WAREKAIA ITERAERA

1 Ao e taetae Iehova nakoni Mote n rereuan Tinai+ n te umwa ni botaki,+ n teuana iai bongin te kauoua n namwakaina ni kauouan ririkin otinakoia man te aba are Aikubita,+ ao e taku: 2 “Karaoa te wareaomata+ ibukin te botaki n aomata aika tibun Iteraera n tatabemania nako* ni kaineti ma aia utu, ni kaineti ma aia koraki mairoun tamaia, ni karinania mwaane ni kabane n araia nako. 3 Korei araia te koraki ni kabane ake kaka 20 rake aia ririki,+ ngkoe ma Aaron, te korakina imwin te korakina,* ake a kona ni kaaina ana taanga ni buaka Iteraera.

4 “Kaira kaka temanna te mwaane mani baronga nako, a na riki bwa mataniwi i aoia aia koraki mairoun tamaia.+ 5 Aikai araia mwaane ake a na buokiko: Eritura+ are natin Teteura, man te baronga are Reuben, 6 Terumiera+ are natin Turitiatai, man te baronga are Timeon, 7 Nation+ are natin Aminataba, man te baronga are Iuta, 8 Netanera+ are natin Tiua, man te baronga are Itakara, 9 Eriaba+ are natin Eeron, man te baronga are Teburun, 10 mairouia natin Ioteba: Eritiama are natin Ammiuta man te baronga are Eberaim,+ ao Kamariera are natini Betatura man te baronga are Manate, 11 Abitan+ are natini Kiteoni, man te baronga are Beniamin, 12 Aietera+ are natin Ammitiatai, man te baronga are Tan, 13 Bakiera+ are natin Okeran, man te baronga are Atera, 14 Eriataba+ are natin Teuera, man te baronga are Kata, 15 ao Aira+ are natin Enan, man te baronga are Nabetari. 16 Nakanne bon te koraki ake a weteaki mai buakon te botaki n aomata. Boni mataniwi+ n aia baronga nako mairoun tamaia, aika mataniwi i aoia nga ma nga i Iteraera.”+

17 Mangaia are a kairiia mwaane aika kaotaki araia aikai Mote ma Aaron. 18 A ikota te botaki n aomata n teuana iai bongin te kauoua n namwakaina, bwa a aonga ni koreaki araia n tatabemania nako n aia utu, ao n aia koraki mairoun tamaia, man 20 te ririki ni waerake,+ 19 n aron are e tua Iehova nakoni Mote. Mangaia are e korei araia ngke a mena n rereuan Tinai.+

20 A karinanaki kanoan Reuben mwaane, ake kanoan ana karimoa Iteraera,+ n araia, n aia utu, ao n aia koraki mairoun tamaia. A warekaki n tatabemania nako mwaane ni kabane aika kaka 20 rake aia ririki, ake a kona ni kaaina te taanga ni buaka, 21 ao mwaitiia ake a koreaki araia man te baronga are Reuben, bon 46,500.

22 A karinanaki kanoan Timeon+ mwaane, n araia, n aia utu, ao n aia koraki mairoun tamaia. A warekaki n tatabemania nako mwaane ni kabane aika kaka 20 rake aia ririki, ake a kona ni kaaina te taanga ni buaka, 23 ao mwaitiia ake a koreaki araia man te baronga are Timeon, bon 59,300.

24 A karinanaki kanoani Kata+ mwaane, n araia, n aia utu, ao n aia koraki mairoun tamaia. A warekaki mwaane ni kabane aika kaka 20 rake aia ririki, ake a kona ni kaaina te taanga ni buaka, 25 ao mwaitiia ake a koreaki araia man te baronga are Kata, bon 45,650.

26 A karinanaki kanoan Iuta+ mwaane, n araia, n aia utu, ao n aia koraki mairoun tamaia. A warekaki mwaane ni kabane aika kaka 20 rake aia ririki, ake a kona ni kaaina te taanga ni buaka, 27 ao mwaitiia ake a koreaki araia man te baronga are Iuta, bon 74,600.

28 A karinanaki kanoan Itakara+ mwaane, n araia, n aia utu, ao n aia koraki mairoun tamaia. A warekaki mwaane ni kabane aika kaka 20 rake aia ririki, ake a kona ni kaaina te taanga ni buaka, 29 ao mwaitiia ake a koreaki araia man te baronga are Itakara, bon 54,400.

30 A karinanaki kanoan Teburun+ mwaane, n araia, n aia utu, ao n aia koraki mairoun tamaia. A warekaki mwaane ni kabane aika kaka 20 rake aia ririki, ake a kona ni kaaina te taanga ni buaka, 31 ao mwaitiia ake a koreaki araia man te baronga are Teburun, bon 57,400.

32 A karinanaki kanoan Ioteba mwaane rinanon Eberaim,+ n araia, n aia utu, ao n aia koraki mairoun tamaia. A warekaki mwaane ni kabane aika kaka 20 rake aia ririki, ake a kona ni kaaina te taanga ni buaka, 33 ao mwaitiia ake a koreaki araia man te baronga are Eberaim, bon 40,500.

34 A karinanaki kanoani Manate,+ n araia, n aia utu, ao n aia koraki mairoun tamaia. A warekaki mwaane ni kabane aika kaka 20 rake aia ririki, ake a kona ni kaaina te taanga ni buaka, 35 ao mwaitiia ake a koreaki araia man te baronga are Manate, bon 32,200.

36 A karinanaki kanoani Beniamin,+ n araia, n aia utu, ao n aia koraki mairoun tamaia. A warekaki mwaane ni kabane aika kaka 20 rake aia ririki, ake a kona ni kaaina te taanga ni buaka, 37 ao mwaitiia ake a koreaki araia man te baronga are Beniamin, bon 35,400.

38 A karinanaki kanoan Tan,+ n araia, n aia utu, ao n aia koraki mairoun tamaia. A warekaki mwaane ni kabane aika kaka 20 rake aia ririki, ake a kona ni kaaina te taanga ni buaka, 39 ao mwaitiia ake a koreaki araia man te baronga are Tan, bon 62,700.

40 A karinanaki kanoan Atera,+ n araia, n aia utu, ao n aia koraki mairoun tamaia. A warekaki mwaane ni kabane aika kaka 20 rake aia ririki, ake a kona ni kaaina te taanga ni buaka, 41 ao mwaitiia ake a koreaki araia man te baronga are Atera, bon 41,500.

42 A karinanaki kanoan Nabetari,+ n araia, n aia utu, ao n aia koraki mairoun tamaia. A warekaki mwaane ni kabane aika kaka 20 rake aia ririki, ake a kona ni kaaina te taanga ni buaka, 43 ao mwaitiia ake a koreaki araia man te baronga are Nabetari, bon 53,400.

44 Nakanne bon te koraki ake a koreaki araia irouni Mote ma Aaron ao aia mataniwi tibun Iteraera ake 12, ake a tei ibukin aia koraki mairoun tamaia n tatabemania nako. 45 A bane tibun Iteraera ake kaka 20 rake aia ririki, ake a kona ni kaaina ana taanga ni buaka Iteraera, ni koreaki araia n aia koraki mairoun tamaia, 46 ao botaia ake a koreaki araia bon 603,550.+

47 Ma a aki koreaki araia tibun Rewi+ i buakoia naakai, n aia baronga tamaia.+ 48 Mangaia are e taetae Iehova nakoni Mote ni kangai: 49 “Tii te baronga ae Rewi ae ko aki riai ni korei araia, ao ko aki riai ni karina botani mwaitiia i buakoia tibun Iteraera.+ 50 Ko riai ni mwiokoiia tibun Rewi bwa a na tararuaa te umwanrianna ae tabu* are e mena i nanona te Ati ni Berita,+ ao bwaini mwakuriana nako ao bwaina ni kabane.+ A na uouota te umwanrianna ae tabu ma bwaini mwakuriana nako,+ ao a na beku iai,+ ao a na katei aia umwanrianna ni katobibia te umwanrianna anne.+ 51 Ngkana e na kamwaingaki te umwanrianna ae tabu ao a riai ni kabwaraa tibun Rewi,+ ao ngkana e na manga kateaki te umwanrianna anne, ao a riai ni kateia tibun Rewi. E riai ni kamateaki te aomata ae kaania ao akea kariaiakana.*+

52 “A riai tibun Iteraera n tatabemania nako ni katei aia umwanrianna n aia kaembwa ake a katauaki iai, ao e na katea ana umwanrianna temanna ma temanna n oin ana tabo*+ ni kaineti ma aia koraki nako.* 53 Ao a riai ni katei aia umwanrianna tibun Rewi n otabwaninia te umwanrianna ae tabu are e mena i nanona te Ati ni Berita, bwa e aonga n aki roko uniu i aon te botaki n aomata aika tibun Iteraera,+ ao a riai tibun Rewi n tabe ma tararuaan* te umwanrianna ae tabu are e mena i nanona te Ati ni Berita.”+

54 A karaoi bwaai ni kabane tibun Iteraera ake e tua Iehova nakoni Mote. A boni karaoi n aron tuangaia.

2 E a taku ngkai Iehova nakoni Mote ma Aaron: 2 “A riai tibun Iteraera ni katei aia umwanrianna n aia tabo* ake a katauaki ibukin aia baronga ake kaka tenua,+ temanna ma temanna i rarikini kanikina ake a kaotii aia tabo aia koraki mairoun tamaia. A riai ni kaembwa ni kaitaraa te umwa ni botaki ni katobibia.

3 “A na kaembwa i mainiku ni kaitaraa otin taai baronga aika tenua ae ana kaembwa Iuta n aia koraki nako,* ao te mataniwi ibukia kanoan Iuta mwaane, bon Nation+ are natin Aminataba. 4 Mwaitiia ake a koreaki araia n ana taanga ni buaka bon 74,600.+ 5 E na kaembwa i rarikina te baronga are Itakara, ao te mataniwi ibukia kanoan Itakara mwaane, bon Netanera+ are natin Tiua. 6 Mwaitiia ake a koreaki araia n ana taanga ni buaka bon 54,400.+ 7 Te baronga are imwina bon Teburun, ao te mataniwi ibukia kanoan Teburun mwaane, bon Eriaba+ are natin Eeron. 8 Mwaitiia ake a koreaki araia n ana taanga ni buaka bon 57,400.+

9 “Botaia naake a koreaki araia n ana taanga ni buaka nako te kaembwa ae Iuta bon 186,400. A riai ni moani mwananga.+

10 “A na kaembwa i maiaki baronga aika tenua ae ana kaembwa Reuben+ n aia koraki nako,* ao te mataniwi ibukia kanoan Reuben mwaane, bon Eritura+ are natin Teteura. 11 Mwaitiia ake a koreaki araia n ana taanga ni buaka bon 46,500.+ 12 E na kaembwa i rarikina te baronga are Timeon, ao te mataniwi ibukia kanoan Timeon mwaane, bon Terumiera+ are natin Turitiatai. 13 Mwaitiia ake a koreaki araia n ana taanga ni buaka bon 59,300.+ 14 Te baronga are imwina boni Kata, ao te mataniwi ibukia kanoani Kata mwaane, bon Eriataba+ are natin Reuera. 15 Mwaitiia ake a koreaki araia n ana taanga ni buaka bon 45,650.+

16 “Botaia naake a koreaki araia n ana taanga ni buaka nako te kaembwa ae Reuben bon 151,450, ao a riai ni kauoman ni mwananga.+

17 “Ngkana e kamwaingaki te umwa ni botaki,+ ao e riai ni mena aia kaembwa tibun Rewi i nukani kaembwa ake tabeua.

“E riai n titeboo aroia ni mwamwananga ma aroia ni kaembwa,+ temanna ma temanna n ana tabo ni kaineti ma aia baronga ake kaka tenua.

18 “A na kaembwa i maeao baronga aika tenua ae ana kaembwa Eberaim n aia koraki nako,* ao te mataniwi ibukia kanoan Eberaim mwaane, bon Eritiama+ are natin Ammiuta. 19 Mwaitiia ake a koreaki araia n ana taanga ni buaka bon 40,500.+ 20 E na mena i rarikina te baronga are Manate,+ ao te mataniwi ibukia kanoani Manate mwaane, boni Kamariera+ are natini Betatura. 21 Mwaitiia ake a koreaki araia n ana taanga ni buaka bon 32,200.+ 22 Te baronga are imwina boni Beniamin, ao te mataniwi ibukia kanoani Beniamin mwaane, bon Abitan+ are natini Kiteoni. 23 Mwaitiia ake a koreaki araia n ana taanga ni buaka bon 35,400.+

24 “Botaia naake a koreaki araia n ana taanga ni buaka nako te kaembwa ae Eberaim bon 108,100, ao a riai ni kateniman ni mwananga.+

25 “A na kaembwa i meang baronga aika tenua ae ana kaembwa Tan n aia koraki nako,* ao te mataniwi ibukia kanoan Tan mwaane, bon Aietera+ are natin Ammitiatai. 26 Mwaitiia ake a koreaki araia n ana taanga ni buaka bon 62,700.+ 27 E na kaembwa i rarikina te baronga are Atera, ao te mataniwi ibukia kanoan Atera mwaane, boni Bakiera+ are natin Okeran. 28 Mwaitiia ake a koreaki araia n ana taanga ni buaka bon 41,500.+ 29 Te baronga are imwina bon Nabetari, ao te mataniwi ibukia kanoan Nabetari mwaane, bon Aira+ are natin Enan. 30 Mwaitiia ake a koreaki araia n ana taanga ni buaka bon 53,400.+

31 “Botaia naake a koreaki araia n ana kaembwa Tan bon 157,600. A riai ni mwananga n te kabane,+ i buakoia aia baronga tibun Iteraera ake kaka tenua.”

32 Nakanne bon tibun Iteraera ake a koreaki araia ni kaineti ma aia koraki mairoun tamaia. Botaia naake n taiani kaembwa ake a koreaki araia ibukin te taanga ni buaka bon 603,550.+ 33 Ma a aki koreaki araia tibun Rewi+ i buakoia tibun Iteraera,+ n aron are e tua Iehova nakoni Mote. 34 A karaoi bwaai ni kabane tibun Iteraera n aron are e tua Iehova nakoni Mote. Anne aroia ni kaembwa n aia baronga ake kaka tenua+ ao anne aroia ni mwananga nako,+ temanna ma temanna n ana utu ni kaineti ma aia koraki mairoun tamaia.

3 Aikai kateirikiaia* ana utu Aaron ma Mote n te bong are e taetae iai Iehova nakoni Mote i aon te Maunga ae Tinai.+ 2 Aikai araia natin Aaron aika mwaane: Nataba are te karimoa, Abiu,+ Ereata,+ ao Itama.+ 3 Akanne araia natin Aaron aika mwaane, aika ibonga* aika kabiraki ake a kateirakeaki* bwa a na beku bwa ibonga.+ 4 Ma a mate n akea natiia Nataba ao Abiu i matan Iehova,+ ngke a uota te ai ae aki kariaiakaki nako matan Iehova n rereuan Tinai. Ma a teimatoa ni beku bwa ibonga Ereata+ ao Itama+ i rarikin Aaron are tamaia.

5 E taku ngkanne Iehova nakoni Mote: 6 “Kakeerakeia kaain te baronga ae Rewi,+ ao kateiia i matan Aaron are te ibonga, ao a na buobuokia.+ 7 A na kakororaoi tabeia irouna ao iroun te botaki n aomata i matan te umwa ni botaki, n aroia ni karaoa aia beku ae irekereke ma te umwanrianna ae tabu.* 8 A na tararuai bwaai ni mwakuri nako n te umwa ni botaki,+ ao a na karaoi tabeia irouia tibun Iteraera n aroia n tararuai mwakuri aika irekereke ma te umwanrianna ae tabu.+ 9 Ko na anga tibun Rewi nakon Aaron ma natina mwaane. Boni ngaiia aika mwiokoaki* ibukina mai buakoia tibun Iteraera.+ 10 Ko riai ni mwiokoa Aaron ma natina mwaane, ao a na karaoi aia mwakuri n ibonga,+ ao e riai ni kamateaki te aomata ae kaania te tabo ae tabu ao akea kariaiakana.”*+

11 E reitia ni kangai Iehova nakoni Mote: 12 “Noria! I anaiia tibun Rewi mai buakoia tibun Iteraera bwa oneani mwia aia karimoa* ni kabane tibun Iteraera,+ ao a na riki tibun Rewi bwa au aomata. 13 Bwa au bwai karimoa ni kabane.+ N te bong are I kamateia iai karimoa ni kabane n te aba are Aikubita+ ao I katabuia* nakoiu karimoa ni kabane i Iteraera mairouia aomata ni karokoa maan.+ A na riki bwa au bwai. Bon Iehova ngai.”

14 E reitia ni kangai Iehova nakoni Mote n rereuan Tinai:+ 15 “Korei araia tibun Rewi n aia koraki mairoun tamaia ao n aia utu. Ko riai ni korei araia mwaane ni kabane man te roro ae teuana te namwakaina ni waerake.”+ 16 Mangaia are e korei araia Mote ni kaineti ma ana taeka Iehova, n aron are e tua nakoina. 17 Aikai araia natin Rewi mwaane: Kerition, Koata, ao Merari.+

18 Aikai araia natini Kerition mwaane n aia utu nako: Ribeni ao Timei.+

19 Natini Koata mwaane n aia utu nako bon Amram, Itia, Eberon, ao Utiera.+

20 Natini Merari mwaane n aia utu nako boni Maari+ ao Muti.+

Aikai aia utu nako tibun Rewi n aia koraki mairoun tamaia.

21 A riki mairouni Kerition aia utu tibun Ribeni+ ao aia utu tibun Timei. Akanne aia utu nako tibuni Kerition. 22 Mwaitiia aia mwaane ni kabane ake a koreaki araia man te roro ae teuana te namwakaina ni waerake bon 7,500.+ 23 A katei aia umwanrianna aia utu nako tibuni Kerition i akun te umwanrianna ae tabu+ i maeao. 24 Te mataniwi irouia tibuni Kerition n aia koraki mairoun tamaia bon Eriataba are natin Raera te mwaane. 25 Tabeia tibuni Kerition+ n te umwa ni botaki bon tararuaan te umwanrianna ae tabu+ ma rabunana+ aika kakaokoro nako, keetenin*+ mataroan te umwa ni botaki, 26 oon te katawanang aika taiani keeten,+ keetenin*+ mataroan oon te katawanang ake a katobibia te umwanrianna ae tabu ma te baonikarea, ao kabaeana nako, ao mwakuri ni kabane aika irekereke ma baikai.

27 A riki mairouni Koata aia utu tibun Amram ao aia utu tibun Itia ao aia utu tibun Eberon ao aia utu tibun Utiera. Akanne aia utu nako tibuni Koata.+ 28 Mwaitiia mwaane ni kabane man te roro ae teuana te namwakaina ni waerake bon 8,600. A tabe nakanne ma tararuaan te tabo ae tabu.+ 29 A kaembwa aia utu nako natini Koata mwaane i maiakin te umwanrianna ae tabu.+ 30 Te mataniwi n aia utu tibuni Koata ae kaainaki irouia aia koraki mairoun tamaia bon Eritaban are natin Utiera te mwaane.+ 31 Tabeia bon tararuaan te Ati,+ te taibora,+ te kaintaura,+ taiani baonikarea,+ bwaai ni mwakuri nako+ aika kabonganaaki ibukin te beku n te tabo ae tabu, te keeten,*+ ao mwakuri ni kabane aika irekereke ma baikai.+

32 Te mataniwi i aoia mataniwi aika tibun Rewi bon Ereata+ are natin Aaron are te ibonga, are e tararuaiia naake a tabe ma te mwakuri n te tabo ae tabu.

33 A riki mairouni Merari aia utu tibuni Maari ao aia utu tibuni Muti. Akanne ana utu Merari.+ 34 Mwaitiia mwaane ni kabane ake a koreaki araia man te roro ae teuana te namwakaina ni waerake bon 6,200.+ 35 Te mataniwi n aia utu tibuni Merari ae kaainaki irouia aia koraki mairoun tamaia bon Turiera are natin Abiaira te mwaane. A katei aia umwanrianna i meangin te umwanrianna ae tabu.+ 36 A tabe tibuni Merari ma tararuaani kain oon+ te umwanrianna ae tabu, kaai ibukini katomaani kain oona,+ bouana,+ nibwana, bwaai ni mwakuri nako iai,+ ao mwakuri ni kabane aika irekereke ma baikai,+ 37 n ikotaki ma boua ake a katobibia te katawanang ma nibwaia,+ ao kain rooana ma kabaeana.

38 Te koraki ake a kaembwa i moan te umwanrianna ae tabu i mainiku, i matan te umwa ni botaki ni kaitaraa otin taai boni Mote ao Aaron ma natina mwaane. A tabe ma tararuaan te tabo ae tabu, bwa boni mwiokoaia ae a karaoia ibukia tibun Iteraera. E na kamateaki te aomata ae kaania te tabo ae tabu ao akea kariaiakana.*+

39 Mwaitiia mwaane ni kabane aika tibun Rewi ake a koreaki araia irouni Mote ma Aaron n aia utu nako, man te roro ae teuana te namwakaina ni waerake ni kaineti ma are e tua Iehova, bon 22,000.

40 Ao e taku Iehova nakoni Mote: “Korei araia mwaane ni kabane aika aia karimoa tibun Iteraera, man te roro ae teuana te namwakaina ni waerake,+ warekiia ao karinani araia. 41 Ko na anaiia tibun Rewi ibukiu bwa oneani mwia aia karimoa ni kabane tibun Iteraera,+ ao anaiia aia man aika manana tibun Rewi bwa oneani mwia aia man ni kabane tibun Iteraera aika taiani karimoa aika manana. Bon Iehova ngai.”+ 42 E korei ngkanne araia karimoa ni kabane mai buakoia tibun Iteraera Mote, n aron are e tua Iehova nakoina. 43 Mwaitiia mwaane ni kabane aika karimoa man te roro ae teuana te namwakaina ni waerake ake a koreaki araia bon 22,273.

44 E reitia ni kangai Iehova nakoni Mote: 45 “Anaiia tibun Rewi bwa oneani mwia aia karimoa ni kabane tibun Iteraera, ao anaiia aia man aika manana tibun Rewi bwa oneani mwia aia man aika manana, ao a na riki tibun Rewi bwa au aomata. Bon Iehova ngai. 46 Ao a raka riki aia karimoa tibun Iteraera i aoia tibun Rewi+ n te mwaiti ae 273. Ibukini kabooani mwia+ naati mwaane aika karimoa aikai, 47 ko na anaa nimaua te tiekera* ibukini kaka temanna,+ ae te tiekera ae kakabonganaaki n te tabo ae tabu.* Teuana te tiekera titeboo ma 20 te kira.*+ 48 Ko na anga te mwane nakon Aaron ma natina mwaane bwa te kaboomwi ibukia naake a raka mwaitiia.” 49 Mangaia are e anaa te mwane Mote ae te kaboomwi bwa kabooani mwia naake a raka mwaitiia i aoia tibun Rewi. 50 E anaa te mwane mairouia aia karimoa tibun Iteraera ae mwaitina 1,365 te tiekera, ae te tiekera ae kakabonganaaki n te tabo ae tabu. 51 Imwina ao e a anga Mote te mwane are te kaboomwi nakon Aaron ma natina mwaane ni kaineti ma ana taeka* Iehova, n aron are e tua Iehova nakoni Mote.

4 E a taku ngkai Iehova nakoni Mote ma Aaron: 2 “E riai ni karaoaki te wareaomata ibukia tibuni Koata+ mai buakoia tibun Rewi, n aia utu nako ao n aia koraki mairoun tamaia, 3 ake aomata ni kabane ake man 30+ nakon 50 aia ririki,+ ake te koraki ake a mwiokoaki bwa a na mwakuri n te umwa ni botaki.+

4 “Aio aia mwakuri tibuni Koata n te umwa ni botaki.+ Bon te bwai ae moan te tabu te baei: 5 A na roko Aaron ma natina mwaane ngkana e nangi mwemwenako te kaembwa, ao a na karuoa te keeten+ ao a na rabuna iai te Ati ni Berita.*+ 6 A na kaaki te rabuna ae kunin te tiire i aona ao n taakina te kunnikai ae buruu i aona, ao a na kanimwi kaai+ ni nneia ibukin uotakina.

7 “A na taakina naba te kunnikai ae buruu i aon taiboran te bwerena ae kaotiotaki,+ ao a na kaaki i aona raurau, mwangko, boora, ao taian tiaeki ibukin te karea ae te moi.+ E riai n titiku i aona te bwerena are te karea+ ae riai ni kakareanaki. 8 A na taakina te kunnikai ae uraroo i aoni baikanne ao n rabuna te taibora n te rabuna ae kunin te tiire, ao a na kanimwi kaai+ ni nneia ibukin uotakina. 9 A na anaa ngkanne te kunnikai ae buruu ao n rabuna te kaintaura+ are ibukin te oota, n ikotaki ma taurana,+ taati ake a kabonganaaki ibukin tauani wikina, baan ake nneni wikin taura ake a a tia ni kabonganaaki, ao nneni bwaana nako,+ ake a kabonganaaki ibukini kateimatoaan uran te kaintaura. 10 A na niniria ma bwaina nako n te rabuna ae kunin te tiire ao ni kaaki i aon te bao* ibukin uotakina. 11 Ao a na taakina te kunnikai ae buruu i aon te baonikarea ae te koora,+ ao n rabunna n te rabuna ae kunin te tiire, ao a na kanimwi kaai+ ni nneia ibukin uotakina. 12 A na anai ngkanne bwaai nako ake a kabonganai+ n aia beku n te tabo ae tabu, ao a na kaaki i nanon te kunnikai ae buruu ao n rabuni n te rabuna ae kunin te tiire, ao a na kaaki i aon te bao ibukin uotakina.

13 “A riai ni kanakoa te mannang* man te baonikarea,+ ao n taakina i aona te kunnikai ae beboo. 14 A na kaaki i aona bwaini mwakuriana nako ake a kabonganaaki ngkana a beku n te baonikarea: aika taiani baan aika nneni mwaakaron te ai, kainiwaiteke, tiaabora, ao boora, ake bwaini mwakurian nako te baonikarea.+ Ao a na taakina te rabuna ae kunin te tiire i aona ao ni kanimwi kaai+ ni nneia ibukin uotakina.

15 “A riai n tia n rabuni bwain te tabo ae tabu+ ma bwaai ni mwakuri nako ake n te tabo ae tabu Aaron ma natina mwaane, ngkana e a mwemwenako te kaembwa. Ao a na rin tibuni Koata n uotii,+ ma a aki riai n ringi bwain te tabo ae tabu bwa a kaawa ni mate.+ Bon tabeia* tibuni Koata baikai n irekereke ma te umwa ni botaki.

16 “E tabe Ereata+ are natin Aaron are te ibonga* ma tararuaani bwaan te taura,+ baika boiarara,+ te karea ae te amwarake* ae riai ni kakareanaki, ao te bwaa ae tabu.+ E tararuaa te umwanrianna ae tabu* ao bwaai ni kabane ake iai, n ikotaki ma te tabo ae tabu ao bwaai ni mwakuri ake iai.”

17 E reitia ni kangai Iehova nakoni Mote ma Aaron: 18 “Tai kariaia te baronga ake aia utu nako tibuni Koata+ bwa a na kamaunaaki mai buakoia tibun Rewi. 19 Ma karaoa aei ibukia bwa a aonga n teimatoa ni maiu ao n aki mate ibukini kaanian baika moan te tabu.+ E na rinnako Aaron ma natina mwaane ao ni mwiokoa temanna ma temanna n ana beku ao n uotana. 20 A aki riai n rin ao n nori naba teutana baika tabu, bwa a kaawa ni mate.”+

21 E taku ngkanne Iehova nakoni Mote: 22 “E riai ni karaoaki te wareaomata ibukia tibuni Kerition,+ n aia koraki mairoun tamaia ao n aia utu nako. 23 Ko na korei araia te koraki ni kabane ake 30 nakon 50 aia ririki, ake a mwiokoaki bwa a na beku n te umwa ni botaki. 24 Aio mwiokoaia aia utu nako tibuni Kerition ae a na tararuaia ao n uotia:+ 25 A na uotii kunnikain te umwanrianna ae tabu,+ kunnikain te umwa ni botaki, rabunan te umwanrianna are kunin te tiire,+ ao te rabuna are i aan anne, keetenin* mataroan te umwa ni botaki,+ 26 oon te katawanang aika taiani keeten,+ keetenin* mataroan te katawanang+ are katobibia te umwanrianna ae tabu ao te baonikarea, kabaeaia, ao bwaia nako ma bwaai nako ake a kabonganaaki ibukini mwakuriana. Bon anne mwiokoaia. 27 A riai n tararuaaki aia beku tibuni Kerition+ ma uotaia iroun Aaron ma natina mwaane. Kam na angania bwa tabeia uotaia aikai ni kabane. 28 Anne te beku ae a na karaoia aia utu tibuni Kerition n te umwa ni botaki,+ ao e mena tabeia i aan ana kairiri Itama+ are natin Aaron are te ibonga.

29 “Ni kaineti ngkanne ma tibuni Merari,+ ko na korei araia n aia utu nako ao n aia koraki mairoun tamaia. 30 Ko na korei araia naake man 30 nakon 50 aia ririki, ake te koraki ni kabane ake a mwiokoaki bwa a na beku n te umwa ni botaki. 31 Ao tabeia ae irekereke ma aia beku n te umwa ni botaki bon uotakini+ baikai: kain oon+ te umwanrianna ae tabu, kaai ibukini katomaani kain oona,+ bouana,+ nibwana,+ 32 boua+ ake a katobibia te katawanang ao nibwaia,+ kain rooaia,+ ao kabaeaia ma bwaini mwakuriaia, ao mwakuri nako ake a irekereke ma baikai. Kam na mwiokoiia n tatabemania nako n te bwai ni mwakuri are tabeia bwa a na uotia. 33 Anne aroia aia utu nako tibuni Merari+ ni beku n te umwa ni botaki, i aan ana kairiri Itama are natin Aaron are te ibonga.”+

34 A korei ngkanne araia tibuni Koata+ n aia utu nako ao n aia koraki mairoun tamaia, Mote ma Aaron ao mataniwi+ n te botaki n aomata, 35 ake aomata ni kabane ake man 30 nakon 50 aia ririki, ake te koraki ake a mwiokoaki bwa a na beku n te umwa ni botaki.+ 36 Botaia naake a koreaki araia n aia utu nako bon 2,750.+ 37 A koreaki araia naakai mai buakoia aia utu tibuni Koata, ake te koraki ni kabane ake a beku n te umwa ni botaki. A korei araia naakai Mote ma Aaron ni kaineti ma are e tua Iehova rinanoni Mote.+

38 A koreaki araia tibuni Kerition+ n aia utu nako ao n aia koraki mairoun tamaia, 39 ake aomata ni kabane ake man 30 nakon 50 aia ririki, ake te koraki ake a mwiokoaki bwa a na beku n te umwa ni botaki. 40 Botaia naake a koreaki araia n aia utu nako ao n aia koraki mairoun tamaia, bon 2,630.+ 41 Anne te koreara ibukia aia utu tibuni Kerition, ake te koraki ni kabane ake a beku n te umwa ni botaki. A korei araia Mote ma Aaron ni kaineti ma are e tua Iehova.+

42 A koreaki araia tibuni Merari n aia utu nako ao n aia koraki mairoun tamaia, 43 ake aomata ni kabane ake man 30 nakon 50 aia ririki, ake te koraki ake a mwiokoaki bwa a na beku n te umwa ni botaki.+ 44 Botaia naake a koreaki araia n aia utu nako bon 3,200.+ 45 Anne te koreara ibukia aia utu tibuni Merari ake a korei araia Mote ma Aaron, ni kaineti ma are e tua Iehova rinanoni Mote.+

46 A korei araia tibun Rewi aikai ni kabane, n aia utu nako ao n aia koraki mairoun tamaia, Mote ma Aaron ao mataniwia tibun Iteraera. 47 E moa man 30 nakon 50 aia ririki, ao a bane ni mwiokoaki bwa a na beku ao n uotii uotaia aika irekereke ma te umwa ni botaki.+ 48 Botaia naake a koreaki araia bon 8,580.+ 49 A koreaki araia ni kaineti ma are e tua Iehova rinanoni Mote, temanna ma temanna n ana beku are e mwiokoaki iai ma uotana. A koreaki araia n aron are e tua Iehova nakoni Mote.

5 E reitia ni kangai Iehova nakoni Mote: 2 “Ko na tua nakoia tibun Iteraera bwa a na kanakoia man te kaembwa aomata nako aika rebera,+ ao aomata nako aika iai te bae waanako mairouia,+ ao aomata nako aika kamwara ibukin ringan te aomata* ae mate.+ 3 E ngae ngke te mwaane ke te aine ma kam riai ni kanakoia. Kam riai ni kanakoia nako tinanikun te kaembwa, bwa a aonga n aki kamwaraei+ aia kaembwa te koraki ake I maeka* i buakoia.”+ 4 Mangaia are a karaoa anne tibun Iteraera ao a kanakoia nako tinanikun te kaembwa. A karaoa are e tua Iehova nakoni Mote tibun Iteraera.

5 E reitia ni kangai Iehova nakoni Mote: 6 “Tuangia tibun Iteraera ni kangai, ‘Ngkana e karaoa te bure teuana te mwaane ke te aine temanna n arona n aki kakaonimaki nakon Iehova, ao e boni bure te aomata* anne.+ 7 E* riai ni kaota te bure+ are e* karaoia ao e na anga te kaboomwi ni kakoroa raoi mwaitina ibukin ana bure, ao n raonna naba ni kanimamwakoroni boona,+ ao e na angan te aomata are e bure nakoina. 8 Ma ngkana e a mate te aomata are e bure nakoina ao akea ana koraki ni kaan ae e na reke irouna te kaboomwi anne, ao e riai ni kaokaki nakon Iehova ao e na bwainna te ibonga,* n ikotaki ma te tiibu mwaane ni kabwarabure are e na karaoa iai karekeani kabwaraan ana bure te aomata anne.+

9 “‘A na riki bwa ana bwai te ibonga+ bwaai n tituaraoi nako aika tabu+ ake e anganaki irouia tibun Iteraera. 10 A na teimatoa n riki bwa ana bwai baika tabu ake e anga temanna ma temanna. E na riki bwa ana bwai te ibonga te bwai are e anga te aomata nakon te ibonga.’”

11 E reitia ni kangai Iehova nakoni Mote: 12 “Taetae nakoia tibun Iteraera ao tuangia ni kangai, ‘Aio te bae riai ni karaoaki ngkana e tibanako buun te mwaane temanna ao e aki kakaonimaki nakoina, 13 ao e wene n taanga ma neiei te mwaane temanna,+ ma e aki ataaki aei irouni buun neiei ao e teimatoa n aki ataaki, n te aro are e a kamwaraea ma akea te tia kakoaua ni kaitaraa, ao e aki kuneaki: 14 Ngkana arona bwa e a kokoo te buu te mwaane ao n nanououa n ana kakaonimaki buuna, ma e a bon tia ni kamwaraea neiei i bon irouna, ke ngkana arona bwa e a kokoo teuaei ao n nanououa n ana kakaonimaki buuna, ma e bon tuai ni kamwaraea neiei i bon irouna, 15 e riai ngkanne te mwaane ni kaira buuna nakon te ibonga, n ikotaki ma te karea ibukini buuna, ae teuana katebwinani mwakoron te eba* ni burawa ae te baare. E aki riai ni kabwaroa te bwaa ke ni kaaki te ribano* i aona, ibukina bwa bon te karea ae te amwarake ni kaineti ma te kokoo, ae te karea ae te amwarake ae kauringa taekan te bure.

16 “‘E na kakeerakea neienne te ibonga ao ni kateia i matan Iehova.+ 17 E na anaa te ran ae itiaki* are n te bwaata ae te kaatibu te ibonga, ao e na anaa teutana te tano mai aontano n te umwanrianna ae tabu* te ibonga ao e na kaaki n te ran. 18 Ao e na katea neiei te ibonga i matan Iehova ao ni kabwaraa iran neiei, ao e na kaaki i nanoni bain neiei te karea ae te amwarake ibukin te kauring, are te karea ae te amwarake ni kaineti ma te kokoo,+ ao e na mena i bain te ibonga te ran ae mao ae uota te rekenikai.+

19 “‘E na tuanga neiei te ibonga bwa e na tuea, ao e kangai nakoina: “Ngkana akea te mwaane ae e a tia ni wene n taanga ma ngkoe ngkai ko mena i aani mwaakani buum,+ ao ko aki tibanako ma ni kamwaraeaki, ao ko bia aki rotakibuaka n te ran ae mao aei ae uota te rekenikai. 20 Ma ngkana ko a tia n tibanako ngkai ko mena i aani mwaakani buum n arom ni kamwaraeko, ao ko a tia ni wene n taanga ma te mwaane+ riki temanna i rarikini buum—” 21 E na tuanga ngkanne neiei te ibonga bwa e na taekina te taetae n tuea ae irianaki n te rekenikai, ao e na kangai te ibonga nakon neiei: “Ke e karaoiko Iehova bwa te katoto i buakoia am koraki ni kaineti ma taian taetae ni karekekai ao taian taetae n tuea, ngkana e karaoiko Iehova bwa e na rotakibuaka* boton rangam* ao ngkana e katibua birotom. 22 E na rin ni kanoannanom te ran ae mao aei ae uota te rekenikai, ao e na katibua birotom ao ni karaoiko bwa e na rotakibuaka* boton rangam.”* Ao e riai ni kangai neiei: “Amen! Amen!”*

23 “‘E riai ngkanne te ibonga ni korei taetae ni karekekai aikai n te boki ao ni kamaunai i nanon te ran are mao. 24 E na kamooa ngkanne neiei n te ran are mao ae uota te rekenikai, ao e na rin i nanon neiei te ran are mao are uota te rekenikai ao e na karawawataa neiei. 25 Ao e riai te ibonga n anaa te karea ae te amwarake ni kaineti ma te kokoo+ mai bain neiei, ao e na katiotioa te karea ae te amwarake i matan Iehova, ao e na uotia nako rarikin te baonikarea. 26 E na abuta te karea ae te amwarake te ibonga bwa e na tei ibukin te karea anne, ao e na kabuekia ni kabubua i aon te baonikarea,+ ao imwin anne e na kamooa neiei n te ran. 27 N te tai are e kamooa iai neiei n te ran, ao ngkana e a bon tia neiei ni kamwaraea i bon irouna ao ni karaoa te mwakuri n aki kakaonimaki nakoni buuna, e na rin ngkanne te ran ae uota te rekenikai i nanon neiei ao e na karawawataa, ao e na tibu birotona ao e na rotakibuaka* boton rangana,* ao e na riki neiei bwa te katoto i buakoia ana koraki ni kaineti ma te taetae ni karekekai. 28 Ma ngkana e aki kamwaraea neiei i bon irouna ao e itiaki, e na inaomata ngkanne man te tuuaa anne, ao e na kona ni bikoukou ma ni karikiia kanoana.

29 “‘Anne te tua ni kaineti ma te kokoo,+ ngkana e tibanako te aine ao e kamwaraea i bon irouna ngkai e mena i aani mwaakani buuna, 30 ke ngkana e a kokoo te mwaane ao ni kanamakinna bwa e aki kakaonimaki buuna. E riai ni kaira buuna ni kateia i matan Iehova, ao e riai te ibonga ni karaoi tuua aikai ni kabane nakon neiei. 31 E na akea ana bure te mwaane iai, ma e na katuuaaeaki buuna ibukin ana bure.’”

6 E reitia ni kangai Iehova nakoni Mote: 2 “Taetae nakoia tibun Iteraera ao tuangia ni kangai, ‘Ngkana e karaoa te taetae ni bau ae okoro te mwaane ke te aine temanna bwa e na riki bwa te Natiraite*+ nakon Iehova, 3 e riai ni kararoaa ma te wain ao kamanging riki tabeua. E aki riai n nima te beneka* ae karaoaki man te wain ao te beneka ae karaoaki mani baika kamanging tabeua.+ E aki riai n nima te moi ae karaoaki man te kureebe, ke ni kang kureebe aika tao a boou ke a mwau. 4 E aki riai ni kang baika karaoaki man te kai ae te kureebe, ni moa man te kureebe ae tuai n tawaa ni karokoa kunna, i nanoni boong nako ake e Natiraite iai.

5 “‘E aki riai n roko te mwariro i aon atuna i nanoni boong nako ake e Natiraite iai.+ E na kamwarairaia irannatuna ni kaotia iai bwa e kaokoroaki ibukin te beku iroun Iehova ni karokoa ae a kakororaoaki boong akanne. 6 E aki riai ni kaania* te aomata* ae mate ni boong nako ake e kaokoroaki iai nakon Iehova. 7 E aki kona ni kamwaraea naba e ngae ngke e mate tamana, ke tinana, ke tarina, ke mwaanena,+ ibukina bwa e mena i aon atuna kanikinaean arona n Natiraite nakon te Atua.

8 “‘E na teimatoa ni kaokoroaki ibukin ana mwakuri Iehova ni boong nako ake e Natiraite iai. 9 Ma ngkana e karina ni mate temanna i rarikina,+ ao e kamwaraea irana are kanikinaeani kaokoroana nakon te Atua,* e riai n imana irannatuna+ n te bong are e kaitiakaki iai. E riai n imanna n te kaitiua ni bong. 10 Ao n te kawanibong e riai n uotii taobe aika uoman ke bitin aika uoman aika ataei nakon te ibonga,* i rarikini mataroan te umwa ni botaki. 11 Ao te ibonga e na katauraoa temanna bwa te karea ni kabwarabure, ao are temanna bwa te karea ni kabuekaki, ao e na karaoia ibukini karekeani kabwaraan ana bure+ are ana bure ae irekereke ma te aomata* ae mate. E riai ngkanne ni katabua* atuna te Natiraite n te bong anne. 12 Ao e riai ni manga kaokoroa nakon Iehova ibukin ana bongi n Natiraite, ao e na uota te tiibutetei ae te mwaane ae tuai n ririki bwa te karea ni kabooa mwin te bure. Ma a na aki warekaki boong ake mai mwaina ibukina bwa e kamwaraea iai arona n Natiraite.

13 “‘Aio te tua ibukin te Natiraite: Ngkana a a koro ana bongi n Natiraite,+ ao e na kairaki nako rarikini mataroan te umwa ni botaki. 14 E riai n anga ikanne ana karea nakon Iehova: temanna te tiibutetei ae te mwaane ae marurung raoi ae tuai n ririki bwa te karea ni kabuekaki,+ temanna te tiibutetei ae te aine ae marurung raoi ae tuai n ririki bwa te karea ni kabwarabure,+ temanna te tiibu mwaane ae marurung raoi bwa te karea n raoi,*+ 15 te bwaene ae kanoana bwerena aika mronron aika aki karikaki aika karaoaki man te burawa ae mte ae renganaki ma te oera, bwerena aika mmani aika aki karikaki aika kabiraki aoia n te oera, a na raonaki n te karea ae te amwarake+ ao n te karea ae te moi.+ 16 E na anga baikai te ibonga i matan Iehova, ao e na kareana ana karea ni kabwarabure ao ana karea ni kabuekaki. 17 E na anga te tiibu mwaane bwa te karea n raoi nakon Iehova n ikotaki ma te bwaene are kanoana bwerena aika aki karikaki, ao te ibonga e na anga naba te karea ae te amwarake+ ao te karea ae te moi ake raon te tiibu mwaane.

18 “‘E riai ngkanne te Natiraite n imana irannatuna*+ are e aki kokoreaki, i rarikini mataroan te umwa ni botaki, ao e na anaa irannatuna are kamwarairaia n ana tai n Natiraite ao e na kaaki n te ai are i aan te karea n raoi. 19 Ao te ibonga e na anaa angan te tiibu mwaane are e a tia ni kaburoaki,+ teuana te bwerena ae mronron ae aki karikaki man te bwaene, ao teuana te bwerena ae mmani ae aki karikaki, ao e na kaaki baikai i nanoni bain te Natiraite imwin tiana n imana kanikinaeana n Natiraite. 20 Ao e na katiotioi baikai te ibonga bwa te karea ni katiotioaki i matan Iehova.+ Bon te bwai ae tabu ibukin te ibonga, n ikotaki ma bwabwaan te man ae te karea ni katiotioaki ao te ranga ae kaokoroaki bwa te angabwai.+ Imwin anne ao e a kona te Natiraite n nima te wain.

21 “‘Aio te tua ibukin te Natiraite+ ae taetae ni bau: Ngkana e taetae ni bau ao ngkana e tau ana bwai ao e kona ni karekea ana karea nakon Iehova i rarikin ake a kainnanoaki ibukin rikina n Natiraite, e riai ngkanne ni kakororaoa ana taetae ni bau ibukin te tua ni kaineti ma rikina n Natiraite.’”

22 E taku ngkanne Iehova nakoni Mote: 23 “Tuangia Aaron ma natina mwaane ni kangai: ‘Aio te aro ae kam riai ni kakabwaiaia+ iai tibun Iteraera. Kam na kangai nakoia:

24 “Ke e kakabwaiako Iehova+ ma ni kawakiniko.

25 Ke e oota i aom ootan ubun Iehova,+ ao ke e akoiko.

26 Ke e taraiko ma te akoi* Iehova ao n anganiko te rau.”’+

27 Ao a riai ni katokaa arau i aoia tibun Iteraera,+ bwa I aonga ni kakabwaiaia.”+

7 N te bong are e tia iai Mote ni katea te umwanrianna ae tabu,*+ ao e kabiria+ ao ni katabua n ikotaki ma bwain nanona nako, te baonikarea, ao bwaai ni mwakuri nako ake iai.+ Ngke e a tia ni kabiri ao ni katabui baikai,+ 2 ao a anga aia karea mataniwia tibun Iteraera,+ ake mataniwi i aoia aia koraki mairoun tamaia. Ao mataniwia baronga aikai ake a kaira te koreara, 3 a anga nako matan Iehova kaa aika onowaa aika rabunaki ao kaao mwaane aika 12, kaka tewaana te kaa ibukia mataniwi aika uoman ao kaka temanna te kao mwaane ibukin temanna, ao a anga baikai i matan te umwanrianna ae tabu. 4 E taku Iehova nakoni Mote: 5 “Butimwaei baikai mairouia bwa a na kabonganaaki ibukini mwakuri ake a karaoaki n te umwa ni botaki, ao ko riai n angania tibun Rewi, n aron ae kainnanoaki iroun temanna ma temanna ibukin aia mwakuri nako.”

6 Mangaia are e butimwaei taiani kaa ao kaao Mote, ao e angania tibun Rewi. 7 E angania tibuni Kerition kaa aika uowaa ao kaao mwaane aika aman, ni kaineti ma ae kainnanoaki ibukin aia mwakuri nako,+ 8 ao e angania tibuni Merari kaa aika awaa ao kaao mwaane aika waniman, ni kaineti ma ae kainnanoaki ibukin aia mwakuri nako, i aan ana kairiri Itama are natin Aaron are te ibonga.*+ 9 Ma akea ae e angania tibuni Koata, ibukina bwa e irekereke tabeia ma mwakuri ake a karaoaki n te tabo ae tabu,+ ao a uouotii baika tabu i aon angaia.+

10 Ao a anga aia karea mataniwi n taini katabuan+ te baonikarea n te bong are e kabiraki iai. Ngke a anga aia karea mataniwi i matan te baonikarea, 11 ao e taku Iehova nakoni Mote: “E na anga ana karea te mataniwi temanna n te bong teuana ao kaka temanna ni boong ake imwina, ibukini katabuan te baonikarea.”

12 Teuare anga ana karea n te moani bong bon Nation+ are natin Aminataba man te baronga ae Iuta. 13 Ana karea bon teuana te raurau ae te tirewa ae 130 te tiekera* rawawatana, ao teuana te boora ae te tirewa ae 70 te tiekera rawawatana, ae te tiekera ae kakabonganaaki n te tabo ae tabu.*+ A kaai n on baikai n te burawa ae mte ae renganaki ma te oera, ibukin te karea ae te amwarake,+ 14 teuana te mwangko* ae te koora ae 10 te tiekera rawawatana ae on ni baika boiarara, 15 temanna te kao mwaane ae ataei, temanna te tiibu mwaane, ao temanna te tiibutetei ae te mwaane ae tuai n ririki, ibukin te karea ni kabuekaki,+ 16 temanna te kooti ae ataei ibukin te karea ni kabwarabure,+ 17 ao ibukini ngkanne te karea n raoi,+ uoman kaao, niman tiibu mwaane, niman kooti mwaane, ao niman te tiibutetei aika mwaane aika kaka teuana aia ririki. Anne ana karea Nation are natin Aminataba.+

18 N te kauoua ni bong ao e anga ana karea Netanera+ are natin Tiua, are te mataniwi n te baronga ae Itakara. 19 E anga bwa ana karea teuana te raurau ae te tirewa ae 130 te tiekera rawawatana, ao teuana te boora ae te tirewa ae 70 te tiekera rawawatana, ae te tiekera ae kakabonganaaki n te tabo ae tabu,+ a kaai n on baikai n te burawa ae mte ae renganaki ma te oera, ibukin te karea ae te amwarake,+ 20 teuana te mwangko ae te koora ae 10 te tiekera rawawatana ae on ni baika boiarara, 21 temanna te kao mwaane ae ataei, temanna te tiibu mwaane, ao temanna te tiibutetei ae te mwaane ae tuai n ririki, ibukin te karea ni kabuekaki,+ 22 temanna te kooti ae ataei ibukin te karea ni kabwarabure,+ 23 ao ibukini ngkanne te karea n raoi,+ uoman kaao, niman tiibu mwaane, niman kooti mwaane, ao niman te tiibutetei aika mwaane aika kaka teuana aia ririki. Anne ana karea Netanera are natin Tiua.

24 N te katenua ni bong ao te mataniwi irouia tibun Teburun are Eriaba+ are natin Eeron, 25 e anga ana karea ae teuana te raurau ae te tirewa ae 130 te tiekera rawawatana, ao teuana te boora ae te tirewa ae 70 te tiekera rawawatana, ae te tiekera ae kakabonganaaki n te tabo ae tabu.+ A kaai n on baikai n te burawa ae mte ae renganaki ma te oera, ibukin te karea ae te amwarake,+ 26 teuana te mwangko ae te koora ae 10 te tiekera rawawatana ae on ni baika boiarara, 27 temanna te kao mwaane ae ataei, temanna te tiibu mwaane, ao temanna te tiibutetei ae te mwaane ae tuai n ririki, ibukin te karea ni kabuekaki,+ 28 temanna te kooti ae ataei ibukin te karea ni kabwarabure,+ 29 ao ibukini ngkanne te karea n raoi,+ uoman kaao, niman tiibu mwaane, niman kooti mwaane, ao niman te tiibutetei aika mwaane aika kaka teuana aia ririki. Anne ana karea Eriaba+ are natin Eeron.

30 N te kaaua ni bong ao te mataniwi irouia tibun Reuben are Eritura+ are natin Teteura, 31 e anga ana karea ae teuana te raurau ae te tirewa ae 130 te tiekera rawawatana, ao teuana te boora ae te tirewa ae 70 te tiekera rawawatana, ae te tiekera ae kakabonganaaki n te tabo ae tabu.+ A kaai n on baikai n te burawa ae mte ae renganaki ma te oera, ibukin te karea ae te amwarake,+ 32 teuana te mwangko ae te koora ae 10 te tiekera rawawatana ae on ni baika boiarara, 33 temanna te kao mwaane ae ataei, temanna te tiibu mwaane, ao temanna te tiibutetei ae te mwaane ae tuai n ririki, ibukin te karea ni kabuekaki,+ 34 temanna te kooti ae ataei ibukin te karea ni kabwarabure,+ 35 ao ibukini ngkanne te karea n raoi,+ uoman kaao, niman tiibu mwaane, niman kooti mwaane, ao niman te tiibutetei aika mwaane aika kaka teuana aia ririki. Anne ana karea Eritura+ are natin Teteura.

36 N te kanimaua ni bong ao te mataniwi irouia tibun Timeon are Terumiera+ are natin Turitiatai, 37 e anga ana karea ae teuana te raurau ae te tirewa ae 130 te tiekera rawawatana, ao teuana te boora ae te tirewa ae 70 te tiekera rawawatana, ae te tiekera ae kakabonganaaki n te tabo ae tabu.+ A kaai n on baikai n te burawa ae mte ae renganaki ma te oera, ibukin te karea ae te amwarake,+ 38 teuana te mwangko ae te koora ae 10 te tiekera rawawatana ae on ni baika boiarara, 39 temanna te kao mwaane ae ataei, temanna te tiibu mwaane, ao temanna te tiibutetei ae te mwaane ae tuai n ririki, ibukin te karea ni kabuekaki,+ 40 temanna te kooti ae ataei ibukin te karea ni kabwarabure,+ 41 ao ibukini ngkanne te karea n raoi,+ uoman kaao, niman tiibu mwaane, niman kooti mwaane, ao niman te tiibutetei aika mwaane aika kaka teuana aia ririki. Anne ana karea Terumiera+ are natin Turitiatai.

42 N te kaonoua ni bong ao te mataniwi irouia tibuni Kata are Eriataba+ are natin Teuera, 43 e anga ana karea ae teuana te raurau ae te tirewa ae 130 te tiekera rawawatana, ao teuana te boora ae te tirewa ae 70 te tiekera rawawatana, ae te tiekera ae kakabonganaaki n te tabo ae tabu.+ A kaai n on baikai n te burawa ae mte ae renganaki ma te oera, ibukin te karea ae te amwarake,+ 44 teuana te mwangko ae te koora ae 10 te tiekera rawawatana ae on ni baika boiarara, 45 temanna te kao mwaane ae ataei, temanna te tiibu mwaane, ao temanna te tiibutetei ae te mwaane ae tuai n ririki, ibukin te karea ni kabuekaki,+ 46 temanna te kooti ae ataei ibukin te karea ni kabwarabure,+ 47 ao ibukini ngkanne te karea n raoi,+ uoman kaao, niman tiibu mwaane, niman kooti mwaane, ao niman te tiibutetei aika mwaane aika kaka teuana aia ririki. Anne ana karea Eriataba+ are natin Teuera.

48 N te kaitiua ni bong ao te mataniwi irouia tibun Eberaim are Eritiama+ are natin Ammiuta, 49 e anga ana karea ae teuana te raurau ae te tirewa ae 130 te tiekera rawawatana, ao teuana te boora ae te tirewa ae 70 te tiekera rawawatana, ae te tiekera ae kakabonganaaki n te tabo ae tabu.+ A kaai n on baikai n te burawa ae mte ae renganaki ma te oera, ibukin te karea ae te amwarake,+ 50 teuana te mwangko ae te koora ae 10 te tiekera rawawatana ae on ni baika boiarara, 51 temanna te kao mwaane ae ataei, temanna te tiibu mwaane, ao temanna te tiibutetei ae te mwaane ae tuai n ririki, ibukin te karea ni kabuekaki,+ 52 temanna te kooti ae ataei ibukin te karea ni kabwarabure,+ 53 ao ibukini ngkanne te karea n raoi,+ uoman kaao, niman tiibu mwaane, niman kooti mwaane, ao niman te tiibutetei aika mwaane aika kaka teuana aia ririki. Anne ana karea Eritiama+ are natin Ammiuta.

54 N te kawanua ni bong ao te mataniwi irouia tibuni Manate are Kamariera+ are natini Betatura, 55 e anga ana karea ae teuana te raurau ae te tirewa ae 130 te tiekera rawawatana, ao teuana te boora ae te tirewa ae 70 te tiekera rawawatana, ae te tiekera ae kakabonganaaki n te tabo ae tabu.+ A kaai n on baikai n te burawa ae mte ae renganaki ma te oera, ibukin te karea ae te amwarake,+ 56 teuana te mwangko ae te koora ae 10 te tiekera rawawatana ae on ni baika boiarara, 57 temanna te kao mwaane ae ataei, temanna te tiibu mwaane, ao temanna te tiibutetei ae te mwaane ae tuai n ririki, ibukin te karea ni kabuekaki,+ 58 temanna te kooti ae ataei ibukin te karea ni kabwarabure,+ 59 ao ibukini ngkanne te karea n raoi,+ uoman kaao, niman tiibu mwaane, niman kooti mwaane, ao niman te tiibutetei aika mwaane aika kaka teuana aia ririki. Anne ana karea Kamariera+ are natini Betatura.

60 N te karuaiwa ni bong ao te mataniwi+ irouia tibuni Beniamin are Abitan+ are natini Kiteoni, 61 e anga ana karea ae teuana te raurau ae te tirewa ae 130 te tiekera rawawatana, ao teuana te boora ae te tirewa ae 70 te tiekera rawawatana, ae te tiekera ae kakabonganaaki n te tabo ae tabu.+ A kaai n on baikai n te burawa ae mte ae renganaki ma te oera, ibukin te karea ae te amwarake,+ 62 teuana te mwangko ae te koora ae 10 te tiekera rawawatana ae on ni baika boiarara, 63 temanna te kao mwaane ae ataei, temanna te tiibu mwaane, ao temanna te tiibutetei ae te mwaane ae tuai n ririki, ibukin te karea ni kabuekaki,+ 64 temanna te kooti ae ataei ibukin te karea ni kabwarabure,+ 65 ao ibukini ngkanne te karea n raoi,+ uoman kaao, niman tiibu mwaane, niman kooti mwaane, ao niman te tiibutetei aika mwaane aika kaka teuana aia ririki. Anne ana karea Abitan+ are natini Kiteoni.

66 N te katebwina ni bong ao te mataniwi irouia tibun Tan are Aietera+ are natin Ammitiatai, 67 e anga ana karea ae teuana te raurau ae te tirewa ae 130 te tiekera rawawatana, ao teuana te boora ae te tirewa ae 70 te tiekera rawawatana, ae te tiekera ae kakabonganaaki n te tabo ae tabu.+ A kaai n on baikai n te burawa ae mte ae renganaki ma te oera, ibukin te karea ae te amwarake,+ 68 teuana te mwangko ae te koora ae 10 te tiekera rawawatana ae on ni baika boiarara, 69 temanna te kao mwaane ae ataei, temanna te tiibu mwaane, ao temanna te tiibutetei ae te mwaane ae tuai n ririki, ibukin te karea ni kabuekaki,+ 70 temanna te kooti ae ataei ibukin te karea ni kabwarabure,+ 71 ao ibukini ngkanne te karea n raoi,+ uoman kaao, niman tiibu mwaane, niman kooti mwaane, ao niman te tiibutetei aika mwaane aika kaka teuana aia ririki. Anne ana karea Aietera+ are natin Ammitiatai.

72 N te ka-11 ni bong ao te mataniwi irouia tibun Atera are Bakiera+ are natin Okeran, 73 e anga ana karea ae teuana te raurau ae te tirewa ae 130 te tiekera rawawatana, ao teuana te boora ae te tirewa ae 70 te tiekera rawawatana, ae te tiekera ae kakabonganaaki n te tabo ae tabu.+ A kaai n on baikai n te burawa ae mte ae renganaki ma te oera, ibukin te karea ae te amwarake,+ 74 teuana te mwangko ae te koora ae 10 te tiekera rawawatana ae on ni baika boiarara, 75 temanna te kao mwaane ae ataei, temanna te tiibu mwaane, ao temanna te tiibutetei ae te mwaane ae tuai n ririki, ibukin te karea ni kabuekaki,+ 76 temanna te kooti ae ataei ibukin te karea ni kabwarabure,+ 77 ao ibukini ngkanne te karea n raoi,+ uoman kaao, niman tiibu mwaane, niman kooti mwaane, ao niman te tiibutetei aika mwaane aika kaka teuana aia ririki. Anne ana karea Bakiera+ are natin Okeran.

78 N te ka-12 ni bong ao te mataniwi irouia tibun Nabetari are Aira+ are natin Enan, 79 e anga ana karea ae teuana te raurau ae te tirewa ae 130 te tiekera rawawatana, ao teuana te boora ae te tirewa ae 70 te tiekera rawawatana, ae te tiekera ae kakabonganaaki n te tabo ae tabu.+ A kaai n on baikai n te burawa ae mte ae renganaki ma te oera, ibukin te karea ae te amwarake,+ 80 teuana te mwangko ae te koora ae 10 te tiekera rawawatana ae on ni baika boiarara, 81 temanna te kao mwaane ae ataei, temanna te tiibu mwaane, ao temanna te tiibutetei ae te mwaane ae tuai n ririki, ibukin te karea ni kabuekaki,+ 82 temanna te kooti ae ataei ibukin te karea ni kabwarabure,+ 83 ao ibukini ngkanne te karea n raoi,+ uoman kaao, niman tiibu mwaane, niman kooti mwaane, ao niman te tiibutetei aika mwaane aika kaka teuana aia ririki. Anne ana karea Aira+ are natin Enan.

84 Aio te karea mairouia mataniwia tibun Iteraera ibukini katabuan te baonikarea+ ngke e kabiraki: 12 raurau aika tirewa, 12 boora aika tirewa, ao 12 mwangko aika koora.+ 85 Kaka 130 te tiekera rawawatan te raurau ae te tirewa, ao kaka 70 te tiekera rawawatan te boora, ao botani mwaitin te tirewa ni kabane n taiani bwainnamwarake bon 2,400 te tiekera, ae te tiekera ae kakabonganaaki n te tabo ae tabu.+ 86 Kaka 10 te tiekera rawawatani mwangko aika koora aika 12 ake a on ni baika boiarara, ae te tiekera ae kakabonganaaki n te tabo ae tabu, ao botani mwaitin te koora ni kabane n taiani mwangko bon 120 te tiekera. 87 Mwaitiia maan ni kabane ake ibukin te karea ni kabuekaki bon 12 kaao mwaane, 12 tiibu mwaane, 12 te tiibutetei aika mwaane aika kaka teuana aia ririki aika raonaki n te karea ae te amwarake, ao 12 kooti aika ataei ake ibukin te karea ni kabwarabure, 88 ao botaia maan ni kabane ake ibukin te karea n raoi bon 24 kaao mwaane, 60 tiibu mwaane, 60 kooti mwaane, ao 60 te tiibutetei aika mwaane aika kaka teuana aia ririki. Anne te karea ibukini katabuan te baonikarea+ imwini kabirakina.+

89 Ni katoatai are e rin iai Mote n te umwa ni botaki bwa e na taetae ma te Atua,*+ ao e ongongo te bwanaa ae kataetaea mai etan rabunan+ te Ati ni Berita* mai marenaia kerubim* ake uoman,+ ao e taetae te Atua ma ngaia.

8 E taetae Iehova nakoni Mote ni kangai: 2 “Taetae nakon Aaron ao tuangnga ni kangai, ‘Ni katoatai are ko kaurai iai taura, a riai taura ake itiua ni kaotaa te tabo are i moan te kaintaura.’”+ 3 Mangaia are e karaoa aei Aaron: E kaurai taurana ibukini kaotaan te tabo are i moan te kaintaura,+ n aron are e tua Iehova nakoni Mote. 4 Aio aroni karaoan te kaintaura: E karaoaki man te koora ae ororeaki n te aama. E ororeaki te koora n te aama ni karaoaki iai botona ni karokoa ueena.+ E karaoaki te kaintaura n aron ae boraoi ma te miitara+ are e kaotia Iehova nakoni Mote.

5 E a manga taetae riki Iehova nakoni Mote ni kangai: 6 “Kairiia tibun Rewi mai buakoia tibun Iteraera ao kaitiakiia.+ 7 Aio te aro ae ko riai ni kaitiakiia iai: Katimtimwa i aoia te ran ibukini kaitiakan te bure, ao a riai n imani rabwataia ni kabane n te mwariro, a na kaitiakii kunnikaia, ao a na kaitiakiia.+ 8 Imwina ao a na kaira te kao mwaane ae ataei+ ao n uota raona ae te karea ae te amwarake+ ae te burawa ae mte ae renganaki ma te oera, ao ko na kaira riki temanna te kao mwaane ae ataei ibukin te karea ni kabwarabure.+ 9 Ao ko na kairiia tibun Rewi nako matan te umwa ni botaki ao ikota te botaki n aomata aika tibun Iteraera.+ 10 Ngkana ko kairiia tibun Rewi nako matan Iehova, ao a na katokai baia tibun Iteraera i aoia tibun Rewi.+ 11 Ao e riai Aaron n anga* tibun Rewi nakon Iehova bwa te karea ni katiotioaki+ mai buakoia tibun Iteraera, ao imwina a na beku ibukin Iehova.+

12 “Ao a na katokai baia tibun Rewi i aon atuia kaao mwaane.+ Imwina, aanga temanna bwa te karea ni kabwarabure ao are temanna bwa te karea ni kabuekaki nakon Iehova, ibukini karekeani kabwaraan aia bure+ tibun Rewi. 13 Ao ko na kateiia tibun Rewi i matan Aaron ma natina mwaane, ma n anga* ngaiia bwa te karea ni katiotioaki nakon Iehova. 14 Ko riai ni kaokoroia tibun Rewi mai buakoia tibun Iteraera, ao a na riki tibun Rewi bwa au aomata.+ 15 Imwin anne ao a na rin tibun Rewi ni beku n te umwa ni botaki. Anne te aro ae ko riai ni kaitiakiia iai ma n anga* ngaiia bwa te karea ni katiotioaki. 16 Bwa boni bwaai n tituaraoi ngaiia aika I anganaki mai buakoia tibun Iteraera. N na anaiia ibukiu bwa oneani mwia aia karimoa* ni kabane tibun Iteraera.+ 17 Bwa bon au bwai karimoa ni kabane mai buakoia tibun Iteraera, ae te aomata ke te man.+ N te bong are I kamateia iai karimoa nako n te aba are Aikubita ao I katabuia* nakoiu.+ 18 N na anaiia tibun Rewi bwa oneani mwia karimoa nako mai buakoia tibun Iteraera. 19 N na anga tibun Rewi mai buakoia tibun Iteraera, bwa bwaai n tituaraoi nakon Aaron ma natina mwaane, bwa a na beku n te umwa ni botaki ibukia tibun Iteraera+ ao ni karaoa karekeani kabwaraan aia bure tibun Iteraera, bwa e aonga n aki roko te rekenikai i aoia tibun Iteraera+ ibukina bwa a kaania te tabo ae tabu tibun Iteraera.”

20 A karaoa anne Mote ma Aaron ao te botaki n aomata aika tibun Iteraera, nakoia tibun Rewi. Ao tibun Iteraera a bon irii nanoni baike e tua Iehova ni kabane ibukia tibun Rewi. 21 Mangaia are a kaitiakiia i bon irouia tibun Rewi ao a kaitiakii kunnikaia,+ ao imwin anne e a anga* ngaiia Aaron bwa te karea ni katiotioaki i matan Iehova.+ Ao e karaoa karekeani kabwaraan aia bure Aaron bwa e na kaitiakiia.+ 22 Imwin anne ao a a rin tibun Rewi ni karaoa aia beku n te umwa ni botaki i matan Aaron ma natina mwaane. Mangaia are e karaoaki nakoia are e tua Iehova nakoni Mote ni kaineti ma tibun Rewi.

23 E a taku ngkai Iehova nakoni Mote: 24 “E kaineti aei nakoia tibun Rewi: E na raonia te koraki ake a beku n te umwa ni botaki, te mwaane ae moa ana ririki man 25 ni waerake. 25 Ma e na motirawa mai buakoia te koraki akana beku akanne, imwini koron 50 ana ririki, ao e na aki manga beku. 26 E kona ni buokiia tarina ake a tabe ma te mwakuri n te umwa ni botaki, ma e aki riai ni karaoa te beku ikanne. Anne ae ko na karaoia ibukia tibun Rewi ao tabeia nako.”+

9 E taetae Iehova nakoni Mote n rereuan Tinai n te moan namwakaina+ n te kauoua n ririki, imwin otinakoia man te aba are Aikubita, ao e kangai: 2 “A riai tibun Iteraera ni katauraoa te karea ibukin te Toa ae te Riao+ n taina ae baireaki.+ 3 Ko riai ni katauraoia n 14 iai bongin te namwakaina aei n te airoo,* n taina ae baireaki. Ngkana ko katauraoia ao ko riai n irii tuua ao babaire ake a katauaki iai.”+

4 Mangaia are e a tuangia tibun Iteraera Mote bwa a na katauraoa te karea ibukin te Toa ae te Riao. 5 A a katauraoa ngkanne te karea ibukin te Toa ae te Riao n te moan namwakaina, ae 14 iai bongin te namwakaina, n te airoo* n rereuan Tinai. A karaoi bwaai ni kabane tibun Iteraera n aron are e tua Iehova nakoni Mote.

6 Ao iai mwaane aika kamwara bwa a ringa rabwatan te mate*+ n te aro ae a aikoa kona ni katauraoa te karea ibukin te Toa ae te Riao n te bong anne. Mangaia are a kaotiia mwaane akekei i matani Mote ma Aaron n te bong anne,+ 7 ao a taku nakoina: “Ti kamwara ibukina bwa ti ringa rabwatan te mate.* E aera ngkai ti riai n tukaki man anganakin Iehova te karea n taina ae baireaki, i buakoia tibun Iteraera?”+ 8 Ao e taku Mote nakoia: “Tataninga ikanne, ao N na ongora bwa tera ae e na tua Iehova ni kaineti ma ngkami.”+

9 E taku ngkanne Iehova nakoni Mote: 10 “Tuangia tibun Iteraera ni kangai: ‘E ngae ngkana iai te aomata i buakomi ke kanoami nakon taai aika a na roko ae e kamwara bwa e ringa rabwatan te mate,*+ ke e mwananga n te mwananga ae raroa, ma e bon riai naba ni katauraoa te karea ibukin te Toa ae te Riao nakon Iehova. 11 A riai ni katauraoia n 14 iai bongin te kauoua n namwakaina+ n te airoo.* A riai ni kanna ma te bwerena ae aki karikaki ao baanikai aika kiriin aika mao.+ 12 A na tai katuka nikirana teutana ni karokoa ae ingabong,+ ao a aki riai n otea riina teaina.+ A riai ni katauraoia ni kaineti ma tuan nako te Toa ae te Riao. 13 Ma ngkana e itiaki te aomata ke e aki mwananga nako ma e kaaka taekani katauraoan te karea ibukin te Toa ae te Riao, ao e riai ni kamateaki te aomata* anne+ ibukina bwa e aki anga te karea ibukin Iehova n taina ae baireaki. E na katuuaaeaki te aomata anne ibukin ana bure.

14 “‘Ao ngkana e maeka i rarikimi te aomata ae maeka n iruwa, e riai naba ni katauraoa te karea ibukin te Toa ae te Riao nakon Iehova.+ Ngkana e katauraoia ao e riai n irii tuua ao babaire ni kabane ake a katauaki iai.+ E riai n tii teuana te tua ibukimi, ibukin te aomata ae maeka n iruwa ao ibukin tibun Iteraera ae bungiaki i buakomi.’”+

15 Ao n te bong are e a tei iai te umwanrianna ae tabu*+ ao te nang e a rabuna te umwanrianna ae tabu, are te umwanrianna are e mena i nanona te Ati ni Berita, ma e tiku i etan te umwanrianna ae tabu man te tairiki ni karokoa ae ingabong, te bwai ae kaanga taraan te ai.+ 16 Ai bon aroarona naba anne: E rabunna te nang n te ngaina, ao te bwai are kaanga taraan te ai n te bong.+ 17 N te tai are e mwemwerake iai te nang man te umwanrianna, ao a waekoa naba ni mwananga tibun Iteraera,+ ao n te tabo are e tiku iai te nang ao a kaembwa naba iai tibun Iteraera.+ 18 A mwananga tibun Iteraera ngkana e tua Iehova, ao a kaembwa ngkana e tua Iehova bwa a na kaembwa.+ N te tai are e tiku iai te nang i etan te umwanrianna ae tabu, ao a tiku naba ni kaembwa. 19 Ngkana e tiku te nang i etan te umwanrianna ae tabu i nanoni boong aika bati, ao a ongeaba tibun Iteraera iroun Iehova ao a aki mwananga.+ 20 N tabetai ao e tiku te nang i etan te umwanrianna ae tabu i nanon tabebong. A tiku ni kaembwa ngkana e tua Iehova, ao a mwananga ngkana e tua Iehova. 21 N tabetai ao e tiku te nang tii man te tairiki ni karokoa ae ingabong, ao ngkana e mwemwerake te nang n te ingabong ao a a mwananga naba. Ngkana tao e mwemwerake te nang n te ngaina ke n te bong, ma a a boni mwananga naba.+ 22 Ngkana tao e tiku te nang i etan te umwanrianna ae tabu i nanon uabong, teuana namwakaina, ke e maan riki, ao a tiku naba tibun Iteraera ni kaembwa ao a aki mwananga. Ma ngkana e mwemwerake, ao a a mwananga naba. 23 A kaembwa ngkana e tua Iehova ao a mwananga ngkana e tua Iehova. A ongeaba iroun Iehova ni kaineti ma are e tua Iehova rinanoni Mote.

10 E taku ngkanne Iehova nakoni Mote: 2 “Karaoi am buu aika uoua+ man te tirewa ae ororeaki n te aama, ao kabonganai ibukini wetean te botaki n aomata ao ibukini kaotan ae e nang reitakinako te mwananga. 3 Ngkana a uaia ni katangaki, ao e riai ni weteaki te botaki n aomata nakoim i rarikini mataroan te umwa ni botaki.+ 4 Ngkana e katangaki tii teuana, a na tii weteaki nakoim mataniwi, ake mataniwi i aoia nga ma nga i Iteraera.+

5 “Ngkana ko katanga te buu n tangina ae bibitaki, ao a riai ni mwananga kaaini kaembwa ake i mainiku.+ 6 Ngkana ko katanga te buu n te kauatai n tangina ae bibitaki, ao a riai ni mwananga kaaini kaembwa ake i maiaki.+ A riai ni katanga te buu n aron aei ni katoatai are a mwananga iai te korakina ma te korakina.

7 “Ao ngkana ko wetea te botaki n aomata n ikotiia, ko riai ni katangi buu+ ma tiaki n tangia aika bibitaki. 8 A riai ni katangi buu natin Aaron aika mwaane, ake ibonga,*+ ao e na riki kabonganaaia bwa te tua ae teimatoa ibukimi n ami roro nako.

9 “Ngkana kam na buaka i abami ni kaitaraa te tia karawawataingkami n te aba ae bwainikiriningkami, kam riai ni katangi buu ni wewete ibukin te buaka,+ ao kam na uringaki iroun Iehova ae Atuami ao ni kamaiuaki mairouia akana kairiribai nakoimi.

10 “Kam riai naba ni katangi buu i matan ami karea ni kabuekaki+ ao ami karea n raoi+ n ami tai ni kimwareirei nako,+ ae taekan ami toa nako+ ao moan nako ami namwakaina. A na riki bwa bwaai ni kauring ibukimi i matan Atuami. Bon Iehova ngai ae Atuami.”+

11 Ao n te kauoua n ririki n te kauoua n namwakaina ae 20 iai bongin te namwakaina,+ ao e a mwemwerake te nang mai etan te umwanrianna ae tabu*+ are e mena i nanona te Ati ni Berita. 12 Mangaia are a a mwananga nako tibun Iteraera man rereuan Tinai, n aroni baireani mwanangaia n nako,+ ao e a tiku te nang n rereuani Baran.+ 13 Ai tibwa aei te moantai ae a nako iai, ni kaineti ma are e tua Iehova rinanoni Mote.+

14 Mangaia are a mwananga moa baronga ake tenua ake n ana kaembwa tibun Iuta, te korakina imwin te korakina,* ao e mataniwi i aon te koraki anne Nation+ are natin Aminataba. 15 E mataniwi Netanera+ are natin Tiua i aoia te koraki ake man te baronga ae kaainaki irouia tibun Itakara. 16 E mataniwi Eriaba+ are natin Eeron i aoia te koraki ake man te baronga ae kaainaki irouia tibun Teburun.

17 Ngkana e kabwaraaki te umwanrianna ae tabu+ ao a a mwananga naba tibuni Kerition+ ao tibuni Merari,+ ake a uouota te umwanrianna ae tabu.

18 Ao a mwananga baronga ake tenua ake n ana kaembwa Reuben, te korakina imwin te korakina,* ao e mataniwi i aon te koraki anne Eritura+ are natin Teteura. 19 E mataniwi Terumiera+ are natin Turitiatai i aoia te koraki ake man te baronga ae kaainaki irouia tibun Timeon. 20 E mataniwi Eriataba+ are natin Teuera i aoia te koraki ake man te baronga ae kaainaki irouia tibuni Kata.

21 A a mwananga ngkanne tibuni Koata, ake a uouotii bwain te tabo ae tabu.+ E riai n tei te umwanrianna ae tabu n rokoia.

22 Ao a mwananga baronga ake tenua ake n ana kaembwa tibun Eberaim, te korakina imwin te korakina,* ao e mataniwi i aon te koraki anne Eritiama+ are natin Ammiuta. 23 E mataniwi Kamariera+ are natini Betatura i aoia te koraki ake man te baronga ae kaainaki irouia tibuni Manate. 24 E mataniwi Abitan+ are natini Kiteoni i aoia te koraki ake man te baronga ae kaainaki irouia tibuni Beniamin.

25 Ao a mwananga baronga ake tenua ake n ana kaembwa tibun Tan, te korakina imwin te korakina,* ao e mataniwi i aon te koraki anne Aietera+ are natin Ammitiatai, ao a riki bwa aia tia tantani kaembwa nako mai buki. 26 E mataniwi Bakiera+ are natin Okeran i aoia te koraki ake man te baronga ae kaainaki irouia tibun Atera. 27 E mataniwi Aira+ are natin Enan i aoia te koraki ake man te baronga ae kaainaki irouia tibun Nabetari. 28 Anne te babaire ibukin te mwananga ae a toua mwina tibun Iteraera ma aia koraki,* ngkana a na mwananga nako.+

29 E taku ngkanne Mote nakon Obaba are natin Reuera*+ are te I-Mirian, are tamani buuni Mote: “Ti nangi mwananga nakon te tabo are e taekinna ni kangai Iehova: ‘N na anganiko.’+ Airi ma ngaira+ ao ti na akoiko, ibukina bwa e a tia Iehova ni beritani baika raraoi ibukia tibun Iteraera.”+ 30 Ma e taku teuaei nakoina: “N na aki mwananga. N na okira abau ao n okiriia au koraki.” 31 E taku ngkanne nakoina: “Taiaoka tai kitanira, bwa ko ataa te tabo ae ti riai ni kaembwa iai n te rereua, ao ko kona n riki bwa te tia kaira kawaira.* 32 Ao ngkana ko airi ma ngaira,+ ao te bwai ae raoiroi ae e kaotia Iehova nakoira, ti na boni kaotia nakoim.”

33 Mangaia are a a mwananga man ana maunga Iehova+ n te mwananga ae tenibong bongina, ao e uouotaki ana ati+ ni berita Iehova rimoaia n te mwananga aei, bwa e na kakaaea te tabo ni motirawa ibukia.+ 34 Ao e mena i etaia ana nang Iehova+ n te ngaina ngkana a mwananga nako man aia tabo ni kaembwa.

35 Ni katoatai are e kamwaingaki iai te Ati ao e na kangai Mote: “Ko na teirake ngkoe ae Iehova+ ao kamaenakoia akana kairiribai nakoim, ao kabirinakoia mai mwaim naake a ribaiko.” 36 Ao ngkana e katukaki ao e na kangai: “Ko na oki ngkoe ae Iehova nakoia tibun Iteraera aika nga ma nga, aika aki kona ni warekaki.”*+

11 Ao a kabatiaa ngurengureia aomata i matan Iehova. Ngke e ongo aei Iehova ao e urarake unna, ao e ura te ai mairoun Iehova nakoia ao e kabuekiia tabeman i tabon te kaembwa. 2 Ngke a a tang aomata nakoni Mote, ao e kakorakoraa n tataro ni bubutii nakon Iehova+ ao e a mate te ai. 3 Mangaia are e aranaki te tabo arei bwa Tabera,* ibukina bwa e ura te ai mairoun Iehova nakoia.+

4 Ao a kaotiota te nanonrang+ aomata aika kakaokoro*+ ake a mena i buakoia, ao tibun Iteraera naba a tang ao a kangai: “Antai ae e na anganira te irikomaiu bwa kanara?+ 5 Ti a rangi n uringa te ika are ti kakanna i Aikubita n akea boona, ao te kukambwa naba, te meron, te anian, ao ai te kaariki!+ 6 Ma e a kekerikaaki korakorara ngkai. Bon akea te bwai naba teuana ae ti noria ma tii te manna aei.”+

7 E mainaina te manna+ n aroni koraan te korianta,*+ ao taraana ai aron te kanim ae te teriam.* 8 A maenako aomata n rikorikoia ao a kamantintia n te atibu ni kamantinti, ke n ikikia i nanon te nne n ikuiku. Imwina ao a kaburoa n taiani bwaata ni kuuka ke ni karaoi bwa kariki aika mronron,+ ao kanakina ai aroni kanakin te bwerena ae karewe ae karaoaki ma te oera. 9 Ngkana e bwaka te aoi n te tairiki i aon te kaembwa, ao e bwaka naba te manna i aona.+

10 E ongo tangia aomata Mote, te utu teuana ma teuana, ao temanna ma temanna ni mataroan ana umwanrianna. Ao e a rangi n un Iehova+ ao e a rangi n aki kukurei naba Mote. 11 E taku ngkanne Mote nakon Iehova: “E aera ngkai ko karawawataa am toro? Tera ae I karaoia ae ko a bon aki kukurei iai irou ngkai ko a kaaki rawawataia aomata aikai ni kabane i aou?+ 12 I bikoukouia aomata aikai ni kabane? I bungia aomata aikai ngkai ko a tuangai ni kangai, ‘Uouotiia i bwanibwanim n aron te tia tararua* ae uouota te teei ae kammammaaki’ nakon te aba are ko taetae n tuea bwa ko na angania aia bakatibu?+ 13 N na karekea ia te irikomaiu ae N na angania aomata aikai ni kabane? Bwa a teimatoa n tang i matau ao a kangai, ‘Anganira te irikomaiu bwa kanara!’ 14 I a aki konaa moaia aomata aikai ni kabane n tii ngai. E a riaon au konaa.+ 15 Ngkana ngaia aei arou iroum ao taiaoka kamateai naba ngkai.+ Ngkana e reke akoau i matam ao tai kariaia bwa N na manga nora riki te rawawata teuana.”

16 E kaeka ni kangai Iehova nakoni Mote: “Ikotiia ibukiu mwaane aika 70 mai buakoia aia unimwaane tibun Iteraera, aika mwaane aika ko kinaia bwa aia unimwaane ao aia mataniwi aomata,+ ao kairiia nakon te umwa ni botaki ao kateiia ikanne ma ngkoe. 17 N na ruo+ n taetae ma ngkoe ikanne,+ ao N na anaa teutana te taamnei+ ane i aom ao ni kaaki i aoia, ao a na buokiko n uotii rawawataia aomata, bwa ko aonga n aki uotia n tii ngkoe.+ 18 Ko riai ni kangai nakoia aomata, ‘Katabuingkami* imwain ningabong+ bwa kam na boni kana te irikomaiu, ibukina bwa e ongo Iehova ngke kam tang ni kangai:+ “Antai ae e na anganira te irikomaiu bwa kanara? E nakoraoi riki maiura i Aikubita.”+ E na bon anganingkami te irikomaiu Iehova ao kam na kanna.+ 19 Kam na kanna, tiaki tii n tebongina ke 2 te bong ke 5 te bong ke 10 te bong ke 20 te bong, 20 ma i nanon teuana namwakaina ni karokoa ae e a otinako mani bwangabwangani bwairimi, ao n riki bwa te bwai ae ribaaki iroumi,+ bwa kam kakeaa Iehova ae mena i buakomi ao kam tang i matana ao kam kangai: “E aera ngke ti bon otinako mai Aikubita?”’”+

21 E taku ngkanne Mote: “Mwaitiia aomata aika I mena i buakoia aikai bon 600,000 mwaane+ aika nakonako, ma ko boni kangai naba, ‘N na angania te irikomaiu, ao e na tau kanaia i nanon teuana namwakaina’! 22 Ngkana a kamateaki ni kabane nanai ni kao ao n tiibu, e na tau ibukia? Ke ngkana a akawaaki ikan taari ni kabane, e na tau ibukia?”

23 Ao e taku Iehova nakoni Mote: “Iai te bwai ae e aki konaaki ni bain Iehova?+ Ngkai ko nang noria bwa e na riki nakoim te bwai ae I taekinna ke e na aki.”

24 Mangaia are e otinako Mote ao e taekin ana taeka Iehova nakoia aomata. Ao e ikotiia mwaane aika 70 mai buakoia aia unimwaane aomata, ao e kateiia ni katobibia te umwanrianna.+ 25 Ao e ruo Iehova n te nang+ ao e taetae nakoina,+ ao e anaa teutana te taamnei*+ are mena i aona ao e kaaki i aoia unimwaane ake 70 n tatabemania nako. Ao ngke e a mena i aoia te taamnei ao a a karaoi aroia burabeti,*+ ma a aki manga karaoia riki.

26 Iai mwaane aika uoman mai buakoia aika a tiku n te kaembwa. Araia naakai bon Eretata ao Metata. Ao e a mena i aoia te taamnei, kioina ngke a mena i buakoia te koraki ake a koreaki araia, ma a aki nakon te umwanrianna. Mangaia are a a karaoi aroia burabeti n te kaembwa. 27 Ao e biri te rorobuaka n ataei temanna ao e kaongoa Mote ni kangai: “A a karaoi aroia burabeti Eretata ao Metata n te kaembwa!” 28 E kaeka ngkanne ni kangai Iotua+ are natin Nun are ana tabonibai Mote mangke te kairake ngaia: “Au toka ae Mote, tukiia nakanne!”+ 29 Ma e taku Mote nakoina: “Ko tauaninne ibukiu? Tiaki ngaia anne, I tangiria bwa a na bane ana aomata Iehova n riki bwa burabeti, ao e na kaaki taamneina Iehova i aoia!” 30 Imwina riki ao e a okira te kaembwa Mote ma aia unimwaane tibun Iteraera.

31 E a kare ngkanne te ang mairoun Iehova ao e a uotiia kuere* mai taari ao ni karuoia ni katobibia te kaembwa,+ tao tebongina te mwananga n te itera aei ao tebongina te mwananga n te itera are teuana, ni katobibia te kaembwa, ao tao uoua te mwanokunibai* rietaia mai aontano. 32 Mangaia are a bane n tiku aomata ni kabongnga ao ni kangainaa ao ni kabanea naba te bong are imwina n rikoa te kuere. Akea temanna ae rikoa ae kee i aan tebwina te oma,* ao a taawaia ni katobibia te kaembwa i bon ibukia. 33 Ma ngke e tuai ni kantaki te irikomaiu bwa e a tibwa mena i marenani wia, ao e urarake unin Iehova nakoia aomata, ao e a oreiia aomata Iehova ni kamateia n te aro ae rangi ni korakora.+

34 Mangaia are a arana te tabo arei bwa Kiberotaataawa,*+ ibukina bwa a taunia ikanne aomata aika kaotiota te nanonrang.+ 35 A nako aomata mai Kiberotaataawa nako Aterota ao a tiku i Aterota.+

12 Ao a a taetae Aaron ma Miriam ni kaitaraa Mote ibukini buuna are e mare ma ngaia ae te I-Kuti, bwa e buuna te I-Kuti.+ 2 A taku: “E tii tataetae Iehova rinanoni Mote? Tiaki e taetae naba rinanora?”+ Ao e kakauongo Iehova.+ 3 Bon te mwaane ae te kabanea n nimamannei Mote i buakoia aomata ni kabane*+ i aon te aba.

4 E waekoa n taku Iehova nakoni Mote, Aaron, ao Miriam: “Otinako, ngkami akana teniman nakon te umwa ni botaki.” Mangaia are a otinako ni kateniman. 5 Ao e ruo Iehova n te boua ae te nang,+ ao e tei i rarikini mataroan te umwanrianna ao e wetea Aaron ma Miriam. Ao a uaia ni keerake naakai. 6 E taku ngkanne: “Ongora n au taeka taiaoka. Ngkana iai ana burabeti Iehova i buakomi, N na kaotai nakoina n te miitara bwa antai ngai,+ ao N na taetae nakoina n te mii.+ 7 Ma tiaki anne aron au toro ae Mote! E mwiokoaki ibukia au aomata ni kabane.*+ 8 I itaramata* n taetae ma ngaia+ n te aro ae mataata, n taeka aika kai ota, ao e nora buran Iehova. E aera ngkanne ngkai kam aki maaku n taetae ni kaitaraa au toro ae Mote?”

9 Mangaia are e urarake unin Iehova irouia, ao e a kitania. 10 E a nako te nang mai etan te umwanrianna, ao noria! e oreaki Miriam n te rebera ae mainaina n aron te tino.+ E rairaki ngkanne Aaron nakoni Miriam, ao e noria bwa e a oreaki neiei n te rebera.+ 11 E a taku naba ngkekei Aaron nakoni Mote: “I a bubutiiko au toka! Taiaoka tai bukinira n te bure aei! Ti a tia ni kaotiota te aro ae nanobaba n te bwai ae ti karaoia. 12 Taiaoka tai kariaia neiei bwa e na teimatoa n arona ae kaanga te aomata ae mate, ae kanakinako iteran irikona ngke e bungiaki!” 13 Ao e kanenea bwanaana Mote nakon Iehova ni kangai: “Taiaoka te Atua, kamaiua neiei! Taiaoka!”+

14 E kaeka ni kangai Iehova nakoni Mote: “Ngke arona bwa e bawareaki ubun neiei iroun tamana, tiaki e na kamaamaeaki i nanon itibong? Ke e kaokoroaki neiei i nanon itibong i tinanikun te kaembwa,+ ao imwina e a kona ni kaokaki ni karinaki.” 15 Mangaia are e a kaokoroaki Miriam i tinanikun te kaembwa i nanon itibong,+ ao a aki reita mwanangaia aomata ni karokoa ae e kairaki ni karinaki Miriam. 16 Ao a a kitana Aterota+ aomata, ao a a kaembwa n rereuani Baran.+

13 E a taku ngkai Iehova nakoni Mote: 2 “Kanakoia mwaane bwa a na karaba n tuoa te aba ae Kanaan, ae I a angania tibun Iteraera. Ko na kanakoa kaka temanna te mwaane man aia baronga nako+ aia bakatibu. A na nako mwaane aika mataniwi.”+

3 Mangaia are e kanakoia Mote man rereuani Baran+ n aron are e tua Iehova. Boni mataniwia tibun Iteraera mwaane akekei ni kabane. 4 Aikai araia: Man te baronga ae Reuben, Tiammua are natin Takura, 5 man te baronga ae Timeon, Tiabata are natin Ori, 6 man te baronga ae Iuta, Kareba+ are natin Iebunne, 7 man te baronga ae Itakara, Ikara are natin Ioteba, 8 man te baronga ae Eberaim, Ootea+ are natin Nun, 9 man te baronga ae Beniamin, Bareti are natin Rabu, 10 man te baronga ae Teburun, Kariera are natin Tori, 11 man te baronga ae Ioteba+ ibukin te baronga ae Manate,+ Kari are natin Tuti, 12 man te baronga ae Tan, Ammiera are natini Kemari, 13 man te baronga ae Atera, Tetura are natini Mikaere, 14 man te baronga ae Nabetari, Nabi are natini Bobeti, 15 man te baronga ae Kata, Keuera are natini Maki. 16 Akanne araia mwaane ake e kanakoia Mote bwa a na karaba n tuoa te aba. Ao Mote e arana Ootea are natin Nun bwa Iotua.*+

17 Ngke e kanakoia Mote bwa a na karaba n tuoa te aba ae Kanaan ao e taku nakoia: “Waerake ikanne nakon te Nekebo,* ao imwina waerake nakon te aono ae maungaunga.+ 18 Kam riai n noria bwa te aeka n aba raa te aba anne,+ ao noria naba bwa a korakora aomata ake a maeka iai ke a mamaara, a karako mwaitiia ke a bati, 19 e raoiroi te aba anne ke e buakaka, ao a maeka i nanoni kaawa aika aki nonoaki ke aika nonoaki. 20 Ao noria bwa e mari te aba anne ke e aki,+ ao iai kainnamwarake iai ke akea. Kam na ninikoria+ ao anai uaanikai tabeua man te aba.” Aei taini moan uaani kureebe n tawaa n te ririki.+

21 Mangaia are a waerake ao a karaba n tuoa te aba man rereuan Tiin+ nako Reoba+ n uakaan ma Reboamata.*+ 22 Ngke a waerake nakon te Nekebo, ao a a roko i Eberon+ ike a maeka iai Aiman, Tetiai, ao Taremai,+ aika tibun Anaka.+ E kateaki Eberon itiua te ririki imwain Toan are i Aikubita. 23 Ngke a roko n te Mwarua ae Etikora,+ ao a korea iai te mwaanga ae iai teuana te amwi ni kureebe i aona, ae kainnanoaki uotakina irouia mwaane aika uoman i aon te kai, n ikotaki ma bamkuranete* tabeua ao taiani biiku.+ 24 A arana te tabo anne bwa te mwarua ae Etikora,*+ ibukin te amwi are a koreia tibun Iteraera mai ikanne.

25 N tokina ao a a oki rikaaki man aia karaba n tutuo n te aba, ni koron 40 te bong.+ 26 Mangaia are a okira Mote ma Aaron ao te botaki n aomata aika tibun Iteraera i Kateti+ n rereuani Baran. A uota rikaaki te rongorongo nakon te botaki n aomata ao ni kaotii nakoia uaan te aba. 27 Aio te rongorongo ae a tuanga Mote: “Ti rinnako n te aba are ko kanakoira nako iai, ao e bon raanga iai rannimamman te man ma aia karewe manibeeru,*+ ao aikai uaana.+ 28 Ma a korakora aomata ake a maeka n te aba, ao a rangi ni bubura kaawa aika nonoaki. Ti noriia naba tibun Anaka ikekei.+ 29 A maeka tibun Amareka+ n te aba are n te Nekebo,+ ao a maeka tibun Eta, I-Iebuti,+ ao taian Amoraite,+ n te aono ae maungaunga, ao a maeka tibuni Kanaan+ i rarikin taari+ ao i rarikin te Ioretan.”

30 E kataia ngkanne Kareba ni karaui nanoia aomata ake a tei i matani Mote, ni kangai: “Ti na waerake ngkai naba ao ti na bon abanna, bwa ti boni kona n taua.”+ 31 Ma a taku mwaane ake a waerake ma ngaia: “Ti aki kona ni kaaitaraia aomata akekei ibukina bwa a korakora riki nakoira.”+ 32 Ao a teimatoa n tuangia tibun Iteraera te rongorongo ae aki raoiroi+ ibukin te aba are a karaba n tuoa, ni kangai: “Te aba are ti rinanona ni karaba n tuoa bon te aba ae kabwautiia kaaina, ao aomata ni kabane ake ti noriia boni mwaane aika riao abwakia.+ 33 Ao ti noriia ikekei taian Nebirim,* ake tibun Anaka,+ ake mairouia* Nebirim, ao kaanga ai aroia taian taake ngaira ngkana ti kabotauaki ma ngaiia.”

14 A kanenei ngkanne bwanaaia te botaki n aomata, ao a tatakarua ma n tang aomata ni kangainaa.+ 2 A bane ni ngurengure tibun Iteraera nakoni Mote ma Aaron,+ ao a taetae te botaki n aomata ni kaaitaraia ni kangai: “E raoiroi riki ngke ti mate n te aba ae Aikubita, ke e raoiroi riki ngke ti mate n te rereua! 3 E aera ngkai e kairira Iehova nakon te aba aei bwa ti na bwaka n te kabaang?+ A na riki buura ma natira bwa kaanga baika kuribwaiaki.+ Tiaki e raoiroi riki iroura bwa ti na okira Aikubita?”+ 4 A kangai naba i marenaia: “Ti na rinea te tia kairiri temanna, ao ti na okira Aikubita!”+

5 Ao a katorobubua Mote ma Aaron ni bobaraaki nako aontano i matan te botaki n aomata aika tibun Iteraera ake a ikotaki. 6 Ao a raeuai kunnikaia Iotua+ are natin Nun ma Kareba+ are natin Iebunne, ake raoia naake a karaba n tuoa te aba, 7 ao a kangai nakon te botaki n aomata aika tibun Iteraera: “Bon te aba ae moan te raoiroi te aba are ti rinanona ni karaba n tutuo iai.+ 8 Ngkana e kukurei Iehova iroura, ao e na boni karinira n te aba aei ao n anganira, ae te aba ae raanga iai rannimamman te man ma aia karewe manibeeru.*+ 9 Ma kam na tai karitei nakon Iehova, ao tai maakuia kaain te aba,+ bwa ti na kabwautiia.* E a tia n nako kamanoaia mairouia, ao e mena Iehova iroura.+ Tai maakuia.”

10 Ma e taekinna te botaki n aomata arei bwa a na karebanaiia n atibu.+ Ma e oti mimitongin Iehova i aon te umwa ni botaki nakoia tibun Iteraera ni kabane.+

11 Ao e taku Iehova nakoni Mote: “A na maanra riki aomata aikai n aki karineai,+ ao a na maanra riki n aki onimakinai e ngae ngke I a tia ni karaoi kanikina aika bati i buakoia?+ 12 N na oreiia n te aoraki ae kamamate ao ni kamaunaia, ao kariaia bwa N na karaoiko bwa te natannaomata ae kakannato ma ni korakora riki nakoia.”+

13 Ma e taku Mote nakon Iehova: “Ane a na ongo I-Aikubita, ake ko kaotinakoia aomata aikai mai buakoia ni mwaakam,+ 14 ao a na taekinna nakoia kaain te aba aei. A a tia naba n ongo ae ngkoe ae Iehova ko mena i buakoia aomata aikai+ ao ko kaoti nakoia n itaramata ma ngaiia.+ Bon Iehova ngkoe, ao e mena am nang i etaia, ao ko rimoaia n te boua ae te nang n te ngaina, ao n te boua ae te ai n te bong.+ 15 Ngkana ko kamateia aomata aikai ni kabane n teuana te tai,* ao ane a na kangai natannaomata ake a a tia n ongo taekani kakannatom: 16 ‘E a aki kona Iehova ni kairiia aomata aikai nakon te aba are e taetae n tuea bwa e na angania, mangaia ae e a kamateia n te rereua.’+ 17 I butiiko ngkai Iehova bwa ko na kaotiota korakorani mwaakam n aron are ko beritanna ngke ko kangai: 18 ‘Iehova ae iremwe n un ao e bati irouna te tangira ae koaua,*+ e kabwarai kairua ma buure, ma tiaki n ae e na aki katuuaaeia akana bure, ma e na katuuaaeia naati aika mwaane ibukin aia kairua taama, ni karokoa te katenroro ma te kaaroro.’+ 19 Taiaoka kabwarai aia bure aomata aikai ni mwaitin am tangira ae koaua,* n aron are ko kabwarai naba aia bure aomata aikai ni moa mai Aikubita ni karokoa ngkai.”+

20 E taku ngkanne Iehova: “I a kabwarai aia bure ni kaineti ma am taeka.+ 21 Ma irarikin anne, e na kaonaki te aonnaba ni kabutaa ni mimitongin Iehova ngkai bon iai ngai.+ 22 Ma akea temanna i buakoia mwaane ake a a tia n nora mimitongiu ma au kanikina+ ake I karaoi i Aikubita ao n te rereua, ma a bon teimatoa naba ni kataai+ n taai aika bati* ao n aki ongo ni bwanaau,+ 23 aika a na nora te aba are I taetae n tuea ibukina nakoia tamaia. Bon akea temanna mai buakoia te koraki ake a aki karineai, ae e na noria.+ 24 Ma ibukina bwa e kaokoro nanon* au toro are Kareba+ ao e teimatoa n irirai ma nanona ni kabane, N na boni karinna n te aba are e nako iai, ao a na abanna kanoana.+ 25 Kam riai n rairaki ningabong ao n reita mwanangami nakon te rereua rinanoni kawain Taari ae Uraura,+ kioina ngkai a maeka tibun Amareka ao tibuni Kanaan+ n te mwarua.”*

26 E taku ngkanne Iehova nakoni Mote ma Aaron: 27 “E na maanra riki te botaki n aomata ae buakaka aei ni ngurengure nakoiu?+ I a tia n ongo te bwai ae a ngurengure iai nakoiu tibun Iteraera.+ 28 Kangai nakoia, ‘“Ngkai bon iai ngai,” bon ana taeka Iehova, “N na boni karaoa nakoimi te baere I ongo are kam taekinna!+ 29 Kam na mate ao a na tiku rabwatami n te rereua aei,+ eng, ngkami ni kabane ake a koreaki arami ake kaka 20 rake ami ririki, ni kabaneingkami ake kam ngurengure nakoiu.+ 30 Akea i buakomi ae e na rin n te aba are I taetae n tuea* bwa kam na maeka iai,+ ma tii Kareba are natin Iebunne ao Iotua are natin Nun.+

31 “‘“Ao N na karinia iai natimi ake kam taku bwa a na riki bwa kaanga baika kuribwaiaki,+ ao a na ataa te aba are kam rawa iai.+ 32 Ma kam na mate ao a na tiku rabwatami n te rereua aei. 33 A na riki natimi bwa taani kawakintiibu n te rereua i nanon 40 te ririki,+ ao a na katuuaaeaki ibukin ami mwakuri n aki kakaonimaki,* ni karokoa maten te kabanea mai buakomi n te rereua.+ 34 Ni kaineti ma mwaitini boong ake kam karaba n tuoa iai te aba, ake 40 te bong,+ kam na katuuaaeaki ibukin ami bure i nanon 40 te ririki,+ tebongina ibukin teuana te ririki, tebongina ibukin teuana te ririki, bwa kam na ataa iai uaani kaitaraakiu.*

35 “‘“I a tia n taetae ngai ae Iehova. Aio te bae N na karaoia nakon te botaki n aomata ae buakaka aei, ake a ikotaki ni kaitaraai: A na roko n tokia n te rereua aei, ao a na mate ikai.+ 36 Mwaane ake e kanakoia Mote bwa a na karaba n tuoa te aba ao ni kauekea ngurenguren te botaki n aomata nakoina, ngke a oki ma te rongorongo ae aki raoiroi ibukin te aba,+ 37 a na bon oreaki ao a na mate i matan Iehova, eng, mwaane ake a uota rikaaki te rongorongo ae aki raoiroi ibukin te aba.+ 38 Ma a na bon teimatoa ni maiu Iotua are natin Nun ao Kareba are natin Iebunne, ake raoia te koraki ake a nako ni karaba n tuoa te aba.”’”+

39 Ngke e taekin taeka aikai Mote nakoia tibun Iteraera ni kabane, ao e a rangi ni korakora nanokawakia aomata. 40 Ao a utimwaaka n te ingabong ao a kataia ni waerake nako taubukin te maunga, ao a kangai: “Ti a tauraoi ngkai ni waerake nakon te tabo are e taekinna Iehova, bwa ti a tia ni bure.”+ 41 Ma e taku Mote: “E aera ngkai kam a riaon are e tua Iehova? E na aki nakoraoi aei. 42 Tai waerake bwa e aki mena Iehova iroumi, ao ane kam na konaaki irouia akana kairiribai nakoimi.+ 43 Bwa a mena imwaimi tibun Amareka ao tibuni Kanaan,+ ao kam na bwaka n te kabaang. E na aki mena Iehova iroumi, ibukina bwa kam rairakinako man irakin Iehova.”+

44 Ma a kan rarabakau n nako taubukin te maunga,+ ma e tiku ana ati ni berita Iehova i nukan te kaembwa ao Mote naba.+ 45 A a ruo ngkanne tibun Amareka ao tibuni Kanaan ake a maeka n te maunga anne, ao a oreiia ni kamaenakoia ni karokoa Orema.+

15 E reitia ni kangai Iehova nakoni Mote: 2 “Taetae nakoia tibun Iteraera ao kangai nakoia, ‘Ngkana kam a roko n te aba are N na anganingkami bwa kam na maeka iai,+ 3 ao kam kareana te karea n te ai nakon Iehova mai buakon taiani kao, tiibu, ao kooti, ae tao te karea ni kabuekaki,+ ke te karea ibukini karaoan te taetae ni bau ae okoro, ke te karea ni kan anga,+ ke te karea n tain ami toa aika motikaki taia,+ ae kam karaoia bwa te boi ae boiarara* iroun Iehova,+ 4 e riai ane e anga ana karea n angan naba Iehova te karea ae te amwarake ae te burawa+ ae mte, ae teuana katebwinani mwakoron te eba,* ae renganaki ma te oera ae te kaamwakoro te in.* 5 Kam riai naba n anga te wain bwa te karea ae te moi ae te kaamwakoro te in, n ikotaki ma te karea ni kabuekaki+ ke te karea ae te tiibutetei ae te mwaane. 6 Ke ngkana e kareanaki te tiibu mwaane, kam riai naba ni karaoa te karea ae te amwarake ae te burawa ae mte ae uoua katebwinani mwakoron te bwai ni baire ae te eba, ae renganaki ma te oera ae katenimwakoron te in. 7 Ao kam riai n anga te wain bwa te karea ae te moi ae katenimwakoron te in, bwa te boi ae boiarara* iroun Iehova.

8 “‘Ma ngkana kam na anga te man ae te mwaane man te nanai bwa te karea ni kabuekaki,+ ke te karea ibukini karaoan te taetae ni bau ae okoro,+ ke taiani karea n raoi nakon Iehova,+ 9 kam riai naba n anga bwa raon te man ae te mwaane man te nanai, te karea ae te amwarake+ ae tenua katebwinani mwakoron te bwai ni baire ae te eba te burawa ae mte, ae renganaki ma te oera ae te iterana te in. 10 Kam riai naba n anga te wain bwa te karea ae te moi+ ae te iterana te in, bwa te karea ae kareanaki n te ai, ae te boi ae boiarara* iroun Iehova. 11 Anne te bae riai ni karaoaki ibukin te kao mwaane temanna ma temanna, ke te tiibu mwaane temanna ma temanna, ke tiibutetei aika mwaane, ke kooti. 12 N aki ongea mwaitin ae kam anga, ma anne te bae kam riai ni karaoia ibukin temanna ma temanna, ni kaineti ma mwaitiia. 13 Anne aroia aomata nako ake a bungiaki bwa tibun Iteraera, ae a riai n anga iai te karea ae kareanaki n te ai, ae te boi ae boiarara* iroun Iehova.

14 “‘Ngkana e na kareana naba te karea n te ai ae te boi ae boiarara* iroun Iehova, te ianena ae maeka i rarikimi, ke temanna ae maeka i buakomi i nanon ami roro aika bati, e riai naba ni karaoa aron are kam karaoia.+ 15 E na tii teuana te tua ibukimi ngkami ake mai buakon te botaki n aomata, ao te ianena naba ae maeka i rarikimi. Aei te tua ae e na teimatoa n ami roro nako. I matan Iehova, tii te arona te aomata ae maeka n iruwa ma ngkami.+ 16 E riai n tii te arona te tua ao tii te arona te moti ibukimi ao ibukin te ianena ae maeka i rarikimi.’”

17 E reitia ni kangai Iehova nakoni Mote: 18 “Taetae nakoia tibun Iteraera ao tuangia ni kangai, ‘Ngkana kam a roko n te aba ae I a kairingkami nako iai, 19 ao kam kana te amwarake man te aba,+ kam riai n anga te angabwai nakon Iehova. 20 Kam riai n anga bwa te angabwai kariki aika mronron aika karaoaki man ami moani burawa ae aki manti raoi, ae reke man ami moan uaa.+ Kam riai n anga n aron are kam anga iai te angabwai man te tabo ni kaaki kun ni uita. 21 Kam riai n anga teutana man ami moani burawa ae aki manti raoi are reke man ami moan uaa, bwa te angabwai nakon Iehova, n ami roro nako.

22 “‘Ngkana kam karaoa ae kairua ao ni kabwaka ni kakairi n tuua aikai ni kabane, ake e taekin Iehova nakoni Mote, 23 ake bwaai ni kabane ake e tua nakoimi Iehova rinanoni Mote, man te bong are e tua iai Iehova ao e reitinako ibukia ami roro nako, 24 ao ngkana e karaoaki ae kairua n akea ataakina iroun te botaki n aomata, e riai te botaki n aomata n anga temanna te kao mwaane ae ataei bwa te karea ni kabuekaki ibukin te boi ae boiarara* iroun Iehova, ma raona ae te karea ae te amwarake ao raona ae te karea ae te moi n aron tuana,+ ao temanna te kooti ae ataei bwa te karea ni kabwarabure.+ 25 E na karaoa karekeani kabwaraan ana bure te botaki n aomata aika tibun Iteraera te ibonga,* ao e na kabwaraaki aia bure+ ibukina bwa a karaoia n tiaki nanoia, ao a uota te karea ae kareanaki n te ai nakon Iehova bwa aia karea, ao aia karea ni kabwarabure i matan Iehova ibukin aia kairua. 26 E na kabwaraaki ana bure te botaki n aomata aika tibun Iteraera ma te ianena ae maeka i buakoia, ibukina bwa a bane ni karaoia n tiaki nanoia.

27 “‘Ngkana e bure te aomata* n tiaki nanona, e riai ngkanne n anga te kooti aine ae tuai n ririki bwa te karea ni kabwarabure.+ 28 Ao te ibonga e na karaoa karekeani kabwaraan ana bure te aomata* anne, man ana kairua are e karaoia n tiaki nanona i matan Iehova, bwa e aonga n reke kabwaraana ao e na kabwaraaki ana bure.+ 29 E riai n tii te arona te tua nakoimi ni kaineti ma karaoan te bure n tiaki te nano, nakon tibun Iteraera ae bungiaki i buakomi ao nakon te ianena ae maeka i buakomi.+

30 “‘Ma e taetae ni kamatauningaa Iehova te aomata* ae karaoa te bure n oin nanona,+ ao e riai ni kamateaki e ngae ngke tibun Iteraera ngaia ke te aomata ae maeka n iruwa. 31 E bon riai ni kamateaki te aomata* anne ibukina bwa e ribaa ana taeka Iehova ao e urua ana tua.+ E boni mena ana bure i aona.’”+

32 Ngke a mena n te rereua tibun Iteraera, ao a kunea te mwaane temanna n rikorikoi mwakorokoro ni kai n te bongi n Taabati.+ 33 Ao a kairia naake a kunea n rikorikoi kaai, nakoni Mote ma Aaron ao te botaki n aomata. 34 Ao a taua ni kawakina teuaei+ ibukina bwa e tuai raoi n taekinaki te bae riai ni karaoaki nakoina.

35 Ao e taku Iehova nakoni Mote: “E bon riai ni kamateaki teuanne,+ ao e riai te botaki n aomata ni karebanaia n atibu i tinanikun te kaembwa.”+ 36 Ao te botaki n aomata e kaira teuaei nako tinanikun te kaembwa, ao a karebanaia n atibu n uaa matena, n aron are e tua Iehova nakoni Mote.

37 E reitia ni kangai Iehova nakoni Mote: 38 “Taetae nakoia tibun Iteraera ao tuangia bwa a riai ni kaburuburui rabin aia kunnikai n aia roro nako, ao a na kanimwa te karai ae buruu i etani buruburun rabin te kunnikai.+ 39 ‘A riai n iai iroumi buruburu aikai bwa kam aonga n nori ao n uringi ana tua ni kabane Iehova ma ni kakairi iai.+ Kam na tai irii oin nanomi ao matami ao n riki bwa aomata aika aki kakaonimaki.*+ 40 E na buokingkami te baei n uringi au tua ni kabane ao ni kakairi iai, ao n itiaki* i matan Atuami.+ 41 Bon Iehova ngai ae Atuami ae I kairingkami ni kaotinakoingkami man te aba are Aikubita, bwa I aonga ni kaotia bwa bon Atuami ngai.+ Bon Iehova ngai ae Atuami.’”+

16 E teirake ngkanne Kora+ are natin Itia+ are natini Koata,+ are natin Rewi,+ n ikotaki ma Ratan ao Abiram ake natin Eriaba,+ ma On are natini Bereeta, ake tibun Reuben.+ 2 A teirake ni kaitaraa Mote, ao raoia mwaane aika tibun Iteraera aika 250 aika kakannato, aika mataniwi n te botaki n aomata, ake mwaane ake a rineaki mai buakon te botaki n aomata. 3 Mangaia are a ikotaki ni kaitaraa+ Mote ma Aaron ao a taku nakoia: “E a bati n tau aromi anne nakoira, bwa a boni bane n itiaki* te botaki n aomata,+ ao e mena Iehova i buakoia.+ E aera ngkanne bwa kam riai ni karietataingkami i aon ana botaki n aomata Iehova?”

4 Ngke e ongo aei Mote ao e a katorobubua naba ni bobaraaki nako aontano. 5 Ao e taku nakoni Kora ma taani boutokaia ni kabane: “N te moaningabong ao e na kaotia Iehova bwa antai ana aomata+ ao antai ae itiaki ao antai ae riai ni kaania,+ ao ane e rineia+ ao e na kaania. 6 Karaoa aei: Anai baan ake nneni mwaakaron te ai,+ ngkoe ae Kora ma taani boutokaiko ni kabane,+ 7 ao kaaki te ai iai ao katokai baika boiarara i aoia i matan Iehova ningabong, ao te mwaane are e rineia Iehova+ boni ngaia ae itiaki. Ngkami aika tibun Rewi,+ kam a rangi n riao!”

8 E taku ngkanne Mote nakoni Kora: “Ongora taiaoka, ngkami aika tibun Rewi. 9 N ami iango, te bwai ae uarereke iroumi kaokoroami iroun Atuan Iteraera mai buakon te botaki n aomata aika tibun Iteraera,+ ao kariaiakami ni kaania bwa kam na karaoa te beku ibukin Iehova n te umwanrianna ae tabu,* ao n tei i matan te botaki n aomata ni beku ibukia,+ 10 ao kairakim ma tarim ni kabane ake tibun Rewi bwa kam na kaania? Ao ngkai kam kataia naba n anaa te nakoa n ibonga?*+ 11 Ibukin aei, kam boni kaitaraa Iehova, ngkoe ma taani boutokaiko ni kabane ake a ikotaki. Ni kaineti ngkanne ma Aaron, kaanga antai ngaia ngkai kam a ngurengure nakoina?”+

12 Imwina riki ao e a kanaanako Mote nakon Ratan ao Abiram+ ake natin Eriaba, ma a taku naakai: “Ti aki nakoati! 13 Te bwai ae uarereke iroum kairakira ao kaotinakoara man te aba ae raanga iai rannimamman te man ma aia karewe manibeeru,* bwa ko na kamateira n te rereua?+ Ao ngkai, ko a manga kani karikiko bwa te tia tautaeka i aora? 14 Ko tuai naba mani kairira nakon te aba teuana ae raanga iai rannimamman te man ma aia karewe manibeeru,+ ke n anganira te tawaana ke te nne ni kureebe ae ti na bwaibwai iai. Ko na autii kanoani mataia mwaane akekei? Ti aki nakoati!”

15 Mangaia are e a rangi n un Mote ao e taku nakon Iehova: “Tai rairaki n tarai aia karea ae te amwarake. I tuai man anaa aia taongki temanna, ke tao ni kaikoaka temanna mai buakoia.”+

16 E taku ngkanne Mote nakoni Kora: “Kaotiko ma taani boutokaiko ni kabane i matan Iehova ningabong, ngkoe ma ngaiia ao Aaron. 17 E riai temanna ma temanna n anaa ana baan are nneni mwaakaron te ai, ao ni katokai i aona baika boiarara, ao e na anga ana baan temanna ma temanna i matan Iehova, bon 250 mwaitin taiani baan, ao kaka teuana naba ami baan, ngkoe ma Aaron.” 18 Mangaia are a anai aia baan ake nneni mwaakaron te ai n tatabemania nako, ao a kaaki te ai ma baika boiarara i aoia, ao a tei i rarikini mataroan te umwa ni botaki n ikotaki ma Mote ao Aaron. 19 Ngke e a tia Kora n ikotiia taani boutokaia+ ni kaaitaraia nakekei i rarikini mataroan te umwa ni botaki, ao e a kaoti mimitongin Iehova i aon te botaki n aomata.+

20 E a tuanga ngkai Mote ma Aaron Iehova ni kangai: 21 “Kaokoroingkami mai buakon te koraki aei bwa I aonga ni kamaunaia n te tai ae waekoa.”+ 22 Ao a katorobubua ni bobaraaki i aontano ao a taku: “Te Atua, ae te Atua ae anga te maiu* nakoia aomata ni kabane,*+ e na kairiko ana bure te mwaane temanna bwa ko nang un naba iai nakon te botaki n aomata aei?”+

23 E taku ngkanne Iehova nakoni Mote: 24 “Taetae nakon te botaki n aomata ao tuangia ni kangai, ‘Kararoaingkami mai rarikin nako aia umwanrianna Kora, Ratan, ao Abiram!’”+

25 Ao e teirake Mote ao e nakon Ratan ao Abiram, ao a iria aia unimwaane+ tibun Iteraera. 26 Ao e tuanga te botaki n aomata ni kangai: “Kararoaingkami taiaoka man aia umwanrianna nako mwaane aika buakaka aikai, ao tai ringa te bwai teuana ae aia bwai, bwa kam aonga n aki kamaunaaki n aia bure nako.” 27 A kararoaia naba ngkekei man iteran nako aia umwanrianna Kora, Ratan, ao Abiram, ao a otinako Ratan ao Abiram ma n tei ni mataroan aia umwanrianna, n ikotaki ma buuia, natiia, ao aia koraki n ataei aika uarereke.

28 E taku ngkanne Mote: “Kam na ataia n aei bwa e kanakoai Iehova bwa N na karaoi baikai ni kabane, ao tiaki n oin nanou: 29 Ngkana a mate naakai n aroni mateia aomata nako, ao ngkana titeboo tuuaaia ma aomata ni kabane, e bon aki ngkanne kanakoai Iehova.+ 30 Ma ngkana e karaoa te bwai ae rangi ni kamimi Iehova nakoia, ao e uki* aontano ma ni kabwautiia ma aia bwai nako, ao a ribunako nakon te Ruanimate* ngke a maiu, kam na bon ataia iai bwa a aki karinea Iehova mwaane aikai.”

31 Ngke e tia naba ngkekei n taekin taeka aikai ni kabane, ao akea bwa e a tabwena aontano are i aaia.+ 32 Ao e uki* aontano ao e kabwautiia nakekei ma kaaini bataia ni kabane, ma aomata ni kabane ake raoni Kora, ao aia bwai ni kabane.+ 33 Mangaia are a a bane n ribunako nakon te Ruanimate* ma aia koraki ni kabane ngke a maiu, ao e rabunia aontano, n te aro are a a mauna mai buakon te botaki n aomata arei.+ 34 A bane ni birinako tibun Iteraera ake a mena i rarikia nakekei ngke a takarua, bwa a kangai: “Ti maaku bwa e kaawa ni kabwautira aontano!” 35 Ao e roko te ai mairoun Iehova+ ao e kabuekiia mwaane ake 250 ake a anga baika boiarara.+

36 E a taku ngkai Iehova nakoni Mote: 37 “Tuanga Ereata are natin Aaron are te ibonga bwa e na anai man te ai baan ake nneni mwaakaron te ai+ bwa boni baika tabu. Tuangnga naba bwa e na kamaenakoa te ai ni kararoaa teutana. 38 A riai ni karaoaki bwa biiti aika mmani aia baan mwaane aika bua maiuia aikai n aia bure, ao a na kanimwaki n te baonikarea ni kabutaa,+ ibukina bwa a anga baikai i matan Iehova ao a a riki bwa baika tabu. A riai n riki bwa te kanikina nakoia tibun Iteraera.”+ 39 Mangaia are e anai baan ake nneni mwaakaron te ai ake buraati Ereata are te ibonga, ake a anga naake a kabuekaki, ao a ororei bwa a na kanimwi n te baonikarea ni kabutaa, 40 n aron are e tuangnga Iehova rinanoni Mote. Bon te bwai ni kauring aei nakoia tibun Iteraera bwa akea te aomata ae akea kariaiakana* ae tiaki kanoan Aaron, ae e riai ni keerake ni kabueki baika boiarara i matan Iehova,+ bwa e aonga n akea ae e na riki n aroni Kora ma taani boutokaia.+

41 Ni bon te bong naba are imwina ao e a ngurengure te botaki n aomata aika tibun Iteraera nakoni Mote ma Aaron+ ni kangai: “Kam a tia ngkami akana uoman ni kamateia ana aomata Iehova.” 42 Ngke e a tia n ikotaki te botaki n aomata ni kaitaraa Mote ma Aaron, ao a a rairaki nakon te umwa ni botaki, ao akea bwa e a rabunaki n te nang, ao e a kaoti mimitongin Iehova.+

43 A nako matan te umwa ni botaki Mote ma Aaron,+ 44 ao e taku Iehova nakoni Mote: 45 “Ngkami naakai, kararoaingkami mai buakon te botaki n aomata aei, bwa I aonga ni kamaunaia n te tai ae waekoa.”+ Ao a katorobubua ni bobaraaki nako aontano.+ 46 Ao e taku Mote nakon Aaron: “Anaa te baan are nneni mwaakaron te ai ao kaaki iai te ai are man te baonikarea,+ ao katokai baika boiarara i aona ao waekoa kawara te botaki n aomata anne, ao karaoa karekeani kabwaraan aia bure,+ ibukina bwa e a roko unin Iehova. E a moanaki te rekenikai ae kamamate!” 47 E aki tabwara Aaron ma e a anaia naba n aron are e taku Mote, ao e biri nako buakon te botaki n aomata arei, ao akea bwa e a roko te rekenikai ae kamamate i aoia aomata. Mangaia are e kaaki baika boiarara i aon te baan are nneni mwaakaron te ai, ao e a moana karaoani karekeani kabwaraan aia bure aomata. 48 E teimatoa n tei i marenaia aika mate ao aika maiu, ao n tokina e a toki te rekenikai ae kamamate. 49 Botani mwaitiia te koraki ake a mate man te rekenikai ae kamamate bon 14,700, i rarikia ake a mate ibukini Kora. 50 Ngke e a oki Aaron nakoni Mote i rarikini mataroan te umwa ni botaki, ao e a toki te rekenikai ae kamamate.

17 E a taku ngkai Iehova nakoni Mote: 2 “Taetae nakoia tibun Iteraera ao anai mairouia kaka teuana te oko ibukin aia koraki mairoun tamaia, mairouia mataniwi n aia koraki nako mairoun tamaia,+ taian oko aika 12 ni kabane. Korea aran temanna ma temanna i aon okona. 3 Ko riai ni korea aran Aaron i aon okon Rewi, ibukina bwa tii kaka teuana te oko ibukin te aomata ae te mataniwi i aoia ana koraki mairoun tamana. 4 Karin taian oko aikai n te umwa ni botaki i matan te Ati ni Berita,*+ ike I kaokaoti iai nakoimi.+ 5 Ao e na bwebwe okon te mwaane ae I rineia,+ ao N na katoka ngurengureia tibun Iteraera nakoiu,+ ae a ngurengure naba iai nakoimi.”+

6 Mangaia are e taetae Mote nakoia tibun Iteraera, ao a bane aia mataniwi n anganna te oko, kaka teuana te oko ibukin te mataniwi temanna ma temanna i aoia aia koraki mairoun tamaia, aika 12, ao e mena okon Aaron i buakon okoia. 7 E karini ngkanne Mote taian oko akanne i matan Iehova n te umwanrianna are e mena i nanona te Ati ni Berita.

8 N te bong are imwina, ngke e rinnako Mote n te umwanrianna are e mena i nanona te Ati ni Berita, ao noria! E a bwebwe okon Aaron man te baronga are Rewi, ao e riki bwebwena ma ueena ao a riki uaana taian amon aika tawaa. 9 E uotii ni kaotinakoi ngkanne taian oko ni kabane Mote mai matan Iehova nakoia tibun Iteraera ni kabane. Ao a tarai baikai, ao e anaa oin okona te mwaane temanna ma temanna.

10 E taku ngkanne Iehova nakoni Mote: “Kaoka okon Aaron+ nako matan te Ati ni Berita bwa te bwai ae e na kawakinaki bwa te kanikina+ nakoia natin te karitei,+ bwa e aonga n toki ngurengureia nakoiu ao a aonga n aki mate.” 11 E aki tabwara Mote ni karaoa are e tua Iehova nakoina. E karaoia n aron tuangana.

12 A taku ngkanne tibun Iteraera nakoni Mote: “Ti nangi mate ngkai, ti na boni mauna, ti nangi boni bane ni mauna! 13 E na mate te aomata ae kaania naba teutana ana umwanrianna ae tabu* Iehova!+ Ti nangi bane ni mate n te aro anne?”+

18 E taku ngkanne Iehova nakon Aaron: “Ko na katuuaaeaki ngkoe ma natim mwaane ao am koraki mairoun tamam ngkana e karaoaki te bure ni kaineti ma te tabo ae tabu,+ ao ko na katuuaaeaki naba ngkoe ma natim mwaane ngkana e karaoaki te bure ni kaineti ma nakoami n ibonga.*+ 2 Kairiia naba tarim ake man te baronga ae Rewi are aia baronga am bakatibu, bwa a aonga n raoniko ao ni buokiko+ ma natim mwaane, i matan te umwanrianna are e mena i nanona te Ati ni Berita.*+ 3 A na kakororaoi tabeia iroum ao tabeia ni kaineti ma te umwanrianna ni kabutaa.+ Ma a na tai kaania ma bwaai ni mwakuri n te tabo ae tabu ao te baonikarea, bwa a aonga n aki mate ao ngkoe naba.+ 4 A na raoniko ao ni karaoi tabeia ni kaineti ma te umwa ni botaki ao mwakuri ni kabane n te umwanrianna, ao akea te aomata ae akea kariaiakana* ae e kona ni kaaningkami.+ 5 Kam riai ni karaoa tabemi ni kaineti ma te tabo ae tabu+ ao te baonikarea,+ bwa e aonga n aki manga roko te un+ i aoia tibun Iteraera. 6 Boni ngai ae I anganingkami tarimi ake tibun Rewi mai buakoia tibun Iteraera, ao I anganingkami bwa bwaai n tituaraoi.+ A na riki bwa ana bwai Iehova ao a na mwakuri n te umwa ni botaki.+ 7 Ko na tabe ma ami mwakuri n ibonga ngkoe ma natim mwaane ni kaineti ma te baonikarea ao are i akun te keeten,+ ao kam na karaoa ami beku aei.+ I anga te beku n te nakoa n ibonga bwa te bwaintituaraoi nakoimi, ao e riai ni kamateaki te aomata ae akea kariaiakana* ae e kaania te tabo ae tabu.”+

8 E reitia ni kangai Iehova nakon Aaron: “Boni ngai ae I mwiokoiko i aon taian angabwai nakoiu.+ I a tia n anganiko ma natim mwaane tibwangami mani baika tabu ni kabane ake a anga tibun Iteraera, bwa bon tibwangami ae teimatoa.+ 9 E na riki aei bwa am bwai mai buakoni karea aika moan te tabu aika kareanaki n te ai: aia karea nako ake a anga n ikotaki ma aia karea ae te karea ae te amwarake,+ ao aia karea ni kabwarabure,+ ao aia karea ni kabooa mwin te bure,+ ake a uotii nakoiu. Bon te bwai ae moan te tabu ibukim ao ibukia natim mwaane. 10 Ko riai ni kanna n te tabo ae moan te tabu.+ A kona ni kanna mwaane nako. E na riki bwa te bwai ae tabu iroum.+ 11 Bon am bwai naba aei: bwaai n tituaraoi ake a anga+ n ikotaki ma aia karea ni katiotioaki ni kabane+ tibun Iteraera. I a tia n anga baikai nakoim ma natim mwaane ao aine, bwa te tibwanga ae teimatoa.+ A kona ni bane ni kanna akana itiaki akana mena n am auti.+

12 “I anganiko+ ae te kabanea n raoiroi man te oera, ao ae te kabanea n raoiroi man te wain ae boou ma te uita,* ake aia moan uaa+ ake a angan Iehova. 13 A na riki bwa am bwai moan uaanikai nako aika tawaa mai abaia, ake a na uotii nakon Iehova.+ A kona ni bane ni kanna aika itiaki aika mena n am auti.

14 “A riai n riki bwa am bwai bwaai nako ake a kaokoroaki* ibukini baika tabu i Iteraera.+

15 “A riai n riki bwa am bwai karimoa nako mai buakoni baika maiu ni kabane*+ ake a na anga nakon Iehova, ae tao te aomata ke te man. Ma ko bon riai ni manga kabooia aia karimoa aomata,+ ao ko riai ni manga kabooia aia karimoa maan aika aki itiaki.+ 16 Ko riai ni manga kabooa ni boona ae kabooani mwina ngkana teuana ana namwakaina ni waerake, n te boo ae katautauaki ae nimaua te tiekera,*+ ae te tiekera ae kakabonganaaki n te tabo ae tabu.* Bon 20 te kira.* 17 Tii te kao mwaane ae te karimoa, ke te tiibutetei ae te mwaane ae te karimoa, ke te kooti ae te karimoa, ae ko aki riai ni manga kabooa.+ Boni baika tabu. Ko riai ni katimtimwi raraaia i aon te baonikarea,+ ao ko riai ni kabueki mwaeteia ni kabubui bwa te karea ae kareanaki n te ai, ibukin te boi ae boiarara* iroun Iehova.+ 18 Ao e riai n riki irikoia bwa am bwai. E riai n riki bwa am bwai n aroni bwabwaan te man are te karea ni katiotioaki, ao n aron te ranga are te atai.+ 19 I a tia n anganiko ma natim mwaane ao natim aine bwa te tibwanga ae teimatoa,+ angabwai ni kabane aika tabu ake a na anga tibun Iteraera nakon Iehova.+ Bon te berita ae teimaan* ibukim ao ibukia kanoam i matan Iehova.”

20 E reitia ni kangai Iehova nakon Aaron: “Ko na aki bwaibwai n abaia, ao e na akea tibwangam te aba i buakoia.+ Bon tibwangam ao am bwai ngai, i buakoia tibun Iteraera.+

21 “Noria bwa I a tia n angania tibun Rewi teuana katebwinani mwakoroni bwaai nako+ i Iteraera bwa tibwangaia, bwa boon te mwakuri ae a kakaraoia, ae te beku n te umwa ni botaki. 22 A aki riai ni manga kaania te umwa ni botaki tibun Iteraera, bwa e kaawa n reke aia bure ao a mate. 23 A na karaoa te beku n te umwa ni botaki tibun Rewi, ao boni ngaiia aika a na katuuaaeaki ibukin aia bure aomata ni kaineti ma te tabo ae tabu.+ Bon te tua ae teimatoa n ami roro nako, ae a aki riai n reke tibwangaia ae a na bwaibwai iai i buakoia tibun Iteraera.+ 24 Bwa I a tia n angania tibun Rewi bwa tibwangaia, teuana katebwinani mwakoron are a anga tibun Iteraera, ake a na angan Iehova. Anne bukina ae I kangai iai nakoia, ‘A aki riai ni karekea tibwangaia ae a na bwaibwai iai i buakoia tibun Iteraera.’”+

25 E taku ngkanne Iehova nakoni Mote: 26 “Ko riai n tuangia tibun Rewi ni kangai, ‘A na reke iroumi teuana katebwinani mwakoroni bwaai mairouia tibun Iteraera, are I anganingkami bwa tibwangami mairouia,+ ao mani katebwinani mwakoroni bwaai akanne kam riai n anga teuana katebwinani mwakoroia bwa te angabwai nakon Iehova.+ 27 Ao e na taraaki bwa ami angabwai, n aron te uita man te tabo ni kaaki kun ni uita,+ ke bwaai ni kabane ake a reke man te nne ni kamanti ibukin te wain ke te oera. 28 Anne naba te aro ae kam na anga iai te angabwai nakon Iehova mai buakoni katebwinani mwakoroni bwaai ni kabane ake kam karekei mairouia tibun Iteraera, ao kam na angan Aaron are te ibonga te angabwai ibukin Iehova mai buakoni baikai. 29 Kam na angan Iehova bwa baika tabu, aeka n angabwai nako mai buakoni bwaai n tituaraoi ni kabane aika taiani kabanea n raoiroi ake kam anganaki.’+

30 “Ao ko riai ni kangai nakoia, ‘Ngkana kam anga aika taiani kabanea n raoiroi mai buakoia, ao e na taraaki bwa aia uaa tibun Rewi ae reke man te tabo ni kaaki kun ni uita, ao ae reke man te nne ni kamanti ibukin te wain ke te oera. 31 Kam kona ni kanna ma kaaini batami n taabo nako, ibukina bwa boni boon ami mwakuri n te umwa ni botaki.+ 32 E na aki reke ami bure n anne, ngkana kam anga aika taiani kabanea n raoiroi mai buakoia, ao kam na tai kamwaraei baika tabu aika aia bwai tibun Iteraera, bwa kam kaawa ni mate.’”+

19 E a manga taetae riki Iehova nakoni Mote ma Aaron ao e taku: 2 “Aio te tua ae e tua Iehova, ‘Tuangia tibun Iteraera bwa a riai ni karekea ibukimi temanna te kao ae uraura ae marurung raoi, ae e aki toabuaka bwain rabwatana+ ao e tuai n toka i aona te amo. 3 Kam na angan Ereata are te ibonga,* ao e na kairia nako tinanikun te kaembwa, ao e na kamateaki i matana. 4 Ao e na anaa raraana teutana Ereata n tabonibaina, ao e na katimtimwa raraana itiua te tai ni kaineta moan te umwa ni botaki.+ 5 Ao e na kabuekaki te kao i matana. E na kabuekaki kunna ao irikona ao raraana ao nakotaarina.+ 6 Ao te ibonga e na anaa mwaangan te kai ae te tiira, te utoba,*+ ao te kunnikai ae uraroo, ao e na karenakoi n te ai are e kabuekaki iai te kao. 7 E na kaitiakii ngkanne kunnikaina te ibonga ao n tebotebo* n te ran, ao imwina e a kona n rin n te kaembwa, ma e na kamwara te ibonga ni karokoa ae bong.

8 “‘E na kaitiakii kunnikaina n te ran ao n tebotebo* n te ran, te aomata are kabueka te kao, ao e na kamwara ni karokoa ae bong.

9 “‘E na bota mannangin te kao anne te mwaane ae itiaki,+ ao e na kaaki i tinanikun te kaembwa n te tabo ae itiaki. Ao e riai ni kawakinaki iroun te botaki n aomata aika tibun Iteraera, ibukini katauraoan te ran are e na kabonganaaki ibukin te kaitiaki.+ Bon te karea ni kabwarabure te baei. 10 E na kaitiakii kunnikaina te aomata are bota mannangin te kao, ao e na kamwara ni karokoa ae bong.

“‘E na riki aei bwa te tua ae teimatoa nakoia tibun Iteraera ao te ianena ae maeka i buakoia.+ 11 E na kamwara i nanon itibong ane e ringa te aomata* ae mate.+ 12 E riai te aomata anne ni kaitiakia n te ran* n te katenua ni bong, ao e na itiaki n te kaitiua ni bong. Ma ngkana e aki kaitiakia n te katenua ni bong, ao e na aki itiaki n te kaitiua ni bong. 13 A kamwaraea ana umwanrianna ae tabu* Iehova,+ aomata nako aika ringa rabwatan te aomata* ae mate ao a aki kaitiakiia. E riai ni kamateaki te aomata* anne mai buakoia tibun Iteraera.+ E teimatoa ni kamwara ibukina bwa e aki katimtimwaki i aona te ran ibukin te kaitiaki.+ E teimatoa kamwaraana i aona.

14 “‘Aio te tua ae e na kabonganaaki ngkana e mate te aomata i nanon te umwanrianna: A na bane ni kamwara i nanon itibong ake a rin n te umwanrianna, ao ake a a kamani mena n te umwanrianna. 15 A kamwara nneni bwaai aika tangaina n akea mataia aika kabaeaki i aoia.+ 16 A na kamwara i nanon itibong aomata nako aika mena n te tawaana aika ringa te aomata ae tiringaki n te kabaang, ke rabwatan te aomata ae mate ke riina, ke te ruanimate.+ 17 Ibukini ngkanne te aomata ae kamwara, a riai n anaa teutana mannangin te karea ni kabwarabure are kabuekaki, ao a na kabwaroa i aona te ran are man te koburake n ran, i nanon te boora. 18 E na anaa ngkanne te utoba+ te aomata ae itiaki+ ao e na kateboa n te ran ao ni katimtimmwa i aon te umwanrianna ma nneni bwaai ao aomata* ake iai, ao i aon te aomata are ringa te ri, ke te aomata ae kamateaki, ke rabwatan te mate, ke te ruanimate. 19 Ao te aomata are itiaki e na katimtimmwa i aon te aomata are kamwara n te katenua ni bong ao n te kaitiua ni bong, ao e na kaitiakia man ana bure n te kaitiua ni bong,+ ao e riai ni kaitiakii kunnikaina ao n tebotebo n te ran, ao e na itiaki n te tairiki.

20 “‘Ma te aomata ae kamwara ao e aki kaitiakia, e riai ni kamateaki te aomata* anne mai buakon te botaki n aomata,+ ibukina bwa e kamwaraea ana tabo ae tabu Iehova. E aki katimtimwaki i aona te ran ibukin te kaitiaki, mangaia are e kamwara.

21 “‘E na riki aei bwa te tua ae teimatoa ibukia: E riai ni kaitiakii kunnikaina te aomata ae katimtimwa te ran ibukin te kaitiaki,+ ao e na kamwara ni karokoa ae bong te aomata ae ringa te ran ibukin te kaitiaki. 22 A na kamwara bwaai nako ake e ringi te aomata ae kamwara, ao e na kamwara ni karokoa ae bong te aomata* ae ringi.’”+

20 N te moan namwakaina ao e roko te botaki n aomata aika tibun Iteraera n rereuan Tiin, ao a a maeka aomata i Kateti.+ Ikanne are e mate iai Miriam+ ma ni kaiiaki.

2 Ai akea ngkai te ran ibukin te botaki n aomata,+ ao a a ikotaki ni kaitaraa Mote ma Aaron. 3 A kauntaeka aomata ma Mote+ ao a taku: “E raoiroi riki ae ti mate ngke a mate tarira i matan Iehova! 4 E aera ngkai kam kaira ana botaki n aomata Iehova nakon te rereua aei, bwa ti na mate ikai ma ara nanai ni man?+ 5 Ao e aera ngkai kam kairira ni kaotinakoira mai Aikubita nakon te tabo ae buakaka aei?+ Akea iai nnen te koraa, taiani biiku, kaai aika kureebe, ao bamkuranete,* ao akea te ran ni moi.”+ 6 A a nako ngkanne Mote ma Aaron mai matan te botaki n aomata arei nakoni mataroan te umwa ni botaki, ao a katorobubua ni bobaraaki nako aontano, ao e kaoti mimitongin Iehova nakoia.+

7 E taku ngkanne Iehova nakoni Mote: 8 “Anaa te oko ao wetea te botaki n aomata anne n ikotiia, ngkoe ma Aaron are tarim, ao taetae nakon te bwaa i mataia bwa e aonga n anga ranna, ao ko na katiinakoa te ran ibukia man te bwaa, ao angan te botaki n aomata anne ma aia nanai ni man nimaia.”+

9 Mangaia are e anaa te oko Mote mai matan Iehova+ n aron are E tua nakoina. 10 Ao a wetea te botaki n aomata arei Mote ma Aaron n ikotiia i matan te bwaa, ao e taku nakoia: “Ongora ngkai, ngkami aika taani karitei! Ti na katiinakoa te ran ibukimi man te bwaa aei?”+ 11 Ai ngaia are e tabeka baina Mote ao e kauouaa orean te bwaa n okona, ao e a tiinako te ran ae bati, ao e a moi te botaki n aomata arei ma aia nanai ni man.+

12 Imwina riki ao e taku Iehova nakoni Mote ma Aaron: “Kam na aki kaira te botaki n aomata aei nakon te aba are N na angania, ibukina bwa kam aki kaota onimakinau ao katabuau i mataia tibun Iteraera.”+ 13 Bon ranin Meriba*+ aei, ike a ngurengure iai tibun Iteraera nakon Iehova, n te aro are e a katabuaki i buakoia.

14 Ao e kanakoia taan uataeka Mote mai Kateti nakon uean Etom+ bwa a na tuangnga ae kangai: “E kangai tarim are Iteraera,+ ‘Ko bon atai raoi karawawata ni kabane ake ti rinanona. 15 A nako Aikubita ara bakatibu,+ ao ti maeka i Aikubita i nanon ririki* aika bati,+ ao a bwainikirinira I-Aikubita ma ara bakatibu.+ 16 N tokina ao ti a tang nakon Iehova,+ ao e ongo iroura ao e kanakoa te anera+ bwa e na kairira ni kaotinakoira mai Aikubita, ao akea bwa ti a roko i Kateti, ae te kaawa ae mena n tian am aono. 17 Taiaoka kariaia bwa ti na rinanon abam. Ti na aki rinanon te tawaana teuana ke te nne ni kureebe, ao ti na aki moi n ranin te mwanibwa teuana. Ti na mwananga ni Kawain te Uea n aki rairaki nakon te angaatai ke te angamaing, ni karokoa ae ti kitana am aono.’”+

18 Ma e taku Etom nakoina: “Ko aki kona n rinanon ara aono, bwa ngkana ko karaoa anne ao N na otinakoiko ma te kabaang.” 19 Ao a taku tibun Iteraera nakoina: “Ti na mwananga n te kawai ae totouaki, ao ngkana ti moi n am ran ma ara nanai ni man, ao ti na kabooa.+ Akea riki te bae ti tangiria ma ti na tii nakonako rinanon am aono.”+ 20 Ma e boni kangai naba: “Ko aki kona n rinanona.”+ Ao e otinakoia uean Etom ma aomata aika bati ao te taanga ni buaka* ae korakora, bwa e na kaitaraa. 21 Mangaia are e rawa Etom ni kariaia tibun Iteraera bwa a na rinanon ana aono, mangaia are a a nako tibun Iteraera mairouna.+

22 A kitana Kateti te botaki n aomata aika tibun Iteraera ao a nako n te Maunga ae Ora.+ 23 E taku ngkanne Iehova nakoni Mote ma Aaron n te Maunga ae Ora n tian aban Etom: 24 “E nang ikotaki Aaron ma ana koraki.*+ E na aki rin n te aba are N na angania tibun Iteraera, ibukina bwa kam uaia ni karitei nakon te baere I tua ni kaineti ma ranin Meriba.+ 25 Kaira Aaron ma Ereata are natina, ao kairiiarake nakon te Maunga ae Ora. 26 Buutii kunnikain Aaron+ n ibonga* ao karini i aon Ereata+ are natina, ao e na mate ikanne Aaron.”*

27 Mangaia are e karaoa Mote aron are e tua Iehova, ao a ararakea te Maunga ae Ora i matan te botaki n aomata. 28 Ao Mote e buutii kunnikain Aaron, ao e karini i aon Ereata are natina. Imwin anne ao e a mate Aaron i taubukin te maunga.+ Ao a a ruo rikaaki man te maunga Mote ma Ereata. 29 Ngke e noria te botaki n aomata aika tibun Iteraera bwa e a mate Aaron, ao a a tanginiweneia Aaron i nanon 30 te bong.+

21 Ngke e ongo uean Aratia+ are tibuni Kanaan are e maeka n te Nekebo* bwa a a roko tibun Iteraera ni kawain Atarim, ao e a buakania tibun Iteraera ao ni kairiianako tabeman bwa taenikai. 2 Mangaia are a taetae ni bau tibun Iteraera nakon Iehova ni kangai: “Ngkana ko anga aomata aikai nako nanoni baira, ao ti na boni kamaunai aia kaawa.” 3 Mangaia are e ongo Iehova ni bwanaaia tibun Iteraera ao e anga tibuni Kanaan nakoia, ao a a kamaunaia ma aia kaawa nako. Ai ngaia are a arana te tabo anne bwa Orema.*+

4 Ngke a reita mwanangaia man te Maunga are Ora+ ni kawain Taari ae Uraura bwa a aonga n aki rinanon te aba ae Etom,+ ao a a rangi ni kua aomata n te mwananga. 5 Ao a teimatoa n taetae aomata ni kaitaraa te Atua ma Mote+ ni kangai: “E aera ngkai kam kairira ni kaotinakoira mai Aikubita bwa ti na mate n te rereua? Akea te amwarake ao te ran+ ao ti a rangi n ribaa te kariki ae kamwara aei.”+ 6 Mangaia are e a kanakoia naeta aika boitin* Iehova nako buakoia aomata, ao a a tenaiia aomata n te aro are a a bati tibun Iteraera aika mate.+

7 Mangaia are a a kawara Mote aomata ao a taku: “Ti bure bwa ti taetae ni kaitaraa Iehova ao ngkoe.+ Bubutiia Iehova bwa e aonga ni kanakoia naeta mairoura.” Ao e bubutii Mote ibukia aomata.+ 8 E taku ngkanne Iehova nakoni Mote: “Karaoa katotongan te naeta ae boitin* ao katekea i aon te kai. Ao ngkana iai ae e tenaaki, ao e na taraia bwa e aonga ni maiu.” 9 E a karaoa naba ngkekei te naeta ae te buraati Mote+ ao e katekea i aon te kai,+ ao n te tai are e tenaa iai te aomata te naeta ao e na maiu teuanne ngkana e taraa te naeta ae te buraati.+

10 Imwin anne ao a a mwananga tibun Iteraera ao a kaembwa i Obota.+ 11 A kitana ngkanne Obota ao a kaembwa i Iieabarim+ n te rereua i mainiku ae kaaitara ma Moaba. 12 Ao a kitana ikanne ao a kaembwa n te Mwarua ae Tiereta.+ 13 Ao a kitana ikanne ao a kaembwa n aonon te mwarua ae Arenon,+ ae mena n te rereua ae reitinako mai aon tiaia taian Amoraite, bwa Arenon bon tiani Moaba, i marenani Moaba ma taian Amoraite. 14 Anne bukina ae e taekinaki n te boki ae Ana Buaka Iehova ae kangai, “Waeba are i Tiuba ao mwaruan nako Arenon, 15 ao rabeeni* mwarua aikai n ruo rikaaki, e reitinako nakon te kaawa ae Aare ao e toma ma tiani Moaba.”

16 Imwina ao a nako Beere.* Aei te mwanibwa are e taekinna Iehova ngke e kangai nakoni Mote: “Ikotiia aomata ao N na angania te ran.”

17 N te tai anne ao a anenea te kuna ae kangai tibun Iteraera:

“Te mwanibwa, ko na kobukoburake! Kaekaa* aei!

Ao a nako man te rereua nako Matana, 19 mai Matana nako Naariera, ao mai Naariera nako Bamota.+ 20 A nako mai Bamota nakon te mwarua ae mena n aononi* Moaba,+ i taubukini Bitika,+ ike e kona n noraki mai iai Ietimon.*+

21 A a kanakoia ngkai taan uataeka tibun Iteraera nakon Taion ae aia uea taian Amoraite, ao a taku:+ 22 “Kariaia bwa ti na rinanon abam. Ti na aki rairaki nakon te tawaana teuana ke te nne ni kureebe teuana. Ti na aki moi n ranin te mwanibwa teuana. Ti na mwananga ni Kawain te Uea ni karokoa ae ti kitana am aono.”+ 23 Ma Taion e aki kariaia tibun Iteraera bwa a na rinanon ana aono. Ma e botiia ana aomata ni kabane Taion ao e nako n ekiianako tibun Iteraera n te rereua, ao ngke e a roko i Iaati ao e a buaka ma tibun Iteraera.+ 24 Ma tibun Iteraera a kataea ana kai n te kabaang+ ao a taui abana+ man te mwarua ae Arenon+ nakon te mwarua ae Iaboka,+ n uakaan ma tibun Ammon, ibukina bwa Iatera+ bon tian aia aono tibun Ammon.+

25 Mangaia are a taui kaawa aikai ni kabane tibun Iteraera ao a maeka n aia kaawa ni kabane taian Amoraite,+ i Etiibon ma kaawa ake a mena i aana.* 26 Bwa Etiibon bon ana kaawa Taion, are aia uea taian Amoraite, are e buakana ueani Moaba, ma n anai abana ni kabane mairouna ni karokoa te mwarua ae Arenon. 27 Anne te bae kauekea te kario ni kakaniko ae kangai:

“Kaaraki nako Etiibon.

Ke e kateaki ana kaawa Taion ma ni kamatoaaki raoi.

28 Bwa e otinako te ai mai Etiibon, te ura man ana kaawa Taion.

E bue iai Aare are i Moaba, ma tooka ake n taabo aika rietata n te mwarua ae Arenon.

29 E na reke kaim, Moaba! Kam na boni kamaunaaki, ngkami aika kaaini Kemoti!+

E karikiia natina mwaane bwa taan tiotionako, ao natina aine bwa ana taenikai Taion, are aia uea taian Amoraite.

31 Mangaia are a a maeka tibun Iteraera i abaia taian Amoraite. 32 E kanakoia ngkanne mwaane tabeman Mote bwa a na karaba n tuoa Iatera.+ A taui kaawa ake a mena i aana,* ma ni kakioianako taian Amoraite ake iai. 33 Imwina ao a rairaki n toua te Kawai ae Batian. Ao e otinakoia Oka+ are ueani Batian ma ana aomata ni kabane ni buakania i Eterei.+ 34 E taku Iehova nakoni Mote: “Tai makua,+ bwa N na anga ngaia ma ana aomata ni kabane ao abana, nako nanoni baim.+ Ao ko na karaoa nakoina te aro are ko karaoia nakon Taion, are aia uea taian Amoraite, are e maeka i Etiibon.”+ 35 Mangaia are a kamatea ma natina mwaane ao ana aomata ni kabane, ni karokoa ae ai akea temanna ana aomata ae maiu,+ ao a taua abana.+

22 A mwananga nako ngkanne tibun Iteraera ao ni kaembwa n rereuani Moaba ake a aoraoi ni kaitaraa te Ioretan mai Ieriko.+ 2 Ao Baraka+ are natin Tibore, e a nori ngkai bwaai ni kabane ake a karaoi tibun Iteraera nakoia taian Amoraite. 3 Ao I-Moaba a a rangi ni maakuia tibun Iteraera, ibukina bwa a rangi ni bati. Ni koauana, a a rikirake ni maaku I-Moaba irouia.+ 4 Mangaia are a a kangai I-Moaba nakoia unimwaaneni Mirian:+ “A nang kabwauti ngkai bwaai ni kabane aika mena i rarikira te botaki n aomata aei, n aron te kao mwaane ngkana e kabwauti uteuten te tawaana.”

Bon ueani Moaba Baraka ae natin Tibore n te tai anne. 5 E kanakoia taan uataeka nakoni Baraam ae natini Beora i Betora,+ are mena i rarikin te Karaanga* n abana are e bungiaki iai. E weteia ao e kangai nakoina: “Noria! E otinako te natannaomata mai Aikubita. Ao akea bwa a kabutaa aon* te aba+ ao a a boni katei maeka naba i moau. 6 Taiaoka nakomai ngkai bwa ko na kamaraiaa te natannaomata aei ibukiu,+ bwa a korakora riki nakoiu. Tao I kona ni kataei aia kai ao ni kakioianako man te aba, bwa I bon ataia raoi bwa e kakabwaiaaki ane ko kakabwaiaa, ao e maraia ane ko kamaraiaa.”

7 Mangaia are a a mwananga unimwaaneni Moaba ao unimwaaneni Mirian ma boon te kaiwa i nanoni baia, ao a nakoni Baraam+ ni kaota nakoina ana rongorongo Baraka. 8 Mangaia are e taku nakoia: “Tiiku ikai n te tairiki aei, ao N na manga okiringkami ma te bwai ae e taekinna Iehova nakoiu.” Ngaia are a a tiku tokani Moaba irouni Baraam.

9 Ao e roko te Atua irouni Baraam ao e taku:+ “Antai mwaane aika iroum aikai?” 10 E taku Baraam nakon te Atua ae koaua: “E kanakotaeka ni kangai nakoiu Baraka are natin Tibore are ueani Moaba: 11 ‘Noria! E a kabutaa aon* te aba te natannaomata ae otinako mai Aikubita aei. Nakomai ngkai bwa ko na kamaraiaia ibukiu.+ Tao I a kona iai ni buakania ao ni kakioianako.’” 12 Ma e taku te Atua nakoni Baraam: “Ko na aki airi ma ngaiia. Ko na aki kamaraiaia aomata aikai, bwa a kakabwaiaaki.”+

13 Ao e teirake Baraam n te ingabong ao e taku nakoia tooka ake mairouni Baraka: “Naako abami, bwa e aki kariaia Iehova bwa N na airi ma ngkami.” 14 Mangaia are a a nako tokani Moaba ao a a okira Baraka ao a taku: “E rawa Baraam n airi ma ngaira.”

15 Ao Baraka e a manga kanakoia tooka aika rangi ni bati riki ao aika kakannato riki nakoia te moani koraki. 16 A roko irouni Baraam ao a taku nakoina: “E kangai ana taeka Baraka are natin Tibore, ‘Taiaoka tai kariaia te bwai teuana bwa e na tuka rokom irou, 17 bwa N na kabatiaa karineam ao N na karaoi bwaai nako akana ko tuangai bwa N na karaoi. Mangaia ae I butiiko bwa ko na nakomai ni kamaraiaa te natannaomata aei ibukiu.’” 18 Ma Baraam e kaekaia ana toro Baraka ni kangai: “Ngkana tao e anganai Baraka ana auti ae on n te tirewa ma te koora, ao I bon aki kona naba ni karaoa te bwai teuana ae riaon are e tua Iehova ae Atuau, e ngae ngkana tao e uarereke ke e bubura.+ 19 Ma taiaoka tiiku naba ikai n tairiki, bwa I aonga n ataa te bwai ae e na tuangai riki Iehova.”+

20 Ao e roko te Atua irouni Baraam n te tairiki ao e taku nakoina: “Ngkana a roko mwaane aikai bwa a na weteiko, ao naako iriia. Ma ko na tii taekin taeka aika I tuangko bwa ko na taekin.”+ 21 Mangaia are e teirake Baraam n te ingabong ao e katokaa ana kaintoka i aon ana taongki,* ao e nako ma tokani Moaba.+

22 Ma e urarake unin te Atua ibukina bwa e nako, ao e tei ana anera Iehova i nanon te kawai bwa e na tukia. E mwananga Baraam i aon ana taongki, ao raona ana tia ibuobuoki aika uoman. 23 Ao ngke e nora ana anera Iehova te taongki, bwa e tei i nanon te kawai ma ana kabaang i nanoni baina, ao e kataia n rairakinako man te kawai nakon te tawaana. Ma e orea te taongki Baraam bwa e na okira te kawai. 24 E tei ngkanne ana anera Iehova i nanon te kawai ae wariki i marenan taiani nne ni kureebe aika uoua, ma oo aika atibu n itera aika uoua. 25 Ngke e nora ana anera Iehova te taongki, ao e a katenaa naba ma te oo ao e a kakomakiia waen Baraam ma te oo, ao Baraam e a manga orea riki te taongki.

26 E a manga mwananga riki ngkai ana anera Iehova ao e tei n te tabo ae wariki, ike ai akea iai te anga n rairaki nakon te angaatai ke nakon te angamaing. 27 Ngke e nora ana anera Iehova te taongki, ao e a wene naba e ngae ngke e bon toka i aona Baraam, ngaia are e a rangi ni maraki nanoni Baraam ao e a ororea te taongki n okona. 28 N tokina ao e a karaoa te taongki Iehova bwa e na taetae,*+ ao e taku nakoni Baraam: “Tera ae I karaoia nakoim ngkai ai tenua am tai n oreai?”+ 29 E kaeka ni kangai Baraam nakon te taongki: “Ibukina bwa ko kateinibabaai. Ngke iai ngkai au kabaang i baiu ao I a tia n tiringko!” 30 E taku ngkanne te taongki nakoni Baraam: “Tiaki bon am taongki ngai ae ko totoka i aou ni kabane am bong ni maiu ni karokoa te bong aei? I a tia ni karaoa aei nakoim mai mwaina?” E kaeka teuaei ni kangai: “Ko tuai!” 31 Ao Iehova e kanorabaa matani Baraam,+ ao e a nora ana anera Iehova n tei n te kawai ma te kabaang i nanoni baina. E aki tabwara ma e a katorobubua naba ni bobaraaki i aontano.

32 E taku ngkanne ana anera Iehova nakoina: “E aera ngkai ai tenua am tai n orea am taongki? Noria! Boni ngai ae I roko bwa N na tukiko, ibukina bwa e a rangi ni bobuaka am waaki ma nanou.+ 33 E norai te taongki ao e kataia n rairakinako mairou tenua te tai.+ Iangoia bwa tera ae e na riki ngke arona bwa e aki rairakinako mairou? Ngke ngkai ao I a tia n tiringko ao I kamaiua te taongki.” 34 E taku Baraam nakon ana anera Iehova: “I bure bwa I aki ataia ae ko tei n te kawai bwa ko na kawarai. Ao ngkai, ngkana arona bwa e aki raoiroi aei i matam, ao N na oki rikaaki.” 35 Ma e taku ana anera Iehova nakoni Baraam: “Naako ma mwaane aikai, ma ko na tii taekin taeka aika I tuangko.” Ai ngaia are e a reitaanako kawaina Baraam ma tooka ake mairouni Baraka.

36 Ngke e ongo Baraka bwa e a roko Baraam, e aki tabwara ma e a nako naba ni kawaria n te kaawa ae Moaba, ae mena i mataniwin Arenon i aon tian te aono anne. 37 E taku Baraka nakoni Baraam: “Tiaki I kanaanako nakoim? Ao e aera ngkai ko aki kawarai? N am iango I aki kona ni kabatiaa karineam?”+ 38 E kaeka ni kangai Baraam nakoni Baraka: “Noria, I a roko iroum ngkai. Ma I kariaiakaki n taekina te bwai teuana? I tii kona n taekin taeka ake e karin te Atua i wiu.”+

39 Mangaia are e a airinako Baraam ma Baraka ao a a roko i Kiriatautota. 40 E kareania kaao ma tiibu Baraka ao e kanakoi iriko tabeua nakoni Baraam ao tooka ake raona. 41 N te moaningabong ao Baraka e kaira Baraam, ao e airi ma ngaia nako Bamotabaara,* ao mai ikanne e a kona iai n noriia aomata ni kabane.+

23 E taku ngkanne Baraam nakoni Baraka: “Katei baonikarea aika itiua n te tabo aei,+ ao katauraoi ibukiu kaao mwaane aika itiman ao tiibu mwaane aika itiman.” 2 E aki tabwara Baraka ma e a karaoa naba are e taku Baraam. Ao e kareana kaka temanna te kao mwaane ao te tiibu mwaane Baraka ao Baraam i aoni kaka teuana te baonikarea.+ 3 E taku ngkanne Baraam nakoni Baraka: “Tiiku ikai i rarikin am karea ni kabuekaki ao ngai N na nako. Tao e na taetae ma ngai Iehova. Te baere e kaotia nakoiu ao N na tuangko.” Mangaia are e a nako taubukin te tabuki teuana.

4 Ao e taetae te Atua ma Baraam+ ao e taku Nakoina: “I katei baonikarea aika itiua ni karinani, ao I kareana kaka temanna te kao mwaane ao te tiibu mwaane i aoni kaka teuana te baonikarea.” 5 Ao e karina te taeka ae kangai Iehova i nanoni win Baraam:+ “Okira Baraka ao aio te bwai ae ko na taekinna.” 6 Mangaia are e a oki ao e nora Baraka ma tokani Moaba ni kabane, n tei i rarikin ana karea ni kabuekaki. 7 E taekina ngkanne te kario ae kangai:+

‘Nakomai kamaraiaa Iakoba ibukiu.

Eng, nakomai kabuakakaa Iteraera.’+

 8 N nang kangaa naba ni kamaraiaia te koraki ake e tuai ni kamaraiaia te Atua?

Ao N nang kangaa naba ni kabuakakaia te koraki ake e tuai ni kabuakakaia Iehova?+

 10 Antai ae kona ni warekiia ana koraki aika korakora Iakoba+ aika rangi ni bati kaanga ai aroni bubun te tano?

Ke ni wareka tii kaamwakoron Iteraera?

11 E taku ngkanne Baraka nakoni Baraam: “Tera ae ko karaoia nakoiu? I kairiko bwa ko na kamaraiaia taani kairiribai nakoiu, ao noria akea te bwai ae ko karaoia ma ko kakabwaiaia.”+ 12 E kaeka ni kangai: “Tiaki I riai n taekini baike e karini i wiu Iehova?”+

13 E taku Baraka nakoina: “I butiiko bwa ko na irai nakon te tabo riki teuana ae ko kona n noriia mai iai. Ane ko na noriia tii tabeman mai buakoia, ao ko na aki noriia ni kabane. Ko na kamaraiaia ibukiu mai ikekei.”+ 14 Mangaia are e kairia nakon te tawaana ae Tobim nako aon taubukini Bitika,+ ao e katei baonikarea aika itiua ao e kareana kaka temanna te kao mwaane ao te tiibu mwaane i aoni kaka teuana te baonikarea.+ 15 Mangaia are e taku Baraam nakoni Baraka: “Tiiku ikai i rarikin am karea ni kabuekaki ngkana I nako n taetae ma Ngaia ikekei.” 16 Ao e taetae Iehova nakoni Baraam ao e karina te taeka ae kangai i nanoni wina:+ “Okira Baraka ao aio te bwai ae ko na taekinna.” 17 Mangaia are e a roko irouna ao e noria bwa e tataninga i rarikin ana karea ni kabuekaki, ao raona tokani Moaba. E titirakinna ngkanne Baraka ni kangai: “Tera ae e taku Iehova?” 18 E taekina ngkanne te kario ae kangai:+

“Teirake Baraka ao kakauongo.

Ongora irou, ngkoe ae natin Tibore.

Ngkana e taekina te bwai teuana, tiaki e na boni karaoia?

Ngkana e taetae, tiaki e na boni kakoroa bukina?+

Bon raoia Iehova ae Atuana.+

Ao e takaruaeaki i buakoia ni kamoamoaaki bwa te uea.

22 E kairiia te Atua ni kaotinakoia mai Aikubita.+

Kaanga koron te kao mwaane ae moaanti ngaia, irouia naakai.+

25 Ao e taku Baraka nakoni Baraam: “Ngkana ko aki kona ni kamaraiaa n te itera teuana, ao ko aki riai naba ni kakabwaiaa n te itera are teuana.” 26 Ao Baraam e kaekaa Baraka ni kangai: “Tiaki I kangai nakoim, ‘N na karaoi bwaai ni kabane ake e taekin Iehova’?”+

27 E taku Baraka nakoni Baraam: “I butiiko ma nakomai, ao kariaia bwa N na kairiko nakon te tabo riki teuana. Tao e na raoiroi i matan te Atua ae koaua, bwa ko na kamaraiaa Iteraera ibukiu mai ikekei.”+ 28 Mangaia are Baraka e kaira Baraam nako taubukini Beore, ike e kona n noraki Ietimon*+ mai iai. 29 Ao e taku Baraam nakoni Baraka: “Katei baonikarea aika itiua n te tabo aei, ao katauraoi ibukiu kaao mwaane aika itiman ao tiibu mwaane aika itiman.”+ 30 Ao Baraka e karaoa are e tua Baraam, ao e kareana kaka temanna te kao mwaane ao te tiibu mwaane i aoni kaka teuana te baonikarea.

24 Ngke e noria Baraam bwa e kukurei* Iehova bwa e na kakabwaiaa tibun Iteraera, ao e aki manga nako riki ni kakaaei kanikinaeani kamaunanakoaia,+ ma e rairaki ni kaitaraa te rereua. 2 Ngke e tabeka matana Baraam ma n noriia tibun Iteraera bwa a katei aia umwanrianna barongana nako,+ ao e a ruonaki n taamnein te Atua.+ 3 E taekina ngkanne te kario ae kangai:+

 8 E kairia te Atua ni kaotinakoa mai Aikubita.

Kaanga koron te kao mwaane ae moaanti ngaia, irouia naakai.

10 Ao e a rangi ni maraki nanoni Baraka irouni Baraam. E uboi baina Baraka ni kakaniko ao e taku nakoni Baraam: “I weteiko bwa ko na kamaraiaia aiau,+ ma akea te bwai ae ko karaoia ma ko kakabwaiaia tenua te tai. 11 Naako naba ngkai nakoni mwengam. I iangoia ngkoa bwa N na kabatiaa karineam+ ma noria! e taua te karineaki mairoum Iehova.”

12 E kaeka Baraam nakoni Baraka ni kangai: “Tiaki I kangai nakoia taan uataeka ake ko kanakoia, 13 ‘Ngkana tao e anganai Baraka ana auti ae on n te tirewa ma te koora, ao I bon aki kona naba ni karaoa te bwai teuana n oin nanou,* ae riaon ae e tua Iehova, e ngae ngkana tao e raoiroi ke e buakaka. Tiaki N na tii taekin taeka ake e tuangai Iehova’?+ 14 Ao ngkai N nangi nako ni kawariia au aomata. Nakomai ao kariaia bwa N na kaongoko te bwai ae e na karaoia te natannaomata aei nakoia am aomata nakon te tai ae e na roko.”* 15 “E taekina ngkanne te kario ae kangai:+

20 Ngke e nora Amareka, ao e reitaanako ana kario ni kangai:

21 Ngke e noriia I-Kenaite,+ ao e reitaanako ana kario ni kangai:

“E mano raoi kainikatikum, ao e kateaki am tabo ni maeka i aon te bwaa.

22 Ma e na kabueka Kaiin* te aomata temanna.

E na maanra imwaini kairakim nako bwa te taenikai iroun Aturia?”

23 Ao e reitaanako ana kario ni kangai:

“Ai kananoangara! Ai antai ae e na maiu ngkana e a karaoa aei te Atua?

Ma e na boni mauna naba teuanne.”

25 Ao e teirake Baraam+ ao e nako n okira ana tabo. Ao e waakina naba kawaina Baraka.

25 Ngke a a maeka tibun Iteraera i Titim+ ao a a wene ni bure ma aine aika natiia tibuni Moaba.+ 2 A kaoia aomata aine aikai nakon aia angakarea nakoia atuaia,+ ao a a kang taiani karea aomata akanne ao ni bobaraaki nakon atuaia.+ 3 Mangaia are a a ira taromauriani Baara-beore+ tibun Iteraera, ao e a rangi n un Iehova irouia tibun Iteraera. 4 E taku Iehova nakoni Mote: “Anaiia taani kairiri* ni kabane i aoia aomata aikai ake a a tia ni bure, ao tauriia i matan Iehova bwa a aonga n noraki irouia aomata,* bwa e aonga n rairakinako uraraken unin Iehova mairouia tibun Iteraera.” 5 E taku ngkanne Mote nakoia aia tia moti tibun Iteraera:+ “Kam riai n tatabemaningkami nako n tiringia ami aomata ake a ira taromauriani Baara-beore.”+

6 Ma akea bwa e a roko naba temanna tibun Iteraera ae kaira te aine temanna ae te I-Mirian+ ni kaania ana koraki teuaei, i matani Mote ao i matan te botaki n aomata aika tibun Iteraera, ake a tabe n tang ni mataroan te umwa ni botaki. 7 Ngke e nora aei Bineati+ are natin Ereata are natin Aaron are te ibonga,* ao e a bon teirake naba mai buakon te botaki n aomata ao e anaa te kainiwai ni baina. 8 Ao e nako n rimwin teuare tibun Iteraera n rin n te umwanrianna ao e kaai n ewariia, teuare tibun Iteraera ao neierei, ao e teke biroton neierei. Ao e a toki iai te aoraki ae kamamate are irouia tibun Iteraera.+ 9 Mwaitiia aika mate man te aoraki ae kamamate aei, bon 24,000.+

10 E taku ngkanne Iehova nakoni Mote: 11 “E a tia Bineati+ are natin Ereata are natin Aaron are te ibonga, n rairaanako uniu mairouia tibun Iteraera ibukina bwa e rawa ni kariaia naba teutana te kaiangatoa nakoiu are e riki i buakoia.+ Mangaia are I a aki kamaunaia tibun Iteraera n au tauaninne ibukin tangiran taromauriau n tii ngai.+ 12 Mangaia ae kangai ibukiu: ‘I karaoa te berita ma ngaia ni kaota akoana irou. 13 Ao e na riki bwa te berita ibukin te nakoa n ibonga ae teimatoa nakoina ma kanoana ake imwina,+ ibukina bwa e rawa ni kariaia te kaiangatoa nakon Atuana,+ ao e karaoa karekeani kabwaraan aia bure tibun Iteraera.’”

14 Ao aran te mwaane are tibun Iteraera are kamateaki ma te aine are te I-Mirian, bon Timri ae natin Taru ae te mataniwi i aoia ana koraki mairoun tamana ake tibun Timeon. 15 Aran te aine ae te I-Mirian are e kamateaki, boni Kotibi ae natin Tura+ ae te mataniwi i Mirian+ i aoia utu ake ana koraki mairoun tamana.

16 Imwina riki ao e taku Iehova nakoni Mote: 17 “Karawawataia I-Mirian ao kam na tiringia,+ 18 bwa a a tia ni karokoa te rawawata i aomi, ngke a nanowanawana n anai nanomi bwa kam na bure n te baere karaoaki ni kaineti ma Beore.+ Bwa a anai nanomi bwa kam na bure rinanon Nei Kotibi are natin aia mataniwi temanna kaaini Mirian, are e kamateaki+ n te bong are e karokoaki iai i aomi te aoraki ae kamamate n te baere karaoaki ni kaineti ma Beore.”+

26 Imwin rokon te aoraki ae kamamate+ ao e a taku Iehova nakoni Mote ao Ereata are natin Aaron are te ibonga:* 2 “Karaoa te wareaomata ibukin te botaki n aomata aika tibun Iteraera, ni moa mairouia ake kaka 20 aia ririki ni waerake, ni kaineti ma aia koraki mairoun tamaia. Warekiia ni kabane ake a kona ni kaaina ana taanga ni buaka Iteraera.”+ 3 Mangaia are a taetae Mote ma Ereata+ are te ibonga ma ngaiia, n rereuani Moaba+ ake a aoraoi i rarikin te Ioretan n uakaan ma Ieriko,+ ni kangai: 4 “Karaoa te wareaomata ibukia man te roro ae 20 te ririki ni waerake, n aron are e tua Iehova nakoni Mote.”+

Ao aikai tibun Iteraera ake a otinako man te aba ae Aikubita: 5 Reuben+ ae ana karimoa Iteraera, ao aikai natin Reuben mwaane:+ Mairoun Anoka, te utu aika tibun Anoka, mairouni Baru, te utu aika tibuni Baru, 6 mairoun Etiron, te utu aika tibun Etiron, mairouni Karemi, te utu aika tibuni Karemi. 7 Akanne bon utuia nako tibun Reuben, ao ake a koreaki araia bon 43,730.+

8 Natini Baru bon Eriaba. 9 Ao natin Eriaba mwaane bon Nemuera, Ratan, ao Abiram. Teuae Ratan ma Abiram boni ngaiia ake a rineaki iroun te botaki n aomata, ake a ekaanako Mote+ ma Aaron, n raonia ana koraki Kora+ ngke a ekaanako Iehova.+

10 Ao e uki* aontano ao e kabwautiia nakekei. Ao e mate Kora ma taani boutokaia ngke a kabuekaki mwaane aika 250 n te ai.+ Ao a riki bwa te bwai n reirei.+ 11 Ma a aki mate natini Kora.+

12 Aikai natin Timeon mwaane+ n aia utu nako: mairoun Nemuera, te utu aika tibun Nemuera, mairoun Iamin, te utu aika tibun Iamin, mairoun Iakin, te utu aika tibun Iakin, 13 mairoun Teera, te utu aika tibun Teera, mairoun Tiaura, te utu aika tibun Tiaura. 14 Akanne bon utuia nako tibun Timeon aika 22,200.+

15 Aikai natini Kata mwaane+ n aia utu nako: mairoun Tebon, te utu aika tibun Tebon, mairoun Aki, te utu aika tibun Aki, mairoun Tuni, te utu aika tibun Tuni, 16 mairoun Otini, te utu aika tibun Otini, mairoun Eri, te utu aika tibun Eri, 17 mairoun Arota, te utu aika tibun Arota, mairoun Areri, te utu aika tibun Areri. 18 Akanne bon utuia nako natini Kata, ao ake a koreaki araia bon 40,500.+

19 Natin Iuta mwaane+ bon Era ao Onan.+ Ma a mate Era ao Onan n te aba ae Kanaan.+ 20 Ao aikai natin Iuta mwaane n aia utu nako: mairoun Tiera,+ te utu aika tibun Tiera, mairouni Bereti,+ te utu aika tibuni Bereti, mairoun Teera,+ te utu aika tibun Teera. 21 Ao aikai natini Bereti mwaane: mairoun Etiron,+ te utu aika tibun Etiron, mairoun Amura,+ te utu aika tibun Amura. 22 Akanne ana utu nako Iuta, ao ake a koreaki araia bon 76,500.+

23 Aikai natin Itakara mwaane+ n aia utu nako: mairoun Tora,+ te utu aika tibun Tora, mairouni Buwa, te utu aika tibuni Buwa, 24 mairoun Iatuba, te utu aika tibun Iatuba, mairoun Timron, te utu aika tibun Timron. 25 Akanne bon ana utu nako Itakara, ao ake a koreaki araia bon 64,300.+

26 Aikai natin Teburun mwaane+ n aia utu nako: mairoun Tereta, te utu aika tibun Tereta, mairoun Eron, te utu aika tibun Eron, mairoun Iareera, te utu aika tibun Iareera. 27 Akanne bon utuia nako tibun Teburun, ao ake a koreaki araia bon 60,500.+

28 Natin Ioteba mwaane+ n aia utu nako boni Manate ao Eberaim.+ 29 Aikai natini Manate:+ mairouni Makira,+ te utu aika tibuni Makira. Ao Makira bon tamani Kireata.+ Mairouni Kireata, te utu aika tibuni Kireata. 30 Aikai natini Kireata mwaane: mairoun Ietera, te utu aika tibun Ietera, mairoun Ereka, te utu aika tibun Ereka, 31 mairoun Atiriera, te utu aika tibun Atiriera, mairoun Tekem, te utu aika tibun Tekem, 32 mairoun Temita, te utu aika tibun Temita, mairoun Ebee, te utu aika tibun Ebee. 33 Ao akea natin Terobeata are natin Ebee aika mwaane, ma tii natina aine,+ ao araia natin Terobeata aine,+ boni Maara, Noa, Okera, Mireka, ao Tireta. 34 Akanne bon ana utu nako Manate, ao ake a koreaki araia bon 52,700.+

35 Aikai natin Eberaim mwaane+ n aia utu nako: mairoun Tutera,+ te utu aika tibun Tutera, mairouni Bekera, te utu aika tibuni Bekera, mairoun Taan, te utu aika tibun Taan. 36 Ao aikai natin Tutera mwaane: mairoun Eran, te utu aika tibun Eran. 37 Akanne aia utu nako natin Eberaim, ao ake a koreaki araia bon 32,500.+ Akanne bon natin Ioteba mwaane n aia utu nako.

38 Aikai natini Beniamin mwaane+ n aia utu nako: mairouni Bera,+ te utu aika tibuni Bera, mairoun Atibera, te utu aika tibun Atibera, mairoun Airam, te utu aika tibun Airam, 39 mairoun Tiebubam, te utu aika tibun Tiebubam, mairoun Ubam, te utu aika tibun Ubam. 40 Natini Bera mwaane bon Areta ao Naaman:+ Mairoun Areta, te utu aika tibun Areta, mairoun Naaman, te utu aika tibun Naaman. 41 Akanne bon utuia nako natini Beniamin, ao aika koreaki araia bon 45,600.+

42 Aikai natin Tan mwaane+ n aia utu nako: mairoun Tuam, te utu aika tibun Tuam. Akanne bon ana utu Tan n aia utu nako. 43 Aia utu ni kabane tibun Tuam aika koreaki araia bon 64,400.+

44 Aikai natin Atera mwaane+ n aia utu nako: mairoun Imna, te utu aika tibun Imna, mairoun Itiwi, te utu aika tibun Itiwi, mairouni Beria, te utu aika tibuni Beria. 45 Mairouia ngkanne natini Beria mwaane: mairoun Eebera, te utu aika tibun Eebera, mairouni Marekiera, te utu aika tibuni Marekiera. 46 Ao aran natin Atera bon Nei Teraa. 47 Akanne bon aia utu nako natin Atera mwaane, ao ake a koreaki araia bon 53,400.+

48 Aikai natin Nabetari mwaane+ n aia utu nako: mairoun Iateera, te utu aika tibun Iateera, mairouni Kuni, te utu aika tibuni Kuni, 49 mairoun Ieteri, te utu aika tibun Ieteri, mairoun Tirem, te utu aika tibun Tirem. 50 Akanne bon ana utu Nabetari n aia utu nako, ao ake a koreaki araia bon 45,400.+

51 Aio botani mwaitiia tibun Iteraera ake a koreaki araia: 601,730.+

52 Imwin anne ao e taku Iehova nakoni Mote: 53 “E riai n tibwatibwaaki te aba i buakoia naakai bwa te tibwanga ni kaineti ma karinanakin taian ara.*+ 54 Ko riai ni karakai tibwangaia te koraki ake a bati riki mwaitiia, ao ko riai ni kakeei tibwangaia te koraki ake a karako riki mwaitiia.+ A riai n anganaki tibwangaia koraki aikai n tatabeua nako ni kaineti ma mwaitiia naake a koreaki araia. 55 Ma e riai n tibwatibwaaki te aba rinanon te kanikina* mairoun te Atua.+ A riai ni karekea tibwangaia ni kaineti ma aran aia baronga nako tamaia. 56 A na baireaki tibwanga aikai n tatabeua nako rinanon te kanikina mairoun te Atua, ao n tibwaaki i buakoia te koraki ake a bati riki mwaitiia ao ake a karako riki mwaitiia.”

57 Aikai ngkanne tibun Rewi+ ake a koreaki araia n aia utu nako: mairouni Kerition, te utu aika tibuni Kerition, mairouni Koata,+ te utu aika tibuni Koata, mairouni Merari, te utu aika tibuni Merari. 58 Aikai utuia nako tibun Rewi: te utu aika tibun Ribeni,+ te utu aika tibun Eberon,+ te utu aika tibuni Maari,+ te utu aika tibuni Muti,+ te utu aika tibuni Kora.+

Ao Koata bon taman Amram.+ 59 Arani buun Amram bon Iokebeta,+ ae natin Rewi te aine, are e bungiaki i Aikubita. Ao e bungia natin Amram neie Iokebeta aika Aaron, Mote, ao mwaaneia are Miriam.+ 60 Imwina ao a a bungiaki natin Aaron aika Nataba, Abiu, Ereata, ao Itama.+ 61 Ma a mate Nataba ao Abiu bwa a angakarea n te ai ae aki kariaiakaki i matan Iehova.+

62 Botani mwaitiia ake a koreaki araia bon 23,000, aika mwaane ni kabane man te roro ae teuana te namwakaina ni waerake.+ Bwa a aki koreaki araia i buakoia tibun Iteraera,+ ibukina bwa akea tibwangaia ae a na anganaki i buakoia tibun Iteraera.+

63 Akanne te koraki ake a koreaki araia irouni Mote ma Ereata are te ibonga, ngke a korei araia tibun Iteraera n rereuani Moaba ake a aoraoi i rarikin te Ioretan n uakaan ma Ieriko. 64 Ma akea i buakoia ae e a kamani koreaki arana irouni Mote ma Aaron are te ibonga, n te wareaomata ibukia tibun Iteraera are e karaoaki n rereuan Tinai.+ 65 Bwa e taekinia ni kangai Iehova: “A na boni mate n te rereua.”+ Mangaia are akea te mwaane temanna ae tiku i buakoia ma tii Kareba are natin Iebunne ao Iotua are natin Nun.+

27 A roko ngkanne natin Terobeata aine,+ are natin Ebee, are natini Kireata, are natini Makira, are natini Manate, man ana utu nako Manate are natin Ioteba. Araia natina aine boni Maara, Noa, Okera, Mireka, ao Tireta. 2 A tei naakai i matani Mote ma Ereata are te ibonga* ao mataniwi,+ ao te botaki n aomata, i rarikini mataroan te umwa ni botaki, ao a taku: 3 “E mate tamara n te rereua, ma e aki mena i buakoia te koraki ake a ikotiia n ekaanako Iehova, ake taani boutokaa Kora,+ ma e mate i bon ibukin ana bure, ao akea natina mwaane. 4 E aera ngkai e riai ni mauna aran tamara mai buakoia ana utu ibukin ae akea natina te mwaane? Anganira tibwangara i buakoia tarin nako tamara.” 5 Mangaia are e tabeka aia tangitang Mote i matan Iehova.+

6 E taekina ngkanne ae kangai Iehova nakoni Mote: 7 “A eti natin Terobeata aine. Ko riai n angania tibwangaia ae a na bwaibwai iai mai buakoia tarin nako tamaia, ao karaaia tibwangan tamaia nakoia.+ 8 Ao tuangia tibun Iteraera ni kangai, ‘Ngkana e mate te aomata ao akea natina te mwaane, ao kam riai ni karaaia tibwangana nakon natina te aine. 9 Ma ngkana akea natina te aine, kam na anga tibwangana nakoia tarina. 10 Ao ngkana akea tarina, kam na anga tibwangana nakoia tarin tamana. 11 Ma ngkana akea tarin tamana, ao kam na anga tibwangana nakon ana koraki ae te kabanea ni kaan nakoina n ana utu ae bon raraana, ao e na bwaibwai iai teuanne. E na riki aei bwa te tua rinanon te moti ibukia tibun Iteraera, n aron are e tua Iehova nakoni Mote.’”

12 Ao e taku Iehova nakoni Mote: “Ararakea maungan Abarim aei,+ ao taraa te aba are N na angania tibun Iteraera.+ 13 Ngkana ko a tia n noria ao ko na ikotaki naba ma am koraki,*+ n aron Aaron are tarim,+ 14 bwa ngke a ngurengure nakoiu te botaki n aomata n rereuan Tiin, ao kam karitei nakon te baere I tua ibukini katabuau i mataia aomata ni kaineti ma te ran.+ Aei bon ranin Meriba+ i Kateti+ are n rereuan Tiin.”+

15 E taku ngkanne Mote nakon Iehova: 16 “Ke e rinea te mwaane temanna bwa e na mataniwina te botaki n aomata, Iehova ae te Atua ae anga te maiu* nakoia aomata nako, 17 are e na otinako ao n rin i mataia ao ni kairiia n nako ao ni kairiia n oki, bwa e aonga n aki riki ana botaki n aomata Iehova bwa kaanga ai aroia tiibu aika akea te tia kawakinia.” 18 Mangaia are e taku Iehova nakoni Mote: “Kaira Iotua are natin Nun, ae te mwaane ae kaotia n aroarona bwa e konabwai, ao kaaki baim i aona.+ 19 Ao kateia i matan Ereata are te ibonga ao i matan te botaki n aomata, ao ko na mwiokoia bwa te tia kairiri, i mataia.+ 20 Ko na kaaki i aona teutana mwaakam,*+ bwa a aonga n ongo irouna te botaki n aomata aika tibun Iteraera.+ 21 E na tei i matan Ereata are te ibonga, are e na titirakina Iehova ibukin teuaei rinanon te Urim ibukin ataakin te moti.+ E na iraki are e tua irouia aomata nako, irouna ao tibun Iteraera ni kabane ao te botaki n aomata.”

22 Mangaia are e karaoa Mote are e tua nakoina Iehova. E kaira Iotua ao e kateia i matan Ereata are te ibonga ao i matan te botaki n aomata, 23 ao e kaaki baina i aona ao e mwiokoia bwa te tia kairiri,+ n aron are e taekinna Iehova rinanoni Mote.+

28 Imwina ao e taku Iehova nakoni Mote: 2 “Ko na tua ae kangai nakoia tibun Iteraera, ‘Kam riai n taraa raoi aromi n anga te karea nakoiu ae te amwarake. A riai ni karaoaki raoi n taia aika baireaki, karea ibukiu aika kareanaki n te ai bwa te boi ae boiarara* irou.’+

3 “Ao kangai nakoia, ‘Aio te karea ae kareanaki n te ai ae kam na anga nakon Iehova: uoman te tiibutetei aika mwaane aika marurung raoi aika kaka teuana aia ririki, ni katoabong bwa te karea ni kabuekaki are kakareanaki.+ 4 Ko na kareana temanna te tiibutetei ae te mwaane n te ingabong, ao temanna te tiibutetei ae te mwaane n te airoo,*+ 5 n ikotaki ma teuana katebwinani mwakoron te eba* ni burawa ae mte ae renganaki ma te oera ae te kaamwakoro te in* man oriwa aika ikaki, bwa te karea ae te amwarake.+ 6 Bon te karea ni kabuekaki are kakareanaki,+ are e kamatoaaki n te Maunga are Tinai bwa te boi ae boiarara,* ae te karea ae kareanaki n te ai nakon Iehova, 7 ao raona ae te karea ae te moi, ae te kaamwakoro te in ibukini kaka temanna te tiibutetei ae te mwaane.+ Kabwaroa te moi ae te kamanging n te tabo ae tabu bwa te karea ae te moi nakon Iehova. 8 Ao ko na kareana te tiibutetei ae te mwaane are temanna riki n te airoo.* Ko na anga bwa te karea ae kareanaki n te ai, bwa te boi ae boiarara* iroun Iehova, ma te karea naba are te amwarake are karaoaki n te ingabong, ao raona are te karea are te moi.+

9 “‘Ma n te bongi n Taabati,+ ao e riai ni kareanaki uoman te tiibutetei aika mwaane aika marurung raoi aika kaka teuana aia ririki, ao uoua katebwinani mwakoron te bwai ni baire ae te eba te burawa ae mte ae renganaki ma te oera, bwa te karea ae te amwarake, n ikotaki ma raona ae te karea ae te moi. 10 Aio te karea ni kabuekaki ibukin te bongi n Taabati, n ikotaki ma te karea ni kabuekaki are kakareanaki, ao raona ae te karea ae te moi.+

11 “‘Ni moan nako taian namwakaina,* ao kam na kakareana te karea ni kabuekaki nakon Iehova, aika kaao mwaane aika ataei aika uoman, temanna te tiibu mwaane, ao itiman te tiibutetei aika mwaane aika marurung raoi aika kaka teuana aia ririki,+ 12 ao tenua katebwinani mwakoron te bwai ni baire te burawa ae mte ae renganaki ma te oera bwa te karea ae te amwarake+ ibukini kaka temanna te kao mwaane, ao uoua katebwinani mwakoron te bwai ni baire te burawa ae mte ae renganaki ma te oera bwa te karea ae te amwarake ibukin temanna te tiibu mwaane,+ 13 ao teuana katebwinani mwakoron te bwai ni baire te burawa ae mte ae renganaki ma te oera bwa te karea ae te amwarake, ibukini kaka temanna te tiibutetei ae te mwaane, bwa te karea ni kabuekaki, ae te boi ae boiarara,*+ ae te karea ae kareanaki n te ai nakon Iehova. 14 Ao a riai n raonaki n te karea ae te moi ae te iterana te in ni wain ibukin te kao mwaane,+ ao katenimwakoron te in ibukin te tiibu mwaane,+ ao te kaamwakoro te in ibukin te tiibutetei ae te mwaane.+ Aio te karea ni kabuekaki n te namwakaina, ae katoa namwakaina i nanon te ririki. 15 E riai naba ni kareanaki temanna te kooti ae ataei bwa te karea ni kabwarabure nakon Iehova, irarikin te karea ni kabuekaki are kakareanaki ma raona ae te karea ae te moi.

16 “‘N te moan namwakaina, ae 14 iai bongin te namwakaina, ao bon Ana Toa ae te Riao Iehova.+ 17 Ao e na iai te toa n 15 iai bongin te namwakaina aei. A na kanaki bwerena aika aki karikaki i nanon itibong.+ 18 N te moani bong ao e na iai te bwabwaro ae tabu. Kam na tai karaoa te mwakuri teuana ae rawawata. 19 Ao kam na anga bwa te karea ni kabuekaki ae kareanaki n te ai nakon Iehova, kaao mwaane aika ataei aika uoman, temanna te tiibu mwaane, ao itiman te tiibutetei aika mwaane aika kaka teuana aia ririki. Kam riai ni kareania maan aika marurung raoi.+ 20 Kam riai ni kareani ma raoia ae te karea ae te amwarake ae te burawa ae mte ae renganaki ma te oera,+ ae tenua katebwinani mwakoron te bwai ni baire ibukin te kao mwaane, ao uoua katebwinani mwakoron te bwai ni baire ibukin te tiibu mwaane. 21 Ao ko na kareana teuana katebwinani mwakoron te bwai ni baire, ibukini kaka temanna te tiibutetei aika mwaane aika itiman, 22 n ikotaki naba ma temanna te kooti bwa te karea ni kabwarabure, ibukini karekeani kabwaraan ami bure. 23 Kam na anga baikanne, irarikin te karea ni kabuekaki are n te ingabong, are ibukin te karea ni kabuekaki ae kakareanaki. 24 Kam riai ni kakareana te amwarake ae te karea ae kareanaki n te ai, bwa te boi ae boiarara* iroun Iehova, n aron anne ni katoabong i nanon itibong. E riai ni kareanaki irarikin te karea ni kabuekaki are kakareanaki ao raona ae te karea ae te moi. 25 Ao n te kaitiua ni bong, kam riai ni karaoa te bwabwaro ae tabu.+ Kam na tai karaoa te mwakuri teuana ae rawawata.+

26 “‘Kam riai ni karaoa te bwabwaro ae tabu ae te toa ae taiani wiki,+ ni bongini moan uaanikai aika tawaa,+ n te tai are kam anga iai te karea ae te amwarake ae boou nakon Iehova.+ Kam na tai karaoa te mwakuri teuana ae rawawata.+ 27 Kam na anga bwa te karea ni kabuekaki ae te boi ae boiarara* iroun Iehova, kaao mwaane aika ataei aika uoman, temanna te tiibu mwaane, ao itiman te tiibutetei aika mwaane aika kaka teuana aia ririki,+ 28 ao raoia ae te karea ae te amwarake ae te burawa ae mte ae renganaki ma te oera, ae tenua katebwinani mwakoron te bwai ni baire ibukini kaka temanna te kao mwaane, ao uoua katebwinani mwakoron te bwai ni baire ibukin temanna te tiibu mwaane, 29 ao teuana katebwinani mwakoron te bwai ni baire ibukini kaka temanna te tiibutetei aika mwaane aika itiman, 30 n ikotaki naba ma temanna te kooti ae ataei ibukini karekeani kabwaraan ami bure.+ 31 Kam na anga baikanne ma raoia ae te karea ae te moi, n ikotaki ma te karea ni kabuekaki are kakareanaki ma raona are te karea ae te amwarake. A riai ni marurung raoi maan akanne.+

29 “‘Kam riai ni karaoa te bwabwaro ae tabu n te kaitiua n namwakaina ae teuana iai bongin te namwakaina. Kam na tai karaoa te mwakuri teuana ae rawawata.+ Bon te bong ae kam riai ni katanga iai te buu.+ 2 Kam na anga temanna te kao mwaane ae ataei, temanna te tiibu mwaane, ao itiman te tiibutetei aika mwaane aika kaka teuana aia ririki, aika a bane ni marurung raoi, bwa te karea ni kabuekaki ae te boi ae boiarara* iroun Iehova. 3 Ao raoia ae te karea ae te amwarake ae te burawa ae mte ae renganaki ma te oera, ae tenua katebwinani mwakoron te bwai ni baire ae te eba ibukin te kao mwaane, ao uoua katebwinani mwakoron te bwai ni baire ibukin te tiibu mwaane, 4 ao teuana katebwinani mwakoron te bwai ni baire ibukini kaka temanna te tiibutetei aika mwaane aika itiman, 5 ao temanna te kooti mwaane ae ataei bwa te karea ni kabwarabure, ibukini karekeani kabwaraan ami bure, 6 n ikotaki ma te karea ni kabuekaki are katoa namwakaina ma raona ae te karea ae te amwarake,+ ao te karea ni kabuekaki are kakareanaki ma raona ae te karea ae te amwarake,+ n ikotaki ma raoia ae te karea ae te moi,+ ni kaineti ma aron tuaia, bwa te boi ae boiarara,* ae te karea ae kareanaki n te ai nakon Iehova.

7 “‘Ao kam riai ni karaoa te bwabwaro ae tabu n tebwina iai bongin te kaitiua n namwakaina+ ao kam na kaota nanokawakimi.* Kam na tai karaoa te mwakuri teuana.+ 8 Ao kam na anga temanna te kao mwaane ae ataei, temanna te tiibu mwaane, ao itiman te tiibutetei aika mwaane aika kaka teuana aia ririki, aika a bane ni marurung raoi, bwa te karea ni kabuekaki nakon Iehova, bwa te boi ae boiarara.*+ 9 Ao raoia ae te karea ae te amwarake, ae tenua katebwinani mwakoron te bwai ni baire te burawa ae mte ae renganaki ma te oera ibukin temanna te kao mwaane, ao uoua katebwinani mwakoron te bwai ni baire ibukin temanna te tiibu mwaane, 10 ao teuana katebwinani mwakoron te bwai ni baire ibukini kaka temanna te tiibutetei aika mwaane aika itiman, 11 n ikotaki ma temanna te kooti ae ataei bwa te karea ni kabwarabure, irarikin te karea ni kabwarabure are ibukini karekeani kabwaraani buure,+ ao te karea ni kabuekaki are kakareanaki ma raona ae te karea ae te amwarake, n ikotaki naba ma raoia ae te karea ae te moi.

12 “‘Ao kam riai ni karaoa te bwabwaro ae tabu n 15 iai bongin te kaitiua n namwakaina. Kam na tai karaoa te mwakuri teuana ae rawawata, ao kam riai ni bukamarua te toa nakon Iehova i nanon itibong.+ 13 Ao kam na anga kaao mwaane aika ataei aika 13, tiibu mwaane aika 2, ao 14 te tiibutetei aika mwaane aika kaka teuana aia ririki, aika a bane ni marurung raoi,+ bwa te karea ni kabuekaki,+ bwa te karea ae kareanaki n te ai ae te boi ae boiarara* iroun Iehova. 14 Ao raoia ae te karea ae te amwarake, ae tenua katebwinani mwakoron te bwai ni baire te burawa ae mte ae renganaki ma te oera ibukini kaka temanna te kao mwaane aika 13, ao uoua katebwinani mwakoron te bwai ni baire ibukini kaka temanna te tiibu mwaane aika 2, 15 ao teuana katebwinani mwakoron te bwai ni baire ibukini kaka temanna te tiibutetei aika mwaane aika 14, 16 n ikotaki ma temanna te kooti ae ataei bwa te karea ni kabwarabure, irarikin te karea ni kabuekaki are kakareanaki, ma raona ae te karea ae te amwarake ao te karea ae te moi.+

17 “‘Ao n te kauoua ni bong kam na anga kaao mwaane aika ataei aika 12, tiibu mwaane aika 2, ao 14 te tiibutetei aika mwaane aika kaka teuana aia ririki, aika a bane ni marurung raoi,+ 18 ao raoia ae te karea ae te amwarake ao te karea ae te moi ibukia kaao mwaane, tiibu mwaane, ao tiibutetei aika mwaane ni kaineti ma are boni mwaitiia n aron tuana, 19 n ikotaki ma temanna te kooti ae ataei bwa te karea ni kabwarabure, irarikin te karea ni kabuekaki are kakareanaki, ma raona ae te karea ae te amwarake, n ikotaki ma raoia ae te karea ae te moi.+

20 “‘Ao n te katenua ni bong kam na anga kaao mwaane aika 11, tiibu mwaane aika 2, ao 14 te tiibutetei aika mwaane aika kaka teuana aia ririki, aika a bane ni marurung raoi,+ 21 ao raoia ae te karea ae te amwarake ao te karea ae te moi ibukia kaao mwaane, tiibu mwaane, ao tiibutetei aika mwaane ni kaineti ma are boni mwaitiia n aron tuana, 22 n ikotaki ma temanna te kooti bwa te karea ni kabwarabure, irarikin te karea ni kabuekaki are kakareanaki, ma raona ae te karea ae te amwarake ao te karea ae te moi.+

23 “‘Ao n te kaaua ni bong kam na anga kaao mwaane aika 10, tiibu mwaane aika 2, ao 14 te tiibutetei aika mwaane aika kaka teuana aia ririki, aika a bane ni marurung raoi,+ 24 ao raoia ae te karea ae te amwarake ao te karea ae te moi ibukia kaao mwaane, tiibu mwaane, ao tiibutetei aika mwaane ni kaineti ma are boni mwaitiia n aron tuana, 25 n ikotaki ma temanna te kooti ae ataei bwa te karea ni kabwarabure, irarikin te karea ni kabuekaki are kakareanaki, ma raona ae te karea ae te amwarake ao te karea ae te moi.+

26 “‘Ao n te kanimaua ni bong kam na anga kaao mwaane aika 9, tiibu mwaane aika 2, ao 14 te tiibutetei aika mwaane aika kaka teuana aia ririki, aika a bane ni marurung raoi,+ 27 ao raoia ae te karea ae te amwarake ao te karea ae te moi ibukia kaao mwaane, tiibu mwaane, ao tiibutetei aika mwaane ni kaineti ma are boni mwaitiia n aron tuana, 28 n ikotaki ma temanna te kooti bwa te karea ni kabwarabure, irarikin te karea ni kabuekaki are kakareanaki, ma raona ae te karea ae te amwarake ao te karea ae te moi.+

29 “‘Ao n te kaonoua ni bong kam na anga kaao mwaane aika 8, tiibu mwaane aika 2, ao 14 te tiibutetei aika mwaane aika kaka teuana aia ririki, aika a bane ni marurung raoi,+ 30 ao raoia ae te karea ae te amwarake ao te karea ae te moi ibukia kaao mwaane, tiibu mwaane, ao tiibutetei aika mwaane ni kaineti ma are boni mwaitiia n aron tuana, 31 n ikotaki ma temanna te kooti bwa te karea ni kabwarabure, irarikin te karea ni kabuekaki are kakareanaki, ma raona ae te karea ae te amwarake ao te karea ae te moi.+

32 “‘Ao n te kaitiua ni bong kam na anga kaao mwaane aika 7, tiibu mwaane aika 2, ao 14 te tiibutetei aika mwaane aika kaka teuana aia ririki, aika a bane ni marurung raoi,+ 33 ao raoia ae te karea ae te amwarake ao te karea ae te moi ibukia kaao mwaane, tiibu mwaane, ao tiibutetei aika mwaane ni kaineti ma are boni mwaitiia n aron tuana, 34 n ikotaki ma temanna te kooti bwa te karea ni kabwarabure, irarikin te karea ni kabuekaki are kakareanaki, ma raona ae te karea ae te amwarake ao te karea ae te moi.+

35 “‘N te kawanua ni bong, kam riai ni karaoa te botaki ae okoro. Kam aki riai ni karaoa te mwakuri teuana ae rawawata.+ 36 Kam na anga temanna te kao mwaane, temanna te tiibu mwaane, ao itiman te tiibutetei aika mwaane aika kaka teuana aia ririki, aika a bane ni marurung raoi, bwa te karea ni kabuekaki, ae te karea ae kareanaki n te ai, bwa te boi ae boiarara* iroun Iehova.+ 37 Ao raoia ae te karea ae te amwarake ao te karea ae te moi ibukin te kao mwaane, te tiibu mwaane, ao tiibutetei aika mwaane ni kaineti ma are boni mwaitiia n aron tuana, 38 n ikotaki ma temanna te kooti bwa te karea ni kabwarabure, irarikin te karea ni kabuekaki are kakareanaki, ma raona ae te karea ae te amwarake ao te karea ae te moi.+

39 “‘Kam na kareani baikanne nakon Iehova n ami toa aika motikaki taia,+ irarikin ami karea ake kam anga ibukin ami taetae ni bau,+ ao ami karea ni kan anga+ bwa ami karea ni kabuekaki+ ao ami karea ae te amwarake+ ao ami karea ae te moi+ ao ami karea n raoi.’”+ 40 Ao Mote e tuangia tibun Iteraera bwaai nako ake e tua Iehova nakoina.

30 E taetae ngkanne Mote nakoia mataniwi+ n aia baronga nako tibun Iteraera ni kangai: “Aio te taeka ae e tua Iehova: 2 Ngkana e taetae ni bau te mwaane+ nakon Iehova, ke ngkana e taetae n tuea+ ni kabaea i bon irouna n te taetae ni bau bwa e na rawa nakon te bwai teuana, ao e na aki urua ana taeka.+ E riai ni karaoi bwaai nako ake e taetae ni bau bwa e na karaoi.+

3 “Ao ngkana e taetae ni bau te aine nakon Iehova ke e kabaea i bon irouna n te taetae ni bau teuana bwa e na rawa nakon te bwai teuana, n ana tai n ataei ao ni maeka n ana auti tamana, 4 ao e ongo taman neiei ana taetae ni bau ke ana taetae ni bau ae e kabaea iai i bon irouna bwa e na rawa nakon te bwai teuana, ao e aki tukia tamana, ao a na bane ni kakoroaki bukin ana taetae ni bau, ao a na bane ni kakoroaki bukin ana taetae ni bau ake e a tia ni kabaea iai i bon irouna bwa e na rawa nakon te bwai teuana. 5 Ma ngkana e tukia tamana ngke e ongo ae e taetae ni bau ke e taetae ni bau neiei ni kabaea i bon irouna bwa e na rawa nakon te bwai teuana, ao e na aki kakoroaki bukina. Ao Iehova e na kabwaraa ana bure neiei ibukina bwa e tukia tamana.+

6 “Ma ngkana e mare neiei ao iai ana taetae ni bau teuana ae e bae iai, ke ana berita i bon irouna are e kabaea iai n aki iangoia raoi, 7 ao e ongo buuna ao e aki tukia n te bong are e ongo iai, ao e na kakoroaki bukin ana taetae ni bau ke ana taetae ni bau are e kabaea iai i bon irouna bwa e na rawa nakon te bwai teuana. 8 Ma ngkana e tukia buuna n te bong are e ongo iai, ao e kona teuarei ni kamauna te taetae ni bau ke te berita are e aki iangoia raoi neiei ngke e kabaea iai i bon irouna,+ ao Iehova e na kabwaraa ana bure neiei.

9 “Ma ngkana e taetae ni bau te aine ae e a tia ni mate buuna ke te aine ae e a tia ni buuraure buuna ma ngaia, e riai ni kakoroi bukini bwaai ni kabane ake e kabaea iai i bon irouna.

10 “Ma ngkana e taekina ana taetae ni bau te aine i nanon ana auti buuna ke ana taetae ni bau i bon irouna bwa e na rawa nakon te bwai teuana, 11 ao e ongo ana taetae ni bau anne buuna ao e aki totokoia ke n rawa iai, ao a na kakoroaki bukin ana taetae ni bau ni kabane ke ana taetae ni bau i bon irouna bwa e na rawa nakon te bwai teuana. 12 Ma ngkana e boni kamaunai buun neiei, ana taetae ni bau nako neiei n te bong are e ongo iai, ke ana taetae ni bau i bon irouna bwa e na rawa nakon te bwai teuana, are e tuea iai, ao a na aki kakoroaki bukia.+ E kamaunai buun neiei ao Iehova e na kabwarai ana bure neiei. 13 Ni kaineti ma te taetae ni bau teuana ke te berita teuana ae irekereke ma ana taetae ni bau neiei i bon irouna bwa e na rawa nakon te bwai teuana, ke e na aki karaoa te bwai teuana, e riai buun neiei ni kamatoaa ke e riai ni kamauna. 14 Ma ngkana akea naba teutana ana taeka n totoko buun neiei n te bong teuana ma teuana, e kamatoai naba ngkanne teuaei ana taetae ni bau neiei ni kabane, ke ana taetae ni bau ni kabane neiei ake a boni mena i aona, ngke e tuea i bon irouna bwa e na rawa nakon te bwai teuana. E kamatoai ibukina bwa e aki totokoia n te bong are e ongo iai bwa e taekin neiei. 15 Ma ngkana e kamaunai teuanne imwina riki, tabeua te tai imwin te bong are e ongoraei iai, ao e na bukinaki n ana bure neiei.+

16 “Aikai tuua ake e tua Iehova nakoni Mote ni kaineti ma te buu te mwaane ao buuna, ao ni kaineti ma te tama ao natina te aine ae ataei ae maeka n ana auti.”

31 Ao Iehova e tuanga Mote ni kangai: 2 “Ko na irii taangaia+ tibun Iteraera ni kaaitaraia tibuni Mirian.+ Imwin anne ao ko na ikotaki ma am koraki.”*+

3 Mangaia are e taetae Mote nakoia aomata ni kangai: “Kataubobongaia mwaane mai buakomi ibukin te buaka* ni kaaitaraia tibuni Mirian, ao ni karokoa ana karekekai Iehova i aoia tibuni Mirian. 4 Kam riai ni kanakoia nakon te taanga ni buaka kaka 1,000 man te baronga teuana ma teuana, mai buakon aia baronga nako tibun Iteraera.” 5 Mangaia are a rineaki kaka 1,000 man te baronga teuana ma teuana mai buakoia tibun Iteraera+ aika nga ma nga, ao bon 12,000 ake a kataubobongaaki ibukin te buaka.*

6 Ao e kanakoia Mote 1,000 man te baronga teuana ma teuana nakon te taanga ni buaka, n ikotaki ma Bineati+ are te ibonga* ibukin te taanga ni buaka, are natin Ereata, are a mena i nanoni baina bwaai ni mwakuri aika tabu ao taiani buu ibukin te kanikina.+ 7 A buakania tibuni Mirian n aron are e tua Iehova nakoni Mote, ao a tiringia mwaane ni kabane. 8 I buakoia ake a tiringaki, a tiringia naba aia uea tibuni Mirian ake Ewi, Rekem, Tura, Uura, ao Reba, ake aia uea tibuni Mirian ake niman. A tiringa naba Baraam+ are natini Beora n te kabaang. 9 Ma tibun Iteraera a kairiianako tibuni Mirian aika aine ma ataei bwa taenikai. A kuribwai naba aia man aika manana ni kabane, ao aia nanai ni man ni kabane, ao aia bwai ni kabane. 10 Ao a kabueki n te ai aia kaawa ni kabane ake a maeka iai, ao aia kaembwa* ni kabane. 11 Ao a anai bwaai ni kabane ake konaia n te buaka ma bwaai ni kuri ni kabane, aika aomata ma maan. 12 Ao a kairiia taenikai, ma bwaai ni kuri, ao konaia n te buaka, nakoni Mote ma Ereata are te ibonga ao nakon te botaki n aomata aika tibun Iteraera, ake n te kaembwa, n rereuani Moaba ake a aoraoi,+ i rarikin te Ioretan n uakaan ma Ieriko.

13 Ao e teirake Mote ma Ereata are te ibonga ao mataniwi ni kabane n te botaki n aomata, ao a nako ni kawariia i tinanikun te kaembwa. 14 Ma e un Mote irouia mwaane ake a mwiokoaki i buakoia kaain te taanga ni buaka, ake mataniwi i aoia kaka teuana tenga, ao mataniwi i aoia kaka tebubua, ake a a oki man te buaka. 15 E taku Mote nakoia: “Kam kamaiuia aine ni kabane? 16 Noria! Boni ngaiia ake a anai nanoia tibun Iteraera i aan ana taeka Baraam, bwa a na aki kakaonimaki+ nakon Iehova n te baere karaoaki ni kaineti ma Beore,+ n te aro are e a roko te aoraki ae kamamate i aon ana botaki n aomata Iehova.+ 17 Kam riai ngkai n tiringia mwaane nako mai buakoia ataei, ao tiringia aine nako ake a a tia ni wene n taanga ma te mwaane. 18 Ma kam na kamaiuia ateiaine ni kabane aika tuai ni wene n taanga ma te mwaane.+ 19 Ao kam riai ni kaembwa i tinanikun te kaembwa i nanon itibong. Ngkami nako ake kam a tia n tiringa temanna* ao ngkami nako ake kam a tia n ringa te aomata ae tiringaki,+ kam riai ni kaitiakingkami+ n te katenua ni bong ao n te kaitiua ni bong, ngkami ma ami taenikai. 20 Ao kam riai ni kaitiakii kunnikai nako, bwaai nako aika karaoaki mani kunin te man, bwaai nako aika karaoaki mani buraen te kooti, ao bwaai nako aika karaoaki man te kai.”

21 E taku ngkanne Ereata are te ibonga nakoia mwaanen te taanga ni buaka ake a nako ni buaka: “Aio te tua ae e tua Iehova nakoni Mote, 22 ‘Tii te koora, te tirewa, te buraati, te biti, te bititaom, ao te buange, 23 ake bwaai nako ake a kona n rinanon te ai ao a aki bue, ae kam riai ni kaaki rinanon te ai ao a na itiaki. Ma a riai naba ni kaitiakaki n te ran ibukin te kaitiaki.+ Kam riai ni kaaki rinanon te ran, bwaai nako ake a kona ni bue n te ai. 24 Ao kam riai ni kaitiakii kunnikaimi n te kaitiua ni bong ao kam na itiaki, ao kam a kona ngkanne n rin n te kaembwa.’”+

25 E taekina ngkanne ae kangai Iehova nakoni Mote: 26 “Korei ni karinani bwaai ni kuri, ni warekiia taenikai aika aomata ma maan. Karaoa aei ma Ereata are te ibonga ao te botaki n aomata ake a mataniwi i aoia aia koraki mairoun tamaia. 27 Kaokoroi nakon uoua te tibwa bwaai ake a kuribwaiaki, bwa a na tibwaaki i marenaia kaain te taanga ni buaka ake a ira te buaka, ao nikiran te botaki n aomata.+ 28 Ko riai n anaa te taekiti ibukin Iehova mairouia tautia ake a ira te buaka, ae temanna mai buakoia aomata, kaao, taongki, ao tiibu ma kooti, aika kaka 500. 29 Kam riai n anaia man tibwangaia ao angan Ereata are te ibonga, bwa te angabwai nakon Iehova.+ 30 Man tibwangaia ngkanne tibun Iteraera ake a anganaki, ko riai naba n anaa temanna mai buakoia aomata, kaao, taongki, tiibu ma kooti, ao maan nako aika manana, aika kaka 50, ao angania tibun Rewi+ ake a tabe ma mwakuri aika irekereke ma ana umwanrianna ae tabu* Iehova.”+

31 Mangaia are a karaoia Mote ma Ereata are te ibonga, n aron are e tua Iehova nakoni Mote. 32 Ao mwaitini konaia ni buaka ake nikirani bwaai ni kuri ake a anai aomata ake a ira te buaka, bon 675,000 tiibu ma kooti, 33 72,000 kaao, 34 ao 61,000 taongki. 35 Mwaitiia aine* ake a tuai ni wene n taanga ma te mwaane+ bon 32,000. 36 Ao mwaitin te tibwa are tibwangaia te koraki ake a ira buakon te buaka, bon 337,500 tiibu ma kooti. 37 Mwaitin te taekiti ibukin Iehova mai buakoia tiibu ma kooti bon 675. 38 Ao mwaitiia kaao bon 36,000, ao te taekiti ibukin Iehova mai buakoia bon 72. 39 Ao mwaitiia taongki bon 30,500, ao te taekiti ibukin Iehova mai buakoia bon 61. 40 Ao mwaitiia aomata bon 16,000, ao te taekiti ibukin Iehova mai buakoia bon 32 aomata.* 41 E anga ngkanne te taekiti Mote bwa te angabwai ibukin Iehova nakon Ereata are te ibonga,+ n aron are e tua Iehova nakoni Mote.

42 Aio te tibwanga are aia bwai tibun Iteraera are e a tia n tibwaia Mote man tibwangaia mwaane ake a buaka: 43 mwaitin te tiibu ma te kooti n te tibwanga anne bon 337,500, 44 ao 36,000 kaao, 45 ao 30,500 taongki, 46 ao 16,000 aomata.* 47 Ao e anaa temanna Mote mai buakoia aomata ao maan, aika kaka 50, man tibwangaia tibun Iteraera, ao e angania tibun Rewi+ ake a tabe ma te mwakuri n ana umwanrianna ae tabu Iehova,+ n aron are e tua Iehova nakoni Mote.

48 A kawara ngkanne Mote mwaane ake a mwiokoaki i buakoia kaain te taanga ni buaka aika nga ma nga,+ ake mataniwi i aoia kaka teuana tenga ao mataniwi i aoia kaka tebubua, 49 ao a taku nakoni Mote: “A a tia am toro ni wareki mwaitiia mwaane aika taani buaka ake a mena i aan ara kairiri, ao akea temanna mairoura ae taekinaki bwa e bua.+ 50 Mangaia ae kariaia temanna ma temanna i buakora bwa e na anga te bwai ae reke irouna bwa te karea nakon Iehova, ae baika karaoaki man te koora, tauaniwae, tauanibai, mwaamwa aika kanikina, taabia, ao bwaai ni katamaroa riki tabeua, ibukini karekeani kabwaraan ara bure i matan Iehova.”

51 Ao Mote ma Ereata are te ibonga a butimwaea te koora mairouia ma bwaai ni katamaroa ni kabane. 52 Mwaitin te koora ni kabane are te angabwai are a angan Iehova bon 16,750 te tiekera,* are e reke mairouia mataniwi i aoia kaka teuana tenga, ao mataniwi i aoia kaka tebubua. 53 A bane n reke tibwangaia mwaane ake taani buaka, mani bwaai ni kuri. 54 A butimwaea te koora Mote ma Ereata are te ibonga, mairouia mataniwi i aoia kaka teuana tenga ao i aoia kaka tebubua, ao a uotia nakon te umwa ni botaki, bwa te bwai ni kauring ibukia tibun Iteraera i matan Iehova.

32 Ao a rangi ni mwaiti aia nanai ni man tibun Reuben+ ma tibuni Kata,+ ao a noria bwa e raoiroi aonon aaba aika Iatera+ ao Kireata ibukin te nanai ni man. 2 Ngaia are a kawara Mote ma Ereata are te ibonga* ao mataniwi n te botaki n aomata, tibuni Kata ma tibun Reuben ao a taku: 3 “Ti nora Atarota, Ribon, Iatera, Nimra, Etiibon,+ Ereare, Tebam, Nebo,+ ao Beon,+ 4 are te aba are e kataenikaia Iehova i matan te botaki n aomata aika tibun Iteraera,+ bwa te aba ae raoiroi ibukin te nanai ni man, ao a bati aia nanai ni man am toro.”+ 5 A reitia ni kangai: “Ngkana e reke akoara i matam, ao a bia anganaki am toro te aba anne bwa abaia. Tai kamwanangaira n rinanon te Ioretan nakon iterana are teuana.”

6 E taku ngkanne Mote nakoia tibuni Kata ma tibun Reuben: “E koaua bwa a na nako ni buaka tarimi ao ngkami kam tiku ikai? 7 E aera ngkai kam na kabwarai nanoia tibun Iteraera bwa a na aki nakon te itera are teuana n rin n te aba are e na bon angania Iehova? 8 Anne te bae a karaoia tamami ngke I kanakoia mai Katetibaanea bwa a na nora te aba.+ 9 Ngke a nakon te Mwarua ae Etikora+ ao a nora te aba, ao a kabwarai nanoia tibun Iteraera bwa a na aki rinnako n te aba are e na angania Iehova.+ 10 E urarake unin Iehova n te bong anne ao e taetae n tuea+ ni kangai: 11 ‘A na aki nora te aba+ are I taetae n tuea ibukina nakon Aberaam, Itaaka, ao Iakoba,+ mwaane ake a otinako mai Aikubita ake kaka 20 rake aia ririki, ibukina bwa a aki irirai ma nanoia ni kabane, 12 ma tii Kareba+ are natin Iebunne are te Kenitaite, ao Iotua+ are natin Nun, ibukina bwa a irira Iehova ma nanoia ni kabane.’+ 13 Mangaia are e urarake unin Iehova nakoia tibun Iteraera ao e katiotionakoia n te rereua i nanon 40 te ririki,+ ni karokoa ae a a bane n roko n tokia kaain te roro are a karaoa ae buakaka i matan Iehova.+ 14 Ao ngkami aika mwaane aika bubure, kam a karaoa ngkai ae titeboo ma are a karaoia tamami, ao kam karikirakea uraraken unin Iehova irouia tibun Iteraera. 15 Ngkana kam rairakinako man irirakina, ao e na boni manga kitania n te rereua, ao kam na karokoa te kamaunaaki i aoia aomata aikai ni kabane.”

16 Imwina riki ao a kawaria ao a taku: “Kariaia bwa ti na katei ikai oo ni man aika atibu ibukia ara nanai ni man, ao kaawa ibukia ara koraki n ataei. 17 Ma ti na teimatoa n tauraoi ibukin te buaka+ ao ti na rimoaia tibun Iteraera ni karokoa ae ti kairiia nakon aia tabo, ma a na maeka ara koraki n ataei ni kaawa aika nonoaki ni mano raoi mairouia kaain te aba. 18 Ti na aki okiri ara auti ni karokoa ae a reke tibwangaia tibun Iteraera n tatabemania nako n te aba.+ 19 Bwa ti na aki karekea tibwangara i rarikia n iteran te Ioretan are teuana ao n nako riki, ibukina bwa ti a tia ni karekea tibwangara i mainikun te Ioretan.”+

20 E kaekaia Mote ni kangai: “Ngkana kam na karaoa aei, ae kam anai ami bwai ni buaka i matan Iehova ibukin te buaka,+ 21 ao ngkana kam bane n anai ami bwai ni buaka ao n rinanon te Ioretan nakon iterana are teuana i matan Iehova, ngkai e kakioianako mai mwaina akana kairiribai nakoina,+ 22 ni karokoa ae e konaaki te aba anne i matan Iehova,+ kam a kona ngkanne imwina n oki+ ao n aki bure i matan Iehova ao tibun Iteraera. Ao e na riki te aba aei bwa abami i matan Iehova.+ 23 Ma ngkana kam aki karaoa aei, kam na bure iai nakon Iehova. Ao ngkana e riki anne, kam na ataia bwa kam na boni katuuaaeaki ibukin ami bure. 24 Mangaia ae kam kona ni katei kaawa ibukia ami koraki n ataei ao ooia ami nanai ni man,+ ma kam riai ni karaoa ae kam a tia ni beritanna.”

25 A taku tibuni Kata ma tibun Reuben nakoni Mote: “A na karaoia am toro n aron ae e tua ara toka. 26 A na tiku ni kaawan nako Kireata ara koraki n ataei, buura, ara nanai ni man, ao ara man ni kabane aika manana,+ 27 ma a na nakon iterana are teuana am toro aika bane n taubobonga nakon te buaka, bwa a na buaka i matan Iehova,+ n aron are e taekinna ara toka.”

28 Mangaia are e anga te tua Mote ibukia naakai nakon Ereata are te ibonga, ao nakon Iotua are natin Nun, ao nakoia te koraki ake mataniwi i aoia aia koraki mairoun tamaia, n aia baronga nako tibun Iteraera. 29 E taku Mote nakoia: “Ngkana a rinanon te Ioretan nako maeaona ma ngkami tibuni Kata ma tibun Reuben, ao a bane n taubobonga nakon te buaka i matan Iehova, ao e konaaki te aba anne i matami, kam na angania ngkanne te aba ae Kireata bwa abaia.+ 30 Ma ngkana a aki uotii bwaai ni buaka ao n nakon iterana are teuana ma ngkami, a na maeka ngkanne i buakomi n te aba ae Kanaan.”

31 A kaeka ni kangai tibuni Kata ma tibun Reuben: “Ti na karaoa are e a tia n taekinna Iehova nakoia am toro. 32 Ti na anai bwaai ni buaka ao ti na nakon iterana are teuana i matan Iehova nakon te aba ae Kanaan,+ ma tibwangara ae ti na bwaibwai iai e na mena n iteran te Ioretan aei.” 33 Ao Mote e angania tibuni Kata ma tibun Reuben,+ ao te itera ni baronga ae Manate+ are natin Ioteba, aban Taion+ are aia uea taian Amoraite, ao aban Oka+ are ueani Batian, ae te aba ma kaawana nako n aono akanne, ao kaawa nako n aaba ake a uakaan ma ngaia.

34 Ao tibuni Kata a katea* Ribon,+ Atarota,+ Aroera,+ 35 Aterotatioban, Iatera,+ Iokebea,+ 36 Betanimra,+ ao Betaaran,+ aika kaawa aika nonoaki, ao a katei oo ni man aika atibu ibukia nanai ni man. 37 Ao tibun Reuben a katea Etiibon,+ Ereare,+ Kiriataim,+ 38 Nebo,+ ao Baarameon,+ a bitaki araia, ao Tibema, ao a kabooui arani kaawa ake a a manga katei.

39 Ao a mwananga tibuni Makira+ are natini Manate n ekaanako Kireata ao a taua, ao a kakioianako taian Amoraite ake iai. 40 Mangaia are e anga Kireata* Mote nakoia tibuni Makira are natini Manate, ao a a maeka iai.+ 41 Ao e mwananga Iaira are kanoani Manate n ekiianako, ao e taui kaawa aika uarereke n aononi Kireata, ao e arani bwa Awotaiaira.*+ 42 Ao e mwananga Noba n ekaanako Kenata ao n taua ma kaawa ake a mena i aana,* ao e aranna ni bon arana ae Noba.

33 Aikai nako teini mwanangaia tibun Iteraera ngke a otinako man te aba are Aikubita,+ te korakina imwin te korakina,*+ i aan ana kairiri Mote ma Aaron.+ 2 E kokorei Mote mwin taabo ake a kitani ni mwamwanangaia ni kaineti ma are e tua Iehova, ao aikai nako teini mwanangaia man te tabo teuana nakon teuana:+ 3 A kitana Rameteti+ n te moan namwakaina ae 15 iai bongin te namwakaina.+ A otinako tibun Iteraera ma te aki maaku* i mataia I-Aikubita ni kabane, ni bon te bong naba are imwin te Toa ae te Riao.+ 4 N te tai anne are a kume iai I-Aikubita n taunia karimoa ni kabane, ake e kamateia Iehova i buakoia,+ bwa e karokoa ana motikitaeka Iehova i aoia atuaia.+

5 Mangaia are a kitana Rameteti tibun Iteraera ao a kaembwa i Tukota.+ 6 Ao a kitana Tukota ao a kaembwa i Etam,+ i aon tian te rereua. 7 Imwina ao a kitana Etam ao a oki rikaaki nako Biairota ae kaaitara ma Baaratebon,+ ao a kaembwa i moani Miketora.+ 8 Imwin anne ao a kitana Biairota ao a rinanon taari+ nakon te rereua,+ ao a teimatoa ni mwananga n rereuan Etam+ n te mwananga ae tenibong bongina, ao a kaembwa i Mara.+

9 A kitana ngkanne Mara ao a a roko i Erim. Iai 12 koburake n ran i Erim, ao 70 te aroka ae te baam, mangaia are a a kaembwa ikanne.+ 10 Imwina ao a kitana Erim ao a kaembwa i rarikin Taari ae Uraura. 11 Imwin anne ao a kitana Taari ae Uraura ao a kaembwa n rereuan Tin.+ 12 Ao a kitana rereuan Tin ao a kaembwa i Tobika. 13 Imwina riki ao a kitana Tobika ao a kaembwa i Aruti. 14 Imwina ao a kitana Aruti ao a kaembwa i Rebirim,+ ike akea iai te ran ibukin nimaia aomata. 15 Imwin anne ao a kitana Rebirim ao a kaembwa n rereuan Tinai.+

16 A kitana rereuan Tinai ao a kaembwa i Kiberotaataawa.+ 17 Ao a kitana Kiberotaataawa ao a kaembwa i Aterota.+ 18 Imwin anne ao a kitana Aterota ao a kaembwa i Ritema. 19 Imwina ao a kitana Ritema ao a kaembwa i Rimmonbereti. 20 A kitana ngkanne Rimmonbereti ao a kaembwa i Ribena. 21 A kitana Ribena ao a kaembwa i Rita. 22 Imwina ao a kitana Rita ao a kaembwa i Keerata. 23 Ao a kitana Keerata ao a kaembwa n te Maunga ae Tebera.

24 Imwin anne ao a kitana te Maunga ae Tebera ao a kaembwa i Arata. 25 A kitana ngkanne Arata ao a kaembwa i Makerota. 26 Imwina ao a kitana+ Makerota ao a kaembwa i Taata. 27 Imwin anne ao a kitana Taata ao a kaembwa i Tera. 28 Ao a kitana Tera ao a kaembwa i Miteka. 29 Imwina riki ao a kitana Miteka ao a kaembwa i Atimona. 30 Imwina ao a kitana Atimona ao a kaembwa i Moterota. 31 A kitana ngkanne Moterota ao a kaembwa i Beneiaakan.+ 32 Ao a kitana Beneiaakan ao a kaembwa i Oraakitekata. 33 Imwina ao a kitana Oraakitekata ao a kaembwa i Iotebata.+ 34 Imwina riki ao a kitana Iotebata ao a kaembwa i Aberona. 35 A kitana ngkanne Aberona ao a kaembwa i Etionkebera.+ 36 Imwin anne ao a kitana Etionkebera ao a kaembwa n rereuan Tiin,+ i Kateti.

37 Imwina riki ao a kitana Kateti ao a kaembwa n te Maunga ae Ora,+ n tian te aba ae Etom. 38 Ao e ararakea te Maunga ae Ora Aaron are te ibonga* ni kaineti ma are e tua Iehova, ao e mate ikanne n te ka-40 n ririki imwini kitanan te aba are Aikubita irouia tibun Iteraera, n te kanimaua n namwakaina ae teuana iai bongin te namwakaina.+ 39 Bon 123 ana ririki Aaron ngke e mate n te Maunga ae Ora.

40 Ao e ongo taekan rokoia tibun Iteraera uean Aratia+ ae tibuni Kanaan, ae maeka n te Nekebo* n te aba ae Kanaan.

41 Imwina riki ao a kitana te Maunga ae Ora+ ao a kaembwa i Taremona. 42 Imwin anne ao a kitana Taremona ao a kaembwa i Bunon. 43 Imwina ao a kitana Bunon ao a kaembwa i Obota.+ 44 Ao a kitana Obota ao a kaembwa i Iieabarim i aon tiani Moaba.+ 45 Imwina riki ao a kitana Iim ao a kaembwa i Ribonkata.+ 46 Imwin anne ao a kitana Ribonkata ao a kaembwa i Aremonriberataim. 47 A kitana ngkanne Aremonriberataim ao a kaembwa ni maunga ake i Abarim+ i moan Nebo.+ 48 N tokina ao a kitani maunga ake i Abarim ao a kaembwa n rereuani Moaba ake a aoraoi, i rarikin te Ioretan n uakaan ma Ieriko.+ 49 A tiku ni kaembwa i rarikin te Ioretan mai Betaietimota ni karokoa Aberatitim,+ n rereuani Moaba ake a aoraoi.

50 E taetae Iehova nakoni Mote n rereuani Moaba ake a aoraoi, i rarikin te Ioretan n uakaan ma Ieriko, ao e kangai: 51 “Taetae nakoia tibun Iteraera ao tuangia ni kangai, ‘Kam a rinanon te Ioretan nakon iterana are teuana nakon te aba ae Kanaan.+ 52 Kam riai ni kakioianako kaain te aba anne ni kabane mai mwaimi, ao ni kamaunai aia atibu aika kaaraki ni kabane,+ ao aia bouannanti ni kabane aika biiti,*+ ao kam riai n urui aia tabo ni kabane aika rietata aika tabu.+ 53 Ao kam na taua te aba anne bwa abami ao ni maeka iai, ibukina bwa N na bon anganingkami te aba anne bwa abami.+ 54 Kam riai n tibwatibwaa te aba nakoia ami utu bwa aia bwai rinanon te kanikina* mairoun te Atua.+ Kam riai ni karakaa tibwangan te utu ae bati riki kaaina ao ni kakeea tibwangan te utu ae karako riki kaaina.+ A na mena tibwangaia aomata nako n taabo ake a kaotaki n te kanikina anne. A na reke abami aika tibwangami, n aia baronga nako tamami.+

55 “‘Ma ngkana kam aki kakioianako kaain te aba anne mai mwaimi,+ ao a na riki te koraki ake kam kariaia tikuia bwa baika kammaraki ni matami ao baika kateketeke i rarikimi, ao a na karawawataingkami n te aba ae kam na maeka iai.+ 56 Ao N na karaoa nakoimi te baere I iangoia bwa N na karaoia nakoia.’”+

34 Ao e reitia ni kangai Iehova nakoni Mote: 2 “Angania tibun Iteraera kaetieti aikai: ‘Ngkana kam rinnako n te aba ae Kanaan,+ ao e na reke iroumi te aba aei bwa tibwangami, ae te aba ae Kanaan ni kaineti ma tiana nako.+

3 “‘E na moa tiami mai maiaki man rereuan Tiin n rirarikin Etom, ao e na moa tiami i maiaki mai mainiku mai tabon te Nama ae Taari.*+ 4 E na bwakeenako tiami rimaiakin te kawai n ararakea Akerabim+ ni karokoa Tiin, ao tokina boni maiakini Katetibaanea.+ Ao e na reitinako nako Aatata+ ni karokoa Atimon. 5 E na bwakeenako tian te aba i Atimon ni karokoa Mwaruan Aikubita, ao e na mena tokina i rarikin Taari.*+

6 “‘Tiami mai maeao bon Taari ae Abwabwaki* ao mataniwin te aba. E na riki aei bwa tiami mai maeao.+

7 “‘E na riki aei bwa tiami mai meang: Kam na kanikinaea tiami man Taari ae Abwabwaki ni karokoa te Maunga ae Ora. 8 Kam na kanikinaea te tia man te Maunga ae Ora ni karokoa Reboamata,*+ ao e na mena tokin te tia i Tetata.+ 9 Ao e na reitinako te tia nako Tiberon ao tokina bon Ataenan.+ E na riki aei bwa tiami mai meang.

10 “‘Ao kam riai ni kanikinaea tiami i mainiku, mai Ataenan nako Tiebam. 11 E na moa te tia mai Tiebam ni karokoa Ribera* i mainikun Ain, ao e na kaneneinako te tia anne nakon iteran Namani Kinnereta* mai mainiku.+ 12 E na reitinako te tia nakon te Ioretan ao tokina bon te Nama ae Taari.+ E na riki aei bwa abami+ ma tiana ni katobibia.’”

13 Mangaia are e tuangia tibun Iteraera ni kangai Mote: “Aio te aba ae kam na tibwatibwaia bwa abami rinanon te kanikina* mairoun te Atua,+ n aron are e tua Iehova bwa a na anganaki baronga ake ruaiwa ma te iterana. 14 A a tia n anai tibwangaia te baronga ae kaainaki irouia tibun Reuben n aia koraki mairoun tamaia, ao te baronga ae kaainaki irouia tibuni Kata n aia koraki mairoun tamaia, ao te itera ni baronga are Manate.+ 15 A a tia baronga aika uoua ao te iterana n anai tibwangaia i mainiku n aonon te Ioretan are uakaan ma Ieriko ni kaitaraa otin taai.”+

16 E reitia ni kangai Iehova nakoni Mote: 17 “Aikai araia mwaane ake a na tibwatibwaa te aba bwa abami, Ereata+ are te ibonga* ao Iotua+ are natin Nun. 18 Ao kam na anaa kaka temanna te mataniwi mani baronga nako, bwa a na tibwatibwaa te aba bwa tibwangami.+ 19 Aikai araia mwaane akanne: Kareba+ are natin Iebunne man te baronga ae Iuta,+ 20 Temuera are natin Ammiuta man te baronga ae kaainaki irouia tibun Timeon,+ 21 Eritata are natini Kitiron man te baronga ae Beniamin,+ 22 te mataniwi ae Buki are natin Iokeri man te baronga ae kaainaki irouia tibun Tan,+ 23 te mataniwi ae Anniera are natin Ebota mai buakoia tibun Ioteba,+ man te baronga ae kaainaki irouia tibuni Manate,+ 24 te mataniwi ae Kemuera are natin Tibetan man aia baronga tibun Eberaim,+ 25 te mataniwi ae Eritaban are natini Barenaka man te baronga ae kaainaki irouia tibun Teburun,+ 26 te mataniwi ae Baretiera are natin Atan man te baronga ae kaainaki irouia tibun Itakara,+ 27 te mataniwi ae Aiuta are natin Teromi man te baronga ae kaainaki irouia tibun Atera,+ 28 ao te mataniwi ae Betaeera are natin Ammiuta man te baronga ae kaainaki irouia tibun Nabetari.”+ 29 Nakanne ake e tua Iehova nakoia, bwa a na tibwatibwaa te aba nakoia tibun Iteraera n te aba ae Kanaan.+

35 E reitia ni kangai Iehova nakoni Mote, n rereuani Moaba ake a aoraoi i rarikin te Ioretan+ n uakaan ma Ieriko: 2 “Tuangia tibun Iteraera bwa a na angania tibun Rewi kaawa aika a na maeka iai man tibwangaia,+ ao a riai n angania tibun Rewi tawaana akana otabwanini kaawa akanne.+ 3 A na maeka ni kaawa akanne, ao taian tawaana i bon ibukia aia nanai ni man, aia bwai, ao aia man riki ake tabeua. 4 Abwakin taian tawaana ni kaawa akanne ake kam na angania tibun Rewi bon 1,000 te mwanokunibai,* ao e na moa man oon te kaawa ni katobibia. 5 Kam riai ni bairea 2,000 te mwanokunibai i tinanikun te kaawa n te itera are mai mainiku, 2,000 te mwanokunibai n te itera are mai maiaki, 2,000 te mwanokunibai n te itera are mai maeao, ao 2,000 te mwanokunibai n te itera are mai meang, ao te kaawa mai nuka. A na riki akanne bwa taian tawaana n aia kaawa nako.

6 “Taiani kaawa aika kam na angania tibun Rewi boni kaawa ni kamanomano aika 6,+ ae kam na anga ibukin te tia tiriaomata bwa e na birinako nako iai,+ n ikotaki ma kaawa aika 42 riki. 7 Botani mwaitini kaawa ake kam na angania tibun Rewi bon 48, n ikotaki ma aia tawaana.+ 8 Kaawa aika kam na angania boni man aia bwai tibun Iteraera.+ Kam na anaa ae bati mai buakoia te koraki ake a bati riki mwaitiia, ao kam na anaa ae karako mai buakoia te koraki ake a karako riki mwaitiia.+ A na anga tabeua mai buakon aia kaawa te koraki teuana ma teuana, nakoia tibun Rewi ni kaineti ma mwaitin tibwangaia are reke irouia.”

9 E reitia ni kangai Iehova nakoni Mote: 10 “Taetae nakoia tibun Iteraera ao tuangia ni kangai, ‘Kam a rinanon te Ioretan nakon iterana are teuana nakon te aba ae Kanaan.+ 11 Kam riai n rinei kaawa aika angaraoi iroumi bwa a na riki bwa kaawa ni kamanomano, ike e na birinako nako iai te tia tiriaomata ae kamatea te aomata* n tiaki nanona.+ 12 A na riki kaawa aikai bwa taabo ni kamanomano ibukimi mairoun te tia irantangaa te raraa,+ bwa e aonga n aki mate te tia tiriaomata ni karokoa kaetan taekana i matan te botaki n aomata.+ 13 A na kabonganaaki ibukin anne kaawa ni kamanomano aika onoua aikai aika kam katauraoi. 14 Kam na katauraoi kaawa aika tenua n iteran te Ioretan ae mai ikai,+ ao kaawa aika tenua n te aba ae Kanaan,+ bwa a na riki bwa kaawa ni kamanomano. 15 A na riki kaawa aika onoua aikai bwa taabo ni kamanomano ibukia tibun Iteraera, ibukin te aomata ae maeka n iruwa,+ ao ibukin te ianena ae maeka i buakoia. E na birinako nako iai ane e kamatea te aomata* n tiaki nanona.+

16 “‘Ma ngkana e oreia n te bwai ae karaoaki man te biti ao e mate, ao bon te tia tiritiri ngaia. E bon riai ni kamateaki te tia tiritiri.+ 17 Ao ngkana e oreia n te atibu ae e kona ni mate iai, ao e mate, ao bon te tia tiritiri ngaia. E bon riai ni kamateaki te tia tiritiri. 18 Ao ngkana e oreia n te bwai ae karaoaki man te kai ae e kona ni mate iai, ao e mate, ao bon te tia tiritiri ngaia. E bon riai ni kamateaki te tia tiritiri.

19 “‘Ao te tia irantangaa te raraa e na kamatea te tia tiritiri. E na kamatea ngkana e kaitiboo ma ngaia. 20 Ngkana e mate bwa e ineakinna ibukin ana riribai, ke e kareia n te bwai teuana ibukin nanona n iowawa ae korakora,*+ 21 ke e oreia ni baina ibukin ana riribai ao e mate, e na boni kamateaki te aomata are orea teuanne. Bon te tia tiritiri ngaia. Ao te tia irantangaa te raraa e na kamatea te tia tiritiri anne ngkana e kaitiboo ma ngaia.

22 “‘Ma ngkana bon te bwai ae aki kantaningaaki bwa e ineakina teuanne tiaki ibukin ana riribai, ao akea nanona n iowawa ae korakora* ngke e kareia n te bwai teuana,+ 23 ke ngkana e aki noria ao e kabwakaa te atibu i aona, ao tiaki ngaia te tia kairiribai ao e aki ukoukora kaikoakana, ao e mate teuanne, 24 e riai ngkanne te botaki n aomata ni karaoa te motikitaeka i marenan te aomata are orea teuanne, ao te tia irantangaa te raraa, n aron ae boraoi ma mooti aikai.+ 25 E riai ngkanne te botaki n aomata ni kamaiua te tia tiriaomata mai nanoni bain te tia irantangaa te raraa, ao a na kaokia nakon ana kaawa ni kamanomano are e birinako nako iai, ao e na maeka iai ni karokoa maten te ibonga ae rietata* are kabiraki n te bwaa ae tabu.+

26 “‘Ma ngkana e otinako te tia tiriaomata man tian ana kaawa ni kamanomano are e birinako nako iai, 27 ao te tia irantangaa te raraa e kunea teuanne i tinanikun tian ana kaawa ni kamanomano, ao e tiringa te tia tiriaomata anne, e bon aki bure ni katuturaraa. 28 Bwa e riai ni maeka n ana kaawa ni kamanomano ni karokoa maten te ibonga ae rietata. Ma e a kona n oki te tia tiriaomata nakon abana imwini maten te ibonga ae rietata.+ 29 A na riki baikai bwa kaetieti ibukimi ibukin te motikitaeka n ami roro nako, n ami tabo ni maeka ni kabane.

30 “‘Ane e tiringa te aomata* ao e riai ni kamateaki bwa te tia tiritiri,+ n aia kaotioti* taani kakoaua,+ ma akea temanna* ae e na kamateaki n ana kaotioti te tia kakoaua ae tii temanna. 31 Akea te kaboomwi ae kam riai n anaia ibukini maiun* te tia tiritiri ae bon tau ni mate, bwa e bon riai ni kamateaki.+ 32 Kam na tai anaa te kaboomwi ibukin te aomata ae birinako nakon ana kaawa ni kamanomano, ae te kaboomwi ibukini kariaiakana ni manga maeka i abana imwaini maten te ibonga ae rietata.

33 “‘Kam na tai kabarekaa te aba ae kam maeka iai, bwa e kabarekaa te aba te raraa,+ ao akea karekeani kabwaraan te bure ibukin te raraa ae katutuaki n te aba, ma tii n raraan te aomata are katutua te raraa.+ 34 Kam na tai kamwaraea te aba ae kam maeka iai, ae I maeka naba iai, bwa ngai ae Iehova I maeka i buakoia tibun Iteraera.’”+

36 Ao mataniwi n aia utu kanoani Kireata are natini Makira+ are natini Manate, man aia utu nako natin Ioteba, a kawara Mote ao a taetae i matana ao i mataia mataniwi, ake mataniwia aia utu tibun Iteraera. 2 A taku: “E tua nakoim Iehova ngkoe ae ara toka bwa ko na tibwatibwaa te aba ni kaineti ma te kanikina* mairoun te Atua,+ bwa tibwangaia tibun Iteraera. Ao e tua Iehova nakon ara toka bwa e na anga tibwangan Terobeata are tarira, nakoia natina aine.+ 3 Ngkana a mare ma mwaane man aia baronga riki tibun Iteraera teuana, e na kanakoaki naba tibwangaia aine aikai mai buakon tibwangaia tamara ao e na ikotaki ma tibwangan te baronga are a na mareaki nako iai, n te aro are e na anaaki man tibwangara are reke iroura n te kanikina mairoun te Atua. 4 Ao ngkana e a roko te Ririki n Inaomata*+ ibukia tibun Iteraera, e na ikotaki naba tibwangaia aine aikai ma tibwangan te baronga are a na mareaki nako iai, n te aro are e na anaaki tibwangaia man tibwangan aia baronga tamara.”

5 E tua ngkanne ni kangai Mote nakoia tibun Iteraera, ni kaineti ma are e tua Iehova: “E eti are a taekinna kaain te baronga ake tibun Ioteba. 6 Aio te taeka ae e tua Iehova ibukia natin Terobeata ake aine: ‘A kona ni mare ma are a bon tangiria. Ma a riai ni mare ma te aomata ae kaain te utu man ana baronga tamaia. 7 Akea tibwangaia tibun Iteraera ae riai n nako man te baronga teuana nakon te baronga teuana, bwa a riai tibun Iteraera n taui tibwangan aia baronga aia bakatibu. 8 Ao a riai naati aine nako ake iai tibwangaia i buakon aia baronga tibun Iteraera, ni buuna te aomata ae kanoan aia baronga tamaia,+ bwa a aonga n teimatoa tibun Iteraera ni bwaibwai n tibwangaia aia bakatibu. 9 Akea te tibwanga ae riai n nako man te baronga teuana nakon te baronga teuana, bwa a riai aia baronga tibun Iteraera n taui oin tibwangaia.’”

10 A karaoa are e tua Iehova nakoni Mote natin Terobeata ake aine.+ 11 Mangaia are a mare Maara, Tireta, Okera, Mireka, ao Noa, ake natin Terobeata aine,+ ma natiia tarin nako tamaia. 12 A riki bwa buuia mwaane ake mai buakoia ana utu Manate are natin Ioteba, bwa e aonga n tiku tibwangaia n ana baronga tamaia.

13 Aikai tuua ma mooti ake e anga Iehova nakoia tibun Iteraera rinanoni Mote, n rereuani Moaba ake a aoraoi i rarikin te Ioretan n uakaan ma Ieriko.+