IOTUA

1 Imwini mateni Mote are ana toro Iehova, ao e taku Iehova nakon Iotua*+ are natin Nun, are ana tabonibai+ Mote: 2 “E a mate Mote are au toro.+ Teirake ngkai ao rinanon te Ioretan nakon iterana are teuana, ngkoe ma aomata aikai ni kabane, ao naako riin n te aba ae N nang anga nakoia tibun Iteraera.+ 3 N na anganingkami taabo nako ake a toua waemi n aron are I beritanna nakoni Mote.+ 4 E na moa ami aono man te rereua ni karokoa Rebanon ao nakon te karaanga ae abwabwaki ae te Iuberetiti, ae taekan abaia ni kabane tibun Eta+ ao nakon Taari ae Abwabwaki* are i maeao.*+ 5 Akea ae e na kona n tei ni kaaitarako n uaa tokini maium.+ N aron are I memena irouni Mote ao N na memena naba iroum.+ N na bon aki kitaniko ke ni kaaki taekam.+ 6 Ko na ninikoria ao kakorakorako,+ bwa boni ngkoe ae ko na kairiia aomata aikai bwa a na abana te aba are I taetae n tuea ibukina nakoia aia bakatibu bwa N na angania.+

7 “Ko na ninikoria ma n rangi ni kakorakorako, ao kakairi raoi n te Tua ae tabwanin are e tua nakoim Mote are au toro. Tai rairakinako mai iai nakon te angaatai ke te angamaing,+ bwa ko aonga ni bwaina te wanawana n taabo ake ko nako iai.+ 8 E aki riai n nako bokin te Tua aei mai wim,+ ao ko riai ni warekia ni karauraua bwanaam* ni ngaina ao ni bong, bwa ko aonga ni kakairi raoi ni bwaai ni kabane ake a koreaki i nanona,+ bwa ane e na nakoraoi arom iai, ao ane ko na bwaina te wanawana iai.+ 9 Tiaki I a tia n tua nakoim? Ko na ninikoria ao kakorakorako. Tai maakunrang ke ni maaku, bwa e memena iroum Iehova ae Atuam n taabo ake ko nako iai.”+

10 E tua ngkanne Iotua ni kangai nakoia aia mataniwi aomata: 11 “Kam na rinanon te kaembwa ao kam na tua ni kangai nakoia aomata, ‘Katauraoi ami tianaki, bwa ai tii tenibong ao kam nang rinanon te Ioretan nakon iterana, n abana te aba ae e a anganingkami Iehova ae Atuami bwa kam na abanna.’”+

12 Ao e taku Iotua nakoia tibun Reuben, tibuni Kata, ao te itera ni baronga are Manate: 13 “Uringa te baere e tua nakoimi Mote are ana toro Iehova+ ni kangai: ‘E anganingkami te motirawa Iehova ae Atuami ao e anganingkami te aba aei. 14 A na maeka buumi, natimi, ao ami nanai ni man, n te aba are e anganingkami Mote n iteran te Ioretan ae mai ikai,*+ ma kam riai ngkami aika taani buaka ni kabane aika korakora+ n rinanon te Ioretan nakon iterana n rimoaia tarimi, n te aro ae baireaki raoi ni baireaia taani buaka.+ Kam riai ni buokiia 15 ni karokoa ae e a angania tarimi te motirawa Iehova, n aron are e anganingkami, ao a abana naba te aba ae e a angania Iehova ae Atuami. Ao kam na oki nakon te aba are kam anganaki bwa kam na maeka iai ao n abanna, are te aba are e anganingkami Mote are ana toro Iehova, are i mainikun te Ioretan.’”+

16 A kaekaa Iotua ni kangai: “Ti na karaoi bwaai ni kabane akana ko tua, ao ti na nakon te tabo are ko kanakoira nako iai.+ 17 N aron are ti ongo ni bwaai ni kabane ake e taekini Mote, ao ai arona naba bwa ti na ongo iroum. Ma ke e memena iroum Iehova ae Atuam n aron are e memena naba irouni Mote.+ 18 E na kamateaki te aomata ae karitei nakon te bwai ae ko tua, ao ae e aki ongeaba n tuua nako ake ko anganna.+ Ko na ninikoria ao kakorakorako.”+

2 Ao Iotua are natin Nun e karaba ni kanakoia mwaane aika uoman mai Titim+ bwa taani karaba n tutuo. E tuangia ni kangai: “Naako tuoa te aba arei, ao riki te aba ae Ieriko.” Mangaia are a nako ao a nakon ana auti te aine ae kakabooaki ae arana Raaba,+ ao a tiku ikekei. 2 Ao e tuangaki uean Ieriko ni kangai: “Noria! A roko ikai mwaane aika tibun Iteraera n te tairiki aei bwa a na karaba n tuoa te aba.” 3 Mangaia are e kanakotaeka uean Ieriko nakon Raaba ni kangai: “Kaotinakoia mwaane ake a roko ao n tiku n am auti, bwa a roko bwa a na karaba n tuoa te aba ni kabutaa.”

4 Ma e a tia ni kairiia mwaane ake uoman neiei ao e karabaia. Ao e taku: “Eng, a bon roko mwaane akanne irou, ma I aki ataia bwa kaain ia. 5 Ao ngke e a roo ngke e nang in mataroan oon te kaawa, ao a otinako mwaane akanne. I aki ataia bwa a nakea mwaane akanne, ma ngkana kam waekoa ni kaeiia ao ane kam na ooiia.” 6 (Ma e a tia neiei ni kairiia nako aon te taubuki ao ni karabaia i buakoni kain taian aroka aika buraekiti* aika kaweneaki ni karinanaki i aon te taubuki.) 7 Mangaia are a a kaeaki irouia mwaane ake e kanakoia te uea n te kawai nakon te Ioretan ni kaorana nako,+ ao a kainaki mataroan oon te kaawa n te tai are a otinako naba iai taani kaeiia.

8 Imwaini matuia mwaane aikai ao e waerake neiei nakoia nako aon te taubuki. 9 E taku neiei nakoia mwaane aikai: “I ataia bwa e na bon anganingkami te aba aei Iehova,+ ao e a bwakarira ngkai maakakimi.+ A a bane ni bwara nanoia kaain te aba ibukimi,+ 10 bwa ti ongo aron Iehova ni kabwatakatakaa ranin Taari ae Uraura i mwaimi ngke kam kitana Aikubita,+ ao baike kam karaoi nakoia ueea ake uoman i aoia taian Amoraite, ake Taion+ ma Oka,+ ake kam kamaunaia n iteran te Ioretan are te iterana.* 11 Ngke ti ongo taekana ao ti buannano,* ao akea temanna ae reke ninikoriana ibukimi, bwa Iehova ae Atuami bon te Atua i karawa i eta ao n te aonnaba i nano.+ 12 Taiaoka ma taetae n tuea nakoiu ngkai iroun Iehova, bwa ngkai I a tia ni kaotiota nakoimi te tangira ae koaua,* ao kam na kaotiota naba te tangira ae kona n onimakinaki nakoia kaaini batan tamau, ao kam riai n anganai te bwai ni kakoaua* bwa I aonga n ataia bwa kam na boni kawakina ami taeka. 13 Kam riai ni kamaiua tamau ma tinau, mwaaneu ma tariu nako, ao ai raoia ni kabane, ao kam riai ni kamaiuira man te mate.”+

14 Ao a taku mwaane akekei nakon neiei: “Ti na anga maiura* ibukini maiumi! Ngkana ko aki kaokaota ara mwakuri, ao ti na kaotiota nakoim te tangira ae koaua* ma te kakaonimaki ngkana e anganira te aba aei Iehova.” 15 Imwin anne ao e nnaiia rikaaki naakai n te roobu man te kamaama, bwa e mena ana auti n iteran oon te kaawa. E boni maeka raoi i aon oon te kaawa.+ 16 Ao e taku nakoia: “Naako nakon te aono ae maungaunga ao karabaingkami iai i nanon tenibong, bwa a aonga n aki kona ni kuneingkami te koraki ake a kaeingkami. Ao imwin okia naake a kaeingkami, ao kam a kona n touaanako kawaimi.”

17 A taku mwaane akekei nakon neiei: “Ti na aki bure ni kaineti ma te taetae n tuea ae ko kairira bwa ti na taetae n tuea iai aei,+ 18 ngkana ko aki kabaea te kabae aei ae karaoaki man te karai ae uraroo n te kamaama ae ko nnaira rikaaki mai iai, ngkana ti a rin n te aba aei. Ko riai n ikotiia tamam, tinam, mwaanem nako, ao kaaini batan tamam ni kabane i rarikim i nanon te auti.+ 19 Ao ngkana iai ae e otinako mani mataroan nako am auti nako tinaniku, ao e na boni mena raraana i aon atuna, ao ti na aki bure iai. Ma ngkana e riki te kabuanibwai nakon* ane e tiku i rarikim i nanon te auti, ao e na mena raraana i aon atura. 20 Ma ngkana ko kaota naba ara mwakuri,+ ao ti na aki bure ni kaineti ma am taetae n tuea are ko kairira bwa ti na taetae n tuea iai.” 21 E kaeka ni kangai neiei: “E na karaoaki ane kam taekinna.”

Ao e kanakoia ao a touaanako kawaia. Imwina ao e kabaea te kabae ae uraroo n te kamaama. 22 Mangaia are a a nako ao a nakon te aono ae maungaunga ao a tiku iai i nanon tenibong, ni karokoa okia taani kaeiia. A kakaaeia naakai taani kaeiia aikai ni kawai nako, ma a aki roko n te kuneia. 23 A ruo ngkanne mwaane aika uoman aikai man te aono ae maungaunga, ao a a rinanon te karaanga nakon iterana are teuana ao a kawara Iotua are natin Nun. A karakini bwaai ni kabane ake a riki nakoia nakon teuaei. 24 Ao a taku nakon Iotua: “E a tia Iehova n anga te aba ni kabutaa nakoira.+ Ni koauana, a a bane ni bwara nanoia kaain te aba ibukira.”+

3 Ao e utimwaaka Iotua n te moaningabong, ao e kitana Titim+ ma tibun Iteraera ni kabane ao a a roko n te Ioretan. A tiku ikekei n te tairiki arei imwain ae a rinanon te karaanga nakon iterana are teuana.

2 Imwin tenibong ao a rinanon te kaembwa mataniwi,+ 3 ao a tua nakoia aomata ni kangai: “N te tai are kam nora naba iai ana ati ni berita Iehova ae Atuami bwa e uotaki irouia ibonga* aika tibun Rewi,+ ao kam riai ni kitana ami tabo ao n rimwina. 4 Ma tataua raroami ae tao 2,000 te mwanokunibai* mai iai, tai manga kaania riki nakon anne, bwa kam aonga n ataa te kawai ae kam na nako iai, bwa kam tuai ni mwananga n te kawai aei mai mwaina.”

5 E a taku ngkai Iotua nakoia aomata: “Katabuingkami,*+ bwa e na karaoi baika kamimi Iehova i buakomi ningabong.”+

6 E taku ngkanne Iotua nakoia ibonga: “Tabeka te ati+ ni berita ao mwananga rimoaia aomata.” Mangaia are a tabeka te ati ni berita ao a nako n rimoaia aomata.

7 E taku ngkanne Iehova nakon Iotua: “N te bong aei ao N nangi moanna ni karietatako i mataia tibun Iteraera ni kabane,+ bwa a aonga n ataia ae N na memena iroum+ n aron are I memena irouni Mote.+ 8 Ko riai n tua ae kangai nakoia ibonga ake a uouota te ati ni berita: ‘Ngkana kam a roko i mataniwin ranin te Ioretan, ao kam riai n tei n aki kakammwakuri n te Ioretan.’”+

9 Ao e taku Iotua nakoia tibun Iteraera: “Nakomai ao ongora n ana taeka Iehova ae Atuami.” 10 E taku ngkanne Iotua: “Kam na ataia n aei bwa e memena i buakomi te Atua ae maiu,+ ao e na boni kakioianako mai mwaimi tibuni Kanaan, tibun Eta, taian Iwaite, taiani Beritaite, taiani Kirekataite, taian Amoraite, ao I-Iebuti.+ 11 Noria! E a mwananga n rimoami nakon te Ioretan ana ati ni berita Uean te aonnaba ni kabutaa. 12 Karekeia ngkai mwaane aika 12 man aia baronga tibun Iteraera, kaka temanna ibukin te baronga teuana ma teuana,+ 13 ao n te tai naba are a toko iai ma* ranin te Ioretan nanoni waeia ibonga* ake a uouota ana Ati Iehova ae Uean te aonnaba ni kabutaa, ao e na toki raangan ranin te Ioretan mai eta, ao e na tei te ran n aron te oo.”+

14 Ao ngke a a kitan aia umwanrianna aomata imwain raoi ae a rinanon te Ioretan nakon iterana are teuana, ao a a rimoaia aomata ibonga ake a uouota te ati+ ni berita. 15 N te tai are a a roko iai n te Ioretan taan uouota te Ati ao a a kateboi waeia ibonga ake a uouota te Ati i mataniwin te ran (e a taorake ngkai te Ioretan i mataniwina+ ni bongin nako tain te tai), 16 ao e a tei naba te ran are mai eta n aki raanga. E a tei bwa kaanga te oo i Atam ae te kaawa ae rangi n raroanako ae kaan ma Tareetan, ao te ran are raanga rikaaki nakon Naman te Arabaa,* are te Nama ae Taari,* e a bane n raanga nako iai. E a toki te ran ao a a mwananga aomata nakon te itera are teuana are kaitaraa Ieriko. 17 Ngke a teimatoa n tei n aki kakammwakuri i aon te tano ae mwau+ i nukan te Ioretan ibonga ake a uouota ana ati ni berita Iehova, ao a bane tibun Iteraera n rinanona nakon iterana are teuana i aon te tano ae mwau,+ ni karokoa ae a bane n tia te natannaomata aei n rinanon te Ioretan nakon iterana are teuana.

4 Ngke e tia naba ngkekei te natannaomata arei ni kabane n rinanon te Ioretan nakon iterana are teuana, ao e a taku Iehova nakon Iotua: 2 “Karekeia mwaane aika 12 mai buakoia aomata, kaka temanna te mwaane man te baronga teuana ma teuana,+ 3 ao ko na tua ae kangai nakoia: ‘Tabeki atibu aika 12 mai nukan te Ioretan, man te tabo are a tei n aki kakammwakuri iai waeia ibonga,*+ ao kam na uotii ao kaaki n te tabo are kam na tiku iai n tairiki.’”+

4 Mangaia are e weteiia mwaane aika 12 Iotua ake e a tia n rineiia mai buakoia tibun Iteraera, kaka temanna te mwaane man te baronga teuana ma teuana, 5 ao e taku Iotua nakoia: “Kam na mwananga n rimoan ana Ati Iehova ae Atuami nako nukan te Ioretan, ao e riai temanna ma temanna n tabeka kaka teuana te atibu i aon angana, n ai aroni mwaitin aia baronga tibun Iteraera, 6 bwa e na riki bwa te kanikina i buakomi. Ngkana a titirakiningkami natimi* rimwi riki ni kangai, ‘E aera ngkai kam kaaki ikai atibu aikai?’+ 7 ao kam riai n tuangia ni kangai, ‘Ibukina bwa e katokaki ngkoa raangan ranin te Ioretan imwain ana ati+ ni berita Iehova. Ngke e rinanon te Ioretan ao e a katokaki naba raangan ranin te Ioretan. A na riki atibu aikai bwa te bwai ni kauring ae teimatoa nakoia tibun Iteraera.’”+

8 Mangaia are a karaoa are e tua Iotua tibun Iteraera. A tabeki atibu aika 12 mai nukan te Ioretan, n aron are e tuangaki Iotua iroun Iehova, n ai aroni mwaitin aia baronga tibun Iteraera. A anai nakon te tabo are a na tiku iai n te tairiki ao a kaaki ikekei.

9 E katei naba atibu aika 12 Iotua i nukan te Ioretan n te tabo are a tei iai waeia ibonga ake a uouota te ati ni berita,+ ao a boni mena naba ikanne atibu akanne ni karokoa te bong aei.

10 A teimatoa n tei i nukan te Ioretan ibonga ake a uouota te Ati ni karokoa tiani bwaai nako ake e tua Iehova nakon Iotua bwa e na tuangia aomata bwa a na karaoia, n aron ae boraoi ma bwaai ni kabane ake e tua Mote nakon Iotua. N te tai anne ao a kawaekoaia aomata ni mwananga nakon te itera are teuana. 11 Ngke a a bane aomata n tia ni mwananga nakon te itera are teuana, ao e nakon naba te itera are teuana ana Ati Iehova ao ibonga, i mataia aomata.+ 12 Ao tibun Reuben ma tibuni Kata ao te itera ni baronga are Manate, a mwananga naba nakon te itera are teuana n te aro ae baireaki raoi ni baireaia taani buaka,+ n rimoaia tibun Iteraera ake tabemwaang, n aron are e tuangia Mote.+ 13 Tao 40,000 mwaitiia tautia aika taubobonga nakon te buaka ake a mwananga nakon te itera are teuana i matan Iehova, nakon rereuan Ieriko ake a aoraoi.

14 E karietataa Iotua n te bong anne Iehova i mataia tibun Iteraera ni kabane,+ ao e a korakora karineana* irouia ni kabane bongini maiuna, n aron ae e korakora naba karineani Mote irouia.+

15 E taku ngkanne Iehova nakon Iotua: 16 “Ko na tua nakoia ibonga ake a uouota te Ati+ ni Berita* bwa a na aerake man te Ioretan.” 17 Mangaia are e tua ae kangai Iotua nakoia ibonga: “Kam na aerake man te Ioretan.” 18 Ngke a aerake mai nukan te Ioretan ibonga ake a uouota ana ati+ ni berita Iehova, ao ngke a a toua te tano ae mwau nanoni waeia ibonga, ao e a manga reitaanako kawaina ranin te Ioretan, ao ni manga taorake i mataniwina+ n arona mai mwaina.

19 A waerake aomata man te Ioretan n te moan namwakaina ae tebwina iai bongin te namwakaina, ao a kaembwa i Kirekara+ n tian Ieriko mai mainiku.

20 Ni kaineti ngkanne ma atibu ake 12 ake a anai man te Ioretan, e katei Iotua i Kirekara.+ 21 E taku ngkanne nakoia tibun Iteraera: “Ngkana a titirakiningkami natimi n te tai ae e na roko ni kangai, ‘Tera ae nanonaki n atibu aikai?’+ 22 ao kam riai ni kabwarabwaraa nakoia natimi ni kangai: ‘A rinanon te Ioretan tibun Iteraera i aon te tano ae mwau nakon iterana are teuana,+ 23 ngke e kabwatakatakaa ranin te Ioretan Iehova ae Atuami imwaia ni karokoa ae a rinanona nakon te itera are teuana, n aron are e karaoia Iehova ae Atuami nakon Taari ae Uraura ngke e kabwatakatakaa imwaira ni karokoa ae ti rinanona nakon te itera are teuana.+ 24 E karaoa aei n te aro are a na bane n ataa korakorani bain Iehova botannaomata n te aonnaba,+ ao kam aonga ni maaka Iehova ae Atuami n taai nako.’”

5 N te tai are a ongo naba iai aia uea ni kabane taian Amoraite+ ake a mena n iteran te Ioretan are mai maeao,* ao aia uea ni kabane tibuni Kanaan+ ake a mena i rarikin taari, ae e kabwatakatakaa Iehova ranin te Ioretan imwaia tibun Iteraera ni karokoa ae a rinanona nakon iterana are teuana, ao a a buannano,*+ ao ai bon akea teutana ninikoriaia ibukia tibun Iteraera.+

2 N te tai anne ao e taku Iehova nakon Iotua: “Karaoi am biti aika atibu ao manga korotobibia+ mwaane aika tibun Iteraera, te kauatai.” 3 Mangaia are e karaoi biiti aika atibu Iotua ao e korotobibia mwaane aika tibun Iteraera i Kibeataararota.*+ 4 Aio bukini korotobibiaia iroun Iotua: A a tia ni mate n te rereua i nanon tain te mwananga imwini kitanan Aikubita, mwaane ni kabane mai buakoia aomata ake a kitana Aikubita, ake mwaane ake taani buaka ni kabane.*+ 5 A a tia ni korotobibiaki aomata ni kabane ake a kitana Aikubita, ma a tuai ni korotobibiaki aomata ni kabane ake a bungiaki n te rereua i nanon tain te mwananga imwini kitanan Aikubita. 6 A a tia tibun Iteraera n rianna i nanon 40 te ririki+ n te rereua ni karokoa ae a bane ni mate te natannaomata aei, ae taekaia mwaane ake taani buaka ake a kitana Aikubita, ake a aki ongo ni bwanaan Iehova.+ E a tia n taetae n tuea Iehova nakoia bwa e na bon aki kariaia bwa a na nora te aba+ are e taetae n tuea ibukina Iehova nakoia aia bakatibu bwa e na anganira,+ ae te aba ae raanga iai rannimamman te man ma aia karewe manibeeru.*+ 7 Mangaia are e a kateirakeia natiia n onei mwia,+ ao e korotobibia naakai Iotua. A tuai ni korotobibiaki ibukina bwa a aki korotobibia n aia tai ni mwananga.

8 Ngke a a tia ni korotobibia te natannaomata aei ni kabane, ao a a tiku n te tabo are a mena iai n te kaembwa ni karokoa marurungia.

9 E taku ngkanne Iehova nakon Iotua: “N te bong aei ao I a tia ni karabinoaanako mairoumi te kamaamaeaki mai Aikubita.” Mangaia are e aranaki te tabo arei bwa Kirekara*+ ni karokoa te bong aei.

10 A teimatoa ni kaembwa tibun Iteraera i Kirekara, ao a karaoa te Toa ae te Riao n 14 iai bongin te namwakaina,+ n te tairiki, n rereuan Ieriko ake a aoraoi. 11 Ao a a moana kanakin uaan te aba n te bong are imwin te Toa ae te Riao, ma bwerena aika aki karikaki+ ao koraa aika umunaki, n te bong naba anne. 12 Ao ai akea te manna n te bong are imwina ngke a a tia ni kana teutana uaan te aba, ai bon akea te manna ibukia tibun Iteraera,+ ma a a moana kanakin uaan te aba ae Kanaan n te ririki anne.+

13 Ngke e a uakaan Iotua ma Ieriko, ao e euta matana ao e nora te mwaane+ ae tei i matana ma ana kabaang i nanoni baina.+ E mwananga Iotua nakon teuaei ao e titiraki ni kangai: “Kaain ara itera ngkoe ke aia itera taani kakaaitaraira?” 14 Ao e taku teuaei: “Tiaki ngaia anne, ma I roko bwa te mataniwi n ana taanga ni buaka Iehova.”+ Ao e bobaraaki i aontano Iotua ao e taku nakon teuaei: “Tera ae e na taekinna au uea nakon ana toro?” 15 E kaeka ni kangai nakon Iotua te mataniwi n ana taanga ni buaka Iehova: “Buutii am kau mai waem, ibukina bwa e tabu te tabo ane ko tei iai.” Ao e aki tabwara Iotua ma e a karaoa naba anne.+

6 Ao e kainaki ni kamatoatoaaki Ieriko ibukia tibun Iteraera, ao akea ae e otiotinako ao akea ae e riirin.+

2 E taku ngkanne Iehova nakon Iotua: “Noria, I anganiko Ieriko ma ueana ao ana tia buaka aika korakora.+ 3 Kam riai ni mwaati ni katobibia te kaawa, ni katobibia teuana te tai, ngkami aika mwaane aika taani buaka ni kabane. Anne te bwai ae kam riai ni karaoia i nanon onobong. 4 Karekeia itiman ibonga* aika uouotii buu aika itiua aika koroia tiibu mwaane imwain te Ati. Ma n te kaitiua ni bong kam riai ni mwaati ni katobibia te kaawa itiua te tai, ao a riai ibonga ni katangi buu.+ 5 Ngkana e a katangaki te buu are koron te tiibu mwaane, ao n te tai are kam ongo naba iai tangin te buu,* ao a riai n takarua tautia ni kabane n te takakaa ni buaka ae korakora. Ao ane e na bwaka ni borababaua oon te kaawa,+ ao a riai n rinrake ni kaineta mooa ngaiia n tatabemania nako.”

6 Ngaia are e weteiia ibonga Iotua are natin Nun n ikotiia ao e tuangia ni kangai: “Tabeka te Ati ni Berita ao a riai ibonga aika itiman n uouotii buu aika itiua aika koroia tiibu mwaane imwain ana Ati Iehova.”+ 7 Ao e tuangia tautia ni kangai: “Mwananga ao mwaati ni katobibia te kaawa, ao a riai n rimoan ana Ati Iehova kaain te taanga ni buaka aika taubobonga raoi.”+ 8 Ao ngke e a tia n taetae Iotua nakoia tautia, ao a mwananga ma ni katangi buu ibonga ake itiman ake a uouotii buu ake itiua ake koroia tiibu mwaane i matan Iehova, ao e ririmwia naakai ana ati ni berita Iehova. 9 Ao a rimoaia ibonga ake a katangi buu, kaain te taanga ni buaka aika taubobonga raoi, ao a ririmwin te Ati taan tantani mai buki ngke a tabe ni katangaki buu.

10 Ao e tua Iotua nakoia tautia ni kangai: “Tai tatakarua ao akea naba ae e na ongongo bwanaami. Akea te taeka teuana ae riai n otinako mai wimi ni karokoa te bong are N na kangai iai nakoimi, ‘Takarua!’ Ao kam a takarua naba.” 11 E tua teuaei kamwanangaan ana Ati Iehova ni katobibia te kaawa, ni katobibia teuana te tai, ao imwin anne a okira te kaembwa n tiku iai n te tairiki anne.

12 Ao e utimwaaka Iotua n te ingabong are imwina, ao ibonga a tabeka ana Ati+ Iehova, 13 ao ibonga ake itiman ake a uouotii buu ake itiua ake koroia tiibu mwaane, a nakonako imwain ana Ati Iehova ao a teimatoa ni katangi buu. A mwananga kaain te taanga ni buaka aika taubobonga raoi n rimoaia naakai, ao taan tantani mai buki a ririmwin ana Ati Iehova ngke a tabe ni katangaki buu. 14 A mwaati ni katobibia te kaawa teuana te tai n te kauoua ni bong, ao imwin anne a okira te kaembwa. Anne te bwai ae a karaoia i nanon onobong.+

15 Ao a utimwaaka n te kaitiua ni bong ngke e a tabwena mainiku, ao n aron are a kakaraoia a a manga mwaati ni katobibia te kaawa, ma a a mwaati ni katobibia te kaawa itiua te tai. Ai tibwa te bong aei ae a mwaati iai ni katobibia te kaawa itiua te tai.+ 16 Ao n te kaitiua n tai ao a katangi buu ibonga, ao e tuangia tautia Iotua ni kangai: “Takarua,+ bwa e anganingkami Iehova te kaawa! 17 E riai ni kamaunaaki raoi te kaawa ma bwaai nako ake iai.+ A a bane n riki bwa ana bwai Iehova. Ma tii Raaba+ are te aine ae kakabooaki ae e na teimatoa ni maiu, ngaia ma te koraki nako ake a mena n ana auti, ibukina bwa e a tia ni karabaia taan uataeka ake ti kamwanangaia.+ 18 Ma kam riai ni kararoaingkami man te bwai ae riai ni kamaunaaki,+ bwa mwina kam mataaiakinna ma n anai bwaai tabeua mai iai,+ ao ni karika iai aia kaembwa tibun Iteraera bwa e na kamaunaaki naba, n aromi ni karokoa te kabuanibwai* i aona.+ 19 Ma a bane n tabu nakon Iehova tirewa ma koora, ao bwaai aika karaoaki man te buraati ao te biti.+ A riai ni karinaki ni nneni baika kakawaki are n ana auti Iehova.”+

20 Ao a tatakarua tautia ngke a a katangaki buu.+ Ao ngke a ongo naba ngkekei tangin te buu ma n tatakarua n te takakaa ni buaka ae korakora, ao e a bwaka naba te oo ni borababaua.+ Imwin anne ao a ninia te kaawa, a kaineta mooa ngaiia n tatabemania nako, ao a taua te kaawa. 21 A kamaunaia n te kabaang kaain te kaawa ni kabane, aika mwaane ma aine, ataei ma kaara, kaao mwaane, tiibu, ao taongki.+

22 E taku Iotua nakoia mwaane ake uoman ake a karaba ngkoa n tuoa te aba: “Naako nakon ana auti te aine are kakabooaki ao kaotinakoa ma raona ni kabane, n aron are kam taetae n tuea iai nakoina.”+ 23 Mangaia are a nako taani karaba n tutuo ake a ataei akekei, ao a kaotinakoa Raaba, n ikotaki ma tamana, tinana, mwaanena nako, ao raona ni kabane, eng, a kaotinakoia kaain ana utu neiei ni kabane,+ ao a kairiia ni kamanoia raoi nakon te tabo teuana ae mena i tinanikun aia kaembwa tibun Iteraera.

24 Ao a kabueka te kaawa ma bwaai nako ake iai n te ai. Ma a anga te tirewa, te koora, ao bwaai ake a karaoaki man te buraati ao te biti, nakoni nneni baika kakawaki are n ana auti Iehova.+ 25 Ma tii Raaba are te aine are kakabooaki, ma kaaini batan tamana ao raona ni kabane, aika a kamaiuaki iroun Iotua,+ ao e maeka neiei i Iteraera ni karokoa te bong aei,+ ibukina bwa e karabaia taan uataeka ake e kamwanangaia Iotua bwa a na karaba n tuoa Ieriko.+

26 N te tai anne ao e taekina te taetae n tuea* Iotua ae kangai: “E na reke kain te mwaane i matan Iehova ae e a manga katea te kaawa ae Ieriko. E na boni mate natina ae ana karimoa ngkana e kawenea aana, ao e na mate natina ae ana bina ngkana e katei mataroana.”+

27 Mangaia are e memena Iehova iroun Iotua,+ ao e a butanako kakannatona ni kabutaa te aonnaba.+

7 Ma a aki kakaonimaki tibun Iteraera ni kaineti ma te bwai are kaokoroaki bwa e na kamaunaaki, bwa e anai bwaai tabeua mani baike a kaokoroaki bwa a na kamaunaaki+ Akan+ are natini Karemi, are natin Taberi, are natin Teera, man te baronga are Iuta. Ibukin aei ao e urarake unin Iehova irouia tibun Iteraera.+

2 Ao e kamwanangaia mwaane Iotua mai Ieriko nako Ai,+ ae kaan ma Betaawen ao e mena i mainikuni Betaera,+ ao e tuangia ni kangai: “Kam na waerake ao karaba n tuoa te aba.” Ngaia are a waerake mwaane akekei ao a karaba n tuoa Ai. 3 Ngke a okira Iotua ao a tuangnga ni kangai: “A aki riai ni waerake kaain te taanga ni buaka ni kabane. E a bati n tau naba tao uoua ke tenua tenga mwaane ibukini kataenikaian Ai. Tai kakuaia aomata ni kabane ni kanakoia, bwa tii tabeman mwaitiia aomata akekei.”

4 Mangaia are a waerake nako ikekei tao 3,000 kaain te taanga ni buaka, ma a a manga birinako mairouia mwaanen Ai.+ 5 A oreiia ni kamateia mwaane aika 36 mwaanen Ai, ao a kakioia mai tinanikuni mataroan oon te kaawa n ruo rikaaki ni karokoa Tebarim,* ao a oreiia ni kamateia i aoni kawaia. Mangaia are a a moanna ni maaku nanoia tibun Iteraera ao e a raanganako n ai aron te ran ninikoriaia.*

6 Ibukin aei ao e raeuai kunnikaina Iotua, ao e katorobubua ni bobaraaki nako aontano i matan ana Ati Iehova ni karokoa ae bong, ngaia ma aia unimwaane tibun Iteraera, ao a teimatoa ni kaaurakea te tano nako aon atuia. 7 E taku Iotua: “Akea ngai te Uea ae Moan te Rietata ae Iehova, e aera ngke ko kairaamai te natannaomata aei bwa a na rinanon te Ioretan nakon iterana aei, tii ibukin ae ko na anga ngaira nakoia taian Amoraite bwa ti na kamaunaaki? E raoiroi riki ngke a rau nanora ao ti tiku n iteran te Ioretan are te iterana!* 8 Taiaoka ngkoe ae Iehova, tera ae I kona n taekinna ngkai a a mumun rikaaki* tibun Iteraera mai mwaia aiaia? 9 Ngkana a ongo taekan aei tibuni Kanaan ma kaain te aba ni kabane, ao a na otabwaninira ma ni kamaunai arara man te aonnaba, ao tera ae ko na karaoia ma aram ae kakannato?”+

10 E kaeka Iehova nakon Iotua ni kangai: “Teirake! E aera ngkai ko a bobaraaki n arom anne? 11 A bure tibun Iteraera. A a tia n urua au berita+ are I tua nakoia bwa a na kawakinna. A anai bwaai tabeua mai buakoni baike a kaokoroaki bwa a na kamaunaaki,+ ni kimoaia+ ao ni karaba ni kaaki i buakon aia bwai.+ 12 Mangaia ae a aikoa kona n tei tibun Iteraera ni kaaitaraia aiaia. A na katannakoi akuia ao ni birinako mairouia aiaia, ibukina bwa a a riki naba bwa bwaai aika kaokoroaki bwa a na kamaunaaki. N na aki manga memena iroumi ma tii ngkana kam kamauna mai buakomi te bwai are riai ni kamaunaaki.+ 13 Teirake ao katabuia* te natannaomata aei!+ Ao tuangia ni kangai, ‘Katabuingkami ibukin te ingabong, bwa e kangai ana taeka Iehova ae Atuan Iteraera: “E mena i buakomi te bwai ae kaokoroaki bwa e na kamaunaaki, ngkami aika tibun Iteraera. Kam aki kona n tei ni kaaitaraia aiami ni karokoa ae kam kanakoa mai buakomi te bwai ae kaokoroaki bwa e na kamaunaaki. 14 Kam na kaotingkami n te moaningabong, te baronga teuana ma teuana, ao te baronga are e rineia Iehova+ e na keerake, te utu teuana ma teuana, ao te utu are e rineia Iehova e na keerake, kaain nako te bata teuana ma teuana, ao kaain nako te bata are e rineia Iehova a na keerake, ao te mwaane temanna ma temanna. 15 Ao te aomata are reke ao iai irouna te bwai are kaokoroaki bwa e na kamaunaaki, e na kamateaki ao imwina e kabuekaki n te ai,+ ngaia ma ana bwai ni kabane, ibukina bwa e urua ana berita+ Iehova ao ibukina bwa e karaoa te mwakuri ae moan te kabwainrang i Iteraera.”’”

16 Mangaia are e utimwaaka Iotua n te moaningabong are imwina ao e tua bwa a na keerake tibun Iteraera, te baronga teuana ma teuana, ao e rineaki te baronga ae Iuta. 17 E tua bwa a na keerake ana utu nako Iuta, ao e rineaki te utu are kanoan Teera,+ imwin anne ao e tua bwa e na keerake te utu are kanoan Teera, te mwaane temanna ma temanna, ao e rineaki Taberi. 18 Ni kabaneana ao e tua bwa a na keerake kaaini batan Taberi, te mwaane temanna ma temanna, ao e rineaki Akan are natini Karemi, are natin Taberi, are natin Teera, are man te baronga are Iuta.+ 19 E taku ngkanne Iotua nakon Akan: “Natiu, taiaoka bwa ko na karinea Iehova ae Atuan Iteraera ao kaota am bure nakoina. Taiaoka tuangai te bwai ae ko a tia ni karaoia. Tai karabaa mairou.”

20 Ao Akan e kaekaa Iotua ni kangai: “Ni koauana, boni ngai ae I bure nakon Iehova ae Atuan Iteraera, ao aio te bwai ae I a tia ni karaoia. 21 Ngke I nora te kunnikai mai Tina+ ae bobuaka ae mataraoi i buakoni bwaai ni kuri, ao 200 te tiekera* n tirewa ao te koora ae 50 te tiekera rawawatana, ao I mataaiakin, ngaia are I a anai. A karabaaki ngkai n te tano i nanon au umwanrianna ao e mena te mwane i aana.”

22 E aki tabwara Iotua ma e a kanakoia naba taan uataeka, ao a biri nakon te umwanrianna ao e karabaaki te kunnikai i nanon ana umwanrianna ma te mwane i aana. 23 Mangaia are a anai bwaai akekei man te umwanrianna ao a uotii nakon Iotua ao nakoia tibun Iteraera ni kabane, ao a kaaki i matan Iehova. 24 Ao Iotua ma tibun Iteraera ni kabane ake raona a kaira Akan+ are tibun Teera n ikotaki ma natina mwaane, natina aine, ana kao mwaane, ana taongki, ana nanai ni man, ao a anaa te tirewa, te kunnikai ae bobuaka, te koora,+ ana umwanrianna, ao bwaai ni kabane ake ana bwai, ao a kairiia ma n uotii nakon te Mwarua* ae Akora.+ 25 E taku Iotua: “E aera ngkai ko karokoa te kabuanibwai* i aora?+ E na karokoa naba te kabuanibwai Iehova i aom n te bong aei.” Ao a bane ni karebanaa teuaei tibun Iteraera ni kabane,+ ao imwin anne a kabuekiia n te ai.+ Mangaia are a karebanaiia ni kabane. 26 Ao a katabuka te bwariko n atibu ae bubura i aon teuaei, ae tiku ni karokoa te bong aei. Ibukin aei ao e a kerikaaki unin Iehova ae korakora.+ Anne bukina ae aran te tabo anne bon te Mwarua ae Akora* ni karokoa te bong aei.

8 E taku ngkanne Iehova nakon Iotua: “Tai maaku ke ni maakunrang.+ Ko na kairiia mwaane aika taani buaka ni kabane ao waerake n ekaanako Ai. Noria, I a tia n anga nakoim uean Ai ma ana aomata, ao ana kaawa ma abana.+ 2 Ko na karaoa nakon Ai ma ueana te aro are ko karaoia naba nakon Ieriko ma ueana,+ ma kam a kona ngkai ni kuribwai bwaai ni kuri ake iai ma nanai ni man ake iai, i bon ibukimi. Ko na katikuia taani karan i akun te kaawa.”

3 Mangaia are e a waerake n ekaanako Ai Iotua ma mwaane ake taani buaka ni kabane. E rineiia taani buaka aika korakora aika 30,000 Iotua, ao e kamwanangaia n te bong. 4 E tua ae kangai nakoia: “Noria, kam na kakaran i akun te kaawa. Tai rangi ni kararoaingkami ma te kaawa, ao kam na bane n tauraoi. 5 Ao ngai ma aomata ni kabane aika raou ti na kaania te kaawa, ao ngkana a otinako n ekiranako n aron are mai mwaina,+ ao ti na mumun rikaaki mairouia. 6 Ngkana a otinako n rimwira, ao ti na kairiianako man te kaawa, bwa ane a na kangai, ‘A a mumun rikaaki mairoura n aron are mai mwaina.’+ Ao ti na mumun rikaaki mairouia. 7 Ao kam riai ngkanne n teirake man ami tabo ni karan ao taua te kaawa. E na anga nakoimi Iehova ae Atuami. 8 N te tai naba are kam taua iai te kaawa, ao kam riai ni kaurarakea.+ Kam riai ni karaoa are e taekinna Iehova. Noria, I a tia n tua nakoimi.”

9 E a kamwanangaia ngkanne Iotua ao a a mwaati nakon te tabo ni karan. A mena i marenani Betaera ma Ai i maeaon Ai, ao e tiku Iotua i rarikia nikiraia tautia n te tairiki anne.

10 Imwin utimwaakan Iotua n te moaningabong ao ikotakia* kaain te taanga ni buaka, ao e a kairiia nako Ai, ngaia ma aia unimwaane tibun Iteraera. 11 A bane ni mwaati mwaane ake taani buaka+ ake raona ao a mwananga nako moan te kaawa. A kaembwa i meangin Ai, ao iai te mwarua i marenaia ma Ai. 12 N te tai anne ao e a tia ni karekeia mwaane aika tao 5,000 ao e katikuia bwa taani karan+ i marenani Betaera+ ma Ai, i maeaon te kaawa. 13 Mangaia are a katea aia kaembwa kaain te taanga ni buaka i meangin te kaawa,+ ao a mena taan tantani mai buki i maeaon te kaawa,+ ao e mwananga Iotua nako nukan te mwarua* n te tairiki anne.

14 Ao ngke e bon nora naba aei uean Ai, ao e waekoa n otinako ngaia ma mwaanen te kaawa n te karangaina, bwa a na buakania tibun Iteraera n te tabo ae kaaitara ma te rereua ae aoraoi.* Ma e aki ataia teuaei ae iai taani karan aika katukaki i akun te kaawa, bwa a na ekianako. 15 Ngke a a buaka mwaanen Ai, ao a a birinako naba Iotua ma tibun Iteraera ni kabane n te kawai nakon te rereua.+ 16 Ao a a bane ni weteaki aomata ake n te kaawa bwa a na kaeiia, ao ngke a kaea Iotua ao a a kairakinako man te kaawa. 17 Akea te mwaane temanna ae tiku i Ai ao i Betaera ae e aki otinako n rimwia tibun Iteraera. A katuka te kaawa ni katangainaa ao a kakioia tibun Iteraera.

18 E a taku ngkai Iehova nakon Iotua: “Arora te koro ane i nanoni baim ni kaitaraa Ai,+ bwa N na bon anga nako nanoni baim.”+ Ngaia are e arora te koro are i nanoni baina Iotua ni kaitaraa te kaawa. 19 N te tai are e arora iai baina, ao a waekoa n teirake taani karan man aia tabo ao a biri n rin n te kaawa ma n taua. Ao a aki tabwara ni kabueka te kaawa n te ai.+

20 Ngke a rairaki mwaanen Ai, ao a a nora bubun te kaawa bwa e a waerake nako karawa, ao ai akea korakoraia ni biri nakon te tabo teuana. Ao te koraki ake a birinako nakon te rereua a a manga rairaki nakoia taani kaeiia. 21 Ngke e noria Iotua ma tibun Iteraera ni kabane bwa a a tia n taua te kaawa taani karan, ao a nora bubun te kaawa bwa e a waerake, ao a a rairaki ma ni buakania mwaanen Ai. 22 Ao naake tabemwaang a otinako man te kaawa ni kaitiboo ma ngaiia, n te aro are a a mwane i nuka mwaanen Ai, ao tibun Iteraera tabeman n te itera aei ao tabeman n te itera are teuana, ao a kamateia ni karokoa ae ai akea temanna ae tiku ae maiu ke ae e reke birinakona.+ 23 Ma a taua uean Ai+ ngke e maiu ao a kairia nako matan Iotua.

24 Ngke a a tia tibun Iteraera ni kamateia kaain Ai ni kabane ake a kaeiia nakon te rereua ao ni kabwakaia n te kabaang, ao a a manga bane tibun Iteraera n okira Ai ao ni kamateia n te kabaang ake a tiku iai. 25 Mwaitiia ni kabane ake a bwaka n te bong anne, mairoun te mwaane ni karokoa te aine bon 12,000, aika kaain Ai ni kabane. 26 E aki roko n te kaoka baina Iotua are e arora iai te koro,+ ni karokoa ae e tia ni kamaunaia kaain Ai ni kabane.+ 27 Ma a anai nanai ni man ao bwaai ni kuri ake n te kaawa tibun Iteraera i bon ibukia, ni kaineti ma baike e tua Iehova nakon Iotua.+

28 E kabueka ngkanne Ai Iotua, ao e karikia bwa te kaawa ae urubekebeke,+ ao e tiku ni karokoa te bong aei. 29 E taura uean Ai i aon te kai* ni karokoa ae bong, ao ngke e nangi bung taai ao e tua Iotua bwa e na karuoaki rabwatana man te kai.+ Ao a karenakoa i rarikini mataroan oon te kaawa ao a katabuka te bwariko n atibu i aona ae bubura, ao e boni mena ikanne ni karokoa te bong aei.

30 N te tai anne ao Iotua e katea te baonikarea i aon te Maunga ae Ebara+ nakon Iehova ae Atuan Iteraera, 31 n aron are e tua Mote are ana toro Iehova nakoia tibun Iteraera, ao n aron are koreaki ni bokin te Tua+ Rinanoni Mote, ae kangai: “Te baonikarea ae karaoaki man atibu aika aki korokoreaki, aika e tuai ni kabonganaaki i aoia te bwai ni mwakuri ae karaoaki man te biti.”+ A anga i aona taiani karea ni kabuekaki nakon Iehova n ikotaki ma karea n raoi.*+

32 Ao e korea ikanne i aon taian atibu katotongan te Tua+ are e koreia Mote i mataia tibun Iteraera.+ 33 A bane n tei tibun Iteraera, aia unimwaane, mataniwi, ao aia tia moti, n iteran te Ati ni kauaitera, i moaia ibonga* ake tibun Rewi ake a uouota ana ati ni berita Iehova. A mena naba ikanne naake a maeka n iruwa n ikotaki ma ake bon tibun Iteraera.+ A tei iterani mwaitiia i moan te Maunga ae Keritim ao ake iteraia i moan te Maunga ae Ebara+ (n aron are e tua mai mwaina Mote are ana toro Iehova),+ bwa a na kakabwaiaia tibun Iteraera. 34 Imwin aei ao e wareki taekan nako te Tua+ ni kabaibati aika taiani kakabwaia+ ao taian rekenikai,+ ni kaineti ma bwaai ni kabane ake a koreaki ni bokin te Tua. 35 Bon akea te taeka teuana mai buakoni baike e tua ni kabane Mote, ae e aki warekia Iotua ni kabaibati i matan te botaki n aomata aika tibun Iteraera,+ n ikotaki ma aine ao ataei, ao aomata ake a maeka n iruwa+ ake a mena* i buakoia.+

9 Ngke a ongo taekan te bwai are riki ueea ni kabane ake a mena n iteran te Ioretan are mai maeao,+ ake a mena n te aono ae maungaunga, n te Tiebira,* ao ake i mataniwin Taari ae Abwabwaki,*+ ao ake i moan Rebanon—ake tibun Eta, taian Amoraite, tibuni Kanaan, taiani Beritaite, taian Iwaite, ao I-Iebuti,+ 2 ao a a karaoa aia boraraoi bwa a na buakana Iotua ma tibun Iteraera.+

3 A ongo naba kaaini Kibeon+ taekan te baere e karaoia Iotua nakon Ieriko+ ma Ai.+ 4 Mangaia are a bwaina te nanowanawana ao a karin aia tianaki i nanoni buua aika mangaingai i aon aia taongki, n ikotaki ma nne ni wain* aika mangaingai aika raeuaaki ao a a tia ni bonotaki. 5 A kaunia naba ni kaau aika bonobonotaki ao a bwainia ni kunnikai aika mangaingai. A a bane ni mwautakataka ma ni maekeeke aia kariki ake aia tianaki. 6 A kawara ngkanne Iotua n te kaembwa i Kirekara,+ ao a taku nakoina ma mwaane ake tibun Iteraera: “Ti roko man te aba ae raroanako. Ngaia ae karaoa ngkai te berita ma ngaira.” 7 Ma a taku mwaane ake tibun Iteraera nakoia taian Iwaite:+ “Tao kam boni maeka n uakaan ma ngaira. Mangaia ae ti na kangaa ni karaoa te berita ma ngkami?”+ 8 A kaeka ni kangai nakon Iotua: “Bon am toro* ngaira.”

E taku ngkanne Iotua nakoia: “Antai ngkami, ao kaain ia ngkami?” 9 Ao a taku nakoina: “A roko am toro man te aba ae rangi n raroanako+ ibukin aran Iehova ae Atuam, ibukina bwa ti a tia n ongo taekani kakannatona ao baike e karaoi ni kabane i Aikubita,+ 10 ao baike e karaoi ni kabane nakoia ueea ake uoman i aoia taian Amoraite ake n iteran te Ioretan are te iterana,* are Taion+ are Uean Etiibon ma Oka+ are Ueani Batian, are mena i Atitarota. 11 Ai ngaia are a tuangira ni kangai ara unimwaane ma kaain abara ni kabane, ‘Karekei ami tianaki ibukin te mwananga ao naako kawariia. Ao tuangia ni kangai: “Ti na riki bwa ami toro.+ Ngaia ae karaoa ngkai te berita ma ngaira.”’+ 12 E bue te kariki aei ngke ti anaia bwa ara tianaki n te bong are ti kitan iai ara auti bwa ti na nakomai ni kawaringkami. Ao ngkai kam kona n noria bwa e a mwautakataka ao ni maekeeke.+ 13 A boou nne ni wain aikai ngke ti kanoai, ma ngkai a a raeuaaki.+ Ao a a mangaingai kunnikaira ma ara kau, ibukin te raroa ae rangi n abwabwaki n te mwananga.”

14 Ao mwaane akekei a anai* tabeua mai buakon aia tianaki nakekei, ma a aki titirakina Iehova.+ 15 Mangaia are e a karekea te raoi Iotua ma ngaiia,+ ao e karaoa te berita ma ngaiia bwa e na kamaiuia, ao anne naba te bwai ae a berita iai n te taetae n tuea mataniwi n te botaki n aomata.+

16 Imwini koron tenibong imwini karaoan aia berita ma ngaiia, ao a a ongo ae a boni maeka n uakaan ma ngaiia, i bon i rarikia. 17 Ao a a mwananga tibun Iteraera ao a a roko n aia kaawa nakekei n te katenua ni bong. Aia kaawa boni Kibeon,+ Kebira, Beerota, ao Kiriataearim.+ 18 Ma a aki buakania nakekei tibun Iteraera, ibukina bwa a a tia mataniwi n te botaki n aomata ni berita n te taetae n tuea iroun Iehova+ ae Atuan Iteraera, nakoia nakekei. Mangaia are e a bane te botaki n aomata ni ngurengure nakoia taiani mataniwi. 19 Ibukin aei ao a a bane n taku mataniwi nakon te botaki n aomata arei: “Ti aki kariaiakaki ni kammarakiia nakekei, kioina ngkai ti berita n te taetae n tuea nakoia iroun Iehova ae Atuan Iteraera. 20 Aio te bwai ae ti na karaoia: Ti na kamaiuia bwa e aonga n aki roko i aora te un ibukin te berita are ti taetae n tuea iai nakoia.”+ 21 Ao a reitia ni kangai mataniwi: “Ke a maiu, ma ke a riki bwa taan tabeaia ao taan itiran ibukin te botaki n aomata.” Anne te bwai ae a beritanna mataniwi nakoia naakai.

22 E a weteiia ngkanne nakekei Iotua ao e taku nakoia: “E aera ngkai kam mwamwanaira ni kangai, ‘Ti roko man te tabo ae rangi n raroanako mairoumi,’ ao ngaia kam boni maeka n te tabo ae rangi ni kaan ma ngaira?+ 23 Ni moa mangkai ao a a reke kaimi,+ ao kam nang teimatoa n riki bwa tooro aika taan tabeaia ao taan itiran ibukin ana auti Atuau.” 24 A kaekaa Iotua ni kangai: “Ibukina bwa a boni kaongoaki raoi am toro bwa Iehova ae Atuami e tua nakoni Mote are ana toro bwa e na anganingkami te aba ni kabane, ao ni kamaunaia kaaina ni kabane mai mwaimi.+ Mangaia ae ti a maaku ibukini maiura* ibukimi,+ ao anne bukina ae ti karaoa iai aei.+ 25 Ao ti a mena ngkai i aan am nanoanga.* Ko na karaoa nakoira ane ko taku bwa e raoiroi ao e eti.” 26 Ao anne te bwai ae e karaoia nakoia. E kamaiuia mai nanoni baia tibun Iteraera, ao a aikoa tiringia. 27 Ma e karaoiia Iotua n te bong anne bwa taan tabeaia ao taan itiran ibukin te botaki n aomata arei,+ ao ibukin ana baonikarea Iehova n te tabo are e rineia te Atua,+ ao a teimatoa n aroia anne ni karokoa te bong aei.+

10 Ngke e ongo naba ngkekei Atoniteteka are Uean Ierutarem bwa e a tia Iotua n taua Ai ao e kamauna, ao ni karaoa nakon Ai ma ueana+ te aro are e karaoia naba nakon Ieriko ma ueana,+ ao aroia kaaini Kibeon ni karekea te raoi ma tibun Iteraera+ ao n tiku i buakoia, 2 ao e a korakora maakuna,+ ibukina bwa Kibeon bon te kaawa teuana ae kakannato, n aron teuana i buakon aia kaawa bwaanuea. E kakannato riki nakon Ai,+ ao mwaanena ni kabane bon taani buaka. 3 Mangaia are e a kanakoa te rongorongo ae kangai Atoniteteka are uean Ierutarem, nakon Oam are uean Eberon,+ Biram are uean Iaremuta, Iabia are uean Rakiti, ao Tebira are uean Ekeron:+ 4 “Nakomai buokai ao ti na buakana Kibeon, ibukina bwa e a tia ni karekea te raoi ma Iotua ao tibun Iteraera.”+ 5 Ao a a ikotaki ni kabane ueea aika niman aikai ake aia uea taian Amoraite,+ ae uean Ierutarem, uean Eberon, uean Iaremuta, uean Rakiti, ao uean Ekeron, n ikotaki ma aia taanga ni buaka, ao a mwaati ao ni kaembwa ni kaitaraa Kibeon bwa a na buakanna.

6 A kanakotaeka ngkanne mwaaneni Kibeon nakon Iotua n te kaembwa i Kirekara+ ni kangai: “Tai kaaki taekaia* am toro.+ Bareiko n nakomai! Kamaiuira ao buokira! A a bane n ikotaki aia uea taian Amoraite man te aono ae maungaunga, bwa a na ekiranako.” 7 Mangaia are e a waerake Iotua mai Kirekara ma mwaane ni kabane aika taani buaka, ao taani buaka aika korakora.+

8 E taku ngkanne Iehova nakon Iotua: “Tai maakuia,+ bwa I a tia n anga ngaiia nakoim.+ Akea temanna i buakoia ae e na kona n tei ni kaaitarako.”+ 9 Ao e rina n roko Iotua n ekiianako imwini mwanangana ni kangainaa mai Kirekara. 10 Ao e kamangaoia Iehova imwaia tibun Iteraera,+ ao a karokoa te kamamate ae korakora i aoia naakai i Kibeon, ni kaeiia n te kawai n ararakea Betaoron ao ni kamateia ni karokoa Ateka ao Maketa. 11 Ngke a birinako mairouia tibun Iteraera ao a a mena ni kawaini Betaoron n ruo rikaaki, ao Iehova e kabwakaa i aoia te karau ae te aiti ae korakora mai karawa, ni karokoa Ateka, ao a a mate. A boni bati riki aika mate man te karau ae te aiti nakoia ake a mate n aia kabaang tibun Iteraera.

12 N te bong are e kataenikaiia iai taian Amoraite Iehova i mataia tibun Iteraera, ao e taetae iai Iotua nakon Iehova i mataia tibun Iteraera ni kangai:

13 Mangaia are e tei taai n aki kakammwakuri ao e aki mwaing namwakaina, ni karokoa ae e kataenikaiia aiana te natannaomata arei. Tiaki e koreaki taekana n ana boki Iatia?+ E tei n aki kakammwakuri taai i nukani karawa, ao e aki ienikuri ni bung, i nanon tao teuana te bong. 14 Bon akea te bong ae ai aron te bong anne mai mwaina ke imwina, ae e ongo iai Iehova ni bwanaan te mwaane temanna,+ bwa e buaka Iehova ibukia tibun Iteraera.+

15 Imwin anne ao a a okira te kaembwa i Kirekara,+ Iotua ma tibun Iteraera ni kabane.

16 Ao a birinako ueea aika niman aikai ao a karabaia n te nangananga i Maketa.+ 17 Ao e kaongoaki ae kangai Iotua: “A kuneaki ueea ake niman ni karabaia n te nangananga i Maketa.”+ 18 Mangaia are e taku Iotua: “Karabinoi atibu aika totoa nako matan te nangananga, ao mwiokoiia mwaane bwa a na teinia. 19 Ma ngkami akana nikirana, tai motirawa. Kaeiia aiami ao kamateia mai buki.+ Tai kariaia bwa a na rinnako n aia kaawa, bwa e a tia Iehova ae Atuami n anga ngaiia nako nanoni baimi.”

20 Ngke e a tia Iotua ma tibun Iteraera ni karokoa te kamamate ae rangi ni korakora i aoia, ni karokoa ae a a boni kamaunaia, ao tii tabeman aika tiku ake a reke maiuia ake a birinako ao n rinnako ni kaawa aika nonoaki, 21 ao a a bane n oki aomata nakon Iotua n te kaembwa i Maketa, n akea aia kangaanga. Bon akea te mwaane temanna ae ninikoria n taekina te taeka* teuana n ekiianako tibun Iteraera. 22 E taku ngkanne Iotua: “Kauka matan te nangananga ao kaotinakoia ueea ake niman man te nangananga nakoiu.” 23 Mangaia are a kairiia nakoina ueea aika niman aikai man te nangananga: uean Ierutarem, uean Eberon, uean Iaremuta, uean Rakiti, ao uean Ekeron.+ 24 Ngke a kairiia ueea aikai nakon Iotua, ao e weteiia mwaane ni kabane aika tibun Iteraera, ao e taku nakoia mataniwia mwaane ake taani buaka ake a airi ma ngaia: “Keerake ao katokai waemi i aoni bukin roroaia ueea aikai.” Mangaia are a keerake ao a katokai waeia i aoni bukin roroaia nakekei.+ 25 E taku ngkanne Iotua nakoia: “Tai maaku ke ni maakunrang.+ Kam na ninikoria ao kakorakoraingkami, bwa aio te bwai ae e na karaoia Iehova nakoia aiami ni kabane aika kam buakania.”+

26 Ao e oreiia nakekei Iotua ni kamateia ao e tauriia i aon taiani kai* aika nimaai, ao a tiku n tauraki i aon taiani kai ni karokoa ae bong. 27 Ngke e a bung taai ao e a tua Iotua bwa a na karuoaki mai aon taiani kai,+ ao ni karenakoaki i nanon te nangananga are a karabaia ngkoa iai. Ao a karabinoaki atibu aika totoa nako matan te nangananga, ao a tiku ikanne ni karokoa te bong naba aei.

28 N te bong anne ao Iotua e taua Maketa+ ao e kamateia kaaina n te kabaang. E kamauna ueana ao aomata* nako ake iai, ao akea temanna ae e kariaia bwa e na reke maiuna.+ E karaoa nakon ueani Maketa+ te aro are e karaoia naba nakon uean Ieriko.

29 Ao a nako mai Maketa Iotua ma tibun Iteraera ni kabane nako Ribena, ao a buakana Ribena.+ 30 Ao Iehova e anga naba Ribena ma ueana+ nako nanoni baia tibun Iteraera, ao a oreia ma aomata* nako ake iai n te kabaang, ao akea temanna ae a kariaia bwa e na reke maiuna. Mangaia are a karaoa nakon ueana te aro are a karaoia naba nakon uean Ieriko.+

31 Imwina ao a nako mai Ribena Iotua ma tibun Iteraera ni kabane nako Rakiti,+ ao a kaembwa ikekei ao a buakanna. 32 Ao Iehova e anga Rakiti nako nanoni baia tibun Iteraera, ao a taua n te kauoua ni bong. A oreia n te kabaang ma aomata* nako ake iai,+ n aron are a karaoia nakon Ribena.

33 Ao Oram are ueani Ketera+ e waerake bwa e na buoka Rakiti, ma Iotua e kamatea teuaei ma ana aomata ni karokoa ae ai bon akea temanna ae reke maiuna.

34 Ao a nako mai Rakiti Iotua ma tibun Iteraera ni kabane nako Ekeron,+ ao a kaembwa ikekei ao a buakanna. 35 A taua n te bong anne ao a oreia n te kabaang. Ao a kamaunaia aomata* nako ake iai n te bong anne, n aron are a karaoia nakon Rakiti.+

36 Ao a nako mai Ekeron Iotua ma tibun Iteraera ni kabane nako Eberon,+ ao a buakanna. 37 A taua ao a oreia n te kabaang ma ueana, kaawana nako, ao aomata* nako ake iai, ao a aki kariaia temanna bwa e na reke maiuna. E kamauna ma aomata* nako ake iai, n aron are e karaoia nakon Ekeron.

38 N tokina ao a a rairaki ni kaineta Tebira+ Iotua ma tibun Iteraera ni kabane, ao a buakanna. 39 Ao e taua ma ueana ao kaawana nako, ao a kamateia n te kabaang ao ni kamaunaia aomata* nako ake iai,+ ao akea temanna ae a kariaia bwa e na reke maiuna.+ E karaoa nakon Tebira ma ueana te aro are e karaoia naba nakon Eberon ao nakon Ribena ma ueana.

40 E kataenikaiia aaba ni kabane Iotua ake n te aono ae maungaunga, n te Nekebo,* n te Tiebira,*+ ao n rabee nako, ao aia uea ni kabane, ao e aki kariaia temanna bwa e na reke maiuna. E kamaunaia aomata* nako+ n aron are e tua Iehova ae Atuan Iteraera.+ 41 E kataenikaiia Iotua mai Katetibaanea+ ni karokoa Kaata,+ ao aaba ni kabane ake i Koten+ ni karokoa Kibeon.+ 42 E tauia ueea aikai ni kabane Iotua ma abaia ni kabane n te tai ae tii teuana, ibukina bwa bon Iehova ae Atuan Iteraera ae e buaka ibukia tibun Iteraera.+ 43 Ao a a okira te kaembwa i Kirekara,+ Iotua ma tibun Iteraera ni kabane.

11 Ngke e ongo naba ngkekei taekan aei Iabin are uean Atiora, ao e a kanakotaeka nakon Iobaba are ueani Maton,+ ao nakon uean Timron, uean Akitaba,+ 2 ueea ake a mena n te aono ae maungaunga mai meang, te koraki ake n te tabo ae aoraoi* i maiakini Kinnereta, te koraki ake n te Tiebira,* te koraki ake n rabeen nako Toora+ nako maeao, 3 tibuni Kanaan+ ake i mainiku ao i maeao, taian Amoraite,+ tibun Eta, taiani Beritaite, I-Iebuti ake n te aono ae maungaunga, ao taian Iwaite+ ake i nanoaan Oman+ n te aba ae Mitiba. 4 Mangaia are a a otinako te koraki aei ma aia taanga ni buaka ni kabane, ae te koraki ae rangi ni mwaitikurikuri n aron tanon aon te bike, n ikotaki ma aoti aika rangi ni mwaiti, ao kaa ni buaka. 5 A bane ni boonnano ueea aikai bwa a na kaitiboo, ao a a mwananga ao a bane ni kaembwa i rarikin te koburake n ran i Merom, bwa a na buakania tibun Iteraera.

6 Ao e taku Iehova nakon Iotua: “Tai maakuia,+ bwa tao n taina aei ningabong ao N na anga ngaiia ni kabane nakoia tibun Iteraera, ao a na kamateaki. Kam na kamwaukui aia aoti,+ ao kam na kabueki aia kaa ni buaka n te ai.” 7 Ao Iotua ma mwaane ake taani buaka ni kabane a rina ni buakania i rarikin te koburake n ran are i Merom. 8 E anga ngaiia Iehova nako nanoni baia tibun Iteraera,+ ao a kataenikaiia ma ni kaeiia ni karokoa Titon ae Kakannato,+ ao Mitirebotamaim,+ ao te Mwarua ae Mitibe nako mainiku, ao a tiringia ni karokoa ae ai bon akea temanna ae reke maiuna.+ 9 Ao Iotua e karaoa nakoia te aro are e tuangnga Iehova. E kamwaukui aia aoti ao e kabueki aia kaa ni buaka n te ai.+

10 Irarikin anne ao e a oki Iotua ao e taua Atiora ao e kamatea ueana n te kabaang,+ ibukina bwa Atiora boni kautun tautaeka n uea aikai ni kabane mai mwaina. 11 A oreiia aomata* nako ake iai n te kabaang, ni kamaunaia.+ Akea naba temanna ae maiu ae tiku.+ Ao imwina e kabueka Atiora n te ai. 12 E taui aia kaawa ni kabane ueea aikai Iotua, ao e kataenikaiia ueea ni kabane ake iai n te kabaang.+ E kamaunaia+ n aron are e a tia n tuangaki Mote are ana toro Iehova. 13 Ma a aki kabueki kaawa aika tei i aon taian tabuki tibun Iteraera, ma tii Atiora. Bon tii ngaia ae e kabuekia Iotua. 14 A kuribwai bwaai ni kuri ni kabane ma te nanai ni man aika mena ni kaawa aikai tibun Iteraera, i bon ibukia.+ Ma a oreiia aomata nako n te kabaang ni karokoa ae a kamaunaia n tatabemania nako.+ A aki kariaia bwa e na tiku temanna ae maiu.+ 15 N aron are e tua Iehova nakoni Mote are ana toro, ao n aron are e tua Mote nakon Iotua,+ ao e boni karaoia Iotua. Akea te bwai teuana ae e katikua n aki karaoia mai buakoni bwaai ni kabane ake e tua Iehova nakoni Mote.+

16 E taui aaba aikai ni kabane Iotua, te aono ae maungaunga, te Nekebo* ni kabutaa,+ te aba ae Koten ni kabutaa, te Tiebira,+ te Arabaa,*+ te aba ae rinano n te aono ae maungaunga i Iteraera, 17 ake aaba ni kabane ake man te Maunga ae Araka are waerake nako Teira, ao ni karokoa Baarakata+ n te Mwarua i Rebanon i nanoaan te Maunga ae Oman.+ E tauia ueea ake iai ni kabane ao e kataenikaiia ni kamateia. 18 E buaka Iotua ma ueea aikai ni kabane n te tai ae maan teutana. 19 Akea te kaawa ae karekea te raoi ma tibun Iteraera, ma tii taian Iwaite ake a mena i Kibeon.+ A kataenikaiia ni kabane ake tabemwaang n te buaka.+ 20 Bon Iehova ae kariaia nanoia naakai bwa a na imanono,+ bwa a aonga ni buakania tibun Iteraera, ao e aonga ni kamaunaia n akea nanoangaaia.+ A na boni kamaunaaki n aron are e tua Iehova nakoni Mote.+

21 N te tai anne ao Iotua e kamaunaia tibun Anaka+ man te aono ae maungaunga, mai Eberon, Tebira, Anaba, ao n aonon Iuta ae maungaunga ni kabutaa, ao te aono ae maungaunga ni kabutaa i Iteraera. E kamaunaia Iotua ma aia kaawa nako.+ 22 Bon akea nikiraia tibun Anaka n tiku i abaia tibun Iteraera, a tii tiku+ i Kaata,+ i Kate,+ ao i Atoto.+ 23 Mangaia are e taua taekan te aba ni kabutaa Iotua n aron are e beritanna Iehova nakoni Mote,+ ao imwina e a anga Iotua bwa tibwangaia tibun Iteraera ni kaineti ma tibwaia ake a a tia n anganaki n aia baronga.+ Ao e a motirawa te aba arei man te buaka.+

12 Ao aikai uean aaba ake a kataenikaiaki irouia tibun Iteraera, ake a anai abaia n abani n iteran te Ioretan are mai mainiku, man te Mwarua ae Arenon+ ni karokoa te Maunga ae Oman+ ao te Arabaa* ni kabutaa are mai mainiku:+ 2 Taion are aia Uea+ taian Amoraite, are e maeka i Etiibon ao e tautaeka mai Aroera+ are i mataniwin te Mwarua ae Arenon,+ ao mai nukan te mwarua, ao iterani Kireata ni karokoa te Mwarua ae Iaboka, are tiaia tibun Ammon. 3 E tautaeka naba i aon te Arabaa ni karokoa Namani Kinnereta*+ mai mainiku, ao ni karokoa Naman te Arabaa, ae te Nama ae Taari,* nako mainiku ni kaineta Betaietimota, ao i maiaki i aan rabeen nako Bitika.+

4 Ao ana aono naba Oka+ are Ueani Batian, are temanna i buakoia kabanean nikiraia taian Rebaim,+ are e maeka i Atitarota ao i Eterei, 5 ao e tautaeka n te Maunga ae Oman, i Tareka, ao i Batian ni kabutaa,+ ni karokoa tiaia I-Keturi ao I-Maakata,+ ao iterani Kireata, nakon ana aono Taion are Uean Etiibon.+

6 A kataenikaiaki naakai irouni Mote are ana toro Iehova ao tibun Iteraera,+ ao imwin anne ao e a anga abaia naakai Mote are ana toro Iehova, bwa abaia tibun Reuben, tibuni Kata, ao te itera ni baronga are Manate.+

7 Aikai uean aaba ake a kataenikaiaki iroun Iotua ma tibun Iteraera n iteran te Ioretan are mai maeao, mai Baarakata+ n te Mwarua i Rebanon+ ao ni karokoa te Maunga ae Araka,+ are waerake nako Teira.+ Imwin anne ao e a anga abaia Iotua nakoia aia baronga tibun Iteraera bwa tibwangaia ni kaineti ma tibwaia nako,+ 8 n te aono ae maungaunga, n te Tiebira,* n te Arabaa, n rabee nako, n te rereua, ao n te Nekebo,*+ ake abaia tibun Eta, taian Amoraite,+ tibuni Kanaan, taiani Beritaite, taian Iwaite, ao I-Iebuti:+

 9 Uean Ieriko,+ temanna, ao uean Ai+ are i rarikini Betaera, temanna.

10 Uean Ierutarem, temanna, ao uean Eberon,+ temanna.

11 Uean Iaremuta, temanna, ao uean Rakiti, temanna.

12 Uean Ekeron, temanna, ao ueani Ketera,+ temanna.

13 Uean Tebira,+ temanna, ao ueani Ketere, temanna.

14 Uean Orema, temanna, ao uean Aratia, temanna.

15 Uean Ribena,+ temanna, ao uean Aruram, temanna.

16 Ueani Maketa,+ temanna, ao ueani Betaera,+ temanna.

17 Uean Tabua, temanna, ao uean Ebee, temanna.

18 Uean Abeki, temanna, ao uean Ratiaron, temanna.

19 Ueani Maton, temanna, ao uean Atiora,+ temanna.

20 Uean Timronimeron, temanna, ao uean Akitaba, temanna.

21 Uean Taanaka, temanna, ao ueani Mekito, temanna.

22 Ueani Keteti, temanna, ao uean Iokeneam+ i Karemera, temanna.

23 Uean Toora n rabeen nako Toora,+ temanna, ao ueani Koiim i Kirekara, temanna.

24 Uean Tireta, temanna. Ikotaia ueea aikai ni kabane bon 31.

13 Ao e a kara Iotua ao e a bunginako ana ririki.+ Mangaia are e taku Iehova nakoina: “Ko a kara ao e a bunginako am ririki, ma a bati nikiran aaba aika tiku n tuai n abanaki.* 2 Aio te aba ae tiku:+ aia aono ni kabane I-Biritia ao I-Keturi+ ni kabane 3 (ni moa mani mwaangan te Naire* are i mainikun* Aikubita ni karokoa tian Ekiron nako meang, are e tataekinaki ngkoa bwa aia aono tibuni Kanaan),+ n ikotaki ma aia aono tooka aika niman aika I-Biritia,+ aika I-Kaata, I-Atoto,+ I-Atikeron,+ I-Kate,+ ao I-Ekiron,+ are aia aono taian Awim+ 4 nako maiaki, abaia tibuni Kanaan ni kabutaa, Meara are abaia I-Titon+ ni karokoa Abeki, ni karokoa tiaia taian Amoraite, 5 abaia I-Kebara+ ao Rebanon ni kabutaa are mai mainiku, ni moa mai Baarakata are i nanoaan te Maunga ae Oman ni karokoa Reboamata,*+ 6 kaain te aono ae maungaunga ni kabane, mai Rebanon+ nako Mitirebotamaim,+ ao I-Titon ni kabane.+ N na kakioianako* mai mwaia tibun Iteraera.+ Ma ko na tii tibwaia nakoia tibun Iteraera bwa tibwangaia, n aron are I tua nakoim.+ 7 Ao ko riai n tibwatibwaa te aba aei bwa tibwangaia baronga ake ruaiwa ao te itera ni baronga are Manate.”+

8 Te itera ni baronga are teuana, tibun Reuben, ao tibuni Kata, a anaa tibwangaia are e angania Mote n iteran te Ioretan are mai mainiku, n aron are e angania Mote are ana toro Iehova:+ 9 mai Aroera+ are i mataniwin te Mwarua ae Arenon, ao te kaawa are i nukan te mwarua,+ ao te tabo ae aoraoi* ni kabutaa ae Meteba ni karokoa Ribon, 10 ao ana kaawa ni kabane Taion are aia Uea taian Amoraite, are e tautaeka i Etiibon, ni karokoa tiaia tibun Ammon,+ 11 ao Kireata naba ao aia aono I-Keturi ao I-Maakata,+ ao te Maunga ae Oman ni kabutaa, ao Batian+ ni kabutaa ni karokoa Tareka,+ 12 ao aaba ni kabane ake e tautaekan Oka i Batian, are e tautaeka i Atitarota ao i Eterei. (Boni ngaia kabanean nikiraia taian Rebaim.)+ E kataenikaiia naakai Mote ao e kakioianako.*+ 13 Ma tibun Iteraera a aki kakioianako*+ I-Keturi ao I-Maakata, bwa a maeka kaaini Keturi ao kaaini Maakata i buakoia tibun Iteraera ni karokoa te bong aei.

14 Bon tii aia baronga tibun Rewi ae e aki angania tibwangaia.+ Bon tibwangaia karea aika kareanaki n te ai nakon Iehova ae Atuan Iteraera,+ n aron are e beritanna nakoia.+

15 Ao Mote e angan aia baronga tibun Reuben tibwangaia n aia utu nako, 16 ao e moa aia aono mai Aroera are i mataniwin te Mwarua ae Arenon, ao te kaawa are i nukan te mwarua, ao te tabo ae aoraoi ni kabutaa are i rarikini Meteba, 17 Etiibon ma kaawana nako+ ake n te tabo ae aoraoi, Ribon, Bamotabaara, Betabaarameon,+ 18 Iaati,+ Ketemota,+ Mebaata,+ 19 Kiriataim, Tibema,+ Teretatiaa are i aoni maungan te mwarua,* 20 Betabeore, rabeen nako Bitika,+ Betaietimota,+ 21 kaawa ni kabane ake n te tabo ae aoraoi, ao aaba ni kabane ake e tautaekan Taion are aia Uea taian Amoraite, are e tautaeka i Etiibon.+ E kataenikaia teuaei Mote+ ma mataniwini Mirian aika Ewi, Rekem, Tura, Uura, ao Reba,+ ao ana aomata Taion ake tooka* ake a maeka n te aba. 22 A kamatea n te kabaang Baraam+ are natini Beora are te tia kaiwa,+ tibun Iteraera, n ikotaki ma te koraki ake nikirana ake a kamateaki. 23 Tiaia tibun Reuben bon te Ioretan, ao te aono aei bon tibwangaia tibun Reuben n aia utu nako, ma kaawa ao taabo ni maeka ake iai.

24 Irarikin anne ao e anga te tibwanga Mote nakon te baronga are Kata, ake tibuni Kata n aia utu nako, 25 ao aia aono bon Iatera+ ma kaawani Kireata ni kabane ao iteran abaia tibun Ammon+ ni karokoa Aroera, are kaitaraa Rabaa,+ 26 ao mai Etiibon+ nako Ramatamitibe ao Betonim, ao mai Maanaim+ nakon tian Tebira, 27 ao n te mwarua* boni Betaaram, Betanimra,+ Tukota,+ ao Taabon, ake nikiran aaba ake e tautaekan Taion are Uean Etiibon,+ ao te Ioretan bon tiana mai maiaki mai tabon Namani Kinnereta*+ mai mainikun te Ioretan. 28 Anne bon tibwangaia tibuni Kata n aia utu nako, ma kaawa ao taabo ni maeka ake iai.

29 Irarikina ao e anga te tibwanga Mote nakon te itera ni baronga are Manate, nakon te itera ni baronga are Manate n aia utu nako.+ 30 Ao e moa aia aono mai Maanaim+ ao e reke naba iai Batian ni kabutaa, ake aaba ni kabane ake e tautaekan Oka are Ueani Batian, ao ana kaawa Iaira ni kabane i Batian ake a mena iai umwanrianna,+ bon 60 te kaawa. 31 Ao iterani Kireata, ao Atitarota ma Eterei,+ ake kaawa ake e tautaekan Oka are ueani Batian, e nakoia natini Makira+ are natini Manate, e nakoia iteraia natini Makira mwaane, n aia utu nako.

32 Akanne bon tibwanga ake e angania Mote n rereuani Moaba ake a aoraoi n iteran te Ioretan are te iterana, i mainikun Ieriko.+

33 Ma e aki angan aia baronga tibun Rewi te tibwanga teuana Mote.+ Bon tibwangaia Iehova ae Atuan Iteraera, n aron are e beritanna nakoia.+

14 Ao anne tibwangaia tibun Iteraera are a karekea n te aba ae Kanaan, are a anganaki bwa a na bwaibwai iai iroun Ereata are te ibonga,* ao Iotua are natin Nun, ao mataniwi n aia baronga tibun Iteraera.+ 2 E reke tibwangaia rinanon te kanikina* mairoun te Atua,+ n aron are e tua Iehova rinanoni Mote ibukini baronga ake ruaiwa ma te iterana.+ 3 E a tia Mote n angania tibwangaia baronga ake uoua ma te iterana n iteran te Ioretan are te iterana,*+ ao e aki anga te tibwanga teuana nako buakoia tibun Rewi.+ 4 A iangoaki kanoan Ioteba bwa baronga aika uoua,+ are Manate ao Eberaim,+ ao a aki anga te tibwanga teuana n te aba nakoia tibun Rewi, ma tii kaawa+ ake a na maeka iai, ao aia tawaana ibukin aia nanai ni man ma aia bwai.+ 5 Mangaia are a tibwatibwaa te aba tibun Iteraera n aron are e tua Iehova nakoni Mote.

6 A kawara ngkanne Iotua mwaane aika tibun Iuta i Kirekara,+ ao e taku nakoina Kareba+ are natin Iebunne are te Kenitaite: “Ko ataa raoi te baere e taekinna Iehova+ nakoni Mote are ana aomata te Atua ae koaua,+ ibukiu ao ibukim i Katetibaanea.+ 7 Bon 40 au ririki ngke e kamwanangaai Mote are ana toro Iehova nako Katetibaanea, bwa N na karaba n tuoa te aba,+ ao I oki ma te rongorongo ae eti raoi.*+ 8 E ngae ngke a kabwarai nanoia* aomata naake tariu ake raou ni mwananga, ma I irira Iehova ae Atuau ma nanou ni kabane.*+ 9 E taetae n tuea n te bong arei Mote ni kangai: ‘E na riki te aba are e nakonako iai waem bwa tibwangam ae teimatoa ma natim, ibukina bwa ko irira Iehova ae Atuau ma nanom ni kabane.’+ 10 Ao e a tia ni kateimatoa maiuu Iehova+ i nanon ririki aika 45 aikai n aron are e beritanna,+ man te tai are e karaoa iai te berita aei Iehova nakoni Mote, ngke a nakonako tibun Iteraera n te rereua.+ Bon iai naba ngai n te bong aei, ao ai 85 au ririki. 11 Ao n te bong aei, ao I boni korakora naba n aron are n te bong are e kamwanangaai iai Mote. Bon titeboo korakorau ae ngkai ma are ngkekei, ibukin te buaka ke mwakuri riki tabeua. 12 Mangaia ae anganai te aono ae maungaunga aei are e beritanna Iehova n te bong arei. E ngae ngke ko ongo n te bong arei bwa iai tibun Anaka+ ikekei ma kaawa aika korakora aika nonoaki,+ ma e na boni* memena irou Iehova,+ ao N na kakioianako,* n aron are e beritanna Iehova.”+

13 Mangaia are e taetae Iotua ni kakabwaiaa Kareba are natin Iebunne, ao e anganna Eberon bwa tibwangana.+ 14 Anne bukina ae Eberon bon tibwangani Kareba are natin Iebunne are te Kenitaite ni karokoa te bong aei, ibukina bwa e irira Iehova ae Atuan Iteraera ma nanona ni kabane.+ 15 Aran Eberon mai mwaina boni Kiriataareba+ (Areba bon te mwaane ae kakannato i buakoia tibun Anaka). Ao e a motirawa te aba arei man te buaka.+

15 Te aba are a anganaki*+ te baronga are Iuta ibukia aia utu nako, e rokoroko n tian Etom,+ n rereuan Tiin, ao nakon te Nekebo* are i tabona mai maiaki. 2 E moa tiaia mai maiaki mai tabon te Nama ae Taari,*+ man te mwanoku are kaitaraa maiaki. 3 Ao e rokoroko i maiaki nakon te kawai n ararakea Akerabim,+ ao e nako Tiin, ao e a manga waerake mai maiaki nako Katetibaanea+ n nako Etiron, ni karokoa Ataa, ao e rairaki nako Kareka. 4 Ao e nako Atimon+ ao e rokoroko ni Mwaruan Aikubita,+ ao e toki te tia i Taari.* Aio bon tiaia mai maiaki.

5 Te tia mai mainiku bon te Nama ae Taari* ni karokoa tabon te Ioretan, ao te tia are man te maninganinga are mai meang bon te mwanoku i taari, i tabon te Ioretan.+ 6 E waerake te tia nako Betaokera+ ao e nako meangini Betarabaa,+ ao e waerake te tia nakon ana atibu Bokan+ are tibun Reuben. 7 E waerake ngkanne te tia nako Tebira n te Mwarua* ae Akora,+ ao e rairaki nako meang nako Kirekara,+ i moan te kawai n ararakea Atummim, i maiakin te mwarua, ao e nako te tia nakon ranin Entemeti,+ ao tokina Enrokera.+ 8 E waerake te tia nakon ana Mwarua Natin Innom+ nakon aia rabee I-Iebuti+ i maiaki, ae taekan Ierutarem,+ ao e waerake te tia nako taubukin te maunga are kaitaraa te Mwarua ae Innom nako maeao, i mataniwin te Mwarua* ae Rebaim nako meang. 9 Ao e kanikinaeaki te tia mai taubukin te maunga nakon te koburake n ran ae Nebetoa,+ ao e rokoroko ni kaawan nako te Maunga ae Ebiron, ao e kanikinaeaki te tia nako Bwaara, ae taekani Kiriataearim.+ 10 E rairaki te tia mai Bwaara nako maeao nakon te Maunga ae Teira, ao e nakon rabeen te Maunga ae Ierim i meang, ae taekani Ketaron, ao e ruo rikaaki nako Betatemeti+ ao e nako Tiimna.+ 11 Ao e rokoroko te tia n rabeen Ekiron+ nako meang, ao e kanikinaeaki te tia nako Tikeron, ao e nakon te Maunga ae Bwaara ao e rokoroko i Iabeneera, ao e toki te tia i taari.

12 E mena te tia mai maeao n Taari ae Abwabwaki*+ ma mataniwina. Aei bon tiaia n itera nako kanoan Iuta n aia utu nako.

13 Ao Iotua e angani Kareba+ are natin Iebunne tibwana i buakoia kanoan Iuta n aron are e tua Iehova nakon Iotua, ae Kiriataareba (Areba bon taman Anaka), ae taekan Eberon.+ 14 Ao Kareba e kakioianako mai ikekei natin Anaka+ aika teniman: Tetiai, Aiman, ao Taremai,+ ake kanoan Anaka. 15 Ao e waerake mai ikekei n ekiianako kaain Tebira.+ (Aran Tebira mai mwaina boni Kiriatatebera.) 16 E taku ngkanne Kareba: “Te mwaane ae orea Kiriatatebera ao e taua, ao N na anganna natiu te aine ae Aketa bwa buuna.” 17 Ao e taua te kaawa anne Oteniera+ are natini Kenati,+ are tarini Kareba. Mangaia are e a anganna natina te aine are Aketa+ bwa buuna. 18 Ngke e a nakoni mwengana Aketa, ao e a kaumaka Oteniera bwa e na butiia taman neiei te tawaana. Ao e ruo Aketa man ana taongki* ao e a titirakinna naba Kareba ni kangai: “Tera ae ko tangiria?”+ 19 E taku Aketa: “Taiaoka anganai te kakabwaia, bwa ko a tia n anganai te mwakoro n aba i maiaki,* ma anganai naba Kurotamaim.”* Ao teuaei e angan neiei Kurota are mai Eta ao Kurota are mai Nano.

20 Aio tibwangan te baronga ae Iuta n aia utu nako.

21 Kaawa ake a mena i tabon aia aono te baronga are Iuta mai maiaki nakon tian Etom,+ boni: Kabeteera, Etera, Iakura, 22 Kina, Rimona, Atataa, 23 Keteti, Atiora, Itenan, 24 Tibi, Terem, Bearota, 25 Atioraatata, ao Keriotaetiron, ae taekan Atiora, 26 Amam, Tiema, Morata,+ 27 Atakata, Etimon, Betabereta,+ 28 Atatuara, Beerateba,+ Bitiotia, 29 Bwaara, Im, Etem, 30 Eretorata, Ketira, Orema,+ 31 Tikeraka,+ Matemanna, Tantanna, 32 Rebaota, Tiurim, Ain, ao Rimmon.+ Botana bon 29 te kaawa n ikotaki ma taabo ni maeka ake iai.

33 Kaawa ake n te Tiebira*+ bon Etitaora, Toraa,+ Atina, 34 Tanoa, Enkannim, Tabua, Enam, 35 Iaremuta, Aruram,+ Tokoa, Ateka,+ 36 Tiaaraim,+ Aritaim, ao Keteraa, (ao Keterotaim).* Boni kaawa aika 14 ma taabo ni maeka ake iai.

37 Tenan, Atatiaa, Miketarakata, 38 Riran, Mitibe, Ioketeera, 39 Rakiti,+ Botikata, Ekeron, 40 Kabon, Ramam, Kiteriti, 41 Keterota, Betatakon, Naama, ao Maketa,+ boni kaawa aika 16 ma taabo ni maeka ake iai.

42 Ribena,+ Etere, Atian,+ 43 Ibeta, Atina, Netiba, 44 Keira, Aketiba, ao Maretiaa, boni kaawa aika ruaiwa ma taabo ni maeka ake iai.

45 Ekiron ma kaawa ake a mena i aana,* ao taabo ni maeka ake iai, 46 mai Ekiron nako maeao ma aono nako ake i rarikin Atoto, ao taabo ni maeka ake iai.

47 Atoto+ ma kaawa ake a mena i aana,* ao taabo ni maeka ake iai, Kaata+ ma kaawa ake a mena i aana, ao taabo ni maeka ake iai, rikaaki nakoni Mwaruan Aikubita, Taari ae Abwabwaki,* ao te aono are i rarikina.+

48 Ao kaawa ake n te aono ae maungaunga bon Tiamira, Iatira,+ Tokoa, 49 Tanna, Kiriatatanna, ae taekan Tebira, 50 Anaba, Etitemo,+ Anim, 51 Koten,+ Oron, ao Kiro.+ Boni kaawa aika 11 ma taabo ni maeka ake iai.

52 Arabia, Ruma, Etian, 53 Ianim, Betatabua, Abeka, 54 Umta, Kiriataareba, ae taekan Eberon,+ ao Tiora, boni kaawa aika ruaiwa ma taabo ni maeka ake iai.

55 Maon,+ Karemera, Tibi,+ Iuteta, 56 Ietireera, Ioketeam, Tanoa, 57 Kaiin, Kibea, ao Tiimna,+ boni kaawa aika tebwina ma taabo ni maeka ake iai.

58 Arura, Betatuura, Ketora, 59 Maaratia, Betaanota, ao Eretekon, boni kaawa aika onoua ma taabo ni maeka ake iai.

60 Kiriatabaara, ae taekani Kiriataearim,+ ao Rabaa, boni kaawa aika uoua ma taabo ni maeka ake iai.

61 Ao kaawa ake n te rereua boni Betarabaa,+ Mirin, Tekaka, 62 Nibetian, te Kaawa ae Taari, ao Enikeri.+ Boni kaawa aika onoua ma taabo ni maeka ake iai.

63 A aki kona mwaane aika tibun Iuta ni kakioianako+ I-Iebuti+ ake a maeka i Ierutarem,+ mangaia are a teimatoa ni maeka I-Iebuti ma tibun Iuta i Ierutarem ni karokoa te bong aei.

16 Ao te aba are reke n te kanikina* mairoun te Atua+ nakoia kanoan Ioteba,+ boni man te Ioretan i Ieriko nakon te koburake n ran are i mainikun Ieriko, rinanon te rereua ni waerake mai Ieriko nakon te aono ae maungaunga i Betaera.+ 2 E moa mai Betaera ae uakaan ma Ruti ao e reitinako nakon tiaia taian Arekaite i Atarota, 3 ao e ruo rikaaki nako maeao nakon tiaia taian Iabereti ni karokoa tiani Betaoron+ are mai Nano ao Ketera,+ ao e toki i taari.

4 Mangaia are a anaa abaia kanoan Ioteba,+ aika Manate ma Eberaim.+ 5 Aio tiaia kanoan Eberaim n aia utu nako: Tian abaia are tibwangaia nako mainiku bon Atarotaata,+ ni karokoa Betaoron are mai Eta,+ 6 ao e rokoroko te tia i taari. E mena Mikemetata+ i meang, ao e rairaki te tia n rimainiku nako Taanatatiro, ao e nako mainiku nako Ianoa. 7 Ao e ruo rikaaki mai Ianoa nako Atarota ma Naara, ao e rokoroko i Ieriko+ ao e reitinako nakon te Ioretan. 8 E reitinako te tia mai Tabua+ nako maeao nakon te Mwarua ae Kanaa, ao e toki i taari.+ Anne bon tibwangaia te baronga ae Eberaim n aia utu nako, 9 ao iai naba kaawa ake a kaokoroaki ibukia kanoan Eberaim are a karekea i buakon tibwangaia tibuni Manate,+ boni kaawa ni kabane ma taabo ni maeka ake iai.

10 Ma a aki kakioianako tibuni Kanaan ake a maeka i Ketera,+ ao a teimatoa tibuni Kanaan ni maeka i buakoia tibun Eberaim ni karokoa te bong aei,+ ao a tautoronaki.+

17 Ao e reke te baronga ae Manate+ rinanon te kanikina* mairoun te Atua,+ ibukina bwa boni ngaia ana karimoa Ioteba.+ Ao kioina ngkai te mwaane ae te tia buaka Makira+ are ana karimoa Manate ao tamani Kireata, ao e a reke irouna Kireata ma Batian.+ 2 Ao e reke te kanikina mairoun te Atua ibukia nikirani kanoani Manate n aia utu nako, aika tibun Abietera,+ tibun Ereka, tibun Atiriera, tibun Tekem, tibun Ebee, ao tibun Temita. Aikai boni kanoani Manate are natin Ioteba, aika mwaane ni kaineti ma aia utu nako.+ 3 Ma akea natin Terobeata+ mwaane, are natin Ebee, are natini Kireata, are natini Makira, are natini Manate, ma tii natina aine, ao aikai araia natina aine: Maara, Noa, Okera, Mireka, ao Tireta. 4 Mangaia are a nako matan Ereata+ are te ibonga* ao Iotua are natin Nun ao mataniwi, ao a taku: “Bon Iehova ae tua nakoni Mote bwa e na anganira tibwangara i buakoia mwaanera.”+ Ai ngaia are e a angania tibwangaia i buakoia tarin tamaia n aron are e tua Iehova.+

5 Ao iai naba tibwanga aika tebwina aika reke irouni Manate bwa raon naba te aba ae Kireata ao Batian, ake a mena n iteran te Ioretan are te iterana,*+ 6 bwa a reke tibwangaia aine aika kaain te baronga ae Manate i rarikia naba kanoana aika mwaane, ao e a riki te aba ae Kireata bwa abaia nikirani kanoani Manate.

7 Ao e moa tiani Manate mai Atera nako Mikemetata,+ are kaitaraa Tekem,+ ao e reitinako te tia nako maiaki* nakon abaia kaain Entabua. 8 E a riki te aba ae Tabua+ bwa abani Manate, ma bon aia tabo kanoan Eberaim te kaawa ae Tabua are n tiani Manate. 9 Ao e ruo rikaaki te tia nakon te Mwarua ae Kanaa, nako maiaki nakon te mwarua. A mena ana kaawa Eberaim i buakon nako ana kaawa Manate,+ ao e mena tiani Manate i meangin te mwarua, ao e toki i taari.+ 10 Bon ana tabo Eberaim nako maiaki, ao ana tabo Manate nako meang, ao tiana bon taari,+ ao a* rota ana tabo Atera mai meang ao ana tabo Itakara mai mainiku.

11 E anganaki Manate mai buakon nako aia aono Itakara ma Atera, Betatean ma kaawa ake a mena i aana,* Ibeream+ ma kaawa ake a mena i aana, kaain Toora+ ma kaawa ake a mena i aana, kaain Entora+ ma kaawa ake a mena i aana, kaain Taanaka+ ma kaawa ake a mena i aana, ao kaaini Mekito ma kaawa ake a mena i aana, aika aono aika tenua aika tabukibuki.

12 Ma a aki kona ni bwaini kaawa aikai kanoani Manate, bwa a imanono tibuni Kanaan n tiku ni maeka n te aba aei.+ 13 Ngke a a rikirake ni korakora tibun Iteraera, ao a tautoronia tibuni Kanaan+ ma a aki kababaneia raoi ni kakioianako.*+

14 A taku kanoan Ioteba nakon Iotua: “E aera ngkai ko anganira* te tibwa ae tii teuana rinanon te kanikina mairoun te Atua+ ma te aono ae tii teuana bwa tibwangara? Bon aomata ngaira aika ti rangi ni bati, bwa e boni kakabwaiaira Iehova ni karokoa ngkai.”+ 15 E kaekaia Iotua ni kangai: “Ngkana aomata ngkami aika kam rangi ni bati, ao waerake nako buakonikai ao kaitiaka te tabo teuana iai ibukimi, i abaia taiani Beritaite+ ao taian Rebaim,+ kioina ngkai e a rangi n ribwa ibukimi aonon Eberaim+ ae maungaunga.” 16 Ao a taku kanoan Ioteba: “E aki tau te aono ae maungaunga ibukira, ao iai aia kaa ni buaka+ aika otinako kabaang mani wiraia* tibuni Kanaan ni kabane ake a maeka n te mwarua,* ake te koraki ake a mena i Betatean+ ma kaawa ake a mena i aana,* ao te koraki ake a mena n te Mwarua* i Ietireera.”+ 17 Mangaia are e kangai Iotua nakoia tibun Ioteba, ake tibun Eberaim ao tibuni Manate: “Bon aomata aika rangi ni bati ngkami, ao kam rangi ni korakora. E na aki reke iroumi te tibwa ae tii teuana rinanon te kanikina mairoun te Atua,+ 18 ma kam na bwaina naba te aono ae maungaunga.+ E ngae ngke bon te buakonikai ma kam na kaitiakia, ao e na riki bwa tian ami aono mai tabona. Bwa kam na kakioianako tibuni Kanaan, e ngae ngke a korakora ao iai aia kaa ni buaka aika otinako kabaang mani wiraia.”*+

18 Ao a ikotaki i Tiro te botaki n aomata aika tibun Iteraera,+ ao a katea te umwa ni botaki ikekei,+ ngkai e a taenikai te aba anne i mataia.+ 2 Ma iai riki nikiran aia baronga tibun Iteraera aika itiua aika a tuai n reke tibwangaia. 3 Mangaia are e taku Iotua nakoia tibun Iteraera: “Maanra riki ngkami n iremwe n nako n abana te aba are e anganingkami Iehova ae Atuaia ami bakatibu?+ 4 Karekeia nakoiu mwaane aika kaka teniman man te baronga teuana ma teuana, ao a riai n nako ao n nakonako ni kabutaa te aba ma ni karaoa mwaben te aba, ni kaineti ma tibwangaia. Ao imwina a riai n okirai. 5 A riai n tibwatibwaia i marenaia nakon taian tibwa aika itiua.+ E na tiku Iuta n ana aono are i maiaki,+ ao a na tiku tibun Ioteba n aia aono are i meang.+ 6 Ma ngkami kam na karaoa mwaben te aba ao tibwaia nakon taian tibwa aika itiua, ao uotii n nakomai nakoiu, ao N na ukoukora te kanikina* ibukimi ikai mairoun Iehova ae Atuara.+ 7 Ma a na aki anganaki tibwaia tibun Rewi i buakomi,+ ibukina bwa bon tibwangaia te nakoa n ibonga* are mairoun Iehova,+ ao Kata ma Reuben ao te itera ni baronga are Manate,+ a a tia n anaa tibwangaia n iteran te Ioretan are mai mainiku, are e angania Mote are ana toro Iehova.”

8 A katauraoiia ngkanne mwaane akekei bwa a na nako ao e tua Iotua nakoia te koraki ake a na karaoa mwaben te aba ni kangai: “Naako ao nakonako ni kabutaa te aba ao karaoa mwaben te aba ao manga okirai, ao N na ukoukora te kanikina ibukimi ikai mairoun Iehova i Tiro.”+ 9 Ao a nako mwaane akekei ao a mwamwananga ni kabutaa te aba ao a karaoi mwabeni kaawa ao n tibwaia nakon taian tibwa aika itiua, ao a taua mwina n te boki. Imwin anne ao a okira Iotua n te kaembwa i Tiro. 10 E ukoukora te kanikina Iotua ibukia i Tiro mairoun Iehova.+ E tibwatibwaa te aba ikanne Iotua nakoia tibun Iteraera, ni kaineti ma tibwaia nako.+

11 Ao e reke te kanikina mairoun te Atua ibukin te baronga ae Beniamin n aia utu nako, ao aia aono are reke n te kanikina e mena i marenaia tibun Iuta+ ao tibun Ioteba.+ 12 E moa tiaia are n te itera are mai meang man te Ioretan, ao e waerake te tia nakon rabeen Ieriko+ mai meang ao e waerake nakon te maunga nako maeao, ao e rokoroko n te rereua ae Betaawen.+ 13 Ao e reitinako te tia mai ikanne nako Ruti i maiakin rabeen Ruti, ae taekani Betaera,+ ao e ruo rikaaki te tia nako Atarotaata+ i aon te maunga are i maiakini Betaoron are mai Nano.+ 14 Ao e rokoroko te tia n te itera are mai maeao, ao e rairaki nako maiaki man te maunga are kaitaraa Betaoron nako maiaki, ao e toki i Kiriatabaara, ae taekani Kiriataearim,+ ae ana kaawa Iuta. Anne bon te itera are mai maeao.

15 Te itera are mai maiaki boni mai taboni Kiriataearim ao e reitinako te tia nako maeao, ao e nakon te koburake n ran ae Nebetoa.+ 16 E ruo rikaaki te tia nako tabon te maunga are kaitaraa ana Mwarua Natin Innom,+ are n te Mwarua ae Rebaim+ nako meang, ao e ruo rikaaki nakon te Mwarua ae Innom nakon aia rabee I-Iebuti+ mai maiaki, ao e nako Enrokera.+ 17 Ao e rokoroko i meang ao e reitinako nako Entemeti ao nako Kerirota, are i moan te kawai n ararakea Atummim,+ ao e ruo rikaaki nakon ana atibu+ Bokan+ are tibun Reuben. 18 Ao e reitinako nakon te rabee are mai meang are i moan te Arabaa* ao e ruo rikaaki nakon te Arabaa. 19 Ao e reitinako te tia nakon rabeen Betaokera+ are mai meang, ao e toki te tia n te mwanoku are mai meang are n te Nama ae Taari,*+ n tokin te Ioretan mai maiaki. Anne bon te tia mai maiaki. 20 Ao e riki te Ioretan bwa tiana man te itera are mai mainiku. Anne bon tibwangaia kanoani Beniamin n aia utu nako, ni kaineti ma tiana nako n iterana ni kabane.

21 Ao ana kaawa te baronga ae Beniamin n aia utu nako bon: Ieriko, Betaokera, Emekatiti, 22 Betarabaa,+ Temeraim, Betaera,+ 23 Awim, Biira, Obera, 24 Kebaraammoni, Obenai, ao Keeba.+ Boni kaawa aika 12 ma taabo ni maeka ake iai.

25 Kibeon,+ Rama, Beerota, 26 Mitibe, Kebira, Motia, 27 Rekem, Irebeera, Tarara, 28 Tieraa,+ Aereba, Iebuti, ae taekan Ierutarem,+ Kibea,+ ao Kiriata, boni kaawa aika 14 ma taabo ni maeka ake iai.

Anne bon tibwangaia kanoani Beniamin n aia utu nako.

19 Ao e reke te kauoua ni kanikina* mairoun te Atua+ ibukin Timeon,+ ibukin te baronga are Timeon n aia utu nako. Ao e mena tibwangaia i nanon tibwangan Iuta.+ 2 Tibwangaia boni Beerateba+ ma Tieba, Morata,+ 3 Atatuara,+ Bara, Etem,+ 4 Eretorata,+ Betura, Orema, 5 Tikeraka,+ Betamarekabota, Ataratuta, 6 Betarebaota,+ ao Tiaruen. Boni kaawa aika 13 ma taabo ni maeka ake iai. 7 Ain, Rimmon, Etere, ao Atian,+ boni kaawa aika aua ma taabo ni maeka ake iai, 8 ao taabo ni maeka ni kabane aika katobibi kaawa aikai ni karokoa Baaratabeera, i Rama are i maiaki. Anne bon tibwangan te baronga are Timeon n aia utu nako. 9 E anaaki tibwangaia kanoan Timeon man tibwangan Iuta, ibukina bwa e a rangi ni bubura tibwaia tibun Iuta ibukia. Mangaia are e a reke abaia kanoan Timeon i nanon tibwangaia.+

10 Imwina ao e a reke te katenua ni kanikina mairoun te Atua+ ibukia kanoan Teburun+ n aia utu nako, ao tian tibwangaia e rokoroko i Tarita. 11 E waerake tiaia nako maeao nako Marara ao e roko i Tabeteta ao e nakon te mwarua are i moan Iokeneam. 12 Ao e nako mai Tarita nako mainiku ni kaitaraa otin taai, nakon tiani Kitirotatabora ao nako Taberata,+ ao ni waerake nako Iabia. 13 Ao e reitinako mai ikanne nako mainiku ni kaitaraa otin taai nako Kataebere,+ nako Etakatin, ao nako Rimmon, ao e rokoroko i Nea. 14 Ao e rairaki te tia i meang nako Annaton, ao e toki n te Mwarua ae Ibetaera, 15 ao Katata, Naarara, Timron,+ Itara, ao Betereem.+ Boni kaawa aika 12 ma taabo ni maeka ake iai. 16 Anne bon tibwangaia kanoan Teburun n aia utu nako.+ Akanne boni kaawa ma taabo ni maeka ake iai.

17 Ao e reke te kaaua ni kanikina mairoun te Atua+ ibukin Itakara,+ ibukia kanoan Itakara n aia utu nako. 18 Ao tiaia e nako Ietireera,+ Keturota, Tunem,+ 19 Abaraim, Taaion, Anaarata, 20 Rabita, Kiition, Ebeti, 21 Remeta, Enkannim,+ Enata, ao Betabateti. 22 Ao e roko te tia i Tabora+ ao Tiaatuma ao Betatemeti, ao tokin tiaia e mena n te Ioretan. Boni kaawa aika 16 ma taabo ni maeka ake iai. 23 Anne bon tibwangan te baronga ae Itakara n aia utu nako,+ ake kaawa ma taabo ni maeka ake iai.

24 Ao e reke te kanimaua ni kanikina mairoun te Atua+ ibukin te baronga ae Atera+ n aia utu nako. 25 Ao tiaia bon Erekata,+ Aari, Beten, Akitaba, 26 Arammereke, Aamata, ao Mitiara. E rokoroko i maeao nako Karemera+ ao nako Tioraribenata, 27 ao e oki rikaaki nako mainiku nako Betatakon ao e roko i aban Teburun, ao n te Mwarua ae Ibetaera nako meang, nako Betaemeka ao Neiera, ao e rokoroko i Kabura man te angamaing, 28 ao nako Ebiiron, Reoba, Aammon, ao Kanaa ni karokoa Titon ae Kakannato.+ 29 Ao e oki rikaaki te tia nako Rama ni karokoa kaawan Turo ae nonoaki.+ E oki rikaaki ngkanne te tia nako Otia ao e toki i taari n aonon Aketiba, 30 Umma, Abeki,+ ao Reoba,+ boni kaawa aika 22 ma taabo ni maeka ake iai. 31 Anne bon tibwangan te baronga ae Atera n aia utu nako.+ Akanne boni kaawa ma taabo ni maeka ake iai.

32 Ao e reke te kaonoua ni kanikina mairoun te Atua+ ibukia kanoan Nabetari, ibukia kanoan Nabetari n aia utu nako. 33 Tiaia boni mai Erebe man te aroka ae bubura i Taanannim,+ ao Ataminekebo ao Iabeneera ni karokoa Rakum, ao e toki n te Ioretan. 34 E oki rikaaki te tia nako maeao nako Atinotatabora, ao e reitinako mai ikanne nako Ukoka ao e roko i aban Teburun mai maiaki, ao nako aban Atera mai maeao, ao nako aban Iuta n te Ioretan mai mainiku. 35 Ao kaawa ake a nonoaki bon Tiarim, Tea, Amaata,+ Rakata, Kinnereta, 36 Atama, Rama, Atiora,+ 37 Keteti,+ Eterei, Enatiora, 38 Iron, Miketaraera, Orem, Betaanata, ao Betatemeti.+ Boni kaawa aika 19 ma taabo ni maeka ake iai. 39 Anne bon tibwangan te baronga ae Nabetari n aia utu nako,+ ake kaawa ma taabo ni maeka ake iai.

40 Ao e reke te kaitiua ni kanikina mairoun te Atua+ ibukin te baronga ae Tan+ n aia utu nako. 41 Ao tian tibwangaia bon Toraa,+ Etitaora, Iratemeti, 42 Tiaarabin,+ Aiiaron,+ Itira, 43 Eron, Tiimna,+ Ekiron,+ 44 Ereteke, Kibeton,+ Baarata, 45 Ieuta, Beneberaka, Katarimmon,+ 46 Meiarekon, ao Rakon, ma te tia ae kaitaraa Iobe.+ 47 Ma e a rangi n ribwa aia aono tibun Tan ibukia.+ Mangaia are a waerake ma ni buakana Retem+ ao a taua ma n oreiia kaaina n te kabaang. Ao a abanna ao a maeka iai, ao a bita aran Retem nakon Tan, bwa ingoan Tan are aia bakatibu.+ 48 Anne bon tibwangan te baronga ae Tan n aia utu nako. Akanne boni kaawa ma taabo ni maeka ake iai.

49 Mangaia are e a toki tibwatibwaan te aba are te tibwanga n aonona nako. Ao tibun Iteraera a angan Iotua are natin Nun tibwangana i buakoia. 50 Ao a anganna te kaawa are e bubutii are Timnatatera+ are n aonon Eberaim ae maungaunga, n aron are e tua Iehova, ao e katea te kaawa ao e maeka iai.

51 Akanne bon tibwanga rinanon te kanikina mairoun te Atua ake a tibwatibwai Ereata are te ibonga,* Iotua are natin Nun, ao mataniwi n aia baronga tibun Iteraera,+ i Tiro+ i matan Iehova i rarikini mataroan te umwa ni botaki.+ Mangaia are a a toki n tibwatibwaa te aba.

20 E taku ngkanne Iehova nakon Iotua: 2 “Tuangia tibun Iteraera ni kangai, ‘Rinei ami kaawa ni kamanomano+ ake I taekin taekaia ngkoa nakoimi rinanoni Mote, 3 bwa e aonga ni birinako nako iai te tia tiriaomata ae kamatea te aomata* n tiaki nanona ke n te aro ae karina n riki.* Ao a na riki bwa taabo ni kamanomano ibukimi mairoun te tia irantangaa te raraa.+ 4 E riai ni birinako nakon teuana mai buakoni kaawa aikai+ ao n tei i rarikini mataroan oon te kaawa,+ ao ni kaota arona i mataia unimwaanen te kaawa anne. Ao a na butimwaeia ni karinna n te kaawa ma n anganna ana tabo, ao e na maeka i rarikia. 5 Ngkana e kaeaki iroun te tia irantangaa te raraa, ao a aki riai unimwaane n anga te tia tiriaomata anne nako nanoni baina, bwa e kamatea raona n aomata n te aro ae karina n riki,* ao e bon aki riribaia mai mwaina.+ 6 E na maeka n te kaawa anne ni karokoa ae e kaetaki taekana i matan te botaki n aomata,+ ao e na tiku ikanne ni karokoa maten te ibonga ae rietata*+ are taua te nakoa n te tai anne. Imwina ao e a kona te tia tiriaomata n okira te kaawa are e birinako mai iai, ao e a kona n rin n ana kaawa ao n ana auti.’”+

7 Mangaia are a katabua* Keteti+ are i Kariraia are n aonon Nabetari ae maungaunga, Tekem+ are n aonon Eberaim ae maungaunga, ao Kiriataareba+ ae taekan Eberon, n aonon Iuta ae maungaunga. 8 Ao n aonon te Ioretan i mainikun Ieriko, a rinea Betera+ are n te rereua n te tabo ae aoraoi* man te baronga are Reuben, Ramota+ are i Kireata man te baronga are Kata, ao Koran+ are i Batian man te baronga are Manate.+

9 Boni kaawa aikai aika rineaki ibukia tibun Iteraera ni kabane ao ibukia aomata aika maeka n iruwa i buakoia, bwa e aonga ni kona ni birinako nako iai ane e kamatea te aomata* n tiaki nanona,+ ao n aki mate ni bain te tia irantangaa te raraa, imwain ae e kaetaki taekana i matan te botaki n aomata.+

21 Ao mataniwi n aia utu tibun Rewi a kawara Ereata+ are te ibonga,* ao Iotua are natin Nun, ao mataniwi n aia baronga tibun Iteraera, 2 ao a taetae nakoia i Tiro+ n te aba are Kanaan ni kangai: “E tua Iehova rinanoni Mote bwa ti na anganaki kaawa aika ti na maeka iai, n ikotaki ma tawaana ake iai ibukia ara nanai ni man.”+ 3 Mangaia are tibun Iteraera a angania tibun Rewi kaawa aikai+ ma tawaana ake iai man tibwangaia,+ n aron are e tua Iehova.

4 Ao e reke te kanikina* mairoun te Atua ibukia aia utu tibuni Koata,+ ao a anganaki tibun Rewi ake kanoan Aaron are te ibonga, kaawa aika 13 rinanon te kanikina mairoun te Atua, man te baronga ae Iuta,+ te baronga ae Timeon,+ ao te baronga ae Beniamin.+

5 Ao a anganaki* nikiraia tibuni Koata kaawa aika tebwina man aia utu te baronga ae Eberaim,+ te baronga ae Tan, ao te itera ni baronga ae Manate.+

6 Ao a anganaki tibuni Kerition+ kaawa aika 13 man aia utu te baronga ae Itakara, te baronga ae Atera, te baronga ae Nabetari, ao te itera ni baronga ae Manate i Batian.+

7 Ao a anganaki tibuni Merari+ n aia utu nako kaawa aika 12 man te baronga ae Reuben, te baronga ae Kata, ao te baronga ae Teburun.+

8 Mangaia are a anga tibun Iteraera kaawa aikai ma tawaana ake iai nakoia tibun Rewi rinanon te kanikina mairoun te Atua, n aron are e tua Iehova rinanoni Mote.+

9 Mangaia are a anga kaawa aika taekinaki araia aikai, man te baronga ae Iuta ao te baronga ae Timeon,+ 10 ao a anganaki tibun Aaron ake man aia utu nako tibuni Koata ake tibun Rewi, ibukina bwa e reke irouia te moani kanikina mairoun te Atua. 11 A angania Kiriataareba+ (Areba bon taman Anaka) ae taekan Eberon,+ are n aonon Iuta ae maungaunga, ma tawaana ake iai ake a katobibia. 12 Ma te tawaana are n te kaawa ma taabo ni maeka ake iai, a angani Kareba are natin Iebunne bwa abana.+

13 Ao a angania tibun Aaron aika mwaane ake ibonga te kaawa ni kamanomano ibukin te tia tiriaomata,+ ae Eberon+ ma tawaana ake iai, ao Ribena+ naba ma tawaana ake iai, 14 Iatira+ ma tawaana ake iai, Etitemoa+ ma tawaana ake iai, 15 Oron+ ma tawaana ake iai, Tebira+ ma tawaana ake iai, 16 Ain+ ma tawaana ake iai, Iuteta+ ma tawaana ake iai, ao Betatemeti ma tawaana ake iai. Boni kaawa aika ruaiwa mani baronga aika uoua aikai.

17 Ao man te baronga ae Beniamin: Kibeon+ ma tawaana ake iai, Keeba ma tawaana ake iai,+ 18 Anatota+ ma tawaana ake iai, ao Aremon ma tawaana ake iai. Boni kaawa aika aua.

19 Kaawa ni kabane ake a anganaki kanoan Aaron ake ibonga, boni kaawa aika 13 ma tawaana ake iai.+

20 Ao a anganaki nikiraia aia utu nako tibuni Koata ake i buakoia tibun Rewi, kaawa rinanon te kanikina mairoun te Atua, man te baronga ae Eberaim. 21 A angania te kaawa ni kamanomano ibukin te tia tiriaomata,+ ae Tekem+ ma tawaana ake iai, n aonon Eberaim ae maungaunga, Ketera+ ma tawaana ake iai, 22 Kibetaim ma tawaana ake iai, ao Betaoron+ ma tawaana ake iai. Boni kaawa aika aua.

23 Ao man te baronga ae Tan: Ereteke ma tawaana ake iai, Kibeton ma tawaana ake iai, 24 Aiiaron+ ma tawaana ake iai, ao Katarimmon ma tawaana ake iai. Boni kaawa aika aua.

25 Ao man te itera ni baronga ae Manate: Taanaka+ ma tawaana ake iai, ao Katarimmon ma tawaana ake iai. Boni kaawa aika uoua.

26 Mwaitini kaawa ni kabane n ikotaki ma tawaana ake iai ake a reke irouia nikiran aia utu nako tibuni Koata, bon tebwina.

27 Ao a anganaki tibuni Kerition+ ake man aia utu tibun Rewi te kaawa ni kamanomano ibukin te tia tiriaomata, iroun te itera ni baronga ae Manate, ae Koran+ i Batian ma tawaana ake iai, ao Beetitera ma tawaana ake iai. Boni kaawa aika uoua.

28 Ao man te baronga ae Itakara:+ Kiition ma tawaana ake iai, ao Taberata+ ma tawaana ake iai, 29 Iaremuta ma tawaana ake iai, ao Enkannim ma tawaana ake iai. Boni kaawa aika aua.

30 Ao man te baronga ae Atera:+ Mitiara ma tawaana ake iai, Abeton ma tawaana ake iai, 31 Erekata+ ma tawaana ake iai, ao Reoba+ ma tawaana ake iai. Boni kaawa aika aua.

32 Ao man te baronga ae Nabetari: te kaawa ni kamanomano+ ibukin te tia tiriaomata, boni Keteti+ are i Kariraia ma tawaana ake iai, Ammotatora ma tawaana ake iai, ao Karetan ma tawaana ake iai. Boni kaawa aika tenua.

33 Aia kaawa ni kabane tibuni Kerition n aia utu nako, boni kaawa aika 13 ma tawaana ake iai.

34 Ao aia utu nako tibuni Merari+ ake nikiraia tibun Rewi, a anganaki man te baronga ae Teburun+ Iokeneam+ ma tawaana ake iai, Kareta ma tawaana ake iai, 35 Rimna ma tawaana ake iai, ao Naarara+ ma tawaana ake iai. Boni kaawa aika aua.

36 Ao man te baronga ae Reuben: Betera+ ma tawaana ake iai, Iaati ma tawaana ake iai,+ 37 Ketemota ma tawaana ake iai, ao Mebaata ma tawaana ake iai. Boni kaawa aika aua.

38 Ao man te baronga ae Kata:+ te kaawa ni kamanomano ibukin te tia tiriaomata, ae Ramota are i Kireata+ ma tawaana ake iai, Maanaim+ ma tawaana ake iai, 39 Etiibon+ ma tawaana ake iai, ao Iatera+ ma tawaana ake iai. Botani kaawa akanne bon aua.

40 Kaawa ni kabane ake a anganaki tibuni Merari n aia utu nako, ake nikiraia aia utu nako tibun Rewi, boni kaawa aika 12.

41 Mwaitin aia kaawa ni kabane tibun Rewi aika mena i nanon abaia tibun Iteraera bon 48 kaawa, n ikotaki ma tawaana ake iai.+ 42 A toa kaawa aikai n tatabeua nako ma tawaanaia aika katobibia. Anne bon aroni kaawa aikai ni kabane.

43 Mangaia are Iehova e angania tibun Iteraera te aba ni kabane are e taetae n tuea bwa e na angania aia bakatibu,+ ao a taua n abanna ma ni maeka iai.+ 44 Irarikin anne ao Iehova e angania te motirawa mairouia aiaia ni kabane ake i rarikia, n aron are e taetae n tuea iai nakoia aia bakatibu,+ ao bon akea temanna aiaia ae e kona n tei ni kaaitaraia.+ E anga aiaia ni kabane nako nanoni baia Iehova.+ 45 Bon akea te berita* teuana ae bwaka mai buakoni berita ni kabane aika raraoi ake e karaoi Iehova ma tibun Iteraera. A bane ni koro bukia.+

22 Ao Iotua e weteiia tibun Reuben, tibuni Kata, ao te itera ni baronga ae Manate, 2 ao e taku nakoia: “Kam a tia ni karaoi bwaai ni kabane ake e tua nakoimi Mote are ana toro Iehova,+ ao kam a tia n ongo ni bwanaau ni bwaai ni kabane ake I tua nakoimi.+ 3 Kam aki kitania tarimi ni karokoa te tai aei, ni karokoa te bong aei,+ ao kam kawakina ana tua Iehova ae Atuami.+ 4 E a tia ngkai Iehova ae Atuami n angania tarimi te motirawa, n aron are e beritanna nakoia.+ Mangaia ae kam a kona ngkai n okiri ami umwanrianna n te aba are e anganingkami Mote are ana toro Iehova bwa kam na abanna, n iteran te Ioretan are te iterana.*+ 5 Ma kam na rangi n taratara raoi bwa kam na kakororaoa te kaetieti ma te Tua are e anganingkami Mote are ana toro Iehova,+ n aromi n tangira Iehova ae Atuami,+ n nakonako ni kawaina ni kabane,+ ni kawakin ana tua,+ n nimtia,+ ao n toro irouna+ ma nanomi ni kabane ao maiumi* ni kabane.”+

6 Ao e kakabwaiaia Iotua ao e kanakoia, ao a a nako nakon aia umwanrianna nako. 7 E a tia Mote n angan te itera ni baronga are Manate tibwangana i Batian,+ ao Iotua e anga te aba are n iteran te Ioretan are mai maeao nakon iteran te baronga anne are teuana,+ n ikotaki ma tariia nako. Irarikin anne ao e kakabwaiaia Iotua ngke e kanakoia nakon aia umwanrianna nako, 8 ao e taku nakoia: “Okiri ami umwanrianna ma kaubwai aika bati, ma te nanai ni man ae rangi ni mwaiti, ma te tirewa ao te koora, te buraati ao te biti, ao kunnikai aika rangi ni mwaitikurikuri.+ Anai tibwami ma tarimi mani bwaai ni kuri+ ake aia bwai aiami.”

9 Imwin anne ao a a nako tibun Reuben, tibuni Kata, ao te itera ni baronga are Manate, mairouia tibun Iteraera ake tabemwaang, mai Tiro n te aba ae Kanaan, ao a a oki nakon te aba ae Kireata,+ ae te aba are abaia are a a tia ni maeka iai n aron are e tua Iehova rinanoni Mote.+ 10 Ngke a a roko tibun Reuben, tibuni Kata, ao te itera ni baronga are Manate, n aono ake n te Ioretan n te aba ae Kanaan, ao a a katea te baonikarea ikekei i rarikin te Ioretan, ae te baonikarea ae rangi ni buburakaei. 11 Imwina riki ao a a ongo taekana tibun Iteraera ake tabemwaang+ ao a taku: “Noria! A katea te baonikarea tibun Reuben, tibuni Kata, ao te itera ni baronga are Manate, i aon tian te aba ae Kanaan, n aono ake n te Ioretan man te itera are abaia tibun Iteraera.” 12 Ngke a ongo taekana tibun Iteraera, ao e a ikotaki te botaki n aomata aika tibun Iteraera i Tiro,+ bwa a na nako ni buakania.

13 Ao a kanakoa Bineati+ are natin Ereata are te ibonga* tibun Iteraera nakoia tibun Reuben, tibuni Kata, ao te itera ni baronga are Manate n te aba ae Kireata, 14 ao raona mataniwi aika tengaun, e tei kaka temanna man aia baronga nako tibun Iteraera. Boni mataniwi ngaiia i aoia aia koraki mairoun tamaia, i buakoia tibun Iteraera aika nga ma nga.*+ 15 Ngke a roko irouia tibun Reuben, tibuni Kata, ao te itera ni baronga are Manate n te aba ae Kireata, ao a taku nakoia:

16 “E kangai aia taeka ana botaki n aomata Iehova: ‘Tera te mwakuri n aki kakaonimaki+ aei ae kam karaoia ni kaitaraa Atuan Iteraera? Kam a rairakinako n te bong aei man irirakin Iehova, n aromi ni katea ami baonikarea ao ni karitei nakon Iehova.+ 17 E aki tau iroura te kairua are i Beore? Ti tuai mani kaitiakira mai iai ni karokoa te bong aei, e ngae ngke e a tia n roko te rekenikai i aon ana botaki n aomata Iehova.+ 18 Ao kam boni kan rairakinako naba n te bong aei man irirakin Iehova? Ngkana kam karitei nakon Iehova n te bong aei, ao ane e na roko unna ningabong ni kaitaraa te botaki n aomata aika tibun Iteraera.+ 19 Ma ngkana ibukin ae e aki itiaki te aba are abami, ao mwananga nakon te aba ae aban Iehova+ ike e mena iai ana umwanrianna ae tabu* Iehova,+ ao maeka i buakora. Ma tai karitei nakon Iehova ao tai karikira bwa taani karitei n aromi ni katea ami baonikarea irarikin are bon ana baonikarea Iehova ae Atuara.+ 20 Ngke e karaoa te mwakuri n aki kakaonimaki Akan+ are tibun Teera ni kaineti ma te baere kaokoroaki bwa e na kamaunaaki, ao tiaki e roko te un i aon te botaki n aomata aika tibun Iteraera?+ Ao tiaki tii ngaia ni mate ibukin ana bure.’”+

21 Ao a kaeka ni kangai tibun Reuben, tibuni Kata, ao te itera ni baronga are Manate, nakoia mataniwi i aoia tibun Iteraera aika nga ma nga:*+ 22 “E bon ataia Iehova ae te Atua ae rietata riki nakoia atua nako! Iehova ae te Atua ae rietata riki nakoia atua nako!+ Ao a na ataia naba tibun Iteraera. Ngkana ti karitei ao n aki kakaonimaki nakon Iehova, ao tai kamaiuira n te bong aei. 23 Ngkana ti katea ara baonikarea bwa ti na rairakinako man irirakin Iehova, ao ti anga taiani karea ni kabuekaki, te karea ae te amwarake,* ao karea n raoi i aona, ao e na boni karokoa te tuuaa Iehova.+ 24 Ma tiaki ngaia anne, ti karaoa aei ibukin raraomara riki teuana, bwa ti taku, ‘N te tai ae e na roko ao ane a na kangai natimi nakoia natira: “Tera irekerekemi ma Iehova ae Atuan Iteraera? 25 E a tia Iehova ni kaaki te Ioretan bwa te tia i marenara ma ngkami, ngkami aika tibun Reuben ao tibuni Kata. Akea te bwai teuana ae kam na karaoia ni kaineti ma Iehova.” Ane a na tukiia natira man taromaurian* Iehova natimi.’

26 “Mangaia ae ti kangai, ‘Ti na katea ara baonikarea, tiaki ibukin taiani karea ni kabuekaki ke taiani karea, 27 ma e na riki bwa te bwai ni kakoaua i marenami ma ngaira+ ao kanoara* ake imwira, bwa ti na boni kakororaoa ara beku nakon Iehova i matana, n ara karea ni kabuekaki ao n ara karea, ao n ara karea n raoi,+ bwa a aonga n aki kangai natimi nakoia natira n te tai ae e na roko: “Akea irekerekemi ma ana bwai Iehova.”’ 28 Mangaia ae ti kangai, ‘Ngkana a bon taekina anne nakoira ma kanoara* n te tai ae e na roko, ao ti na kangai ngkanne nakoia: “Nora katotongan ana baonikarea Iehova are a karaoia ara bakatibu, tiaki ibukin taiani karea ni kabuekaki ke taiani karea, ma e na riki bwa te bwai ni kakoaua i marenami ma ngaira.”’ 29 Ti bon aki kona n iangoa karaoan ae ti na karitei nakon Iehova ao n rairakinako n te bong aei man irirakin Iehova,+ n arora ni katea te baonikarea ibukin taiani karea ni kabuekaki, te karea ae te amwarake, ao taiani karea, irarikin are bon ana baonikarea Iehova ae Atuara are i matan ana umwanrianna ae tabu!”+

30 Ao Bineati are te ibonga ma aia mataniwi te botaki n aomata, ao mataniwi i aoia tibun Iteraera aika nga ma nga* ake raona, ngke a ongo aia taeka kanoan Reuben, Kata, ao Manate, ao a a rau nanoia.+ 31 Mangaia are e taku Bineati are natin Ereata are te ibonga nakoia kanoan Reuben, Kata, ao Manate: “Ti a ataia n te bong aei bwa e mena Iehova i buakora, ibukina bwa kam aki karaoa te mwakuri n aki kakaonimaki aei nakon Iehova. Kam a tia ngkai ni kamaiuia tibun Iteraera mai nanoni bain Iehova.”

32 Ao Bineati are natin Ereata are te ibonga ma mataniwi, a a oki mairouia tibun Reuben ao tibuni Kata ake n te aba are Kireata, nakon te aba ae Kanaan, ao a uota rikaaki te rongorongo nakoia tibun Iteraera ake tabemwaang. 33 Ao a rau nanoia tibun Iteraera n te rongorongo arei. Ao a karaoiroa te Atua tibun Iteraera, ao a aikoa manga taekina ae a na nako ni buakania tibun Reuben ao tibuni Kata ni kamauna te aba are a maeka iai.

34 Mangaia are a arana te baonikarea* arei tibun Reuben ao tibuni Kata, ibukina bwa “bon te bwai ni kakoaua i marenara bwa Iehova bon te Atua ae koaua.”

23 Imwini boong aika bati ngke e a tia Iehova n angania tibun Iteraera te motirawa+ mairouia aiaia ni kabane ake i rarikia, ngke e a kara Iotua ao e a bunginako ana ririki,+ 2 ao e weteiia tibun Iteraera ni kabane Iotua,+ ma aia unimwaane, aia tia kairiri, aia tia moti, ao aia mataniwi,+ ao e taku nakoia: “I a kara ao e a bunginako au ririki. 3 Ao kam a bon tia n nori bwaai ni kabane ake e karaoi ibukimi Iehova ae Atuami nakoia natannaomata aikai ni kabane, ibukina bwa bon Iehova ae Atuami ae buaka ibukimi.+ 4 Noria, I anganingkami rinanon te kanikina* mairoun te Atua,+ abaia natannaomata ake a tiku, bwa tibwangan ami baronga nako,+ n ikotaki ma abaia natannaomata ni kabane ake I kamaunaia,+ man te Ioretan nakon Taari ae Abwabwaki* i maeao.* 5 Ao bon Iehova ae Atuami ae teimatoa ni kanakoia mai mwaimi,+ ao e kakioianako* ibukimi, ao kam a abana abaia n aron are e beritanna nakoimi Iehova ae Atuami.+

6 “Ao kam riai n rangi n ninikoria ni kakairi ao ni kakororaoi bwaai ni kabane ake a koreaki ni bokin te Tua+ Rinanoni Mote, n aromi n aki rairakinako mai iai nakon te angaatai ke te angamaing,+ 7 ao n aromi n aki rereitaki ma natannaomata+ aikai aika tiku i rarikimi. Kam na aki naba taekin araia atuaia+ ke n taetae n tuea irouia, ao kam na aki toro irouia ke ni bobaraaki nakoia.+ 8 Ma kam na nimta Iehova ae Atuami,+ n aron ae kam karaoia ni karokoa te bong aei. 9 Ane e na kakioianako natannaomata aika kakannato ao aika korakora Iehova mai mwaimi,+ bwa bon akea te mwaane temanna ae e a tia ni kona n tei imwaimi, ni karokoa te bong aei.+ 10 E na kakioianako aomata aika teuana tenga te mwaane ae tii temanna+ mai buakomi, ibukina bwa bon Iehova ae Atuami ae buaka ibukimi,+ n aron are e beritanna nakoimi.+ 11 Mangaia ae teimatoa n tarataraingkami+ n tangira Iehova ae Atuami.+

12 “Ma ngkana kam bon rairakinako naba teutana ao n nimtiia nikiraia natannaomata aika tiku i rarikimi aikai,+ ao kam imaremare ma ngaiia+ ao kam raonia, ao ngaiia a raoningkami, 13 ao kam bon riai n ataia bwa e na aki teimatoa Iehova ae Atuami ni kakioianako* natannaomata aikai ibukimi.+ A na riki bwa te bwai ni kamwane ao te kai ni kabwaru, ao te kai ni kataere ae orei iterami,+ ao bwaai ni kateketeke i matami, ni karokoa ae kam boni mauna man te aba ae raoiroi aei ae e a tia n anganingkami Iehova ae Atuami.

14 “Ao noria! Ae I a kaani mate,* ao kam ataia raoi ma nanomi ni kabane ao maiumi* ni kabane, bwa bon akea te taeka teuana ae bwaka mani berita aika raraoi ni kabane ake e taekin nakoimi Iehova ae Atuami. A bane ni koro bukia ibukimi. E aki bwaka te taeka teuana mai buakoia.+ 15 Ma ngkai a roko i aomi berita ni kabane aika raraoi ake e taekin nakoimi Iehova ae Atuami,+ ao ai arona naba bwa e na boni karokoa i aomi te rekenikai ni kabane Iehova are e beritanna,* ao e na kamaunaingkami man te aba ae raoiroi aei ae e a tia n anganingkami Iehova ae Atuami.+ 16 Ngkana kam urua ana berita Iehova ae Atuami are e tua nakoimi bwa kam na kawakinna, ao ngkana kam nako n toro irouia atua riki tabeman ao ni bobaraaki nakoia, ao ane e na urarake unin Iehova iroumi,+ ao kam na waekoa ni mauna man te aba ae raoiroi are e a tia n anganingkami.”+

24 E ikotiia ngkanne aia baronga nako tibun Iteraera Iotua i Tekem, ao e weteiia aia unimwaane tibun Iteraera, aia tia kairiri, aia tia moti, ao aia mataniwi,+ ao a tei i matan te Atua ae koaua. 2 Ao e taku Iotua nakoia aomata ni kabane: “E kangai ana taeka Iehova ae Atuan Iteraera, ‘A maeka ngkoangkoa+ ami bakatibu n iteran te Karaanga* are te iterana,+ are Tera are taman Aberaam ao taman Naora, ao a taneiai n toro irouia atua riki tabeman.+

3 “‘Imwina riki ao I a kaira Aberaam are ami bakatibu+ man iteran te Karaanga* are te iterana, ao I kanakonakoa ni kabutaa te aba ae Kanaan ao I kamwaitiia kanoana.*+ I anganna Itaaka,+ 4 ao I anga Iakoba ma Etau+ nakon Itaaka. Imwina riki ao I angan Etau te Maunga ae Teira bwa abana,+ ao a nako Aikubita Iakoba ma natina.+ 5 I kamwanangaa imwina riki Mote ma Aaron+ ao I karekea kain Aikubita n te baere I karaoia i buakoia,+ ao imwin anne I a kairingkami ni kaotinakoingkami. 6 Ngke I kairiia tamami ni kaotinakoia man te aba are Aikubita+ ao kam a roko i taari, ao a kaeiia tamami I-Aikubita ma kaa ni buaka ao tautia aika toka i aoia aoti, ni karokoa Taari ae Uraura.+ 7 Ao a a takarua nakon Iehova,+ mangaia are e a kaaki te rotongitong i marenami ma I-Aikubita, ao e karokoa taari i aoia ma n rabunia nako,+ ao matami a nora te baere I karaoia i Aikubita.+ Imwina ao kam a maeka n te rereua i nanon ririki* aika bati.+

8 “‘Ao I a kairingkami nakon abaia taian Amoraite ake a maeka n iteran te Ioretan are te iterana,* ao a buakaningkami.+ Ma I anga ngaiia nako nanoni baimi, bwa kam aonga n abana abaia, ao I kamaunaia mai mwaimi.+ 9 E teirake ngkanne Baraka are natin Tibore, are ueani Moaba, ao e buakania tibun Iteraera. Mangaia are e wetea Baraam are natini Beora bwa e na kamaraiaingkami.+ 10 Ma I aki ongo irouni Baraam,+ ngaia are e a bati ana tai ni kakabwaiaingkami+ ao I kamaiuingkami mai nanoni baina.+

11 “‘Ao kam rinanon te Ioretan+ nakon iterana nako Ieriko.+ Ao a buakaningkami taani kairiri* mai Ieriko, taian Amoraite, taiani Beritaite, tibuni Kanaan, tibun Eta, taiani Kirekataite, taian Iwaite, ao I-Iebuti, ma I anga ngaiia nako nanoni baimi.+ 12 Mangaia are I karimoaa namakinan te bwarannano* imwaimi, ao e a kakioianako mai mwaimi+ ueea ake uoman i aoia taian Amoraite. Bon tiaki man ami kabaang ao tiaki man ami kainikatebe.+ 13 Mangaia are I anganingkami te aba ae kam aki korakai ni mwakuri iai, ao kaawa aika kam aki katei,+ ao kam maeka iai. Kam a amwarake man taiani nne ni kureebe ao taiani nne n oriwa, aika kam aki uniki.’+

14 “Mangaia ae maaka Iehova ao tooro irouna ma te aro ae eti* ao te kakaonimaki,*+ ao kanakoi mairoumi atua ake a toro irouia ami bakatibu n iteran te Karaanga* are te iterana, ao i Aikubita,+ ao tooro iroun Iehova. 15 Ao ngkana e taraa ni buakaka iroumi te toro iroun Iehova, ao kam na rinea n te bong aei ane kam na toro irouna,+ ae tao atua ake a toro ami bakatibu irouia n iteran te Karaanga* are te iterana,+ ke atuaia taian Amoraite aika kam maeka i abaia.+ Ma ngai ma kaaini batau, ti na toro iroun Iehova.”

16 Ao a kaeka ni kangai aomata: “Ti bon aki kona n iangoa kitanan Iehova ao n toro irouia atua riki tabeman. 17 Bon Iehova ae Atuara ae kairira ma tamara nako ni kaotinakoira man te aba are Aikubita,+ man te auti n toronaki,+ ao e karaoi kanikina aika rangi ni kamimi aikai i matara,+ ao e teimatoa ni kawakinira ni kawaira ni kabane ake ti nakonako iai ao i buakoia botannaomata ni kabane ake ti rirarikia.+ 18 E kakioianako botannaomata ni kabane Iehova n ikotaki ma taian Amoraite ake a maeka n te aba imwaira. Mangaia ae ti na toro naba ngaira iroun Iehova, ibukina bwa bon Atuara.”

19 E taku ngkanne Iotua nakoia aomata: “Kam aki kona n toro iroun Iehova bwa bon te Atua ae tabu.+ Bon te Atua ngaia ae tua bwa e na taromauriaki n tii ngaia.+ E na aki kabwarai ami kairua* ma ami bure.+ 20 Ngkana kam kitana Iehova ma n toro irouia atua aika ianena, ao ane e na kaaitaraingkami ao ni kamaunaingkami, imwini karaoan ae raoiroi ibukimi.”+

21 Ma a taku aomata nakon Iotua: “Tiaki ngaia anne, ma ti na bon toro iroun Iehova!”+ 22 Mangaia are e taku Iotua nakoia aomata: “Bon taani kakoaua ngkami ni kaaitaraingkami ngkai kam a bon tia n rineia iroumi bwa kam na toro iroun Iehova.”+ Ao a kaeka ni kangai: “Bon taani kakoaua ngaira.”

23 “Mangaia ae kanakoi atua aika ianena akana i buakomi, ao rairi nanomi nakon Iehova ae Atuan Iteraera.” 24 A taku aomata nakon Iotua: “Ti na toro iroun Iehova ae Atuara, ao ti na ongo ni bwanaana!”

25 Mangaia are e karaoa te berita Iotua ma aomata n te bong arei, ao e katea te tua ma te moti ibukia i Tekem. 26 E korei ngkanne taeka aikai Iotua ni bokin ana Tua te Atua,+ ao e anaa te atibu ae rangi ni bubura+ ao e kateia ikekei i aan te aroka ae bubura are i rarikin ana tabo ae tabu Iehova.

27 E reitia ni kangai Iotua nakoia aomata ni kabane: “Noria! E na riki te atibu aei bwa te bwai ni kakoaua ni kaaitaraira,+ ibukina bwa e a tia n ongo bwaai nako ake e taekin Iehova nakoira, ao e na riki bwa te bwai ni kakoaua ni kaaitaraingkami, bwa kam aonga n aki kakeaa Atuami.” 28 Ao e kanakoia aomata Iotua, temanna ma temanna nakon abana.+

29 Imwini baikai ao e a mate Iotua are natin Nun are ana toro Iehova, ngke ai 110 ana ririki.+ 30 Mangaia are a kaiia n te aono are tibwangana i Timnatatera,+ are n aonon Eberaim ae maungaunga, i meangin te Maunga ae Kaati. 31 A teimatoa tibun Iteraera n toro iroun Iehova ni kabane ana bong Iotua, ao ni kabane aia bong unimwaane ake a reitinako maiuia imwin Iotua, ake a atai ana mwakuri ni kabane Iehova ibukia tibun Iteraera.+

32 A taunaki riin Ioteba+ ake a uotii tibun Iteraera mai Aikubita i Tekem, ni mwakoron te tawaana are e karekea Iakoba mairouia natin Amora+ are taman Tekem, n te mwane ae 100 te mwakoro n tirewa.+ Ao e riki bwa tibwangaia tibun Ioteba.+

33 Ao e mate naba Ereata are natin Aaron.+ Mangaia are a taunna n Ana Tabuki Bineati are natina,+ are e anganaki n aonon Eberaim ae maungaunga.