Avril

A pou nou gen lafwa annan ranson-an pou nou gen lavi pou tout-tan (Éph. 1:7). Pannan Répa Sényèr-a nou ka fè chak lannen, sa-ya ki annan « ròt brébi »-ya pa ka ni manjé dipen-an ni bwè diven-an é yé pa divèt fè l’ (Jean 10:16). Magré sa, lachè ké disan Jézi ka pèrmèt sa moun-yan trapé bénédiksyon si yé ka montré ki yé gen lafwa annan sakrifis Jézi (Jean 6:53). Sèl moun ki ka manjé dipen-an é ki ka bwè diven-an, a sa-ya ki annan nouvo alyans-a é ki ké fè parti di rwayonm-an ki annan syèl-a. Donk, ki nou ka fè parti di wen-yan, ki nou ka fè parti di ròt brébi-ya, nou blijé gen lafwa pou nou gen lavi pou tout-tan. w24.12 12 § 14 ; 13 § 16.

Pannan Répa Sényèr-a, Jézi bay so apot dipen san lèlven é i byen di yé ki sa dipen-an té ka réprézanté so kò. Apré sa, i bay yé bwè diven é i di yé ki sa diven-an té ka réprézanté « disan alyans »-a (Marc 14:22-25 ; Luc 22:20 ; 1 Cor. 11:24). I ka fè sa nouvo alyans-a ké ‘pèp Israyèl [èspirityèl-a]’ ki ké fè parti di « Rwayonm Bondjé-a » (Héb. 8:6, 10 ; 9:15). Sa Jézi di pannan Répa Sényèr-a, a té pou « piti troupo »-a. Prémyé moun ki fè parti di sa group-a, a so apot ki té fidèl é ki té la ké li sa jou-a. A pou yé Jézi préparé roun plas òbò li annan syèl-a. w24.12 11 § 9-10.

Yé trayi Jézi, yé arété l’, yé jouré l’, yé manti asou l’, yé di i té koupab é yé malmennen l’. Plizyèr sòlda mennen l’ koté yé té ké tchwé l’ é yé mété l’ asou roun poto. Toupannan i té ka sipòrté sa soufrans-ya, i té gen roun moun ki té ka soufri ankò plis, a té Jéova. Jéova té pouvé fè roun bagaj pou arété sa. Mé i tchenbé so kò, i pa fè anyen. Poukisa ? Pas Jéova kontan nou. Sakrifis Jézi-a, a pi bèl prèv ki ka montré kouman Jéova kontan to. To Bondjé bay so Pitit pou tiré to anba péché-a ké lanmò, menmsi i té savé ki a pa ti soufri i té ké soufri ! (1 Jean 4:9, 10). I vréman lé idé nou chak briga ké péché-a épi ganyen ! w24.08 6 § 13-14.

Nou ké pi byen konprann fòrs lanmou Jéova gen pou nou si nou ka réfléchi asou kouman i soufri lò i wè yé malmennen so Pitit. Satan ka di ki pyès sèrvitèr Bondjé pa ké rété li fidèl anba éprèv. Pou montré ki a pa vré, Jéova pèrmèt so Pitit soufri anvan i mouri (Job 2:1-5). I wè chèf rélijyé-ya ari di li, i wè plizyèr sòlda bay li kout fwèt jiktan i senyen é i wè yé maré l’ asou roun poto. Apré sa, i wè li soufri jiktan i mouri (Mat. 27:28-31, 39). Si i té lé, i té pouvé fè moun arété fè so Pitit soufri lanmenm (Mat. 27:42, 43). Mé, si i té fè roun bagaj, i pa té ké gen ranson é jòdla nou pa té ké gen pyès èspwar. Donk, i lésé so Pitit soufri jiktan i mouri. w25.01 22 § 7.

Nou annan lannen 33 di nou lépòk, jou 16 nizan-an. Disip Jézi-ya tris toubonnman é yé pè. Dé annan yé ka soti Jérizalèm pou alé Émayis. Roun mouché yé pa konnèt ka vin bò d’ yé é i ka koumansé maché ansanm ké yé. Disip-ya ka rakonté l’ sa ki rivé Jézi é yé ka di l’ kouman yé yèg. Mouché-a ka koumansé kozé ké yé é sa kozé-a, yé pa ké janmen bliyé l’. « I koumansé ké Moyiz ké tout profèt-ya » é i èspliké yé poukisa Mési-a té divèt soufri épi mouri. Lò yé ka rivé Émayis, mouché-a ka di yé kimoun i sa : yé ka konprann ki sa mouché-a, a Jézi Bondjé résisité ! (Luc 24:13-35). Jézi rété 40 jou asou latè-a anvan i routounen annan syèl-a é i parèt douvan so disip plizyèr fwa pannan sa 40 jou-ya. So disip té tris é yé té pè, mé aprézan, yé tchò té kontan é yé té gen kouraj pou préché ké ansényé bon nouvèl Rwayonm-an. w24.10 12 § 1-3.

Piti piti, nou tout ka vin gran san nou pa bézwen fè anyen. Parkont, annan domenn èspirityèl-a, pyès moun pa ka vin gran konsa. Parèkzanp, frè ké sò-ya ki té Korent té asèpté bon nouvèl-a, yé té batizé, yé té rousouvwè lèspri sen-an é yé té anprann roun patché bagaj grasa sa Pòl té anprann yé (Actes 18:8-11). Mé déztrwa lannen apré yé batizé, roun patché annan yé té ka tété toujou (1 Cor. 3:2). Pou nou divini roun moun ki djòk, a pou nou anvi divini roun moun konsa. Sa-ya ki simyé rété dé timoun annan domenn èspirityèl-a paské yé « pa konnèt anyen » é ki yé « kontan rété konsa », yé pa ké rivé pyès koté (Prov. 1:22). Nou pa lé sanblé ké sa-ya ki ka konté asou yé papa ké yé manman pou yé pran désizyon a yé plas. Nou pito lé pran nou rèsponsabilité épi vin gran annan domenn èspirityèl-a. Si to lé divini roun moun ki djòk, doumandé Jéova bay to « anvi aji é anmenmtan fòrs pou aji » (Phil. 2:13). w24.04 4 § 9-10.

Jéova ka di nou sa i ka rousanti lò i ka jijé moun-yan (Ézéch. 33:11). Jéova pa ké détrwi roun moun pou tout-tan sòf si i gen roun bon rézon pou fè l’. I plen ké mizérikòrd, donk, i ka aji ké mizérikòrd chak fwa sa posib. Ès nou savé si sèrten moun pa ké résisité ? Wi, mé Labib ka bay non déztrwa moun rounso. Jézi di ki Jida Iskaryòt pa té ka mérité Bondjé résisité l’ (Marc 14:21 ; gadé osi Jean 17:12 ké nòt pou étidyé pou sa vèrsé-a). Jida viré do bay Jéova ké so Pitit, é i té byen savé sa i té ka fè (gadé Marc 3:29 ké nòt pou étidyé pou sa vèrsé-a). Anplis di sa, Jézi di ki roun ran chèf rélijyé ki té éséyé baré so chimen té ké mouri é yé pa té ké gen pyès èspwar rouviv (Mat. 23:33 ; gadé Jean 19:11 ké nòt pou étidyé « l’homme » pou sa vèrsé-a). É Pòl èspliké ki Bondjé pa ké résisité apòsta-ya ki pa ka répanti (Héb. 6:4-8 ; 10:29). w24.05 4 § 10-11.

Si nou ka rété pròch di Jéova, Satan pa ké pouvé fè nou pyès bagaj Jéova pa pouvé ranjé (1 Jean 3:8). É annan monn nouvo-a, Jéova ké kontinyé protéjé so zanmi ki fidèl kont tousa ki pouvé gaté yé lanmityé ké li é kont lanmò-a osi (Rév. 21:4). Jéova ka envité nou, é a roun gran lònò. Nou pouvé gen roun lanmityé ki fò ké li pou tout-an ! (Ézéch. 37:27). Mé kisa nou divèt fè si nou lé rété annan so tant ? Lò to envité koté roun moun, to lé savé sa sa moun-an lé ouben sa i pa lé to fè annan so kaz. Menm fason-an, nou lé savé sa Jéova lé ké sa i pa lé so envité fè. Nou lanmou pou li ka pousé nou fè tousa nou pouvé pou nou « fè li plézi » (Col. 1:10). Annou pa janmen bliyé kimoun i sa é annou toujou gen bokou rèspè pou li. Sa ké anpéché nou fè bagaj ki pa ka fè l’ plézi. Wi, annou ‘maché ké nou Bondjé toupannan nou ka rékonnèt nou limit’ ! (Mich. 6:8). w24.06 4 § 8-9.

Jéova doumandé Abraam sakrifyé so pitit Izaak. A pa ti rèd sa té divèt rèd pou Abraam, mé i obéyi so Bondjé. Lò Abraam té paré pou tchwé so pitit, Jéova anpéché li fè sa. Èkzanp Abraam té ké anprann tout sa ki té ké gen lafwa roun bagaj enpòrtan : tèlman Jéova kontan moun-yan, i té ké paré sakrifyé so Pitit i kontan-an ! (Gen. 22:1-18). Roun patché lannen pita, annan Lalwa i bay Israyélit-ya, Bondjé doumandé yé fè roun patché sakrifis pou pardonnen yé péché (Lév. 4:27-29 ; 17:11). Sa sakrifis-ya té ka montré ki Jéova té ké bay roun sakrifis ki té ké miyò. Sa sakrifis-a té ké tiré moun-yan anba péché-a. Bondjé fè sèrten profèt èspliké ki désandans i té promèt-a (pita moun vin konprann ki a té Pitit Bondjé-a menm) té ké soufri épi yé té ké tchwé l’ pou libéré moun-yan di péché ké lanmò-a. É to menm osi, to annan ! (Is. 53:1-12). w24.08 4 § 7-8.

Lò to ka li Labib, réfléchi asou kouman to pouvé fè sa to ka anprann. Doumandé to kò : « Kouman mo pouvé sèrvi sa mo anprann, jòdla ouben pita ? » Parèkzanp, imajiné to fin li 1 Thessaloniciens 5:17, 18. To pouvé doumandé to kò si to ka priyè souvan épi ké tout to tchò. To pouvé réfléchi osi asou sa ki ka bay to anvi di Bondjé mèrsi. É pitèt to pouvé désidé di l’ mèrsi pou trwa bagaj èspésyalman. Menmsi to ka pran déztrwa minit sèlman pou réfléchi asou sa Labib ka anprann to, sa ké idé to konprann épi fè sa Paròl Bondjé-a ka di. Épi réfléchi asou bénédiksyon to ké jwenn si to ka fè sa touléjou ! Ké tan-an, to ké sèrvi Jéova pi byen ! w24.09 4-5 § 9-10.

Jéova fè nou roun fason èspésyal. Nou kontan rousouvwè, mé nou tchò ankò pi kontan lò nou ka bay. Lò nou ka idé nou frè ké sò-ya, nou tchò kontan. Nou kontan lò yé ka di nou mèrsi. Mé ki yé ka di nou mèrsi, ki yé pa ka di nou mèrsi, nou kontan paské nou fè sa nou té divèt fè. Annou pa janmen bliyé ki kèlkéswa sa nou ka bay, ‘Jéova pouvé bay nou lontan plis ki sa’ (2 Chron. 25:9). Nou pa ké janmen pouvé bay plis pasé li. É lò a Jéova li menm ki ka rékonpansé nou, i pa gen anyen ki pi bèl pasé sa. Donk, annou toujou byen désidé fè kou nou Papa ki annan syèl-a ki kontan bay ! w24.09 31 § 20-21.

Jéova gen pityé pou nou, i lé pardonnen nou é i ka pran nou lapenn (Ps. 103:13 ; Is. 49:15). Lò nou ka soufri, i ka soufri li menm osi (Zach. 2:8). I ka idé nou vini òbò li épi divini so zanmi (Ps. 25:14 ; Actes 17:27). I ka fè so kò toupiti ; « i ka bésé pou gadé syèl-a ké latè-a, é sa-la ki toupiti, i ka fè l’ soti annan lapousyè » (Ps. 113:6, 7). Tout sa bèl kalité-ya ka bay nou anvi bay nou Bondjé laglwar ! Nou ka bay Jéova laglwar paské nou lé tout moun konnèt li. I gen roun patché moun ki pa konnèt lavérité asou Jéova. Poukisa ? Paské Satan ka vèrglé yé, i ka manti asou li (2 Cor. 4:4). I ka fè yé krè ki Jéova sa roun Bondjé ki ka vanjé so kò, ki rèd é ki a li ka fè nou soufri. Mé nou menm, nou savé sa pa vré ! Atò, nou pouvé fè moun konnèt lavérité asou Bondjé épi konsa bay li laglwar ! (Is. 43:10). w25.01 3 § 6-7.

Annan 1^é syèk-a, menmsi Pitit Bondjé-a té parfè é i té ka fè mirak, sa-ya ki té ka maché ké Satan di manti asou manti asou li. Parèkzanp, chèf rélijyé-ya té ka di pèp-a ki si Jézi té ka rivé tiré démon-yan, a té grasa « chèf démon-yan » (Marc 3:22). É lò yé jijé l’, yé di ki i té ka dérèspèkté Bondjé. É yé fè moun-yan doumandé yé tchwé l’ (Mat. 27:20). Pita, toupannan disip-ya té ka préché bon nouvèl-a, yé lèlmi ‘fè moun lévé faché kont yé é yé fè yé’ pèrsékité yé (Actes 14:2, 19). Men sa La Tour de Garde 1^é désanm 1998 ka di asou Actes 14:2 : « Non sèlman Jwif-ya ki pa té dakò pa té lé kouté mésaj-a, mé anplis di sa, yé koumansé sali répitasyon krétyen-yan pou éséyé monté moun-yan ki pa té jwif kont krétyen-yan. » Jòdla, Satan ka kontinyé manti. I « ka bloublou tout moun asou latè-a ». w24.04 11 § 15-16.

Bondjé pa ka gadé kitan roun moun ka mouri pou désidé si sa moun-an ké viv pou tout-tan. Jéova sa roun jij ki parfè ; lò i ka désidé roun bagaj, i toujou jis (Ps. 33:4, 5). Nou pouvé sir ki « Jij tout latè-a » ké fè sa ki jis. Nou pouvé di osi ki Bondjé pa ka gadé koté roun moun ka rété pou désidé si sa moun-an ké viv pou tout-tan. Jéova pa ké janmen di ki roun moun sa roun « kabrit » sèlman pas i ka rété roun koté yé pa janmen bay li posibilité tandé mésaj Rwayonm-an (Mat. 25:46). Jij tout latè-a ki jis ka gadé pou sa moun-yan plis pasé nou menm nou pa ké janmen pouvé fè l’. Nou pa savé kouman Jéova ké dirijé bagaj-ya pannan gran tribilasyon-an. Pitèt roun ran annan sa moun-yan ké pouvé anprann konnèt Jéova, mété yé lafwa annan li, épi pran parti pou li lò i ké fè tout moun asou tout latè-a savé kimoun i sa (Ézéch. 38:16). w24.05 12 § 14-15.

Sèrvitèr Jéova-ya ka pran plézi idé yé konpanyen (2 Cor. 8:4). Mé détan, pou fè sa, a pou yé gen kouraj. Parèkzanp, lò lagèr ka pété, ansyen-yan savé ki frè ké sò-ya ké bézwen ankourajman. Yé ké bézwen yé soutni yé, é pitèt sa ké rèd pou yé trapé manjé èspirityèl ouben sa yé bézwen pou yé viv. Paské yé kontan brébi-ya, détan, ansyen-yan ka riské yé lavi pou idé yé. Annan sa kalité sitiasyon-yan, sa enpòrtan di rété ansanm ansanm. Donk, byen swiv sa filyal-a ka di to fè (Héb. 13:17). A toulong, ansyen-yan divèt rouwè sa pou fè si i gen roun katastròf annan yé koté, ké sa òrganizasyon-an ka di osi asou sa pou fè lò roun katastròf tou pròch rivé (1 Cor. 14:33, 40). A pou to gen kouraj, mé a pou to panga (Prov. 22:3). Byen réfléchi anvan to fè roun bagaj. Pa riské to lavi pou anyen. Fè Jéova konfyans. I pouvé idé to idé to frè ké sò san to pa mété to kò an danjé. w24.07 4 § 8 ; 5 § 11.

Rwa David té konnèt Jéova é i té ka konté asou li. Lò rwa Sayil ké ròt moun té ka éséyé tchwé l’, David doumandé Jéova idé l’. Bondjé réponn so lapriyè, i sové l’. David di : « Jéova vivan ! » (Ps. 18:46). Lò i di sa, a pa té jis pou di ki Bondjé ka èkzisté. Roun liv ka di ki David té ka byen montré ki Jéova sa vré Bondjé-a, sa-la ki ké toujou idé so sèrvitèr-ya. Grasa so èspéryans, David té savé ki so Bondjé té « vivan », é kou i té sir di sa, i té ankò pi désidé adoré l’ épi louwé l’ (Ps. 18:28, 29, 49). Si nou sir ki Jéova sa Bondjé ki vivan-an, nou ké anvi adoré l’ ké balan. Grasa sa, nou ké gen fòrs pou tchenbé anba éprèv-ya, nou ké anvi fè tousa nou pouvé pou travay pou li é nou ké byen désidé rété pròch di li. w24.06 20-21 § 3-4.

Kisa nou pouvé anprann di sa apot Pòl di Tésalonisyen-yan ? Lò nou ka tandé palé di roun bagaj ki pa k’alé ké sa nou anprann annan Labib ouben roun bagaj ki ka choké nou, annou pran tan byen réfléchi. Roun jou, annan ex-Union soviétique-a, nou lèlmi bay frè-ya roun lèt ki té ka vini di syèj mondyal-a swadizan é ki té ka ankourajé frè-ya séparé yé kò di òrganizasyon-an pou fè yépa òrganizasyon. Yé té ké di ki sa lèt-a té ka vini di Kolèj santral-a vré, mé yé pa rivé bloublou frè-ya paské sa sa lèt-a té ka di pa té k’alé ké sa yé té anprann. Jòdla, détan, moun ki kont lavérité-a ka sèrvi bagaj kou Entèrnèt ké rézo sosyal-ya pou éséyé bloublou nou ouben séparé nou. Pasé nou lésé yé ‘anpéché nou byen réfléchi’, annou protéjé nou kò, annou réfléchi pou wè si sa nou ka tandé ouben sa nou ka li ka alé ké lavérité nou konnèt (2 Thess. 2:2 ; 1 Jean 4:1). w24.07 12 § 14-15.

Désizyon pi enpòrtan roun moun pouvé pran, a bay Jéova so lavi épi fè parti di so fanmi. A sa Jéova lé tout moun fè. Poukisa ? Pas i lé yé divini so zanmi é yé viv pou tout-tan (Deut. 30:19, 20 ; Gal. 6:7, 8). Mé, Jéova pa ka fòrsé pyès moun adoré l’. I ka lésé chak moun désidé sa i ké fè. Atò, kisa ansyen-yan divèt fè lò roun krétyen ka fè roun péché ki grav ? Si i pa ka répanti, yé divèt tiré l’ annan asanblé-a (1 Cor. 5:13). Mé, menm annan sa sitiasyon-an, Jéova vréman lé sa moun-an rouvini òbò li. A pou sa Jéova bay ranson-an : pou i pouvé pardonnen sa-ya ki fè roun péché ki grav, mé ki ka répanti. Nou Bondjé ki kontan nou ka doumandé sa-ya ki fè roun péché ki grav répanti é i ka fè l’ ké bokou lanmou (Zach. 1:3 ; Rom. 2:4 ; Jacq. 4:8). w24.08 14 § 1-2.

Lò apot Jan ékri so trwazyèm lèt, moun té ka ansényé bagaj ki pa té vré é té ka mété dézòrd annan asanblé-a. Mé roun ran krétyen té ka kontinyé « maché annan lavérité-a ». Yé té ka obéyi Jéova é yé té ka « kontinyé obéyi so koumannman » (2 Jean 4, 6). Jan té kontan é Jéova té kontan osi (Prov. 27:11). Kisa nou pouvé anprann ? Lò nou ka rété fidèl ké Jéova nou tchò kontan é nou ka fè tchò ròt moun kontan osi (1 Jean 5:3). Parèkzanp, nou kontan paské nou savé ki nou ka fè tchò Jéova kontan. Jéova li menm kontan lò i ka wè ki nou pa ka tonbé annan tantasyon sa monn-an é ki nou ka asèpté lavérité. É ròt moun annan syèl-a kontan osi (Luc 15:10). Nou osi nou pouvé kontan lò nou ka wè nou frè ké sò ki ka rété fidèl (2 Thess. 1:4). Épi apré lagèr Armagédon, nou ké kontan pas nou montré ki nou té fidèl menm annan roun monn Satan té ka dirijé. w24.11 12 § 17-18.

Konmyen tan to divèt gadé kouman roun moun fika anvan to alé di l’ ki to lé konnèt li pi byen ? Si to k’alé wè moun-an tro bònò, pitèt i ké pansé ki to sa roun moun ki pa ka réfléchi anvan i pran roun désizyon (Prov. 29:20). Mé si to ka pran tròp tan, pitèt moun-an ké pansé ki to ka ézité tròp anvan to pran roun désizyon, èspésyalman si i ja wè ki to ka djété l’ (Eccl. 11:4). Pa bliyé ki to pa bézwen sir ki to ké maryé ké moun-an anvan to alé wè l’. Parkont to divèt sir ki to paré pou to maryé é ki moun-an ké pouvé sa roun bon mouché ouben roun bon madanm pou to. É si aprézan to ka wè ki roun moun té ké lé konnèt to pi byen, mé ki to menm, to pa lé ? A pou sa to ka di ké sa to ka fè byen montré l’ ki to pa lé frékanté l’. Pa fè moun-an krè ki pitèt to ké asèpté koumansé frékanté l’ si a pa vré. Sa pa té ké janti (Éph. 4:25). w24.05 23 § 9-10.

A sèlman krétyen-yan ki vréman wen é ki ké rété fidèl Jézi ké « pran », sa lé di i ké rousouvwè annan Rwayonm-an ki annan syèl-a. Si roun krétyen wen pa ka panga, i pa ké annan sa-ya yé ké « chwazi » lò yé ké rasanblé yé (Mat. 24:31). É tout sa-ya ki gen èspwar viv asou latè-a divèt pran sa Jézi di kou roun avèrtisman épi rété fidèl é kontinyé véyé. Nou ki byen konnèt Jéova, nou sir ki i toujou ka fè sa ki jis. Si sa lannen-yan ki fin pasé, Jéova chwazi roun ran krétyen fidèl pou yé divini wen, nou pa enkyèt pou sa. Nou ka sonjé èkzanp plantasyon rézen Jézi pran-an é sa i di asou ouvriyé-ya ki rivé bò d’ senkèr di laprémidi (Mat. 20:1-16). Ouvriyé-ya yé envité vin travay annan plantasyon rézen-an pita annan lajournen-an rousouvwè menm soumaké ki sa-ya ki té koumansé travay bònò. Menm fason-an, kèlkéswa moman Bondjé ka chwazi krétyen wen-yan, si Bondjé ka di ki yé fidèl, rékonpans yé ké gen, a lavi annan syèl-a. w24.09 24 § 15-17.

Jézi montré nou pi bon fason pou nou réyaji lò moun ka fè nou wè mizè. Roun patché moun fè l’ méchansté, menm so fanmi té annan sa. Yé di ki i té vin fou ; chèf rélijyé-ya di ki i té ka travay ké démon-yan ; é plizyèr sòlda romen ari di so tèt, fè l’ patché méchansté épi tchwé l’ (Marc 3:21, 22 ; 14:55 ; 15:16-20, 35-37). Pourtan, i sipòrté tout sa kalité mové bagaj-ya san i pa janmen vanjé so kò. Kisa so èkzanp pouvé anprann nou ? (1 Pierre 2:21-23). Jézi ka bay nou roun èkzanp ki parfè. I té savé kitan i té divèt fronmen so bouch épi kitan i té divèt palé (Mat. 26:62-64). Détan, lò moun té ka manti asou li, i té ka désidé pa di anyen (Mat. 11:19). Lò i té ka désidé palé, i pa té ka jouré sa-ya ki té ka pèrsékité l’ é i pa té ka ménasé yé. w24.11 4-5 § 9-10.

Imajiné to ka bay roun moun roun bèl kado, roun kado ki ké itil pou li. To pa té ké kontan wè moun-an yenki mété to kado annan roun kwen épi bliyé l’ ! Parkont, si i ka sèrvi to kado é si i ka montré to so rékonésans pou sa kado-a, sa ké fè to plézi. Kisa sa èkzanp-a ka anprann nou ? Jéova bay so Pitit pou nou. So tchò kontan lò nou ka montré nou rékonésans pou ranson-an é pou lanmou ki fè l’ bay nou sa bèl kado-a ! (Jean 3:16 ; Rom. 5:7, 8). Mé, ké tan-an, ranson-an pouvé gen mwens valò pou nou kousidiré nou té ka mété sa kado Bondjé bay nou-a annan roun kwen. Menmsi nou byen kontan gen l’, pitèt nou pa ké sonjé l’ ankò. Pou sa pa rivé nou, a pou nou chaché gen toujou plis rékonésans pou sa Jéova ké Jézi fè pou nou. w25.01 26 § 1-2.

Roun frè ki gen kalité èspirityèl-ya roun ansyen divèt gen « pa [...] sa roun moun ki fin batizé ». Menmsi to pa blijé batizé dipi roun patché lannen pou to divini ansyen, sa ka pran tan pou to fè to lanmityé ké Jéova vin pi fò é pou to sèrvi sa ki annan Labib pou to pran bon désizyon. Anvan to divini ansyen, to divèt montré ki, kou Jézi, to ka fè to kò toupiti é to ka pran pasyans, to ka antann Jéova bay to roun rèsponsabilité annan asanblé-a (Mat. 20:23 ; Phil. 2:5-8). Anplis di sa, si to ka kontinyé kouté sa Jéova ka di annan Labib é si to ka swiv sa so òrganizasyon ka di, to ké montré ki to « fidèl ». Labib ka byen di ki roun ansyen divèt « konnèt ansényé ». Ès sa lé di ki to divèt sa roun mèt dòkò annan zafè fè diskour ? Non. Menmsi roun patché ansyen pa dòkò annan zafè fè diskour, yé ka byen ansényé ròt-ya lò yé ka préché é lò yé ka ankourajé yé frè ké sò. w24.11 23-24 § 14-15.

Lò to ka tonbé asou roun vèrsé annan Labib ki to pa ka byen konprann, fè réchèrch. Épi pannan tout lajournen, réfléchi asou sa to étidyé é asou sa sa ka anprann to asou Jéova, so Pitit ké lanmou yé gen pou to (Ps. 119:97). Si to pa ka trouvé pyès nouvo bagaj ouben pyès bagaj entérésan chak fwa to ka étidyé ouben to ka fè réchèrch, pa dékourajé. To kou moun ka chaché lò ké roun baté. Moun ki ka chaché lò divèt gen bokou pasyans. Détan, yé ka travay lontan, plizyèr jou menm, anvan yé trapé rounsèl ti pépit. Mé yé pa ka lésé tonbé paské menm roun ti moso lò gen bokou valò. Enben, pou nou, chak pépit èspirityèl gen plis valò pasé lò ! (Prov. 8:10). Atò, a pou to gen pasyans é a pou to swiv program to fè pou li Labib-a (Ps. 1:2). w25.01 25 § 14-15.

Jéova lé nou paré pou pardonnen sa-ya ki fè nou mal (Ps. 86:5 ; Luc 17:4 ; Éph. 4:32). Sa roun moun ka di ouben ka fè pouvé fè nou lapenn bokou, èspésyalman si a roun bon zanmi ouben moun nou fanmi (Ps. 55:12-14). Détan, tèlman nou tchò ka fè nou mal, a kousidiré yé té bay nou roun kout kouto (Prov. 12:18). Pitèt to ké fè kousidiré sa pa ka fè to anyen, mé si to ka fè sa, a kousidiré to ka lésé kouto-a annan to lachè. Nou pa pouvé krè ki sa nou ka rousanti ké yenki disparèt konsa si nou pa ka rékonnèt ki nou ka soufri toujou akoz di sa moun-an fè nou. Détan, lò roun moun ka fè nou mal, prémyé bagaj nou ka fè, a lévé faché. Labib ka di ki sa pouvé rivé nou, mé i ka di nou osi pa rété kòlè (Ps. 4:4 ; Éph. 4:26). Poukisa ? Paské lò nou kòlè, a pa bon bagaj sa ka bay (Jacq. 1:20). Pa jen bliyé : roun moun pouvé fè nou kòlè anba kou-a. Mé si nou ka rété kòlè, a chwazi nou chwazi rété kòlè. w25.02 15 § 4-6.

Jézi sèrvi roun èkzanp pou èspliké ki roun moun ki ka chaché gen bokou soumaké san i pa « rich pou Bondjé », sòt (Luc 12:16-21). Nou pa savé sa ki pouvé rivé nou dimen (Prov. 23:4, 5 ; Jacq. 4:13-15). Anplis di sa, nou ka jwenn problèm pas nou disip Kris. Jézi di ki si nou lé divini so disip, nou divèt paré « lésé » tousa nou gen (Luc 14:33). A sa ki rivé krétyen-yan ki té ka rété Jidé annan 1^é syèk-a. Yé tchò té kontan menmsi yé té pédi tout yé bagaj (Héb. 10:34). É jòdla, roun patché frè ké sò pédi yé travay paské yé pa té lé soutni roun parti politik (Rév. 13:16, 17). Kisa ki bay yé fòrs pou yé fè sa ? Yé té ka fè sa promès Jéova-a konfyans : « Mo pa ké jen lésé to, é mo pa ké jen lagé to » (Héb. 13:5). Donk, annou fè sa nou pouvé pou nou gen sa nou bézwen lò nou ké pi vyé, mé si roun bagaj nou pa té prévwè ka sirprann nou, annou fè Jéova konfyans. w25.03 29 § 13-14.

Jéova pa ka doumandé nou vin djòk ké nou pròp fòrs rounso. Annan asanblé krétyen-an, i gen frè ki bèrjé ké ansényan. Yé rousouvwè roun fòrmasyon pou idé nou « vin gran » annan domenn èspirityèl-a, é pou idé nou rivé « annan menm ran ké Kris, pou nou vin antchè kou li menm » (Éph. 4:11-13). Jéova ka bay nou so lèspri sen osi pou nou gen « mantalité Kris-a » (1 Cor. 2:14-16). Pou fini, i fè moun ékri kat Évanjil pou fè nou savé kouman Jézi réfléchi, sa i ansényé épi sa i fè lò i té asou latè-a. Si to ka fè tousa to pouvé pou to réfléchi é pou to aji kou Jézi, to ké rivé divini roun krétyen ki djòk. Mé pou nou divini dé krétyen ki djòk, nou divèt anprann plis ki « ansèyman enpòrtan-yan asou Kris », sa lé di prémyé bagaj-ya nou ka anprann asou Kris. w24.04 4-5 § 11-12.

Nou gen désizyon pou nou pran touléjou. Roun ran désizyon fasil pou pran. Parèkzanp, nou pa ka réfléchi lontan pou désidé kisa nou ké tchenbétchò ouben ki lèr nou ké alé dronmi. Mé i gen ròt désizyon ki pi difisil pou pran. Parèkzanp, lò a nou lasanté, nou fanmi ké nou zanmi, sa ki pouvé fè nou tchò kontan ouben fason nou ka adoré Jéova. Nou lé pran désizyon ki ké bon pou nou ké nou fanmi. Mé pi enpòrtan-an, nou lé nou désizyon fè Jéova plézi (Rom. 12:1, 2). Pou pran roun bon désizyon, prémyé bagaj nou divèt fè, a chaché gen tout enfòrmasyon nou bézwen. Poukisa sa enpòrtan ? Annou pran roun èkzanp : Roun moun gen roun gro problèm santé é i k’alé wè roun dòktèr. Ès dòktèr-a ké di li ki rémèd pou i pran san i pa menm ni gadé li ni pozé li pyès késyon ? Awa. I pa ké jen fè sa. To menm osi, to ké pran pi bon désizyon si to ka chaché savé tousa to bézwen savé parapòrta désizyon to gen pou pran-an. w25.01 14 § 1-3.

Jéova plen ké mizérikòrd, é « i pa lé rounsèl moun mouri » (2 Pierre 3:9). Kisa ka montré nou sa ? Gadé kouman i aji ké mizérikòrd ké roun ran moun ki té fè péché ki té grav. Rwa David, parèkzanp, fè roun adiltèr é i tchwé roun moun. Mé kou i répanti, Jéova pardonnen l’ (2 Sam. 12:1-12). Kanta rwa Manasé li menm, i fè mové bagaj pannan près tout so lavi. Pourtan, menm annan sa sitiasyon-an ki té grav menm, Jéova aji ké mizérikòrd ké li é i pardonnen l’ paské i répanti (2 Chron. 33:9-16). Sa èkzanp-ya ka fè nou sonjé ki Jéova ka aji ké mizérikòrd chak fwa i gen roun bon rézon pou i fè l’. Donk, i ké résisité sa-ya ki ka konprann ki péché yé fè té grav é ki ka répanti. w24.05 4 § 12.