ni karaoa ae buakaka i matan Iehova ao e nakonako ni kawain tamana+ ao tinana,+ ao ni kawain Ieroboam are natin Nebata, are e karekeia tibun Iteraera n te bure.+ 53 E teimatoa n toro irouni Baara+ ao ni bobaraaki nakoina, ao e teimatoa ni kauna Iehova ae Atuan Iteraera+ n aron are e karaoia tamana.
Ebera, “ana bong.”
Ke, “ni karawawataa nanona; boaia.”
Nora Nanon Taeka.
Ke, “manga kabooai.”
Ke, “te miure ae te aine.”
Ke, “tau.”
Ebera, “N nangi nako i nanoni kawaia kaain te aonnaba ni kabane.”
Ke, “bwaina te wanawana.”
Ebera, “e na aki koreakinako temanna mairoum.”
Ke, “Tiore,” ae taekan ruanimaten te botannaomata. Nora Nanon Taeka.
Ke, “te tangira ae kona n onimakinaki.”
Ke, “Tiore,” ae taekan ruanimaten te botannaomata. Nora Nanon Taeka.
Ebera, “Ana bong.”
Ebera, “a kaeta mataia i aou.”
Nora Nanon Taeka.
Ke, “te utu n uea.”
Ke, “eweka Atoniia.”
Ke, “anaa.”
Ebera, “kakannato.”
Ke, “te tangira ae kona n onimakinaki.”
Ke, “te teinimwaane ngai.”
Ebera, “ao I aki ataa aron te otiotinako ao te riirin.”
Ke tao, “kangaanga.” Ebera, “tinebu.”
Ebera, “am bong aika bati.”
Ebera, “ni kabane am bong.”
Ebera, “kaabwabwaka am bong.”
Ke, “te karea n iraorao.” Te karea ae kaikonaka ae a kaai n amwarake ibonga, taan taromauri, ao Iehova, ni kaota te raoi i marenaia.
Ebera, “bwanibwanna.”
Ebera, “maaku.”
Ke, “ana toka nako.”
Nora Nanon Taeka.
Ae taekan te Iuberetiti.
Teuana te kore titeboo ma 220 te rita. Nora Buk. B14.
Ae taekani maeaon te Iuberetiti.
E kuneaki te ware aei ni koroboki nikawai tabeua, ao n rongorongon naba aei ae koreaki n te kibu teuana. A taekina 40,000 koroboki nikawai riki tabeua.
Ke, “taan toka i aoia aoti.”
Ke, “te nano ae ataibwai.”
Ke, “taekin.”
Nora Nanon Taeka.
Ke, “maan aika kibakiba.”
Tao n ikotaki ma maan ake a aeae i birotoia ao maan aika uarereke.
Ke, “e teimatoa n tangira Tawita.”
Teuana te kore titeboo ma 220 te rita. Nora Buk. B14.
Ke, “berita.”
Ke, “taan aonnanga te uota ae rawawata.”
Nora Buk. B15.
Nora Buk. B8.
Teuana te mwanokunibai titeboo ma 44.5 te tientemita (17.5 te inti). Nora Buk. B14.
Ae taekan te tabo n rin ae mena i moan te tembora.
Ebera, “temboran te auti.”
Ke, “raababana.”
Ke, “20 te mwanokunibai n ira raababan te auti.”
E kaineti aei nakon te Ruu ae Tabu.
Ebera, “te ruu are mai nanona riki.”
Ebera, “angaatain.”
Ae taekan nanon te auti.
Ae taekan te Ruu ae Tabu, are i moan te Ruu ae Moan te Tabu.
Nora Nanon Taeka.
Ebera, “te kai ae te oera,” ke tao te aroka ae te bwaain ae te Aleppo.
Tao e kaineti nakoni kateani kain te mataroa ke nakon abwakin ao raababan taiani mataroa.
E kaineti aei nakon te Ruu ae Tabu.
Tao e kaineti nakoni kateani kain te mataroa ke nakon abwakin ao raababan taiani mataroa.
Nora Buk. B15.
Nora Buk. B15.
Ke, “baareti.”
Teuana te mwanokunibai titeboo ma 44.5 te tientemita (17.5 te inti). Nora Buk. B14.
Ke, “Kamanin.”
Ke, “Kamanin.”
Ke, “baareti.”
Ae taekan te tabo n rin ae mena i moan te tembora.
Ke, “te buraonti,” n te kibu aei ao ni kiibu ake imwina riki n te mwakoro aei.
Ke, “kaka 12 te mwanokunibai mronronin te boua teaina ma teaina.”
Nora Nanon Taeka.
Nora Nanon Taeka.
E kaineti aei nakon te Ruu ae Tabu.
Ke, “maiaki.”
Ae nanona, “Ke E [ae taekan Iehova] Kamatoaa Raoi.”
Ke, “meang.”
Tao nanona, “N te Korakora.”
Ke, “bon 30 te mwanokunibai mronronna.”
Tao 7.4 te tientemita (2.9 te inti). Nora Buk. B14.
Teuana te bwate titeboo ma 22 te rita (5.81 te kaaran). Nora Buk. B14.
Ke, “kaa n ran.”
Nora Nanon Taeka.
Ke, “teuana rabwataia ma.”
Ke, “teuana rabwataia.”
Ke, “aua te mwanokunibai man tarana teuana nakon tarana are teuana.”
Ebera, “te tembora.” N taraana ao e kaineti aei nakon te Ruu ae Tabu.
Ae taekan te Toa ae Umwanrianna.
Nora Buk. B15.
Nora Nanon Taeka.
Nora Nanon Taeka.
Ebera, “te ruu are mai nanona riki.”
Ebera, “natim, are teuare otinako mai bebeem.”
Ke, “te tangira ae kona n onimakinaki.”
Ke, “ao teuane te rao e kaaki te rekenikai i aon teuanne.” Ae taekan te taetae n tuea ae irianaki n te rekenikai bwa te tuuaa iai, ngkana e karaoaki te taetae n tuea n te aro ae kewe ke e uruakaki.
Ebera, “te rekenikai.”
Ebera, “te rekenikai.”
Ebera, “buakaka.”
Ebera, “e raoiroi.”
Ke, “karawawataia.”
Ke, “taian taake.”
Ke, “taekam.”
Ebera, ne’phesh, nora Nanon Taeka.
Ke, “ongora irouia n te bwai are a bubutiiko iai.”
Ebera, “tibwangam.”
Ke, “bane raoi.”
Ke, “te karea ae te koraa.” Nora Nanon Taeka.
Ke, “te kawai n rin i Amata.”
Ebera, “te kawanua,” ae taekan, te bong are imwin te kauoua ni kaitiua ni bong.
Ke, “baareti.”
Ebera, “te taeka n rabakau.”
Ke, “baareti.”
Ebera, “a aki riai i matana.”
Ke tao, “te Aba ae Akea Bongana.”
Teuana te tarena titeboo ma 34.2 te kirokuraem. Nora Buk. B14.
Ke, “baareti.”
Te taeka n Ebera ae nanona “kanoaaki.” Nora Nanon Taeka.
Ke, “te bwaintangira ibukin te mare; uotan te buu te aine nakon te buu te mwaane.”
Ke, “katea nonon.”
Ke, “n taiani kamwaninga.”
Ke, “aika rereena.”
Ebera, “akea te bwai ae raba mairoun.”
Ke, “am taeka.”
Teuana te tarena titeboo ma 34.2 te kirokuraem. Nora Buk. B14.
Te kai ae rangi ni kakawaki ae kabonganaaki ibukini karaoani baika rangi ni kakawaki.
Ke, “baareti.”
Ebera, “ni kaineti ma bain te Uea are Toromon.”
Teuana te tiekera titeboo ma 11.4 te kuraem. Nora Buk. B14.
Te otanga ae uarereke ae uouotaki irouia taani katebe.
Teuana te mina n te Baibara n te Taetae n Ebera titeboo ma 570 te kuraem. Nora Buk. B14.
Nora Nanon Taeka.
Ebera, “ukoukora ubun.”
Ke, “taan toka i aoia aoti.”
Ke, “taan toka i aoia aoti.”
Ke, “te aba ae rinano.”
Ke tao, “mai Aikubita ao mai Kue. A bae ni kabooi mai Kue ana tia iokinibwai te uea,” tao e kaineti Kue nakoni Kirikia.
Ke, “Kam na tai imaremare ma ngaiia.”
Nora Nanon Taeka, “Buu ni kewe.”
Ke, “e korakora aia kariri buuna nakoina.”
Ke, “rairaanako.”
Ke, “tabwanin raoi tangiran.”
Ebera, “koreianako.”
Tiaki te ueannaine are tautaeka.
Ke tao, “e kakoriria.”
Ebera, “kamateia.”
Ebera, “tabeka baina.”
Te taeka n Ebera ae nanona “kanoaaki.” Nora Nanon Taeka.
“Batam” ae taekan te kanoa aika ueea, ke te utu n uea.
Ebera, “Ana bong.”
Ke, “karawawata.”
Ebera, “aia umwanrianna.”
Ebera, “rineaki.”
Ke, “katea nonon.”
Ke, “katea nonon.”
Ke, “te bwai ae kamimi.”
Ke, “te bwai ae kamimi.”
Ke, “mannang aika kiriiti,” ae taekan taiani mannang aika mara ni kiriitin taiani karea.
Ke, “mate.”
Ke, “te bwai ae kamimi.”
Ke, “kamaraua ubun.”
Ebera, “kaoni baia.”
Nora Nanon Taeka.
Ke, “Ko riai n taetae nakoina n te aro aei ao n te aro arei.”
Ke, “bouannanti aika kaburoaki n atoaki.”
Ebera, “koreianako.”
Ebera, “te aomata ae mira te oo.” Te taeka n Ebera ni kabuakaka nakoia mwaane.
Ebera, “koreianako.”
Ae taekan te Iuberetiti.
Nora Nanon Taeka.
Ebera, “ana bong.”
Nora Nanon Taeka.
Ke, “baareti.”
Ebera, “taani biri.”
E aranaki naba bwa Abiia.
Ke, “e aki tabwanin raoi tangiran.”
Te taeka n Ebera aei tao e irekereke ma te taeka ibukin “te nakotaari,” ao e kabonganaaki bwa te taeka ni kabuakaka.
Nora Nanon Taeka.
Ke, “tabwanin raoi ana tangira nakon.”
Ebera, “ana bong.”
Ke, “katea nonon; manga katea.”
Ke, “kitana ke rinnako n ana aono.”
Ke, “baareti.”
Ke, “berita.”
Ke, “berita.”
Ke, “katean nonon; manga katean.”
Ke, “katea nonon; manga katea.”
Ke, “katei nonoia; manga katei.”
Ae taekan Nataba are natin Ieroboam.
Ebera, “te aomata ae mira te oo.” Te taeka n Ebera ni kabuakaka nakoia mwaane.
Ke, “taan irantangaa raraana.”
Ke, “baareti.”
Teuana te tarena titeboo ma 34.2 te kirokuraem. Nora Buk. B14.
Ae nanona, “Ana Bwai te Baronga ae Temera.”
Ebera, “te toka.”
Ke, “tembora.”
Nora Nanon Taeka.
Ae nanona, “Bon Iehova Atuau.”
Ebera, “are I tei i matana.”
Ke, “Tera irekerekeu ma ngkoe, . . .?”
Ebera, ne’phesh, nora Nanon Taeka.
Ebera, ne’phesh, nora Nanon Taeka.
Ke, “e a maiu.”
Ebera, “koreianako.”
Ke, “Tabaota.” Nora Nanon Taeka.
Ebera, “are I tei i matana.”
Ke, “uota te katinanikuaki.”
Nora Nanon Taeka.
Ebera, “turatura i marenan iango aika uoua.”
Ke tao, “e a mwananga nako.”
Ke, “a karaoi aroia burabeti.”
Teuana te tiea titeboo ma 7.33 te rita. Nora Buk. B14.
Ke, “te mwarua.”
Ke, “e kabaea.”
Ebera, ne’phesh, nora Nanon Taeka.
Arokan te rereua ae matoatoa botona.
Ebera, ne’phesh, nora Nanon Taeka.
Ebera, ne’phesh, nora Nanon Taeka.
Ebera, ne’phesh, nora Nanon Taeka.
Ae nanona, “E Kakamaiu te Atua.”
Ke, “aono aika tautaekanaki.”
Ke, “te kamamate.”
Ae taekan tain te abue are imwina.
Ebera, “wareka.”
Ae taekan tain te abue.
Ke, “bon ueea aika bwaina te tangira ae kona n onimakinaki.”
Nora Nanon Taeka.
Ke, “rinei taiani kawai ibukim.”
Ke, “berita.”
“Natiia burabeti” e taraa ni kaineti nakon te kuura n reirei ibukia burabeti ke nakon te botaki ae kaainaki irouia burabeti.
Ke, “oreiko ni kabwakako.”
Ebera, ne’phesh, nora Nanon Taeka.
Teuana te tarena titeboo ma 34.2 te kirokuraem. Nora Buk. B14.
Ebera, ne’phesh, nora Nanon Taeka.
Ebera, “bwainna?”
Ebera, “ko a tia ni kaboonakoko i bon iroum.”
Ebera, “te aomata ae mira te oo.” Te taeka n Ebera ni kabuakaka nakoia mwaane.
Ebera, “e kaboonakoa i bon irouna.”
Te taeka n Ebera aei tao e irekereke ma te taeka ibukin “te nakotaari,” ao e kabonganaaki bwa te taeka ni kabuakaka.
Nora Nanon Taeka.
Ke, “kebutuia.”
Nora Nanon Taeka.
Ke, “n tiaki nanona.”
Ebera, “te kaembwa.”
Ke tao, “ike a tetebotebo iai aine aika kakabooaki, ao a newenewea raraana kamea.”
Ke, “baareti.”
Nora Nanon Taeka.